པཱ་ཊི་དེ་ས་ནཱི་ཡ་ཀ་ཎྜོ
༡. པ་ཋ་མ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ
པཱ་ཊི་དེ་ས་ནཱི་ཡེ་སུ པ་ཋ་མེ ཨ་ནྟ་ར་གྷ་རཾ པ་ཝི་ཊྛཱ་ཡཱཏི ཝ་ཙ་ན་ཏོ ས་ཙེ ཏ་སྶཱ ཨ་ནྟ་རཱ་རཱ་མཱ་དཱི་སུ ཋ་ཏྭཱ་པི ད་ད་མཱ་ནཱ་ཡ ཧ་ཏྠ་ཏོ ས་ཡཾ ར་ཐི་ཡཱ་བྱཱུ་ཧ་སི་ངྒྷཱ་ཊ་ཀ་གྷ་རཱ་ནཾ ཨ་ཉྙ་ཏ་ར་སྨིཾ ཋི་ཏོ་པི ག་ཎྷཱ་ཏི, དོ་སོ ན་ཏྠི. ཏ་སྶཱ པ་ན ར་ཐི་ཡཱ་དཱི་སུ ཋ་ཏྭཱ ད་ད་མཱ་ནཱ་ཡ, ར་ཐི་ཡཱ་དཱི་སུ ཝཱ, ཨ་ནྟ་རཱ་རཱ་མཱ་དཱི་སུ ཝཱ ཋ་ཏྭཱ་པི ཡཾ་ཀི་ཉྩི ཨཱ་མི་སཾ ཨ་ཛ྄ཛྷོ་ཧ་ར་ཎ་ཏྠཱ་ཡ ག་ཎྷ་ཏོ པ་ཊི་གྒ་ཧ་ཎེ དུ་ཀྐ་ཊཾ, ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ པཱ་ཊི་དེ་ས་ནཱི་ཡཾ. ཏ་སྶ དེ་སེ་ཏ་བྦཱ་ཀཱ་རོ གཱ་ར་ཡ྄ཧཾ ཨཱ་ཝུ་སོཏི་ཨཱ་དི་ནཱ ན་ཡེ་ན སི་ཀྑཱ་པ་དེ ད་སྶི་ཏོ་ཡེ་ཝ.
སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ཨ་ནྟ་ར་གྷ་རཾ པ་ཝི་ཊྛཱ་ཡ ཧ་ཏྠ་ཏོ ཨཱ་མི་སཾ པ་ཊི་གྒ་ཧ་ཎ་ཝ་ཏྠུ་སྨིཾ པ་ཉྙ་ཏྟཾ, ཨ་སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཡ་ཐཱ ཙེ་ཏཾ, ཏ་ཐཱ སེ་སཱ་ནི་པི, ཏི་ཀ་པཱ་ཊི་དེ་ས་ནཱི་ཡཾ, ཡཱ་མ་ཀཱ་ལི་ཀཱ་དཱི་སུ པ་ཊི་གྒ་ཧ་ཎེ་པི ཨ་ཛ྄ཛྷོ་ཧ་ར་ཎེ་པི དུ་ཀྐ་ཊཾ, ཨེ་ཀ་ཏོ་ཨུ་པ་ས་མྤ་ནྣཱ་ཡ ཡཱ་ཝ་ཀཱ་ལི་ཀེ་པི ཏ་ཐེ་ཝ, ཉཱ་ཏི་ཀཱ་ཡ ཨ་ཉྙཱ་ཏི་ཀ་ས་ཉྙི་ཝེ་མ་ཏི་ཀཱ་ན་མྤི