༡༧. ཁུ་དྡ་ཀ་ཝ་ཏྠུ་ཝི་བྷ་ངྒོ
༡. ཨེ་ཀ་ཀ་ནི་དྡེ་ས་ཝ་ཎྞ་ནཱ
༨༤༣-༤. ཨ་ཏྠི་པ་ཊི་ཙྩཾ ནཱ་མཱཏི ཨ་ཏྠི་ཏཱ པ་ཊི་ཙྩ་ཏྠོ ནཱ་མ, ཨ་ས་ཏི་པི ས་ཧ་ཛཱ་ཏ་པུ་རེ་ཛཱ་ཏཱ་དི་བྷཱ་ཝེ ཡ་སྨིཾ ས་ཏི ཡཾ ཧོ་ཏི, སོ ཏ་སྶ པ་ཙྩ་ཡོ་ཏི ཀ་ཏྭཱ ཡ་ཐཱ ཏ་ཐཱ ཨ་ཏྠི་ཏཱ་མ་ཏྟཾ ཨི་དྷ པ་ཊི་ཙྩ་ཏྠོ་ཏི ཨ་ཏྠོ. ཏཾ པ་ན པ་ཊི་ཙྩ་ཏྠཾ བྱ་ཏི་རེ་ཀ་མུ་ཁེ་ན པཱ་ཀ་ཊ་ཏ་རཾ ཀཱ་ཏུཾ ‘‘ཡ་ཐཱ’’ཏི་ཨཱ་དི་མཱ་ཧ. ཏ་ཏྠ ནི་སྶ་ཡཱ་དི་པ་ཙྩ་ཡ་བྷཱ་ཝེ་ན པ་ཊི་ཙྩཱ་ཏི ཝུ་ཏྟནྟི ནི་སྶ་ཡཱ་དི་པ་ཙྩ་ཡ་བྷཱ་ཝ་ཏོ པ་ཙྩ་ཡ་བྷཱུ་ཏཾ ཙ་ཀྑཱ་དི ‘‘པ་ཊི་ཙྩཱ’’ཏི ཝུ་ཏྟཾ. ཨེ་ཀི་སྶཱ སེ་ཎི་ཡཱཏི ཨ་ཊྛཱ་ར་ས་སུ སེ་ཎཱི་སུ མ་ཡཾ ཨ་མུ་ཀཱ་ཡ སེ་ཎི་ཡཱ ཛཱ་ཏཱ་མྷ, ན ཨ་ཉྙེ ཝི་ཡ ཨ་པྤ་ཉྙཱ་ཏཱ་ཏི ཨེ་ཝ་མེ་ཏྠ ཨ་ཏྠཾ ཝ་ད་ནྟི.
པུ་ར་ཏོ ཀ་ར་ཎཾ པ་མུ་ཁ་བྷཱ་ཝ་ཀ་ར་ཎཾ. ནི་དྷཱ་ན་རཱ་སཱིཏི ནི་ད་ཧི་ཏྭཱ ཋ་པི་ཏ་དྷ་ན་ནི་ཙ་ཡོ. ཡ་སོཏི ཨི་སྶ་རི་ཡཾ. ཏཾ པ་ན ཡེ་སུ ཝ་ཏྟ་ཏི, ཏེ་སུ པ་ཊྛཱ་པ་ཀ་ཨཱ་ཎཱ་ཀ་ར་ཎེ་ཧི པཱ་ཀ་ཊོ ཧོ་ཏཱི་ཏི ‘‘པ་ཊྛཱ་པ་ཀ་མ་དོ, ཨཱ་ཎཱ་ཀ་ར་ཎ་མ་དོ’’ཏི ཙ ཝུ་ཏྟཾ.
༨༤༥. ཝ་ཏྠུ་ནཱཏི ཛཱ་ཏི་ཨཱ་དི་པ་ཝ་ཏྟི་ཧེ་ཏུ་ནཱ.
༨༤༦. པ་ཏི་ཊྛཱ་བྷཱ་ཝོཏི ཀུ་ས་ལ་ཀ་མྨེ་སུ པ་ཏི་ཊྛཱ་ནཱ་བྷཱ་ཝོ, སོ པ་ན ཡ་སྨཱ ཀུ་ས་ལ་ཀི་རི་ཡཱ་ཡ ཋཱ་ནཾ ན ཧོ་ཏི, ཏ་སྨཱ ‘‘ཀུ་ས་ལ་ཀ་ར་ཎེ ཨ་ཊྛཱ་ན’’ནྟི ཨཱ་ཧ. པ་མཱ་ད་ས་ངྑཱ་ཏ་སྶ ཨ་ཏྠ་སྶ ཨེ་ཝ་མཱ་དི་ཀོ པ་རི་ཡཱ་ཡོ་ཏི ཡོ་ཛ་ནཱ. ཨཱ་དི-ས་དྡེ་ན ‘‘ཝ་ཙཱི་དུ་ཙྩ་རི་ཏེ, མ་ནོ་དུ་ཙྩ་རི་ཏེ ཙི་ཏྟ་སྶ ཝོ་སྶ་གྒོ, མ་ཀྑོ, པ་ལཱ༹་སོ’’ཏི ཙ ཨེ་ཝ་མཱ་དི་ཀ་སྶ ས་ངྒ་ཧོ ད་ཊྛ་བྦོ. ‘‘པ་མཱ་དོ པ་མ་ཛྫ་ནཱ་དཱི’’ཏི་ཨཱ་དི་ཀོ ཏ་ད་ཏྠ་པྤ་ཀཱ་ས་ཀོ, ‘‘ཙི་ཏྟ་སྶ ཝོ་སྶ་གྒོ ཝོ་སྶ་གྒཱ་ནུ་པྤཱ་ད་ན’’ནྟི་ཨཱ་དི་ཀོ ཏ་པྤ་རི་ཡཱ་ཡ་པྤ་ཀཱ་ས་ཀོ བྱ་ཉྫ་ན་པ་རི་ཡཱ་ཡོ ཙ ཨ་པ་རི་ཡ་ནྟོ་ཏི ས་མྦ་ནྡྷོ. ‘‘ཙ་ཏྟཱ་རོ ཁ་ནྡྷེ ད་སྶེ་ཏཱི’’ཏི ཨི་མི་ནཱ ས་ཏི་ཝོ་སྶ་གྒཱ་ཀཱ་ར་པྤ་ཝ་ཏྟཱ ཙ་ཏྟཱ་རོ ཨ་ཀུ་ས་ལ་ཀྑ་ནྡྷཱ པ་མཱ་དོ་ཏི ཝ་ད་ཏི.
