༢. ཨཱ་ཡུ་པྤ་མཱ་ཎ་ཝ་ཎྞ་ནཱ
༡༠༢༦. སུ་པ་རི་མ་ཛྫི་ཏ་ཀ་ཉྩ་ནཱ་དཱ་སཾ ཝི་ཡ སོ་བྷ་ཏི ཝི་ཛྫོ་ཏ་ཏཱི་ཏི སུ་བྷོ, ས་རཱི་རོ་བྷཱ་སོ, ཏེ་ན སུ་བྷེ་ན ཀི་ཎྞཱ ཝི་ཀི་ཎྞཱ་ཏི སུ་བྷ་ཀི་ཎྞཱ.
༡༠༢༧. ཏཾ་ཏཾ་མ་ན་སི་ཀཱ་རནྟི པ་རི་ཏྟ་པ་ཐ་ཝཱི་ཀ་སི་ཎཱ་དི་ག་ཏ་མ་ན་སི་ཀཱ་རཾ. ཨ་པྤ་ནཱ་ཀྑ་ཎེ་པཱིཏི པི-ས་དྡེ་ན པུ་བྦ་བྷཱ་གཾ ས་མྤི་ཎྜེ་ཏི. ཚ་ནྡ་ནཾ ཨཱ་ར་མྨ་ཎ་པ་རི་ཡེ་ས་ནཾ ཚ་ནྡོ, ཀ་ཏྟུ་ཀ་མྱ་ཏཱ་ཚ་ནྡོ. པ་ཎི་དྷཱ་ནཾ ཙི་ཏྟ་ཊྛ་པ་ནཱ པ་ཎི་དྷི, ས་ཉྙཱ་ཝི་རཱ་གཱ་དཱི་ཧི ཨཱ་ར་མྨ་ཎ་སྶ ཝི་སེ་ས་ནཾ ཏ་ཐཱ་པ་ཝ་ཏྟཱ་ཡ བྷཱ་ཝ་ནཱ་ཡ ཨཱ་ར་མྨ་ཎ་ཀ་ར་ཎ་མེ་ཝ.
ཝི་པུ་ལཾ ཝུ་ཙྩ་ཏི མ་ཧ་ནྟཾ, ས་ནྟ་བྷཱ་ཝོ་པི མ་ཧ་ནཱི་ཡ་ཏཱ་ཡ མ་ཧ་ནྟ་མེ་ཝཱ་ཏི ཨཱ་ཧ ‘‘ཝི་པུ་ལཱ ཕ་ལཱ་ཏི ཝི་པུ་ལ་ས་ནྟ་སུ་ཁཱ་ཡུ་ཝ་ཎྞཱ་དི་ཕ་ལཱ’’ཏི.
༡༠༢༨. ཡཾ ཙཱ་ཏུ་མ་ཧཱ་རཱ་ཛི་ཀཱ་ནཾ ཨཱ་ཡུ་པྤ་མཱ་ཎཾ, ས་ཉྫཱི་ཝེ ཨེ་སོ ཨེ་ཀོ ར་ཏྟི་དི་ཝོ, ཏཱ་ཡ ར་ཏྟི་ཡཱ ཏིཾ་ས ར་ཏྟི་ཡོ མཱ་སོ, ཏེ་ན མཱ་སེ་ན དྭཱ་ད་ས་མཱ་སི་ཀོ སཾ་ཝ་ཙྪ་རོ, ཏེ་ན སཾ་ཝ་ཙྪ་རེ་ན པ་ཉྩ ཝ་སྶ་ས་ཏཱ་ནི ས་ཉྫཱི་ཝེ ཨཱ་ཡུ་པྤ་མཱ་ཎཾ. ཡཾ ཏཱ་ཝ་ཏིཾ་སཱ་ནཾ ཨཱ་ཡུ་པྤ་མཱ་ཎཾ, ཨེ་སོ ཀཱ་ལ༹་སུ་ཏྟེ ཨེ་ཀོ ར་ཏྟི་དི་ཝོ…པེ… ཏེ་ན