༥. ཙི་ཏྟཱ་གཱ་ར་ཝ་གྒོ

༡. རཱ་ཛཱ་གཱ་ར་སི་ཀྑཱ་པ་ད་ཝ་ཎྞ་ནཱ

ཙི་ཏྟཱ་གཱ་ར་ཝ་གྒ་སྶ པ་ཋ་མེ རཱ་ཛཱ་གཱ་རནྟི ར་ཉྙོ ཀཱི་ལ༹་ན་གྷ་རཾ. ཙི་ཏྟཱ་གཱ་རནྟི ཀཱི་ལ༹་ན་ཙི་ཏྟ་སཱ་ལཾ. ཨཱ་རཱ་མནྟི ཀཱི་ལ༹་ན་ཨུ་པ་ཝ་ནཾ. ཨུ་ཡྻཱ་ནནྟི ཀཱི་ལ༹་ནུ་ཡྻཱ་ནཾ. པོ་ཀྑ་ར་ཎིནྟི ཀཱི་ལ༹་ན་པོ་ཀྑ་ར་ཎིཾ. ད་སྶ་ནཱ་ཡཱཏི ‘‘ཨེ་ཏེ་སུ ཡཾ་ཀི་ཉྩི པ་སྶི་སྶཱ་མཱི’’ཏི ག་ཙྪ་ནྟི་ཡཱ པ་དེ པ་དེ དུ་ཀྐ་ཊཾ, ཡ་ཏྠ ཋ་ཏྭཱ པ་སྶ་ཏི, ཏ་ཏྠ པ་དཾ ཨ་ནུ་དྡྷ་རི་ཏྭཱ པ་ཉྩཱ་པི པ་སྶ་ནྟི་ཡཱ ཨེ་ཀཱ་ཝ ཨཱ་པ་ཏྟི. ས་ཙེ པ་ན ཏཾ ཏཾ ཝི་ལོ་ཀེ་ཏྭཱ པ་སྶ་ཏི, གཱི་ཝཾ པ་རི་ཝ་ཏྟ་ན་པྤ་ཡོ་ག་ག་ཎ་ནཱ་ཡ ཨཱ་པ་ཏྟི་ཡོ, ན ཨུ་མྨཱི་ལ་ན་ག་ཎ་ནཱ་ཡ.

སཱ་ཝ་ཏྠི་ཡཾ ཚ་བྦ་གྒི་ཡཱ བྷི་ཀྑུ་ནི་ཡོ ཨཱ་ར་བྦྷ ཙི་ཏྟཱ་གཱ་རཾ ད་སྶ་ནཱ་ཡ ག་མ་ན་ཝ་ཏྠུ་སྨིཾ པ་ཉྙ་ཏྟཾ, བྷི་ཀྑུ་སྶ ས་བྦ་ཏྠ དུ་ཀྐ་ཊཾ, ཨ་ཝ་སེ་སོ ཝི་ནི་ཙྪ་ཡོ ན་ཙྩ་ད་སྶ་ན་སི་ཀྑཱ་པ་དེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦོ་ཏི.

རཱ་ཛཱ་གཱ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༢. ཨཱ་ས་ནྡི་པ་རི་བྷུ་ཉྫ་ན་སི་ཀྑཱ་པ་ད་ཝ་ཎྞ་ནཱ

དུ་ཏི་ཡེ ཨཱ་ས་ནྡཱི ནཱ་མ ཨ་ཏི་ཀྐ་ནྟ་པྤ་མཱ་ཎཱ ཝུ་ཙྩ་ཏི. པ་ལླ་ངྐོ ནཱ་མ སཾ་ཧཱ་རི་མེ་ན ཝཱ་ལེ༹་ན ཀ་ཏོ་ཏི ཝུ་ཏྟོ. པ་རི་བྷུ་ཉྫེ་ཡྻཱཏི ཨེ་ཏྠ པ་ན ནི་སཱི་ད་ན་ནི་པ་ཛྫ་ན་པྤ་ཡོ་ག་ག་ཎ་ནཱ་ཡ པཱ་ཙི་ཏྟི་ཡཾ ཝེ་དི་ཏ་བྦཾ.

སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨཱ་ས་ནྡི་པ་ལླ་ངྐ་པ་རི་བྷོ་ག་ཝ་ཏྠུ་སྨིཾ པ་ཉྙ་ཏྟཾ, ཨཱ་ས་ནྡི་ཡཱ པཱ་དེ ཚི་ནྡི་ཏྭཱ, པ་ལླ་ངྐ་སྶ ཝཱ་ལེ༹ བྷི་ནྡི་ཏྭཱ པ་རི་བྷུ་ཉྫ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨཱ་ས་ནྡི་པ་ལླ་ངྐ་ཏཱ, ནི་སཱི་ད་ནཾ ནི་པ་ཛྫ་ནཾ ཝཱ་ཏི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.

