༨. ཀུ་མཱ་རི་བྷཱུ་ཏ་ཝ་གྒོ
༡-༢-༣. པ་ཋ་མ་ཀུ་མཱ་རི་བྷཱུ་ཏཱ་དི་སི་ཀྑཱ་པ་ད་ཝ་ཎྞ་ནཱ
ཀུ་མཱ་རི་བྷཱུ་ཏ་ཝ་གྒ་སྶ པ་ཋ་མ་དུ་ཏི་ཡ་ཏ་ཏི་ཡཱ་ནི ཏཱི་ཧི གི་ཧི་ག་ཏ་སི་ཀྑཱ་པ་དེ་ཧི ས་དི་སཱ་ནེ་ཝ. ཡཱ པ་ན ཏཱ ས་བྦ་པ་ཋ་མཱ དྭེ མ་ཧཱ་སི་ཀྑ་མཱ་ནཱ, ཏཱ ཨ་ཏི་ཀྐ་ནྟ་ཝཱི་ས་ཏི་ཝ་སྶཱ་ཏི ཝེ་དི་ཏ་བྦཱ. ཏཱ ཧི གི་ཧི་ག་ཏཱ ཝཱ ཧོ་ནྟུ, ཨ་གི་ཧི་ག་ཏཱ ཝཱ, ས་མྨུ་ཏི་ཀ་མྨཱ་དཱི་སུ ‘‘སི་ཀྑ་མཱ་ནཱ’’ཨི་ཙྩེ་ཝ ཝ་ཏྟ་བྦཱ, ‘‘གི་ཧི་ག་ཏཱ’’ཏི ཝཱ ‘‘ཀུ་མཱ་རི་བྷཱུ་ཏཱ’’ཏི ཝཱ ན ཝ་ཏྟ་བྦཱ. གི་ཧི་ག་ཏཱ་ཡ ད་ས་ཝ་སྶ་ཀཱ་ལེ སི་ཀྑཱ་ས་མྨུ་ཏིཾ ད་ཏྭཱ དྭཱ་ད་ས་ཝ་སྶ་ཀཱ་ལེ ཨུ་པ་ས་མྤ་དཱ ཀཱ་ཏ་བྦཱ, ཨེ་ཀཱ་ད་ས་ཝ་སྶ་ཀཱ་ལེ ད་ཏྭཱ ཏེ་ར་ས་ཝ་སྶ་ཀཱ་ལེ ཀཱ་ཏ་བྦཱ, དྭཱ་ད་ས་ཏེ་ར་ས་ཙུ་དྡ་ས་པ་ནྣ་ར་ས་སོ་ལ༹་ས་ས་ཏྟ་ར་ས་ཨ་ཊྛཱ་ར་ས་ཝ་སྶ་ཀཱ་ལེ སི་ཀྑཱ་ས་མྨུ་ཏིཾ ད་ཏྭཱ ཝཱི་ས་ཏི་ཝ་སྶ་ཀཱ་ལེ ཨུ་པ་ས་མྤ་དཱ ཀཱ་ཏ་བྦཱ. ཨ་ཊྛཱ་ར་ས་ཝ་སྶ་ཀཱ་ལ་ཏོ པ་ཊྛཱ་ཡ ཙ པ་ནཱ་ཡཾ ‘‘གི་ཧི་ག་ཏཱ’’ཏི་པི ‘‘ཀུ་མཱ་རི་བྷཱུ་ཏཱ’’ཏི་པི ཝ་ཏྟུཾ ཝ་ཊྚ་ཏི. ཡཱ པ་ནཱ་ཡཾ ‘‘ཀུ་མཱ་རི་བྷཱུ་ཏཱ’’ཏི ཝུ་ཏྟཱ སཱ་མ་ཎེ་རཱི, སཱ ‘‘གི་ཧི་ག་ཏཱ’’ཏི ན ཝ་ཏྟ་བྦཱ, ‘‘ཀུ་མཱ་རི་བྷཱུ་ཏཱ’’ཨི་ཙྩེ་ཝ ཝ་ཏྟ་བྦཱ. སི་ཀྑཱ་ས་མྨུ་ཏི་དཱ་ན་ཝ་སེ་ན པ་ན ས་བྦཱ་པི ‘‘སི་ཀྑ་མཱ་ནཱ’’ཏི ཝ་ཏྟུཾ ཝ་ཊྚ་ཏཱི་ཏི.
