༢. ཧེ་ཏུ་ཙ་ཏུ་ཀྐ་ཝ་ཎྞ་ནཱ

༢༤༤. ཨ་བྷཱ་ཝ་ཏོཏི བྷཱ་ཝཱ་བྷཱ་ཝ་ཏོ. ཡ་ཉྷི ཛཱ་ཏི་ཀྑ་ཎ་མ་ཏྟེ་ཡེ་ཝ བྷ་ཝ་ཏི, ན ཏ་ཏོ པ་རཾ, ཏཾ ཛཱ་ཏི་ཡཱ ཨ་ཝི་ག་ཏ་པ་ཙྩ་ཡོ སི་ཡཱ ཨ་ཝི་ག་ཏ་པ་ཙྩ་ཡ་ནི་ཡ་མ་ས་བྦྷཱ་ཝ་ཏོ. བྷ་ཝོ པ་ན ཡ་སྨཱ ཛཱ་ཏི་ཀྑ་ཎ་ཏོ པ་ར་མྤི བྷ་ཝ་ཏི, ཏ་སྨཱ ན སོ ཏ་སྶཱ ཨ་ཝི་ག་ཏ་པ་ཙྩ་ཡོ ཧོ་ཏི. ཏེ་ན ཝུ་ཏྟཾ ‘‘ཏ་ཏོ ཨུ་དྡྷཾ བྷཱ་ཝ་ཏོ་ཏི ཨ་ཏྠོ’’ཏི. བྷ་ཝེཏི བྷ་ཝ་པ་དེ, བྷ་ཝེ ཝཱ ནི་པྥཱ་དེ་ཏ་བྦེ. ཨེ་ས ན་ཡོ ཛཱ་ཏི་ཨཱ་དཱི་སཱུཏི ཨེ་ཏྠཱ་པི. ‘‘ཡ་ཐཱ པ་ནཱ’’ཏི་ཨཱ་དི་ནཱ ‘‘ཨ་ཝི་ག་ཏ་པ་ཙྩ་ཡ་སྶ ཨ་བྷཱ་ཝ་ཏོ, ནི་ཡ་མཱ་བྷཱ་ཝ་ཏོ ཙཱ’’ཏི ཝུ་ཏྟཱ་ནཾ ཧེ་ཏཱུ་ནཾ ཝུ་ཏྟ་ན་ཡེ་ན ཨ་བྱཱ་པི་བྷཱ་ཝ་ཝི་བྷཱ་ཝ་ནེ་ན ཨ་ཀཱ་ར་ཎ་ཏཾ ད་སྶེ་ཏི ཨ་ཡཱ་ཝ་བྷཱ་ཝི་ནོ པ་ཙྩ་ཡུ་པྤ་ནྣ་སྶ, པ་ཙྩ་ཡ་དྷ་མྨ་སྶ ཙ ཨ་ཝི་ག་ཏ་པ་ཙྩ་ཡ་བྷཱ་ཝ་ད་སྶ་ན་ཏོ. ས་ངྑཱ་ར་ཀྑ་ནྡྷེཏི་ཨཱ་དི མ་གྒ་སོ་དྷ་ན་ཝ་སེ་ན ཝུ་ཏྟཾ. ཏ་སྶ པ་རི་ཧཱ་རཾ ས་ཡ་མེ་ཝ ཝ་ད་ཏི. སོ ཁ་ཎོ ཨེ་ཏ་སྶ ཨ་ཏྠཱི་ཏི ཏ་ངྑ་ཎི་ཀོ, ན ཏ་ངྑ་ཎི་ཀོ ཨ་ཏ་ངྑ་ཎི་ཀོ, ཏ་སྶ ས་བྦྷཱ་ཝཱ, ཨ་ཡཱ་ཝ་བྷཱ་ཝི་ཀ་ས་བྦྷཱ་ཝཱ་ཏི ཨ་ཏྠོ. ཡ་ཐཱ པ་ན ཧེ་ཏཱུ ཧོ་ནྟི, ཏཾ ད་སྶེ་ཏུཾ ‘‘ས་ངྑ་ཏ་ལ་ཀྑ་ཎཱ་ནཾ པ་ནཱ’’ཏི་ཨཱ་དི་མཱ་ཧ.