༨༤༧. ཨ་ནི་ཝཱ་ཏ་ཝུ་ཏྟི་ཏཱ་ཡ ཧེ་ཏུ་བྷཱུ་ཏོ ཙི་ཏྟ་ས་མྤ་གྒ་ཧོ མཱ་ན་ཝི་སེ་སོ.
༨༤༨. ཨུ་ཏྟ་ར་བྷཱ་ཝོ ཨུ་ཏྟ་རི་ཡཾ, ཀ་ར་ཎེ་ན ཨུ་ཏྟ་རི་ཡཾ ཀ་ར་ཎུ་ཏྟ་རི་ཡཾ, སཱ་ར་མྦྷེ་ན པ་ར་སྶ ཀི་རི་ཡ་ཏོ ཨུ་ཏྟ་རི་ཀི་རི་ཡཱ.
༨༤༩. ནེ་རུ་ཏྟི་ཀ་ཝི་དྷཱ་ནེ་ནཱཏི ཨི-ཀཱ་ར་ཙྩ-ཀཱ་རཱ་ན་ཉྩ ར-ཀཱ་ར་ཏཱ་པཱ་ད་ནེ་ན.
ཨ་ཏྟ་ཧི་ཏཾ ཨ་ཏྟཱཏི ཨུ་ཏྟ་ར་པ་ད་ལོ་པེ་ན ནི་དྡེ་ས་མཱ་ཧ ཡ་ཐཱ ‘‘རཱུ་པ་བྷ་ཝོ རཱུ་པཾ, བྷཱི་མ་སེ་ནོ བྷཱི་མོ’’ཏི ཙ. ཨཱ་དི་ནྣོ, པ་ཏྟོ ཝཱ ཨ་ཏྠོ ཨ་ཏྟཱཏི ནི་རུ་ཏྟི་ན་ཡེ་ན པ་ད་སི་དྡྷི ཝེ་དི་ཏ་བྦཱ.
མུ་དྡི་ཏ་སྶཱཏི ཨ་ངྐི་ཏ་སྶ.
༨༥༠. ཛཱ་ན་ནྟ་སྶེ་ཝ མ་ཧཱ་ཛ་ན་སྶ. ཨུ་པཱ་དཱ་ནཱ་དི་པ་ཙྩ་ཡེཏི ཨི་ནྡྷ་ནུ་ད་ཀ་ཙཱི་ཝ་རཱ་དི་ཀེ པཱ་རི་པཱུ་རི་ཧེ་ཏུ་ཀེ.
༨༥༡. ག་ཎྛི་ཀཱ ས་ཡཾ ག་ཎྛི་ཀ་ར་ཎ་ཏོ. པ་ཏི་རཱུ་པ་ཝ་ཙ་ན་ཏོ, ཨ་ཉྙེ་སཾ ག་ཎྛི་བྷེ་ད་ཏོ ཙ ག་ཎྛི་བྷཱུ་ཏཱ.
༨༥༢. ཨ་བྷེ་ཛྫ་ནྟ་ར་ཏཱ་ཡ ས་མཱ་སེ་ཝི་ཏ་ཏཱ་ཡ སུ་ཊྛུ ཨཱ་སེ་ཝི་ཏ་ཏཱ་ཡ.
༨༥༣. ཙི་ར་ཀཱ་ལ་པ་རི་བྷཱ་ཝི་ཏ་ཏྟེ་ན ཏེ་མ་ན་ཀ་ར་ཎཾ ཨ་ལླ་བྷཱ་ཝ་ཀ་ར་ཎཾ, ལོ་བྷ་ཝ་སེ་ན ཨ་ཝ་སྶ་ཝ་ན་ནྟི ཨ་ཏྠོ.
ཨེ་ཝཾ ས་ནྟེ ཀ་ཐཾ ཁཱི་ཡ་ན་ནྟི ནི་དྡེ་སོ་ཏི ཨཱ་ཧ ‘‘ཁཱི་ཡ་ན་ནྟི ཙཱ’’ཏི་ཨཱ་དི.