པ་ཋ་མ་ཀུ་མཱ་རི་བྷཱུ་ཏཱ་དི་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༤. ཨཱུ་ན་དྭཱ་ད་ས་ཝ་སྶ་སི་ཀྑཱ་པ་ད་ཝ་ཎྞ་ནཱ
ཙ་ཏུ་ཏྠེ ཨཱུ་ན་དྭཱ་ད་ས་ཝ་སྶཱཏི ཨུ་པ་ས་མྤ་དཱ་ཝ་སེ་ན ཨ་པ་རི་པུ་ཎྞ་དྭཱ་ད་ས་ཝ་སྶཱ. པཱ་ཙི་ཏྟི་ཡནྟི ཨུ་པ་ཛ྄ཛྷཱ་ཡཱ ཧུ་ཏྭཱ ཝུ་ཊྛཱ་པེ་ནྟི་ཡཱ ཝུ་ཏྟ་ན་ཡེ་ནེ་ཝ དུ་ཀྐ་ཊཱ་ནི ཨ་ནྟ་རཱ, ཀ་མྨ་ཝཱ་ཙཱ་པ་རི་ཡོ་སཱ་ནེ པཱ་ཙི་ཏྟི་ཡ་ནྟི.
ཨཱུ་ན་དྭཱ་ད་ས་ཝ་སྶ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༥. པ་རི་པུ་ཎྞ་དྭཱ་ད་ས་ཝ་སྶ་སི་ཀྑཱ་པ་ད་ཝ་ཎྞ་ནཱ
པ་ཉྩ་མེ ས་ངྒྷེ་ན ཨ་ས་མྨ་ཏཱཏི ཡ་སྶཱ ས་ངྒྷེ་ན པ་ད་བྷཱ་ཛ་ནེ (པཱ་ཙི. ༡༡༣༢) ཝུ་ཏྟཱ ཝུ་ཊྛཱ་པ་ན་ས་མྨུ་ཏི ན དི་ནྣཱ. སེ་སཾ ཨུ་བྷ་ཡ་ཏྠཱ་པི མ་ཧཱ་སི་ཀྑ་མཱ་ནཱ་སི་ཀྑཱ་པ་ད་དྭ་ཡ་ས་དི་ས་མེ་ཝཱ་ཏི.
པ་རི་པུ་ཎྞ་དྭཱ་ད་ས་ཝ་སྶ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༦. ཁཱི་ཡ་ན་དྷ་མྨ་སི་ཀྑཱ་པ་ད་ཝ་ཎྞ་ནཱ
ཚ་ཊྛེ ཨ་ལཾ ཏཱ་ཝ ཏེ ཨ་ཡྻེ ཝུ་ཊྛཱ་པི་ཏེ་ནཱ་ཏི ཝུ་ཙྩ་མཱ་ནཱཏི ཝུ་ཊྛཱ་པ་ན་ས་མྨུ་ཏི་ཡཱ ཡཱ་ཙི་ཏཱ་ཡ ས་ངྒྷེ་ན ཨུ་པ་པ་རི་ཀྑི་པི་ཏྭཱ ‘‘ཡ་སྨཱ བཱ་ལཱ ཨ་བྱ་ཏྟཱ ཙ ཨ་ལ་ཛྫི་ནཱི ཙ ཧོ་ཏི, ཏ་སྨཱ ཨ་ལཾ ཏཱ་ཝ ཏུ་ཡ྄ཧཾ ཨུ་པ་ས་མྤཱ་དི་ཏེ་ནཱ’’ཏི ཨེ་ཝཾ ནི་ཝཱ་རཱི་ཡ་མཱ་ནཱ. པ་ཙྪཱ ཁཱི་ཡ་ན་དྷ་མྨནྟི པ་ཙྪཱ ཨ་ཉྙཱ་སཾ བྱ་ཏྟཱ་ནཾ ལ་ཛྫི་ནཱི་ནཾ ཝུ་ཊྛཱ་པ་ན་ས་མྨུ་ཏིཾ དི་ཡྻ་མཱ་ནཾ དི་སྭཱ ‘‘ཨ་ཧ་མེ་ཝ ནཱུ་ན བཱ་ལཱ’’ཏི་ཨཱ་དཱི་ནི བྷ་ཎ་མཱ་ནཱ ཡ་ཏྠ ཀ་ཏྠ་ཙི ཁཱི་ཡེ་ཡྻ. པཱ་ཙི་ཏྟི་ཡནྟི ཨེ་ཝཾ ཁཱི་ཡ་ན་དྷ་མྨཾ ཨཱ་པ་ཛྫ་ནྟི་ཡཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཙ་ཎྜ་ཀཱ་ལི༹ཾ ཨཱ་ར་བྦྷ ཨེ་ཝཾ ཁཱི་ཡ་ན་དྷ་མྨཾ ཨཱ་པ་ཛྫ་ན་ཝ་ཏྠུ་སྨིཾ པ་ཉྙ་ཏྟཾ, པ་ཀ་ཏི་ཡཱ ཚ་ནྡཱ་དཱི་ནཾ ཝ་སེ་ན ཀ་རོ་ནྟཱི་ནཾ ཁཱི་ཡ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཝུ་ཊྛཱ་པ་ན་ས་མྨུ་ཏི་ཡཱ ཡཱ་ཙ་ནཾ, ཨུ་པ་པ་རི་ཀྑི་ཏྭཱ ན ཚ་ནྡཱ་དི་ཝ་སེ་ན པ་ཊི་ཀྑི་ཏྟཱ་ཡ ‘‘སཱ་དྷཱུ’’ཏི པ་ཊི་སྶ་ཝོ, པ་ཙྪཱ་ཁཱི་ཡ་ན་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནི, ཨི་དཾ པ་ན དུ་ཀྑ་ཝེ་ད་ན་ནྟི.
ཁཱི་ཡ་ན་དྷ་མྨ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༧-༨. སི་ཀྑ་མཱ་ན་ན་ཝུ་ཊྛཱ་པ་ན་པ་ཋ་མ་དུ་ཏི་ཡ་སི་ཀྑཱ་པ་ད་ཝ་ཎྞ་ནཱ
ས་ཏྟ་མེ སཱ པ་ཙྪཱཏི སི་ཀྑ་མཱ་ནཱ་ཡ ཨུ་པ་ས་མྤ་དཱ་ཡ ཡཱ་ཙི་ཡ་མཱ་ནཱ་ཡ སཱ བྷི་ཀྑུ་ནཱི ཨེ་ཝཾ ཝ་ཏྭཱ ལ་དྡྷེ ཙཱི་ཝ་རེ པ་ཙྪཱ ཨ་ས་ཏི ཨ་ནྟ་རཱ་ཡེ ‘‘ནེ་ཝ ཝུ་ཊྛཱ་པེ་སྶཱ་མི, ན ཝུ་ཊྛཱ་པ་ནཱ་ཡ ཨུ་སྶུ་ཀྐཾ ཀ་རི་སྶཱ་མཱི’’ཏི དྷུ་རཾ ནི་ཀྑི་པེ་ཡྻ, ཏ་སྶཱ ས་ཧ དྷུ་ར་ནི་ཀྑེ་པེ་ན པཱ་ཙི་ཏྟི་ཡ་ནྟི. ཨ་ཊྛ་མེ་པི ཨེ་སེ་ཝ ན་ཡོ.
ཨུ་བྷ་ཡ་མྤི སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨེ་ཏེ་སུ ཝ་ཏྠཱུ་སུ པ་ཉྙ་ཏྟཾ, དྭཱི་སུ་པི ས་ཏི ཨ་ནྟ་རཱ་ཡེ, པ་རི་ཡེ་སི་ཏྭཱ ཨ་ལ་བྷ་ནྟི་ཡཱ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨུ་བྷ་ཡ་ཏྠ ‘‘ཨེ་ཝཱ་ཧཾ ཏཾ ཝུ་ཊྛཱ་པེ་སྶཱ་མཱི’’ཏི པ་ཊི་ཉྙཱ, ཨཱ་ཀ་ངྑི་ཏ་ནི་པྥ་ཏྟི, པ་ཙྪཱ དྷུ་ར་ནི་ཀྑེ་པོ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ་ཏི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་མ་ནུ་བྷཱ་ས་ན་ས་དི་སཱ་ནཱི་ཏི.
