༡༡. ཀེ་ཝ་ཊྚ་སུ་ཏྟ་ཝ་ཎྞ་ནཱ
ཀེ་ཝ་ཊྚ་ག་ཧ་པ་ཏི་པུ་ཏྟ་ཝ་ཏྠུ་ཝ་ཎྞ་ནཱ
༤༨༡. པཱ་ཝཱ་རི་ཀ་མྦ་ཝ་ནེཏི པཱ་ཝཱ་རི་ཀ་སེ་ཊྛི་ནོ ཨ་མྦ་བ་ཧུ་ལེ ཨུ་པ་ཝ་ནེ. ཏཾ ཀི་ར སོ སེ་ཊྛཱི བྷ་ག་ཝ་ཏོ ཨ་ནུ་ཙྪ་ཝི་ཀཾ ག་ནྡྷ་ཀུ་ཊིཾ, བྷི་ཀྑུ་ས་ངྒྷ་སྶ ཙ ར་ཏྟི་ཊྛཱ་ན་དི་ཝཱ་ཊྛཱ་ན་ཀུ་ཊི་མ་ཎྜ་པཱ་དཱི་ནི ས་མྤཱ་དེ་ཏྭཱ པཱ་ཀཱ་ར་པ་རི་ཀྑི་ཏྟཾ དྭཱ་ར་ཀོ་ཊྛ་ཀ་ས་མྤ་ནྣཾ ཀ་ཏྭཱ བུ་དྡྷ་པྤ་མུ་ཁ་སྶ ས་ངྒྷ་སྶ ནི་ཡྻཱ་ཏེ་སི, པུ་རི་མ་ཝོ་ཧཱ་རེ་ན པ་ན ‘‘པཱ་ཝཱ་རི་ཀ་མྦ་ཝ་ན’’ནྟི ཝུ་ཙྩ་ཏི, ཏ་སྨིཾ པཱ་ཝཱ་རི་ཀ་མྦ་ཝ་ནེ. ཀེ་ཝ་ཊྚོ་ཏི ཨི་དཾ ཏ་སྶ ནཱ་མཾ ཀེ་ཝ་ཊྚེ་ཧི སཾ་ར་ཀྑི་ཏ་ཏྟཱ, ཏེ་སཾ ཝཱ ས་ནྟི་ཀེ སཾ་ཝ་ཌྜྷི་ཏ་ཏྟཱ་ཏི ཀེ་ཙི. ‘‘ག་ཧ་པ་ཏི་པུ་ཏྟ་སྶཱ’’ཏི ཨེ་ཏྠ ཀཱ་མཾ ཏ་དཱ སོ ག་ཧ་པ་ཏི་ཊྛཱ་ནེ ཋི་ཏོ, པི་ཏུ པ་ན་སྶ ཨ་ཙི་ར་ཀཱ་ལཾ་ཀ་ཏ་ཏཱ་ཡ པུ་རི་མ་ས་མ་ཉྙཱ་ཡ ‘‘ག་ཧ་པ་ཏི་པུ་ཏྟོ’’ ཏྭེ་ཝ ཝོ་ཧ་རཱི་ཡ་ཏི, ཏེ་ནཱ་ཧ ‘‘ག་ཧ་པ་ཏི མ་ཧཱ་སཱ་ལོ’’ཏི. མ་ཧཱ་ཝི་བྷ་ཝ་ཏཱ་ཡ མ་ཧཱ་སཱ་རོ, ག་ཧ་པ་ཏཱི་ཏི ཨ་ཏྠོ ར-ཀཱ་ར་སྶ ལ-ཀཱ་རཾ ཀ་ཏྭཱ ‘‘མ་ཧཱ་སཱ་ལོ སུ་ཁུ་མཱ་ལོ ཨ་ཧ’’ནྟི་ཨཱ་དཱི་སུ (ཨ. ནི. ༣.༣༩) ཝི་ཡ. ས་དྡྷཱ་ས་མྤ་ནྣོཏི པོ་ཐུ་ཛྫ་ནི་ཀཱ་ཡ ས་དྡྷཱ་ཡ ཝ་སེ་ན ས་དྡྷཱ ས་མ་ནྣཱ་ག་ཏོ.
ས་མི་དྡྷཱཏི ས་མྨ་དེ་ཝ ཨི་དྡྷཱ, ཨི་དྡྷི་ཡཱ ཝི་བྷ་ཝ་ས་མྤ་ཏྟི་ཡཱ ཝེ་པུ་ལླ་པྤ་ཏྟཱ་ཏི ཨ་ཏྠོ. ‘‘ཨེ་ཧི ཏྭཾ བྷི་ཀྑུ ཨ་ནྭ་དྡྷ་མཱ་སཾ, ཨ་ནུ་མཱ་སཾ, ཨ་ནུ་སཾ་ཝ་ཙྪ་རཾ ཝཱ མ་ནུ་སྶཱ་ནཾ པ་སཱ་དཱ་ཡ ཨི་དྡྷི་པཱ་ཊི་ཧཱ་རི་ཡཾ ཀ་རོ་ཧཱི’’ཏི ཨེ་ཀ་སྶ བྷི་ཀྑུ་ནོ ཨཱ་ཎཱ་པ་ནཾ ཏ་སྨིཾ ཋཱ་ནེ ཏ་སྶ ཋ་པ་ནཾ ནཱ་མ ཧོ་ཏཱི་ཏི ཨཱ་ཧ ‘‘ཋཱ་ན་ནྟ་རེ ཋ་པེ་ཏཱུ’’ཏི. ཨུ་ཏྟ་རི་མ་ནུ་སྶཱ་ནཾ དྷ་མྨ་ཏོཏི ཨུ་ཏྟ་རི་མ་ནུ་སྶཱ་ནཾ བུ་དྡྷཱ་དཱི་ནཾ ཨ་དྷི་ག་མ་དྷ་མྨ་ཏོ. ནི་དྡྷཱ་ར་ཎེ ཙེ་ཏཾ ནི་སྶ་ཀྐཾ. ཨི་དྡྷི་པཱ་ཊི་ཧཱ་རི་ཡ་ཉྷི ཏ་ཏོ ནི་དྡྷཱ་རེ་ཏི. མ་ནུ་སྶ་དྷ་མྨ་ཏོ ཨུ་ཏྟ་རཱིཏི པ་ཀ་ཏི་མ་ནུ་སྶ་དྷ་མྨ་ཏོ ཨུ་པ་རི. པ་ཛྫ་ལི་ཏ་པ་དཱི་པོཏི པ་ཛྫ་ལ་ནྟོ པ་དཱི་པོ.
༤༨༢. ན དྷཾ་སེ་མཱིཏི གུ་ཎ་ས་མྤ་ཏྟི་ཏོ ན ཙཱ་ཝེ་མི, ཏེ་ནཱ་ཧ ‘‘སཱི་ལ་བྷེ་ད’’ནྟི་ཨཱ་དི. ཝི་སྶཱ་སཾ ཝ་ཌྜྷེ་ཏྭཱ བྷ་ག་ཝ་ཏི ཨ་ཏྟ་ནོ ཝི་སྶ་ཏྠ་བྷཱ་ཝཾ བྲཱུ་ཧེ་ཏྭཱ ཝི་བྷཱུ་ཏཾ པཱ་ཀ་ཊཾ ཀ་ཏྭཱ.
