༡༠. ཚ་ནྡཾ་ཨ་ད་ཏྭཱ་ག་མ་ན་སི་ཀྑཱ་པ་ད་ཝ་ཎྞ་ནཱ

ད་ས་མེ ཝི་ནི་ཙྪ་ཡ་ཀ་ཐཱ་ཡཱཏི ཡཱ་ཝ ཨཱ་རོ་ཙི་ཏཾ ཝ་ཏྠུ ཨ་ཝི་ནི་ཙྪི་ཀཾ, ཉ་ཏྟིཾ ཝཱ ཋ་པེ་ཏྭཱ ཀ་མྨ་ཝཱ་ཙཱ ཨ་ནི་ཊྛཱ་པི་ཏཱ, ཏཱ་ཝ ཝི་ནི་ཙྪ་ཡ་ཀ་ཐཱ ཝ་ཏྟ་མཱ་ནཱ ནཱ་མ ཧོ་ཏི. ཡོ བྷི་ཀྑུ ཨེ་ཏ་སྨིཾ ཨ་ནྟ་རེ ཀ་མྨཾ ཀོ་པེ་ཏུ་ཀཱ་མ་ཏཱ་ཡ པ་རི་སཱ་ཡ ཧ་ཏྠ་པཱ་སཾ ཝི་ཛ་ཧ་ཏི, ཏ་སྶ ཝི་ཛ་ཧ་ནེ དུ་ཀྐ་ཊཾ, ཝི་ཛ་ཧི་ཏེ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ ཚ་ནྡཾ ཨ་ད་ཏྭཱ པ་ཀྐ་མ་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, དྷ་མྨ་ཀ་མྨེ ཝེ་མ་ཏི་ཀ་སྶ, ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙི་ནོ, ཝེ་མ་ཏི་ཀ་སྶ ཙ དུ་ཀྐ་ཊཾ. ཨ་དྷ་མྨ་ཀ་མྨ་ས་ཉྙི་སྶ པ་ན, ཡོ ཙ ‘‘ས་ངྒྷ་སྶ བྷ་ཎྜ་ནཱ་དཱི་ནི ཝཱ བྷ་ཝི་སྶ་ནྟི, ཨ་དྷ་མྨེ་ན ཝཱ ཝ་གྒེ་ན ཝཱ ན་ཀ་མྨཱ་ར་ཧ་སྶ ཝཱ ཀ་མྨཾ ཀ་རི་སྶ་ནྟཱི’’ཏི (པཱ་ཙི. ༤༨༣) ཉ་ཏྭཱ, གི་ལཱ་ནོ ཝཱ ཧུ་ཏྭཱ, གི་ལཱ་ན་སྶ ཝཱ ཀ་ར་ཎཱི་ཡེ་ན, ཨུ་ཙྩཱ་རཱ་དཱི་ཧི ཝཱ པཱི་ལི༹་ཏོ, ན ཙ ཀ་མྨཾ ཀོ་པེ་ཏུ་ཀཱ་མོ ‘‘པུ་ན པ་ཙྩཱ་ག་མི་སྶཱ་མཱི’’ཏི ག་ཙྪ་ཏི, ཏ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཝི་ནི་ཙྪ་ཡ་ཀ་ཐཱ་ཡ ཝ་ཏྟ་མཱ་ན་ཏཱ, དྷ་མྨ་ཀ་མྨ་ཏཱ, དྷ་མྨ་ཀ་མྨ་ས་ཉྙི་ཏཱ, ས་མཱ་ན་སཱི་མཱ་ཡཾ ཋི་ཏ་ཏཱ, ས་མཱ་ན་སཾ་ཝཱ་ས་ཀ་ཏཱ, ཀོ་པེ་ཏུ་ཀཱ་མ་ཏཱ་ཡ ཧ་ཏྠ་པཱ་ས་ཝི་ཛ་ཧ་ན་ནྟི ཨི་མཱ་ནེ་ཏྠ ཚ ཨ་ངྒཱ་ནི. ས་མ་ནུ་བྷཱ་ས་ན་ས་མུ་ཊྛཱ་ནཾ, ཀི་རི་ཡཱ་ཀི་རི་ཡཾ, ས་ཉྙཱ་ཝི་མོ་ཀྑཾ, ས་ཙི་ཏྟ་ཀཾ, ལོ་ཀ་ཝ་ཛྫཾ, ཀཱ་ཡ་ཀ་མྨཾ, ཝ་ཙཱི་ཀ་མྨཾ, ཨ་ཀུ་ས་ལ་ཙི་ཏྟཾ, དུ་ཀྑ་ཝེ་ད་ན་ནྟི.

ཚ་ནྡཾ་ཨ་ད་ཏྭཱ་ག་མ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.