༤. ཙ་ཏུ་ཏྠ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ

ཙ་ཏུ་ཏྠེ ཡཱ་ནི ཁོ པ་ན ཏཱ་ནི ཨཱ་ར་ཉྙ་ཀཱ་ནཱིཏི་ཨཱ་དི ཙཱི་ཝ་ར་ཝི་པྤ་ཝཱ་ས་སི་ཀྑཱ་པ་དེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. པུ་བྦེ ཨ་པྤ་ཊི་སཾ་ཝི་དི་ཏནྟི ཨེ་ཏྠ ཡཾ ཨི་ཏྠི་ཡཱ ཝཱ པུ་རི་སེ་ན ཝཱ ག་ཧ་ཊྛེ་ན ཝཱ པ་བྦ་ཛི་ཏེ་ན ཝཱ ཨཱ་རཱ་མཾ ཝཱ ཨཱ་རཱ་མཱུ་པ་ཙཱ་རཾ ཝཱ པ་ཝི་སི་ཏྭཱ ‘‘ཨི་ཏྠ་ནྣཱ་མ་སྶ, བྷ་ནྟེ, ཀུ་ལ་སྶ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨཱ་ཧ་རི་ཡི་སྶ་ཏཱི’’ཏི (པཱ་ཙི. ༥༧༣) ཨཱ་རོ་ཙི་ཏཾ, ཏཾ པ་ཙྪཱ ཡ་ཐཱ་ཨཱ་རོ་ཙི་ཏ་མེ་ཝ ཝཱ ཨཱ་ཧ་རི་ཡ་ཏུ, ཏ་སྶ པ་རི་ཝཱ་རཾ ཀ་ཏྭཱ ཨ་ཉྙཾ ཝཱ ཏེ་ན ས་དྡྷིཾ བ་ཧུ་ཀ་མྤི, ‘‘ཨི་ཏྠ་ནྣཱ་མཾ ཀུ་ལཾ པ་ཊི་སཾ་ཝི་དི་ཏཾ ཀ་ཏྭཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ག་ཧེ་ཏྭཱ ག་ཙྪ་ཏཱི’’ཏི སུ་ཏྭཱ ཨ་ཉྙཱ་ནི ཝཱ ཀུ་ལཱ་ནི ཏེ་ཧི ས་དྡྷིཾ ཨཱ་ཧ་ར་ནྟུ, ཏཾ ས་བྦཾ པ་ཊི་སཾ་ཝི་དི་ཏཾ ནཱ་མ. ཡཾ པ་ན ཨེ་ཝཾ ཨ་ནཱ་རོ་ཙི་ཏཾ ཨ་ནཱ་ཧ་ཊ་ཉྩ, ཏཾ ཨ་པྤ་ཊི་སཾ་ཝི་དི་ཏཾ ནཱ་མ. ཨ་གི་ལཱ་ནོ ནཱ་མ ཡོ ས་ཀྐོ་ཏི པི་ཎྜཱ་ཡ ག་ནྟུཾ. པཱ་ཊི་དེ་ས་ནཱི་ཡནྟི ཨེ་ཝ་རཱུ་པཾ ཨ་ནྟ་མ་སོ ཨཱ་རཱ་མ་མ་ཛ྄ཛྷེ་ན ག་ཙྪ་ནྟེ་ཧི ཨ་དྡྷི་ཀེ་ཧི དི་ནྣ་མྤི ཨཱ་རཱ་མེ ཝཱ ཨཱ་རཱ་མཱུ་པ་ཙཱ་རེ ཝཱ པ་ཊི་གྒ་ཧེ་ཏྭཱ ཨ་ཛ྄ཛྷོ་ཧ་ར་ནྟ་སྶ པ་ཊི་གྒ་ཧ་ཎེ དུ་ཀྐ་ཊཾ, ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ པཱ་ཊི་དེ་ས་ནཱི་ཡ་ནྟི.

