༡༣. ཏེ་ཝི་ཛྫ་སུ་ཏྟ་ཝ་ཎྞ་ནཱ
༥༡༨. ཨུ་ཏྟ་རེ་ནཱཏི ཨེ་ཏྠ ཨེ་ན-ས་དྡོ དི་སཱ་ཝཱ་ཙཱི་ས་དྡ་ཏོ པ་ཉྩ་མཱི་ཨ་ནྟ་ཏོ ཨ་དཱུ་ར་ཏྠོ ཨི་ཙྪི་ཏོ, ཏ་སྨཱ ཨུ་ཏྟ་རེ་ན-ས་དྡེ་ན ཨ་དཱུ་ར་ཏྠ་ཛོ་ཏ་ནཾ ད་སྶེ་ནྟོ ‘‘ཨ་དཱུ་རེ ཨུ་ཏྟ་ར་པ་སྶེ’’ཏི ཨཱ་ཧ. ཨ་ཀྑ་ར་ཙི་ནྟ་ཀཱ པ་ན ཨེ་ན-ས་དྡ་ཡོ་གེ ཨ་ཝ་དྷི་ཝཱ་ཙི་ནི པ་དེ ཨུ་པ་ཡོ་ག་ཝ་ཙ་ནཾ ཨི་ཙྪ་ནྟི. ཨ་ཏྠོ པ་ན སཱ་མི་ཝ་སེ་ནེ་ཝ ཨི་ཙྪི་ཏོ་ཏི ཨི་དྷ སཱ་མི་ཝ་ཙ་ན་ཝ་སེ་ནེ་ཝ ཝུ་ཏྟཾ.
༥༡༩. ཀུ་ལ་ཙཱ་རི་ཏྟཱ་དཱིཏི ཨཱ་དི-ས་དྡེ་ན མ་ནྟ་ཛ྄ཛྷེ་ནཱ་བྷི་རཱུ་པ་ཏཱ་དི་ས་མྤ་ཏྟིཾ ས་ངྒ་ཎྷཱ་ཏི. མ་ནྟ་ས་ཛ྄ཛྷཱ་ཡ་ཀ་ར་ཎ་ཏྠནྟི ཨཱ་ཐ་བྦ་ཎ་མ་ནྟཱ་ནཾ ས་ཛ྄ཛྷཱ་ཡ་ཀ་ར་ཎ་ཏྠཾ, ཏེ་ནཱ་ཧ ‘‘ཨ་ཉྙེ་སཾ བ་ཧཱུ་ནཾ པ་ཝེ་ས་ནཾ ནི་ཝཱ་རེ་ཏྭཱ’’ཏི.
མ་གྒཱ་མ་གྒ་ཀ་ཐཱ་ཝ་ཎྞ་ནཱ
༥༢༠. ‘‘ཛ་ངྒྷ་ཙཱ་ར’’ནྟི ཙ་ངྐ་མ་ཏོ ཨི་ཏོ ཙི་ཏོ ཙ ཙ་ར་ཎ་མཱ་ཧ. སོ ཧི ཛ་ངྒྷཱ་སུ ཀི་ལ་མ་ཐ་ཝི་ནོ་ད་ན་ཏྠོ ཙཱ་རོ་ཏི ཏ་ཐཱ ཝུ་ཏྟོ. ཏེ་ནཱ་ཧ ‘‘ཨ་ནུ་ཙ་ངྐ་མ་ནྟཱ་ནཾ ཨ་ནུ་ཝི་ཙ་ར་ནྟཱ་ན’’ནྟི. ཏེ་ནཱཏི ཨུ་བྷོ་སུ་པི ཨ་ནུ་ཙ་ངྐ་མ་ནཱ་ནུ་ཝི་ཙཱ་ར་ཎཱ་ནཾ ལ་བྦྷ་ན་ཏོ. ས་ཧཱ་ཡཱ ཧི ཏེ ཨ་ཉྙ་མ་ཉྙ ས་བྷཱ་ག་ཝུ་ཏྟི་ཀཱ. ‘‘མ་གྒོ’’ཏི ཨི་ཙྪི་ཏ་ཊྛཱ་ནཾ ཨུ་ཛུ་ཀཾ མ་གྒ་ཏི ཨུ་པ་ག་ཙྪ་ཏི ཨེ་ཏེ་ནཱ་ཏི མ་གྒོ, ཨུ་ཛུ་མ་གྒོ. ཏ་ད་ཉྙོ ཨ་མ་གྒོ, ཏ་སྨིཾ མ་གྒེ ཙ ཨ་མ་གྒེ ཙ. པ་ཊི་པ་དནྟི བྲ་ཧྨ་ལོ་ཀ་གཱ་མི་མ་གྒ་སྶ པུ་བྦ་བྷཱ་ག་པ་ཊི་པ་དཾ.
ནི་ཡྻཱ་ཏཱི་ཏི ནི་ཡྻཱ་ནཱི་ཡོ, སོ ཨེ་ཝ ‘‘ནི་ཡྻཱ་ནི་ཀོ’’ཏི ཝུ་ཏྟོ་ཏི ཨཱ་ཧ ‘‘ནི་ཡྻཱ་ཡ་ནྟོ’’ཏི. ཡ་སྨཱ ནི་ཡྻཱ་ཏ་པུ་གྒ་ལ་ཝ་སེ་ན་སྶ ནི་ཡྻཱ་ནི་ཀ་བྷཱ་ཝོ, ཏ་སྨཱ ‘‘ནི་ཡྻཱ་ཡ་ནྟོ’’ཏི པུ་གྒ་ལ་སྶ ཡོ་ནི་སོ པ་ཊི་པ་ཛྫ་ན་ཝ་སེ་ན ནི་ཡྻཱ་ཡ་ནྟོ མ་གྒོ ‘‘ནི་ཡྻཱ་ཏཱི’’ཏི ཝུ་ཏྟོ. ཀ་རོ་ཏཱིཏི ཨ་ཏྟ་ནོ ས་ནྟཱ་ནེ ཨུ་པྤཱ་དེ་ཏི. ཨུ་པྤཱ་དེ་ནྟོ་ཡེ་ཝ ཧི ཏ་ཏྠ པ་ཊི་པ་ཛྫ་ཏི ནཱ་མ. ས་ཧ བྱེ་ཏི ཝ་ཏྟ་ཏཱི་ཏི ས་ཧ་བྱོ, ས་ཧ་ཝ་ཏྟ་ན་ཀོ. ཏ་སྶ བྷཱ་ཝོ ས་ཧ་བྱ་ཏཱཏི ཨཱ་ཧ ‘‘ས་ཧ་བྷཱ་ཝཱ་ཡཱ’’ཏི་ཨཱ་དི. ས་ཧ་བྷཱ་ཝོ་ཏི ཙ ས་ལོ་ཀ་ཏཱ, ས་མཱི་པ་ཏཱ ཝཱ ཝེ་དི་ཏ་བྦཱ, ཏེ་ནཱ་ཧ ‘‘ཨེ་ཀ་ཊྛཱ་ནེ པཱ་ཏུ་བྷཱ་ཝཱ་ཡཱ’’ཏི. ས་ཀ་མེ་ཝ ཨཱ་ཙ་རི་ཡ་ཝཱ་དནྟི ཨ་ཏྟ་ནོ ཨཱ་ཙ་རི་ཡེ་ན པོ་ཀྑ་ར་སཱ་ཏི་ནཱ ཀ་ཐི་ཏ་མེ་ཝ ཨཱ་ཙ་རི་ཡ་ཝཱ་དཾ. ཐོ་མེ་ཏྭཱ པ་གྒ་ཎྷི་ཏྭཱ ‘‘ཨ་ཡ་མེ་ཝ ཨུ་ཛུ་མ་གྒོ ཨ་ཡ་མ་ཉྫ་སཱ་ཡ་ནོ’’ཏི པ་སཾ་སི་ཏྭཱ ཨུ་ཀྐཾ་སི་ཏྭཱ. བྷཱ་ར་དྭཱ་ཛོ་པི ས་ཀ་མེ་ཝཱཏི བྷཱ་ར་དྭཱ་ཛོ་པི མཱ་ཎ་ཝོ ཨ་ཏྟ་ནོ ཨཱ་ཙ་རི་ཡེ་ན ཏཱ་རུ་ཀྑེ་ན ཀ་ཐི་ཏ་མེ་ཝ ཨཱ་ཙ་རི་ཡ་ཝཱ་དཾ ཐོ་མེ་ཏྭཱ པ་གྒ་ཎྷི་ཏྭཱ ཝི་ཙ་ར་ཏཱི་ཏི ཡོ་ཛ་ནཱ. ཏེ་ན ཝུ་ཏྟནྟི ཏེ་ན ཡ་ཐཱ ཏ་ཐཱ ཝཱ ཨ་བྷི་ནི་ཝི་ཊྛ་བྷཱ་ཝེ་ན ཝུ་ཏྟཾ པཱ་ལི༹་ཡཾ.
༥༢༡-༢. ཨ་ནི་ཡྻཱ་ནི་ཀཱ ཝཱཏི ཨ་པྤཱ་ཊི་ཧཱ་རི་ཡཱ་ཝ ཨ་ཉྙ་མ་ཉྙ་སྶ ཝཱ་དེ དོ་སཾ ད་སྶེ་ཏྭཱ ཨ་ཝི་པ་རཱི་ཏ་ཏྠ་ད་སྶ་ན་ཏྠཾ ཨུ་ཏྟ་ར་ར་ཧི་ཏཱ ཨེ་ཝ. ཨ་ཉྙ་མ་ཉྙ་སྶ ཝཱ་ད་སྶ ཨཱ་དི་ཏོ ཝི་རུ་དྡྷ་གྒ་ཧ་ཎཾ ཝི་གྒ་ཧོ, སྭེ་ཝ ཝི་ཝ་ད་ན་ཝ་སེ་ན ཨ་པ་རཱ་པ་རཾ ཨུ་པྤ་ནྣོ ཝི་ཝཱ་དོཏི ཨཱ་ཧ ‘‘པུ་བྦུ་པྤ་ཏྟི་ཀོ ཝི་གྒ་ཧོ ཨ་པ་ར་བྷཱ་གེ ཝི་ཝཱ་དོ’’ཏི. དུ་ཝི་དྷོ་པི ཨེ་སོ ཝི་གྒ་ཧོ, ཝི་ཝཱ་དོ་ཏི དྭི་དྷཱ ཝུ་ཏྟོ་པི ཝི་རོ་དྷོ. ནཱ་ནཱ་ཨཱ་ཙ་རི་ཡཱ་ནཾ ཝཱ་ད་ཏོཏི ནཱ་ནཱ་རུ་ཙི་ཀཱ་ནཾ ཨཱ་ཙ་རི་ཡཱ་ནཾ ཝཱ་ད་བྷཱ་ཝ་ཏོ. ནཱ་ནཱ་ཝཱ་དོ ནཱ་ནཱ་ཝི་དྷོ ཝཱ་དོ་ཏི ཀ་ཏྭཱ.
༥༢༣. ཨེ་ཀ་སྶཱ་པཱིཏི ཏུ་མྷེ་སུ དྭཱི་སུ ཨེ་ཀ་སྶཱ་པི. ཨེ་ཀ་སྨིནྟི ས་ཀ་ཝཱ་ད་པ་ར་ཝཱ་དེ་སུ ཨེ་ཀ་སྨི་མྤི. སཾ་ས་ཡོ ན་ཏྠཱིཏི ‘‘མ་གྒོ ནུ ཁོ, ན མ་གྒོ ནུ ཁོ’’ཏི སཾ་ས་ཡོ ཝི་ཙི་ཀི་ཙྪཱ ན་ཏྠི. ཨ་ཉྫ་སཱ་ཡ་ན་བྷཱ་ཝེ པ་ན སཾ་ས་ཡོ. ཏེ་ནཱ་ཧ ‘‘ཨེ་ས ཀི་རཱ’’ཏི་ཨཱ་དི. བྷ་ག་ཝཱ པ་ན ཡ་དི ས་བྦ་ཏྠ མ་གྒ་ས་ཉྙི་ནོ, ཨེ་ཝཾ ས་ཏི ‘‘ཀི་སྨིཾ ཝོ ཝི་གྒ་ཧོ’’ཏི པུ་ཙྪ་ཏི.
༥༢༤. ‘‘ཨི་ཙྪི་ཏ་ཊྛཱ་ནཾ ཨུ་ཛུ་ཀཾ མ་གྒ་ཏི ཨུ་པ་ག་ཙྪ་ཏི ཨེ་ཏེ་ནཱ་ཏི མ་གྒོ, ཨུ་ཛུ་མ་གྒོ. ཏ་ད་ཉྙོ ཨ་མ་གྒོ’’ཏི ཝུ་ཏྟོ ཝཱ་ཡ་མ་ཏྠོ. ས་བྦེ ཏེཏི ས་བྦེ་པི ཏེ ནཱ་ནཱ་ཨཱ་ཙ་རི་ཡེ་ཧི ཝུ་ཏྟ་མ་གྒཱ.
