༡༠. སུ་བྷ་སུ་ཏྟ་ཝ་ཎྞ་ནཱ
སུ་བྷ་མཱ་ཎ་ཝ་ཀ་ཝ་ཏྠུ་ཝ་ཎྞ་ནཱ
༤༤༤. ‘‘ཨ་ཙི་ར་པ་རི་ནི་བྦུ་ཏེ’’ཏི ས་ཏྠུ པ་རི་ནི་བྦུ་ཏ་བྷཱ་ཝ་སྶ ཙི་ར་ཀཱ་ལ་ཏཱ་པ་ཊི་ཀྑེ་པེ་ན ཨཱ་ས་ནྣ་ཏཱ ད་སྶི་ཏཱ, ཀཱ་ལ་པ་རི་ཙྪེ་དོ ན ད་སྶི་ཏོ་ཏི ཏཾ པ་རི་ཙྪེ་ད་ཏོ ད་སྶེ་ཏུཾ ‘‘པ་རི་ནི་བྦཱ་ན་ཏོ ཨུ་དྡྷཾ མཱ་ས་མ་ཏྟེ ཀཱ་ལེ’’ཏི ཝུ་ཏྟཾ. ཏ་ཏྠ མ་ཏྟ-གྒ་ཧ་ཎེ་ན ཀཱ་ལ་སྶ ཨ་ས་མྤུ་ཎྞ་ཏཾ ཛོ་ཏེ་ཏི. ཏུ་དི་ས་ཉྙི་ཏོ གཱ་མོ ནི་ཝཱ་སོ ཨེ་ཏ་སྶཱ་ཏི ཏོ་དེ་ཡྻོ. ཏཾ པ་ནེ་ས ཡ་སྨཱ སོ་ཎ་ད་ཎྜོ ཝི་ཡ ཙ་མྤཾ, ཀཱུ་ཊ་ད་ནྟོ ཝི་ཡ ཙ ཁཱ་ཎུ་མ་ཏཾ ཨ་ཛ྄ཛྷཱ་ཝ་ས་ཏི, ཏ་སྨཱ ཝུ་ཏྟཾ ‘‘ཏ་སྶ ཨ་དྷི་པ་ཏི་ཏྟཱ’’ཏི ཨི་སྶ་ར་བྷཱ་ཝ་ཏོ་ཏི ཨ་ཏྠོ. ས་མཱ་ཧཱ་རནྟི ས་ནྣི་ཙ་ཡཾ. པ་ཎྜི་ཏོ གྷ་ར་མཱ་ཝ་སེཏི ཡ་སྨཱ ཨ་པྤ་ཏ་ར་པྤ་ཏ་རེ་པི ཝ་ཡ་མཱ་ནེ བྷོ་གཱ ཁི་ཡ་ནྟི, ཨ་པྤ་ཏ་ར་པྤ་ཏ་རེ་པི ས་ཉྩི་ཡ་མཱ་ནེ ཝ་ཌྜྷ་ནྟི, ཏ་སྨཱ ཝི་ཉྙུ་ཛཱ་ཏི་ཀོ ཀི་ཉྩི ཝ་ཡཾ ཨ་ཀ་ཏྭཱ ཨཱ་ཡ་མེ་ཝ ཨུ་པྤཱ་དེ་ནྟོ གྷ་རཱ་ཝཱ་སཾ ཨ་ནུ་ཏི་ཊྛེ་ཡྻཱ་ཏི ལོ་བྷཱ་དེ་སི་ཏཾ པ་ཊི་པ་ཏྟིཾ ཨུ་པ་དི་ས་ཏི.
