༡. ཨཱ་རཱ་མ་པ་ཝི་ས་ན་སི་ཀྑཱ་པ་ད་ཝ་ཎྞ་ནཱ

ཨཱ་རཱ་མ་ཝ་གྒ་སྶ པ་ཋ་མེ ས་བྷི་ཀྑུ་ཀཾ ཨཱ་རཱ་མནྟི ཡ་ཏྠ བྷི་ཀྑཱུ རུ་ཀྑ་མཱུ་ལེ་པི ཝ་ས་ནྟི, ཏཾ པ་དེ་སཾ. ཨ་ནཱ་པུ་ཙྪཱཏི ཨེ་ཏྠ བྷི་ཀྑུ་སཱ་མ་ཎེ་ར་ཨཱ་རཱ་མི་ཀེ་སུ ཡཾ་ཀི་ཉྩི ཨ་ནཱ་པུ་ཙྪཱ, པ་རི་ཀྑི་ཏྟ་སྶ ཨཱ་རཱ་མ་སྶ པ་རི་ཀྑེ་པཾ ཨ་ཏི་ཀྐ་མ་ནྟི་ཡཱ, ཨ་པ་རི་ཀྑི་ཏྟ་སྶ ཨུ་པ་ཙཱ་རཾ ཨོ་ཀྐ་མ་ནྟི་ཡཱ པ་ཋ་མ་པཱ་དེ དུ་ཀྐ་ཊཾ, དུ་ཏི་ཡ་པཱ་དེ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨ་ནཱ་པུ་ཙྪཱ ཨཱ་རཱ་མཾ པ་ཝི་ས་ན་ཝ་ཏྠུ་སྨིཾ པ་ཉྙ་ཏྟཾ, ‘‘ས་ནྟཾ བྷི་ཀྑུཾ ཨ་ནཱ་པུ་ཙྪཱ’’ཏི ཙ ‘‘ཛཱ་ནཾ ས་བྷི་ཀྑུ་ཀ’’ནྟི ཙ ཨི་མཱ་ནེ་ཏྠ དྭེ ཨ་ནུ་པ་ཉྙ་ཏྟི་ཡོ, ས་བྷི་ཀྑུ་ཀེ ཝེ་མ་ཏི་ཀཱ་ཡ, ཨ་བྷི་ཀྑུ་ཀེ ས་བྷི་ཀྑུ་ཀ་ས་ཉྙཱ་ཡ ཙེ་ཝ ཝེ་མ་ཏི་ཀཱ་ཡ ཙ དུ་ཀྐ་ཊཾ. ཏ་སྨིཾ པ་ན དུ་ཝི་དྷེ་པི ཨ་བྷི་ཀྑུ་ཀ་ས་ཉྙཱ་ཡ, ས་ནྟཾ བྷི་ཀྑུཾ ཨཱ་པུ་ཙྪཱ པ་ཝི་ས་ནྟི་ཡཱ, པ་ཋ་མ་པྤ་ཝི་ཊྛཱ་ནཾ ཝཱ བྷི་ཀྑུ་ནཱི་ནཾ སཱི་སཾ་ནུ་ལོ་ཀི་ཀཱ་ཡ, ཡ་ཏྠ ཝཱ བྷི་ཀྑུ་ནི་ཡོ ས་ནྣི་པ་ཏི་ཏཱ, ཏ་ཏྠ ‘‘ཏཱ་སཾ ས་ནྟི་ཀཾ ག་ཙྪཱ་མཱི’’ཏི ས་ཉྙཱ་ཡ, ཨཱ་རཱ་མེ་ན ཝཱ མ་གྒོ ཧོ་ཏི, ཏེ་ན ག་ཙྪ་ནྟི་ཡཱ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ས་བྷི་ཀྑུ་ཀཱ་རཱ་མ་ཏཱ, ས་བྷི་ཀྑུ་ཀ་ས་ཉྙི་ཏཱ, ཝུ་ཏྟ་པ་རི་ཙྪེ་དཱ་ཏི་ཀྐ་མོ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ་ཏི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མ་ནུ་བྷཱ་ས་ན་ས་མ་ཨུ་ཊྛཱ་ནཾ, ཀི་རི་ཡཱ་ཀི་རི་ཡཾ, ས་ཉྙཱ་ཝི་མོ་ཀྑཾ, ས་ཙི་ཏྟ་ཀཾ, པ་ཎྞ་ཏྟི་ཝ་ཛྫཾ, ཀཱ་ཡ་ཀ་མྨཾ, ཝ་ཙཱི་ཀ་མྨཾ, ཏི་ཙི་ཏྟཾ, ཏི་ཝེ་ད་ན་ནྟི.

ཨཱ་རཱ་མ་པ་ཝི་ས་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.