ཨེ་སེ་ཝ ན་ཡོ. ཉཱ་ཏི་ཀ་ས་ཉྙི་ནོ པ་ན, ཉཱ་ཏི་ཀཱ་ཡ ཝཱ དཱ་པེ་ནྟི་ཡཱ, ཨུ་པ་ནི་ཀྑི་པི་ཏྭཱ ཝཱ ད་ད་མཱ་ནཱ་ཡ, ཡཱ ཙ ཨ་ནྟ་རཱ་རཱ་མ་བྷི་ཀྑུ་ནུ་པ་སྶ་ཡ་ཏི་ཏྠི་ཡ་སེ་ཡྻ་པ་ཊི་ཀྐ་མ་ནེ་སུ ཋ་ཏྭཱ གཱ་མ་ཏོ བ་ཧི ནཱི་ཧ་རི་ཏྭཱ, ཡཱ་མ་ཀཱ་ལི་ཀཱ་དཱི་ནི ཝཱ ‘‘ས་ཏི པ་ཙྩ་ཡེ པ་རི་བྷུ་ཉྫཱ’’ཏི དེ་ཏི, ཏ་སྶ, སི་ཀྑ་མཱ་ན་སཱ་མ་ཎེ་རཱི་ན་ཉྩ ཧ་ཏྠ་ཏོ ག་ཧེ་ཏྭཱ པ་རི་བྷུ་ཉྫ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. པ་རི་པུ་ཎྞཱུ་པ་ས་མྤ་ནྣ་ཏཱ, ཨ་ཉྙཱ་ཏི་ཀ་ཏཱ, ཨ་ནྟ་ར་གྷ་རེ ཋི་ཏཱ་ཡ ཧ་ཏྠ་ཏོ ས་ཧ་ཏྠཱ པ་ཊི་གྒ་ཧ་ཎཾ, ཡཱ་ཝ་ཀཱ་ལི་ཀ་ཏཱ, ཨ་ཛ྄ཛྷོ་ཧ་ར་ཎ་ནྟི ཨི་མཱ་ནེ་ཏྠ པ་ཉྩ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.
པ་ཋ་མ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༢. དུ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ
དུ་ཏི་ཡེ ཨི་དྷ སཱུ་པནྟི་ཨཱ་དི ཝོ་སཱ་ས་ནཱ་ཀཱ་ར་ད་སྶ་ནཾ. ཨ་པ་ས་ཀྐ ཏཱ་ཝ བྷ་གི་ནཱིཏི་ཨཱ་དི ཨ་པ་སཱ་དེ་ཏ་བྦཱ་ཀཱ་ར་ད་སྶ་ནཾ. ཏ་ཏྲཱ་ཡཾ ཝི་ནི་ཙྪ་ཡོ – ཨེ་ཀེ་ནཱ་པི བྷི་ཀྑུ་ནཱ ཨ་ན་པ་སཱ་དི་ཏེ ཨ་ཛ྄ཛྷོ་ཧ་ར་ཎ་ཏྠཱ་ཡ ཨཱ་མི་སཾ ག་ཎྷ་ནྟཱ་ནཾ པ་ཊི་གྒ་ཧ་ཎེ དུ་ཀྐ་ཊཾ, ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ པཱ་ཊི་དེ་ས་ནཱི་ཡ་ནྟི.