ཨ་དཱ་ན་མེ་ཝ སི་ཀྑཱ་པེ་ཏྭཱ ལོ་བྷཱ་བྷི་བྷཱུ་ཏ་ཏཱ་ཡ ཏ་སྨིཾ་ཡེ་ཝ གྷ་རེ སུ་ན་ཁོ ཧུ་ཏྭཱ ནི་བྦ་ཏྟི. ལོ་བྷ་ཝ་སི་ཀ་སྶ ཧི དུ་གྒ་ཏི པཱ་ཊི་ཀ་ངྑཱ. ཨ་ཏི་ཝི་ཡ པི་ཡཱ་ཡ་ཏི པུ་བྦ་པ་རི་ཙ་ཡེ་ན. པི་ཎྜཱ་ཡ པཱ་ཝི་སི སུ་བྷཾ མཱ་ཎ་ཝཾ ཨ་ནུ་གྒ་ཎྷི་ཏུ་ཀཱ་མོ. ནི་ར་ཡེ ནི་བྦ་ཏྟི་སྶ་སི ཀ་ཏོ་ཀཱ་ས་སྶ ཀ་མྨ་སྶ པ་ཊི་བཱ་ཧི་ཏུཾ ཨ་ས་ཀྐུ་ཎེ་ཡྻ་བྷཱ་ཝ་ཏོ.
བྲཱ་ཧྨ་ཎ་ཙཱ་རི་ཏྟ་སྶ བྷཱ་ཝི་ཏ་ཏཾ ས་ནྡྷཱ་ཡ, ཏ་ཐཱ པི་ཏ་རཾ ཨུ་ཀྐཾ་སེ་ནྟོ ཙ ‘‘བྲ་ཧྨ་ལོ་ཀེ ནི་བྦ་ཏྟོ’’ཏི ཨཱ་ཧ. ཏཾ པ་ཝ་ཏྟིཾ པུ་ཙྪཱིཏི སུ་ཏ་མེ་ཏཾ མ་ཡཱ ‘‘མ་ཡ྄ཧཾ པི་ཏཱ སུ་ན་ཁོ ཧུ་ཏྭཱ ནི་བྦ་ཏྟོ’’ཏི ཏུ་མྷེ་ཧི ཝུ་ཏྟཾ, ཀི་མི་དཾ ས་ཙྩ་ནྟི པུ་ཙྪི. ཏ་ཐེ་ཝ ཝ་ཏྭཱཏི ཡ་ཐཱ པུ་བྦེ སུ་ན་ཁ་སྶ ཝུ་ཏྟཾ, ཏ་ཐེ་ཝ ཝ་ཏྭཱ. ཨ་ཝི་སཾ་ཝཱ་ད་ན་ཏྠནྟི ས་ཙྩཱ་པ་ན་ཏྠཾ ‘‘ཏོ་དེ་ཡྻ་བྲཱ་ཧྨ་ཎོ སུ་ན་ཁོ ཧུ་ཏྭཱ ནི་བྦ་ཏྟོ’’ཏི ཨ་ཏྟ་ནོ ཝ་ཙ་ན་སྶ ཨ་ཝི་སཾ་ཝཱ་ད་ན་ཏྠཾ ཨ་ཝི་སཾ་ཝཱ་ད་བྷཱ་ཝ་སྶ ད་སྶ་ན་ཏྠ་ནྟི ཨ་ཏྠོ. ས་བྦཾ ད་སྶེ་སཱིཏི བུ་དྡྷཱ་ནུ་བྷཱ་ཝེ་ན སོ སུ་ན་ཁོ ཏཾ ས་བྦཾ ནེ་ཏྭཱ ད་སྶེ་སི, ན ཛཱ་ཏི་སྶ་ར་ཏཱ་ཡ. བྷ་ག་ཝ་ནྟཾ དི་སྭཱ བྷུ་ཀྐ་ར་ཎཾ པ་ན པུ་རི་མ་ཛཱ་ཏི་སི་དྡྷ་ཝཱ་ས་ནཱ་ཝ་སེ་ན. ཙུ་དྡ་ས པ་ཉྷེ པུ་ཙྪི་ཏྭཱཏི ‘‘དི་སྶ་ནྟི ཧི བྷོ གོ་ཏ་མ མ་ནུ་སྶཱ ཨ་པྤཱ་ཡུ་ཀཱ, དི་སྶ་ནྟི དཱི་གྷཱ་ཡུ་ཀཱ. དི་སྶ་ནྟི བ་ཝ྄ཧཱ་བཱ་དྷཱ, དི་སྶ་ནྟི ཨ་པྤཱ་བཱ་དྷཱ. དི་སྶ་ནྟི དུ་བྦ་ཎྞཱ, དི་སྶ་ནྟི ཝ་ཎྞ་ཝ་ནྟོ. དི་སྶ་ནྟི ཨ་པྤེ་ས་ཀྑཱ, དི་སྶ་ནྟི མ་ཧེ་ས་ཀྑཱ. དི་སྶ་ནྟི ཨ་པྤ་བྷོ་གཱ, དི་སྶ་ནྟི མ་ཧཱ་བྷོ་གཱ. དི་སྶ་ནྟི ནཱི་ཙ་ཀུ་ལཱི་ནཱ, དི་སྶ་ནྟི ཨུ་ཙྩཱ་ཀུ་ལཱི་ནཱ. དི་སྶ་ནྟི དུ་པྤ་ཉྙཱ, དི་སྶ་ནྟི པ་ཉྙཱ་ཝ་ནྟོ’’ཏི (མ. ནི. ༣.༢༨༩). ཨི་མེ ཙུ་དྡ་ས པ་ཉྷེ པུ་ཙྪི་ཏྭཱ, ཨ་ངྒ་སུ་བྷ་ཏཱ་ཡ ཀི་རེ་ས ‘‘སུ་བྷོ’’ཏི ནཱ་མཾ ལ་བྷི.