སཾ་ཝ་ཙྪ་རེ་ན ཝ་སྶ་ས་ཧ་སྶཾ ཀཱ་ལ༹་སུ་ཏྟེ ཨཱ་ཡུ་པྤ་མཱ་ཎཾ. ཡཾ ཡཱ་མཱ་ནཾ ཨཱ་ཡུ་པྤ་མཱ་ཎཾ, ཨེ་སོ ས་ངྒྷཱ་ཏེ ཨེ་ཀོ ར་ཏྟི་དི་ཝོ…པེ… ཏེ་ན སཾ་ཝ་ཙྪ་རེ་ན དྭེ ཝ་སྶ་ས་ཧ་སྶཱ་ནི ས་ངྒྷཱ་ཏེ ཨཱ་ཡུ་པྤ་མཱ་ཎཾ. ཡཾ ཏུ་སི་ཏཱ་ནཾ ཨཱ་ཡུ་པྤ་མཱ་ཎཾ, རོ་རུ་ཝེ ཨེ་སོ ཨེ་ཀོ ར་ཏྟི་དི་ཝོ…པེ… ཏེ་ན སཾ་ཝ་ཙྪ་རེ་ན ཙ་ཏྟཱ་རི ཝ་སྶ་ས་ཧ་སྶཱ་ནི རོ་རུ་ཝེ ཨཱ་ཡུ་པྤ་མཱ་ཎཾ. ཡཾ ནི་མྨཱ་ན་ར་ཏཱི་ནཾ ཨཱ་ཡུ་པྤ་མཱ་ཎཾ, མ་ཧཱ་རོ་རུ་ཝེ ཨེ་སོ ཨེ་ཀོ ར་ཏྟི་དི་ཝོ…པེ… ཏེ་ན སཾ་ཝ་ཙྪ་རེ་ན ཨ་ཊྛ ཝ་སྶ་ས་ཧ་སྶཱ་ནི མ་ཧཱ་རོ་རུ་ཝེ ཨཱ་ཡུ་པྤ་མཱ་ཎཾ. ཡཾ པ་ར་ནི་མྨི་ཏ་ཝ་ས་ཝ་ཏྟཱི་ནཾ དེ་ཝཱ་ནཾ ཨཱ་ཡུ་པྤ་མཱ་ཎཾ, ཏཱ་པ་ནེ ཨེ་སོ ཨེ་ཀོ ར་ཏྟི་དི་ཝོ…པེ… ཏེ་ན སཾ་ཝ་ཙྪ་རེ་ན སོ་ལ༹་ས ཝ་སྶ་ས་ཧ་སྶཱ་ནི ཏཱ་པ་ནེ ཨཱ་ཡུ་པྤ་མཱ་ཎཾ. མ་ཧཱ་ཏཱ་པ་ནེ ཨུ་པ་ཌྜྷ་ནྟ་ར་ཀ་པྤོ. ཨ་ཝཱི་ཙི་ཡཾ ཨེ་ཀོ ཨ་ནྟ་ར་ཀ་པྤོ ཙ ཨཱ་ཡུ་པྤ་མཱ་ཎ་ནྟི ཝ་ད་ནྟི. དེ་ཝཱ་ནཾ ཨ་དྷི་མུ་ཏྟ་ཀཱ་ལ་ཀི་རི་ཡཱ ཝི་ཡ ཏཱ་དི་སེ་ན པུ་ཉྙ་བ་ལེ་ན ཨ་ནྟ་རཱ་པི མ་ར་ཎཾ ཧོ་ཏཱི་ཏི ‘‘ཀ་མྨ་མེ་ཝ པ་མཱ་ཎ’’ནྟི ཝུ་ཏྟ་ནྟི ཝེ་དི་ཏ་བྦཾ. ཨེ་ཝ་ཉྩ ཀ་ཏྭཱ ཨ་བྦུ་དཱ་དི་ཨཱ་ཡུ་པ་རི་ཙྪེ་དོ་པི ཡུ་ཏྟ་ཏ་རོ ཧོ་ཏཱི་ཏི.