ཡེ པཱ་ལི༹་ཡཾ ‘‘ཨ་དྡྷ་རི་ཡཱ བྲཱ་ཧྨ་ཎཱ’’ཏི་ཨཱ་དི་ནཱ ཝུ་ཏྟཱ. ཨ་དྡྷ་རོ ནཱ་མ ཡ་ཉྙ་ཝི་སེ་སོ, ཏ་དུ་པ་ཡོ་གི་བྷཱ་ཝ་ཏོ ‘‘ཨ་དྡྷ་རི་ཡཱ’’ ཏྭེ་ཝ ཝུ་ཙྩ་ནྟི ཡ་ཛཱུ་ནི, ཏཱ་ནི ས་ཛ྄ཛྷཱ་ཡ་ནྟཱི་ཏི ཨ་དྡྷ་རི་ཡཱ, ཡ་ཛུ་བྦེ་དི་ནོ. ཡེ ཙ ཏི་ཏྟི་རི་ཨི་སི་ནཱ ཀ་ཏེ མ་ནྟེ ས་ཛ྄ཛྷཱ་ཡ་ནྟི, ཏེ ཏི་ཏྟི་རི་ཡཱ, ཡ་ཛུ་བྦེ་དི་ནོ ཨེ་ཝ. ཡ་ཛུ་བྦེ་ད་སཱ་ཁཱ ཧེ་སཱ, ཡ་དི་དཾ ཏི་ཏྟི་རཾ. ཚ་ནྡོ ཝུ་ཙྩ་ཏི ཝི་སེ་ས་ཏོ སཱ་མ་ཝེ་དོ, ཏཾ ས་རེ་ན ཀཱ་ཡ་ནྟཱི་ཏི ཚ་ནྡོ་ཀཱ, སཱ་མ་ཝེ་དི་ནོ. ‘‘ཚ་ནྡོ་གཱ’’ཏི་པི པ་ཋ་ནྟི, སོ ཨེ་ཝ་ཏྠོ. བ་ཧ་ཝོ ཨི་ར་ཡོ ཨེ་ཏྠཱ་ཏི བ་ཝ྄ཧཱ་རི, ཨི་རུ་བྦེ་དོ. ཏཾ ཨ་དྷཱི་ཡ་ནྟཱི་ཏི བ་ཝ྄ཧཱ་རི་ཛ྄ཛྷཱ.
‘‘བ་ཧཱུ་ནཱི’’ཏི ཨེ་ཏྠཱ་ཡཾ ཨུ་པ་མཱ་སཾ་ས་ནྡ་ནཱ – ཡ་ཐཱ ཏེ ནཱ་ནཱ་མ་གྒཱ ཨེ་ཀཾ་ས་ཏོ ཏ་སྶ གཱ་མ་སྶ ཝཱ ནི་ག་མ་སྶ ཝཱ པ་ཝེ་སཱ་ཡ ཧོ་ནྟི, ཨེ་ཝཾ བྲཱ་ཧྨ་ཎེ་ཧི པ་ཉྙཱ་པི་ཡ་མཱ་ནཱ་པི ནཱ་ནཱ་མ་གྒཱ བྲ་ཧྨ་ལོ་ཀཱུ་པ་ག་མ་ནཱ་ཡ བྲ་ཧྨུ་ནཱ ས་ཧ་བྱ་ཏཱ་ཡ ཨེ་ཀཾ་སེ་ནེ་ཝ ཧོ་ནྟཱི་ཏི.
༥༢༧-༥༢༩. ཝ-ཀཱ་རོ ཨཱ་ག་མ་ས་ནྡྷི་མ་ཏྟནྟི ཨ་ན་ཏྠ་ཀོ ཝ-ཀཱ་རོ, ཏེ་ན ཝ་ཎྞཱ་ག་མེ་ན པ་ད་ནྟ་ར་ས་ནྡྷི་མ་ཏྟཾ ཀ་ཏ་ནྟི ཨ་ཏྠོ. ཨ་ནྡྷ་པ་ཝེ་ཎཱིཏི ཨ་ནྡྷ་པ་ནྟི. ‘‘པ་ཉྙཱ་ས་ས་ཊྛི ཨ་ནྡྷཱ’’ཏི ཨི་དཾ ཏ་སྶཱ ཨ་ནྡྷ་པ་ཝེ་ཎི་ཡཱ མ་ཧ་ཏོ ག་ཙྪ་གུ་མྦ་སྶ ཨ་ནུ་པ་རི་ག་མ་ན་ཡོ་གྱ་ཏཱ་ད་སྶ་ནཾ. ཨེ་ཝ་ཉྷི ཏེ ‘‘སུ་ཙི་རཾ ཝེ་ལཾ མ་གྒཾ ག་ཙྪཱ་མཱ’’ཏི ཨེ་ཝཾ ས་ཉྙི་ནོ ཧོ་ནྟི. ནཱ་མ་ཀཾ་ཡེ་ཝཱཏི ཨ་ཏྠཱ་བྷཱ་ཝ་ཏོ ནཱ་མ་མ་ཏྟཾ་ཡེ་ཝ, ཏཾ པ་ན བྷཱ་སི་ཏཾ ཏེ་ཧི སཱ་ར་ས་ཉྙི་ཏ་མྤི ནཱ་མ་མ་ཏྟ་ཏཱ་ཡ ཨ་སཱ་ར་བྷཱ་ཝ་ཏོ ནི་ཧཱི་ན་མེ་ཝཱ་ཏི ཨཱ་ཧ ‘‘ལཱ་མ་ཀཾ་ཡེ་ཝཱ’’ཏི.
༥༣༠. ཡ་ཏོཏི བྷུ་མྨ་ཏྠེ ནི་སྶ་ཀྐ་ཝ་ཙ་ནཾ, སཱ་མ་ཉྙ་ཛོ་ཏ་ནཱ ཙ ཝི་སེ་སེ ཨ་ཝ་ཏི་ཊྛ་ཏཱི་ཏི ཨཱ་ཧ ‘‘ཡ་སྨིཾ ཀཱ་ལེ’’ཏི. ཨཱ་ཡཱ་ཙ་ནྟཱིཏི པ་ཏྠེ་ནྟི. ཨུ་གྒ་མ་ནཾ ལོ་ཀ་སྶ བ་ཧུ་ཀཱ་ར་བྷཱ་ཝ་ཏོ ཏ་ཐཱ ཐོ་མ་ནཱ་ཏི. ཨ་ཡཾ ཀི་ར བྲཱ་ཧྨ་ཎཱ་ནཾ ལ་དྡྷི ‘‘བྲཱ་ཧྨ་ཎཱ་ནཾ ཨཱ་ཡཱ་ཙ་ནཱ་ཡ ཙ་ནྡི་མ་སཱུ་རི་ཡཱ ག་ནྟྭཱ ལོ་ཀེ ཨོ་བྷཱ་སཾ ཀ་རོ་ནྟཱི’’ཏི.
