༦. སུ་རཱ་པཱ་ན་ཝ་གྒོ
༡. སུ་རཱ་པཱ་ན་སི་ཀྑཱ་པ་ད་ཝ་ཎྞ་ནཱ
སུ་རཱ་པཱ་ན་ཝ་གྒ་སྶ པ་ཋ་མེ སུ་རཱ་མེ་ར་ཡ་པཱ་ནེཏི ཨེ་ཏྠ པི་ཊྛཱ་དཱི་ཧི ཀ་ཏཾ མ་ཛྫཾ སུ་རཱ, པུ་པྥཱ་དཱི་ཧི ཀ་ཏོ ཨཱ་ས་ཝོ མེ་ར་ཡཾ, ཏ་དུ་བྷ་ཡ་མྤི བཱི་ཛ་ཏོ པ་ཊྛཱ་ཡ ཀུ་ས་གྒེ་ནཱ་པི པི་ཝ་ཏོ པ་ཡོ་གེ པ་ཡོ་གེ པཱ་ཙི་ཏྟི་ཡཾ.
ཀོ་ས་མྦི་ཡཾ སཱ་ག་ཏ་ཏྠེ་རཾ ཨཱ་ར་བྦྷ མ་ཛྫ་པི་ཝ་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཨ་མ་ཛྫེ མ་ཛྫ་ས་ཉྙི་སྶ, ཝེ་མ་ཏི་ཀ་སྶ ཝཱ དུ་ཀྐ་ཊཾ. ཨ་མ་ཛྫ་ས་ཉྙི་སྶ, ཨ་མ་ཛྫཾ མ་ཛྫ་ཝ་ཎྞ་ག་ནྡྷ་ར་སཾ ལོ་ཎ་སོ་ཝཱི་ར་ཀཾ ཝཱ སུ་ཏྟཾ ཝཱ པི་ཝ་ཏོ, ཝཱ་ས་གྒཱ་ཧཱ་པ་ན་ཏྠཾ ཨཱི་ས་ཀཾ མ་ཛྫཾ པ་ཀྑི་པི་ཏྭཱ སཱུ་པཱ་དཱི་ནི པ་ཙ་ནྟི, ཏེ་སུ སཱུ་པ་ས་མྤཱ་ཀཱ་དཱི་སུ, ཨཱ་མ་ལ་ཀ་ར་སཱ་དཱི་ཧི ཨ་མ་ཛྫཾ མ་ཛྫ་ས་དི་སཾ ཨ་རི་ཊྛཾ ཀ་རོ་ནྟི, ཏཾ པི་ཝ་ཏོ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. མ་ཛྫ་བྷཱ་ཝོ, ཏ་སྶ པཱ་ན་ཉྩཱ་ཏི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནི, ཨི་དཾ པ་ན ལོ་ཀ་ཝ་ཛྫཾ, ཨ་ཀུ་ས་ལ་ཙི་ཏྟཾ, ཏི་ཝེ་ད་ན་ནྟི.
སུ་རཱ་པཱ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༢. ཨ་ངྒུ་ལི་པ་ཏོ་ད་ཀ་སི་ཀྑཱ་པ་ད་ཝ་ཎྞ་ནཱ
དུ་ཏི་ཡེ ཨ་ངྒུ་ལི་པ་ཏོ་ད་ཀེཏི ཨ་ངྒུ་ལཱི་ཧི ཨུ་པ་ཀ་ཙྪ་ཀཱ་དི་གྷ་ཊྚ་ནཾ ཝུ་ཙྩ་ཏི, ཨ་པི་ཙ ཡེ་ན ཀེ་ན་ཙི ས་རཱི་རཱ་ཝ་ཡ་ཝེ་ན ཧ་སཱ་དྷི་པྤཱ་ཡ་སྶ ཨུ་པ་ས་མྤ་ནྣཾ ཕུ་ས་ཏོ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཚ་བྦ་གྒི་ཡེ ཨཱ་ར་བྦྷ ཨ་ངྒུ་ལི་པ་ཏོ་ད་ཀེ་ན ཧ་ས་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣེ ཏི་ཀ་དུ་ཀྐ་ཊཾ, ཨི་དྷ པ་ན བྷི་ཀྑུ་ནཱི་པི བྷི་ཀྑུ་སྶ, བྷི་ཀྑུ ཙ བྷི་ཀྑུ་ནི་ཡཱ ཨ་ནུ་པ་ས་མྤ་ནྣོ ཨེ་ཝ, ཀཱ་ཡ་པྤ་ཊི་བ་དྡྷཱ་དཱི་སུ ས་བྦ་ཏྠ དུ་ཀྐ་ཊ་མེ་ཝ. ན ཧ་ས་ནཱ་དྷི་པྤཱ་ཡ་སྶ, ས་ཏི ཀ་ར་ཎཱི་ཡེ ཨཱ་མ་ས་ཏོ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཧ་སཱ་དྷི་པྤཱ་ཡ་ཏཱ, ཨུ་པ་ས་མྤ་ནྣ་སྶ ཀཱ་ཡེ་ན ཀཱ་ཡཱ་མ་ས་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི པ་ཋ་མ་པཱ་རཱ་ཛི་ཀ་ས་དི་སཱ་ནེ་ཝཱ་ཏི.