༨༥༤. ཙཱི་ཝ་ར་མ་ཎྜ་ནཱ་དཱི་ནནྟི ཙཱི་ཝ་ར་མ་ཎྜ་ནཱ པ་ཏྟ་མ་ཎྜ་ནཱ སེ་ནཱ་ས་ན་མ་ཎྜ་ནཱ་ཏི ཨི་མེ་སཾ. ཨི་དཱ་ནི ཏཾ ཝི་སེ་ས་ན་བྷཱ་ཝཾ ཡོ་ཛེ་ཏྭཱ ད་སྶེ་ཏུཾ ‘‘ཙཱི་ཝ་རེ་ན ཧཱི’’ཏི་ཨཱ་དི ཝུ་ཏྟཾ.
༨༥༥. ས་བྷཱ་ག་ར་ཧི་ཏོ, ས་བྷཱ་ག་པ་ཊི་པ་ཀྑོ ཝཱ ཨ་ས་བྷཱ་གོ, ཨ་ན་ནུ་ཀཱུ་ལཱ་ནཾ པ་ཊི་ཀྐཱུ་ལ་ཏཱ ཝཱ. ཏེ་ནཱ་ཧ ‘‘མཱ་ན་ཐ་དྡྷ་ཏཱ, ཝི་རོ་དྷོ ཝཱ’’ཏི.
༨༥༦. ས་ངྐ་མྤ་ནཱ ཨུ་ཀྐ་ཎྛ་ནཱ་ཝ་སེ་ན ཨ་ན་ཝ་ཊྛཱ་ནཾ, ཨ་ན་ཝ་དྷཱ་ནཾ ཝཱ. ཏ་སྶ ཏ་སྶ ཨཱ་ར་མྨ་ཎ་སྶ ཏ་ཎྷཱ་ཡ་ནཱ.
༨༥༧. ཀཱ་ཡ་སྶཱཏི ནཱ་མ་ཀཱ་ཡ་སྶ. ཏ་སྨི་ཉྷི ཨ་ཝི་པྥཱ་རི་ཀེ རཱུ་པ་ཀཱ་ཡོ་པི ཨ་ཝི་པྥཱ་རི་ཀོ ཧོ་ཏི.
༨༦༠. རཱ་གཱ་དཱི་ནནྟི རཱ་ག་མོ་ཧ་ཨ་ཧི་རི་ཀཱ་ནོ་ཏྟ་པྤ་ཝི་ཙི་ཀི་ཙྪཱ་དཱི་ནཾ.
༨༦༡. ཏི་ཝི་དྷ་མྤི ཀུ་ཧ་ན་ཝ་ཏྠུཾ ད་སྶེ་ཏུ་ནྟི ས་མྦ་ནྡྷོ. ཏ་ཏྠཱཏི མ་ཧཱ་ནི་དྡེ་སེ. ‘‘ཏ་ཏྠ ཀ་ཏ་མཱ ཀུ་ཧ་ནཱ ལཱ་བྷ་ས་ཀྐཱ་ར་སི་ལོ་ཀ་ས་ནྣི་སྶི་ཏ་སྶཱ’’ཏི་ཨཱ་དི་ནཱ (ཝི་བྷ. ༨༦༡) ཨི་དྷ ཁུ་དྡ་ཀ་ཝི་བྷ་ངྒེ ཨཱ་ག་ཏཾ དེ་ས་ནཱ་ན་ཡཾ ནི་སྶཱ་ཡ མ་ཧཱ་ནི་དྡེ་ས་དེ་ས་ནཱ པ་ཝ་ཏྟཱ་ཏི ཨཱ་ཧ ‘‘ནི་སྶ་ཡ་བྷཱུ་ཏཱ་ཡ ཨི་མཱ་ཡ པཱ་ལི༹་ཡཱ’’ཏི.
ཨ་ནྟ་ར་ཧི་ཏཱ་ནཱིཏི ཨ་ནྟ་ཝི་ཀ་ལཱ་ནི ཚི་ནྡ་ནྟཱ་ནི.
ལཱ་བྷ་ས་ཀྐཱ་ར་སི་ལོ་ཀ་ཧེ་ཏུ ས་མྦྷཱ་ཝ་ནཱ་དྷི་པྤཱ་ཡེ་ན སཾ་ཡ་ཏཱ་ཀཱ་ར་ད་སྶ་ནཾ ཀོ་ཧ་ཉྙ་ནྟི ཨཱ་ཧ ‘‘པཱ་པི་ཙྪ་ཏཱ་ཡ ནི་ར་ཏྠ་ཀ་ཀཱ་ཡ་ཝ་ཙཱི་ཝི་པྥ་ནྡ་ནི་གྒ་ཧ་ཎཾ ཀོ་ར་ཛ’’ནྟི. ཡོ སཾ་ཝེ་ག་བ་ཧུ་ལོ ཀུ་ཀྐུ་ཙྩ་ཀོ པུ་བྦེ་ནཱ་པ་རཾ ཨ་ཏྟ་ནོ་པི ཀི་རི་ཡཾ པ་རི་ས་ངྐ་ནྟོ པ་ཙྩ་ཝེ་ཀྑ་མཱ་ནོ ཏི་ཊྛ་ཏི, ཏཱ་དི་སཾ ཝི་ཡ ཨ་ཏྟཱ་ནཾ ད་སྶེ་ནྟོ ‘‘ཨ་ཏི་པ་རི་ས་ངྐི་ཏོ’’ཏི ཝུ་ཏྟོ.