༤༤༥. ‘‘ཨེ་ཀཱ ཙ མེ ཀ་ངྑཱ ཨ་ཏྠཱི’’ཏི ཨི་མི་ནཱ ཨུ་པ་རི པུ་ཙྪི་ཡ་མཱ་ན་སྶ པ་ཉྷ་སྶ པ་གེ་ཝ ཏེ་ན ཨ་བྷི་ས་ངྑ་ཏ་བྷཱ་ཝཾ ད་སྶེ་ཏི. ཝི་ས་བྷཱ་ག་ཝེ་ད་ནཱཏི དུ་ཀྑ་ཝེ་ད་ནཱ. སཱ ཧི ཀུ་ས་ལ་ཀ་མྨ་ནི་བྦ་ཏྟེ ཨ་ཏྟ་བྷཱ་ཝེ ཨུ་པྤ་ཛྫ་ན་ཀ་སུ་ཁ་ཝེ་ད་ནཱ་པ་ཊི་པ་ཀྑ་བྷཱ་ཝ་ཏོ ‘‘ཝི་ས་བྷཱ་ག་ཝེ་ད་ནཱ’’ཏི. ཀཱ་ཡཾ གཱ་ལ༹ྷཱ ཧུ་ཏྭཱ བཱ་དྷ་ཏི པཱི་ལེ༹་ཏཱི་ཏི ‘‘ཨཱ་བཱ་དྷོ’’ཏི ཙ ཝུ་ཙྩ་ཏི. ཨེ་ཀ་དེ་སེ ཨུ་པྤ་ཛྫི་ཏྭཱཏི ས་རཱི་ར་སྶ ཨེ་ཀ་དེ་སེ ཨུ་ཊྛི་ཏཱ་པི ཨ་ཡ་པ་ཊྚེ་ན ཨཱ་བ་ནྡྷི་ཏྭཱ ཝི་ཡ ག་ཎྷཱ་ཏི ཨ་པ་རི་ཝ་ཏྟ་བྷཱ་ཝ་ཀ་ར་ཎ་ཏོ, ཨེ་ཏེ་ན བ་ལ་ཝ་རོ་གོ ཨཱ་བཱ་དྷོ ནཱ་མཱ་ཏི ད་སྶེ་ཏི. ཀི་ཙྪ་ཛཱི་ཝི་ཏ་ཀ་རོཏི ཨ་སུ་ཁ་ཛཱི་ཝི་ཏཱ་ཝ་ཧོ, ཨེ་ཏེ་ན དུ་བྦ་ལོ ཨ་པྤ་མ་ཏྟ་ཀོ རོ་གོ ཨཱ་ཏ་ངྐོ་ཏི ད་སྶེ་ཏི. ཨུ་ཊྛཱ་ནནྟི ས་ཡ་ན་ནི་ས་ཛྫཱ་དི་ཏོ ཨུ་ཊྛ་ཧ་ནཾ, ཏེ་ན ཡ་ཐཱ ཏ་ཐཱ ཨ་པ་རཱ་པ་རཾ ས་རཱི་ར་སྶ པ་རི་ཝ་ཏྟ་ནཾ ཝ་ད་ཏི. ག་རུ་ཀནྟི བྷཱ་རི་ཡཾ ཀི་ཙྪ་སི་དྡྷི་ཀཾ. ཀཱ་ཡེ བ་ལཾ ན ཧོ་ཏཱིཏི ཨེ་ཏྠཱ་པི ‘‘གི་ལཱ་ན་སྶེ་ཝཱ’’ཏི པ་དཾ ཨཱ་ནེ་ཏྭཱ ས་མྦ་ནྡྷི་ཏ་བྦཾ. ཧེ་ཊྛཱ ཙ་ཏཱུ་ཧི པ་དེ་ཧི ཨ་ཕཱ་སུ་ཝི་ཧཱ་རཱ་བྷཱ་ཝཾ པུ་ཙྪི་ཏྭཱ ཨི་དཱ་ནི ཕཱ་སུ་ཝི་ཧཱ་ར་ས་བྦྷཱ་ཝཾ པུ་ཙྪ་ཏི, ཏེ་ན ས་ཝི་སེ་སོ ཕཱ་སུ་ཝི་ཧཱ་རོ པུ་ཙྪི་ཏོ་ཏི ད་ཊྛ་བྦོ, ཨ་ས་ཏི་པི ཨ་ཏི་ས་ཡ་ཏྠ་ཛོ་ཏ་ནེ ས་དྡེ ཨ་ཏི་ས་ཡ་ཏྠ་སྶ ལ་བྦྷ་ན་ཏོ ཡ་ཐཱ ‘‘ཨ་བྷི་རཱུ་པཱ་ཡ དེ་ཡྻཾ དཱ་ཏ་བྦ’’ནྟི.
༤༤༧. ཀཱ་ལ་ཉྩ ས་མ་ཡ་ཉྩ ཨུ་པཱ་དཱ་ཡཱཏི. ཨེ་ཏྠ ཀཱ་ལོ ནཱ་མ ཨུ་པ་ས་ངྐ་མ་ན་སྶ ཡུ་ཏྟ་པ་ཏྟ་ཀཱ་ལོ. ས་མ་ཡོ ནཱ་མ ཏ་སྶེ་ཝ པ་ཙྩ་ཡ་སཱ་མ་གྒཱི, ཨ་ཏྠ་ཏོ ཏ་ཛྫཾ ས་རཱི་ར་བ་ལ་ཉྩེ་ཝ ཏ་པྤ་ཙྩ་ཡ་པ་རི་སྶ་ཡཱ་བྷཱ་ཝོ ཙ. ཨུ་པཱ་དཱ་ནཾ ནཱ་མ ཉཱ་ཎེ་ན ཏེ་སཾ ག་ཧ་ཎཾ ས་ལླ་ཀྑ་ཎ་ནྟི ད་སྶེ་ཏུཾ ‘‘ཀཱ་ལ་ཉྩཱ’’ཏི་ཨཱ་དི ཝུ་ཏྟཾ. ཕ་རི་སྶ་ཏཱིཏི ཝ་ཌྜྷི་སྶ་ཏི.