ཨ་ངྒུ་ལི་པ་ཏོ་ད་ཀ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༣. ཧ་ས་དྷ་མྨ་སི་ཀྑཱ་པ་ད་ཝ་ཎྞ་ནཱ
ཏ་ཏི་ཡེ ཨུ་ད་ཀེ ཧ་ས་དྷ་མྨེཏི ཨུ་ད་ཀ་ཀཱི་ལཱ༹ ཝུ་ཙྩ་ཏི. ཏ་སྨཱ ཡོ བྷི་ཀྑུ ཨུ་པ་རི་གོ་པྥ་ཀེ ཨུ་ད་ཀེ་ཡེ་ཝ ག་ཙྪ་ནྟོ ཧ་སཱ་དྷི་པྤཱ་ཡོ ནི་མུ་ཛྫ་ཏི ཝཱ ཨུ་མྨུ་ཛྫ་ཏི ཝཱ, ཏ་སྶ ནི་མུ་ཛྫ་ནཱ་དཱི་ནཾ ཨ་ཏྠཱ་ཡ ཨོ་ཏ་ར་ནྟ་སྶ ཧ་ཏྠ་ཝཱ་རེ པ་ད་ཝཱ་རེ དུ་ཀྐ་ཊཾ, ནི་མུ་ཛྫ་ནུ་མྨུ་ཛྫ་ནེ་སུ པ་ཡོ་གེ པ་ཡོ་གེ པཱ་ཙི་ཏྟི་ཡཾ, ནི་མུ་ཛྫི་ཏྭཱ ཨ་ནྟོ་ཨུ་ད་ཀེ་ཡེ་ཝ ག་ཙྪ་ནྟ་སྶ ཧ་ཏྠ་ཝཱ་ར་པ་ད་ཝཱ་རེ་སུ, ཏ་ར་ནྟ་སྶ ཝཱ ཡེ་ན ཡེ་ན ཨ་ངྒེ་ན ཏ་ར་ཏི, ཏ་སྶ ཏ་སྶ པ་ཡོ་གེ པ་ཡོ་གེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ས་ཏྟ་ར་ས་ཝ་གྒི་ཡེ བྷི་ཀྑཱུ ཨཱ་ར་བྦྷ ཨུ་ད་ཀེ ཀཱི་ལ༹་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཨུ་ད་ཀེ ཨ་ཧ་ས་དྷ་མྨེ ཧ་ས་དྷ་མྨ་ས་ཉྙི་ནོ, ཝེ་མ་ཏི་ཀ་སྶ ཝཱ དུ་ཀྐ་ཊཾ, ཏ་ཐཱ ནཱ་ཝཱ་ཡ ཀཱི་ལ༹་ཏོ ཧ་ཏྠེ་ན ཝཱ པཱ་དེ་ན ཝཱ ཀ་ཊྛེ་ན ཝཱ ཀ་ཐ་ལཱ་ཡ ཝཱ ཨུ་ད་ཀཾ པ་ཧ་ར་ཏོ, བྷཱ་ཛ་ན་ག་ཏཾ ཨུ་ད་ཀཾ ཝཱ ཀ་ཉྫི་ཀཱ་དཱི་ནི ཝཱ ཙི་ཀྑ་ལླཾ ཝཱ ཁི་པ་ན་ཀཱི་ལཱ༹་ཡ ཀཱི་ལ༹་ཏོ དུ་ཀྐ་ཊཾ. ཨ་ཏྠ་ཛོ་ཏ་ཀཾ པ་ན ཨ་ཀྑ་རཾ ཚི་ནྡི་ཏུཾ ཝ་ཊྚ་ཏི. ན ཧ་སཱ་དྷི་པྤཱ་ཡ་སྶ, ས་ཏི ཀ་ར་ཎཱི་ཡེ ཨོ་ཏ་རི་ཏྭཱ ནི་མུ་ཛྫ་ནཱ་དཱི་ནི ཀ་རོ་ནྟ་སྶ, པཱ་རཾ ག་ཙྪ་ཏོ, ཨཱ་པ་དཱ་སུ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཨུ་པ་རི་གོ་པྥ་ཀ་ཏཱ, ཧ་སཱ་དྷི་པྤཱ་ཡེ་ན ཀཱི་ལ༹་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི པ་ཋ་མ་པཱ་རཱ་ཛི་ཀ་ས་དི་སཱ་ནཱི་ཏི.
ཧ་ས་དྷ་མྨ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༤. ཨ་ནཱ་ད་རི་ཡ་སི་ཀྑཱ་པ་ད་ཝ་ཎྞ་ནཱ
ཙ་ཏུ་ཏྠེ ཨ་ནཱ་ད་རི་ཡེཏི པུ་གྒ་ལ་སྶ ཝཱ དྷ་མྨ་སྶ ཝཱ ཨ་ནཱ་ད་ར་ཀ་ར་ཎེ. ཏ་སྨཱ ཡོ བྷི་ཀྑུ ཨུ་པ་ས་མྤ་ནྣེ་ན པ་ཉྙ་ཏྟེ་ན ཝུ་ཙྩ་མཱ་ནོ ཏ་སྶ ཝཱ ཝ་ཙ་ནཾ ཨ་ཀ་ཏྟུ་ཀཱ་མ་ཏཱ་ཡ, ཏཾ ཝཱ དྷ་མྨཾ ཨ་སི་ཀྑི་ཏུ་ཀཱ་མ་ཏཱ་ཡ ཨ་ནཱ་ད་རི་ཡཾ ཀ་རོ་ཏི, ཏ་སྶ ཏ་སྨིཾ ཨ་ནཱ་ད་རི་ཡེ པཱ་ཙི་ཏྟི་ཡཾ.