༥༣༢. ཨི་དྷ པ་ན ཀིཾ ཝ་ཏྟ་བྦནྟི ཨི་མ་སྨིཾ པ་ན ཨ་པྤ་ཙྩ་ཀྑ་བྷཱུ་ཏ་སྶ བྲ་ཧྨུ་ནོ ས་ཧ་བྱ་ཏཱ་ཡ མ་གྒ་དེ་ས་ནེ ཏེ་ཝི་ཛྫཱ་ནཾ ཀིཾ ཝ་ཏྟ་བྦཾ ཨ་ཏྠི, ཡེ པ་ཙྩ་ཀྑ་བྷཱུ་ཏཱ་ན་མྤི ཙ་ནྡི་མ་སཱུ་རི་ཡཱ་ནཾ ས་ཧ་བྱ་ཏཱ་ཡ མ་གྒཾ དེ་སེ་ཏུཾ ན ས་ཀྐོ་ནྟཱི་ཏི ཨ་དྷི་པྤཱ་ཡོ. ‘‘ཡ་ཏྠཱ’’ཏི ‘‘ཨི་དྷ པ་ནཱ’’ཏི ཝུ་ཏྟ་མེ་ཝ་ཏྠཾ པ་ཙྩཱ་མ་ས་ཏི.
ཨ་ཙི་ར་ཝ་ཏཱི་ན་དཱི་ཨུ་པ་མཱ་ཀ་ཐཱ་ཝ་ཎྞ་ནཱ
༥༤༢. ས་མ་བྷ་རི་ཏཱཏི ས་མྤུ་ཎྞཱ. ཏ་ཏོ ཨེ་ཝ ཀཱ་ཀ་པེ་ཡྻཱ. པཱ་རཱཏི པ་ར་ཏཱི་རཾ. ཨ་པཱ་རནྟི ཨོ་རི་མ་ཏཱི་རཾ. ཨེ་ཧཱིཏི ཨཱ་ག་ཙྪ.
༥༤༤. པ་ཉྩ་སཱི་ལ…པེ… ཝེ་དི་ཏ་བྦཱ ཡ་མ་ནི་ཡ་མཱ་དི་བྲཱ་ཧྨ་ཎ་དྷ་མྨཱ་ནཾ ཏ་ད་ནྟོ་ག་དྷ་བྷཱ་ཝ་ཏོ. ཏ་བྦི་པ་རཱི་ཏཱཏི པ་ཉྩ་སཱི་ལཱ་དི་ཝི་པ་རཱི་ཏཱ པ་ཉྩ ཝེ་རཱ་ད་ཡོ. ‘‘པུ་ན་པཱི’’ཏི ཝ་ཏྭཱ ‘‘ཨ་པ་ར་མྤཱི’’ཏི ཝ་ཙ་ནཾ ཨི་ཏ་རཱ་ཡ་པི ན་དི ཨུ་པ་མཱ་ཡ ས་ངྒ་ཎྷ་ན་ཏྠཾ.
༥༤༦. ཀཱ་མ་ཡི་ཏ་བྦ་ཊྛེ་ནཱཏི ཀཱ་མ་ནཱི་ཡ་བྷཱ་ཝེ་ན. བ་ནྡྷ་ན་ཊྛེ་ནཱཏི ཏེ་ནེ་ཝ ཀཱ་མེ་ཏ་བྦ་བྷཱ་ཝེ་ན ས་ཏྟཱ་ནཾ ཙི་ཏྟ་སྶ ཨཱ་བ་ནྡྷ་ན་བྷཱ་ཝེ་ན. ཀཱ་མ་ཉྩཱ་ཡཾ གུ་ཎ-ས་དྡོ ཨ་ཏྠ་ནྟ་རེ་སུ་པི དི་ཊྛ་པྤ་ཡོ་གོ, ཏེ་སཾ པ་ནེ་ཏྠ ཨ་ས་མྦྷ་ཝ་ཏོ པཱ་རི་སེ་ས་ཉཱ་ཡེ་ན བ་ནྡྷ་ན་ཊྛེ་ཡེ་ཝ ཡུ་ཏྟོ་ཏི ད་སྶེ་ཏུཾ ‘‘ཨ་ནུ་ཛཱ་ནཱ་མཱི’’ཏི་ཨཱ་དི་ནཱ ཨ་ཏྠུ་དྡྷཱ་རོ ཨཱ་ར་དྡྷོ, ཨེ་སེ་ཝཱཏི བ་ནྡྷ་ན་ཊྛོ ཨེ་ཝ. ན ཧི རཱུ་པཱ་དཱི་ནཾ ཀཱ་མེ་ཏ་བྦ་བྷཱ་ཝེ ཝུ་ཙྩ་མཱ་ནེ པ་ཊ་ལ་ཊྛོ ཡུ་ཛྫ་ཏི ཏ་ཐཱ ཀཱ་མེ་ཏ་བྦ་ཏཱ་ཡ ཨ་ན་དྷི་པྤེ་ཏ་ཏྟཱ. རཱ་ས་ཊྛ་ཨཱ་ནི་སཾ་ས་ཊྛེ་སུ་པི ཨེ་སེ་ཝ ན་ཡོ ཏ་ཐཱ་པི ཀཱ་མེ་ཏ་བྦ་ཏཱ་ཡ ཨ་ན་དྷི་པྤེ་ཏ་ཏྟཱ. པཱ་རི་སེ་ས་ཏོ པ་ན བ་ནྡྷ་ན་ཊྛོ ག་ཧི་ཏོ. ཡ་ད་གྒེ་ན ཧི ནེ་སཾ ཀཱ་མེ་ཏ་བྦ་ཏཱ, ཏ་ད་གྒེ་ན བ་ནྡྷ་ན་བྷཱ་ཝོ ཙཱ་ཏི.
ཀོ་ཊྛཱ་ས་ཊྛོ་པི ཏེ་སུ ཡུ་ཛྫ་ཏེ་ཝ ཙ་ཀྑུ་ཝི་ཉྙེ་ཡྻཱ་དི་ཀོ་ཊྛཱ་ས་བྷཱ་ཝེ་ན ནེ་སཾ ཀཱ་མེ་ཏ་བྦ་ཏོ. ཀོ་ཊྛཱ་སེ ཙ གུ་ཎ-ས་དྡོ དི་སྶ་ཏི ‘‘དི་གུ་ཎཾ ཝ་ཌྜྷེ་ཏ་བྦ’’ནྟི་ཨཱ་དཱི་སུ, ས་མྤ་དཱ་ཊྛོ་པི –
‘‘ཨ་ས་ངྑྱེ་ཡྻཱ་ནི ནཱ་མཱ་ནི, ས་གུ་ཎེ་ན མ་ཧེ་སི་ནོ;
གུ་ཎེ་ན ནཱ་མ་མུ་དྡྷེ་ཡྻཾ, ཨ་པི ནཱ་མ་ས་ཧ་སྶ་ཏོ’’ཏི. (དྷ. ས. ཨ་ཊྛ. ༡༣༡༣; ཨུ་དཱ. ཨ་ཊྛ. ༥༣; པ་ཊི. མ. ཨ་ཊྛ. ༧༦);
ཨཱ་དཱི་སུ སོ་པི ཨི་དྷ ན ཡུ་ཛྫ་ཏཱི་ཏི ཨ་ནུ་དྡྷ་ཊོ.
