པཱ་ཙི་ཏྟི་ཡ་ཀ་ཎྜོ
༡. ལ་སུ་ཎ་ཝ་གྒོ
༡. ལ་སུ་ཎ་སི་ཀྑཱ་པ་ད་ཝ་ཎྞ་ནཱ
པཱ་ཙི་ཏྟི་ཡེ་སུ ལ་སུ་ཎ་ཝ་གྒ་སྶ ཏཱ་ཝ པ་ཋ་མེ ལ་སུ་ཎནྟི མ་ག་དྷ་ར་ཊྛེ ཛཱ་ཏཾ ཨཱ་མ་ཀཾ བྷ་ཎྜི་ཀ་ལ་སུ་ཎ་མེ་ཝ, ན ཨེ་ཀ་དྭི་ཏི་མི་ཉྫ་ཀཾ. ཏ་ཉྷི ‘‘ཁཱ་དི་སྶཱ་མཱི’’ཏི པ་ཊི་གྒ་ཎྷ་ནྟི་ཡཱ དུ་ཀྐ་ཊཾ, ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ལ་སུ་ཎཾ ཧ་རཱ་པ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ལ་སུ་ཎེ དྭི་ཀ་དུ་ཀྐ་ཊཾ. ཏ་སྨིཾ པ་ན ཨ་ལ་སུ་ཎ་ས་ཉྙཱ་ཡ, པ་ལ་ཎྜུ་ཀེ, བྷ་ཉྫ་ན་ཀེ, ཧ་རི་ཏ་ཀེ, ཙཱ་པ་ལ་སུ་ཎེ, སཱུ་པ་ས་མྤཱ་ཀེ, མཾ་ས་ས་མྤཱ་ཀེ, ཏེ་ལ་ས་མྤཱ་ཀེ, སཱ་ལ༹་ཝེ, ཨུ་ཏྟ་རི་བྷ་ངྒེ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨཱ་མ་ཀ་ལ་སུ་ཎ་ཉྩེ་ཝ, ཨ་ཛ྄ཛྷོ་ཧ་ར་ཎ་ཉྩཱ་ཏི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.
ལ་སུ་ཎ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༢. ས་མྦཱ་དྷ་ལོ་མ་སི་ཀྑཱ་པ་ད་ཝ་ཎྞ་ནཱ
དུ་ཏི་ཡེ ས་མྦཱ་དྷེཏི པ་ཊི་ཙྪ་ནྣོ་ཀཱ་སེ, ཨུ་པ་ཀ་ཙྪ་ཀེ་སུ ཙ མུ་ཏྟ་ཀ་ར་ཎེ ཙཱ་ཏི ཨ་ཏྠོ. སཾ་ཧ་རཱ་པེ་ཡྻཱཏི ཨེ་ཏྠ ཁུ་ར་ས་ཎྜཱ་ས་ཀ་ཏྟ་རི་ཨཱ་དཱི་སུ ཡེ་ན ཀེ་ན་ཙི སཾ་ཧ་རཱ་པེ་ནྟི་ཡཱ པ་ཡོ་ག་ག་ཎ་ནཱ་ཡ པཱ་ཙི་ཏྟི་ཡཾ, ན ལོ་མ་ག་ཎ་ནཱ་ཡ.
སཱ་ཝ་ཏྠི་ཡཾ ཚ་བྦ་གྒི་ཡཱ བྷི་ཀྑུ་ནི་ཡོ ཨཱ་ར་བྦྷ ས་མྦཱ་དྷེ ལོ་མཾ སཾ་ཧ་རཱ་པ་ན་ཝ་ཏྠུ་སྨིཾ པ་ཉྙ་ཏྟཾ, ཨ་ཏྟ་ནོ ཨ་ཏྠཱ་ཡ ཨ་ཉྙཾ ཨཱ་ཎཱ་པེ་ནྟི་ཡཱ སཱ་ཎ་ཏྟི་ཀཾ, ཨཱ་པ་ཏྟི་བྷེ་དོ་ན་ཏྠི. ཨཱ་བཱ་དྷ་པ་ཙྩ་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨཱ་བཱ་དྷཱ་བྷཱ་ཝོ, ས་མྦཱ་དྷེ ལོ་མ་སཾ་ཧ་ར་ཎ་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི བྷི་ཀྑུ་ནི་ཡཱ ས་དྡྷིཾ ཨེ་ཀ་དྡྷཱ་ན་མ་གྒ་ག་མ་ན་སི་ཀྑཱ་པ་ད་ས་དི་སཱ་ནཱི་ཏི.
ས་མྦཱ་དྷ་ལོ་མ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༣. ཏ་ལ་གྷཱ་ཏ་ཀ་སི་ཀྑཱ་པ་ད་ཝ་ཎྞ་ནཱ
ཏ་ཏི་ཡེ ཏ་ལ་གྷཱ་ཏ་ཀེཏི ཨ་ནྟ་མ་སོ ཨུ་པྤ་ལ་ཀེ་ས་རེ་ནཱ་པི མུ་ཏྟ་ཀ་ར་ཎ་སྶ ཏ་ལ་གྷཱ་ཏ་ནེ མུ་ཏྟ་ཀ་ར་ཎ་མྷི པ་ཧཱ་ར་དཱ་ནེ པཱ་ཙི་ཏྟི་ཡ་ནྟི ཨ་ཏྠོ.
སཱ་ཝ་ཏྠི་ཡཾ དྭེ བྷི་ཀྑུ་ནི་ཡོ ཨཱ་ར་བྦྷ ཏ་ལ་གྷཱ་ཏ་ཀ་ར་ཎ་ཝ་ཏྠུ་སྨིཾ པ་ཉྙ་ཏྟཾ, པུ་རི་མ་ན་ཡེ་ནེ་ཝ སཱ་ཎ་ཏྟི་ཀཾ, ཨཱ་པ་ཏྟི་བྷེ་དོ ན་ཏྠི. ཨི་ཏོ པ་རཾ པ་ན ཡ་ཏྠ ན་ཏྠི, ཏ་ཏྠ ཨ་ཝ་ཏྭཱ་ཝ ག་མི་སྶཱ་མ. ཨཱ་བཱ་དྷ་པ་ཙྩ་ཡཱ ག་ཎྜཾ ཝཱ ཝ་ཎཾ ཝཱ པ་ཧ་ར་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨཱ་བཱ་དྷཱ་བྷཱ་ཝོ, མུ་ཏྟ་ཀ་ར་ཎེ པ་ཧཱ་ར་དཱ་ནཾ, ཕ་སྶ་སཱ་དི་ཡ་ན་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི པ་ཋ་མ་པཱ་རཱ་ཛི་ཀ་ས་དི་སཱ་ནཱི་ཏི.
ཏ་ལ་གྷཱ་ཏ་ཀ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༤. ཛ་ཏུ་མ་ཊྛ་ཀ་སི་ཀྑཱ་པ་ད་ཝ་ཎྞ་ནཱ
ཙ་ཏུ་ཏྠེ ཛ་ཏུ་མ་ཊྛ་ཀེཏི ཛ་ཏུ་ནཱ ཀ་ཏེ མ་ཊྛ་ད་ཎྜ་ཀེ. ཝ་ཏྠུ་ཝ་སེ་ནེ་ཏཾ ཝུ་ཏྟཾ, ཀཱ་མ་རཱ་གེ་ན པ་ན ཨུ་པྤ་ལ་ཀེ་ས་ར་མྤི པ་ཝེ་སེ་ནྟི་ཡཱ ཨཱ་པ་ཏྟི.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ ཛ་ཏུ་མ་ཊྛ་ཀ་སཱ་དི་ཡ་ན་ཝ་ཏྠུ་སྨིཾ པ་ཉྙ་ཏྟཾ, སེ་སཾ ཏ་ཏི་ཡ་ས་དི་ས་མེ་ཝཱ་ཏི.
ཛ་ཏུ་མ་ཊྛ་ཀ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༥. ཨུ་ད་ཀ་སུ་དྡྷི་ཀ་སི་ཀྑཱ་པ་ད་ཝ་ཎྞ་ནཱ
པ་ཉྩ་མེ ཨུ་ད་ཀ་སུ་དྡྷི་ཀནྟི མུ་ཏྟ་ཀ་ར་ཎ་སྶ དྷོ་ཝ་ནཾ. ཨཱ་དི་ཡ་མཱ་ནཱ་ཡཱཏི ཀ་རོ་ནྟི་ཡཱ. དྭ་ངྒུ་ལ་པ་བྦ་པ་ར་མཾ ཨཱ་དཱ་ཏ་བྦནྟི དྭཱི་སུ ཨ་ངྒུ་ལཱི་སུ ཨེ་ཀེ་ཀཾ ཀ་ཏྭཱ དྭ་ངྒུ་ལ་པ་བྦ་པ་ར་མཾ ཨཱ་དཱ་ཏ་བྦཾ. ཏཾ ཨ་ཏི་ཀྐཱ་མེ་ནྟི་ཡཱཏི ས་ཙེ དྷོ་ཝ་ན་ཀཱ་ལེ རཱ་ག་ཝ་སེ་ན ཝི་ཏྠཱ་ར་ཏོ ཏ་ཏི་ཡཱ་ཡ ཨ་ངྒུ་ལི་ཡཱ ཨ་གྒ་པ་བྦཾ, ག་མྦྷཱི་ར་ཏོ ཨེ་ཀི་སྶཱ་ཝ ཨ་ངྒུ་ལི་ཡཱ ཏ་ཏི་ཡ་པ་བྦཾ པ་ཝེ་སེ་ཏི པཱ་ཙི་ཏྟི་ཡཾ.
ས་ཀྐེ་སུ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ ཨ་ཏི་ག་མྦྷཱི་རཾ ཨུ་ད་ཀ་སུ་དྡྷི་ཀཾ ཨཱ་དི་ཡ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨཱུ་ན་ཀ་དྭ་ངྒུ་ལ་པ་བྦེ དྭི་ཀ་དུ་ཀྐ་ཊཾ. ཏ་སྨིཾ པ་ན ཨཱུ་ན་ཀ་ས་ཉྙཱ་ཡ, དྭ་ངྒུ་ལ་པ་བྦ་པ་ར་མཾ ཨཱ་དི་ཡ་ནྟི་ཡཱ, ཨཱ་བཱ་དྷ་པ་ཙྩ་ཡཱ ཨ་ཏི་རེ་ཀ་མྤི, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི, སེ་སཾ ཏ་ཏི་ཡ་ས་དི་ས་མེ་ཝཱ་ཏི.