ཨཱ་ས་ནྡི་པ་རི་བྷུ་ཉྫ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༣. སུ་ཏྟ་ཀ་ནྟ་ན་སི་ཀྑཱ་པ་ད་ཝ་ཎྞ་ནཱ

ཏ་ཏི་ཡེ སུ་ཏྟནྟི ཚ་ནྣཾ ཨ་ཉྙ་ཏ་རཾ. ཀ་ནྟེ་ཡྻཱཏི ཨེ་ཏྠ ཡ་ཏྟ་ཀཾ ཧ་ཏྠེ་ན ཨ་ཉྪི་ཏཾ ཧོ་ཏི, ཏ་སྨིཾ ཏ་ཀྐ་མྷི ཝེ་ཋི་ཏེ ཨེ་ཀཱ ཨཱ་པ་ཏྟི. ཨི་ད་ཉྷི ས་ནྡྷཱ་ཡ པ་ད་བྷཱ་ཛ་ནཱི་ཡེ (པཱ་ཙི. ༩༨༨) ‘‘ཨུ་ཛྫ་ཝུ་ཛྫ་ཝེ’’ཏི ཝུ་ཏྟཾ.

སཱ་ཝ་ཏྠི་ཡཾ ཚ་བྦ་གྒི་ཡཱ བྷི་ཀྑུ་ནི་ཡོ ཨཱ་ར་བྦྷ སུ་ཏྟཾ ཀ་ནྟ་ན་ཝ་ཏྠུ་སྨིཾ པ་ཉྙ་ཏྟཾ, ཀ་ནྟ་ན་ཏོ པུ་བྦེ ཀ་པྤཱ་ས་ཝི་ཙི་ན་ནཾ ཨཱ་དིཾ ཀ་ཏྭཱ ས་བྦ་པྤ་ཡོ་གེ་སུ ཧ་ཏྠ་ཝཱ་ར་ག་ཎ་ནཱ་ཡ དུ་ཀྐ་ཊཾ. ཀ་ནྟི་ཏ་སུ་ཏྟཾ ཀ་ནྟ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ཀ་ནྟི་ཏ་ཏཱ, ཀ་ནྟ་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.

སུ་ཏྟ་ཀ་ནྟ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༤. གི་ཧི་ཝེ་ཡྻཱ་ཝ་ཙྩ་སི་ཀྑཱ་པ་ད་ཝ་ཎྞ་ནཱ

ཙ་ཏུ་ཏྠེ གི་ཧི་ཝེ་ཡྻཱ་ཝ་ཙྩནྟི གི་ཧཱི་ནཾ ཝེ་ཡྻཱ་ཝ་ཙྩཾ. ས་ཙེ་པི ཧི མཱ་ཏཱ་པི་ཏ་རོ ཨ་ཏྟ་ནོ ཀི་ཉྩི ཀ་མྨཾ ཨ་ཀཱ་རཱ་པེ་ཏྭཱ ཏེ་སཾ ཡཱ་གུ་པ་ཙ་ནཱ་དཱི་ནི ཀ་རོ་ནྟི, པུ་བྦ་པྤ་ཡོ་གེ་སུ པ་ཡོ་ག་ག་ཎ་ནཱ་ཡ དུ་ཀྐ་ཊཱ་ནི ཨཱ་པ་ཛྫི་ཏྭཱ ཡཱ་གུ་ཨཱ་དཱི་སུ བྷཱ་ཛ་ན་ག་ཎ་ནཱ་ཡ, ཁཱ་ད་ནཱི་ཡཱ་དཱི་སུ པཱུ་ཝ་ག་ཎ་ནཱ་ཡ པཱ་ཙི་ཏྟི་ཡཾ ཨཱ་པ་ཛྫ་ཏི.

སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ གི་ཧཱི་ནཾ ཝེ་ཡྻཱ་ཝ་ཙྩ་ཀ་ར་ཎ་ཝ་ཏྠུ་སྨིཾ པ་ཉྙ་ཏྟཾ, མ་ནུ་སྶེ་ཧི ས་ངྒྷ་སྶ ཡཱ་གུ་པཱ་ནེ ཝཱ བྷ་ཏྟེ ཝཱ ཙེ་ཏི་ཡ་པཱུ་ཛཱ་ཡ ཝཱ ཀ་རཱི་ཡ་མཱ་ནཱ་ཡ ཏེ་སཾ ས་ཧཱ་ཡ་བྷཱ་ཝེ་ན ཡཱ་གུ་པ་ཙ་ནཱ་དཱི་ནི, ཨ་ཏྟ་ནོ ཝེ་ཡྻཱ་ཝ་ཙྩ་ཀ་ར་སྶ ཙ ཏཱ་ནི་ཡེ་ཝ ཀ་རོ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. གི་ཧི་ཝེ་ཡྻཱ་ཝ་ཙྩ་ཀ་ར་ཎཾ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ་ཏི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནེ་ཝཱ་ཏི.