ཙ་ཀྑུ་ཝི་ཉྙེ་ཡྻཱཏི ཙ་ཀྑུ་ཝི་ཉྙཱ་ཎེ་ན ཝི་ཛཱ་ནི་ཏ་བྦཱ, ཏེ་ན པ་ན ཝི་ཛཱ་ན་ནཾ ད་སྶ་ན་མེ་ཝཱ་ཏི ཨཱ་ཧ ‘‘པ་སྶི་ཏ་བྦཱ’’ཏི. ‘‘སོ་ཏ་ཝི་ཉྙཱ་ཎེ་ན སོ་ཏ་བྦཱ’’ཏི ཨེ་ཝ་མཱ་དི ཨེ་ཏེ་ནུ་པཱ་ཡེ་ནཱཏི ཨ་ཏི་དི་ས་ཏི. ག་ཝེ་སི་ཏ་མྤི ‘‘ཨི་ཊྛ’’ནྟི ཝུ་ཙྩ་ཏི, ཏཾ ཨི་དྷ ནཱ་དྷི་པྤེ་ཏ་ནྟི ཨཱ་ཧ ‘‘པ་རི་ཡི་ཊྛཱ ཝཱ ཧོ་ནྟུ མཱ ཝཱ’’ཏི. ཨི་ཊྛཱ་ར་མྨ་ཎ་བྷཱུ་ཏཱཏི སུ་ཁཱ་ར་མྨ་ཎ་བྷཱུ་ཏཱ. ཀཱ་མ་ནཱི་ཡཱཏི ཀཱ་མེ་ཏ་བྦཱ. ཨི་ཊྛ་བྷཱ་ཝེ་ན མ་ནཾ ཨ་པྤཱ་ཡ་ནྟཱི་ཏི མ་ནཱ་པཱ. པི་ཡ་ཛཱ་ཏི་ཀཱཏི པི་ཡ་ས་བྷཱ་ཝཱ.
གེ་དྷེ་ནཱཏི ལོ་བྷེ་ན ཨ་བྷི་བྷཱུ་ཏཱ ཧུ་ཏྭཱ པ་ཉྩ་ཀཱ་མ་གུ་ཎེ པ་རི་བྷུ་ཉྫ་ནྟཱི་ཏི ཡོ་ཛ་ནཱ. མུ་ཙྪཱ་ཀཱ་རནྟི མོ་ཧ་ནཱ་ཀཱ་རཾ. ཨ་དྷི་ཨོ་ས་ནྣཱཏི ཨ་དྷི་གྒ་ཡ྄ཧ ཨ་ཛ྄ཛྷོ་སཱ་ཡ ཨ་ཝ་ས་ནྣཱ, ཏེ་ནཱ་ཧ ‘‘ཨོ་གཱ་ལ༹ྷཱ’’ཏི. པ་རི་ནི་ཊྛཱ་ན་པྤ་ཏྟཱཏི གི་ལི་ཏྭཱ པ་རི་ནི་ཊྛཱ་པ་ན་ཝ་སེ་ན པ་རི་ནི་ཊྛཱ་ནཾ ཨུ་པ་ག་ཏཱ. ཨཱ་དཱི་ན་ཝནྟི ཀཱ་མ་པ་རི་བྷོ་གེ ས་མྤ་ཏི, ཨཱ་ཡ་ཏི་ཉྩ དོ་སཾ ཨ་པ་སྶ་ནྟཱ. གྷཱ་ས་ཙྪཱ་ད་ནཱ་དི་ས་མྦྷོ་ག་ནི་མི་ཏྟ་སཾ་ཀི་ལེ་ས་ཏོ ནི་སྶ་ར་ནྟི ཨ་པ་ག་ཙྪ་ནྟི ཨེ་ཏེ་ནཱ་ཏི ནི་སྶ་ར་ཎཾ, ཡོ་ནི་སོ པ་ཙྩ་ཝེ་ཀྑི་ཏྭཱ ཏེ་སཾ པ་རི་བྷོ་ག་པ་ཉྙཱ. ཏ་ད་བྷཱ་ཝ་ཏོ ཨ་ནི་སྶ་ར་ཎ་པ་ཉྙཱཏི ཨི་མ་མ་ཏྠཾ ད་སྶེ་ནྟོ ‘‘ཨི་ད་མེ་ཏྠཱ’’ཏི་ཨཱ་དི་མཱ་ཧ.
༥༤༨-༩. ཨཱ་ཝ་ར་ནྟཱིཏི ཀུ་ས་ལ་པྤ་ཝ་ཏྟིཾ ཨཱ་དི་ཏོ་ཝ ནི་ཝཱ་རེ་ནྟི. ནི་ཝཱ་རེ་ནྟཱིཏི ནི་ར་ཝ་སེ་ས་ཏོ ཝཱ་ར་ཡ་ནྟི. ཨོ་ན་ནྡྷ་ནྟཱིཏི ཨོ་གཱ་ཧ་ནྟཱ ཝི་ཡ ཚཱ་དེ་ནྟི. པ་རི་ཡོ་ན་ནྡྷ་ནྟཱིཏི ས་བྦ་སོ ཚཱ་དེ་ནྟི. ཨཱ་ཝ་ར་ཎཱ་དཱི་ནཾ ཝ་སེ་ནཱཏི ཨཱ་ཝ་ར་ཎཱ་དི་ཨ་ཏྠཱ་ནཾ ཝ་སེ་ན. ཏེ ཧི ཨཱ་སེ་ཝ་ན་བ་ལ་ཝ་ཏཱ་ཡ པུ་རི་མ་པུ་རི་མེ་ཧི པ་ཙྪི་མ་པ་ཙྪི་མཱ ད་ལ༹ྷ་ཏ་ར་ཏ་མཱ་དི་བྷཱ་ཝ་པྤ་ཏྟཱ ཝུ་ཏྟཱ.