ཀིཾ ཛྷཱ་ནནྟི ཨ་ཊྛ་སུ ཛྷཱ་ནེ་སུ ཀ་ཏ་རཾ ཛྷཱ་ནཾ. བྷ་ཝ་སཱི་སཱ་ནཱིཏི བྷ་ཝ་གྒཱ་ནི, པུ་ཐུ་ཛྫ་ན་བྷ་ཝ་གྒཾ ཨ་རི་ཡ་བྷ་ཝ་གྒཾ ས་བྦ་བྷ་ཝ་གྒ་ནྟི ཝེ་ཧ་པྥ་ལཱ་དཱི་ནཾ ས་མ་ཉྙཱ. ཀ་སྶ་ཙི ས་ཏྟཱཏི པུ་ཐུ་ཛྫ་ན་སྶ, ཀ་སྶ་ཙི པ་ཉྩཱཏི སོ་ཏཱ་པ་ནྣ་སྶ, ས་ཀ་དཱ་གཱ་མི་ནོ ཙ, ཀ་སྶ་ཙི ཏ་ཡོཏི ཨ་ནཱ་གཱ་མི་ནོ ཝ་སེ་ན ཝུ་ཏྟཾ. ཏ་སྨཱ སོ བྲ་ཧྨ་ཀཱ་ཡི་ཀཱ་དཱི་ཧི ཙུ་ཏོ ཨ་རཱུ་པཾ ཨུ་པ་པ་ཛྫ་ནྟོ ཝེ་དི་ཏ་བྦོ. ‘‘ན་ཝ་སུ བྲ་ཧྨ་ལོ་ཀེ་སུ ནི་བྦ་ཏྟ་ཨ་རི་ཡ་སཱ་ཝ་ཀཱ་ནཾ ཏ་ཏྲཱུ་པ་པ་ཏྟི་ཡེ་ཝ ཧོ་ཏི, ན ཧེ་ཊྛཱུ་པ་པ་ཏྟཱི’’ཏི (ཝི་བྷ. ཨ་ཊྛ. ༡༠༢༨) ཨ་ཡཾ ཨ་ཊྛ་ཀ་ཐཱ་པཱ་ཋོ་ཏི ཨ་དྷི་པྤཱ་ཡེ་ན ‘‘ཡཾ པ་ནཱ’’ཏི་ཨཱ་དི ཝུ་ཏྟཾ. ‘‘ཏ་ཏྲཱུ་པ་པ་ཏྟི་པི ཧོ་ཏི ཨུ་པ་རཱུ་པ་པ་ཏྟི་པི, ན ཧེ་ཊྛཱུ་པ་པ་ཏྟཱི’’ཏི པ་ན པཱ་ཋོ་ཏི ཏེ་ན ‘‘ཧེ་ཊྛཱུ་པ་པ་ཏྟི་ཡེ་ཝ ནི་ཝཱ་རི་ཏཱ’’ཏི་ཨཱ་དི་ཝ་ཙ་ནེ་ན པ་ཡོ་ཛ་ནཾ ན་ཏྠི. ཨ་རཱུ་པ་དྷཱ་ཏཱུ་པ་པ་ཏྟི ཙ ན ནི་ཝཱ་རི་ཏཱ་ཏི ས་མྦ་ནྡྷོ. ཨ་རཱུ་པ་དྷཱ་ཏཱུ་པ་པ་ཏྟི ན ནི་ཝཱ་རི་ཏཱ ‘‘མ་ཏྠ་ཀེ ཋི་ཏོ་ཝ པ་རི་ནི་བྦཱ་ཏཱི’’ཏི ནི་ཡ་མ་སྶ ཨ་ནི་ཙྪི་ཏ་ཏྟཱ.