༤༤༨. ཙེ་ཏི་ཡ་ར་ཊྛེཏི ཙེ་ཏི་ར་ཊྛེ. ཡ-ཀཱ་རེ་ན ཧི པ་དཾ ཝ་ཌྜྷེ་ཏྭཱ ཝུ་ཏྟཾ. ཙེ་ཏི་ར་ཊྛ་ཏོ ཨ་ཉྙཾ ཝི་སུཾ་ཡེ་ཝེ་ཀཾ ར་ཊྛ་ནྟི ཙ ཝ་ད་ནྟི. མ་ར་ཎ་པ་ཊི་སཾ་ཡུ་ཏྟནྟི མ་ར་ཎཾ ནཱ་མ ཏཱ་དི་སཱ་ནཾ རོ་ག ཝ་སེ་ནེ་ཝ ཧོ་ཏཱི་ཏི ཡེ་ན རོ་གེ་ན ཏཾ ཛཱ་ཏཾ, ཏ་སྶ ས་རཱུ་པ་པུ་ཙྪཱ, ཀཱ་ར་ཎ་པུ་ཙྪཱ, མ་ར་ཎ་ཧེ་ཏུ་ཀ་ཙི་ཏྟ་ས་ནྟཱ་པ་པུ་ཙྪཱ, ཏ་སྶ ཙ ས་ནྟཱ་པ་སྶ ས་བྦ་ལོ་ཀ་སཱ་དྷཱ་ར་ཎ་ཏཱ, ཏ་ཐཱ མ་ར་ཎ་སྶ ཙ ཨ་པྤ་ཏི་ཀཱ་ར་ཏཱ་ཏི ཨེ་ཝཾ ཨཱ་དི་ནཱ མ་ར་ཎ་པ་ཊི་སཾ་ཡུ་ཏྟཾ ས་མྨོ་ད་ནཱི་ཡཾ ཀ་ཐཾ ཀ་ཐེ་སཱི་ཏི ད་སྶེ་ཏུཾ ‘‘བྷོ ཨཱ་ན་ནྡཱ’’ཏི་ཨཱ་དི ཝུ་ཏྟཾ. ན ར་ནྡྷ་ག་ཝེ་སཱི མཱ་རོ ཝི་ཡ, ན ཝཱི་མཾ་ས་ནཱ་དྷི་པྤཱ་ཡོ ཨུ་ཏྟ་ར་མཱ་ཎ་ཝོ ཝི་ཡཱ་ཏི ཨ་དྷི་པྤཱ་ཡོ. ཡེ་སུ དྷ་མྨེ་སཱུཏི ཝི་མོ་ཀྑུ་པཱ་ཡེ་སུ ནི་ཡྻཱ་ན་དྷ་མྨེ་སུ. དྷ་ར་ནྟཱིཏི ཏི་ཊྛ་ནྟི, པ་ཝ་ཏྟ་ནྟཱི་ཏི ཨ་ཏྠོ.
༤༤༩. ཨ་ཏྠ་པྤ་ཡུ་ཏྟ་ཏཱ་ཡ ས་དྡ་པ་ཡོ་ག་སྶ ས་དྡ་པྤ་བ་ནྡྷ་ལ་ཀྑ་ཎཱ་ནི ཏཱི་ཎི པི་ཊ་ཀཱ་ནི ཏ་ད་ཏྠ་བྷཱུ་ཏེ་ཧི སཱི་ལཱ་དཱི་ཧི དྷ་མྨ་ཀྑ་ནྡྷེ་ཧི ས་ངྒ་ཡ྄ཧ་ནྟཱི་ཏི ཝུ་ཏྟཾ ‘‘ཏཱི་ཎི པི་ཊ་ཀཱ་ནི ཏཱི་ཧི ཁ་ནྡྷེ་ཧི ས་ངྒ་ཧེ་ཏྭཱ’’ཏི. ས་ངྑི་ཏྟེ་ན ཀ་ཐི་ཏནྟི ‘‘ཏི་ཎྞཾ ཁ་ནྡྷཱ་ན’’ནྟི ཨེ་ཝཾ ག་ཧ་ཎ་ཏོ སཱ་མ་ཉྙ་ཏོ ཙཱ་ཏི ས་ངྑེ་པེ་ནེ་ཝ ཀ་ཐི་ཏཾ. ‘‘ཀ་ཏ་མེ་སཾ ཏི་ཎྞ’’ནྟི ཨ་ཡཾ ཨ་དི་ཊྛ་ཛོ་ཏ་ནཱ པུ་ཙྪཱ, ན ཀ་ཐེ་ཏུ་ཀ་མྱ་ཏཱ པུ་ཙྪཱ་ཏི ཝུ་ཏྟཾ ‘‘ཝི་ཏྠཱ་ར་ཏོ པུ་ཙྪི་སྶཱ་མཱི ‘ཏི ཙི་ནྟེ་ཏྭཱ ‘ཀ་ཏ་མེ་སཾ ཏི་ཎྞ’ནྟི ཨཱ་ཧཱ’’ཏི. ཀ་ཐེ་ཏུ་ཀ་མྱ་ཏཱ་བྷཱ་ཝེ པ་ན་སྶ ཐེ་ར་སྶ ཝ་ཙ་ན་ཏཱ སི་ཡཱ.