ཨུ་ད་ཀ་སུ་དྡྷི་ཀ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༦. ཨུ་པ་ཏི་ཊྛ་ན་སི་ཀྑཱ་པ་ད་ཝ་ཎྞ་ནཱ
ཚ་ཊྛེ བྷུ་ཉྫ་ནྟ་སྶཱཏི པ་ཉྩ་ནྣཾ བྷོ་ཛ་ནཱ་ནཾ ཨ་ཉྙ་ཏ་རཾ བྷུ་ཉྫ་ཏོ. པཱ་ནཱི་ཡེ་ནཱཏི སུ་དྡྷེ་ན ཝཱ ཨུ་ད་ཀེ་ན, ཏ་ཀྐཱ་དཱི་སུ ཝཱ ཨ་ཉྙ་ཏ་རེ་ན. ཝི་དྷཱུ་པ་ནེ་ནཱཏི ཡཱ་ཡ ཀཱ་ཡ་ཙི བཱི་ཛ་ནི་ཡཱ. ཨུ་པ་ཏི་ཊྛེ་ཡྻཱཏི ཡཱ ཨེ་ཏེ་སུ དྭཱི་སུ ཨ་ཉྙ་ཏ་རཾ ག་ཧེ་ཏྭཱ ཧ་ཏྠ་པཱ་སེ ཏི་ཊྛ་ཏི, ཏ་སྶཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ བྷུ་ཉྫ་ནྟ་སྶ ཨེ་ཝཾ ཏི་ཊྛ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཧ་ཏྠ་པཱ་སཾ ཝི་ཛ་ཧི་ཏྭཱ ཁཱ་ད་ནཱི་ཡཾ ཁཱ་ད་ནྟ་སྶ ཨུ་པ་ཏི་ཊྛ་ནྟི་ཡཱ དུ་ཀྐ་ཊཾ, ཨ་ནུ་པ་ས་མྤ་ནྣེ ཏི་ཀ་དུ་ཀྐ་ཊཾ. ‘‘ཨི་མཾ པི་ཝ་ཐ, ཨི་མི་ནཱ བཱི་ཛ་ཐཱ’’ཏི ཨེ་ཝཾ དེ་ནྟི་ཡཱ ཝཱ, དཱ་པེ་ནྟི་ཡཱ ཝཱ, ཨ་ནུ་པ་ས་མྤ་ནྣཾ ཝཱ ཨུ་པ་ཏི་ཊྛཱ་པ་ན་ཏྠཾ ཨཱ་ཎཱ་པེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. བྷུ་ཉྫ་ནྟ་སྶ བྷི་ཀྑུ་ནོ ཧ་ཏྠ་པཱ་སེ ཋཱ་ནཾ, པཱ་ནཱི་ཡ་སྶ ཝཱ ཝི་དྷཱུ་པ་ན་སྶ ཝཱ ག་ཧ་ཎ་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.
ཨུ་པ་ཏི་ཊྛ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༧. ཨཱ་མ་ཀ་དྷ་ཉྙ་སི་ཀྑཱ་པ་ད་ཝ་ཎྞ་ནཱ
ས་ཏྟ་མེ ཝི་ཉྙ་ཏྭཱཏི ཨ་ནྟ་མ་སོ མཱ་ཏ་ར་མྤི ཡཱ་ཙི་ཏྭཱ. བྷུ་ཉྫེ་ཡྻཱཏི ཨ་ཛ྄ཛྷོ་ཧ་རེ་ཡྻ. ཨེ་ཏྠ ཙ ཝི་ཉྙ་ཏྟི ཙེ་ཝ བྷོ་ཛ་ན་ཉྩ པ་མཱ་ཎཾ, ཏ་སྨཱ ས་ཡཾ ཝི་ཉྙ་ཏྭཱ ཨ་ཉྙཱ་ཡ བྷ་ཛྫ་ནཱ་དཱི་ནི ཀཱ་རཱ་པེ་ཏྭཱ ཝཱ, ཨ་ཉྙཱ་ཡ ཝི་ཉྙཱ་པེ་ཏྭཱ ས་ཡཾ བྷ་ཛྫ་ནཱ་དཱི་ནི ཀ་ཏྭཱ ཝཱ པ་ཊི་གྒ་ཧ་ཎ་ཏོ པ་ཊྛཱ་ཡ ཡཱ་ཝ ད་ནྟེ་ཧི སཾ་ཁཱ་ད་ནཾ, ཏཱ་ཝ པུ་བྦ་པྤ་ཡོ་གེ་སུ དུ་ཀྐ་ཊཱ་ནི, ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨཱ་མ་ཀ་དྷ་ཉྙཾ ཝི་ཉྙཱ་པ་ན་ཝ་ཏྠུ་སྨིཾ པ་ཉྙ་ཏྟཾ, ས་ཡཾ ཝཱ ཨ་ཉྙཱ་ཡ ཝཱ ཨ་ཝི་ཉྙ་ཏྟི་ཡཱ ལ་དྡྷཾ བྷ་ཛྫ་ནཱ་དཱི་ནི ཀ་ཏྭཱ ཝཱ ཀཱ་རེ་ཏྭཱ ཝཱ བྷུ་ཉྫ་ནྟི་ཡཱ དུ་ཀྐ་ཊཾ, ཨ་ཉྙཱ་ཡ ཝི་ཉྙ་ཏྟི་ཡཱ ལ་དྡྷཾ པ་ན ས་ཡཾ བྷ་ཛྫ་ནཱ་དཱི་ནི ཀ་ཏྭཱ་པི ཀཱ་རེ་ཏྭཱ་པི བྷུ་ཉྫ་ནྟི་ཡཱ དུ་ཀྐ་ཊ་མེ་ཝ. ཨཱ་བཱ་དྷེ ས་ཏི སེ་ད་ཀ་མྨཱ་དཱི་ནཾ ཨ་ཏྠཱ་ཡ ཝི་ཉྙཱ་པེ་ནྟི་ཡཱ, ཨ་ཝི་ཉྙ་ཏྟི་ཡཱ ལ་བྦྷ་མཱ་ནཾ ན་ཝ་ཀ་མྨ་ཏྠཱ་ཡ ས་མྤ་ཊི་ཙྪ་ནྟི་ཡཱ, ཉཱ་ཏ་ཀ་པྤ་ཝཱ་རི་ཏ་ཊྛཱ་ནེ མུ་གྒ་མཱ་སཱ་དི་ཨ་པ་ར་ཎྞཾ ཝི་ཉྙཱ་པེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ས་ཏྟ་ནྣཾ དྷ་ཉྙཱ་ནཾ ཨ་ཉྙ་ཏ་ར་སྶ ཝི་ཉྙཱ་པ་ནཾ ཝཱ ཝི་ཉྙཱ་པཱ་པ་ནཾ ཝཱ, པ་ཊི་ལཱ་བྷོ, བྷ་ཛྫ་ནཱ་དཱི་ནི ཀ་ཏྭཱ ཝཱ ཀཱ་རེ་ཏྭཱ ཝཱ ཨ་ཛ྄ཛྷོ་ཧ་ར་ཎ་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དྡྷཱ་ན་མ་གྒ་སི་ཀྑཱ་པ་ད་ས་དི་སཱ་ནཱི་ཏི.
ཨཱ་མ་ཀ་དྷ་ཉྙ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༨. པ་ཋ་མ་ཨུ་ཙྩཱ་ར་ཚ་ཌྜ་ན་སི་ཀྑཱ་པ་ད་ཝ་ཎྞ་ནཱ
ཨ་ཊྛ་མེ ས་ངྐཱ་རནྟི ཀ་ཙ་ཝ་རཾ. ཝི་གྷཱ་སནྟི ཡཾ་ཀི་ཉྩི པ་རི་བྷུ་ཏྟཱ་ཝ་སེ་སཾ ཨུ་ཙྪི་ཊྛོ་ད་ཀ་མྤི ད་ནྟ་ཀ་ཊྛ་མྤི, ཨ་ཊྛི་ཀ་ཙ་ལ་ཀེ་སུ པ་ན ཝ་ཏྟ་བྦ་མེ་ཝ ན་ཏྠི. ཏི་རོ་ཀུ་ཊྚེ ཝཱ ཏི་རོ་པཱ་ཀཱ་རེ ཝཱཏི ཡ་སྶ་ཀ་སྶ་ཙི ཀུ་ཊྚ་སྶ ཝཱ པཱ་ཀཱ་ར་སྶ ཝཱ པ་ར་ཏོ. ཚ་ཌྜེ་ཡྻ ཝཱ ཚ་ཌྜཱ་པེ་ཡྻ ཝཱཏི ས་བྦཱ་ནི་པེ་ཏཱ་ནི ཨེ་ཀ་ཏོ ཚ་ཌྜེ་ནྟི་ཡཱ ཨེ་ཀ་པྤ་ཡོ་གེ ཨེ་ཀཱ་པ་ཏྟི, ས་ཀིཾ ཨཱ་ཎ་ཏྟི་ཡཱ བ་ཧུ་ཀེ་པི ཚ་ཌྜི་ཏེ ཨེ་ཀཱ་ཝ.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ ཨུ་ཙྩཱ་རཾ ཏི་རོ་ཀུ་ཊྚེ ཚ་ཌྜ་ན་ཝ་ཏྠུ་སྨིཾ པ་ཉྙ་ཏྟཾ, སཱ་ཎ་ཏྟི་ཀཾ, བྷི་ཀྑུ་སྶ དུ་ཀྐ་ཊཾ, ཨོ་ལོ་ཀེ་ཏྭཱ ཝཱ ཨ་ཝ་ལ་ཉྫེ ཝཱ ཚ་ཌྜེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨུ་ཙྩཱ་རཱ་དི་བྷཱ་ཝོ, ཨ་ནོ་ལོ་ཀ་ནཾ, ཝ་ལ་ཉྫ་ན་ཊྛཱ་ནཾ, ཏི་རོ་ཀུ་ཊྚ་ཏི་རོ་པཱ་ཀཱ་ར་ཏཱ, ཚ་ཌྜ་ནཾ ཝཱ ཚ་ཌྜཱ་པ་ནཾ ཝཱ་ཏི ཨི་མཱ་ནེ་ཏྠ པ་ཉྩ ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་ཉྩ་རི་ཏྟ་ས་དི་སཱ་ནི, ཨི་དཾ པ་ན ཀི་རི་ཡཱ་ཀི་རི་ཡ་ནྟི.
པ་ཋ་མ་ཨུ་ཙྩཱ་ར་ཚ་ཌྜ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༩. དུ་ཏི་ཡ་ཨུ་ཙྩཱ་ར་ཚ་ཌྜ་ན་སི་ཀྑཱ་པ་ད་ཝ་ཎྞ་ནཱ
ན་ཝ་མེ ཧ་རི་ཏེཏི ཁེ་ཏྟེ ཝཱ ནཱ་ལི༹་ཀེ་རཱ་དི་ཨཱ་རཱ་མེ ཝཱ ཡ་ཏྠ་ཀ་ཏྠ་ཙི རོ་པི་མ་ཧ་རི་ཏ་ཊྛཱ་ནེ. ཏཱ་ནི ཝ་ཏྠཱུ་ནི ཚ་ཌྜེ་ནྟི་ཡཱ ཝཱ ཚ་ཌྜཱ་པེ་ནྟི་ཡཱ ཝཱ པུ་རི་མ་ན་ཡེ་ནེ་ཝ ཨཱ་པ་ཏྟི, ཏཱ་དི་སེ ཋཱ་ནེ ནི་སཱི་དི་ཏྭཱ ཨ་ནྟ་མ་སོ ཨུ་ད་ཀཾ པི་ཝི་ཏྭཱ མ་ཏྠ་ཀ་ཙྪི་ནྣཾ ནཱ་ལི༹་ཀེ་ར་མྤི ཚ་ཌྜེ་ནྟི་ཡཱ ཨཱ་པ་ཏྟི་ཡེ་ཝ.
སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨུ་ཙྩཱ་རཱ་དཱི་ནི ཧ་རི་ཏེ ཚ་ཌྜ་ན་ཝ་ཏྠུ་སྨིཾ པ་ཉྙ་ཏྟཾ, སཱ་ཎ་ཏྟི་ཀཾ, ཏི་ཀ་པཱ་ཙི་ཏྟི་ཡཾ, བྷི་ཀྑུ་ནོ དུ་ཀྐ་ཊཾ, བྷི་ཀྑུ་ནི་ཡཱ་པི ནི་ཀྑི་ཏྟ་བཱི་ཛེ ཁེ་ཏྟེ ཡཱ་ཝ ཨ་ངྐུ་རོ ན ཨུ་ཊྛ་ཧ་ཏི, ཏཱ་ཝ དུ་ཀྐ་ཊཾ, ཨ་ཧ་རི་ཏེ དྭི་ཀ་དུ་ཀྐ་ཊཾ. ཏ་སྨིཾ པ་ན ཨ་ཧ་རི་ཏ་ས་ཉྙཱ་ཡ ཚ་ཌྜི་ཏ་ཁེ་ཏྟེ ཝཱ, སཱ་མི་ཀེ ཨ་པ་ལོ་ཀེ་ཏྭཱ ཝཱ ཚ་ཌྜེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. སེ་སཾ ཨ་ཊྛ་མ་ས་དི་ས་མེ་ཝཱ་ཏི.
དུ་ཏི་ཡ་ཨུ་ཙྩཱ་ར་ཚ་ཌྜ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༠. ན་ཙྩ་གཱི་ཏ་སི་ཀྑཱ་པ་ད་ཝ་ཎྞ་ནཱ
ད་ས་མེ ན་ཙྩནྟི ཨ་ནྟ་མ་སོ མོ་ར་ན་ཙྩ་མྤི. གཱི་ཏནྟི ཨ་ནྟ་མ་སོ དྷ་མྨ་བྷཱ་ཎ་ཀ་གཱི་ཏ་མྤི. ཝཱ་དི་ཏནྟི ཨ་ནྟ་མ་སོ ཨུ་ད་ཀ་བྷེ་རི་ཝཱ་དི་ཏ་མྤི. ད་སྶ་ནཱ་ཡཱཏི ཨེ་ཏེ་སུ ཡཾ་ཀི་ཉྩི ད་སྶ་ནཱ་ཡ ག་ཙྪ་ནྟི་ཡཱ པ་དེ པ་དེ དུ་ཀྐ་ཊཾ, ཡ་ཏྠ ཋི་ཏཱ པ་སྶ་ཏི ཝཱ སུ་ཎཱ་ཏི ཝཱ, ཨེ་ཀ་པྤ་ཡོ་གེ ཨེ་ཀཱ་པ་ཏྟི, ཏཾ ཏཾ དི་སཾ ཨོ་ལོ་ཀེ་ནྟི་ཡཱ པ་ཡོ་གེ པ་ཡོ་གེ ཨཱ་པ་ཏྟི.
རཱ་ཛ་ག་ཧེ ཚ་བྦ་གྒི་ཡཱ བྷི་ཀྑུ་ནི་ཡོ ཨཱ་ར་བྦྷ ན་ཙྩཱ་དཱི་ནི ད་སྶ་ནཱ་ཡ ག་མ་ན་ཝ་ཏྠུ་སྨིཾ པ་ཉྙ་ཏྟཾ, ས་ཡཾ ཏཱ་ནི ཝ་ཏྠཱུ་ནི ཀ་རོ་ནྟི་ཡཱ, ཨ་ཉྙཾ ཝཱ ཨཱ་ཎཱ་པེ་ནྟི་ཡཱ, ‘‘ཙེ་ཏི་ཡ་སྶ ཨུ་པ་ཧཱ་རཾ དེ་ཐཱ’’ཏི ཨཱི་དི་སེ་ན པ་རི་ཡཱ་ཡེ་ན ཝཱ བྷ་ཎ་ནྟི་ཡཱ, ‘‘ཙེ་ཏི་ཡ་སྶ ཨུ་པ་ཧཱ་རཾ ཀ་རོ་མཱ’’ཏི ཝཱ ཝུ་ཏྟེ ‘‘སཱ་དྷཱུ’’ཏི ས་མྤ་ཊི་ཙྪ་ནྟི་ཡཱ ཙ པཱ་ཙི་ཏྟི་ཡ་མེ་ཝཱ་ཏི ས་བྦ་ཨ་ཊྛ་ཀ་ཐཱ་སུ (པཱ་ཙི. ཨ་ཊྛ. ༨༣༥-༨༣༧) ཝུ་ཏྟཾ, བྷི་ཀྑུ་ནོ ས་བྦ་ཏྠ དུ་ཀྐ་ཊཾ. ‘‘ཏུ་མྷཱ་ཀཾ ཙེ་ཏི་ཡ་སྶ ཨུ་པ་ཊྛཱ་ནཾ ཀ་རོ་མཱ’’ཏི ཝུ་ཏྟེ པ་ན ‘‘ཨུ་པ་ཊྛཱ་ན་ཀ་ར་ཎཾ ནཱ་མ སུ་ནྡ་ར’’ནྟི ཨཱི་དི་སཾ པ་རི་ཡཱ་ཡཾ བྷ་ཎ་ནྟི་ཡཱ, ཨཱ་རཱ་མེ ཋ་ཏྭཱ པ་སྶ་ནྟི་ཡཱ ཝཱ སུ་ཎ་ནྟི་ཡཱ ཝཱ, ཏ་ཐཱ ཨ་ཏྟ་ནོ ཋི་ཏོ་ཀཱ་སཾ ཨཱ་ག་ནྟྭཱ པ་ཡོ་ཛི་ཏཾ པ་ཊི་པ་ཐཾ ག་ཙྪ་ནྟི་ཡཱ ས་མྨུ་ཁཱི་བྷཱུ་ཏཾ ས་ལཱ་ཀ་བྷ་ཏྟཱ་དི་ཀེ ས་ཏི ཀ་ར་ཎཱི་ཡེ ག་ནྟྭཱ, ཨཱ་པ་དཱ་སུ ཝཱ ས་མ་ཛྫ་ཊྛཱ་ནཾ པ་ཝི་སི་ཏྭཱ་པི པ་སྶ་ནྟི་ཡཱ ཝཱ སུ་ཎ་ནྟི་ཡཱ ཝཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ན་ཙྩཱ་དཱི་ནཾ ཨ་ཉྙ་ཏ་ར་ཏཱ, ཨ་ཉྙ་ཏྲ ཨ་ནུ་ཉྙཱ་ཏ་ཀཱ་ར་ཎཱ ག་མ་ནཾ, ད་སྶ་ནཾ ཝཱ ས་ཝ་ནཾ ཝཱ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནི, ཨི་དཾ པ་ན ལོ་ཀ་ཝ་ཛྫཾ, ཨ་ཀུ་ས་ལ་ཙི་ཏྟཾ, ཏི་ཝེ་ད་ན་ནྟི.
ན་ཙྩ་གཱི་ཏ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
ལ་སུ་ཎ་ཝ་གྒོ པ་ཋ་མོ.
༢. ར་ཏྟ་ནྡྷ་ཀཱ་ར་ཝ་གྒོ
༡. ར་ཏྟ་ནྡྷ་ཀཱ་ར་སི་ཀྑཱ་པ་ད་ཝ་ཎྞ་ནཱ
ཨ་ནྡྷ་ཀཱ་ར་ཝ་གྒ་སྶ པ་ཋ་མེ ར་ཏྟ་ནྡྷ་ཀཱ་རེཏི ར་ཏྟི་ཨ་ནྡྷ་ཀཱ་རེ. ཨ་པྤ་དཱི་པེཏི པ་ཛྫོ་ཏ་ཙ་ནྡ་སཱུ་རི་ཡ་ཨ་གྒཱི་སུ ཨེ་ཀེ་ཀེ་ནཱ་པི ཨ་ནོ་བྷཱ་སི་ཏེ. པུ་རི་སེ་ནཱཏི ས་ནྟི་ཊྛི་ཏུཾ ས་ལླ་པི་ཏུ་ཉྩ ཝི་ཉྙུ་ནཱ མ་ནུ་སྶ་པུ་རི་སེ་ན ས་དྡྷིཾ. ས་ནྟི་ཊྛེ་ཡྻ ཝཱཏི ཧ་ཏྠ་པཱ་སེ ཋི་ཏ་མ་ཏྟཱ་ཡ པཱ་ཙི་ཏྟི་ཡཾ. ས་ལླ་པེ་ཡྻཱཏི ཏ་ཏྠ ཋ་ཏྭཱ གེ་ཧ་སི་ཏ་ཀ་ཐཾ ཀ་ཐེ་ནྟི་ཡཱ་པི པཱ་ཙི་ཏྟི་ཡ་མེ་ཝ.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ ཨེ་ཝཾ ས་ནྟི་ཊྛ་ན་ཝ་ཏྠུ་སྨིཾ པ་ཉྙ་ཏྟཾ, པུ་རི་ས་སྶ ཧ་ཏྠ་པཱ་སཾ ཝི་ཛ་ཧི་ཏྭཱ, ཡ་ཀྑཱ་དཱི་ནཾ ཧ་ཏྠ་པཱ་སཾ ཨ་ཝི་ཛ་ཧི་ཏྭཱ་པི ས་ནྟི་ཊྛ་ནྟི་ཡཱ, ས་ལླ་པེ་ནྟི་ཡཱ ཝཱ དུ་ཀྐ་ཊཾ, ཡཾ་ཀི་ཉྩི ཝི་ཉྙུཾ དུ་ཏི་ཡཾ ག་ཧེ་ཏྭཱ ཨེ་ཝཾ ཀ་རོ་ནྟི་ཡཱ, ཨ་ར་ཧོ་པེ་ཀྑཱ་ཡ, ཨ་ཉྙ་ཝི་ཧི་ཏཱ་ཡ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ར་ཏྟ་ནྡྷ་ཀཱ་ར་ཏཱ, པུ་རི་ས་སྶ ཧ་ཏྠ་པཱ་སེ ཋཱ་ནཾ ཝཱ ས་ལླ་པ་ནཾ ཝཱ, ས་ཧཱ་ཡཱ་བྷཱ་ཝོ, ར་ཧོ་པེ་ཀྑ་ཏཱ་ཏི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ཐེ་ཡྻ་ས་ཏྠ་ས་མུ་ཊྛཱ་ནཾ, ཀི་རི་ཡཾ, ས་ཉྙཱ་ཝི་མོ་ཀྑཾ, ས་ཙི་ཏྟ་ཀཾ, ལོ་ཀ་ཝ་ཛྫཾ, ཀཱ་ཡ་ཀ་མྨཾ, ཝ་ཙཱི་ཀ་མྨཾ, ཨ་ཀུ་ས་ལ་ཙི་ཏྟཾ, ཏི་ཝེ་ད་ན་ནྟི.