སི་ཀྑ་མཱ་ན་ན་ཝུ་ཊྛཱ་པ་ན་པ་ཋ་མ་དུ་ཏི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༩. སོ་ཀཱ་ཝཱ་ས་སི་ཀྑཱ་པ་ད་ཝ་ཎྞ་ནཱ
ན་ཝ་མེ སོ་ཀཱ་ཝཱ་སནྟི ས་ངྐེ་ཏཾ ཀ་ཏྭཱ ཨཱ་ག་ཙྪ་མཱ་ནཱ པུ་རི་སཱ་ནཾ ཨ་ནྟོ་སོ་ཀཾ པ་ཝེ་སེ་ཏཱི་ཏི སོ་ཀཱ་ཝཱ་སཱ, ཏཾ སོ་ཀཱ་ཝཱ་སཾ. ཨ་ཐ ཝཱ གྷ་རཾ ཝི་ཡ གྷ་ར་སཱ་མི་ཀཱ ཨ་ཡ་མྤི པུ་རི་ས་ས་མཱ་ག་མཾ ཨ་ལ་བྷ་མཱ་ནཱ སོ་ཀཾ ཨཱ་ཝི་ས་ཏི, ཨི་ཏི ཡཾ ཨཱ་ཝི་ས་ཏི, སྭཱ་སྶཱ ཨཱ་ཝཱ་སོ ཧོ་ཏཱི་ཏི སོ་ཀཱ་ཝཱ་སཱ. ཏེ་ནེ་ཝ་སྶ པ་ད་བྷཱ་ཛ་ནེ (པཱ་ཙི. ༡༡༦༠) ‘‘སོ་ཀཱ་ཝཱ་སཱ ནཱ་མ པ་རེ་སཾ དུ་ཀྑཾ ཨུ་པྤཱ་དེ་ཏི, སོ་ཀཾ ཨཱ་ཝི་ས་ཏཱི’’ཏི དྭི་དྷཱ ཨ་ཏྠོ ཝུ་ཏྟོ. པཱ་ཙི་ཏྟི་ཡནྟི ཨེ་ཝ་རཱུ་པཾ ཝུ་ཊྛཱ་པེ་ནྟི་ཡཱ ཝུ་ཏྟ་ན་ཡེ་ནེ་ཝ ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨེ་ཝ་རཱུ་པཾ སི་ཀྑ་མཱ་ནཾ ཝུ་ཊྛཱ་པ་ན་ཝ་ཏྠུ་སྨིཾ པ་ཉྙ་ཏྟཾ. ཨ་ཛཱ་ན་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. སོ་ཀཱ་ཝཱ་ས་ཏཱ, ཛཱ་ན་ནཾ, ཝུ་ཊྛཱ་པ་ན་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ག་བྦྷི་ནི་ཝུ་ཊྛཱ་པ་ན་ས་དི་སཱ་ནེ་ཝཱ་ཏི.