སཾ་ས་ནྡ་ན་ཀ་ཐཱ་ཝ་ཎྞ་ནཱ
༥༥༠. ཨི་ཏྠི་པ་རི་གྒ་ཧེ ས་ཏི པུ་རི་ས་སྶ པ་ཉྩ་ཀཱ་མ་གུ་ཎ་པ་རི་གྒ་ཧོ པ་རི་པུ་ཎྞོ ཨེ་ཝ ཧོ་ཏཱི་ཏི ཝུ་ཏྟཾ ‘‘ས་པ་རི་གྒ་ཧོ་ཏི ཨི་ཏྠི་པ་རི་གྒ་ཧེ་ན ས་པ་རི་གྒ་ཧོ’’ཏི. ‘‘ཨི་ཏྠི་པ་རི་གྒ་ཧེ་ན ཨ་པ་རི་གྒ་ཧོ’’ཏི ཙ ཨི་དཾ ཏེ་ཝི་ཛྫ་བྲཱ་ཧྨ་ཎེ་སུ དི་སྶ་མཱ་ན་པ་རི་གྒ་ཧཱ་ནཾ དུ་ཊྛུ་ལླ་ཏ་མ་པ་རི་གྒ་ཧཱ་བྷཱ་ཝ་ད་སྶ་ནཾ. ཨེ་ཝཾ་བྷཱུ་ཏཱ་ནཾ ཏེ་ཝི་ཛྫཱ་ནཾ བྲཱ་ཧྨ་ཎཱ་ནཾ ཀཱ བྲ་ཧྨུ་ནཱ སཾ་ས་ནྡ་ནཱ, བྲ་ཧྨཱ པ་ན ས་བྦེ་ན ས་བྦཾ ཨ་པ་རི་གྒ་ཧོ་ཏི. ཝེ་ར་ཙི་ཏྟེ་ན ཨ་ཝེ་རོ, ཀུ་ཏོ ཨེ་ཏ་སྶ ཝེ་ར་པྤ་ཡོ་གོ་ཏི ཨ་དྷི་པྤཱ་ཡོ. ཙི་ཏྟ་གེ་ལ་ཉྙ་ས་ངྑཱ་ཏེ་ནཱཏི ཙི་ཏྟུ་པྤཱ་ད་གེ་ལ་ཉྙ་ས་ཉྙི་ཏེ་ན, ཏེ་ན་སྶ ས་བྦ་རཱུ་པ་ཀཱ་ཡ་གེ་ལ་ཉྙ་བྷཱ་ཝོ ཝུ་ཏྟོ ཧོ་ཏི. བྱཱ་པ་ཛ྄ཛྷེ་ནཱཏི དུ་ཀྑེ་ན. ཨུ་དྡྷ་ཙྩ་ཀུ་ཀྐུ་ཙྩཱ་དཱི་ཧཱིཏི ཨཱ་དི-ས་དྡེ་ན ཏ་དེ་ཀ་ཊྛཱ སཾ་ཀི་ལེ་ས་དྷ་མྨཱ ས་ངྒ་ཡ྄ཧ་ནྟི. ཨ་པྤ་ཊི་པ་ཏྟི་ཧེ་ཏུ་བྷཱུ་ཏཱ་ཡ ཝི་ཙི་ཀི་ཙྪཱ་ཡ ས་ཏི ན ཀ་དཱ་ཙི ཙི་ཏྟཾ པུ་རི་ས་སྶ ཝ་སེ ཝ་ཏྟ་ཏི, པ་ཧཱི་ནཱ་ཡ པ་ན སི་ཡཱ ཝ་ས་ཝ་ཏྟ་ན་ནྟི ཨཱ་ཧ ‘‘ཝི་ཙི་ཀི་ཙྪཱ་ཡ ཨ་བྷཱ་ཝ་ཏོ ཙི་ཏྟཾ ཝ་སེ ཝ་ཏྟེ་ཏཱི’’ཏི. ཙི་ཏྟ་ག་ཏི་ཀཱཏི ཙི་ཏྟ་ཝ་སི་ཀཱ, ཏེ་ནཱ་ཧ ཙི་ཏྟ་སྶ ཝ་སེ ཝ་ཏྟ་ནྟཱི’’ཏི. ན ཏཱ་དི་སོཏི བྲཱ་ཧྨ་ཎཱ ཝི་ཡ ཙི་ཏྟ་ཝ་སི་ཀོ ན ཧོ་ཏི, ཨ་ཐ ཁོ ཝ་སཱི་བྷཱུ་ཏ་ཛ྄ཛྷཱ་ནཱ་བྷི་ཉྙ་ཏཱ་ཡ ཙི་ཏྟཾ ཨ་ཏྟ་ནོ ཝ་སེ ཝ་ཏྟེ་ཏཱི་ཏི ཝ་ས་ཝ་ཏྟཱི.
༥༥༢. བྲ་ཧྨ་ལོ་ཀ་མ་གྒེཏི བྲ་ཧྨ་ལོ་ཀ་གཱ་མི་མ་གྒེ པ་ཊི་པ་ཛྫི་ཏ་བྦེ, པ་ཉྙ་པེ་ཏ་བྦེ ཝཱ, ཏཾ པ་ཉྙ་པེ་ནྟཱ་ཏི ཨ་དྷི་པྤཱ་ཡོ. ཨུ་པ་ག་ནྟྭཱཏི ཨ་མ་གྒ་མེ་ཝ ‘‘མ་གྒོ’’ཏི མི་ཙྪཱ་པ་ཊི་པ་ཛྫ་ནེ་ན ཨུ་པ་ག་ནྟྭཱ, པ་ཊི་ཛཱ་ནི་ཏྭཱ ཝཱ. པ་ངྐཾ ཨོ་ཏི་ཎྞཱ ཝི་ཡཱཏི མ་ཏྠ་ཀེ ཨེ་ཀ་ངྒུ་ལཾ ཝཱ ཨུ་པ་ཌྜྷ་ངྒུ་ལཾ ཝཱ སུ་ཀྑ་ཏཱ་ཡ ‘‘ས་མ་ཏ་ལ’’ནྟི ས་ཉྙཱ་ཡ ཨ་ནེ་ཀ་པོ་རི་སཾ མ་ཧཱ་པ་ངྐཾ ཨོ་ཏི་ཎྞཱ ཝི་ཡ. ཨ་ནུ་པྤ་ཝི་ས་ནྟཱིཏི ཨ་པཱ་ཡ་མ་གྒཾ བྲ་ཧྨ་ལོ་ཀ་མ་གྒ་ས་ཉྙཱ་ཡ ཨོ་གཱ་ཧ་ཡ་ནྟི. ཏ་ཏོ ཨེ་ཝ སཾ་སཱི་དི་ཏྭཱ ཝི་སཱ་དཾ པཱ་པུ་ཎ་ནྟི. ཨེ་ཝནྟི ‘‘ས་མ་ཏ་ལ’’ནྟི་ཨཱ་དི་ནཱ ཝུ་ཏྟ་ན་ཡེ་ན. སཾ་སཱི་དི་ཏྭཱཏི