རཱ་ཛ་ག་ཧེ ཚ་བྦ་གྒི་ཡེ ཨཱ་ར་བྦྷ བྷི་ཀྑུ་ནི་ཡཱ ཝོ་སཱ་ས་ནྟི་ཡཱ ན་ནི་ཝཱ་ར་ཎ་ཝ་ཏྠུ་སྨིཾ པ་ཉྙ་ཏྟཾ, ཏི་ཀ་པཱ་ཊི་དེ་ས་ནཱི་ཡཾ, ཨེ་ཀ་ཏོ་ཨུ་པ་ས་མྤ་ནྣཱ་ཡ ཝོ་སཱ་ས་ནྟི་ཡཱ ན་ནི་ཝཱ་རེ་ནྟ་སྶ དུ་ཀྐ་ཊཾ, ཏ་ཐཱ ཨ་ནུ་པ་ས་མྤ་ནྣཱ་ཡ ཨུ་པ་ས་མྤ་ནྣ་ས་ཉྙི་ནོ ཝེ་མ་ཏི་ཀ་སྶ ཙ. ཨ་ནུ་པ་ས་མྤ་ནྣ་ས་ཉྙི་ནོ, པ་ན ཡོ ཙ ཨ་ཏྟ་ནོ ཝཱ བྷ་ཏྟཾ དཱ་པེ་ནྟི་ཡཱ, ཨ་ཉྙེ་སཾ ཝཱ བྷ་ཏྟཾ དེ་ནྟི་ཡཱ, ཡཾ ཝཱ ན དི་ནྣཾ, ཏཾ དཱ་པེ་ནྟི་ཡཱ, ཡ་ཏྠ ཝཱ ན དི་ནྣཾ, ཏ་ཏྠ, ས་བྦེ་སཾ ཝཱ ས་མ་ཀཾ དཱ་པེ་ནྟི་ཡཱ, སི་ཀྑ་མཱ་ནཱ་ཡ ཝཱ སཱ་མ་ཎེ་རི་ཡཱ ཝཱ ཝོ་སཱ་ས་ནྟི་ཡཱ པ་ཊི་གྒ་ཧེ་ཏྭཱ བྷུ་ཉྫ་ཏི, ཏ་སྶ, པ་ཉྩ བྷོ་ཛ་ནཱ་ནི ཋ་པེ་ཏྭཱ ས་བྦ་ཏྠ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. པ་རི་པུ་ཎྞཱུ་པ་ས་མྤ་ནྣ་ཏཱ, པ་ཉྩ་བྷོ་ཛ་ན་ཏཱ, ཨ་ནྟ་ར་གྷ་རེ ཨ་ནུ་ཉྙཱ་ཏ་པ་ཀཱ་ར་ཏོ ཨ་ཉྙ་ཐཱ ཝོ་སཱ་ས་ནཱ, ཨ་ནི་ཝཱ་ར་ཎཱ, ཨ་ཛ྄ཛྷོ་ཧ་ར་ཎ་ནྟི ཨི་མཱ་ནེ་ཏྠ པ་ཉྩ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཀ་ཐི་ན་ས་དི་སཱ་ནཱི་ཏི.
དུ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༣. ཏ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ
ཏ་ཏི་ཡེ སེ་ཀྑ་ས་མྨ་ཏཱ་ནཱིཏི ལ་དྡྷ་སེ་ཀྑ་ས་མྨུ་ཏི་ཀཱ་ནི. པུ་བྦེ ཨ་ནི་མ་ནྟི་ཏོཏི གྷ་རཱུ་པ་ཙཱ་རོ་ཀྐ་མ་ན་ཏོ པ་ཋ་མ་ཏ་རཾ ཨུ་པ་ཙཱ་རཾ ཨ་ནོ་ཀྐ་མ་ནྟེ་ཡེ་ཝ པུ་བྦེ ཨ་ནི་མ་ནྟི་ཏོ. ཨ་གི་ལཱ་ནོ ནཱ་མ ཡོ ས་ཀྐོ་ཏི པི་ཎྜཱ་ཡ ཙ་རི་ཏུཾ. པཱ་ཊི་དེ་ས་ནཱི་ཡནྟི གྷ་རཱུ་པ་ཙཱ་རཾ ཨོ་ཀྐ་མི་ཏྭཱ ཨཱ་མི་སཾ ག་ཎྷ་ནྟ་སྶ པ་ཊི་གྒ་ཧ་ཎེ ཏཱ་ཝ དུ་ཀྐ་ཊཾ, ཏཾ ག་ཧེ་ཏྭཱ ཡ་ཏྠ་ཀ་ཏྠ་ཙི བྷུ་ཉྫ་ནྟ་སྶ ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ པཱ་ཊི་དེ་ས་ནཱི་ཡ་ནྟི.