སོ་ཀཱ་ཝཱ་ས་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༠. ཨ་ན་ནུ་ཉྙཱ་ཏ་སི་ཀྑཱ་པ་ད་ཝ་ཎྞ་ནཱ
ད་ས་མེ མཱ་ཏཱ་པི་ཏཱུ་ཧཱིཏི ཝི་ཛཱ་ཏ་མཱ་ཏ་རཱ ཙ ཛ་ན་ཀ་པི་ཏ་རཱ ཙ. སཱ་མི་ཀེ་ནཱཏི ཡེ་ན པ་རི་གྒ་ཧི་ཏཱ, ཏེ་ན. ཨ་ན་ནུ་ཉྙཱ་ཏནྟི ཨུ་པ་ས་མྤ་ད་ཏྠཱ་ཡ ཨ་ན་ནུ་ཉྙཱ་ཏཾ. དྭི་ཀྑ་ཏྟུ་ཉྷི བྷི་ཀྑུ་ནཱི་ཧི ཨཱ་པུ་ཙྪི་ཏ་བྦཾ, པ་བྦ་ཛྫཱ་ཀཱ་ལེ ཙ ཨུ་པ་ས་མྤ་དཱ་ཀཱ་ལེ ཙ, བྷི་ཀྑཱུ་ནཾ པ་ན ས་ཀིཾ ཨཱ་པུ་ཙྪི་ཏེ་པི ཝ་ཊྚ་ཏི. ཏ་སྨཱ ཡཱ ཨུ་པ་ས་མྤ་དཱ་ཀཱ་ལེ ཨ་ནཱ་པུ་ཙྪཱ ཨུ་པ་ས་མྤཱ་དེ་ཏི, ཏ་སྶཱ ཝུ་ཏྟ་ན་ཡེ་ནེ་ཝ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨ་ན་ནུ་ཉྙཱ་ཏ་ཝུ་ཊྛཱ་པ་ན་ཝ་ཏྠུ་སྨིཾ པ་ཉྙ་ཏྟཾ. ཨ་པ་ལོ་ཀེ་ཏྭཱ ཝུ་ཊྛཱ་པེ་ནྟི་ཡཱ, ཏེ་སཾ ཨ་ཏྠི་བྷཱ་ཝཾ ཨ་ཛཱ་ན་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ན་པ་ལོ་ཀ་ནཾ, ཨ་ཏྠི་བྷཱ་ཝ་ཛཱ་ན་ནཾ, ཝུ་ཊྛཱ་པ་ན་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ཨ་ན་ནུ་ཉྙཱ་ཏ་ས་མུ་ཊྛཱ་ནཾ, ཀི་རི་ཡཱ་ཀི་རི་ཡཾ, ནོ་ས་ཉྙཱ་ཝི་མོ་ཀྑཾ, ཨ་ཙི་ཏྟ་ཀཾ, པ་ཎྞ་ཏྟི་ཝ་ཛྫཾ, ཀཱ་ཡ་ཀ་མྨཾ, ཝ་ཙཱི་ཀ་མྨཾ, ཏི་ཙི་ཏྟཾ, ཏི་ཝེ་ད་ན་ནྟི.
ཨ་ན་ནུ་ཉྙཱ་ཏ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༡. པཱ་རི་ཝཱ་སི་ཀ་སི་ཀྑཱ་པ་ད་ཝ་ཎྞ་ནཱ
ཨེ་ཀཱ་ད་ས་མེ པཱ་རི་ཝཱ་སི་ཀ་ཚ་ནྡ་དཱ་ནེ་ནཱཏི པཱ་རི་ཝཱ་སི་ཡེ་ན ཚ་ནྡ་དཱ་ནེ་ན. ཏ་ཏྠ ཙ་ཏུ་བྦི་དྷཾ པཱ་རི་ཝཱ་སི་ཡཾ པ་རི་ས་པཱ་རི་ཝཱ་སི་ཡཾ ར་ཏྟི་པཱ་རི་ཝཱ་སི་ཡཾ ཚ་ནྡ་པཱ་རི་ཝཱ་སི་ཡཾ ཨ་ཛ྄ཛྷཱ་ས་ཡ་པཱ་རི་ཝཱ་སི་ཡ་ནྟི.
ཏ་ཏྠ པ་རི་ས་པཱ་རི་ཝཱ་སི་ཡཾ ནཱ་མ བྷི་ཀྑཱུ ཀེ་ན་ཙི་དེ་ཝ ཀ་ར་ཎཱི་ཡེ་ན ས་ནྣི་པ་ཏི་ཏཱ ཧོ་ནྟི, ཨ་ཐ མེ་གྷོ ཝཱ ཨུ་ཊྛ་ཧ་ཏི, ཨུ་སྶཱ་ར་ཎཱ ཝཱ ཀ་རཱི་ཡ་ཏི, མ་ནུ་སྶཱ ཝཱ ཨ་ཛ྄ཛྷོ་ཏྠ་ར་ནྟཱ ཨཱ་ག་ཙྪ་ནྟི, བྷི་ཀྑཱུ ‘‘ཨ་ནོ་ཀཱ་སཱ མ་ཡཾ, ཨ་ཉྙ་ཏྲ ག་ཙྪཱ་མཱ’’ཏི ཚ་ནྡཾ ཨ་ཝི་སྶ་ཛྫི་ཏྭཱ་ཝ ཨུ་ཊྛ་ཧ་ནྟི, ཨི་དཾ པ་རི་ས་པཱ་རི་ཝཱ་སི་ཡཾ ནཱ་མ, ཀི་ཉྩཱ་པི པ་རི་ས་པཱ་རི་ཝཱ་སི་ཡཾ, ཚ་ནྡ་སྶ པ་ན ཨ་ཝི་སྶ་ཊྛ་ཏྟཱ ཀ་མྨཾ ཀཱ་ཏུཾ ཝ་ཊྚ་ཏི.