ར་ཏྟ་ནྡྷ་ཀཱ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༢. པ་ཊི་ཙྪ་ནྣོ་ཀཱ་ས་སི་ཀྑཱ་པ་ད་ཝ་ཎྞ་ནཱ
དུ་ཏི་ཡེ པ་ཊི་ཙྪ་ནྣེ ཨོ་ཀཱ་སེཏི ཀུ་ཊྚཱ་དཱི་སུ ཡེ་ན ཀེ་ན་ཙི པ་ཊི་ཙྪ་ནྣེ, ཨི་ད་མེ་ཝེ་ཏྠ ནཱ་ན་ཏྟཾ.
པ་ཊི་ཙྪ་ནྣོ་ཀཱ་ས་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༣. ཨ་ཛ྄ཛྷོ་ཀཱ་ས་ས་ལླ་པ་ན་སི་ཀྑཱ་པ་ད་ཝ་ཎྞ་ནཱ
ཏ་ཏི་ཡེ ཨ་ཛ྄ཛྷོ་ཀཱ་སེཏི ནཱ་ནཾ, སེ་སཾ ཨུ་བྷ་ཡ་ཏྠཱ་པི པ་ཋ་མ་ས་དི་ས་མེ་ཝཱ་ཏི.
ཨ་ཛ྄ཛྷོ་ཀཱ་ས་ས་ལླ་པ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༤. དུ་ཏི་ཡི་ཀ་ཨུ་ཡྻོ་ཛ་ན་སི་ཀྑཱ་པ་ད་ཝ་ཎྞ་ནཱ
ཙ་ཏུ་ཏྠེ ར་ཐི་ཀཱ་ཡཱཏི ར་ཙྪཱ་ཡཾ. བྱཱུ་ཧེཏི ཨ་ནི་ཝི་དྡྷ་ར་ཙྪཱ་ཡཾ. སི་ངྒྷཱ་ཊ་ཀེཏི ཙ་ཙྩ་རེ. ནི་ཀ་ཎྞི་ཀཾ ཝཱ ཛ་པྤེ་ཡྻཱཏི ཀ་ཎྞ་མཱུ་ལེ ཀི་ཉྩི ཛ་པྤེ་ཡྻ. ཨུ་ཡྻོ་ཛེ་ཡྻཱཏི ཨ་ནཱ་ཙཱ་རཾ ཙ་རི་ཏུ་ཀཱ་མ་ཏཱ་ཡ ‘‘ག་ཙྪ ཏྭ’’ནྟི དུ་ཏི་ཡི་ཀཾ ཨུ་ཡྻོ་ཛེ་ཡྻ. པཱ་ཙི་ཏྟི་ཡནྟི པུ་རི་མ་ན་ཡེ་ནེ་ཝ ཏཱ་ཝ ས་ནྟི་ཊྛ་ནཱ་དཱི་སུ ཏཱི་ཎི པཱ་ཙི་ཏྟི་ཡཱ་ནི, ཨུ་ཡྻོ་ཛེ་ནྟི་ཡཱ པ་ན ཨུ་ཡྻོ་ཛ་ནེ ཙ ཧ་ཏྠ་པཱ་ས་ཝི་ཛ་ཧ་ནེ ཙ དུ་ཀྐ་ཊཾ, ཝི་ཛ་ཧི་ཏེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨེ་ཝཾ ས་ནྟི་ཊྛ་ན་ཝ་ཏྠུ་སྨིཾ པ་ཉྙ་ཏྟཾ, སེ་སཾ པུ་རི་མ་ཏྟ་ཡ་ས་དི་ས་མེ་ཝ. ཨ་ནཱ་པ་ཏྟི་ཡཾ པ་ན ‘‘ན ཨ་ནཱ་ཙཱ་རཾ ཨཱ་ཙ་རི་ཏུ་ཀཱ་མཱ, ས་ཏི ཀ་ར་ཎཱི་ཡེ དུ་ཏི་ཡི་ཀཾ བྷི་ཀྑུ་ནིཾ ཨུ་ཡྻོ་ཛེ་ཏཱི’’ཏི (པཱ་ཙི. ༨༥༢) ཨེ་ཏྟ་ཀཾ ཨ་དྷི་ཀ་ནྟི.
དུ་ཏི་ཡི་ཀ་ཨུ་ཡྻོ་ཛ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༥. ཨ་ནཱ་པུ་ཙྪཱ་པ་ཀྐ་མ་ན་སི་ཀྑཱ་པ་ད་ཝ་ཎྞ་ནཱ
པ་ཉྩ་མེ པུ་རེ་བྷ་ཏྟནྟི ཨ་རུ་ཎུ་གྒ་མ་ནཾ ཨུ་པཱ་དཱ་ཡ ཡཱ་ཝ མ་ཛ྄ཛྷ་ནྷི་ཀཾ. ཨཱ་ས་ནེཏི པ་ལླ་ངྐ་སྶོ་ཀཱ་ས་བྷཱུ་ཏེ. སཱ་མི་ཀེ ཨ་ནཱ་པུ་ཙྪཱཏི ཏ་སྨིཾ ཀུ་ལེ ཡཾ་ཀི་ཉྩི ཝི་ཉྙུཾ མ་ནུ་སྶཾ ཨ་ནཱ་པུ་ཙྪཱ. པ་ཀྐ་མེ་ཡྻཱཏི ཨེ་ཏྠ ཚ་ནྣ་སྶ ཨ་ནྟོ ནི་སཱི་དི་ཏྭཱ ཨ་ནོ་ཝ་སྶ་ཀཾ ཨ་ཛ྄ཛྷོ་ཀཱ་སེ ཨུ་པ་ཙཱ་རཾ ཨ་ཏི་ཀྐཱ་མེ་ནྟི་ཡཱ པ་ཋ་མ་པཱ་དེ དུ་ཀྐ་ཊཾ, དུ་ཏི་ཡེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ ཨ་ནཱ་པུ་ཙྪཱ པ་ཀྐ་མ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, པ་ལླ་ངྐ་སྶ ཨ་ནོ་ཀཱ་སེ དུ་ཀྐ་ཊཾ, ཏ་ཐཱ ཨཱ་པུ་ཙྪི་ཏེ ཨ་ནཱ་པུ་ཙྪི་ཏ་ས་ཉྙཱ་ཡ ཙེ་ཝ ཝེ་མ་ཏི་ཀཱ་ཡ ཙ. ཨཱ་པུ་ཙྪི་ཏ་ས་ཉྙཱ་ཡ པ་ན, ཨ་སཾ་ཧཱ་རི་མེ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. པུ་རེ་བྷ་ཏྟ་ཏཱ, ཨ་ནྟ་ར་གྷ་རེ ནི་ས་ཛྫཱ, ཨཱ་ས་ན་སྶ པ་ལླ་ངྐོ་ཀཱ་ས་ཏཱ, ཨ་ཉྙ་ཏྲ ཨ་ནུ་ཉྙཱ་ཏ་ཀཱ་ར་ཎཱ ཨ་ནཱ་པུ་ཙྪ་ནཾ, ཝུ་ཏྟ་པ་རི་ཙྪེ་དཱ་ཏི་ཀྐ་མོ་ཏི ཨི་མཱ་ནེ་ཏྠ པ་ཉྩ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཀ་ཐི་ན་ས་དི་སཱ་ནི, ཨི་དཾ པ་ན ཀི་རི་ཡཱ་ཀི་རི་ཡ་ནྟི.
ཨ་ནཱ་པུ་ཙྪཱ་པ་ཀྐ་མ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༦. ཨ་ནཱ་པུ་ཙྪཱ་ཨ་བྷི་ནི་སཱི་ད་ན་སི་ཀྑཱ་པ་ད་ཝ་ཎྞ་ནཱ
ཚ་ཊྛེ པ་ཙྪཱ་བྷ་ཏྟནྟི མ་ཛ྄ཛྷ་ནྷི་ཀེ ཝཱི་ཏི་ཝ་ཏྟེ ཡཱ་ཝ སཱུ་རི་ཡ་སྶ ཨ་ཏྠ་ངྒ་མཱ. ཨ་བྷི་ནི་སཱི་དེ་ཡྻ ཝཱཏི ཨཱ་དི་མྷི ནི་སཱི་དི་ཏྭཱ ག་ཙྪ་ནྟི་ཡཱ ཨེ་ཀཱ ཨཱ་པ་ཏྟི, ཨ་ནི་སཱི་དི་ཏྭཱ ནི་པ་ཛྫི་ཏྭཱ་ཝ ག་ཙྪ་ནྟི་ཡཱ་པི ཨེ་ཀཱ, ནི་སཱི་དི་ཏྭཱ ནི་པ་ཛྫ་ནྟི་ཡཱ དྭེ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨཱ་ས་ནེ ཨ་བྷི་ནི་སཱི་ད་ན་ཝ་ཏྠུ་སྨིཾ པ་ཉྙ་ཏྟཾ, སེ་སཾ པ་ཉྩ་མ་ས་དི་ས་མེ་ཝ. ཡ་ཐཱ པ་ན ཏ་ཏྠ ཨ་སཾ་ཧཱ་རི་མེ, ཨེ་ཝ་མི་དྷ དྷུ་ཝ་པ་ཉྙ་ཏྟེ ཨ་ནཱ་པ་ཏྟཱི་ཏི.
ཨ་ནཱ་པུ་ཙྪཱ་ཨ་བྷི་ནི་སཱི་ད་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༧. ཨ་ནཱ་པུ་ཙྪཱ་ས་ནྠ་ར་ཎ་སི་ཀྑཱ་པ་ད་ཝ་ཎྞ་ནཱ
ས་ཏྟ་མེ ཝི་ཀཱ་ལེཏི ཨ་ཏྠ་ངྒ་ཏེ སཱུ་རི་ཡེ. སེ་ཡྻནྟི ཨ་ནྟ་མ་སོ པ་ཎྞ་ས་ནྠཱ་ར་མྤི, སེ་སཾ ཚ་ཊྛ་ས་དི་ས་མེ་ཝ.
ཨི་དཾ པ་ན སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཝི་ཀཱ་ལེ ཀུ་ལཱ་ནི ཨུ་པ་ས་ངྐ་མི་ཏྭཱ སཱ་མི་ཀེ ཨ་ནཱ་པུ་ཙྪི་ཏྭཱ སེ་ཡྻཾ ས་ནྠ་རི་ཏྭཱ ཨ་བྷི་ནི་སཱི་ད་ན་ཝ་ཏྠུ་སྨིཾ པ་ཉྙ་ཏྟཾ, ཨ་ནཱ་པ་ཏྟི་ཡ་ཉྩེ་ཏྠ དྷུ་ཝ་པ་ཉྙ་ཏྟཾ ནཱ་མ ན་ཏྠཱི་ཏི.