ཀོ་ས་མྦི་ཡཾ ཚ་ནྣ་ཏྠེ་རཾ ཨཱ་ར་བྦྷ ཨ་ནཱ་ད་རི་ཡ་ཀ་ར་ཎ་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣེ ཏི་ཀ་དུ་ཀྐ་ཊཾ, ཨུ་པ་ས་མྤ་ནྣེ་ན ཝཱ ཨ་ནུ་པ་ས་མྤ་ནྣེ་ན ཝཱ ‘‘ཨི་དཾ ན ས་ལླེ་ཁཱ་ཡ སཾ་ཝ་ཏྟ་ཏཱི’’ཏི་ཨཱ་དི་ནཱ ན་ཡེ་ན ཨ་པ་ཉྙ་ཏྟེ་ན ཝུ་ཙྩ་མཱ་ན་སྶ ཨ་ནཱ་ད་རི་ཡེ་པི དུ་ཀྐ་ཊ་མེ་ཝ. པ་ཝེ་ཎི་ཨཱ་ག་ཏཾ པ་ན ཨུ་གྒ་ཧཾ ག་ཧེ་ཏྭཱ ‘‘ཨེ་ཝཾ ཨ་མྷཱ་ཀཾ ཨཱ་ཙ་རི་ཡཱ་ནཾ ཨུ་གྒ་ཧོ པ་རི་པུ་ཙྪཱ’’ཏི (པཱ་ཙི. ༣༤༤) བྷ་ཎ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཨུ་པ་ས་མྤ་ནྣ་སྶ པ་ཉྙ་ཏྟེ་ན ཝ་ཙ་ནཾ, ཨ་ནཱ་ད་རི་ཡ་ཀ་ར་ཎ་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནི, ཨི་དཾ པ་ན དུ་ཀྑ་ཝེ་ད་ན་ནྟི.
ཨ་ནཱ་ད་རི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༥. བྷིཾ་སཱ་པ་ན་སི་ཀྑཱ་པ་ད་ཝ་ཎྞ་ནཱ
པ་ཉྩ་མེ བྷིཾ་སཱ་པེ་ཡྻཱཏི བྷིཾ་སཱ་པ་ན་ཏྠཾ རཱུ་པཱ་དཱི་ནི ཨུ་པ་སཾ་ཧ་རེ་ཡྻ, བྷ་ཡཱ་ན་ཀ་ཀ་ཐཾ ཝཱ ཀ་ཐེ་ཡྻ. སོ པ་ན བྷཱ་ཡ་ཏུ ཝཱ, མཱ ཝཱ, ཨི་ཏ་ར་སྶ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཚ་བྦ་གྒི་ཡེ བྷི་ཀྑཱུ ཨཱ་ར་བྦྷ བྷིཾ་སཱ་པ་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ. ཨ་ནུ་པ་ས་མྤ་ནྣེ ཏི་ཀ་དུ་ཀྐ་ཊཾ, ན བྷིཾ་སཱ་པེ་ཏུ་ཀཱ་མ་སྶ ཏ་ཐཱ ཀ་རོ་ཏོ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཨུ་པ་ས་མྤ་ནྣ་ཏཱ, ཏ་སྶ ད་སྶ་ན་ས་ཝ་ན་ཝི་ས་ཡེ བྷིཾ་སཱ་པེ་ཏུ་ཀཱ་མ་ཏཱ་ཡ ཝཱ་ཡཱ་མ་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་ན་ནྟ་ར་སི་ཀྑཱ་པ་ད་ས་དི་སཱ་ནེ་ཝཱ་ཏི.
བྷིཾ་སཱ་པ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༦. ཛོ་ཏི་སི་ཀྑཱ་པ་ད་ཝ་ཎྞ་ནཱ
ཚ་ཊྛེ ཝི་སི་བྦ་ནཱ་པེ་ཀྑོཏི ཏ་པྤི་ཏུ་ཀཱ་མོ. ས་མཱ་ད་ཧེ་ཡྻཱཏི ཛཱ་ལེ་ཡྻ, ཨ་ཉྙ་ཏྲ ཏ་ཐཱ་རཱུ་པ་པྤ་ཙྩ་ཡཱཏི པ་དཱི་པུ་ཛྫཱ་ལ་ནཾ ཝཱ པ་ཏྟ་པ་ཙ་ནཱ་དཱི་སུ ཛོ་ཏི་ཀ་ར་ཎཾ ཝཱ་ཏི ཨེ་ཝ་རཱུ་པཾ པ་ཙྩ་ཡཾ ཝི་ནཱ. ཏ་ཏྲཱ་ཡཾ ཝི་ནི་ཙྪ་ཡོ – ས་ཡཾ ས་མཱ་ད་ཧ་ནྟ་སྶ ཨ་ར་ཎི་ས་ཎྛཱ་པ་ན་ཏོ པ་ཊྛཱ་ཡ ཡཱ་ཝ ཛཱ་ལཱ ན ཨུ་ཊྛ་ཧ་ཏི, ཏཱ་ཝ ས་བྦ་པྤ་ཡོ་གེ་སུ དུ་ཀྐ་ཊཾ, ཛཱ་ལུ་ཊྛཱ་ནེ པཱ་ཙི་ཏྟི་ཡཾ. ས་མཱ་ད་ཧཱ་པེ་ནྟ་སྶ ཨཱ་ཎ་ཏྟི་ཡཱ དུ་ཀྐ་ཊཾ, ས་ཀིཾ ཨཱ་ཎ་ཏྟེ་ན བ་ཧུ་མྤི ས་མཱ་ད་ཧི་ཏེ ཨེ་ཀ་མེ་ཝ པཱ་ཙི་ཏྟི་ཡཾ.
