༦. དུ་ཏི་ཡ་པ་ཝཱ་ར་ཎཱ་སི་ཀྑཱ་པ་ད་ཝ་ཎྞ་ནཱ

ཚ་ཊྛེ ཨ་བྷི་ཧ་ཊྛུཾ པ་ཝཱ་རེ་ཡྻཱཏི ཨ་བྷི་ཧ་རི་ཏྭཱ ‘‘ཧ་ནྡ, བྷི་ཀྑུ ཁཱ་ད ཝཱ བྷུ་ཉྫ ཝཱ’’ཏི ཨེ་ཝཾ པ་ཝཱ་རེ་ཡྻ. ཛཱ་ནནྟི སུ་ཏྭཱ ཝཱ དི་སྭཱ ཝཱ ཏ་སྶ པ་ཝཱ་རི་ཏ་བྷཱ་ཝཾ ཛཱ་ན་ནྟོ. ཨཱ་སཱ་ད་ནཱ་པེ་ཀྑོཏི ཨཱ་སཱ་ད་ནཾ ཙོ་ད་ནཾ མ་ངྐུ་ཀ་ར་ཎ་བྷཱ་ཝཾ ཨ་པེ་ཀྑ་མཱ་ནོ. བྷུ་ཏྟ་སྨིཾ པཱ་ཙི་ཏྟི་ཡནྟི ཨེ་ཏྠ ཨ་བྷི་ཧཱ་རེ ཏཱ་ཝ དུ་ཀྐ་ཊཾ, ས་ཙེ སོ ཏཾ ག་ཎྷཱ་ཏི, པུ་ན ཨ་བྷི་ཧཱ་ར་ཀ་སྶ དུ་ཀྐ་ཊཾ, ཏ་སྨིཾ པ་ན བྷུ་ཉྫ་ནྟེ ཨ་བྷི་ཧཱ་ར་ཀ་སྶ ཏ་སྶ ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ དུ་ཀྐ་ཊཾ, བྷོ་ཛ་ན་པ་རི་ཡོ་སཱ་ནེ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ ཨ་ན་ཏི་རི་ཏྟེ་ན བྷོ་ཛ་ནེ་ན ཨ་བྷི་ཧ་ཊྛུཾ པ་ཝཱ་ར་ཎཱ་ཝ་ཏྠུ་སྨིཾ པ་ཉྙ་ཏྟཾ, ཨ་སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, པ་ཝཱ་རི་ཏེ པ་ཝཱ་རི་ཏ་ས་ཉྙི་ནོ པཱ་ཙི་ཏྟི་ཡཾ. ཝེ་མ་ཏི་ཀ་སྶ, ཡཱ་མ་ཀཱ་ལི་ཀཱ་དཱི་ནི ཨཱ་ཧཱ་ར་ཏྠཱ་ཡ ཨ་བྷི་ཧ་ར་ནྟ་སྶ, ཏེ་ས་ཉྩ པ་ཊི་གྒ་ཧ་ཎ་ཨ་ཛ྄ཛྷོ་ཧཱ་རེ་སུ, ཨ་པྤ་ཝཱ་རི་ཏེ ཙ པ་ཝཱ་རི་ཏ་ས་ཉྙི་ནོ, ཝེ་མ་ཏི་ཀ་སྶ ཙ དུ་ཀྐ་ཊཾ. ཨ་པྤ་ཝཱ་རི་ཏ་ས་ཉྙི་སྶ པ་ན, ཡོ ཙ ཨ་ཏི་རི་ཏྟཾ ཀཱ་རཱ་པེ་ཏྭཱ དེ་ཏི, ‘‘ཀཱ་རཱ་པེ་ཏྭཱ ཝཱ བྷུ་ཉྫཱ་ཧཱི’’ཏི དེ་ཏི, ཡོ ཝཱ ‘‘ཨ་ཉྙ་སྶ་ཏྠཱ་ཡ ཧ་ར་ནྟོ ག་ཙྪཱ་ཧཱི’’ཏི དེ་ཏི, ཡོ ཙ ཡཱ་མ་ཀཱ་ལི་ཀཱ་དཱི་ནི ‘‘ས་ཏི པ་ཙྩ་ཡེ པ་རི་བྷུ་ཉྫཱ་ཧཱི’’ཏི དེ་ཏི, ཏ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. པ་ཝཱ་རི་ཏ་ཏཱ, པ་ཝཱ་རི་ཏ་ས་ཉྙི་ཏཱ, ཨཱ་སཱ་ད་ནཱ་པེ་ཀྑ་ཏཱ, ཨ་ན་ཏི་རི་ཏྟེ་ན ཨ་བྷི་ཧ་ཊྛུཾ པ་ཝཱ་ར་ཎ་ཏཱ, བྷོ་ཛ་ན་པ་རི་ཡོ་སཱ་ན་ནྟི ཨི་མཱ་ནེ་ཏྠ པ་ཉྩ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནི, ཨི་དཾ པ་ན དུ་ཀྑ་ཝེ་ད་ན་ནྟི.

དུ་ཏི་ཡ་པ་ཝཱ་ར་ཎཱ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.