ཨ་ནཱ་པུ་ཙྪཱ་ས་ནྠ་ར་ཎ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༨. པ་ར་ཨུ་ཛ྄ཛྷཱ་པ་ན་ཀ་སི་ཀྑཱ་པ་ད་ཝ་ཎྞ་ནཱ
ཨ་ཊྛ་མེ དུ་གྒ་ཧི་ཏེ་ན དཱུ་པ་དྷཱ་རི་ཏེ་ནཱཏི ཡཾ ཝུ་ཏྟཾ, ཏ་ཏོ ཨ་ཉྙ་ཐཱ ག་ཧི་ཏེ་ན ཙ ཨུ་པ་དྷཱ་རི་ཏེ་ན ཙ. པ་རནྟི ‘‘ཨ་ཧཾ ཀི་ར་ཡྻེ ཨ་ཡྻཾ ན ས་ཀྐ་ཙྩཾ ཨུ་པ་ཊྛ་ཧཱ་མཱི’’ཏི་ཨཱ་དི་ནཱ (པཱ་ཙི. ༨༦༩) ན་ཡེ་ན ཨུ་པ་ས་མྤ་ནྣཾ ཨུ་ཛ྄ཛྷཱ་པེ་ནྟི་ཡཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ ཨེ་ཝཾ པ་རཾ ཨུ་ཛ྄ཛྷཱ་པ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ, ཨུ་མྨ་ཏྟི་ཀཱ་དཱི་ནཾ་ཡེ་ཝ ཨ་ནཱ་པ་ཏྟི. དུ་གྒ་ཧི་ཏ་ཏཱ, ཨུ་ཛ྄ཛྷཱ་པ་ནཾ, ཡཾ ཨུ་ཛ྄ཛྷཱ་པེ་ཏི, ཏ་སྶཱ ཨུ་པ་ས་མྤ་ནྣ་ཏཱ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནི, ཨི་དཾ པ་ན དུ་ཀྑ་ཝེ་ད་ན་ནྟི.
པ་ར་ཨུ་ཛ྄ཛྷཱ་པ་ན་ཀ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༩. པ་ར་ཨ་བྷི་ས་པ་ན་སི་ཀྑཱ་པ་ད་ཝ་ཎྞ་ནཱ
ན་ཝ་མེ ཨ་བྷི་ས་པེ་ཡྻཱཏི ས་པ་ཐཾ ཀ་རེ་ཡྻ. ཏ་ཏྠ ‘‘ནི་ར་ཡེ ཨུ་པ་པ་ཛྫཱ་མི, ནི་ར་ཡེ ཨུ་པ་པ་ཛྫ་ཏཱུ’’ཏི་ཨེ་ཝ་མཱ་དཱི་ནི ཝ་ད་མཱ་ནཱ ནི་ར་ཡེ་ན ཨ་བྷི་ས་པ་ཏི ནཱ་མ, ཨ་ཀྐོ་ས་ཏཱི་ཏི ཨ་ཏྠོ. ‘‘གི་ཧི་ནཱི ཧོ་མི, གི་ཧི་ནཱི ཧོ་ཏཱུ’’ཏི་ཨེ་ཝ་མཱ་དཱི་ནི ཝ་ད་མཱ་ནཱ བྲ་ཧྨ་ཙ་རི་ཡེ་ན. ཏ་སྶཱ ཝཱ་ཙཱ་ཡ ཝཱ་ཙཱ་ཡ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཙ་ཎྜ་ཀཱ་ལི༹ཾ ཨཱ་ར་བྦྷ ཨེ་ཝཾ ཨ་བྷི་ས་པ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ, ཏི་ར་ཙྪཱ་ན་ཡོ་ནི་ཡཱ ཝཱ པེ་ཏྟི་ཝི་ས་ཡེ་ན ཝཱ མ་ནུ་སྶ་དོ་བྷ་གྒེ་ན ཝཱ ཨ་བྷི་ས་པ་ནེ དུ་ཀྐ་ཊཾ. ཨ་ཏྠ་དྷ་མྨཱ་ནུ་སཱ་ས་ནི་པུ་རེ་ཀྑཱ་རཱ་ནཾ ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ནི་ར་ཡེ་ན ཝཱ བྲ་ཧྨ་ཙ་རི་ཡེ་ན ཝཱ ཨ་བྷི་ས་པ་ནཾ, ཨུ་པ་ས་མྤ་ནྣ་ཏཱ, ཨ་ཏྠ་དྷ་མྨ་པུ་རེ་ཀྑཱ་རཱ་དཱི་ནཾ ཨ་བྷཱ་ཝོ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་ཊྛ་མ་ས་དི་སཱ་ནེ་ཝཱ་ཏི.
པ་ར་ཨ་བྷི་ས་པ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༠. རོ་ད་ན་སི་ཀྑཱ་པ་ད་ཝ་ཎྞ་ནཱ
ད་ས་མེ ཝ་དྷི་ཏྭཱཏི ཧ་ཏྠཱ་དཱི་ཧི པ་ཧ་རི་ཏྭཱ, ཨུ་བྷ་ཡཾ ཀ་རོ་ནྟི་ཡཱ་ཝ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཙ་ཎྜ་ཀཱ་ལི༹ཾ ཨཱ་ར་བྦྷ ཨ་ཏྟཱ་ནཾ ཝ་དྷི་ཏྭཱ རོ་ད་ན་ཝ་ཏྠུ་སྨིཾ པ་ཉྙ་ཏྟཾ, ཀེ་ཝ་ལཾ ཝ་དྷ་ནྟི་ཡཱ ཝཱ རོ་ད་ནྟི་ཡཱ ཝཱ དུ་ཀྐ་ཊ་མེ་ཝ. ཉཱ་ཏི་རོ་ག་བྷོ་ག་བྱ་ས་ནེ་ཧི ཕུ་ཊྛཱ་ཡ ཀེ་ཝ་ལཾ རོ་ད་ནྟི་ཡཱ ཨེ་ཝ ན ཝ་དྷ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ཏྟཱ་ནཾ ཝ་དྷ་ན་ཉྩེ་ཝ, རོ་ད་ན་ཉྩཱ་ཏི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་མ་ནུ་བྷཱ་ས་ན་ས་དི་སཱ་ནི, ཨི་དཾ པ་ན ཀི་རི་ཡ་མེ་ཝཱ་ཏི.
རོ་ད་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
ར་ཏྟ་ནྡྷ་ཀཱ་ར་ཝ་གྒོ དུ་ཏི་ཡོ.
༣. ན་གྒ་ཝ་གྒོ
༡. ན་གྒ་སི་ཀྑཱ་པ་ད་ཝ་ཎྞ་ནཱ
ན་གྒ་ཝ་གྒ་སྶ པ་ཋ་མེ ན་གྒཱཏི ཨ་ནི་ཝ་ཏྠཱ ཝཱ ཨ་པཱ་རུ་ཏཱ ཝཱ. ཨེ་ཝ་ཉྷི ན་ཧཱ་ཡ་ནྟི་ཡཱ ས་བྦ་པྤ་ཡོ་གེ་སུ དུ་ཀྐ་ཊཾ, ན་ཧཱ་ན་པ་རི་ཡོ་སཱ་ནེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨེ་ཝཾ ན་ཧཱ་ན་ཝ་ཏྠུ་སྨིཾ པ་ཉྙ་ཏྟཾ, ཨུ་ད་ཀ་སཱ་ཊི་ཀ་ཙཱི་ཝ་རེ ཨ་ཙྪི་ནྣེ ཝཱ ན་ཊྛེ ཝཱ, ‘‘མ་ཧ་གྒྷཾ ཨི་དཾ དི་སྭཱ ཙོ་རཱ་པི ཧ་རེ་ཡྻུ’’ནྟི ཨེ་ཝ་རཱུ་པཱ་སུ ཨཱ་པ་དཱ་སུ ཝཱ ན་ཧཱ་ཡ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ན་གྒ་ཏཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, ན་ཧཱ་ན་པ་རི་ཡོ་སཱ་ན་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.
ན་གྒ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༢. ཨུ་ད་ཀ་སཱ་ཊི་ཀ་སི་ཀྑཱ་པ་ད་ཝ་ཎྞ་ནཱ
དུ་ཏི་ཡེ སཱ་ཝ་ཏྠི་ཡཾ ཚ་བྦ་གྒི་ཡཱ བྷི་ཀྑུ་ནི་ཡོ ཨཱ་ར་བྦྷ ཨ་པྤ་མཱ་ཎི་ཀཱ་ཡོ ཨུ་ད་ཀ་སཱ་ཊི་ཀཱ་ཡོ དྷཱ་ར་ཎ་ཝ་ཏྠུ་སྨིཾ པ་ཉྙ་ཏྟཾ, སེ་ས་མེ་ཏྠ ས་བྦཾ ར་ཏ་ན་ཝ་གྒེ ནི་སཱི་ད་ན་སི་ཀྑཱ་པ་དེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦ་ནྟི.
ཨུ་ད་ཀ་སཱ་ཊི་ཀ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༣. ཙཱི་ཝ་ར་སི་བྦ་ན་སི་ཀྑཱ་པ་ད་ཝ་ཎྞ་ནཱ
ཏ་ཏི་ཡེ ཝི་སི་བྦེ་ཏྭཱཏི དུ་སྶི་བྦི་ཏཾ པུ་ན་སི་བྦ་ན་ཏྠཱ་ཡ ཝི་སི་བྦེ་ཏྭཱ. ཨ་ན་ནྟ་རཱ་ཡི་ཀི་ནཱིཏི ད་ས་སུ ཨ་ནྟ་རཱ་ཡེ་སུ ཨེ་ཀེ་ཀ་སྨི་མྤི ཨ་ས་ཏི. ཨ་ཉྙ་ཏྲ ཙ་ཏཱུ་ཧ་པ་ཉྩཱ་ཧཱཏི ཝི་སི་བྦི་ཏ་དི་ཝ་ས་ཏོ པ་ཉྩ དི་ཝ་སེ ཨ་ཏི་ཀྐཱ་མེ་ཏྭཱ ‘‘ནེ་ཝ སི་བྦི་སྶཱ་མི, ན སི་བྦཱ་པ་ནཱ་ཡ ཨུ་སྶུ་ཀྐཾ ཀ་རི་སྶཱ་མཱི’’ཏི དྷུ་རཾ ནི་ཀྑི་ཏྟ་མ་ཏྟེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཙཱི་ཝ་རཾ ཝི་སི་བྦེ་ཏྭཱ ན སི་བྦ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ, ཏ་ཐཱ ཨུ་བྷི་ནྣ་མྤི ཨ་ཉྙ་སྨིཾ པ་རི་ཀྑཱ་རེ. ཡཱ པ་ན ཨ་ནྟ་རཱ་ཡི་ཀི་ནཱི ཝཱ ཧོ་ཏི, པ་རི་ཡེ་སི་ཏྭཱ ཝཱ ཀི་ཉྩི ན ལ་བྷ་ཏི, ཀ་རོ་ནྟཱི ཝཱ པ་ཉྩཱ་ཧཾ ཨ་ཏི་ཀྐཱ་མེ་ཏི, ཏ་སྶཱ ཙ, གི་ལཱ་ནཱ་ཡ ཙ, ཨཱ་པ་དཱ་སུ ཙ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ནི་ཝཱ་ས་ན་པཱ་རུ་པ་ནུ་པ་ག་ཙཱི་ཝ་ར་ཏཱ, ཨུ་པ་ས་མྤ་ནྣཱ་ཡ ས་ནྟ་ཀ་ཏཱ, སི་བྦ་ན་ཏྠཱ་ཡ ཝི་སི་བྦ་ནཾ ཝཱ ཝི་སི་བྦཱ་པ་ནཾ ཝཱ, ཨ་ཉྙ་ཏྲ ཨ་ནུ་ཉྙཱ་ཏ་ཀཱ་ར་ཎཱ པ་ཉྩཱ་ཧཱ་ཏི་ཀྐ་མོ, དྷུ་ར་ནི་ཀྑེ་པོ་ཏི ཨི་མཱ་ནེ་ཏྠ པ་ཉྩ ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་མ་ནུ་བྷཱ་ས་ན་ས་དི་སཱ་ནཱི་ཏི.