༨༦༤. པ་སཾ་སཱ་མུ་ཁེ་ན ནི་ནྡ་ན་ནྟི པ་སཾ་སཱ་ཝ་ཏྠུ་ཏོ ཁི་པ་ནཾ བ་ཧི ཚ་ཌྜ་ནཾ ཡ་ཐཱ ‘‘ཨ་དཱ་ཡ་ཀཾ ཨ་ཧོ དཱ་ན་པ་ཏཱི’’ཏི.
༨༦༥. ག་ཝེ་ས་ན་ཀ་མྨནྟི ཨ་པྤ་ཀེ་ན ལཱ་བྷེ་ན མ་ཧ་ནྟ་སྶ པ་རི་ཡེ་ས་ན་ཀ་བྱཱ་པཱ་རོ.
༨༦༦. པོ་ཀྑ་རཾ ཝུ་ཙྩ་ཏི སུ་ནྡ་རཾ, ཝ་ཎྞ་སྶ སུ་ནྡ་ར་བྷཱ་ཝོ ཝ་ཎྞ་པཱ་རི་པཱུ་རཱི ཧོ་ཏཱི་ཏི ཨཱ་ཧ ‘‘ཝ་ཎྞ་པཱ་རི་པཱུ་རཱི ཝཱ ཝ་ཎྞ་པོ་ཀྑ་ར་ཏཱ’’ཏི.
༨༧༩. སེ་ཡྻ་མཱ་ནཱ་དི་ནི་དྡེ་སེ་སཱུཏི ‘‘ཏ་ཏྠ ཀ་ཏ་མོ སེ་ཡྻ་སྶ ‘སེ་ཡྻོ་ཧ་མ་སྨཱི’ཏི མཱ་ནོ’’ཏི་ཨཱ་དི་ནཱ (ཝི་བྷ. ༨༦༩) ནི་དྡི་ཊྛེ་སུ ན་ཝ་སུ མཱ་ན་ནི་དྡེ་སེ་སུ. ‘‘སེ་ཡྻཱ་དི་པུ་གྒ་ལོ’’ཏི ཨི་དཾ ཏ་ཏྠ པཱ་ལི༹་ཡཾ སེ་ཡྻཱ་དཱི་ནཾ ན་ཝ་ནྣཾ པུ་གྒ་ལཱ་ནཾ ཨཱ་མ་ཊྛ་ཏྟཱ ཝུ་ཏྟཾ. ཨི་དྷ པ་ན པུ་གྒ་ལཱ་མ་ས་ནེ ས་ཏི སེ་ཡྻ་པུ་གྒ་ལོ ཙ ཨཱ་མ་སི་ཏ་བྦོ སི་ཡཱ. ཏེ་ནེ་ཝཱ་ཧ ‘‘སེ་ཡྻ་མཱ་ན་བྷཱ་ཝེ་པཱི’’ཏི. སེ་ཡྻ་མཱ་ན་བྷཱ་ཝེ་པཱིཏི པི-ས་དྡོ ཨཱ་ཀ་ཌྜྷ་ཀོ ཨ་སེ་ཡྻ་མཱ་ན་ནི་དྡེ་སེ་པི པུ་གྒ་ལཱ་མ་ས་ན་སྶ ཀ་ཏ་ཏྟཱ. ཡ་སྶ ཀ་སྶ་ཙཱིཏི སེ་ཡྻཱ་དཱི་སུ ཡ་སྶ ཀ་སྶ་ཙི པུ་གྒ་ལ་སྶ.
༨༨༠. པུ་རི་མ་མཱ་ན་སྶཱཏི པུ་བྦེ པ་ཝ་ཏྟ་སྶ ས་དི་ས་མཱ་ན་སྶ, ཧཱི་ན་མཱ་ན་སྶ ཝཱ, ས་དི་ས་མཱ་ན་ཝ་སེ་ནེ་ཝ པ་ན པཱ་ལི༹ ཨཱ་ག་ཏཱ.
༨༨༡. ‘‘མི་གཱ་ནཾ ཀོ་ཏྠུ་ཀོ ཨ་ནྟོ, པ་ཀྑཱི་ནཾ པ་ན ཝཱ་ཡ་སོ’’ཏི (ཛཱ. ༡.༣.༡༣༥) ཝ་ཙ་ན་ཏོ ཨཱ་ཧ ‘‘པ་ཀྑི་ཛཱ་ཏཱི་སུ ཝཱ་ཡ་སོ ཨ་ནྟོ ལཱ་མ་ཀོ’’ཏི.
༨༨༢. ཝི་རཱ་གནྟི ཨ་ར་ཧ་ཏྟཾ.
༨༨༣. མཱ་ན་ས་མྤ་ཡུ་ཏྟ་ཙྪ་ནྡོ ཏ་ཎྷཱ་ཚ་ནྡོ. མཱ་ན་ས་བྷཱ་ཝཾ ཨ་ནུ་ག་ཏོ སེ་ཡྻཱ་དི་ཏོ ས་མྤ་གྒ་ཎྷ་ན་ཝ་སེ་ན པ་ཝ་ཏྟོ མཱ་ན་ས་མྤ་ཡུ་ཏྟ་ཀ་ཏྟུ་ཀ་མྱ་ཏཱ་ཚ་ནྡོ ཝཱ མཱ་ན་ཙྪ་ནྡོ.