སཱི་ལ་ཀྑ་ནྡྷ་ཝ་ཎྞ་ནཱ
༤༥༠-༤༥༣. སཱི་ལ་ཀྑ་ནྡྷ་སྶཱཏི ཨེ་ཏྠ ཨི་ཏི-ས་དྡོ ཨཱ་དི་ཨ་ཏྠོ, པ་ཀཱ་ར་ཏྠོ ཝཱ, ཏེ་ན ‘‘ཨ་རི་ཡ་སྶ ས་མཱ་དྷི་ཀྑ་ནྡྷ་སྶ…པེ… པ་ཏི་ཊྛཱ་པེ་སཱི’’ཏི ཨ་ཡཾ ཨེ་ཏྟ་ཀོ པཱ་ཋོ ད་སྶི་ཏོ་ཏི ད་ཊྛ་བྦཾ ཏེ་ནཱ་ཧ ‘‘ཏེ་སུ ད་སྶི་ཏེ་སཱུ’’ཏི, ཨུ་དྡེ་ས་ཝ་སེ་ནཱ་ཏི ཨ་དྷི་པྤཱ་ཡོ. བྷ་ག་ཝ་ཏཱ ཝུ་ཏྟ་ན་ཡེ་ནེ་ཝཱཏི སཱ་མ་ཉྙ་ཕ་ལ་དེ་ས་ནཱ་དཱི་སུ བྷ་ག་ཝ་ཏཱ དེ་སི་ཏ་ན་ཡེ་ནེ་ཝ, ཏེ་ན་སྶ སུ་ཏྟ་སྶ ས་ཏྠུ་བྷཱ་སི་ཏ་བྷཱ་ཝཾ ཛི་ན་ཝ་ཙ་ན་བྷཱ་ཝཾ ད་སྶེ་ཏི. སཱ་ས་ནེ ན སཱི་ལ་མེ་ཝ སཱ་རོཏི ཨ་རི་ཡ་མ་གྒ་སཱ་རེ བྷ་ག་ཝ་ཏོ སཱ་ས་ནེ ཡ་ཐཱ ད་སྶི་ཏཾ སཱི་ལཾ སཱ་རོ ཨེ་ཝ ན ཧོ་ཏི སཱ་ར་ཝ་ཏོ མ་ཧ་ཏོ རུ་ཀྑ་སྶ པ་པ་ཊི་ཀ་ཊྛཱ་ནི་ཡ་ཏྟཱ. ཡ་དི ཨེ་ཝཾ ཀ་སྨཱ ཨི་དྷ ག་ཧི་ཏ་ནྟི ཨཱ་ཧ ‘‘ཀེ་ཝ་ལ་ཉྷེ་ཏཾ པ་ཏི་ཊྛཱ་མ་ཏྟ་ཀ་མེ་ཝཱ’’ཏི. ཛྷཱ་ནཱ་དི་ཨུ་ཏྟ་རི་མ་ནུ་སྶ་དྷ་མྨེ ཨ་དྷི་ག་ནྟུ་ཀཱ་མ་སྶ ཨ་དྷི་ཊྛཱ་ན་མ་ཏྟཾ ཏ་ཏྠ ཨ་པྤ་ཏི་ཊྛི་ཏ་སྶ ཏེ་སཾ ཨ་ས་མྦྷ་ཝ་ཏོ. ཨ་ཐ ཝཱ ན སཱི་ལ་མེ་ཝ སཱ་རོཏི ཀཱ་མ་ཉྩེ་ཏྠ སཱ་ས་ནེ ‘‘མ་གྒ་སཱི་ལཾ, ཕ་ལ་སཱི་ལ’’ནྟི ཨི་དཾ ལོ་ཀུ་ཏྟ་ར་སཱི་ལ་མྤི སཱ་ར་མེ་ཝ, ཏ་ཐཱ་པི ན སཱི་ལ་ཀྑ་ནྡྷོ ཨེ་ཝ སཱ་རོ ཨ་ཐ ཁོ ས་མཱ་དྷི་ཀྑ་ནྡྷོ་པི པ་ཉྙཱ་ཀྑ་ནྡྷོ་པི སཱ་རོ ཨེ་ཝཱ་ཏི ཨེ་ཝ་མེ་ཏྠ ཨ་ཏྠོ ད་ཊྛ་བྦོ. པུ་རི་མོ ཨེ་ཝ སཱ་རོ, ཏེ་ནཱ་ཧ ‘‘ཨི་ཏོ ཨུ་ཏྟ་རཱི’’ཏི་ཨཱ་དི.