ས་ཀྐེ་སུ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ཨཱ་རཱ་མེ ཙོ་རེ པ་ཊི་ཝ་ས་ནྟེ ཨ་ནཱ་རོ་ཙ་ན་ཝ་ཏྠུ་སྨིཾ པ་ཉྙ་ཏྟཾ, ‘‘ཨ་གི་ལཱ་ནོ’’ཏི ཨ་ཡ་མེ་ཏྠ ཨེ་ཀཱ ཨ་ནུ་པ་ཉྙ་ཏྟི, ཏི་ཀ་པཱ་ཊི་དེ་ས་ནཱི་ཡཾ, ཡཱ་མ་ཀཱ་ལི་ཀཱ་དཱི་སུ ཨཱ་ཧཱ་ར་ཏྠཱ་ཡ པ་ཊི་གྒ་ཧ་ཎེ་པི ཨ་ཛ྄ཛྷོ་ཧཱ་རེ་པི དུ་ཀྐ་ཊ་མེ་ཝ, ཏ་ཐཱ པ་ཊི་སཾ་ཝི་དི་ཏེ ཨ་པྤ་ཊི་སཾ་ཝི་དི་ཏ་ས་ཉྙི་ནོ ཝེ་མ་ཏི་ཀ་སྶ ཙ, པ་ཊི་སཾ་ཝི་དི་ཏ་ས་ཉྙི་ནོ, པ་ན གི་ལཱ་ན་སྶ, ཡོ ཙ པ་ཊི་སཾ་ཝི་དི་ཏཾ ཀ་ཏྭཱ ཨཱ་ཧ་ཊཾ ཝཱ གི་ལཱ་ནཱ་ཝ་སེ་ས་ཀཾ ཝཱ བ་ཧཱ་རཱ་མེ ཝཱ པ་ཊི་གྒ་ཧི་ཏཾ, ཏ་ཏྠ་ཛཱ་ཏ་ཀ་མེ་ཝ ཝཱ མཱུ་ལ་ཕ་ལཱ་དིཾ, ཡཱ་མ་ཀཱ་ལི་ཀཱ་དཱི་སུ ཝཱ ཡཾ་ཀི་ཉྩི ‘‘ས་ཏི པ་ཙྩ་ཡེ པ་རི་བྷུ་ཉྫཱ’’ཏི ལ་དྡྷཾ པ་རི་བྷུ་ཉྫ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཡ་ཐཱ་ཝུ་ཏྟ་ཨཱ་ར་ཉྙ་ཀ་སེ་ནཱ་ས་ན་ཏཱ, ཡཱ་ཝ་ཀཱ་ལི་ཀ་སྶ ཨ་ཏ་ཏྠ་ཛཱ་ཏ་ཀ་ཏཱ, ཨ་གི་ལཱ་ན་ཏཱ, ཨ་གི་ལཱ་ནཱ་ཝ་སེ་ས་ཀ་ཏཱ, ཨ་པྤ་ཊི་སཾ་ཝི་དི་ཏ་ཏཱ, ཨ་ཛ྄ཛྷཱ་རཱ་མེ པ་ཊི་གྒ་ཧ་ཎཾ, ཨ་ཛ྄ཛྷོ་ཧ་ར་ཎ་ནྟི ཨི་མཱ་ནེ་ཏྠ ས་ཏྟ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཀ་ཐི་ན་ས་དི་སཱ་ནེ་ཝ, ཨི་དཾ པ་ན ཀི་རི་ཡཱ་ཀི་རི་ཡ་ནྟི.

ཙ་ཏུ་ཏྠ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

ཀ་ངྑཱ་ཝི་ཏ་ར་ཎི་ཡཱ པཱ་ཏི་མོ་ཀྑ་ཝ་ཎྞ་ནཱ་ཡ

པཱ་ཊི་དེ་ས་ནཱི་ཡ་ཝ་ཎྞ་ནཱ ནི་ཊྛི་ཏཱ.