བྷ་གྒེ་སུ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ཛོ་ཏིཾ ས་མཱ་ད་ཧི་ཏྭཱ ཝི་སི་བྦ་ན་ཝ་ཏྠུ་སྨིཾ པ་ཉྙ་ཏྟཾ, ‘‘ཨ་གི་ལཱ་ནོ, ཨ་ཉྙ་ཏྲ ཏ་ཐཱ་རཱུ་པ་པྤ་ཙྩ་ཡཱ’’ཏི ཨི་མཱ་ནེ་ཏྠ དྭེ ཨ་ནུ་པ་ཉྙ་ཏྟི་ཡོ, སཱ་དྷཱ་ར་ཎ་པ་ཉྙ་ཏྟི, སཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, གི་ལཱ་ན་སྶ ཨ་གི་ལཱ་ན་ས་ཉྙི་ནོ, ཝེ་མ་ཏི་ཀ་སྶ ཝཱ དུ་ཀྐ་ཊཾ, ཏ་ཐཱ པ་ཊི་ལཱ་ཏཾ ཨུ་ཀྑི་པ་ནྟ་སྶ, ཏ་ཉྩ ཨ་ཝི་ཛ྄ཛྷཱ་ཏཾ ཨུ་ཀྑི་པི་ཏྭཱ ཡ་ཐཱ་ཋཱ་ནེ ཋ་པེ་ནྟ་སྶ. ཝི་ཛ྄ཛྷཱ་ཏཾ པ་ན ཛཱ་ལ་ཡ་ཏོ པཱ་ཙི་ཏྟི་ཡ་མེ་ཝ. གི་ལཱ་ན་སྶ གི་ལཱ་ན་ས་ཉྙི་སྶ, ཨ་ཉྙེ་ན ཀ་ཏཾ ཝཱ ཝཱི་ཏ་ཙྩི་ཏ་ངྒཱ་རཾ ཝཱ ཝི་སི་བྦེ་ནྟ་སྶ, པ་དཱི་པ་ཛོ་ཏི་ཀ་ཛ་ནྟཱ་གྷ་རཱ་དི་ཀེ ཏ་ཐཱ་རཱུ་པ་པྤ་ཙྩ་ཡེ, ཨཱ་པ་དཱ་སུ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཨ་གི་ལཱ་ན་ཏཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, ཝི་སི་བྦེ་ཏུ་ཀཱ་མ་ཏཱ, ས་མཱ་ད་ཧ་ན་ནྟི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་ཉྩ་རི་ཏྟེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ་ནཱི་ཏི.
ཛོ་ཏི་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༧. ན་ཧཱ་ན་སི་ཀྑཱ་པ་ད་ཝ་ཎྞ་ནཱ
ས་ཏྟ་མེ ན་ཧཱ་ཡེ་ཡྻཱཏི ཡོ བྷི་ཀྑུ མ་ཛ྄ཛྷི་མ་དེ་སེ ན་ཧཱ་ན་དི་ཝ་ས་ཏོ པ་ཊྛཱ་ཡ ཨ་དྡྷ་མཱ་སེ ཨ་པུ་ཎྞེ ཨ་ཉྙ་ཏྲ ས་མ་ཡཱ ‘‘ན་ཧཱ་ཡི་སྶཱ་མཱི’’ཏི ཙུ་ཎྞཾ ཝཱ མ་ཏྟི་ཀཾ ཝཱ ཨ་བྷི་ས་ངྑ་རོ་ཏི, ཏ་སྶ ཏ་ཏོ པ་ཊྛཱ་ཡ ས་བྦ་པྤ་ཡོ་གེ་སུ དུ་ཀྐ་ཊཾ, ན་ཧཱ་ན་པ་རི་ཡོ་སཱ་ནེ པཱ་ཙི་ཏྟི་ཡཾ. ས་མ་ཡེ་སུ པ་རི་ཝེ་ཎ་ས་མྨ་ཛྫ་ན་མ་ཏྟ་མྤི ཀ་མྨ་ས་མ་ཡོ, ཨ་དྡྷ་ཡོ་ཛ་ནཾ ག་ནྟུ་ཀཱ་མ་སྶ, ག་ཙྪ་ཏོ, ག་ཏ་སྶ ཝཱ ཨ་དྡྷཱ་ན་ག་མ་ན་ས་མ་ཡོ, ས་ར་ཛེ་ན ཝཱ་ཏེ་ན ཨོ་ཀི་ཎྞ་སྶ དྭཱི་སུ ཝཱ ཏཱི་སུ ཝཱ ཨུ་ད་ཀ་ཕུ་སི་ཏེ་སུ ཀཱ་ཡེ པ་ཏི་ཏེ་སུ ཝཱ་ཏ་ཝུ་ཊྛི་ས་མ་ཡོཏི ཝེ་དི་ཏ་བྦོ. སེ་སཾ ཨུ་ཏྟཱ་ན་མེ་ཝ.