ཨི་དྡྷི་པཱ་ཊི་ཧཱ་རི་ཡ་ཝ་ཎྞ་ནཱ
༤༨༣-༤. ཨཱ་དཱི་ན་ཝནྟི དོ་སཾ. ག་ནྡྷཱ་རཱིཏི ཙཱུ་ལ༹་ག་ནྡྷཱ་རཱི, མ་ཧཱ་ག་ནྡྷཱ་རཱི་ཏི དྭེ ག་ནྡྷཱ་རཱི་ཝི་ཛྫཱ. ཏ་ཏྠ ཙཱུ་ལ༹་ག་ནྡྷཱ་རཱི ནཱ་མ ཏི་ཝ་སྶ་ཏོ ཨོ་རཾ མ་ཏཱ་ནཾ ས་ཏྟཱ་ནཾ ཨུ་པ་པ་ནྣ་ཊྛཱ་ན་ཛཱ་ན་ན་ཝི་ཛྫཱ. མ་ཧཱ་ག་ནྡྷཱ་རཱི ཏ་མྤི ཛཱ་ནཱ་ཏི ཏ་ཏོ ཨུ་ཏྟ་རི་པི ཨི་དྡྷི་ཝི་དྷ་ཉཱ་ཎ་ཀ་པྤཾ ཡེ་བྷུ་ཡྻེ་ན ཨི་དྡྷི་ཝི་དྷ་ཀི་ཙྩཾ སཱ་དྷེ་ཏི. ཏ་སྶཱ ཀི་ར ཝི་ཛྫཱ་ཡ སཱ་དྷ་ཀོ པུ་གྒ་ལོ ཏཱ་དི་སེ དེ་ས་ཀཱ་ལེ མ་ནྟཾ པ་རི་ཛ་པྤི་ཏྭཱ བ་ཧུ་དྷཱ་པི ཨ་ཏྟཱ་ནཾ ད་སྶེ་ཏི, ཧ་ཏྠི་ཨཱ་དཱི་ནི་པི ད་སྶེ་ཏི, ད་སྶ་ནཱི་ཡོ་པི ཧོ་ཏི, ཨ་གྒི་ཐ་མྦྷ་མྤི ཀ་རོ་ཏི, ཛ་ལ་ཐ་མྦྷ་མྤི ཀ་རོ་ཏི, ཨཱ་ཀཱ་སེ་པི ཨ་ཏྟཱ་ནཾ ད་སྶེ་ཏི. ས་བྦཾ ཨི་ནྡ་ཛཱ་ལ་ས་དི་སཾ ད་ཊྛ་བྦཾ. ཨ་ཊྚོཏི དུ་ཀྑི་ཏོ བཱ་དྷི་ཏོ, ཏེ་ནཱ་ཧ ‘‘པཱི་ལི༹་ཏོ’’ཏི.
ཨཱ་དེ་ས་ནཱ་པཱ་ཊི་ཧཱ་རི་ཡ་ཝ་ཎྞ་ནཱ
༤༨༥. ཀཱ་མཾ ‘‘ཙེ་ཏ་སི་ཀ’’ནྟི པ་དཾ ཡེ ཙེ་ཏ་སི ནི་ཡུ་ཏྟཱ ཙི་ཏྟེ་ན ས་མྤ་ཡུ་ཏྟཱ, ཏེ་སཾ སཱ་དྷཱ་ར་ཎ་ཝ་ཙ་ནཾ, སཱ་དྷཱ་ར་ཎེ པ་ན ག་ཧི་ཏེ ཙི་ཏྟ་ཝི་སེ་སོ ག་ཧི་ཏོ་ཝ ཧོ་ཏི, སཱ་མ་ཉྙ་ཛོ་ཏ་ནཱ ཙ ཝི་སེ་སེ ཨ་ཝ་ཏི་ཊྛ་ཏཱི་ཏི ཙེ་ཏ་སི་ཀ་གྒ་ཧ་ཎ་སྶ ཨ་དྷི་པྤཱ་ཡཾ ཝི་ཝ་ར་ནྟོ ‘‘སོ་མ་ན་སྶ་དོ་མ་ན་སྶཾ ཨ་དྷི་པྤེ་ཏ’’ནྟི ཨཱ་ཧ. སོ་མ་ན་སྶ་གྒ་ཧ་ཎེ་ན ཙེ་ཏྠ ཏ་དེ་ཀ་ཊྛཱ རཱ་གཱ་ད་ཡོ, ས་དྡྷཱ་ད་ཡོ ཙ ད་སྶི་ཏཱ ཧོ་ནྟི, དོ་མ་ན་སྶ་གྒ་ཧ་ཎེ་ན དོ་སཱ་ད་ཡོ. ཝི་ཏ་ཀྐ་ཝི་ཙཱ་རཱ པ་ན ས་རཱུ་པེ་ནེ་ཝ ད་སྶི་ཏཱ. ཨེ་ཝཾ ཏ་ཝ མ་ནོཏི ཨི་མི་ནཱ ཨཱ་ཀཱ་རེ་ན ཏ་ཝ མ་ནོ པ་ཝ་ཏྟོ་ཏི ཨ་ཏྠོ. ཀེ་ན པ་ཀཱ་རེ་ན པ་ཝ་ཏྟོ་ཏི ཨཱ་ཧ ‘‘སོ་མ་ན་སྶི་ཏོ ཝཱ’’ཏི་ཨཱ་དི. ‘‘ཨེ་ཝཾ ཏ་ཝ མ་ནོ’’ཏི ཨི་དཾ པ་ན སོ་མ་ན་སྶི་ཏ་ཏཱ་དི་མ་ཏྟ་ད་སྶ་ནཾ, ན པ་ན ཡེ་ན ཡེ་ན སོ་མ་ན་སྶི་ཏོ ཝཱ དོ་མ་ན་སྶི་ཏོ ཝཱ, ཏཾ ཏཾ ད་སྶ་ནཾ. དུ་ཏི་ཡནྟི ‘‘ཨི་ཏྠ་མྤི ཏེ མ་ནོ’’ཏི ཨི་དཾ. ཨི་ཏི་པཱིཏི ཨེ་ཏྠ ཨི་ཏི-ས་དྡོ ནི་ད་སྶ་ན་ཏྠོ ‘‘ཨ་ཏྠཱི་ཏི ཁོ, ཀ་ཙྩཱ་ན, ཨ་ཡ་མེ་ཀོ ཨ་ནྟོ’’ཏི་ཨཱ་དཱི་སུ (སཾ. ནི. ༢.༡༥; ༣.༩༠) ཝི་ཡ, ཏེ་ནཱ་ཧ ‘‘ཨི་མ་ཉྩ ཨི་མ་ཉྩ ཨ་ཏྠཾ ཙི་ནྟ་ཡ་མཱ་ན’’ནྟི པི-ས་དྡོ ཝུ་ཏྟ་ཏྠ་ས་མྤི་ཎྜ་ན་ཏྠོ. པ་ར་སྶ ཙི་ནྟཾ མ་ན་ཏི ཛཱ་ནཱ་ཏི ཨེ་ཏེ་ནཱ་ཏི ཙི་ནྟཱ་མ་ཎི. ཏ་སྶཱ ཀི་ར ཝི་ཛྫཱ་ཡ སཱ་དྷ་ཀོ པུ་གྒ་ལོ ཏཱ་དི་སེ དེ་ས་ཀཱ་ལེ མ་ནྟཾ པ་རི་ཛ་པྤི་ཏྭཱ ཡ་སྶ ཙི་ཏྟཾ ཛཱ་ནི་ཏུ་ཀཱ་མོ, ཏ་སྶ དི་ཊྛ་སུ་ཏཱ་དི་ཝི་སེ་ས་ས་ཉྫཱ་ན་ན་མུ་ཁེ་ན ཙི་ཏྟཱ་ཙཱ་རཾ ཨ་ནུ་མི་ན་ནྟོ ཀ་ཐེ་ཏཱི་ཏི ཀེ་ཙི. ཨ་པ་རེ ‘‘ཝཱ་ཙཾ ནི་ཙྪ་རཱ་པེ་ཏྭཱ ཏ་ཏྠ ཨ་ཀྑ་ར་ས་ལླ་ཀྑ་ཎ་ཝ་སེ་ནཱ’’ཏི ཝ་ད་ནྟི.