ཙཱི་ཝ་ར་སི་བྦ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༤. ས་ངྒྷཱ་ཊི་ཙཱ་ར་སི་ཀྑཱ་པ་ད་ཝ་ཎྞ་ནཱ
ཙ་ཏུ་ཏྠེ པ་ཉྩ ཨ་ཧཱ་ནི པ་ཉྩཱ་ཧཾ, པ་ཉྩཱ་ཧ་མེ་ཝ པ་ཉྩཱ་ཧི་ཀཾ. ས་ངྒྷཱ་ཊཱི་ནཾ ཙཱ་རོ ས་ངྒྷཱ་ཊི་ཙཱ་རོ, པ་རི་བྷོ་ག་ཝ་སེ་ན ཝཱ ཨོ་ཏཱ་པ་ན་ཝ་སེ་ན ཝཱ ས་ངྒྷ་ཊི་ཏ་ཊྛེ་ན ‘ས་ངྒྷཱ་ཊཱི’ཏི ལ་དྡྷ་ནཱ་མཾ ཏི་ཙཱི་ཝ་རཾ, ཨུ་ད་ཀ་སཱ་ཊི་ཀཱ, སཾ་ཀ་ཙྩི་ཀཱ་ཏི ཨི་མེ་སཾ པ་ཉྩ་ནྣཾ ཙཱི་ཝ་རཱ་ནཾ པ་རི་ཝ་ཏྟ་ན་ནྟི ཨ་ཏྠོ. ཨ་ཏི་ཀྐཱ་མེ་ཡྻ པཱ་ཙི་ཏྟི་ཡནྟི ཚ་ཊྛེ ཨ་རུ་ཎུ་གྒ་མ་ནེ ཨེ་ཀ་སྨིཾ ཙཱི་ཝ་རེ ཝུ་ཏྟ་ན་ཡེ་ན ཨ་པ་རི་ཝ་ཏྟི་ཏེ ཨེ་ཀཱ ཨཱ་པ་ཏྟི, པ་ཉྩ་སུ པ་ཉྩ.
སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཙཱི་ཝ་རཾ ནི་ཀྑི་པི་ཏྭཱ ས་ནྟ་རུ་ཏྟ་རེ་ན ཛ་ན་པ་ད་ཙཱ་རི་ཀཾ པ་ཀྐ་མ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, པ་ཉྩཱ་ཧཱ་ན་ཏི་ཀྐ་ནྟེ དྭི་ཀ་དུ་ཀྐ་ཊཾ. ཏ་སྨིཾ པ་ན ཨ་ན་ཏི་ཀྐ་ནྟ་ས་ཉྙཱ་ཡ, པ་ཉྩ་མཾ དི་ཝ་སཾ པ་ཉྩ ཙཱི་ཝ་རཱ་ནི ནི་ཝཱ་སེ་ནྟི་ཡཱ ཝཱ པཱ་རུ་པ་ནྟི་ཡཱ ཝཱ ཨོ་ཏཱ་པེ་ནྟི་ཡཱ ཝཱ, གི་ལཱ་ནཱ་ཡ, ‘‘ཨི་དཾ མེ ཙཱི་ཝ་རཾ མ་ཧ་གྒྷཾ ཨཱི་དི་སེ ཙོ་ར་བྷ་ཡེ ན ས་ཀྐཱ དྷཱ་རེ་ཏུ’’ནྟི ཨེ་ཝ་རཱུ་པཱ་སུ ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. པ་ཉྩ་ནྣཾ ཙཱི་ཝ་རཱ་ནཾ ཨ་ཉྙ་ཏ་ར་ཏཱ, པ་ཉྩཱ་ཧཱ་ཏི་ཀྐ་མོ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, ཨ་པ་རི་ཝ་ཏྟ་ན་ནྟི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཀ་ཐི་ན་ས་དི་སཱ་ནཱི་ཏི.
ས་ངྒྷཱ་ཊི་ཙཱ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༥. ཙཱི་ཝ་ར་ས་ངྐ་མ་ནཱི་ཡ་སི་ཀྑཱ་པ་ད་ཝ་ཎྞ་ནཱ
པ་ཉྩ་མེ ཙཱི་ཝ་ར་ས་ངྐ་མ་ནཱི་ཡནྟི ས་ངྐ་མེ་ཏ་བྦཾ ཙཱི་ཝ་རཾ, ཨ་ཉྙི་སྶཱ ས་ནྟ་ཀཾ ཨ་ནཱ་པུ་ཙྪཱ ག་ཧི་ཏཾ པུ་ན པ་ཊི་དཱ་ཏ་བྦཾ པ་ཉྩ་ནྣཾ ཨ་ཉྙ་ཏ་རཾ ཙཱི་ཝ་ར་ནྟི ཨ་ཏྠོ. དྷཱ་རེ་ཡྻཱཏི ས་ཙེ ཏཾ ནི་ཝཱ་སེ་ཏི ཝཱ པཱ་རུ་པ་ཏི ཝཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུ་ནིཾ ཨཱ་ར་བྦྷ བྷི་ཀྑུ་ནི་ཡཱ ཙཱི་ཝ་རཾ ཨཱ་དཱ་ཡ ཨ་ནཱ་པུ་ཙྪཱ པཱ་རུ་པ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ. ཡཱ པ་ན ཏཱ་ཡ ཝཱ དི་ནྣཾ, ཏཾ ཝཱ ཨཱ་པུ་ཙྪཱ, ཨ་ཙྪི་ནྣ་ན་ཊྛ་ཙཱི་ཝ་རི་ཀཱ ཝཱ ཧུ་ཏྭཱ, ‘‘ཨི་དཾ མེ ཙཱི་ཝ་རཾ མ་ཧ་གྒྷཾ ཨཱི་དི་སེ ཙོ་ར་བྷ་ཡེ ན ས་ཀྐཱ དྷཱ་རེ་ཏུ’’ནྟི ཨེ་ཝ་རཱུ་པཱ་སུ ཨཱ་པ་དཱ་སུ ཝཱ དྷཱ་རེ་ཏི, ཏ་སྶཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཙཱི་ཝ་ར་ས་ངྐ་མ་ནཱི་ཡ་ཏཱ, ཨུ་པ་ས་མྤ་ནྣཱ་ཡ ས་ནྟ་ཀ་ཏཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, དྷཱ་ར་ཎ་ནྟི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི པ་ཋ་མ་ཀ་ཐི་ན་ས་དི་སཱ་ནི, ཨི་དཾ པ་ན ཀི་རི་ཡཱ་ཀི་རི་ཡ་ནྟི.
ཙཱི་ཝ་ར་ས་ངྐ་མ་ནཱི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༦. ག་ཎ་ཙཱི་ཝ་ར་སི་ཀྑཱ་པ་ད་ཝ་ཎྞ་ནཱ
ཚ་ཊྛེ ག་ཎ་སྶཱཏི བྷི་ཀྑུ་ནི་ས་ངྒྷ་སྶ. ཙཱི་ཝ་ར་ལཱ་བྷནྟི ཝི་ཀ་པྤ་ནུ་པ་ག་མྤི པ་ཙྪི་མཾ ལ་བྷི་ཏ་བྦཾ ཙཱི་ཝ་རཾ. ཨ་ནྟ་རཱ་ཡཾ ཀ་རེ་ཡྻཱཏི ཡ་ཐཱ ཏེ དཱ་ཏུ་ཀཱ་མཱ ན དེ་ནྟི, ཨེ་ཝཾ པ་ར་ཀྐ་མེ་ཡྻ. པཱ་ཙི་ཏྟི་ཡནྟི ས་ཙེ ཏ་སྶཱ ཝ་ཙ་ནེ་ན ཏེ ན དེ་ནྟི, བྷི་ཀྑུ་ནི་ཡཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ག་ཎ་སྶ ཙཱི་ཝ་ར་ལཱ་བྷ་ནྟ་རཱ་ཡ་ཀ་ར་ཎ་ཝ་ཏྠུ་སྨིཾ པ་ཉྙ་ཏྟཾ, ཨ་ཉྙ་སྨིཾ པ་རི་ཀྑཱ་རེ དུ་ཀྐ་ཊཾ, ས་མྦ་ཧུ་ལཱ་ནཾ པ་ན ཨེ་ཀ་བྷི་ཀྑུ་ནི་ཡཱ ཝཱ ཙཱི་ཝ་ར་ལཱ་བྷེ་པི དུ་ཀྐ་ཊ་མེ་ཝ. ‘‘ས་མ་གྒྷ་ཀཱ་ལེ ད་སྶ་ཐཱ’’ཏི ཨེ་ཝཾ ཨཱ་ནི་སཾ་སཾ ད་སྶེ་ཏྭཱ ནི་ཝཱ་རེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཝི་ཀ་པྤ་ནུ་པ་ག་པ་ཙྪི་མ་ཏཱ, ས་ངྒྷ་སྶ པ་རི་ཎ་ཏ་བྷཱ་ཝོ, ཝི་ནཱ ཨཱ་ནི་སཾ་ས་ད་སྶ་ནེ་ན ཨ་ནྟ་རཱ་ཡ་ཀ་ར་ཎ་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནཱི་ཏི.
ག་ཎ་ཙཱི་ཝ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༧. པ་ཊི་བཱ་ཧ་ན་སི་ཀྑཱ་པ་ད་ཝ་ཎྞ་ནཱ
ས་ཏྟ་མེ དྷ་མྨི་ཀཾ ཙཱི་ཝ་ར་ཝི་བྷ་ངྒནྟི ས་མ་གྒེ་ན ས་ངྒྷེ་ན ས་ནྣི་པ་ཏི་ཏྭཱ ཀ་རཱི་ཡ་མཱ་ནཾ ཙཱི་ཝ་ར་ཝི་བྷ་ངྒ. པ་ཊི་བཱ་ཧེ་ཡྻཱཏི པ་ཊི་སེ་དྷེ་ཡྻ, ཨེ་ཝཾ པ་ཊི་སེ་དྷེ་ནྟི་ཡཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ དྷ་མྨི་ཀཾ ཙཱི་ཝ་ར་ཝི་བྷ་ངྒཾ པ་ཊི་བཱ་ཧ་ན་ཝ་ཏྠུ་སྨིཾ པ་ཉྙ་ཏྟཾ, དྷ་མྨི་ཀེ ཝེ་མ་ཏི་ཀཱ་ཡ, ཨ་དྷ་མྨི་ཀེ དྷ་མྨི་ཀ་ས་ཉྙཱ་ཡ ཙེ་ཝ ཝེ་མ་ཏི་ཀཱ་ཡ ཙ དུ་ཀྐ་ཊཾ. ཨུ་བྷ་ཡ་ཏྠ ཨ་དྷ་མྨི་ཀ་ས་ཉྙཱ་ཡ, ཨཱ་ནི་སཾ་སཾ ད་སྶེ་ཏྭཱ པ་ཊི་བཱ་ཧ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཙཱི་ཝ་ར་ཝི་བྷ་ངྒ་སྶ དྷ་མྨི་ཀ་ཏཱ, དྷ་མྨི་ཀ་ས་ཉྙི་ཏཱ, ཝི་ནཱ ཨཱ་ནི་སཾ་སེ་ན པ་ཊི་བཱ་ཧ་ན་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནེ་ཝཱ་ཏི.