ས་མཱ་དྷི་ཀྑ་ནྡྷ་ཝ་ཎྞ་ནཱ
༤༥༤. ཀ་སྨཱ པ་ནེ་ཏྠ ཐེ་རོ ས་མཱ་དྷི་ཀྑ་ནྡྷཾ པུ་ཊྛོ ཨི་ནྡྲི་ཡ་སཾ་ཝ་རཱ་དི་ཀེ ཝི་སྶ་ཛྫེ་སི, ན་ནུ ཨེ་ཝཾ ས་ནྟེ ཨ་ཉྙཾ པུ་ཊྛོ ཨ་ཉྙཾ བྱཱ་ཀ་རོ་ནྟོ ཨ་མྦཾ པུ་ཊྛོ ལ་བུ་ཛཾ བྱཱ་ཀ་རོ་ནྟོ ཝི་ཡ ཧོ་ཏཱི་ཏི ཨཱི་དི་སཱི ཙོ་ད་ནཱ ཨི་དྷ ཨ་ནོ་ཀཱ་སཱ་ཏི ད་སྶེ་ནྟོ ‘‘ཀ་ཐ་ཉྩ མཱ་ཎ་ཝ བྷི་ཀྑུ…པེ… ས་མཱ་དྷི་ཀྑ་ནྡྷཾ ད་སྶེ་ཏུ་ཀཱ་མོ ཨཱ་ར་བྷཱི’’ཏི ཨཱ་ཧ, ཏེ་ནེ་ཏྠ ཨི་ནྡྲི་ཡ་སཾ་ཝ་རཱ་ད་ཡོ་པི ས་མཱ་དྷི་ཨུ་པ་ཀཱ་ར་ཏཾ ཨུ་པཱ་དཱ་ཡ ས་མཱ་དྷི་ཀྑ་ནྡྷ་པ་ཀྑི་ཀཱ་ནི ཨུ་དྡི་ཊྛཱ་ནཱི་ཏི ད་སྶེ་ཏི རཱུ་པ་ཛ྄ཛྷཱ་ནཱ་ནེ་ཝ ཨཱ་ག་ཏཱ་ནི, ན ཨ་རཱུ་པ་ཛ྄ཛྷཱ་ནཱ་ནི རཱུ་པཱ་ཝ་ཙ་ར་ཙ་ཏུ་ཏྠ་ཛ྄ཛྷཱ་ན་དེ་ས་ནཱ་ན་ནྟ་རཾ ཨ་བྷི་ཉྙཱ་དེ་ས་ནཱ་ཡ ཨ་ཝ་ས་རོ་ཏི ཀ་ཏྭཱ. རཱུ་པཱ་ཝ་ཙ་ར་ཙ་ཏུ་ཏྠ་ཛ྄ཛྷཱ་ན་པཱ་དི་ཀཱ ཧི ས་པ་རི་བྷ་ཎྜཱ ཚ་པི ཨ་བྷི་ཉྙཱ་ཡོ. ལོ་ཀི་ཡཱ ཨ་བྷི་ཉྙཱ པ་ན སི་ཛ྄ཛྷ་མཱ་ནཱ ཡ་སྨཱ ཨ་ཊྛ་སུ ས་མཱ་པ་ཏྟཱི་སུ ཙུ་དྡ་ས་ཝི་དྷེ་ན ཙི་ཏྟ་པ་རི་ད་མ་ནེ་ན ཝི་ནཱ ན ཨི་ཛ྄ཛྷ་ནྟི, ཏ་སྨཱ ཨ་བྷི་ཉྙཱ་སུ དེ་སི་ཡ་མཱ་ནཱ་སུ ཨ་རཱུ་པ་ཛ྄ཛྷཱ་ནཱ་ནི་པི དེ་སི་ཏཱ་ནེ་ཝ ཧོ་ནྟི ནཱ་ན་ནྟ་རི་ཡ་བྷཱ་ཝ་ཏོ, ཏེ་ནཱ་ཧ ‘‘ཨཱ་ནེ་ཏྭཱ པ་ན