ཨ་ནུ་སཱ་ས་ནཱི་པཱ་ཊི་ཧཱ་རི་ཡ་ཝ་ཎྞ་ནཱ
༤༨༦. པ་ཝ་ཏྟེ་ནྟཱཏི པ་ཝ་ཏྟ་ན་ཀཱ ཧུ་ཏྭཱ, པ་ཝ་ཏྟ་ན་ཝ་སེ་ནཱ་ཏི ཨ་ཏྠོ. ‘‘ཨེ་ཝ’’ནྟི ཧི པ་དཾ ཡ་ཐཱ་ནུ་སི་ཊྛཱ་ཡ ཨ་ནུ་སཱ་ས་ནི་ཡཱ ཝི་དྷི་ཝ་སེ་ན, པ་ཊི་སེ་དྷ་ཝ་སེ་ན ཙ པ་ཝ་ཏྟི་ཨཱ་ཀཱ་ར་པ་རཱ་མ་ས་ནཾ, སཱ ཙ ས་མྨཱ་ཝི་ཏ་ཀྐཱ་ནཾ མི་ཙྪཱ་ཝི་ཏ་ཀྐཱ་ན་ཉྩ པ་ཝ་ཏྟི་ཨཱ་ཀཱ་ར་ད་སྶ་ན་ཝ་སེ་ན པ་ཝ་ཏྟ་ཏི ཏ་ཏྠ ཨཱ་ནི་སཾ་ས་སྶ ཨཱ་དཱི་ན་ཝ་སྶ ཙ ཝི་བྷཱ་ཝ་ན་ཏྠཾ. ཨ་ནི་ཙྩ་ས་ཉྙ་མེ་ཝ ན ནི་ཙྩ་ས་ཉྙ་ནྟི ཨ་ཏྠོ. པ་ཊི་ཡོ་གཱི་ནི་ཝ་ཏྟ་ན་ཏྠ་ཉྷི ཨེ་ཝ-ཀཱ་ར་གྒ་ཧ་ཎཾ. ཨི་དྷཱ་པི ཨེ་ཝཾ ས་དྡ་གྒ་ཧ་ཎ་སྶ ཨ་ཏྠོ, པ་ཡོ་ཛ་ན་ཉྩ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. ཨི་དཾག་ཧ་ཎེ་པི ཨེ་སེ་ཝ ན་ཡོ. པ་ཉྩ་ཀཱ་མ་གུ་ཎི་ཀ་རཱ་གནྟི ནི་ད་སྶ་ན་མ་ཏྟཾ ད་ཊྛ་བྦཾ, ཏ་ད་ཉྙ་རཱ་ག་སྶ, དོ་སཱ་དཱི་ན་ཉྩ པ་ཧཱ་ན་སྶ ཨི་ཙྪི་ཏ་ཏྟཱ, ཏ་པྤ་ཧཱ་ན་སྶ ཙ ཏ་ད་ཉྙ་རཱ་གཱ་དི་ཁེ་པ་ན་སྶ ཨུ་པཱ་ཡ་བྷཱ་ཝ་ཏོ ཏ་ཐཱ ཝུ་ཏྟཾ དུ་ཊྛ་ལོ་ཧི་ཏ་ཝི་མོ་ཙ་ན་སྶ པུ་བྦ་དུ་ཊྛ་མཾ་ས་ཁེ་པ་ནཱུ་པཱ་ཡ་ཏཱ ཝི་ཡ. ལོ་ཀུ་ཏྟ་ར་དྷ་མྨ་མེ་ཝཱཏི ཨ་ཝ་དྷཱ་ར་ཎཾ པ་ཊི་པ་ཀྑ་བྷཱ་ཝ་ཏོ སཱ་ཝ་ཛྫ་དྷ་མྨ་ནི་ཝ་ཏྟ་ན་པ་རཾ ད་ཊྛ་བྦཾ ཏ་སྶཱ་དྷི་ག་མཱུ་པཱ་ཡཱ་ནི་སཾ་ས་བྷཱུ་ཏཱ་ནཾ ཏ་ད་ཉྙེ་སཾ ཨ་ན་ཝ་ཛྫ་དྷ་མྨཱ་ནཾ ནཱ་ན་ནྟ་རི་ཡ་བྷཱ་ཝ་ཏོ. ཨི་དྡྷི་ཝི་དྷཾ ཨི་དྡྷི་པཱ་ཊི་ཧཱ་རི་ཡ་ནྟི ད་སྶེ་ཏི ཨི་དྡྷི་ད་སྶ་ནེ་ན པ་ར་ས་ནྟཱ་ནེ པ་སཱ་དཱ་དཱི་ནཾ པ་ཊི་པ་ཀྑ་སྶ ཧ་ར་ཎ་ཏོ. ཨི་མི་ནཱ ན་ཡེ་ན སེ་ས་པ་ད་དྭ་ཡེ་པི ཨ་ཏྠོ ཝེ་དི་ཏ་བྦོ. ས་ཏ་ཏཾ དྷ་མྨ་དེ་ས་ནཱཏི ས་བྦ་ཀཱ་ལཾ དེ་སེ་ཏ་བྦ་དྷ་མྨ་དེ་ས་ནཱ.