༨༨༤. ཏ་ཏྠཱཏི ཏ་སྨིཾ ཝི་ལ་མྦ་ནེ ནི་པྥཱ་དེ་ཏ་བྦེ. ཡུ་ཏྟཾ ཨ་ནུ་ཙྪ་ཝི་ཀཾ. མུ་ཏྟཾ ཝི་སྶ་ཊྛཾ. སི་ལི་ཊྛཾ ས་ཧི་ཏཾ, ཨ་ཏྠ་དྭ་ཡ་ཝི་བྷཱ་ཝ་ཀཾ ཝཱ.
༨༨༨. ཨ་ནུ་དྡ་ཡ་སྶེ་ཝཱཏི མེ་ཏྟཱ་ཡ་ནྟ་སྶ ཝི་ཡ ཨ་ནུ་ཀ་མྤ་ནྟ་སྶ ཝི་ཡ ཝི་ཀ་པྤ་ནཱ་ཏི ཨཱ་ཧ ‘‘ས་ཧ་ན་ནྡི་ཏཱ་དི་ཀ་སྶཱ’’ཏི, མེ་ཏྟཱ་དི་པ་ཏི་རཱུ་པེ་ན པ་ཝ་ཏྟ་གེ་ཧ་སི་ཏ་སི་ནེ་ཧ་སྶཱ་ཏི ཨ་ཏྠོ. ཏེ་ནཱ་ཧ ‘‘ཏཱ་དི་སོ རཱ་གོ’’ཏི. ཨ་ཏྠོ ཡུ་ཛྫ་ཏཱིཏི ཨེ་ཝ་མྤི ‘‘ཏ་ཏྠཱ’’ཏི པཱ་ལི༹་པ་ད་སྶ ཨ་ཏྠོ ཡུ་ཛྫ་ཏི. པ་རཱ་ནུ་དྡ་ཡ་ཏཱ་ཧེ་ཏུ་ཀོ ཧི པ་རཱ་ནུ་དྡ་ཡ་ཏཱ་ས་ཧི་ཏོ སོ ཝི་ཏ་ཀྐོ་ཏི.
༨༩༠. ཀཱ་མ་གུ་ཎ་པཱ་རི་པཱུ་རི་ཡཱ ཡེ་བྷུ་ཡྻེ་ན ལོ་ཀོ ས་མྦྷཱ་ཝེ་ཏཱི་ཏི ཨཱ་ཧ ‘‘ཨ་ན་ཝ་ཉྙ་ཏྟ་ཏྠ་མེ་ཝ ཀཱ་མ་གུ་ཎེ ཙ པ་ཏྠེ་ཏཱི’’ཏི.
ཨེ་ཀ་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༢. དུ་ཀ་ནི་དྡེ་ས་ཝ་ཎྞ་ནཱ
༨༩༡. བ་ནྡྷ་ཏཱིཏི ཀུ་ཛ྄ཛྷ་ནཱ་ཀཱ་རཾ བ་ནྡྷ་ཏི གྷ་ཊེ་ཏི. ཨུ་པ་ནཱ་ཧོ ཧི ཨཱ་གྷཱ་ཏ་ཝ་ཏྠུ་ནཱ ཙི་ཏྟཾ བ་ནྡྷ་ནྟོ ཝི་ཡ ཧོ་ཏི, ཡ་ཏོ ཨ་ཉྙ་ཐཱ པ་ཝ་ཏྟི་ཏྭཱ་པི ཨ་ཝི་དི་ཏེ ཨུ་པ་ནཱ་ཧེ ཨཱ་གྷཱ་ཏ་ཝ་ཏྠུ་ས་ནྣི་སྶི་ཏོ་ཝ ཧོ་ཏི.
༨༩༢. ད་ནྟེ་ཧི ཚི་ནྡི་ཏྭཱཏི ད་ནྟེ་ཧི ཚི་ནྡི་ཏྭཱ ཝི་ཡ ཨེ་ཀ་དེ་སཾ ཨ་པ་ནེ་ཏྭཱ ཨེ་ཀ་དེ་སཾ ག་ཧེ་ཏྭཱ་ཏི ཨ་དྷི་པྤཱ་ཡོ.
༨༩༤. ཨ་ཙྩ་ཡཾ ཀ་ཏྭཱཏི ཝཱི་ཏི་ཀྐ་མཾ ཀ་ཏྭཱ. པ་ཊི་ཙྪཱ་ད་ནེཏི ཨ་ཏྟ་ནཱ ཀ་ཏ་སྶ ཨ་ཙྩ་ཡ་སྶ པ་ཊི་ཙྪཱ་ད་ནེ. ཝོ་ཙྪི་ནྡ་ནཾ ཝཱི་ཏི་ཀྐ་མ་ཀི་རི་ཡཱ་ཡ ཨ་པྤ་ཊི་ཛཱ་ན་ཝ་སེ་ན ཨུ་པ་ཙྪི་ནྡ་ནཾ, ཝོ་ཙྪི་ནྡ་ནེ་ན ཚཱ་ད་ནཱ ཝོ་ཙྪི་ནྡ་ན་ཚཱ་ད་ནཱ.
