༤. ཏུ་ཝ་ཊྚ་ཝ་གྒོ

༡. ཨེ་ཀ་མ་ཉྩ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ

ཏུ་ཝ་ཊྚ་ཝ་གྒ་སྶ པ་ཋ་མེ ཏུ་ཝ་ཊྚེ་ཡྻུནྟི ནི་པ་ཛྫེ་ཡྻུཾ. ཏཱ་སུ པ་ན ཨེ་ཀཱ་ཡ ཝཱ ནི་པ་ནྣཱ་ཡ ཨ་པ་རཱ ནི་པ་ཛྫ་ཏུ, དྭེ་པི ཝཱ ས་ཧེ་ཝ ནི་པ་ཛྫ་ནྟུ, དྭི་ནྣ་མྤི པཱ་ཙི་ཏྟི་ཡཾ.

སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ དྭི་ནྣཾ ཨེ་ཀ་མ་ཉྩེ ཏུ་ཝ་ཊྚ་ན་ཝ་ཏྠུ་སྨིཾ པ་ཉྙ་ཏྟཾ, ས་ཙེ པ་ན ཨེ་ཀཱ་ཡ ནི་པ་ནྣཱ་ཡ ཨེ་ཀཱ ནི་སཱི་ད་ཏི, ཨུ་བྷོ ཝཱ ནི་སཱི་ད་ནྟི, ཏཱ་སཾ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨེ་ཀ་མ་ཉྩ་ཏཱ, དྭི་ནྣཾ ཏུ་ཝ་ཊྚ་ན་ནྟི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.

ཨེ་ཀ་མ་ཉྩ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༢. ཨེ་ཀ་ཏྠ་ར་ཎ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ

དུ་ཏི་ཡེ ཨེ་ཀཾ ཨ་ཏྠ་ར་ཎ་ཉྩེ་ཝ པཱ་ཝུ་ར་ཎ་ཉྩ ཨེ་ཏཱ་ས་ནྟི ཨེ་ཀ་ཏྠ་ར་ཎ་པཱ་ཝུ་ར་ཎཱ, སཾ་ཧཱ་རི་མཱ་ནཾ པཱ་ཝཱ་ར་ཏྠ་ར་ཎ་ཀ་ཊ་སཱ་ར་ཀཱ་དཱི་ནཾ ཨེ་ཀཾ ཨ་ནྟཾ ཨ་ཏྠ་རི་ཏྭཱ ཨེ་ཀཾ པཱ་རུ་པི་ཏྭཱ ཏུ་ཝ་ཊྚེ་ནྟཱི་ན་མེ་ཏཾ ཨ་དྷི་ཝ་ཙ་ནཾ. པཱ་ཙི་ཏྟི་ཡནྟི ཏཾ་ཡེ་ཝ ཨ་ཏྠ་རི་ཏྭཱ ཏཾ པཱ་རུ་པི་ཏྭཱ ནི་པ་ཛྫ་ནྟཱི་ནཾ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཨེ་ཝཾ ཏུ་ཝ་ཊྚ་ན་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ཏྠ་ར་ཎེ ཝཱ པཱ་ཝུ་ར་ཎེ ཝཱ ཨེ་ཀ་སྨིཾ དུ་ཀྐ་ཊཾ, ནཱ་ན་ཏྠ་ར་ཎ་པཱ་ཝུ་ར་ཎེ དྭི་ཀ་དུ་ཀྐ་ཊཾ. ཏ་སྨིཾ པ་ན ནཱ་ན་ཏྠ་ར་ཎ་པཱ་ཝུ་ར་ཎ་ས་ཉྙཱ་ཡ, ཝ་ཝ་ཏྠཱ་ནཾ ད་སྶེ་ཏྭཱ ནི་པ་ཛྫ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. སེ་སཾ པ་ཋ་མ་ས་དི་ས་མེ་ཝཱ་ཏི.

ཨེ་ཀ་ཏྠ་ར་ཎ་ཏུ་ཝ་ཊྚ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༣. ཨ་ཕཱ་སུ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ

ཏ་ཏི་ཡེ ཨ་ཕཱ་སུནྟི ‘‘ཨི་མི་ནཱ ཨི་མི་སྶཱ ཨ་ཕཱ་སུ བྷ་ཝི་སྶ་ཏཱི’’ཏི ཨ་ནཱ་པུ་ཙྪཱ པུ་ར་ཏོ ཙ་ངྐ་མ་ན་ཊྛཱ་ན་ནི་སྶ་ཛྫཱ་ད་ཡོ ཝཱ ཨུ་དྡི་ས་ཨུ་དྡི་སཱ་པ་ན་པ་རི་པུ་ཙྪ་ན་ས་ཛ྄ཛྷཱ་ཡཾ ཝཱ ཀ་རོ་ནྟི་ཡཱ ཙ་ངྐ་མ་ནེ ནི་ཝ་ཏྟ་ན་ག་ཎ་ནཱ་ཡ, ཋཱ་ནཱ་དཱི་སུ པ་ཡོ་ག་ག་ཎ་ནཱ་ཡ, ཨུ་དྡེ་སཱ་དཱི་སུ པ་ད་ག་ཎ་ནཱ་ཡ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ས་ཉྩི་ཙྩ ཨ་ཕཱ་སུ་ཀ་ར་ཎ་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ, ན ཨ་ཕཱ་སུ་ཀཱ་མ་ཏཱ་ཡ, ཨཱ་པུ་ཙྪཱ པུ་ར་ཏོ ཙ་ངྐ་མ་ནཱ་དཱི་ནི ཀ་རོ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨུ་པ་ས་མྤ་ནྣ་ཏཱ, ཨ་ཕཱ་སུ་ཀཱ་མ་ཏཱ, ཨ་ཕཱ་སུ་ཀ་ར་ཎཾ, ཨ་ནཱ་པུ་ཙྪ་ན་ནྟི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནི, ཨི་དཾ པ་ན ཀི་རི་ཡཱ་ཀི་རི་ཡཾ, དུ་ཀྑ་ཝེ་ད་ན་ནྟི.

ཨ་ཕཱ་སུ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༤. ན་ཨུ་པ་ཊྛཱ་པ་ན་སི་ཀྑཱ་པ་ད་ཝ་ཎྞ་ནཱ

ཙ་ཏུ་ཏྠེ དུ་ཀྑི་ཏནྟི གི་ལཱ་ནཾ. ས་ཧ་ཛཱི་ཝི་ནིནྟི ས་དྡྷི་ཝི་ཧཱ་རི་ནིཾ. ནེ་ཝ ཨུ་པ་ཊྛ་ཧེ་ཡྻཱཏི ཏ་སྶཱ ཨུ་པ་ཊྛཱ་ནཾ ས་ཡཾ ཝཱ ཨ་ཀ་རོ་ནྟི་ཡཱ, པ་རེ་ཧི ཝཱ ཨ་ཀཱ་རེ་ནྟི་ཡཱ དྷུ་རཾ ནི་ཀྑི་ཏྟ་མ་ཏྟེ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ དུ་ཀྑི་ཏཾ ས་ཧ་ཛཱི་ཝི་ནིཾ ཨ་ནུ་པ་ཊྛཱ་ན་ཝ་ཏྠུ་སྨིཾ པ་ཉྙ་ཏྟཾ, ཨ་ནྟེ་ཝཱ་སི་ནི་ཡཱ ཝཱ ཨ་ནུ་པ་ས་མྤ་ནྣཱ་ཡ ཝཱ དུ་ཀྐ་ཊཾ, ད་ས་སུ ཨ་ཉྙ་ཏ་ར་ནྟ་རཱ་ཡེ ས་ཏི པ་རི་ཡེ་སི་ཏྭཱ ཨ་ལ་བྷ་ནྟི་ཡཱ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. གི་ལཱ་ན་ཏཱ, ས་དྡྷི་ཝི་ཧཱ་རི་ཏཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, ཨུ་པ་ཊྛཱ་ནེ དྷུ་ར་ནི་ཀྑེ་པོ་ཏི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་མ་ནུ་བྷཱ་ས་ན་ས་དི་སཱ་ནཱི་ཏི.

ན་ཨུ་པ་ཊྛཱ་པ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༥. ནི་ཀྐ་ཌྜྷ་ན་སི་ཀྑཱ་པ་ད་ཝ་ཎྞ་ནཱ