ཨི་དྡྷི་པཱ་ཊི་ཧཱ་རི་ཡེ་ནཱཏི ས་ཧ་ཡོ་གེ ཀ་ར་ཎ་ཝ་ཙ་ནཾ, ཨི་དྡྷི་པཱ་ཊི་ཧཱ་རི་ཡེ་ན ས་དྡྷི་ནྟི ཨ་ཏྠོ. ཨཱ་དེ་ས་ནཱ་པཱ་ཊི་ཧཱ་རི་ཡེ་ནཱཏི ཨེ་ཏྠཱ་པི ཨེ་སེ་ཝ ན་ཡོ. དྷ་མྨ་སེ་ནཱ་པ་ཏི་སྶ ཨཱ་ཙི་ཎྞ་ནྟི ཡོ་ཛ་ནཱ. ‘‘ཙི་ཏྟཱ་ཙཱ་རཾ ཉ་ཏྭཱ’’ཏི ཨི་མི་ནཱ ཨཱ་དེ་ས་ནཱ་པཱ་ཊི་ཧཱ་རི་ཡཾ ད་སྶེ་ཏི. ‘‘དྷ་མྨཾ དེ་སེ་སཱི’’ཏི ཨི་མི་ནཱ ཨ་ནུ་སཱ་ས་ནཱི་པཱ་ཊི་ཧཱ་རི་ཡཾ ‘‘བུ་དྡྷཱ་ནཾ ས་ཏ་ཏཾ དྷ་མྨ་དེ་ས་ནཱ’’ཏི ཨ་ནུ་སཱ་ས་ནཱི་པཱ་ཊི་ཧཱ་རི་ཡ་སྶ ཏ་ཏྠ སཱ་ཏི་ས་ཡ་ཏཱ་ཡ ཝུ་ཏྟཾ. ས་ཨུ་པཱ་ར་མྦྷཱ་ནི པ་ཏི་རཱུ་པེ་ན ཨུ་པཱ་ར་མྦྷི་ཏ་བྦ་ཏོ. ས་དོ་སཱ་ནི དོ་ས་ས་མུ་ཙྪི་ནྡ་ན་སྶ ཨ་ནུ་པཱ་ཡ་བྷཱ་ཝ་ཏོ. ས་དོ་ས་ཏྟཱ ཨེ་ཝ ཨ་དྡྷཱ་ནཾ ན ཏི་ཊྛ་ནྟི ཙི་ར་ཀཱ་ལ་ཊྛཱ་ཡཱི་ནི ན ཧོ་ནྟི. ཨ་དྡྷཱ་ནཾ ཨ་ཏི་ཊྛ་ན་ཏོ ན ནི་ཡྻ་ནྟཱིཏི ཕ་ལེ་ན ཧེ་ཏུ་ནོ ཨ་ནུ་མཱ་ནཾ. ཨ་ནི་ཡྻཱ་ནི་ཀ་ཏཱ་ཡ ཧི ཏཱ་ནི ཨ་ན་དྡྷ་ནི་ཡཱ་ནི. ཨ་ནུ་སཱ་ས་ནཱི་པཱ་ཊི་ཧཱ་རི་ཡཾ ཨ་ནུ་པཱ་ར་མྦྷཾ ཝི་སུ་དྡྷི་པྤ་བྷ་ཝ་ཏོ, ཝི་སུ་དྡྷི་ནི་སྶ་ཡ་ཏོ ཙ. ཏ་ཏོ ཨེ་ཝ ནི་དྡོ་སཾ. ན ཧི ཏ་ཏྠ པུ་བྦཱ་པ་ར་ཝི་རོ་དྷཱ་དི་དོ་ས་ས་མྦྷ་ཝོ. ནི་དྡོ་ས་ཏྟཱ ཨེ་ཝ ཨ་དྡྷཱ་ནཾ ཏི་ཊྛ་ཏི པ་ར་ཝཱ་ད་ཝཱ་ཏེ་ཧི, ཀི་ལེ་ས་ཝཱ་ཏེ་ཧི ཙ ཨ་ནུ་པ་ཧ་ནྟ་བྦ་ཏོ. ཏ་སྨཱཏི ཡ་ཐཱ་ཝུ་ཏྟ་ཀཱ་ར་ཎ་ཏོ, ཏེ་ན ས་ཨུ་པཱ་ར་མྦྷཱ་དིཾ, ཨ་ནུ་པཱ་ར་མྦྷཱ་དིཾ ཙཱ་ཏི ཨུ་བྷ་ཡཾ ཨུ་བྷ་ཡ་ཏྠ ཡ་ཐཱ་ཀྐ་མཾ གཱ་ར་ཡ྄ཧ་པཱ་སཾ་ས་བྷཱ་ཝཱ་ནཾ ཧེ་ཏུ་བྷཱ་ཝེ་ན པ་ཙྩཱ་མ་ས་ཏི.
བྷཱུ་ཏ་ནི་རོ་དྷེ་ས་ཀ་ཝ་ཏྠུ་ཝ་ཎྞ་ནཱ
༤༨༧. ཨ་ནི་ཡྻཱ་ནི་ཀ་བྷཱ་ཝ་ད་སྶ་ན་ཏྠནྟི ཡ་སྨཱ མ་ཧཱ་བྷཱུ་ཏ་པ་རི་ཡེ་ས་ཀོ བྷི་ཀྑུ པུ་རི་མེ་སུ དྭཱི་སུ པཱ་ཊི་ཧཱ་རི་ཡེ་སུ ཝ་སི་པྤ་ཏྟོ ཀུ་ས་ལོ་པི ས་མཱ་ནོ མ་ཧཱ་བྷཱུ་ཏཱ་ནཾ ཨ་པ་རི་སེ་ས་ནི་རོ་དྷ་ས་ངྑཱ་ཏཾ ནི་བྦཱ་ནཾ ནཱ་ཝ་བུ་ཛ྄ཛྷི, ཏ་སྨཱ ཏཱ་ནི ནི་ཡྻཱ་ནཱ་ཝ་ཧ་ཏཱ་བྷཱ་ཝ་ཏོ ཨ་ནི་ཡྻཱ་ནི་ཀཱ་ནཱི་ཏི ཏེ་སཾ ཨ་ནི་ཡྻཱ་ནི་ཀ་བྷཱ་ཝ་ད་སྶ་ན་ཏྠཾ. ཏ་ཏི་ཡཾ པ་ན ཏ་ཀྐ་ར་སྶ ཨེ་ཀ་ནྟ་ཏོ ནི་ཡྻཱ་ནཱ་ཝ་ཧ་ནྟི ཏ་སྶེ་ཝ ནི་ཡྻཱ་ནི་ཀ་བྷཱ་ཝ་ད་སྶ་ན་ཏྠཾ.