གི་ཧི་ཝེ་ཡྻཱ་ཝ་ཙྩ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༥. ཨ་དྷི་ཀ་ར་ཎ་སི་ཀྑཱ་པ་ད་ཝ་ཎྞ་ནཱ

པ་ཉྩ་མེ ཨ་དྷི་ཀ་ར་ཎནྟི ཙ་ཏུ་ནྣཾ ཨ་ཉྙ་ཏ་རཾ. པཱ་ཙི་ཏྟི་ཡནྟི ཨི་དྷ ཙཱི་ཝ་ར་སི་བྦ་ནེ ཝི་ཡ དྷུ་རཾ ནི་ཀྑི་ཏྟ་མ་ཏྟེ པཱ་ཙི་ཏྟི་ཡཾ, ཨེ་ཀཱ་ཧ་མྤི པ་རི་ཧཱ་རོ ན་ཏྠི.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨ་དྷི་ཀ་ར་ཎཾ ན་ཝཱུ་པ་ས་མ་ན་ཝ་ཏྠུ་སྨིཾ པ་ཉྙ་ཏྟཾ, སེ་ས་མེ་ཏྠ ཙཱི་ཝ་ར་སི་བྦ་ན་སི་ཀྑཱ་པ་དེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦ་ནྟི.

ཨ་དྷི་ཀ་ར་ཎ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༦. བྷོ་ཛ་ན་དཱ་ན་སི་ཀྑཱ་པ་ད་ཝ་ཎྞ་ནཱ

ཚ་ཊྛེ ས་ཧ་ཏྠཱཏི ཀཱ་ཡེ་ན ཝཱ ཀཱ་ཡ་པྤ་ཊི་བ་དྡྷེ་ན ཝཱ ནི་སྶ་གྒི་ཡེ་ན ཝཱ ཋ་པེ་ཏྭཱ པ་ཉྩ་ས་ཧ་དྷ་མྨི་ཀེ ཨ་ཝ་སེ་སཱ་ནཾ ཨ་ཉྙ་ཏྲ ཨུ་ད་ཀ་ད་ནྟ་པོ་ནཱ ཡཾ་ཀི་ཉྩི ཨ་ཛ྄ཛྷོ་ཧ་ར་ཎཱི་ཡཾ ད་ད་ནྟི་ཡཱ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨ་གཱ་རི་ཀ་སྶ ཁཱ་ད་ནཱི་ཡ་བྷོ་ཛ་ནཱི་ཡ་དཱ་ན་ཝ་ཏྠུ་སྨིཾ པ་ཉྙ་ཏྟཾ, ཨུ་ད་ཀ་ད་ནྟ་པོ་ནེ དུ་ཀྐ་ཊཾ. ཡཱ པ་ན དཱ་པེ་ཏི ན དེ་ཏི, ཨུ་པ་ནི་ཀྑི་པི་ཏྭཱ དེ་ཏི, བཱ་ཧི་ར་ལེ་པཾ དེ་ཏི, ཏ་སྶཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ཉྙ་ཏྲ ཨུ་ད་ཀ་ད་ནྟ་པོ་ནཱ ཨ་ཛ྄ཛྷོ་ཧ་ར་ཎི་ཡཾ, ཋ་པེ་ཏྭཱ པ་ཉྩ ས་ཧ་དྷ་མྨི་ཀེ ཨ་ཉྙ་སྶ ས་ཧ་ཏྠཱ དཱ་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.