རཱ་ཛ་ག་ཧེ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ན མ་ཏྟཾ ཛཱ་ནི་ཏྭཱ ན་ཧཱ་ཡ་ན་ཝ་ཏྠུ་སྨིཾ པ་ཉྙ་ཏྟཾ, ‘‘ཨ་ཉྙ་ཏྲ ས་མ་ཡཱ’’ཏི ཨ་ཡ་མེ་ཏྠ ཚ་བྦི་དྷཱ ཨ་ནུ་པ་ཉྙ་ཏྟི, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཨ་ཏི་རེ་ཀ་དྡྷ་མཱ་སེ ཨཱུ་ན་ཀ་ས་ཉྙི་ནོ, ཝེ་མ་ཏི་ཀ་སྶ ཝཱ དུ་ཀྐ་ཊཾ. ཨ་ཏི་རེ་ཀ་ས་ཉྙི་སྶ, ས་མ་ཡེ ཝཱ ན་ཧཱ་ཡ་ནྟ་སྶ, ཡོ ཝཱ ན་དཱི་པཱ་རཾ ག་ཙྪ་ནྟོ ཝཱ་ལུ་ཀཾ ཨུ་ཀྐི་རི་ཏྭཱ ཀ་ཏ་ཨཱ་ཝཱ་ཊེ་སུ་པི ན་ཧཱ་ཡ་ཏི, ཏ་སྶ, པ་ཙྩ་ནྟི་མེ ཛ་ན་པ་དེ ས་བྦེ་སཾ, ཨཱ་པ་དཱ་སུ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. མ་ཛ྄ཛྷི་མ་དེ་སོ, ཨཱུ་ན་ཀ་དྡྷ་མཱ་སེ ན་ཧཱ་ནཾ, ས་མ་ཡཱ་ནཾ ཝཱ ན་དཱི་པཱ་ར་ག་མ་ན་སྶ ཝཱ ཨཱ་པ་དཱ་ནཾ ཝཱ ཨ་བྷཱ་ཝོ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནེ་ཝཱ་ཏི.
ན་ཧཱ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༨. དུ་བྦ་ཎྞ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ
ཨ་ཊྛ་མེ ཨ་ལ་བྷཱི་ཏི ལ་བྷོ, ལ་བྷོ ཨེ་ཝ ལཱ་བྷོ, ཀིཾ ཨ་ལ་བྷི? ཙཱི་ཝ་རཾ, ཀཱི་དི་སཾ? ན་ཝཾ, ཨི་ཏི ‘‘ན་ཝ་ཙཱི་ཝ་ར་ལཱ་བྷེ་ནཱ’’ཏི ཝ་ཏྟ་བྦེ ཨ་ནུ་ནཱ་སི་ཀ་ལོ་པཾ ཨ་ཀ་ཏྭཱ ན་ཝཾ་ཙཱི་ཝ་ར་ལཱ་བྷེ་ནཱཏི ཝུ་ཏྟཾ, པ་ཊི་ལ་དྡྷ་ན་ཝ་ཙཱི་ཝ་རེ་ནཱ་ཏི ཨ་ཏྠོ. མ་ཛ྄ཛྷེ ཋི་ཏ་པ་ད་དྭ་ཡེ པ་ནཱཏི ནི་པཱ་ཏ་མ་ཏྟཾ. བྷི་ཀྑུ་ནཱཏི ཡེ་ན ལ་དྡྷཾ, ཏ་སྶ ནི་ད་སྶ་ནཾ, སེ་སཾ པ་ད་ཏྠ་ཏོ ཨུ་ཏྟཱ་ན་མེ་ཝ. ཨ་ཡཾ པ་ནེ་ཏྠ ཝི་ནི་ཙྪ་ཡོ – ནི་ཝཱ་ས་ན་པཱ་རུ་པ་ནུ་པ་གཾ ཙཱི་ཝ་རཾ ལ་བྷི་ཏྭཱ ཏ་སྶ ནི་ཊྛི་ཏ་ར་ཛ་ན་སྶ ཡ་སྨིཾ ཝཱ ཏ་སྨིཾ ཝཱ པ་དེ་སེ ཀཾ་ས་ནཱི་ལེ་ན ཝཱ པ་ཏྟ་ནཱི་ལེ་ན ཝཱ ཀ་དྡ་མེ་ན ཝཱ ཡེ་ན ཀེ་ན་ཙི ཀཱ་ལ༹་ཀེ་ན ཝཱ མོ་ར་ཀྑི་མ་ཎྜ་ལ་མ་ངྒུ་ལ་པི་ཊྛཱི་ནཾ ཨ་ཉྙ་ཏ་ར་པྤ་མཱ་ཎཾ ཀ་པྤ་བི་ནྡུཾ ཨཱ་དི་ཡི་ཏྭཱ ཏཾ ཙཱི་ཝ་རཾ པ་རི་བྷུ་ཉྫི་ཏ་བྦཾ, ཨ་ནཱ་དི་ཡི་ཏྭཱ པ་རི་བྷུ་ཉྫ་ནྟ་སྶ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ཨ་ཏྟ་ནོ ཙཱི་ཝ་ར་ཨ་ཛཱ་ན་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཨཱ་དི་ནྣེ ཨ་ནཱ་དི་ནྣ་ས་ཉྙི་ནོ, ཝེ་མ་ཏི་ཀ་སྶ ཝཱ དུ་ཀྐ་ཊཾ. ཨཱ་དི་ནྣ་ས་ཉྙི་སྶ, ཀ་པྤེ ན་ཊྛེ, ཀ་པྤ་ཀ་ཏོ་ཀཱ་སེ ཛི་ཎྞེ, ཀ་པྤ་ཀ་ཏེ་ན ཨ་ཀ་པྤ་ཀ་ཏེ སཾ་སི་བྦི་ཏེ, པ་ཙྪཱ ཨཱ་རོ་པི་ཏེ་སུ ཨ་གྒ་ལ༹་ཨ་ནུ་ཝཱ་ཏ་པ་རི་བྷ་ཎྜེ་སུ ཏཾ པ་རི་བྷུ་ཉྫ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཝུ་ཏྟ་པྤ་ཀཱ་ར་སྶ ཙཱི་ཝ་ར་སྶ ཨ་ཀ་ཏ་ཀ་པྤ་ཀ་ཏཱ, ན ན་ཊྛ་ཙཱི་ཝ་རཱ་དི་ཏཱ, ནི་ཝཱ་ས་ནཾ ཝཱ པཱ་རུ་པ་ནཾ ཝཱ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནི, ཨི་དཾ པ་ན ཀི་རི་ཡཱ་ཀི་རི་ཡ་ནྟི.