ཨེ་ཝ་མེ་ཏི་སྶཱ དེ་ས་ནཱ་ཡ མུ་ཁྱ་པ་ཡོ་ཛ་ནཾ ད་སྶེ་ཏྭཱ ཨི་དཱ་ནི ཨ་ནུ་ས་ངྒི་ཀ་མྤི ད་སྶེ་ཏུཾ ‘‘ཨ་པི་ཙཱ’’ཏི་ཨཱ་དི ཨཱ་ར་དྡྷཾ. མ་ཧཱ་བྷཱུ་ཏེ པ་རི་ཡེ་ས་ནྟོཏི ཨ་པ་རི་སེ་སཾ ནི་རུ་ཛ྄ཛྷ་ན་ཝ་སེ་ན མ་ཧཱ་བྷཱུ་ཏེ ག་ཝེ་ས་ནྟོ, ཏེ་སཾ ཨ་ན་ཝ་སེ་ས་ནི་རོ་དྷཾ ཝཱི་མཾ་ས་ནྟོ་ཏི ཨ་ཏྠོ. ཝི་ཙ་རི་ཏྭཱཏི དྷ་མྨ་ཏཱ་ཡ ཙོ་དི་ཡ་མཱ་ནོ ཝི་ཙ་རི་ཏྭཱ. དྷ་མྨ་ཏཱ་སི་དྡྷཾ ཀི་རེ་ཏཾ, ཡ་དི་དཾ ཏ་སྶ བྷི་ཀྑུ་ནོ ཏ་ཐཱ ཝི་ཙ་ར་ཎཾ, ཡ་ཐཱ ཨ་བྷི་ཛཱ་ཏི་ཡཾ མ་ཧཱ་པ་ཐ་ཝི་ཀ་མྤཱ་དི. མ་ཧ་ནྟ་བྷཱ་ཝ་པྤ་ཀཱ་ས་ན་ཏྠནྟི ས་དེ་ཝ་ཀེ ལོ་ཀེ ཨ་ན་ཉྙ་སཱ་དྷཱ་ར་ཎ་སྶ བུ་དྡྷཱ་ནཾ མ་ཧ་ནྟ་བྷཱ་ཝ་སྶ མ་ཧཱ་ནུ་བྷཱ་ཝ་ཏཱ་ཡ དཱི་པ་ན་ཏྠཾ. ཨི་ད་ཉྩ ཀཱ་ར་ཎནྟི ས་བྦེ་ས་མྤི བུ་དྡྷཱ་ནཾ སཱ་ས་ནེ ཨཱི་དི་སོ ཨེ་ཀོ བྷི་ཀྑུ ཏ་དཱ་ནུ་བྷཱ་ཝ་པྤ་ཀཱ་ས་ནོ ཧོ་ཏཱི་ཏི ཨི་ད་མྤི ཀཱ་ར་ཎཾ ད་སྶེ་ནྟོ.
ཀ་ཏྠཱཏི ནི་མི་ཏྟེ བྷུ་མྨཾ, ཏ་སྨཱ ཀ་ཏྠཱཏི ཀི་སྨིཾ ཋཱ་ནེ ཀཱ་ར་ཎ་བྷཱུ་ཏེ. ཀིཾ ཨཱ་ག་མྨཱཏི ཀིཾ ཨཱ་ར་མྨ་ཎཾ པ་ཙྩ་ཡ་བྷཱུ་ཏཾ ཨ་དྷི་ག་ནྟྭཱ, ཏེ་ནཱ་ཧ ‘‘ཀིཾ པ་ཏྟ་སྶཱ’’ཏི. ཏེཏི མ་ཧཱ་བྷཱུ་ཏཱ. ཨ་པྤ་ཝ་ཏྟི་ཝ་སེ་ནཱཏི ཨ་ནུ་པྤ་ཛྫ་ན་ཝ་སེ་ན. ས་བྦཱ་ཀཱ་རེ་ནཱཏི ཝ་ཙ་ན་ཏྠ་ལ་ཀྑ་ཎཱ་དི་ས་མུ་ཊྛཱ་ན་ཀ་ལཱ་པ་ཙུ་ཎྞ་ནཱ་ན་ཏྟེ་ཀ་ཏྟ་ཝི་ནི་བྦྷོ་གཱ་ཝི་ནི་བྦྷོ་ག- ས་བྷཱ་ག་ཝི་ས་བྷཱ་ག་ཨ་ཛ྄ཛྷ་ཏྟི་ཀ་བཱ་ཧི་ར་ས་ངྒ་ཧ་པ་ཙྩ་ཡ་ས་མ་ནྣཱ་ཧཱ་ར་པ་ཙྩ་ཡ་ཝི་བྷཱ་གཱ་ཀཱ་ར་ཏོ, ས་ས་མྦྷཱ་ར་ས་ངྑེ་པ་ས་ས་མྦྷཱ་ར་ཝི་བྷ་ཏྟི་ས་ལ་ཀྑ་ཎ་ས་ངྑེ་པ་ས་ལ་ཀྑ་ཎ་ཝི་བྷ་ཏྟི་ཨཱ་ཀཱ་ར་ཏོ ཙཱ་ཏི ས་བྦེ་ན ཨཱ་ཀཱ་རེ་ན.
༤༨༨. དི་བྦ་ནྟི ཨེ་ཏྠ པ་ཉྩ་ཧི ཀཱ་མ་གུ་ཎེ་ཧི ས་མ་ངྒཱི་བྷཱུ་ཏཱ ཧུ་ཏྭཱ ཝི་ཙ་ར་ནྟི, ཀཱི་ལ༹་ནྟི, ཛོ་ཏ་ནྟི ཙཱ་ཏི དེ་ཝོ, དེ་ཝ་ལོ་ཀོ. ཏཾ ཡ་ནྟི ཨུ་པ་ག་ཙྪ་ནྟི ཨེ་ཏེ་ནཱ་ཏི དེ་ཝ་ཡཱ་ནི་ཡོ. ཝ་སཾ ཝ་ཏྟེ་ནྟོཏི ཨེ་ཏྠ ཝ་ས་ཝ་ཏྟ་ནཾ ནཱ་མ ཡ་ཐི་ཙྪི་ཏ་ཊྛཱ་ན་ག་མ་ནཾ. ཙ་ཏྟཱ་རོ མ་ཧཱ་རཱ་ཛཱ་ནོ ཨེ་ཏེ་སཾ ཨི་སྶ་རཱ་ཏི ཙཱ་ཏུ་མ་ཧཱ་རཱ་ཛི་ཀཱ ཡཱ དེ་ཝ་ཏཱ མ་གྒ་ཕ་ལ་ལཱ་བྷི་ནོ ཏཱ ཏ་མ་ཏྠཾ ཨེ་ཀ་དེ་སེ་ན ཛཱ་ནེ་ཡྻུཾ བུ་དྡྷ་ཝི་ས་ཡོ པ་ནཱ་ཡཾ པ་ཉྷོ་ཏི ཙི་ནྟེ་ཏྭཱ ‘‘ན ཛཱ་ནཱ་མཱ’’ཏི ཨཱ་ཧཾ་སུ, ཏེ་ནཱ་ཧ ‘‘བུ་དྡྷ་ཝི་ས་ཡེ’’ཏི་ཨཱ་དི. ཨ་ཛ྄ཛྷོ་ཏྠ་ར་ཎཾ ནཱ་མེ་ཏྠ ནི་པྤཱི་ལ༹་ན་ནྟི ཨཱ་ཧ ‘‘པུ་ན་པྤུ་ནཾ པུ་ཙྪ་ཏཱི’’ཏི. ཨ་བྷི་ཀྐ་ནྟ་ཏ་རཱཏི རཱུ་པ་ས་མྤ་ཏྟི་ཡཱ ཙེ་ཝ པ་ཉྙཱ་པ་ཊི་བྷཱ་ནཱ་དི་གུ་ཎེ་ཧི ཙ ཨ་མྷེ ཨ་བྷི་བྷུ་ཡྻ པ་རེ་སཾ ཀཱ་མ་ནཱི་ཡ་ཏ་རཱ. པ་ཎཱི་ཏ་ཏ་རཱཏི ཨུ་ལཱ༹་ར་ཏ་རཱ, ཏེ་ནཱ་ཧ ‘‘ཨུ་ཏྟ་མ་ཏ་རཱ’’ཏི.