པ་ཉྩ་མེ ཨུ་པ་སྶ་ཡཾ ད་ཏྭཱཏི ས་ཀ་ཝཱ་ཊ་བ་དྡྷཾ ཨ་ཏྟ་ནོ པུ་གྒ་ལི་ཀ་ཝི་ཧཱ་རཾ ད་ཏྭཱ. ནི་ཀྐ་ཌྜྷེ་ཡྻཱཏི བ་ཧཱུ་ནི་པི དྭཱ་རཱ་ནི ཨེ་ཀ་པྤ་ཡོ་གེ་ན ནི་ཀྐ་ཌྜྷེ་ནྟི་ཡཱ ཨེ་ཀཱ ཨཱ་པ་ཏྟི, ནཱ་ནཱ་པ་ཡོ་གེ་ཧི པ་ཡོ་ག་ག་ཎ་ནཱ་ཡ ཨཱ་པ་ཏྟི་ཡོ, ཨཱ་ཎ་ཏྟི་ཡ་མྤི ཨེ་སེ་ཝ ན་ཡོ. ས་ཙེ པ་ན ‘‘ཨི་མ་ཉྩི་མ་ཉྩ དྭཱ་རཾ ཨ་ཏི་ཀྐཱ་མེ་ཧཱི’’ཏི ཨཱ་ཎཱ་པེ་ཏི, ཨེ་ཀཱ་ཡ ཨཱ་ཎ་ཏྟི་ཡཱ ཨེ་ཝ དྭཱ་ར་ག་ཎ་ནཱ་ཡ ཨཱ་པ་ཏྟི་ཡོ.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨེ་ཏཱ་དི་སེ ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཙི་ཏྟི་ཡཾ, ཨ་ཀ་ཝཱ་ཊ་བ་དྡྷ་ཏོ དུ་ཀྐ་ཊཾ, ཨ་ནུ་པ་ས་མྤ་ནྣཱ་ཡ ཏི་ཀ་དུ་ཀྐ་ཊཾ, ས་ཀ་ཝཱ་ཊ་བ་དྡྷ་ཏོ ཝཱ ཨ་ཀ་ཝཱ་ཊ་བ་དྡྷ་ཏོ ཝཱ ཨུ་བྷི་ནྣ་མྤི པ་རི་ཀྑཱ་ར་ནི་ཀྐ་ཌྜྷ་ནེ དུ་ཀྐ་ཊ་མེ་ཝ, སེ་སཾ ས་ངྒྷི་ཀ་ཝི་ཧཱ་ར་ནི་ཀྐ་ཌྜྷ་ན་སི་ཀྑཱ་པ་དེ ཝུ་ཏྟ་ན་ཡ་མེ་ཝཱ་ཏི.

ནི་ཀྐ་ཌྜྷ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༦. སཾ་ས་ཊྛ་སི་ཀྑཱ་པ་ད་ཝ་ཎྞ་ནཱ

ཚ་ཊྛཾ ཨུ་ཏྟཱ་ན་པ་ད་ཏྠ་མེ་ཝ. སཱ་ཝ་ཏྠི་ཡཾ ཙ་ཎྜ་ཀཱ་ལི༹ཾ ཨཱ་ར་བྦྷ སཾ་ས་ཊྛ་ཝི་ཧཱ་ར་ཝ་ཏྠུ་སྨིཾ པ་ཉྙ་ཏྟཾ, སེ་ས་མེ་ཏྠ པ་ཋ་མ་ཨ་རི་ཊྛ་སི་ཀྑཱ་པ་དེ ཝུ་ཏྟ་ཝི་ནི་ཙྪ་ཡ་ས་དི་ས་མེ་ཝཱ་ཏི.

སཾ་ས་ཊྛ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༧. ཨ་ནྟོ་ར་ཊྛ་སི་ཀྑཱ་པ་ད་ཝ་ཎྞ་ནཱ

ས་ཏྟ་མེ ཨ་ནྟོ་ར་ཊྛེཏི ཡ་སྶ ཝི་ཛི་ཏེ ཝི་ཧ་ར་ཏི, ཏ་སྶ ར་ཊྛེ. ཨ་ས་ཏྠི་ཀཱ ཙཱ་རི་ཀནྟི ཝི་ནཱ ས་ཏྠེ་ན ག་ཙྪ་ནྟི་ཡཱ, གཱ་མ་ནྟ་ར་ག་ཎ་ནཱ་ཡ, ཨ་གཱ་མ་ཀེ ཨ་ར་ཉྙེ ཨ་དྡྷ་ཡོ་ཛ་ན་ག་ཎ་ནཱ་ཡ པཱ་ཙི་ཏྟི་ཡཾ.

སཱ་ཝ་ཏྠི་ཡཾ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཝུ་ཏྟ་ན་ཡེ་ནེ་ཝ དེ་ས་ཙཱ་རི་ཀཾ པ་ཀྐ་མ་ན་ཝ་ཏྠུ་སྨིཾ པ་ཉྙ་ཏྟཾ. ས་ཏྠེ་ན ས་ཧ ག་ཙྪ་ནྟི་ཡཱ, ཁེ་མེ ཨ་པྤ་ཊི་བྷ་ཡེ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ནྟོ་ར་ཊྛ་ཏཱ, ཨ་ཁེ་མ་ཏཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, ཙཱ་རི་ཀཾ པ་ཀྐ་མ་ན་ནྟི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.

ཨ་ནྟོ་ར་ཊྛ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༨. ཏི་རོ་ར་ཊྛ་སི་ཀྑཱ་པ་ད་ཝ་ཎྞ་ནཱ

ཨ་ཊྛ་མེ ཏི་རོ་ར་ཊྛེཏི ཡ་སྶ ཝི་ཛི་ཏེ ཝི་ཧ་ར་ཏི, ཏཾ ཋ་པེ་ཏྭཱ ཨ་ཉྙ་སྶ ར་ཊྛེ. སེ་སཾ ས་ཏྟ་མེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ, ན་ག་རཾ པ་ནེ་ཏྠ རཱ་ཛ་ག་ཧ་ནྟི.