ཨ་ས་མྨཱ་བྷཱ་ས་ནེ ས་ཋ-ས་དྡོ ལོ་ཀེ ནི་རུ་ལ༹ྷོ་ཏི ཨཱ་ཧ ‘‘ཡོ ན ས་མྨཱ བྷཱ་ས་ཏི, སོ ས་ཋོ’’ཏི. ས་ཋ་སྶ ཡ་ཀྑ་སཱུ་ཀ་ར་ས་དི་ས་ཏཾ ད་སྶེ་ནྟོ ‘‘ཀུ་ཙྪི ཝཱ པི་ཋི ཝཱ ཛཱ་ནི་ཏུཾ ན ས་ཀྐཱ’’ཏི ཨཱ་ཧ, ཨི་ནྡ་ཛཱ་ལ་ས་དི་སོ ཝཱ ཨེ་སོ ད་ཊྛ་བྦོ.
ཡོ ས་བྦ་ཐཱ ཝི་པ་ནྣ་ཛ྄ཛྷཱ་ས་ཡོ་པི ས་མཱ་ནོ ཀཱ་ཡ་ཝ་ཙཱི་བྷེ་ད་མ་ཏྟེ་ན ཨ་ཏྟཱ་ནཾ ས་མྤ་ནྣཾ ཝི་ཡ ད་སྶེ་ཏྭཱ ལོ་ཀཾ ཝ་ཉྩེ་ནྟོ ཨ་ཉྙ་ཐཱ ས་ནྟཾ ཨ་ཉྙ་ཐཱ པ་ཝེ་དེ་ཏི. ཏེ་ནཱ་ཧ ‘‘ཏེ་ནེ་ཏཾ སཱ་ཋེ་ཡྻཾ མཱ་ཡཱ་ཏོ བ་ལ་ཝ་ཏ་རཱ ཝ་ཉྩ་ནཱ་ཏི ད་ཊྛ་བྦ’’ནྟི. ས་ནྟ་དོ་ས་པ་ཊི་ཙྪཱ་ད་ན་མེ་ཝ ཧི མཱ་ཡཱ. ཏེ་ནེ་ཝཱཏི བ་ལ་ཝ་ཏ་ར་ཝ་ཉྩ་ནཱ་བྷཱ་ཝེ་ནེ་ཝ. ད་ལ༹ྷ་ཀེ་རཱ་ཊི་ཡ་ཉྷི ‘‘པ་རི་ཀྑ་ཏ་ཏཱ’’ཏི ཝུ་ཏྟཾ.
༩༠༨. ཨ་བྷཱ་ཝེ་པཱིཏི པི-ས་དྡེ་ན ‘‘ཀོ པ་ན ཝཱ་དོ བྷཱ་ཝེ’’ཏི ད་སྶེ་ཏི. ཡ་དི་པི ཧི པུ་ཐུ་ཛྫ་ནཱ་ནཾ, ཨེ་ཀ་ཙྩཱ་ན་ཉྩ སེ་ཀྑཱ་ནཾ ཡ་ཐཱ་ར་ཧཾ ཨ་ཏྟཱ་བྷི་ནི་ཝེ་སཱ་དཱི་ཧི ཀ་ཏཱུ་པ་ཀཱ་རཾ རཱུ་པ་རཱ་གཱ་དི་སཾ་ཡོ་ཛ་ན་ཀི་ཙྩཾ སཱ་དྷེ་ཏི, ཨེ་ཀ་ཙྩཱ་ནཾ པ་ན ཝི་ནཱ ཨེ་ཝ ཏེ་ཧཱི་ཏི ཀ་སྶ་ཙི་པི ཀི་ལེ་ས་སྶ ཨ་ཝི་ཀྑ་མྦྷི་ཏ་ཏྟཱ ཀ་ཐ་ཉྩི་པི ཨ་ཝི་མུ་ཏྟོ ཀཱ་མ་བྷ་ཝོ ཨ་ཛ྄ཛྷ་ཏྟ་གྒ་ཧ་ཎ་སྶ ཝི་སེ་ས་པ་ཙྩ་ཡོ་ཏི ‘‘ཨ་ཛ྄ཛྷ་ཏྟ’’ནྟི ཝུ་ཙྩ་ཏི, ཏ་ད་བྷཱ་ཝ་ཏོ ‘‘བ་ཧི་དྡྷཱ’’ཏི ལ་དྡྷ་ཝོ་ཧཱ་རེ རཱུ་པཱ་རཱུ་པ་བྷ་ཝེ ཀེ་ཝ་ལ་མྤི སཾ་ཡོ་ཛ་ན་ཀི་ཙྩཾ སཱ་དྷེ་ནྟཾ པ་ཝ་ཏྟ་ཏཱི་ཏི, ཏ་ཏོ ཨེ་ཝ རཱུ་པཱ་རཱུ་པཱ་ཝ་ཙ་ར་ས་ཏྟཱ་ནཾ བ་ཧི་དྡྷཱ་སཾ་ཡོ་ཛ་ན་བྷཱ་ཝ་ཧེ་ཏ་ཛཱ་ཏ་ནྟི ཙ ‘‘བ་ཧི་དྡྷཱ་སཾ་ཡོ་ཛ་ན’’ནྟི ཝུ་ཙྩ་ཏཱི་ཏི ཨི་མ་མ་ཏྠ་མཱ་ཧ ‘‘ས་ཀྐཱ་ཡ་དི་ཊྛཱ་དཱི་ནཾ…པེ… ཡོ་ཛ་ནཾ ནཱ་མཱ’’ཏི.