དུ་བྦ་ཎྞ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༩. ཝི་ཀ་པྤ་ན་སི་ཀྑཱ་པ་ད་ཝ་ཎྞ་ནཱ
ན་ཝ་མེ ཝི་ཀ་པྤེ་ཏྭཱཏི ཨེ་ཏྠ དྭེ ཝི་ཀ་པྤ་ནཱ ས་མྨུ་ཁཱ་ཝི་ཀ་པྤ་ནཱ པ་ར་མྨུ་ཁཱ་ཝི་ཀ་པྤ་ནཱ ཙ. ཀ་ཐཾ ས་མྨུ་ཁཱ་ཝི་ཀ་པྤ་ནཱ ཧོ་ཏི? ཙཱི་ཝ་རཱ་ནཾ ཨེ་ཀ་བ་ཧུ་བྷཱ་ཝཾ ས་ནྣི་ཧི་ཏཱ་ས་ནྣི་ཧི་ཏ་བྷཱ་ཝ་ཉྩ ཉ་ཏྭཱ ‘ཨི་མཾ ཙཱི་ཝ་ར’ནྟི ཝཱ ‘ཨི་མཱ་ནི ཙཱི་ཝ་རཱ་ནཱི’ཏི ཝཱ ‘ཨེ་ཏཾ ཙཱི་ཝ་ར’ནྟི ཝཱ ‘ཨེ་ཏཱ་ནི ཙཱི་ཝ་རཱ་ནཱི’ཏི ཝཱ ཝ་ཏྭཱ ‘ཏུ་ཡ྄ཧཾ ཝི་ཀ་པྤེ་མཱི’ཏི ཝ་ཏྟ་བྦཾ, ཨ་ཡ་མེ་ཀཱ ས་མྨུ་ཁཱ་ཝི་ཀ་པྤ་ནཱ. ཨེ་ཏྟཱ་ཝ་ཏཱ ནི་དྷེ་ཏུཾ ཝ་ཊྚ་ཏི, པ་རི་བྷུ་ཉྫི་ཏུཾ པ་ན ཝི་སྶ་ཛྫེ་ཏུཾ ཝཱ ཨ་དྷི་ཊྛཱ་ཏུཾ ཝཱ ན ཝ་ཊྚ་ཏི. ‘‘མ་ཡ྄ཧཾ ས་ནྟ་ཀཾ, མ་ཡ྄ཧཾ ས་ནྟ་ཀཱ་ནི པ་རི་བྷུ་ཉྫ ཝཱ ཝི་སྶ་ཛྫེ་ཧི ཝཱ ཡ་ཐཱ་པ་ཙྩ་ཡཾ ཀ་རོ་ཧཱི’’ཏི (པཱ་ཙི. ༣༧༤) ཨེ་ཝཾ པ་ན ཝུ་ཏྟེ པ་ཙྩུ་དྡྷཱ་རོ ནཱ་མ ཧོ་ཏི, ཏ་ཏོ པ་བྷུ་ཏི པ་རི་བྷོ་གཱ་ད་ཡོ་པི ཝ་ཊྚ་ནྟི. ཨ་པ་རོ ན་ཡོ, ཏ་ཐེ་ཝ ཙཱི་ཝ་རཱ་ནཾ ཨེ་ཀ་བ་ཧུ་བྷཱ་ཝཾ ས་ནྣི་ཧི་ཏཱ་ས་ནྣི་ཧི་ཏ་བྷཱ་ཝ་ཉྩ ཉ་ཏྭཱ ཏ་སྶེ་ཝ བྷི་ཀྑུ་ནོ ས་ནྟི་ཀེ ‘ཨི་མཾ ཙཱི་ཝ་ར’ནྟི ཝཱ ‘ཨི་མཱ་ནི ཙཱི་ཝ་རཱ་ནཱི’ཏི ཝཱ ‘ཨེ་ཏཾ ཙཱི་ཝ་ར’ནྟི ཝཱ ‘ཨེ་ཏཱ་ནི ཙཱི་ཝ་རཱ་ནཱི’ཏི ཝཱ ཝ་ཏྭཱ པ་ཉྩ་སུ ས་ཧ་དྷ་མྨི་ཀེ་སུ ཨ་ཉྙ་ཏ་ར་སྶ ཨ་ཏྟ་ནཱ ཨ་བྷི་རུ་ཙི་ཏ་སྶ ཡ་སྶ ཀ་སྶ་ཙི ནཱ་མཾ ག་ཧེ་ཏྭཱ ‘‘ཏི་སྶ་སྶ བྷི་ཀྑུ་ནོ ཝི་ཀ་པྤེ་མཱི’’ཏི ཝཱ ‘‘ཏི་སྶཱ་ཡ བྷི་ཀྑུ་ནི་ཡཱ, སི་ཀྑ་མཱ་ནཱ་ཡ, སཱ་མ་ཎེ་ར་སྶ, ཏི་སྶཱ་ཡ སཱ་མ་ཎེ་རི་ཡཱ ཝི་ཀ་པྤེ་མཱི’’ཏི ཝཱ ཝ་ཏྟ་བྦཾ, ཨ་ཡཾ ཨ་པ་རཱ་པི ས་མྨུ་ཁཱ་ཝི་ཀ་པྤ་ནཱ. ཨེ་ཏྟཱ་ཝ་ཏཱ ནི་དྷེ་ཏུཾ ཝ་ཊྚ་ཏི, པ་རི་བྷོ་གཱ་དཱི་སུ ཨེ་ཀ་མྤི ན ཝ་ཊྚ་ཏི. ཏེ་ན པ་ན བྷི་ཀྑུ་ནཱ ‘‘ཏི་སྶ་སྶ བྷི་ཀྑུ་ནོ ས་ནྟ་ཀཾ…པེ… ཏི་སྶཱ་ཡ སཱ་མ་ཎེ་རི་ཡཱ ས་ནྟ་ཀཾ པ་རི་བྷུ་ཉྫ ཝཱ ཝི་སྶ་ཛྫེ་ཧི ཝཱ ཡ་ཐཱ་པ་ཙྩ་ཡཾ ཀ་རོ་ཧཱི’’ཏི ཝུ་ཏྟེ པ་ཙྩུ་དྡྷཱ་རོ ནཱ་མ ཧོ་ཏི, ཏ་ཏོ པ་བྷུ་ཏི པ་རི་བྷོ་གཱ་ད་ཡོ་པི ཝ་ཊྚ་ནྟི.