སཱ་ཝ་ཏྠི་ཡཾ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ན མ་ཏྟཾ ཛཱ་ནི་ཏྭཱ པ་ཊི་གྒ་ཧ་ཎ་ཝ་ཏྠུ་སྨིཾ པ་ཉྙ་ཏྟཾ, ‘‘པུ་བྦེ ཨ་ནི་མ་ནྟི་ཏོ, ཨ་གི་ལཱ་ནོ’’ཏི ཨི་མཱ པ་ནེ་ཏྠ དྭེ ཨ་ནུ་པ་ཉྙ་ཏྟི་ཡོ, ཏི་ཀ་པཱ་ཊི་དེ་ས་ནཱི་ཡཾ, ཡཱ་མ་ཀཱ་ལི་ཀཱ་དཱི་སུ པ་ཊི་གྒ་ཧ་ཎེ་པི ཨ་ཛ྄ཛྷོ་ཧཱ་རེ་པི དུ་ཀྐ་ཊཾ, ཏ་ཐཱ ཨ་སེ་ཀྑ་ས་མྨ་ཏེ སེ་ཀྑ་ས་མྨ་ཏ་ས་ཉྙི་ནོ ཝེ་མ་ཏི་ཀ་སྶ ཙ. ཨ་སེ་ཀྑ་ས་མྨ་ཏ་ས་ཉྙི་ནོ, པ་ན ཡོ ཙ པུ་བྦེ ནི་མ་ནྟི་ཏོ ཝཱ གི་ལཱ་ནོ ཝཱ ཨ་ཉྙ་སྶ ཝཱ ཏེ་སཾ གྷ་རེ པ་ཉྙ་ཏྟཾ བྷི་ཀྑཾ ག་ཎྷཱ་ཏི, ཡ་སྶ ཙ གྷ་ར་ཏོ ནཱི་ཧ་རི་ཏྭཱ, ཨཱ་ས་ན་སཱ་ལཱ་དཱི་སུ ཝཱ བྷི་ཀྑུཾ ཨ་དི་སྭཱ པ་ཋ་མཾ་ཡེ་ཝ ནཱི་ཧ་རི་ཏྭཱ, དྭཱ་ར་མཱུ་ལེ ཝཱ ཋ་པི་ཏཾ དེ་ནྟི, ཏ་སྶ ཏཾ བྷུ་ཉྫ་ནྟ་སྶ, ནི་ཙྩ་བྷ་ཏྟ་ཀེ, ས་ལཱ་ཀ་བྷ་ཏྟེ, པ་ཀྑི་ཀེ, ཨུ་པོ་ས་ཐི་ཀེ, པཱ་ཊི་པ་དི་ཀེ, ཡཱ་མ་ཀཱ་ལི་ཀཱ་དིཾ ‘‘ས་ཏི པ་ཙྩ་ཡེ པ་རི་བྷུ་ཉྫཱ’’ཏི དི་ནྣཾ པ་རི་བྷུ་ཉྫ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. སེ་ཀྑ་ས་མྨ་ཏ་ཏཱ, པུ་བྦེ ཨ་ནི་མ་ནྟི་ཏ་ཏཱ, ཨ་གི་ལཱ་ན་ཏཱ, གྷ་རཱུ་པ་ཙཱ་རོ་ཀྐ་མ་ནཾ, ཋ་པེ་ཏྭཱ ནི་ཙྩ་བྷ་ཏྟ་ཀཱ་དཱི་ནི ཨ་ཉྙཾ ཨཱ་མི་སཾ ག་ཧེ་ཏྭཱ བྷུ་ཉྫ་ན་ནྟི ཨི་མཱ་ནེ་ཏྠ པ་ཉྩ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨེ་ལ༹་ཀ་ལོ་མ་ས་དི་སཱ་ནཱི་ཏི.
ཏ་ཏི་ཡ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
༤. ཙ་ཏུ་ཏྠ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ
ཙ་ཏུ་ཏྠེ ཡཱ་ནི ཁོ པ་ན ཏཱ་ནི ཨཱ་ར་ཉྙ་ཀཱ་ནཱིཏི་ཨཱ་དི ཙཱི་ཝ་ར་ཝི་པྤ་ཝཱ་ས་སི་ཀྑཱ་པ་དེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. པུ་བྦེ ཨ་པྤ་ཊི་སཾ་ཝི་དི་ཏནྟི ཨེ་ཏྠ ཡཾ ཨི་ཏྠི་ཡཱ ཝཱ པུ་རི་སེ་ན ཝཱ ག་ཧ་ཊྛེ་ན ཝཱ པ་བྦ་ཛི་ཏེ་ན ཝཱ ཨཱ་རཱ་མཾ ཝཱ ཨཱ་རཱ་མཱུ་པ་ཙཱ་རཾ ཝཱ པ་ཝི་སི་ཏྭཱ ‘‘ཨི་ཏྠ་ནྣཱ་མ་སྶ, བྷ་ནྟེ, ཀུ་ལ་སྶ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཨཱ་ཧ་རི་ཡི་སྶ་ཏཱི’’ཏི (པཱ་ཙི. ༥༧༣) ཨཱ་རོ་ཙི་ཏཾ, ཏཾ པ་ཙྪཱ ཡ་ཐཱ་ཨཱ་རོ་ཙི་ཏ་མེ་ཝ ཝཱ ཨཱ་ཧ་རི་ཡ་ཏུ, ཏ་སྶ པ་རི་ཝཱ་རཾ ཀ་ཏྭཱ ཨ་ཉྙཾ ཝཱ ཏེ་ན ས་དྡྷིཾ བ་ཧུ་ཀ་མྤི, ‘‘ཨི་ཏྠ་ནྣཱ་མཾ ཀུ་ལཾ པ་ཊི་སཾ་ཝི་དི་ཏཾ ཀ་ཏྭཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ག་ཧེ་ཏྭཱ ག་ཙྪ་ཏཱི’’ཏི སུ་ཏྭཱ ཨ་ཉྙཱ་ནི ཝཱ ཀུ་ལཱ་ནི ཏེ་ཧི ས་དྡྷིཾ ཨཱ་ཧ་ར་ནྟུ, ཏཾ ས་བྦཾ པ་ཊི་སཾ་ཝི་དི་ཏཾ ནཱ་མ. ཡཾ པ་ན ཨེ་ཝཾ ཨ་ནཱ་རོ་ཙི་ཏཾ ཨ་ནཱ་ཧ་ཊ་ཉྩ, ཏཾ ཨ་པྤ་ཊི་སཾ་ཝི་དི་ཏཾ ནཱ་མ. ཨ་གི་ལཱ་ནོ ནཱ་མ ཡོ ས་ཀྐོ་ཏི པི་ཎྜཱ་ཡ ག་ནྟུཾ. པཱ་ཊི་དེ་ས་ནཱི་ཡནྟི ཨེ་ཝ་རཱུ་པཾ ཨ་ནྟ་མ་སོ ཨཱ་རཱ་མ་མ་ཛ྄ཛྷེ་ན ག་ཙྪ་ནྟེ་ཧི ཨ་དྡྷི་ཀེ་ཧི དི་ནྣ་མྤི ཨཱ་རཱ་མེ ཝཱ ཨཱ་རཱ་མཱུ་པ་ཙཱ་རེ ཝཱ པ་ཊི་གྒ་ཧེ་ཏྭཱ ཨ་ཛ྄ཛྷོ་ཧ་ར་ནྟ་སྶ པ་ཊི་གྒ་ཧ་ཎེ དུ་ཀྐ་ཊཾ, ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ པཱ་ཊི་དེ་ས་ནཱི་ཡ་ནྟི.