པུ་ན བྷི་ཀྑཱུ ‘‘ཨུ་པོ་ས་ཐཱ་དཱི་ནི ཀ་རི་སྶཱ་མཱ’’ཏི ར་ཏྟིཾ ས་ནྣི་པ་ཏི་ཏྭཱ ‘‘ཡཱ་ཝ ས་བྦེ ས་ནྣི་པ་ཏ་ནྟི, ཏཱ་ཝ དྷ་མྨཾ སུ་ཎི་སྶཱ་མཱ’’ཏི ཨེ་ཀཾ ཨ་ཛ྄ཛྷེ་ས་ནྟི, ཏ་སྨིཾ དྷ་མྨ་ཀ་ཐཾ ཀ་ཐེ་ནྟེ་ཡེ་ཝ ཨ་རུ་ཎོ ཨུ་གྒ་ཙྪ་ཏི. ས་ཙེ ‘‘ཙཱ་ཏུ་དྡ་སི་ཀཾ ཨུ་པོ་ས་ཐཾ ཀ་རི་སྶཱ་མཱ’’ཏི ནི་སི་ནྣཱ, ‘‘པ་ནྣ་ར་སོ’’ཏི ཀཱ་ཏུཾ ཝ་ཊྚ་ཏི. ས་ཙེ པ་ནྣ་ར་སི་ཀཾ ཀཱ་ཏུཾ ནི་སི་ནྣཱ, པཱ་ཊི་པ་དེ ཨ་ནུ་པོ་ས་ཐེ ཨུ་པོ་ས་ཐཾ ཀཱ་ཏུཾ ན ཝ་ཊྚ་ཏི. ཨ་ཉྙཾ པ་ན ས་ངྒྷ་ཀི་ཙྩཾ ཀཱ་ཏུཾ ཝ་ཊྚ་ཏི, ཨི་དཾ ར་ཏྟི་པཱ་རི་ཝཱ་སི་ཡཾ ནཱ་མ.
པུ་ན བྷི་ཀྑཱུ ‘‘ཀི་ཉྩི་དེ་ཝ ཨ་བྦྷཱ་ནཱ་དི་ས་ངྒྷ་ཀ་མྨཾ ཀ་རི་སྶཱ་མཱ’’ཏི ས་ནྣི་སི་ནྣཱ ཧོ་ནྟི, ཏ་ཏྲེ་ཀོ ན་ཀྑ་ཏྟ་པཱ་ཋ་ཀོ བྷི་ཀྑུ ཨེ་ཝཾ ཝ་ད་ཏི ‘‘ཨ་ཛྫ ན་ཀྑ་ཏྟཾ དཱ་རུ་ཎཾ, མཱ ཨི་དཾ ཀ་མྨཾ ཀ་རོ་ཐཱ’’ཏི. ཏེ ཏ་སྶ ཝ་ཙ་ནེ་ན ཚ་ནྡཾ ཝི་སྶ་ཛྫེ་ཏྭཱ ཏ་ཏྠེ་ཝ ནི་སི་ནྣཱ ཧོ་ནྟི, ཨ་ཐ་ཉྙོ ཨཱ་ག་ནྟྭཱ ‘‘ན་ཀྑ་ཏྟཾ པ་ཏི་མཱ་ནེ་ནྟཾ, ཨ་ཏྠོ བཱ་ལཾ ཨུ་པ་ཛ྄ཛྷ་གཱ (ཛཱ. ༡.༡.༤༩), ཀིཾ ན་ཀྑ་ཏྟེ་ན ཀ་རོ་ཐཱ’’ཏི ཝ་ད་ཏི, ཨི་དཾ ཚ་ནྡ་པཱ་རི་ཝཱ་སི་ཡཉྩེ་ཝ ཨ་ཛ྄ཛྷཱ་ས་ཡ་པཱ་རི་ཝཱ་སི་ཡཉྩ. ཨེ་ཏ་སྨིཾ པཱ་རི་ཝཱ་སི་ཡེ པུ་ན ཚ་ནྡ་པཱ་རི་སུ་དྡྷིཾ ཨ་ནཱ་ཧ་རི་ཏྭཱ ཀ་མྨཾ ཀཱ་ཏུཾ ན ཝ་ཊྚ་ཏི, ཨི་དཾ ས་ནྡྷཱ་ཡ ཝུ་ཏྟཾ ‘‘པཱ་རི་ཝཱ་སི་ཀ་ཚ་ནྡ་དཱ་ནེ་ནཱ’’ཏི. པཱ་ཙི་ཏྟི་ཡནྟི ཨེ་ཝཾ ཝུ་ཊྛཱ་པེ་ནྟི་ཡཱ ཝུ་ཏྟ་ན་ཡེ་ནེ་ཝ ཀ་མྨ་ཝཱ་ཙཱ་པ་རི་ཡོ་སཱ་ནེ པཱ་ཙི་ཏྟི་ཡཾ.