༤༩༡-༣. དེ་ཝ་ཡཱ་ནི་ཡ་ས་དི་སོ ཨི་དྡྷི་ཝི་དྷ་ཉཱ་ཎ་སྶེ་ཝ ཨ་དྷི་པྤེ་ཏ་ཏྟཱ. ‘‘དེ་ཝ་ཡཱ་ནི་ཡ་མ་གྒོ་ཏི ཝཱ …པེ… ས་བྦ་མེ་ཏཾ ཨི་དྡྷི་ཝི་དྷ་ཉཱ་ཎ་སྶེ་ཝ ནཱ་མ’’ནྟི ཨི་དཾ པཱ་ལི༹་ཡཾ ཨ་ཊྛ་ཀ་ཐཱ་སུ ཙ ཏ་ཏྠ ཏ་ཏྠ ཨཱ་ག་ཏ་རུ་ལ༹ྷི་ཝ་སེ་ན ཝུ་ཏྟཾ.
༤༩༤. ཨཱ་ག་མ་ན་པུ་བྦ་བྷཱ་གེ ནི་མི་ཏྟནྟི བྲ་ཧྨུ་ནོ ཨཱ་ག་མ་ན་སྶ པུ་བྦ་བྷཱ་གེ ཨུ་པྤ་ཛྫ་ན་ནི་མི་ཏྟཾ. པཱ་ཏུ་ར་ཧོ་སཱིཏི ཨཱ་ཝི བྷ་ཝི. པཱ་ཀ་ཊོ ཨ་ཧོ་སཱིཏི པ་ཀཱ་སོ ཨ་ཧོ་སི.
༤༩༧. པ་དེ་སེ་ནཱཏི ཨེ་ཀ་དེ་སེ་ན, ཨུ་པཱ་དི་ནྣ་ཀ་ཝ་སེ་ན, ས་ཏྟ་ས་ནྟཱ་ན་པ་རི་ཡཱ་པ་ནྣེ་ནཱ་ཏི ཨ་ཏྠོ. ཨ་ནུ་པཱ་དི་ནྣ་ཀེ་པཱིཏི ཨ་ནི་ནྡྲི་ཡ་བ་དྡྷེ་པི. ནི་པྤ་དེ་ས་ཏོ ཨ་ན་ཝ་སེ་ས་ཏོ. པུ་ཙྪཱ་མཱུ་ལ༹ྷ་སྶཱཏི པུ་ཙྪི་ཏུཾ ཨ་ཛཱ་ན་ནྟ་སྶ. པུ་ཙྪཱ་ཡ དོ་སཾ ད་སྶེ་ཏྭཱཏི ཏེ་ན ཀ་ཏ་པུ་ཙྪཱ་ཡ པུ་ཙྪི་ཏཱ་ཀཱ་རེ དོ་སཾ ཝི་བྷཱ་ཝེ་ཏྭཱ. ཡ་སྨཱ ཝི་སྶ་ཛྫ་ནཾ ནཱ་མ པུ་ཙྪཱ་ནུ་རཱུ་པཾ པུ་ཙྪཱ་ས་བྷཱ་གེ་ན ཝི་སྶ་ཛྫེ་ཏ་བྦ་ཏོ, ན ཙ ཏ་ཐཱ་ག་ཏཱ ཝི་ར་ཛ྄ཛྷི་ཏྭཱ ཀ་ཏ་པུ་ཙྪཱ་ནུ་རཱུ་པཾ ཝི་སྶ་ཛྫེ་ནྟི, ཨ་ཏྠ་ས་བྷཱ་ག་ཏཱ་ཡ ཙ ཝི་སྶ་ཛྫ་ན་སྶ པུ་ཙྪ་ཀཱ ཏ་ད་ཏྠཾ ཨ་ན་ཝ་བུ་ཛ྄ཛྷ་ནྟཱ ས་མྨུ་ཡ྄ཧ་ནྟི, ཏ་སྨཱ པུ་ཙྪཱ་ཡ སི་ཀྑཱ་པ་ནཾ བུ་དྡྷཱ་ཙི་ཎྞཾ, ཏེ་ནཱ་ཧ ‘‘པུ་ཙྪཾ སི་ཀྑཱ་པེ་ཏྭཱ’’ཏི་ཨཱ་དི.