བྷོ་ཛ་ན་དཱ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༧. ཨཱ་ཝ་ས་ཐ་ཙཱི་ཝ་ར་སི་ཀྑཱ་པ་ད་ཝ་ཎྞ་ནཱ

ས་ཏྟ་མེ ཨཱ་ཝ་ས་ཐ་ཙཱི་ཝ་རནྟི ‘‘ཨུ་ཏུ་ནི་ཡོ བྷི་ཀྑུ་ནི་ཡོ པ་རི་བྷུ་ཉྫ་ནྟཱུ’’ཏི དི་ནྣ་ཙཱི་ཝ་རཾ. ཨ་ནི་སྶ་ཛྫི་ཏྭཱཏི ཙ་ཏུ་ཏྠེ དི་ཝ་སེ དྷོ་ཝི་ཏྭཱ ཨ་ཉྙི་སྶཱ ཨ་ནྟ་མ་སོ སཱ་མ་ཎེ་རི་ཡཱ་པི ཨུ་ཏུ་ནི་ཡཱ ཨ་ད་ཏྭཱ. པཱ་ཙི་ཏྟི་ཡནྟི ཨེ་ཝཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ནྟི་ཡཱ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨཱ་ཝ་ས་ཐ་ཙཱི་ཝ་རཾ ཨ་ནི་སྶ་ཛྫི་ཏྭཱ པ་རི་བྷུ་ཉྫ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ནི་སྶ་ཛྫི་ཏེ དྭི་ཀ་དུ་ཀྐ་ཊཾ. ཏ་སྨིཾ པ་ན ནི་སྶ་ཛྫི་ཏ་ས་ཉྙཱ་ཡ, པུ་ན པ་རི་ཡཱ་ཡེ་ན ཝཱ, ཨ་ཉྙཱ་སཾ ཨུ་ཏུ་ནཱི་ནཾ ཨ་བྷཱ་ཝེ་ན ཝཱ, ཨ་ཙྪི་ནྣ་ན་ཊྛ་ཙཱི་ཝ་རི་ཀཱ་ཡ ཝཱ, ཨཱ་པ་དཱ་སུ ཝཱ པ་རི་བྷུ་ཉྫ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨཱ་ཝ་ས་ཐ་ཙཱི་ཝ་ར་ཏཱ, ཙ་ཏུ་ཏྠ་དི་ཝ་ས་ཏཱ, དྷོ་ཝི་ཏྭཱ ཨ་ནི་སྶ་ཛྫ་ནཾ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ་ཏི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཀ་ཐི་ན་ས་དི་སཱ་ནི, ཨི་དཾ པ་ན ཀི་རི་ཡཱ་ཀི་རི་ཡ་ནྟི.

ཨཱ་ཝ་ས་ཐ་ཙཱི་ཝ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༨. ཨཱ་ཝ་ས་ཐ་ཝི་ཧཱ་ར་སི་ཀྑཱ་པ་ད་ཝ་ཎྞ་ནཱ

ཨ་ཊྛ་མེ ཨཱ་ཝ་ས་ཐནྟི ཀ་ཝཱ་ཊ་བ་དྡྷ་ཝི་ཧཱ་རཾ. ཨ་ནི་སྶ་ཛྫི་ཏྭཱཏི ར་ཀྑ་ཎ་ཏྠཱ་ཡ ཨ་ད་ཏྭཱ, ‘‘ཨི་དཾ ཛ་གྒེ་ཡྻཱ་སཱི’’ཏི ཨེ་ཝཾ ཨ་ནཱ་པུ་ཙྪི་ཏྭཱ་ཏི ཨ་ཏྠོ. ཙཱ་རི་ཀཾ པ་ཀྐ་མེ་ཡྻ པཱ་ཙི་ཏྟི་ཡནྟི ཨེ་ཏྠ ས་ཀ་གཱ་མ་ཏོ ཨ་ཉྙཾ གཱ་མཾ ཨེ་ཀ་ར་ཏྟི་ཝཱ་ས་ཏྠཱ་ཡ་པི པ་ཀྐ་མ་ནྟི་ཡཱ པ་རི་ཀྑི་ཏྟ་སྶ ཨཱ་ཝ་ས་ཐ་སྶ པ་རི་ཀྑེ་པཾ, ཨ་པ་རི་ཀྑི་ཏྟ་སྶ ཨུ་པ་ཙཱ་རཾ པ་ཋ་མ་པཱ་དེ་ན ཨ་ཏི་ཀྐ་ནྟ་མ་ཏྟེ དུ་ཀྐ་ཊཾ, དུ་ཏི་ཡེ་ན པཱ་ཙི་ཏྟི་ཡཾ.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨཱ་ཝ་ས་ཐཾ ཨ་ནི་སྶ་ཛྫི་ཏྭཱ ཙཱ་རི་ཀཾ པ་ཀྐ་མ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ཀ་ཝཱ་ཊ་བ་དྡྷེ དུ་ཀྐ་ཊཾ, ནི་སྶ་ཛྫི་ཏེ དྭི་ཀ་དུ་ཀྐ་ཊཾ. ཏ་སྨིཾ པ་ན ནི་སྶ་ཛྫི་ཏ་ས་ཉྙཱ་ཡ, ས་ཏི ཨ་ནྟ་རཱ་ཡེ, པ་ཊི་ཛ་གྒི་ཀཾ པ་རི་ཡེ་སི་ཏྭཱ ཨ་ལ་བྷ་ནྟི་ཡཱ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ས་ཀ་ཝཱ་ཊ་བ་དྡྷ་ཏཱ, ཝུ་ཏྟ་ན་ཡེ་ན པ་ཀྐ་མ་ནཾ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཀ་ཐི་ན་ས་དི་སཱ་ནཱི་ཏི, ཨི་དཾ པ་ན ཀི་རི་ཡཱ་ཀི་རི་ཡ་ནྟི.