རཱ་ཛ་ག་ཧེ ཐུ་ལླ་ན་ནྡཾ ཨཱ་ར་བྦྷ ཨེ་ཝཾ ཝུ་ཊྛཱ་པ་ན་ཝ་ཏྠུ་སྨིཾ པ་ཉྙ་ཏྟཾ. ཚ་ནྡཾ ཨ་ཝི་སྶ་ཛྫེ་ཏྭཱ་ཝ ཨ་ཝུ་ཊྛི་ཏཱ་ཡ པ་རི་སཱ་ཡ ཝུ་ཊྛཱ་པེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. པཱ་རི་ཝཱ་སི་ཀ་ཚ་ནྡ་དཱ་ན་ཏཱ, ཝུ་ཊྛཱ་པ་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ག་མྦྷི་ནི་སི་ཀྑཱ་པ་ད་ས་དི་སཱ་ནེ་ཝཱ་ཏི.
པཱ་རི་ཝཱ་སི་ཀ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༢. ཨ་ནུ་ཝ་སྶ་སི་ཀྑཱ་པ་ད་ཝ་ཎྞ་ནཱ
དྭཱ་ད་ས་མེ ཨ་ནུ་ཝ་སྶནྟི ཨ་ནུ་སཾ་ཝ་ཙྪ་རཾ. ཨེ་ཝཾ ཝུ་ཊྛཱ་པེ་ནྟི་ཡཱ་པི ཝུ་ཏྟ་ན་ཡེ་ནེ་ཝ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨ་ནུ་ཝ་སྶཾ ཝུ་ཊྛཱ་པ་ན་ཝ་ཏྠུ་སྨིཾ པ་ཉྙ་ཏྟཾ. ཨེ་ཀ་ནྟ་རི་ཀཾ ཝུ་ཊྛཱ་པེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ནུ་ཝ་སྶ་ཏཱ, ཝུ་ཊྛཱ་པ་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ཀཱ་ད་ས་མེ ཝུ་ཏྟ་ན་ཡཱ་ནེ་ཝཱ་ཏི.
ཨ་ནུ་ཝ་སྶ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༣. ཨེ་ཀ་ཝ་སྶ་སི་ཀྑཱ་པ་ད་ཝ་ཎྞ་ནཱ
ཏེ་ར་ས་མེ ཨེ་ཀ་ནྟ་རི་ཀཾ ཨེ་ཀཾ ཝུ་ཊྛཱ་པེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. སེ་སཾ དྭཱ་ད་ས་མེ་ན ས་དི་ས་མེ་ཝཱ་ཏི.
ཨེ་ཀ་ཝ་སྶ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
ཀུ་མཱ་རི་བྷཱུ་ཏ་ཝ་གྒོ ཨ་ཊྛ་མོ.