ནི་མྨུ་ཛྫི་ཏྭཱ. སུ་ཀྑ་ཏ་ར་ཎཾ མ་ཉྙེ ཏ་ར་ནྟཱིཏི སུ་ཀྑ་ན་དི་ཏ་ར་ཎཾ ཏ་ར་ནྟི མ་ཉྙེ. ཏ་སྨཱཏི ཡ་སྨཱ ཏེ་ཝི་ཛྫཱ ཨ་མ་གྒ་མེ་ཝ ‘‘མ་གྒོ’’ཏི ཨུ་པ་ག་ནྟྭཱ སཾ་སཱི་ད་ནྟི, ཏ་སྨཱ. ཡ་ཐཱ ཏེཏི ཡ་ཐཱ ཏེ ‘‘ས་མ་ཏ་ལ’’ནྟི ས་ཉྙཱ་ཡ པ་ངྐཾ ཨོ་ཏི་ཎྞཱ. ཨི་དྷེ་ཝ ཙཱཏི ཨི་མ་སྨི་ཉྩ ཨ་ཏྟ་བྷཱ་ཝེ. སུ་ཁཾ ཝཱ སཱ་ཏཾ ཝཱ ན ལ་བྷ་ནྟཱིཏི ཛྷཱ་ན་སུ་ཁཾ ཝཱ ཝི་པ་སྶ་ནཱ་སཱ་ཏཾ ཝཱ ན ལ་བྷ་ནྟི, ཀུ་ཏོ མ་གྒ་སུ་ཁཾ ཝཱ ནི་བྦཱ་ན་སཱ་ཏཾ ཝཱ་ཏི ཨ་དྷི་པྤཱ་ཡོ. མ་གྒ་དཱི་པ་ཀནྟི མ་གྒ་དཱི་པ་ཀཱ་བྷི་མ་ཏཾ. ‘‘ཨི་རི་ཎ’’ནྟི ཨ་ར་ཉྙཱ་ནི་ཡཱ ཨི་དཾ ཨ་དྷི་ཝ་ཙ་ན་ནྟི ཨཱ་ཧ ‘‘ཨ་གཱ་མ་ཀཾ མ་ཧཱ་ར་ཉྙ’’ནྟི. མི་ག་རུ་རུ་ཨཱ་དཱི་ན་མྤི ཨ་ནུ་པ་བྷོ་ག་རུ་ཀྑེ་ཧི. པ་རི་ཝ་ཏྟི་ཏུ་མྤི ན ས་ཀྐཱ ཧོ་ནྟི མ་ཧཱ་ཀ་ཎྚ་ཀ་ཏཱ་ཡ. ཉཱ་ཏཱི་ནཾ བྱ་ས་ནཾ ཝི་ནཱ་སོ ཉཱ་ཏི་བྱ་ས་ནཾ. ཨེ་ཝཾ བྷོ་ག་སཱི་ལ་བྱ་ས་ནཱ་ནི ཝེ་དི་ཏ་བྦཱ་ནི. རོ་གོ ཨེ་ཝ བྱ་ས་ཏི ཝི་བཱ་དྷ་ཏཱི་ཏི རོ་ག་བྱ་ས་ནཾ. ཨེ་ཝཾ དི་ཊྛི་བྱ་ས་ནམྤི ད་ཊྛ་བྦཾ.
༥༥༤. ཛཱ་ཏ་སཾ་ཝ་ཌྜྷོཏི ཛཱ་ཏོ ཧུ་ཏྭཱ སཾ་ཝ་ཌྜྷི་ཏོ. ན ས་བྦ་སོ པ་ཙྩ་ཀྑཱ ཧོ་ནྟི པ་རི་ཙ་ཡཱ་བྷཱ་ཝ་ཏོ. ཙི་ར་ནི་ཀྑ་ནྟོཏི ནི་ཀྑ་ནྟོ ཧུ་ཏྭཱ ཙི་ར་ཀཱ་ལོ. ད་ནྡྷཱ་ཡི་ཏ་ཏྟནྟི ཝི་སྶ་ཛྫ་ནེ མ་ནྡ་ཏྟཾ ས་ཎི་ཀ་ཝུ་ཏྟི, ཏཾ པ་ན སཾ་ས་ཡ་ཝ་སེ་ན ཙི་རཱ་ཡ་ནཾ ནཱ་མ ཧོ་ཏཱི་ཏི ཨཱ་ཧ ‘‘ཀ་ངྑཱ་ཝ་སེ་ན ཙི་རཱ་ཡི་ཏ་ཏྟ’’ནྟི. ཝི་ཏྠཱ་ཡི་ཏ་ཏྟནྟི སཱ་ར་ཛྫི་ཏ་ཏྟཾ. ཨ་ཊྛ་ཀ་ཐཱ་ཡཾ པ་ན ཝི་ཏྠཱ་ཡི་ཏ་ཏྟཾ ནཱ་མ ཚ་མྦྷི་ཏ་ཏྟ་ནྟི ཨ་དྷི་པྤཱ་ཡེ་ན ‘‘ཐ་དྡྷ་བྷཱ་ཝ་གྒ་ཧ་ཎ’’ནྟི ཝུ་ཏྟཾ.
༥༥༥. ཨུ-ཨི་ཏི ཨུ་པ་ས་གྒ་ཡོ་གེ ལུ་མྤ-ས་དྡོ ཨུ་དྡྷ་ར་ཎ་ཏྠོ ཧོ་ཏཱི་ཏི ‘‘ཨུ་ལླུ་མྤ་ཏཱུ’’ཏི པ་ད་སྶ ཨུ་དྡྷ་ར་ཏཱུཏི ཨ་ཏྠ་མཱ་ཧ. ཨུ་པ་ས་གྒ་ཝ་སེ་ན ཧི དྷཱ་ཏུ-ས་དྡཱ ཨ་ཏྠ་ཝི་སེ་ས་ཝུ་ཏྟི་ནོ ཧོ་ནྟི ཡ་ཐཱ ‘‘ཨུ་དྡྷ་ར་ཏཱུ’’ཏི.
བྲ་ཧྨ་ལོ་ཀ་མ་གྒ་དེ་ས་ནཱ་ཝ་ཎྞ་ནཱ
༥༥༦. ཡ་སྶ ཨ་ཏི་ས་ཡེ་ན བ་ལཾ ཨ་ཏྠི, སོ ‘‘བ་ལ་ཝཱ’’ཏི ཝུ་ཏྟོ་ཏི ཨཱ་ཧ ‘‘བ་ལ་ས་མྤ་ནྣོ’’ཏི. ས་ངྑཾ དྷ་མ་ཡ་ཏཱི་ཏི ས་ངྑ་དྷ་མ་ཀོ, ཏཾ དྷ་མ་ཡི་ཏྭཱ ཏ་ཏོ ས་དྡ་པ་ཝ་ཏྟ་ཀོ. ཨ་པྤ་ནཱ་ཝ ཝ་ཊྚ་ཏི པ་ཊི་པ་ཀྑ་ཏོ ས་མྨ་དེ་ཝ ཙེ་ཏ་སོ ཝི་མུ་ཏྟི་བྷཱ་ཝ་ཏོ.