ཀ་ཐཾ པ་ར་མྨུ་ཁཱ་ཝི་ཀ་པྤ་ནཱ ཧོ་ཏི? ཙཱི་ཝ་རཱ་ནཾ ཏ་ཐེ་ཝ ཨེ་ཀ་བ་ཧུ་བྷཱ་ཝཾ ས་ནྣི་ཧི་ཏཱ་ས་ནྣི་ཧི་ཏ་བྷཱ་ཝ་ཉྩ ཉ་ཏྭཱ ‘ཨི་མཾ ཙཱི་ཝ་ར’ནྟི ཝཱ ‘ཨི་མཱ་ནི ཙཱི་ཝ་རཱ་ནཱི’ཏི ཝཱ ‘ཨེ་ཏཾ ཙཱི་ཝ་ར’ནྟི ཝཱ ‘ཨེ་ཏཱ་ནི ཙཱི་ཝ་རཱ་ནཱི’ཏི ཝཱ ཝ་ཏྭཱ ‘‘ཏུ་ཡ྄ཧཾ ཝི་ཀ་པྤ་ན་ཏྠཱ་ཡ ད་མྨཱི’’ཏི ཝ་ཏྟ་བྦཾ. ཏེ་ན ཝ་ཏྟ་བྦོ ‘‘ཀོ ཏེ མི་ཏྟོ ཝཱ ས་ནྡི་ཊྛོ ཝཱ’’ཏི. ཏ་ཏོ ཨི་ཏ་རེ་ན པུ་རི་མ་ན་ཡེ་ནེ་ཝ ‘ཏི་སྶོ བྷི་ཀྑཱུ’ཏི ཝཱ…པེ… ‘ཏི་སྶཱ སཱ་མ་ཎེ་རཱི’ཏི ཝཱ ཝ་ཏྟ་བྦཾ. པུ་ན ཏེ་ན བྷི་ཀྑུ་ནཱ ‘‘ཨ་ཧཾ ཏི་སྶ་སྶ བྷི་ཀྑུ་ནོ ད་མྨཱི’’ཏི ཝཱ…པེ… ‘‘ཏི་སྶཱ་ཡ སཱ་མ་ཎེ་རི་ཡཱ ད་མྨཱི’’ཏི ཝཱ ཝ་ཏྟ་བྦཾ, ཨ་ཡཾ པ་ར་མྨུ་ཁཱ་ཝི་ཀ་པྤ་ནཱ. ཨེ་ཏྟཱ་ཝ་ཏཱ ནི་དྷེ་ཏུཾ ཝ་ཊྚ་ཏི, པ་རི་བྷོ་གཱ་དཱི་སུ ཨེ་ཀ་མྤི ན ཝ་ཊྚ་ཏི. ཏེ་ན པ་ན བྷི་ཀྑུ་ནཱ དུ་ཏི་ཡ་ས་མྨུ་ཁཱ་ཝི་ཀ་པྤ་ནཱ་ཡཾ ཝུ་ཏྟ་ན་ཡེ་ནེ་ཝ ‘‘ཨི་ཏྠ་ནྣཱ་མ་སྶ ས་ནྟ་ཀཾ པ་རི་བྷུ་ཉྫ ཝཱ ཝི་སྶ་ཛྫེ་ཧི ཝཱ ཡ་ཐཱ་པ་ཙྩ་ཡཾ ཀ་རོ་ཧཱི’’ཏི ཝུ་ཏྟེ པ་ཙྩུ་དྡྷཱ་རོ ནཱ་མ ཧོ་ཏི, ཏ་ཏོ པ་བྷུ་ཏི པ་རི་བྷོ་གཱ་ད་ཡོ་པི ཝ་ཊྚ་ནྟཱི་ཏི. པ་ཏྟ་ཝི་ཀ་པྤ་ནཱ་ཡ་མྤི ཨེ་སེ་ཝ ན་ཡོ. ཨི་ཏི ཨི་མཱ་སུ དྭཱི་སུ ཝི་ཀ་པྤ་ནཱ་སུ ཡཱ་ཡ ཀཱ་ཡ་ཙི ཝི་ཀ་པྤ་ནཱ་ཡ པ་ཉྩ་སུ ས་ཧ་དྷ་མྨི་ཀེ་སུ ཡ་སྶ ཀ་སྶ་ཙི ཙཱི་ཝ་རཾ ཝི་ཀ་པྤེ་ཏྭཱ ཝུ་ཏྟ་ན་ཡེ་ན ཨ་ཀ་ཏ་པྤ་ཙྩུ་དྡྷཱ་རཾ ཝཱ ཡེ་ན ཝི་ན་ཡ་ཀ་མྨཾ ཀ་ཏཾ, ཏ་སྶ ཝཱ ཝི་སྶཱ་སེ་ན ཨ་གྒ་ཧེ་ཏྭཱ པ་རི་བྷུ་ཉྫ་ནྟ་སྶ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཨུ་པ་ན་ནྡཾ ཨཱ་ར་བྦྷ ཨ་པྤ་ཙྩུ་དྡྷཱ་ར་ཎཾ པ་རི་བྷུ་ཉྫ་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཏཾ པ་ན ཨ་དྷི་ཊྛ་ཧ་ནྟ་སྶ ཝཱ ཝི་སྶ་ཛྫེ་ནྟ་སྶ ཝཱ དུ་ཀྐ་ཊཾ, ཏ་ཐཱ པ་ཙྩུ་དྡྷཱ་ར་ཎེ ཨ་པྤ་ཙྩུ་དྡྷཱ་ར་ཎ་ས་ཉྙི་སྶ ཝེ་མ་ཏི་ཀ་སྶ ཝཱ. པ་ཙྩུ་དྡྷཱ་ར་ཎ་ས་ཉྙི་སྶ པ་ན ཝི་སྶཱ་སེ་ན