ཨཱ་ཝ་ས་ཐ་ཝི་ཧཱ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༩. ཏི་ར་ཙྪཱ་ན་ཝི་ཛྫཱ་པ་རི་ཡཱ་པུ་ཎ་ན་སི་ཀྑཱ་པ་ད་ཝ་ཎྞ་ནཱ

ན་ཝ་མེ ཏི་ར་ཙྪཱ་ན་ཝི་ཛྫནྟི ཡཾ་ཀི་ཉྩི བཱ་ཧི་ར་ཀཾ ཨ་ན་ཏྠ་སཾ་ཧི་ཏཾ ཧ་ཏྠི་ཨ་སྶ་ར་ཐ་དྷ་ནུ་ཐ་རུ་སི་པྤ་ཨཱ་ཐ་བྦ་ཎ་ཁི་ལ་ན་ཝ་སཱི་ཀ་ར་ཎ་སོ་སཱ་པ་ན་མ་ནྟཱ་ག་ད་པྤ་ཡོ་གཱ་དི་བྷེ་དཾ པ་རཱུ་པ་གྷཱ་ཏ་ཀ་རཾ ཝི་ཛྫཾ. པ་རི་ཡཱ་པུ་ཎེ་ཡྻཱཏི ཨེ་ཏྠ ཡ་སྶ ཀ་སྶ་ཙི ས་ནྟི་ཀེ ཏཾ པ་དཱ་དི་ཝ་སེ་ན པ་རི་ཡཱ་པུ་ཎ་ནྟི་ཡཱ པ་ད་ག་ཎ་ནཱ་ཡ ཙེ་ཝ ཨ་ཀྑ་ར་ག་ཎ་ནཱ་ཡ ཙ པཱ་ཙི་ཏྟི་ཡ་ནྟི.

ཏི་ར་ཙྪཱ་ན་ཝི་ཛྫཱ་པ་རི་ཡཱ་པུ་ཎ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༡༠. ཏི་ར་ཙྪཱ་ན་ཝི་ཛྫཱ་ཝཱ་ཙ་ན་སི་ཀྑཱ་པ་ད་ཝ་ཎྞ་ནཱ

ད་ས་མེ ཝཱ་ཙེ་ཡྻཱཏི པ་དཾ ཝི་སེ་སོ. ཨུ་བྷ་ཡ་མྤི སཱ་ཝ་ཏྠི་ཡཾ ཚ་བྦ་གྒི་ཡཱ ཙེ་ཝ ས་མྦ་ཧུ་ལཱ བྷི་ཀྑུ་ནི་ཡོ ཙ ཨཱ་ར་བྦྷ ཏི་ར་ཙྪཱ་ན་ཝི་ཛྫཾ པ་རི་ཡཱ་པུ་ཎ་ན་ཝཱ་ཙ་ན་ཝ་ཏྠུ་སྨིཾ པ་ཉྙ་ཏྟཾ. ལེ་ཁེ, དྷཱ་ར་ཎཱ་ཡ ཙ, གུ་ཏྟ་ཏྠཱ་ཡ ཙ ཡ་ཀྑ་པ་རི་ཏྟ་ནཱ་ག་མ་ཎྜ་ལཱ་དི་ཀེ ས་བྦ་པ་རི་ཏྟེ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཏི་ར་ཙྪཱ་ན་ཝི་ཛྫ་ཏཱ, པ་རི་ཡཱ་པུ་ཎ་ན་ཝཱ་ཙ་ནཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ་ཏི ཨི་མཱ་ནེ་ཏྠ དྭཱི་སུ་པི ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི པ་ད་སོ་དྷ་མྨ་ས་དི་སཱ་ནཱི་ཏི.

ཏི་ར་ཙྪཱ་ན་ཝི་ཛྫཱ་ཝཱ་ཙ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

ཙི་ཏྟཱ་གཱ་ར་ཝ་གྒོ པ་ཉྩ་མོ.