པ་མཱ་ཎ་ཀ་ཏཾ ཀ་མྨཾ ནཱ་མ ཀཱ་མཱ་ཝ་ཙ་རཾ པ་མཱ་ཎ་ཀ་རཱ་ནཾ སཾ་ཀི་ལེ་ས་དྷ་མྨཱ་ནཾ ཨ་ཝི་ཀྑ་མྦྷ་ན་ཏོ. ཏ་ཐཱ ཧི ཏཾ བྲ་ཧྨ་ཝི་ཧཱ་ར་པུ་བྦ་བྷཱ་ག་བྷཱུ་ཏཾ པ་མཱ་ཎཾ ཨ་ཏི་ཀྐ་མི་ཏྭཱ ཨོ་དི་སྶ་ཀ་ཨ་ནོ་དི་སྶ་ཀ་དི་སཱ་ཕ་ར་ཎ་ཝ་སེ་ན ཝ་ཌྜྷེ་ཏུཾ ན ས་ཀྐཱ. ཝུ་ཏྟ་ཝི་པ་རི་ཡཱ་ཡ་ཏོ པ་ན ཨ་པྤ་མཱ་ཎ་ཀ་ཏཾ ཀ་མྨཾ ནཱ་མ རཱུ་པཱ་རཱུ་པཱ་ཝ་ཙ་རཾ, ཏེ་ནཱ་ཧ ‘‘ཏ་ཉྷཱི’’ཏི་ཨཱ་དི. ཏ་ཏྠ ཨ་རཱུ་པཱ་ཝ་ཙ་རེ ཨོ་དི་སྶ་ཀཱ་ནོ་དི་སྶ་ཀ་ཝ་སེ་ན ཕ་ར་ཎཾ ན ལ་བྦྷ་ཏི, ཏ་ཐཱ དི་སཱ་ཕ་ར་ཎཾ.
ཀེ་ཙི པ་ན ཏཾ ཨཱ་ག་མ་ན་ཝ་སེ་ན ལ་བྦྷ་ཏཱི་ཏི ཝ་ད་ནྟི, ཏ་ད་ཡུ་ཏྟཾ. ན ཧི བྲ་ཧྨ་ཝི་ཧཱ་ར་ནི་སྶ་ནྡོ ཨཱ་རུ་པྤཾ, ཨ་ཐ ཁོ ཀ་སི་ཎ་ནི་སྶ་ནྡོ, ཏ་སྨཱ ཡཾ སུ་ཝི་བྷཱ་ཝི་ཏཾ ཝ་སཱི་བྷཱ་ཝཾ པཱ་པི་ཏཾ ཨཱ་རུ་པྤཾ, ཏཾ ‘‘ཨ་པྤ་མཱ་ཎ་ཀ་ཏ’’ནྟི ཝུ་ཏྟ་ནྟི ད་ཊྛ་བྦཾ. ཡཾ ཝཱ སཱ་ཏི་ས་ཡཾ བྲ་ཧྨ་ཝི་ཧཱ་ར་བྷཱ་ཝ་ནཱ་ཡ ཨ་བྷི་ས་ངྑ་ཏེ་ན ས་ནྟཱ་ནེ་ན ནི་བྦ་ཏྟི་ཏཾ, ཡ་ཉྩ བྲ་ཧྨ་ཝི་ཧཱ་ར་ས་མཱ་པ་ཏྟི་ཏོ ཝུ་ཊྛཱ་ཡ ས་མཱ་པ་ནྣཾ ཨ་རཱུ་པཱ་ཝ་ཙ་ར་ཛ྄ཛྷཱ་ནཾ, ཏཾ ཨི་མི་ནཱ པ་རི་ཡཱ་ཡེ་ན ཕ་ར་ཎ་པྤ་མཱ་ཎ་ཝ་སེ་ན ཨ་པྤ་མཱ་ཎ་ཀ་ཏནྟི ཝ་ཏྟུཾ ཝ་ཊྚ་ཏཱི་ཏི ཨ་པ་རེ. ཝཱི་མཾ་སི་ཏྭཱ ག་ཧེ་ཏ་བྦཾ.
རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཀ་མྨེཏི རཱུ་པཱ་ཝ་ཙ་ར་ཀ་མྨེ, ཨ་རཱུ་པཱ་ཝ་ཙ་ར་ཀ་མྨེ ཙ ས་ཏི. ན ཨོ་ཧཱི་ཡ་ཏི ན ཏི་ཊྛ་ཏཱིཏི ཀ་ཏཱུ་པ་ཙི་ཏ་མྤི ཀཱ་མཱ་ཝ་ཙ་ར་ཀ་མྨཾ ཡ་ཐཱ་དྷི་ག་ཏེ མ་ཧ་གྒ་ཏ་ཛ྄ཛྷཱ་ནེ ཨ་པ་རི་ཧཱི་ནེ ཏཾ ཨ་བྷི་བྷ་ཝི་ཏྭཱ པ་ཊི་བཱ་ཧི་ཏྭཱ ས་ཡཾ ཨོ་ཧཱི་ཡ་ཀཾ ཧུ་ཏྭཱ པ་ཊི་ས་ནྡྷིཾ དཱ་ཏུཾ ས་མ་ཏྠ་བྷཱ་ཝེ ན ཏི་ཊྛ་ཏི. ལ་གྒི་ཏུནྟི ཨཱ་ཝ་རི་ཏུཾ ནི་སེ་དྷེ་ཏུཾ. ཋཱ་ཏུནྟི པ་ཊི་བ་ལོ ཧུ་ཏྭཱ ཋཱ་ཏུཾ. ཕ་རི་ཏྭཱཏི པ་ཊི་པྥ་རི་ཏྭཱ. པ་རི་ཡཱ་དི་ཡི་ཏྭཱཏི ཏ་སྶ སཱ་མ་ཏྠི་ཡཾ ཁེ་པེ་ཏྭཱ. ཀ་མྨ་སྶ པ་རི་ཡཱ་དི་ཡ་ནཾ ནཱ་མ ཏ་སྶ ཝི་པཱ་ཀུ་པྤཱ་ད་ནཾ ནི་སེ་དྷེ་ཏྭཱ ཨ་ཏྟ་ནོ ཝི་པཱ་ཀུ་པྤཱ་ད་ན་ནྟི ཨཱ་ཧ ‘‘ཏ་སྶ ཝི་པཱ་ཀཾ པ་ཊི་བཱ་ཧི་ཏྭཱ’’ཏི་ཨཱ་དི. ཨེ་ཝཾ མེ་ཏྟཱ་དི་ཝི་ཧཱ་རཱིཏི ཨེ་ཝཾ ཝུ་ཏྟཱ་ནཾ མེ་ཏྟཱ་དཱི་ནཾ བྲ་ཧྨ་ཝི་ཧཱ་རཱ་ནཾ ཝ་སེ་ན མེ་ཏྟཱ་དི་ཝི་ཧཱ་རཱི.
༥༥༩. ཨ་གྒ་ཉྙ་སུ་ཏྟེ…པེ… ཨ་ལ་ཏྠུནྟི ཨ་གྒ་ཉྙ་སུ་ཏྟེ ཨཱ་ག་ཏ་ན་ཡེ་ན ཨུ་པ་ས་མྤ་ད་ཉྩེ་ཝ ཨ་ར་ཧ་ཏྟ་ཉྩ ཨ་ལ་ཏྠུཾ པ་ཊི་ལ་བྷིཾ་སུ. སེ་སཾ སུ་ཝི་ཉྙེ་ཡྻ་མེ་ཝ.
ཏེ་ཝི་ཛྫ་སུ་ཏྟ་ཝ་ཎྞ་ནཱ་ཡ ལཱི་ན་ཏྠ་པྤ་ཀཱ་ས་ནཱ.