པ་ཊི་བཱ་ཧ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༨. ཙཱི་ཝ་ར་དཱ་ན་སི་ཀྑཱ་པ་ད་ཝ་ཎྞ་ནཱ
ཨ་ཊྛ་མེ ས་མ་ཎ་ཙཱི་ཝ་རནྟི ཀ་པྤ་ཀ་ཏཾ ནི་ཝཱ་ས་ན་པཱ་རུ་པ་ནུ་པ་གཾ, ཨེ་ཝ་རཱུ་པཾ ཋ་པེ་ཏྭཱ པ་ཉྩ ས་ཧ་དྷ་མྨི་ཀེ མཱ་ཏཱ་པི་ཏ་རོ ཙ ཡ་སྶ ཀ་སྶ་ཙི ག་ཧ་ཊྛ་སྶ ཝཱ པ་བྦ་ཛི་ཏ་སྶ ཝཱ པ་རི་ཙྩ་ཛི་ཏྭཱ དེ་ནྟི་ཡཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨ་གཱ་རི་ཀ་སྶ ས་མ་ཎ་ཙཱི་ཝ་ར་དཱ་ན་ཝ་ཏྠུ་སྨིཾ པ་ཉྙ་ཏྟཾ, བྷི་ཀྑུ་ནོ དུ་ཀྐ་ཊཾ. མཱ་ཏཱ་པི་ཏཱུ་ནཾ པ་རི་ཙྩ་ཛི་ཏྭཱ་པི, ཨ་ཉྙེ་སཾ ཏཱ་ཝ་ཀཱ་ལི་ཀ་མེ་ཝ དེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ས་མ་ཎ་ཙཱི་ཝ་ར་ཏཱ, ཋ་པེ་ཏྭཱ ས་ཧ་དྷ་མྨི་ཀེ ཙ མཱ་ཏཱ་པི་ཏ་རོ ཙ ཨ་ཉྙེ་སཾ དཱ་ནཾ, ཨ་ཏཱ་ཝ་ཀཱ་ལི་ཀ་ཏཱ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་ཉྩ་རི་ཏྟ་ས་དི་སཱ་ནཱི་ཏི.
ཙཱི་ཝ་ར་དཱ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༩. ཀཱ་ལ་ཨ་ཏི་ཀྐ་མ་ན་སི་ཀྑཱ་པ་ད་ཝ་ཎྞ་ནཱ
ན་ཝ་མེ དུ་བྦ་ལ་ཙཱི་ཝ་ར་པ་ཙྩཱ་སཱ་ཡཱཏི དུ་བྦ་ལཱ་ཡ ཙཱི་ཝ་ར་པ་ཙྩཱ་སཱ་ཡ, ‘‘ས་ཙེ ས་ཀྐོ་མ ད་སྶཱ་མཱ’’ཏི ཨེ་ཏྟ་ཀ་མ་ཏྟཾ སུ་ཏྭཱ ཨུ་པྤཱ་དི་ཏཱ་ཡ ཨཱ་སཱ་ཡཱ་ཏི ཨ་ཏྠོ. ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཡྻཱཏི ཝ་སྶཾ་ཝུ་ཊྛ་བྷི་ཀྑུ་ནཱི་ཧི ཀཱ་ལ་ཙཱི་ཝ་རེ བྷཱ་ཛི་ཡ་མཱ་ནེ ‘‘ཨཱ་ག་མེ་ཡྻཱ་ཐ, ཨ་ཡྻེ, ཨ་ཏྠི ས་ངྒྷ་སྶ ཙཱི་ཝ་ར་པ་ཙྩཱ་སཱ’’ཏི ཝ་ཏྭཱ ཏཾ ཙཱི་ཝ་ར་ཝི་བྷ་ངྒཾ ཙཱི་ཝ་ར་ཀཱ་ལཾ ཨ་ཏི་ཀྐཱ་མེ་ཡྻ, ཏ་སྶཱ ཨ་ན་ཏྠ་ཏེ ཀ་ཐི་ནེ ཝ་སྶཱ་ན་སྶ པ་ཙྪི་མ་མཱ་སཾ, ཨ་ཏྠ་ཏེ ཀ་ཐི་ནེ ཀ་ཐི་ནུ་བྦྷཱ་ར་དི་ཝ་སཾ ཨ་ཏི་ཀྐཱ་མེ་ནྟི་ཡཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ དུ་བྦ་ལ་ཙཱི་ཝ་ར་པ་ཙྩཱ་སཱ་ཡ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐ་མ་ན་ཝ་ཏྠུ་སྨིཾ པ་ཉྙ་ཏྟཾ, དུ་བྦ་ལ་ཙཱི་ཝ་རེ ཝེ་མ་ཏི་ཀཱ་ཡ, ཨ་དུ་བྦ་ལ་ཙཱི་ཝ་རེ དུ་བྦ་ལ་ཙཱི་ཝ་ར་ས་ཉྙཱ་ཡ ཙེ་ཝ ཝེ་མ་ཏི་ཀཱ་ཡ ཙ དུ་ཀྐ་ཊཾ. ཨུ་བྷ་ཡ་ཏྠ ཨ་དུ་བྦ་ལ་ཙཱི་ཝ་ར་ས་ཉྙཱ་ཡ, ཀི་ཉྩཱ་པི ‘ན ས་ཀྐོ་མཱ’ཏི ཝ་ད་ནྟི, ‘‘ཨི་དཱ་ནི པ་ན ཏེ་སཾ ཀ་པྤཱ་སོ ཝཱ ཨུ་པྤ་ཛྫི་སྶ་ཏི, ས་དྡྷོ ཝཱ པུ་རི་སོ ཨཱ་ག་མི་སྶ་ཏི, ཏ་སྨིཾ ཨཱ་ག་ཏེ ཨ་དྡྷཱ ད་སྶ་ནྟཱི’’ཏི ཨེ་ཝཾ ཨཱ་ནི་སཾ་སཾ ད་སྶེ་ཏྭཱ ནི་ཝཱ་རེ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. དུ་བྦ་ལ་ཙཱི་ཝ་ར་ཏཱ, དུ་བྦ་ལ་ས་ཉྙི་ཏཱ, ཝི་ནཱ ཨཱ་ནི་སཾ་སེ་ན ནི་ཝཱ་ར་ཎ་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནཱི་ཏི.
ཀཱ་ལ་ཨ་ཏི་ཀྐ་མ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༡༠. ཀ་ཐི་ནུ་དྡྷཱ་ར་སི་ཀྑཱ་པ་ད་ཝ་ཎྞ་ནཱ
ད་ས་མེ དྷ་མྨི་ཀཾ ཀ་ཐི་ནུ་དྡྷཱ་རནྟི ས་བྦཱ་སཾ བྷི་ཀྑུ་ནཱི་ནཾ ཨ་ཀཱ་ལ་ཙཱི་ཝ་རཾ དཱ་ཏུ་ཀཱ་མེ་ན ཨུ་པཱ་ས་ཀེ་ན ཡ་ཏྟ་ཀོ ཨ་ཏྠཱ་ར་མཱུ་ལི་ཀོ ཨཱ་ནི་སཾ་སོ, ཏ་ཏོ ཨ་དྷི་ཀཾ ཝཱ ས་མ་ཀཾ ཝཱ ད་ཏྭཱ ཡཱ་ཙི་ཏེ་ན ས་མ་གྒེ་ན བྷི་ཀྑུ་ནི་ས་ངྒྷེ་ན ཡཾ ཀ་ཐི་ནཾ ཉ་ཏྟི་དུ་ཏི་ཡ་ཀ་མྨེ་ན ཨ་ནྟ་རཱ ཨུ་དྡྷ་རཱི་ཡ་ཏི, ཏ་སྶ སོ ཨུ་དྡྷཱ་རོ ‘དྷ་མྨི་ཀོ’ཏི ཝུ་ཙྩ་ཏི, ཨེ་ཝ་རཱུ་པཾ ཀ་ཐི་ནུ་དྡྷཱ་ར་ནྟི ཨ་ཏྠོ. པ་ཊི་བཱ་ཧེ་ཡྻཱཏི ནི་ཝཱ་རེ་ཡྻ, ཏ་སྶ ཨེ་ཝ་རཱུ་པཾ ཀ་ཐི་ནུ་དྡྷཱ་རཾ ནི་ཝཱ་རེ་ནྟི་ཡཱ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཀ་ཐི་ནུ་དྡྷཱ་རཾ པ་ཊི་བཱ་ཧ་ན་ཝ་ཏྠུ་སྨིཾ པ་ཉྙ་ཏྟཾ, སེ་སཾ ས་ཏྟ་མེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦ་ནྟི.
ཀ་ཐི་ནུ་དྡྷཱ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
ན་གྒ་ཝ་གྒོ ཏ་ཏི་ཡོ.
༤. ཏུ་ཝ་ཊྚ་ཝ་གྒོ
༡. ཨེ་ཀ་མ་ཉྩ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ
ཏུ་ཝ་ཊྚ་ཝ་གྒ་སྶ པ་ཋ་མེ ཏུ་ཝ་ཊྚེ་ཡྻུནྟི ནི་པ་ཛྫེ་ཡྻུཾ. ཏཱ་སུ པ་ན ཨེ་ཀཱ་ཡ ཝཱ ནི་པ་ནྣཱ་ཡ ཨ་པ་རཱ ནི་པ་ཛྫ་ཏུ, དྭེ་པི ཝཱ ས་ཧེ་ཝ ནི་པ་ཛྫ་ནྟུ, དྭི་ནྣ་མྤི པཱ་ཙི་ཏྟི་ཡཾ.
སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ དྭི་ནྣཾ ཨེ་ཀ་མ་ཉྩེ ཏུ་ཝ་ཊྚ་ན་ཝ་ཏྠུ་སྨིཾ པ་ཉྙ་ཏྟཾ, ས་ཙེ པ་ན ཨེ་ཀཱ་ཡ ནི་པ་ནྣཱ་ཡ ཨེ་ཀཱ ནི་སཱི་ད་ཏི, ཨུ་བྷོ ཝཱ ནི་སཱི་ད་ནྟི, ཏཱ་སཾ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨེ་ཀ་མ་ཉྩ་ཏཱ, དྭི་ནྣཾ ཏུ་ཝ་ཊྚ་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.