༤༩༨. ཨ་པྤ་ཏི་ཊྛཱཏི ཨ་པྤ་ཙྩ་ཡཱ, ས་བྦ་སོ ས་མུ་ཙྪི་ནྣ་ཀཱ་ར་ཎཱ་ཏི ཨ་ཏྠོ. ཨུ་པཱ་དི་ནྣཾ ཡེ་ཝཱཏི ཨི་ནྡྲི་ཡ་བ་དྡྷ་མེ་ཝ. ཡ་སྨཱ ཨེ་ཀ་དི་སཱ་བྷི་མུ་ཁཾ ས་ནྟཱ་ན་ཝ་སེ་ན ས་ཎྛི་ཏེ རཱུ་པ་པྤ་བ་ནྡྷེ དཱི་གྷ་ས་མ་ཉྙཱ ཏཾ ཨུ་པཱ་དཱ་ཡ ཏ་ཏོ ཨ་པྤ་ཀེ ར་སྶ་ས་མ་ཉྙཱ ཏ་དུ་བྷ་ཡ་ཉྩ ཝི་སེ་ས་ཏོ རཱུ་པ་གྒ་ཧ་ཎ་མུ་ཁེ་ན ག་ཡ྄ཧ་ཏི, ཏ་སྨཱ ཨཱ་ཧ ‘‘དཱི་གྷ་ཉྩ ར་སྶ་ཉྩཱ་ཏི ས་ཎྛཱ་ན་ཝ་སེ་ན ཨུ་པཱ་དཱ་རཱུ་པཾ ཝུ་ཏྟ’’ནྟི. ཨ་པྤ་པ་རི་མཱ་ཎེ རཱུ་པ་ས་ངྒྷཱ་ཏེ ཨ་ཎུ་ས་མ་ཉྙཱ, ཏཾ ཨུ་པཱ་དཱ་ཡ ཏ་ཏོ མ་ཧ་ཏི ཐཱུ་ལ་ས་མ་ཉྙཱ. ཨི་ད་མྤི དྭ་ཡཾ ཝི་སེ་ས་ཏོ རཱུ་པ་གྒ་ཧ་ཎ་མུ་ཁེ་ན ག་ཡ྄ཧ་ཏི, ཏེ་ནཱ་ཧ ‘‘ཨི་མི་ནཱ་པཱི’’ཏི་ཨཱ་དི. པི-ས་དྡེ་ན ཙེ་ཏྠ ‘‘ས་ཎྛཱ་ན་ཝ་སེ་ན ཨུ་པཱ་དཱ་རཱུ་པཾ ཝུ་ཏྟ’’ནྟི ཨེ་ཏྠཱ་པི ཝ་ཎྞ་མ་ཏྟ་མེ་ཝ ཀ་ཐི་ཏ་ནྟི ཨི་མ་མ་ཏྠཾ ས་མུ་ཙྩི་ན་ཏཱི་ཏི ཝ་ད་ནྟི. སུ་བྷནྟི སུ་ནྡ་རཾ, ཨི་ཊྛ་ནྟི ཨ་ཏྠོ. ཨ་སུ་བྷནྟི ཨ་སུ་ནྡ་རཾ, ཨ་ནི་ཊྛ་ནྟི ཝུ་ཏྟཾ ཧོ་ཏི. ཏེ་ནེ་ཝཱ་ཧ ‘‘ཨི་ཊྛཱ་ནི་ཊྛཱ་ར་མྨ་ཎཾ པ་ནེ་ཝཾ ཀ་ཐི་ཏ’’ནྟི. དཱི་གྷཾ ར་སྶཾ, ཨ་ཎུཾ ཐཱུ་ལཾ, སུ་བྷཱ་སུ་བྷ་ནྟི ཏཱི་སུ ཋཱ་ནེ་སུ ཨུ་པཱ་དཱ་རཱུ་པ་སྶེ་ཝ ག་ཧ་ཎཾ, བྷཱུ་ཏ་རཱུ་པཱ་ནཾ ཝི་སུཾ ག་ཧི་ཏ་ཏྟཱ. ནཱ་མནྟི ཝེ་ད་ནཱ་དི་ཀྑ་ནྡྷ་ཙ་ཏུ་ཀྐཾ ཏ་ཉྷི ཨཱ་ར་མྨ་ཎཱ་བྷི་མུ་ཁཾ ན་མ་ན་ཏོ, ནཱ་མ་ཀ་ར་ཎ་ཏོ ཙ ‘‘ནཱ་མ’’ནྟི ཝུ་ཙྩ་ཏི. ཧེ་ཊྛཱ ‘‘དཱི་གྷཾ ར་སྶ’’ནྟི་ཨཱ་དི་ནཱ ཝུ་ཏྟ་མེ་ཝ ཨི་དྷ རུ་པྤ་ན་ཊྛེ་ན ‘‘རཱུ་པ’’ནྟི ག་ཧི་ཏ་ནྟི ཨཱ་ཧ ‘‘དཱི་གྷཱ་དི་བྷེ་དཾ རཱུ་པ་ཉྩཱ’’ཏི. དཱི་གྷཱ་དཱིཏི ཙ ཨཱ་དི-ས་དྡེ་ན ཨཱ་པཱ་དཱི་ན་ཉྩ ས་ངྒ་ཧོ ད་ཊྛ་བྦོ. ཡ་སྨཱ ཝཱ དཱི་གྷཱ་དི་ས་མ་ཉྙཱ ན རཱུ་པཱ་ཡ་ཏ་ན་ཝ་ཏྠུ་ཀཱ་ཝ, ཨ་ཐ ཁོ བྷཱུ་ཏ་རཱུ་པ་ཝ་ཏྠུ་ཀཱ་པི. ཏ་ཐཱ ཧི ས་ཎྛཱ་ནཾ ཕུ་ས་ན་མུ་ཁེ་ན་པི ག་ཡ྄ཧ་ཏི, ཏ་སྨཱ དཱི་གྷ་ར་སྶཱ་དི་གྒ་ཧ་ཎེ་ན བྷཱུ་ཏ་རཱུ་པ་མྤི ག་ཡ྄ཧ་ཏེ་ཝཱ་ཏི ‘‘དཱི་གྷཱ་དི་བྷེ་དཾ རཱུ་པ’’མི་ཙྩེ་ཝ ཝུ་ཏྟཾ. ཀིཾ ཨཱ་ག་མྨཱཏི ཀིཾ ཨ་དྷི་ག་ནྟྭཱ ཀི་སྶ ཨ་དྷི་ག་མ་ཧེ་ཏུ. ‘‘ཨུ་པ་རུ་ཛ྄ཛྷ་ཏཱི’’ཏི ཨི་དཾ ཨ་ནུ་པྤཱ་ད་ནི་རོ་དྷཾ ས་ནྡྷཱ་ཡ ཝུ་ཏྟཾ, ན ཁ་ཎ་ནི་རོ་དྷ་ནྟི ཨཱ་ཧ ‘‘ཨ་སེ་ས་མེ་ཏཾ ན་པྤ་ཝ་ཏྟ་ཏཱི’’ཏི.