ཏི་རོ་ར་ཊྛ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༩. ཨ་ནྟོ་ཝ་སྶ་སི་ཀྑཱ་པ་ད་ཝ་ཎྞ་ནཱ

ན་ཝ་མེ ཨ་ནྟོ་ཝ་སྶནྟི པུ་རི་མཾ ཝཱ ཏེ་མཱ་སཾ, པ་ཙྪི་མཾ ཝཱ ཏེ་མཱ་སཾ ཨ་ཝ་སི་ཏྭཱ ཏ་སྶ ཝ་སྶ་སྶ ཨ་ནྟོ་ཡེ་ཝ. ཨི་དྷ ས་ཏྟཱ་ཧ་ཀ་ར་ཎཱི་ཡེ་ན ཝཱ ཀེ་ན་ཙི ཨུ་བྦ་ལ༹ྷཱ་ཡ ཝཱ ཨཱ་པ་དཱ་སུ ཝཱ ག་ཙྪ་ནྟི་ཡཱ ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. སེ་སཾ ཨ་ཊྛ་མ་ས་དི་ས་མེ་ཝཱ་ཏི.

ཨ་ནྟོ་ཝ་སྶ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༡༠. ཙཱ་རི་ཀ་ན་པ་ཀྐ་མ་ན་སི་ཀྑཱ་པ་ད་ཝ་ཎྞ་ནཱ

ད་ས་མེ ཝ་སྶཾ་ཝུ་ཊྛཱཏི པུ་རི་མཾ ཝཱ ཏེ་མཱ་སཾ, པ་ཙྪི་མཾ ཝཱ ཏེ་མཱ་སཾ ཝུ་ཊྛཱ. ཚ་པྤ་ཉྩ་ཡོ་ཛ་ནཱ་ནཱིཏི ཨེ་ཏྠ པ་ཝཱ་རེ་ཏྭཱ པ་ཉྩ ཡོ་ཛ་ནཱ་ནི ག་ནྟུ་མྤི ཝ་ཊྚ་ཏི, ཚ་སུ ཝ་ཏྟ་བྦ་མེ་ཝ ན་ཏྠི. ས་ཙེ པ་ན ཏཱི་ཎི ག་ནྟྭཱ ཏེ་ནེ་ཝ མ་གྒེ་ན པ་ཙྩཱ་ག་ཙྪ་ཏི, ན ཝ་ཊྚ་ཏི, ཨ་ཉྙེ་ན ཨཱ་ག་ནྟུཾ ཝ་ཊྚ་ཏི. ‘‘ཝུ་ཏྟ་པྤ་མཱ་ཎཾ ཨ་དྡྷཱ་ནཾ ན ག་ཙྪི་སྶཱ་མཱི’’ཏི དྷུ་རེ ནི་ཀྑི་ཏྟ་མ་ཏྟེ པཱ་ཙི་ཏྟི་ཡཾ.

རཱ་ཛ་ག་ཧེ ས་མྦ་ཧུ་ལཱ བྷི་ཀྑུ་ནི་ཡོ ཨཱ་ར་བྦྷ ཝ་སྶཾ ཝ་སི་ཏྭཱ ཙཱ་རི་ཀཾ ཨ་པ་ཀྐ་མ་ན་ཝ་ཏྠུ་སྨིཾ པ་ཉྙ་ཏྟཾ. ཨ་ནྟ་རཱ་ཡེ ས་ཏི, པ་རི་ཡེ་སི་ཏྭཱ དུ་ཏི་ཡི་ཀཾ བྷི་ཀྑུ་ནིཾ ཨ་ལ་བྷ་ནྟི་ཡཱ, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཝ་སྶཾ་ཝུ་ཊྛ་ཏཱ, ཨ་ནུ་ཉྙཱ་ཏ་ཀཱ་ར་ཎཱ་བྷཱ་ཝོ, པ་ཉྩ་ཡོ་ཛ་ནཱ་ན་ཏི་ཀྐ་མོ་ཏི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི པ་ཋ་མ་པཱ་རཱ་ཛི་ཀ་ས་དི་སཱ་ནི, ཨི་དཾ པ་ན ཨ་ཀི་རི་ཡཾ, དུ་ཀྑ་ཝེ་ད་ན་ནྟི.

ཙཱ་རི་ཀ་ན་པ་ཀྐ་མ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

ཏུ་ཝ་ཊྚ་ཝ་གྒོ ཙ་ཏུ་ཏྠོ.