དུ་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༣. ཏི་ཀ་ནི་དྡེ་ས་ཝ་ཎྞ་ནཱ
༩༠༩. ཨ་ཝི་ཛྫཱ་བྷ་ཝ་ཏ་ཎྷཱ་ཧི ཝི་ཡ ཨི་སྶཱ་མ་ཙྪ་རི་ཡ་དོ་མ་ན་སྶཱ་དི་ས་ཧཱ་ཡ་བྷཱུ་ཏེ་ན དོ་སེ་ན་པི བྷ་ཝཱ་བྷི་ས་ངྑ་ར་ཎཾ ཧོ་ཏཱི་ཏི ‘‘ཨ་ཀུ་ས་ལ་མཱུ་ལཱ་ནེ་ཝ ཝ་ཊྚ་མཱུ་ལཱ་ནཱི’’ཏི. ཏེ་ནཱ་ཧ ‘‘ཏཱི་ཧི…པེ… ཀ་ཐི་ཏོ’’ཏི.
༩༡༩. རཱུ་པཱ་རཱུ་པཱ་ཝ་ཙ་ར་ཝི་པཱ་ཀཱ་ནཾ ས་ནྟ་པ་ཎཱི་ཏ་བྷཱ་ཝེ་ན ཨུ་ལཱ༹་ར་ཏ་མ་ཏྟཱ ཏ་ཏྠ སཱ་ཏི་ས་ཡོ བྷ་ཝ་རཱ་གོ ཝུ་ཏྟོ.
༩༢༠. མཱ་ནེ་ན ཋ་པ་ནཱཏི མཱ་ནེ་ན སེ་ཡྻཱ་དི་ཝ་སེ་ན ཨ་ཏྟ་ནོ ཋ་པ་ནཱ. ཋ་པ་ནཱཏི ཙ ད་ཧ་ནཱ, པ་གྒ་ཎྷ་ནཱ ཝཱ.
༩༢༡. ཏཾ་ས་མྤ་ཡུ་ཏྟཱཏི དོ་ས་ས་མྤ་ཡུ་ཏྟཱ.
༩༢༢. ཏེ་སཾ ཝ་ཎྞ་བྷེ་དནྟི ཏེ་སཾ ཛཱི་ཝཱ་ནཾ ཝ་ཎྞ་ཝི་སེ་སཾ, ཏེ་སཾ ཝཱ ཏ་ཐཱ ཀ་ཐེ་ནྟཱ་ནཾ སུ་ཏྭཱ. བྱཱ་པཱིཏི ས་ཀ་ལ་ལོ་ཀ་བྱཱ་པཱི, ས་ཀ་ལ་ས་རཱི་ར་བྱཱ་པཱི ཝཱ. པ་རི་མ་ཎྜ་ལོཏི པ་ར་མཱ་ཎུ་པྤ་མཱ་ཎོ ཧུ་ཏྭཱ པ་རི་མ་ཎྜ་ལོ. ཨཱ་དི-ས་དྡེ་ན ཨ་ངྒུ་ཊྛ་པྤ་མཱ་ཎོ ཝ་ཡ་པྤ་མཱ་ཎོ་ཏི་ཨཱ་དི་ཀཾ ས་ངྒ་ཎྷཱ་ཏི.
༩༢༣. ཨུ་ཏུ་ཝི་པ་རི་ཎཱ་མ་ཛོ སཱི་ཏཱ་དི་ཨུ་ཏུ་ཝི་པ་རི་ཝ་ཏྟ་ཛཱ་ཏོ. ཨོ་པ་ཀྐ་མི་ཀོ ཨ་ཏྟ་ནོ, པ་ར་སྶ ཝཱ ཏཱ་དི་ས་ཨུ་པ་ཀྐ་མ་ནི་བྦ་ཏྟོ. ཝི་ས་མ་པ་རི་ཧཱ་ར་ཛོ ཙི་རཱ་ས་ན་ཙི་ར་ཊྛཱ་ནཱ་དི་ནཱ ཀཱ་ཡ་སྶ ཝི་ས་མ་པ་རི་ཧ་ར་ཎ་ཏོ ཛཱ་ཏོ. ས་ནྣི་པཱ་ཏ་ཛོ ས་ཉྩ་ཡ་ཏོ པ་ཊྛཱ་ཡ པ་ཙྩེ་ཀཾ ཝི་ས་མཱ་ཀཱ་ར་ཏོ དོ་ས་ཏྟ་ཡ་ས་མོ་དྷཱ་ན་ཏོ ཛཱ་ཏོ. ཀ་མྨ་ས་མུ་ཊྛཱ་ནོ ཨུ་ཏུ་ཝི་པ་རི་ཎཱ་མཱ་དཱི་ཧི ཝི་ནཱ ཀ་མྨ་ཏོ ས་མུ་ཊྛི་ཏོ. པི་ཏྟ་སེ་མྷ་ཝཱ་ཏ་ས་མུ་ཊྛཱ་ནཱ པ་ན པི་ཏྟཱ་དཱི་ནཾ ཨ་དྷི་ཀ་བྷཱ་ཝེ་ནེ་ཝ ཝུ་ཏྟཱ. ས་བྦ་སྶཱ་པི ཧི རོ་ག་སྶ དོ་ས་ཏྟ་ཡཾ ཨཱ་ས་ནྣ་ཀཱ་ར་ཎཾ དོ་ས་པྤ་ཀོ་པེ་ན ཝི་ནཱ ཨ་བྷཱ་ཝ་ཏོ. ཀ་མྨཾ པ་དྷཱ་ན་ཀཱ་ར་ཎཾ ཀ་ཏོ་ཀཱ་སེ ཨེ་ཝ ཏ་སྨིཾ ཨུ་པྤ་ཛྫ་ན་ཏོ, ཨི་ཏ་རཾ པ་ན ཏ་སྶ ས་ཧ་ཀཱ་རི་ཀཱ་ར་ཎཾ ད་ཊྛ་བྦཾ. ཏ་ཡི་དཾ པུ་བྦེ་ཀ་ཏ་ཧེ་ཏུ་ཝཱ་དི་ནོ པ་ཊི་ཀྑི་པ་ནྟི. ཨུ་པ་པ་ཛྫ་ཝེ་ད་ནཱི་ཡ་ཕ་ལ་མྤི པུ་བྦེ་ཀ་ཏ་ཧེ་ཏུ་ཀ་པ་ཀྑི་ཀ་མེ་ཝ ཨ་ཏཱི་ཏ་དྡྷི་ཀ་ཏྟཱ ཀ་མྨ་སྶཱ་ཏི ཨ་རུ་ཙི་སཱུ་ཙ་ན་ཏྠཾ ཀི་ར-ས་དྡ་གྒ་ཧ་ཎཾ ཀ་རོ་ཏི ‘‘ཨུ་པ་པ་ཛྫ་ཝེ་ད་ནཱི་ཡ་ཉྩ ཀི་ར པ་ཊི་ཀྑི་པ་ནྟཱི’’ཏི.