༤༩༩. ཝི་ཉྙཱ་ཏ་བྦནྟི ཝི་སི་ཊྛེ་ན ཉཱ་ཏ་བྦཾ, ཉཱ་ཎུ་ཏྟ་མེ་ན ཨ་རི་ཡ་མ་གྒ་ཉཱ་ཎེ་ན པ་ཙྩ་ཀྑ་ཏོ ཛཱ་ནི་ཏ་བྦ་ནྟི ཨ་ཏྠོ, ཏེ་ནཱ་ཧ ‘‘ནི་བྦཱ་ན་སྶེ་ཏཾ ནཱ་མ’’ནྟི. ནི་དི་སྶ་ཏཱི་ཏི ནི་ད་སྶ་ནཾ, ཙ་ཀྑུ་ཝི་ཉྙེ་ཡྻཾ. ན ནི་ད་སྶ་ནཾ ཨ་ནི་ད་སྶ་ནཾ, ཨ་ཙ་ཀྑུ་ཝི་ཉྙེ་ཡྻ་ནྟི ཨེ་ཏ་མ་ཏྠཾ ཝ་ད་ནྟི. ནི་ད་སྶ་ནཾ ཝཱ ཨུ་པ་མཱ, ཏཾ ཨེ་ཏ་སྶ ན་ཏྠཱི་ཏི ཨ་ནི་ད་སྶ་ནཾ. ན ཧི ནི་བྦཱ་ན་སྶ ནི་ཙྩ་སྶ ཨེ་ཀ་སྶ ཨ་ཙྩ་ནྟ་ས་ནྟ་པ་ཎཱི་ཏ་ས་བྷཱ་ཝ་སྶ ས་དི་སཾ ནི་ད་སྶ་ནཾ ཀུ་ཏོ་ཙི ལ་བྦྷ་ཏཱི་ཏི. ཡཾ ཨ་ཧུ་ཏྭཱ ས་མྦྷོ་ཏི, ཧུ་ཏྭཱ པ་ཊི་ཝེ་ཏི ཏཾ ས་ངྑ་ཏཾ ཨུ་ད་ཡ་ཝ་ཡ་ནྟེ་ཧི ས་ཨ་ནྟཾ, ཨ་ས་ངྑ་ཏ་སྶ པ་ན ནི་བྦཱ་ན་སྶ ནི་ཙྩ་སྶ ཏེ ཨུ་བྷོ་པི ཨ་ནྟཱ ན ས་ནྟི, ཏ་ཏོ ཨེ་ཝ ན་ཝ་བྷཱ་ཝཱ་པ་ག་མ་ས་ངྑཱ་ཏོ ཛ་ར་ནྟོ་པི ཏ་སྶ ན་ཏྠཱི་ཏི ཨཱ་ཧ ‘‘ཨུ་པྤཱ་ད་ནྟོ…པེ… ཨ་ན་ནྟ’’ནྟི. ‘‘ཏི་ཏྠ་སྶ ནཱ་མ’’ནྟི ཝ་ཏྭཱ ཏ་ཏྠ ནི་བྦ་ཙ་ནཾ ད་སྶེ་ཏུཾ ‘‘པ་པ་ནྟི ཨེ་ཏྠཱ་ཏི པ་པ’’ནྟི ཝུ་ཏྟཾ. ཨེ་ཏྠ ཧི པ་པ་ནྟི པཱ་ན་ཏི་ཏྠཾ. བྷ-ཀཱ་རོ ཀ་ཏོ ནི་རུ་ཏྟི་ན་ཡེ་ན. ཝི་སུ་དྡྷ་ཊྛེ་ན ཝཱ ས་བྦ་ཏོ་པ་བྷཾ, ཀེ་ན་ཙི ཨ་ནུ་པ་ཀྐི་ལི་ཊྛ་ཏཱ་ཡ ས་མ་ནྟ་ཏོ པ་བྷ་སྶ་ར་ནྟི ཨ་ཏྠོ. ཡེ་ན ནི་བྦཱ་ནཾ ཨ་དྷི་ག་ཏཾ, ཏཾ ས་ནྟ་ཏི་པ་རི་ཡཱ་པ་ནྣཱ་ནཾ་ཡེ་ཝ ཨི་དྷ ཨ་ནུ་པྤཱ་ད་ནི་རོ་དྷོ ཨ་དྷི་པྤེ་ཏོ་ཏི ཝུ་ཏྟཾ ‘‘ཨུ་པཱ་དི་ནྣ་ཀ་དྷ་མྨ་ཛཱ་ཏཾ ནི་རུ་ཛ྄ཛྷ་ཏི ཨ་པྤ་ཝ་ཏྟཾ ཧོ་ཏཱི’’ཏི.
ཏ་ཏྠཱཏི ‘‘ཝི་ཉྙཱ་ཎ་སྶ ནི་རོ་དྷེ་ནཱ’’ཏི ཡཾ པ་དཾ ཝུ་ཏྟཾ, ཏ་སྨིཾ. ‘‘ཝི་ཉྙཱ་ཎ’’ནྟི ཝི་ཉྙཱ་ཎཾ ཨུ་དྡྷ་ར་ཏི ཝི་བྷ་ཏྟ་བྦ་ཏྟཱ ཨེ་ཏྠེ་ཏཾ ཨུ་པ་རུ་ཛ྄ཛྷ་ཏཱིཏི ཨེ་ཏ་སྨིཾ ནི་བྦཱ་ནེ ཨེ་ཏཾ ནཱ་མ་རཱུ་པཾ ཙ་རི་མ་ཀ་ཝི་ཉྙཱ་ཎ་ནི་རོ་དྷེ་ན ཨ་ནུ་པྤཱ་ད་ཝ་སེ་ན ནི་རུ་ཛ྄ཛྷ་ཏི ཨ་ནུ་པཱ་དི་སེ་སཱ་ཡ ནི་བྦཱ་ན་དྷཱ་ཏུ་ཡཱ, ཏེ་ནཱ་ཧ ‘‘ཝི་ཛ྄ཛྷཱ་ཏ་དཱི་པ་སི་ཁཱ ཝི་ཡ ཨ་པ་ཎྞ་ཏྟི་ཀ་བྷཱ་ཝཾ ཡཱ་ཏཱི’’ཏི. ‘‘ཙ་རི་མ་ཀ་ཝི་ཉྙཱ་ཎ’’ནྟི ཧི ཨ་ར་ཧ་ཏོ ཙུ་ཏི་ཙི་ཏྟཾ ཨ་དྷི་པྤེ་ཏཾ. ‘‘ཨ་བྷི་ས་ངྑཱ་ར་ཝི་ཉྙཱ་ཎ་སྶཱ་པཱི’’ཏི་ཨཱ་དི་ནཱ་པི ས་ཨུ་པཱ་དི་སེ་ས་ནི་བྦཱ་ན་མུ་ཁེ་ན ཨ་ནུ་པཱ་དི་སེ་ས་ནི་བྦཱ་ན་མེ་ཝ ཝ་ད་ཏི ནཱ་མ་རཱུ་པ་སྶ ཨ་ན་ཝ་སེ་ས་ཏོ ཨུ་པ་རུ་ཛ྄ཛྷ་ན་སྶ ཨ་དྷི་པྤེ་ཏ་ཏྟཱ, ཏེ་ནཱ་ཧ ‘‘ཨ་ནུ་པྤཱ་ད་ཝ་སེ་ན ཨུ་པ་རུ་ཛ྄ཛྷ་ཏཱི’’ཏི. སོ་ཏཱ་པ་ཏྟི་མ་གྒ་ཉཱ་ཎེ་ནཱཏི ཀ་ཏྟ་རི, ཀ་ར་ཎེ ཝཱ ཀ་ར་ཎ་ཝ་ཙ་ནཾ. ནི་རོ་དྷེ་ནཱཏི པ་ན ཧེ་ཏུ་མྷི. ཨེ་ཏྠཱཏི ཨེ་ཏ་སྨིཾ ནི་བྦཱ་ནེ. སེ་ས་མེ་ཏྠ ཡཾ ཨ་ཏྠ་ཏོ ན ཝི་བྷ་ཏྟཾ, ཏཾ སུ་ཝི་ཉྙེ་ཡྻ་མེ་ཝ.
ཀེ་ཝ་ཊྚ་སུ་ཏྟ་ཝ་ཎྞ་ནཱ་ཡ ལཱི་ན་ཏྠ་པྤ་ཀཱ་ས་ནཱ.