དཱི་པེ་ཏ་བྦཱ་ནཱི’’ཏི. ཝུ་ཏྟ་ན་ཡེ་ན དེ་སི་ཏཱ་ནེ་ཝ ཀ་ཏྭཱ སཾ་ཝ་ཎྞ་ཀེ་ཧི པ་ཀཱ་སེ་ཏ་བྦཱ་ནཱི་ཏི ཨ་ཏྠོ. ཨ་ཊྛ་ཀ་ཐཱ་ཡཾ པ་ན ‘‘ཙ་ཏུ་ཏྠ་ཛ྄ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏཱི’’ཏི ཨི་མི་ནཱ་ཝ ཨ་རཱུ་པ་ཛ྄ཛྷཱ་ན་མྤི ས་ངྒ་ཧི་ཏ་ནྟི ད་སྶེ་ཏུཾ ‘‘ཙ་ཏུ་ཏྠ་ཛ྄ཛྷཱ་ནེ་ན ཧཱི’’ཏི་ཨཱ་དི ཝུ་ཏྟཾ. ཙ་ཏུ་ཏྠ་ཛ྄ཛྷཱ་ན་ཉྷི རཱུ་པ་ཝི་རཱ་ག་བྷཱ་ཝ་ནཱ་ཝ་སེ་ན པ་ཝ་ཏྟཾ ‘‘ཨ་རཱུ་པ་ཛ྄ཛྷཱ་ན’’ནྟི ཝུ་ཙྩ་ཏཱི་ཏི.
༤༧༡-༤༨༠. ན ཙི་ཏྟེ་ཀ་གྒ་ཏཱ་མ་ཏྟ་ཀེ་ནེ་ཝཱཏི ཨེ་ཏྠ ཧེ་ཊྛཱ ཝུ་ཏྟ་ན་ཡཱ་ནུ་སཱ་རེ་ན ཨ་ཏྠོ ཝེ་དི་ཏ་བྦོ. ལོ་ཀི་ཡ་སྶ ས་མཱ་དྷི་ཀྑ་ནྡྷ་སྶ ཨ་དྷི་པྤེ་ཏ་ཏྟཱ ‘‘ན ཙི་ཏྟེ…པེ… ཨ་ཏྠཱི’’ཏི ཝུ་ཏྟཾ. ཨ་རི་ཡ-ས་དྡོ ཙེ་ཏྠ སུ་དྡྷ་པ་རི་ཡཱ་ཡོ, ན ལོ་ཀུ་ཏྟ་ར་པ་རི་ཡཱ་ཡོ. ཏ་ཐཱ ཧེ་ཊྛཱ་པི ལོ་ཀི་ཡཱ་བྷི་ཉྙཱ་པ་ཊི་ས་མྦྷི་དཱ་ཧི ཝི་ནཱ་ཝ ཨ་ར་ཧ་ཏྟེ ཨ་དྷི་ག་ཏེ ན་ཏྠེ་ཝ ཨུ་ཏྟ་རིཾ་ཀ་ར་ཎཱི་ཡ་ནྟི ས་ཀྐཱ ཝ་ཏྟུཾ ཡ་ད་ཏྠཾ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏི, ཏ་སྶ སི་དྡྷ་ཏྟཱ. ཨི་དྷ པ་ན ལོ་ཀི་ཡཱ་བྷི་ཉྙཱ་པི ཨཱ་ག་ཏཱ ཨེ་ཝ. སེ་སཾ སུ་ཝི་ཉྙེ་ཡྻ་མེ་ཝ.
སུ་བྷ་སུ་ཏྟ་ཝ་ཎྞ་ནཱ་ཡ ལཱི་ན་ཏྠ་པྤ་ཀཱ་ས་ནཱ.