ཨ་ཉྙ་ཏྠཱཏི ཀཱ་མ་ལོ་ཀེ. ཏ་ཏྠཱཏི རཱུ་པ་ལོ་ཀེ. ཨ་ཡཾ ཨ་ཊྛ་ཀ་ཐཱཏི ‘‘པ་ཋ་མ་ཛ྄ཛྷཱ་ན་བྷཱུ་མི་ཡཾ ནི་བྦ་ཏྟོ…པེ… པ་རི་ནི་བྦཱ་ཏཱི’’ཏི ཨེ་ཝཾ པ་ཝ་ཏྟཱ ཨ་ཊྛ་ཀ་ཐཱ. ཏེ་ནེ་ཝཱཏི ཡ་སྨཱ རཱུ་པ་དྷཱ་ཏུ་ཡཾ ཨུ་པ་པ་ནྣོ ཨ་དྷི་པྤེ་ཏོ, ན ཨུ་པ་པ་ཛྫ་ནཱ་ར་ཧོ, ཏེ་ནེ་ཝ ཀཱ་ར་ཎེ་ན. ཏ་སྶཱཏི ཡ་ཐཱ་ཝུ་ཏྟ་སྶ རཱུ་པ་དྷཱ་ཏུ་ཡཾ ཨུ་པ་པ་ནྣ་སྶ ཨ་རི་ཡ་སཱ་ཝ་ཀ་སྶ. ཡེ་ན རཱུ་པ་རཱ་གེ་ན ཏ་ཏྠ རཱུ་པ་བྷ་ཝེ ཨུ་པ་པ་ནྣོ, ཏ་སྨིཾ ཨ་རཱུ་པ་ཛ྄ཛྷཱ་ནེ་ན ཝི་ཀྑ་མྦྷི་ཏེ ས་མྨ་དེ་ཝ དི་ཊྛཱ་དཱི་ན་ཝེ་སུ ཡ་ཐཱ ཀཱ་མ་རཱུ་པ་བྷ་ཝེ་སུ ཨཱ་ཡ་ཏིཾ བྷ་ཝཱ་བྷི་ལཱ་སོ ན བྷ་ཝི་སྶ་ཏི, ཨེ་ཝཾ ཨ་རཱུ་པ་བྷ་ཝེ་པཱི་ཏི ད་སྶེ་ནྟོ ཨཱ་ཧ ‘‘པུ་ན…པེ… བྷ་ཝི་སྶ་ཏི་ཡེ་ཝཱ’’ཏི. ཏ་ཏྠ ནི་བྦ་ཏྟོཏི རཱུ་པ་དྷཱ་ཏུ་ཡཾ ཨུ་པ་པ་ནྣོ. ཨ་རི་ཡ་མ་གྒཾ བྷཱ་ཝེ་ཏྭཱཏི ཧེ་ཊྛི་མཾ ཨ་རི་ཡ་མ་གྒཾ ས་མྤཱ་དེ་ཏྭཱ. ནི་བྦ་ཏྟ་བྷ་ཝཱ་དཱི་ན་ཝ་ད་སྶ་ན་ཝ་སེ་ནཱཏི ཏ་སྨིཾ རཱུ་པ་བྷ་ཝེ ནི་བྦ་ཏྟོ་པི ཏ་ཏྠེ་ཝ ཨཱ་དཱི་ན་ཝ་ད་སྶ་ན་ཝ་སེ་ན. ཨ་ནི་ཝ་ཏྟི་ཏ་བྷ་ཝཱ་བྷི་ལཱ་སོཏི ཨུ་པ་རི ཨ་རཱུ་པ་བྷ་ཝེ ཨ་ཝི་སྶ་ཊྛ་བྷ་ཝ་པ་ཏྠ་ནོ, ཡ་ཏོ ཨ་རཱུ་པ་དྷཱ་ཏུ་ཡཾ ཨུ་པ་པ་ཛྫ་ནཱ་ར་ཧོ. ཏ་སྶ ཝ་སེ་ནཱཏི ཏཱ་དི་ས་སྶ ཨ་རི་ཡ་སཱ་ཝ་ཀ་སྶ ཝ་སེ་ན. ‘‘ཀ་སྶ་ཙི པ་ཉྩ, ཀ་སྶ་ཙི ཏ་ཡོ ཨ་ནུ་ས་ཡཱ ཨ་ནུ་སེ་ནྟཱི’’ཏི ཨ་ཡཾ ཡ་མ་ཀ་པཱ་ལི༹ (ཡ་མ. ༢.ཨ་ནུ་ས་ཡ་ཡ་མ་ཀ.༣༡༢) པ་ཝ་ཏྟཱ.
ཨཱ་ཡུ་པྤ་མཱ་ཎ་ཝ་ཎྞ་ནཱ ནི་ཊྛི་ཏཱ.