ཨེ་ཝནྟི ཨེ་ཝཾ ཡ་ཐཱ་ཝུ་ཏྟ་ན་ཡེ ས་ཏི, ཨེ་ཝཾ ས་ནྟེ་ཏི ཨ་ཏྠོ. ‘‘ན ཧི…པེ… ཨ་ཏྠཱི’’ཏི ཨི་མི་ནཱ ཛཱ་ཏི་ཨཱ་དཱི་ནཾ ཨ་ཝི་ག་ཏ་པ་ཙྩ་ཡ་ཝ་སེ་ན པ་ཙྩ་ཡུ་པྤ་ནྣ་བྷཱ་ཝོ ཝི་ཡ པ་ཙྩ་ཡ་བྷཱ་ཝོ་པི ན་ཏྠཱི་ཏི ད་སྶེ་ཏི. ཏ་ཏྠ ཀཱ་ར་ཎ་མཱ་ཧ ‘‘ཨ་ས་བྷཱ་ཝ་དྷ་མྨ་ཏྟཱ’’ཏི.

ཀ་ཐཾ པ་ན ཨ་ས་བྷཱ་ཝ་དྷ་མྨཱ་ནཾ ཛཱ་ཏི་ཨཱ་དཱི་ནཾ པ་ཙྩ་ཡུ་པྤ་ནྣ་ཏཱ, པ་ཙྩ་ཡ་ཏཱ ཙཱ་ཏི ཨཱ་ཧ ‘‘ཛཱ་ཡ་མཱ་ནཱ་ནཾ པ་ནཱ’’ཏི་ཨཱ་དི. ཏ་སྶཱཏི ཛཱ་ཏི་ཛ་རཱ་མ་ར་ཎ་སྶ. ཝ་ཏྟ་བྦ་པ་དེ་སོཏི ‘‘ཋ་པེ་ཏྭཱ’’ཏི ཝ་ཏྟ་བྦ་པ་དེ་སོ. ཀོ པ་ན སོ་ཏི? ཡ་ཐཱ་ཝུ་ཏྟཾ ནཱ་མཾ, ནཱ་མ་རཱུ་པ་ཉྩ ས་ངྑཱ་ར་ཀྑ་ནྡྷེ་ན རཱུ་པ་ཀྑ་ནྡྷེ་ན ཙ ཛ་རཱ་མ་ར་ཎཱ་ནཾ ས་ངྒ་ཧི་ཏ་ཏྟཱ. ‘‘ཡོ བྷ་ཝོ ཛཱ་ཏི་ཡཱ པ་ཙྩ་ཡོ’’ཏི ཨེ་ཏེ་ན བྷ་ཝ་ས་ངྒ་ཧི་ཏཱ་ནི་པི ཛཱ་ཏི་ཨཱ་དཱི་ནི ཛཱ་ཏི་ཡཱ ཨ་པྤ་ཙྩ་ཡ་ཏྟཱ ཨེ་ཝ ‘‘ཋ་པེ་ཏྭཱ’’ཏི ན ཝུ་ཏྟཱ་ནཱི་ཏི ད་སྶེ་ཏི, པ་ཙྩ་ཡ་བྷཱ་ཝཱ་ས་ངྐཱ ཨེ་ཝ ནེ་སཾ ཏ་སྶཱ ན་ཏྠཱི་ཏི ཨ་དྷི་པྤཱ་ཡོ. ཏེ་ནེ་ཝ ཋ་པེ་ཏ་བྦ་ག་ཧེ་ཏ་བྦ་ཝི་སེ་སེ ས་ཏཱིཏི སཱ་ས་ངྐཾ ཝ་ད་ཏི.

ཧེ་ཏུ་ཙ་ཏུ་ཀྐ་ཝ་ཎྞ་ནཱ ནི་ཊྛི་ཏཱ.