པ་རི་བྷུ་ཉྫ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. སཱ་མཾ ཝི་ཀ་པྤི་ཏ་སྶ ཨ་པྤ་ཙྩུ་དྡྷཱ་རོ, ཝི་ཀ་པྤ་ནུ་པ་ག་ཙཱི་ཝ་ར་ཏཱ, པ་རི་བྷོ་གོ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི པ་ཋ་མ་ཀ་ཐི་ན་ས་དི་སཱ་ནེ་ཝ, ཨི་དཾ པ་ན ཀི་རི་ཡཱ་ཀི་རི་ཡ་ནྟི.
ཝི་ཀ་པྤ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༠. ཨ་པ་ནི་དྷཱ་ན་སི་ཀྑཱ་པ་ད་ཝ་ཎྞ་ནཱ
ད་ས་མེ པ་ཏྟནྟི ཨ་དྷི་ཊྛཱ་ནུ་པ་གཾ. ཙཱི་ཝ་རནྟི ཝི་ཀ་པྤ་ནུ་པ་གཾ. ནི་སཱི་ད་ནཾ ནཱ་མ ས་ད་སཾ ཝུ་ཙྩ་ཏི. སཱུ་ཙི་གྷ་རཾ ནཱ་མ ས་སཱུ་ཙི་ཀཾ ཝཱ ཨ་སཱུ་ཙི་ཀཾ ཝཱ. ཀཱ་ཡ་བ་ནྡྷ་ནཾ ནཱ་མ པ་ཊྚི་ཀཱ ཝཱ སཱུ་ཀ་ར་ནྟ་ཀཾ ཝཱ. ཨ་པ་ནི་དྷེ་ཡྻཱཏི ཨ་པ་ནེ་ཏྭཱ ནི་ད་ཧེ་ཡྻ. ཧ་སཱ་པེ་ཀྑོཏི ཧ་སཱ་དྷི་པྤཱ་ཡོ. པཱ་ཙི་ཏྟི་ཡནྟི ས་ཡཾ ཨ་པ་ནི་དྷེ་ནྟ་སྶ པཱ་ཙི་ཏྟི་ཡཾ, ཨ་ཉྙཾ ཨཱ་ཎཱ་པེ་ནྟ་སྶ ཨཱ་ཎ་ཏྟི་ཡཱ དུ་ཀྐ་ཊཾ, ཏེ་ན ཨ་པ་ནི་ཧི་ཏེ ཨི་ཏ་ར་སྶ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཚ་བྦ་གྒི་ཡེ ཨཱ་ར་བྦྷ ཨ་པ་ནི་དྷཱ་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, སཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣེ ཏི་ཀ་དུ་ཀྐ་ཊཾ, ཝུ་ཏྟ་པྤ་ཀཱ་རཱ་ནི པ་ན པ་ཏྟཱ་དཱི་ནི ཋ་པེ་ཏྭཱ ཨ་ཉྙཾ པ་རི་ཀྑཱ་རཾ ཨུ་པ་ས་མྤ་ནྣ་སྶ ཝཱ ཨ་ནུ་པ་ས་མྤ་ནྣ་སྶ ཝཱ ས་ནྟ་ཀཾ ཨ་པ་ནི་དྷེ་ནྟ་སྶ དུ་ཀྐ་ཊ་མེ་ཝ. དུ་ནྣི་ཀྑི་ཏྟཾ པ་ཊི་སཱ་མེ་ནྟ་སྶ, ‘‘དྷ་མྨ་ཀ་ཐཾ ཀ་ཏྭཱ ད་སྶཱ་མཱི’’ཏི པ་ཊི་སཱ་མེ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཨུ་པ་ས་མྤ་ནྣ་སྶ ས་ནྟ་ཀཱ་ནཾ པ་ཏྟཱ་དཱི་ནཾ ཨ་པ་ནི་དྷཱ་ནཾ, ཝི་ཧེ་སེ་ཏུ་ཀཱ་མ་ཏཱ ཝཱ ཧ་སཱ་དྷི་པྤཱ་ཡ་ཏཱ ཝཱ་ཏི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནཱི་ཏི.
ཨ་པ་ནི་དྷཱ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
སུ་རཱ་པཱ་ན་ཝ་གྒོ ཚ་ཊྛོ.