ས་ཀྐེ་སུ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ཨཱ་རཱ་མེ ཙོ་རེ པ་ཊི་ཝ་ས་ནྟེ ཨ་ནཱ་རོ་ཙ་ན་ཝ་ཏྠུ་སྨིཾ པ་ཉྙ་ཏྟཾ, ‘‘ཨ་གི་ལཱ་ནོ’’ཏི ཨ་ཡ་མེ་ཏྠ ཨེ་ཀཱ ཨ་ནུ་པ་ཉྙ་ཏྟི, ཏི་ཀ་པཱ་ཊི་དེ་ས་ནཱི་ཡཾ, ཡཱ་མ་ཀཱ་ལི་ཀཱ་དཱི་སུ ཨཱ་ཧཱ་ར་ཏྠཱ་ཡ པ་ཊི་གྒ་ཧ་ཎེ་པི ཨ་ཛ྄ཛྷོ་ཧཱ་རེ་པི དུ་ཀྐ་ཊ་མེ་ཝ, ཏ་ཐཱ པ་ཊི་སཾ་ཝི་དི་ཏེ ཨ་པྤ་ཊི་སཾ་ཝི་དི་ཏ་ས་ཉྙི་ནོ ཝེ་མ་ཏི་ཀ་སྶ ཙ, པ་ཊི་སཾ་ཝི་དི་ཏ་ས་ཉྙི་ནོ, པ་ན གི་ལཱ་ན་སྶ, ཡོ ཙ པ་ཊི་སཾ་ཝི་དི་ཏཾ ཀ་ཏྭཱ ཨཱ་ཧ་ཊཾ ཝཱ གི་ལཱ་ནཱ་ཝ་སེ་ས་ཀཾ ཝཱ བ་ཧཱ་རཱ་མེ ཝཱ པ་ཊི་གྒ་ཧི་ཏཾ, ཏ་ཏྠ་ཛཱ་ཏ་ཀ་མེ་ཝ ཝཱ མཱུ་ལ་ཕ་ལཱ་དིཾ, ཡཱ་མ་ཀཱ་ལི་ཀཱ་དཱི་སུ ཝཱ ཡཾ་ཀི་ཉྩི ‘‘ས་ཏི པ་ཙྩ་ཡེ པ་རི་བྷུ་ཉྫཱ’’ཏི ལ་དྡྷཾ པ་རི་བྷུ་ཉྫ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཡ་ཐཱ་ཝུ་ཏྟ་ཨཱ་ར་ཉྙ་ཀ་སེ་ནཱ་ས་ན་ཏཱ, ཡཱ་ཝ་ཀཱ་ལི་ཀ་སྶ ཨ་ཏ་ཏྠ་ཛཱ་ཏ་ཀ་ཏཱ, ཨ་གི་ལཱ་ན་ཏཱ, ཨ་གི་ལཱ་ནཱ་ཝ་སེ་ས་ཀ་ཏཱ, ཨ་པྤ་ཊི་སཾ་ཝི་དི་ཏ་ཏཱ, ཨ་ཛ྄ཛྷཱ་རཱ་མེ པ་ཊི་གྒ་ཧ་ཎཾ, ཨ་ཛ྄ཛྷོ་ཧ་ར་ཎ་ནྟི ཨི་མཱ་ནེ་ཏྠ ས་ཏྟ ཨ་ངྒཱ་ནི. ས་མུ་ཊྛཱ་ནཱ་དཱི་ནི ཀ་ཐི་ན་ས་དི་སཱ་ནེ་ཝ, ཨི་དཾ པ་ན ཀི་རི་ཡཱ་ཀི་རི་ཡ་ནྟི.
ཙ་ཏུ་ཏྠ་པཱ་ཊི་དེ་ས་ནཱི་ཡ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.
ཀ་ངྑཱ་ཝི་ཏ་ར་ཎི་ཡཱ པཱ་ཏི་མོ་ཀྑ་ཝ་ཎྞ་ནཱ་ཡ
པཱ་ཊི་དེ་ས་ནཱི་ཡ་ཝ་ཎྞ་ནཱ ནི་ཊྛི་ཏཱ.