ཨེ་ཀ་མ་ཉྩ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༢. ཨེ་ཀ་ཏྠ་ར་ཎ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ
དུ་ཏི་ཡེ ཨེ་ཀཾ ཨ་ཏྠ་ར་ཎ་ཉྩེ་ཝ པཱ་ཝུ་ར་ཎ་ཉྩ ཨེ་ཏཱ་ས་ནྟི ཨེ་ཀ་ཏྠ་ར་ཎ་པཱ་ཝུ་ར་ཎཱ, སཾ་ཧཱ་རི་མཱ་ནཾ པཱ་ཝཱ་ར་ཏྠ་ར་ཎ་ཀ་ཊ་སཱ་ར་ཀཱ་དཱི་ནཾ ཨེ་ཀཾ ཨ་ནྟཾ ཨ་ཏྠ་རི་ཏྭཱ ཨེ་ཀཾ པཱ་རུ་པི་ཏྭཱ ཏུ་ཝ་ཊྚེ་ནྟཱི་ན་མེ་ཏཾ ཨ་དྷི་ཝ་ཙ་ནཾ. པཱ་ཙི་ཏྟི་ཡནྟི ཏཾ་ཡེ་ཝ ཨ་ཏྠ་རི་ཏྭཱ ཏཾ པཱ་རུ་པི་ཏྭཱ ནི་པ་ཛྫ་ནྟཱི་ནཾ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨེ་ཝཾ ཏུ་ཝ་ཊྚ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ཏྠ་ར་ཎེ ཝཱ པཱ་ཝུ་ར་ཎེ ཝཱ ཨེ་ཀ་སྨིཾ དུ་ཀྐ་ཊཾ, ནཱ་ན་ཏྠ་ར་ཎ་པཱ་ཝུ་ར་ཎེ དྭི་ཀ་དུ་ཀྐ་ཊཾ. ཏ་སྨིཾ པ་ན ནཱ་ན་ཏྠ་ར་ཎ་པཱ་ཝུ་ར་ཎ་ས་ཉྙཱ་ཡ, ཝ་ཝ་ཏྠཱ་ནཾ ད་སྶེ་ཏྭཱ ནི་པ་ཛྫ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. སེ་སཾ པ་ཋ་མ་ས་དི་ས་མེ་ཝཱ་ཏི.
ཨེ་ཀ་ཏྠ་ར་ཎ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༣. ཨ་ཕཱ་སུ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ
ཏ་ཏི་ཡེ ཨ་ཕཱ་སུནྟི ‘‘ཨི་མི་ནཱ ཨི་མི་སྶཱ ཨ་ཕཱ་སུ བྷ་ཝི་སྶ་ཏཱི’’ཏི ཨ་ནཱ་པུ་ཙྪཱ པུ་ར་ཏོ ཙ་ངྐ་མ་ན་ཊྛཱ་ན་ནི་སྶ་ཛྫཱ་ད་ཡོ ཝཱ ཨུ་དྡི་ས་ཨུ་དྡི་སཱ་པ་ན་པ་རི་པུ་ཙྪ་ན་ས་ཛ྄ཛྷཱ་ཡཾ ཝཱ ཀ་རོ་ནྟི་ཡཱ ཙ་ངྐ་མ་ནེ ནི་ཝ་ཏྟ་ན་ག་ཎ་ནཱ་ཡ, ཋཱ་ནཱ་དཱི་སུ པ་ཡོ་ག་ག་ཎ་ནཱ་ཡ, ཨུ་དྡེ་སཱ་དཱི་སུ པ་ད་ག་ཎ་ནཱ་ཡ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ས་ཉྩི་ཙྩ ཨ་ཕཱ་སུ་ཀ་ར་ཎ་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ, ན ཨ་ཕཱ་སུ་ཀཱ་མ་ཏཱ་ཡ, ཨཱ་པུ་ཙྪཱ པུ་ར་ཏོ ཙ་ངྐ་མ་ནཱ་དཱི་ནི ཀ་རོ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨུ་པ་ས་མྤ་ནྣ་ཏཱ, ཨ་ཕཱ་སུ་ཀཱ་མ་ཏཱ, ཨ་ཕཱ་སུ་ཀ་ར་ཎཾ, ཨ་ནཱ་པུ་ཙྪ་ན་ནྟི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནི, ཨི་དཾ པ་ན ཀི་རི་ཡཱ་ཀི་རི་ཡཾ, དུ་ཀྑ་ཝེ་ད་ན་ནྟི.
ཨ་ཕཱ་སུ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༤. ན་ཨུ་པ་ཊྛཱ་པ་ན་སི་ཀྑཱ་པ་ད་ཝ་ཎྞ་ནཱ
ཙ་ཏུ་ཏྠེ དུ་ཀྑི་ཏནྟི གི་ལཱ་ནཾ. ས་ཧ་ཛཱི་ཝི་ནིནྟི ས་དྡྷི་ཝི་ཧཱ་རི་ནིཾ. ནེ་ཝ ཨུ་པ་ཊྛ་ཧེ་ཡྻཱཏི ཏ་སྶཱ ཨུ་པ་ཊྛཱ་ནཾ ས་ཡཾ ཝཱ ཨ་ཀ་རོ་ནྟི་ཡཱ, པ་རེ་ཧི ཝཱ ཨ་ཀཱ་རེ་ནྟི་ཡཱ དྷུ་རཾ ནི་ཀྑི་ཏྟ་མ་ཏྟེ པཱ་ཙི་ཏྟི་ཡཾ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ དུ་ཀྑི་ཏཾ ས་ཧ་ཛཱི་ཝི་ནིཾ ཨ་ནུ་པ་ཊྛཱ་ན་ཝ་ཏྠུ་སྨིཾ པ་ཉྙ་ཏྟཾ, ཨ་ནྟེ་ཝཱ་སི་ནི་ཡཱ ཝཱ ཨ་ནུ་པ་ས་མྤ་ནྣཱ་ཡ ཝཱ དུ་ཀྐ་ཊཾ, ད་ས་སུ ཨ་ཉྙ་ཏ་ར་ནྟ་རཱ་ཡེ ས་ཏི པ་རི་ཡེ་སི་ཏྭཱ ཨ་ལ་བྷ་ནྟི་ཡཱ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. གི་ལཱ་ན་ཏཱ, ས་དྡྷི་ཝི་ཧཱ་རི་ཏཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, ཨུ་པ་ཊྛཱ་ནེ དྷུ་ར་ནི་ཀྑེ་པོ་ཏི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་མ་ནུ་བྷཱ་ས་ན་ས་དི་སཱ་ནཱི་ཏི.
ན་ཨུ་པ་ཊྛཱ་པ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༥. ནི་ཀྐ་ཌྜྷ་ན་སི་ཀྑཱ་པ་ད་ཝ་ཎྞ་ནཱ
པ་ཉྩ་མེ ཨུ་པ་སྶ་ཡཾ ད་ཏྭཱཏི ས་ཀ་ཝཱ་ཊ་བ་དྡྷཾ ཨ་ཏྟ་ནོ པུ་གྒ་ལི་ཀ་ཝི་ཧཱ་རཾ ད་ཏྭཱ. ནི་ཀྐ་ཌྜྷེ་ཡྻཱཏི བ་ཧཱུ་ནི་པི དྭཱ་རཱ་ནི ཨེ་ཀ་པྤ་ཡོ་གེ་ན ནི་ཀྐ་ཌྜྷེ་ནྟི་ཡཱ ཨེ་ཀཱ ཨཱ་པ་ཏྟི, ནཱ་ནཱ་པ་ཡོ་གེ་ཧི པ་ཡོ་ག་ག་ཎ་ནཱ་ཡ ཨཱ་པ་ཏྟི་ཡོ, ཨཱ་ཎ་ཏྟི་ཡ་མྤི ཨེ་སེ་ཝ ན་ཡོ. ས་ཙེ པ་ན ‘‘ཨི་མ་ཉྩི་མ་ཉྩ དྭཱ་རཾ ཨ་ཏི་ཀྐཱ་མེ་ཧཱི’’ཏི ཨཱ་ཎཱ་པེ་ཏི, ཨེ་ཀཱ་ཡ ཨཱ་ཎ་ཏྟི་ཡཱ ཨེ་ཝ དྭཱ་ར་ག་ཎ་ནཱ་ཡ ཨཱ་པ་ཏྟི་ཡོ.
སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨེ་ཏཱ་དི་སེ ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ཀ་ཝཱ་ཊ་བ་དྡྷ་ཏོ དུ་ཀྐ་ཊཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ, ས་ཀ་ཝཱ་ཊ་བ་དྡྷ་ཏོ ཝཱ ཨ་ཀ་ཝཱ་ཊ་བ་དྡྷ་ཏོ ཝཱ ཨུ་བྷི་ནྣ་མྤི པ་རི་ཀྑཱ་ར་ནི་ཀྐ་ཌྜྷ་ནེ དུ་ཀྐ་ཊ་མེ་ཝ, སེ་སཾ ས་ངྒྷི་ཀ་ཝི་ཧཱ་ར་ནི་ཀྐ་ཌྜྷ་ན་སི་ཀྑཱ་པ་དེ ཝུ་ཏྟ་ན་ཡ་མེ་ཝཱ་ཏི.
ནི་ཀྐ་ཌྜྷ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༦. སཾ་ས་ཊྛ་སི་ཀྑཱ་པ་ད་ཝ་ཎྞ་ནཱ
ཚ་ཊྛཾ ཨུ་ཏྟཱ་ན་པ་ད་ཏྠ་མེ་ཝ. སཱ་ཝ་ཏྠི་ཡཾ ཙ་ཎྜ་ཀཱ་ལི༹ཾ ཨཱ་ར་བྦྷ སཾ་ས་ཊྛ་ཝི་ཧཱ་ར་ཝ་ཏྠུ་སྨིཾ པ་ཉྙ་ཏྟཾ, སེ་ས་མེ་ཏྠ པ་ཋ་མ་ཨ་རི་ཊྛ་སི་ཀྑཱ་པ་དེ ཝུ་ཏྟ་ཝི་ནི་ཙྪ་ཡ་ས་དི་ས་མེ་ཝཱ་ཏི.
སཾ་ས་ཊྛ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༧. ཨ་ནྟོ་ར་ཊྛ་སི་ཀྑཱ་པ་ད་ཝ་ཎྞ་ནཱ
ས་ཏྟ་མེ ཨ་ནྟོ་ར་ཊྛེཏི ཡ་སྶ ཝི་ཛི་ཏེ ཝི་ཧ་ར་ཏི, ཏ་སྶ ར་ཊྛེ. ཨ་ས་ཏྠི་ཀཱ ཙཱ་རི་ཀནྟི ཝི་ནཱ ས་ཏྠེ་ན ག་ཙྪ་ནྟི་ཡཱ, གཱ་མ་ནྟ་ར་ག་ཎ་ནཱ་ཡ, ཨ་གཱ་མ་ཀེ ཨ་ར་ཉྙེ ཨ་དྡྷ་ཡོ་ཛ་ན་ག་ཎ་ནཱ་ཡ པཱ་ཙི་ཏྟི་ཡཾ.