༩༢༤. དཱ་ཧ་ཀཱ་ར་ཎ་ཏཱ་ཡཱཏི རཱ་གཱ་དི་ད་ས་ཝི་དྷ་གྒི་དཱ་ཧ་སྶ, ན་ར་ཀ་གྒི་དཱ་ཧ་སྶ ཙ ཀཱ་ར་ཎ་ཏཱ་ཡ.
༩༢༦. པུ་ཐུ་ནི་མི་ཏྟ་ས་བྷཱ་ཝེ་སཱུཏི པུ་ཐུ ནཱ་ནཱ་ཀི་ལེ་སཱ་དཱི་ནཾ ཀཱ་ར་ཎ་ས་བྷཱ་ཝེ་སུ.
༩༣༡. ཨ་དྡ་ནཾ ཨ་དྡཱ མ་དྡ་ཝོ, ཨ་ནེ་ཀ་ཏྠ་ཏྟཱ དྷཱ་ཏཱུ་ནཾ ཏ་པྤ་ཊི་ཀྑེ་པེ་ན ཨ་ན་དྡཱཏི ཨཱ་ཧ ‘‘ཨ་མུ་དུ་ཏཱ ཝཱ ཨ་ན་དྡཱ’’ཏི.
༩༣༦. ཨ་ཡོ་ནི་སོ་མ་ན་སི་ཀཱ་ར་ཧེ་ཏུ་ཀ་ཏྟཱ ཨཱ་ཝ་ཛྫ་ནཱ་ཡ ཨ་ཀུ་ས་ལཱ་ནུ་ཀཱུ་ལ་ཀི་ཙྩ་ཏཱ ད་ཊྛ་བྦཱ.
ཏི་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༤. ཙ་ཏུ་ཀྐ་ནི་དྡེ་ས་ཝ་ཎྞ་ནཱ
༩༣༩. ཨེ་ཝཾ-ས་དྡེ་ནཱཏི ནི་ད་སྶ་ན་ཏྠེ་ན ཨེ་ཝཾ-ས་དྡེ་ནཱ་ཏི ཨ་དྷི་པྤཱ་ཡོ. བྷ་ཝོ ཨེ་ཝ ཨ་བྷི་ཝུ་དྡྷོ ཨ་བྷ་ཝོ ཡ་ཐཱ ‘‘ཨ་སེ་ཀྑཱ དྷ་མྨཱ’’ཏི (དྷ. ས. ཏི་ཀ་མཱ་ཏི་ཀཱ ༡༡). དུ་ཏི་ཡ་སྨིཾ པ་ཀྑེ བྷ་ཝཱ་བྷ་ཝ་ས་དྡེ་ན ས་མྤ་ཏྟི་ཝི་པ་ཏྟི་ཡོ, ཝུ་དྡྷི་ཧཱ་ནི་ཡོ ཝཱ ཝུ་ཏྟཱ་ཏི ཝེ་དི་ཏ་བྦཱ.
ཨ་ག་ཏི་ཡཱཏི ཨ་ཡུ་ཏྟ་ག་ཏི་ཡཱ, ཨ་པྤ་ཏི་རཱུ་པ་ཀི་རི་ཡཱ་ཡཱ་ཏི ཨ་ཏྠོ.
ཀོ་དྷཱུ་པཱ་ཡཱ་ས…པེ… མཱ་ཏུ་གཱ་མཱ ཝཱ ཨཱུ་མི་ཨཱ་དི་བྷ་ཡ་ནྟི ཡོ་ཛ་ནཱ. པ་ཉྩ་ཀཱ་མ་གུ་ཎ་མཱ་ཏུ་གཱ་མ་གྒ་ཧ་ཎེཏི པ་ཉྩ་ཀཱ་མ་གུ་ཎ་གྒ་ཧ་ཎེ, མཱ་ཏུ་གཱ་མ་གྒ་ཧ་ཎེ ཙ.
‘‘ས་ཡཾ་ཀ་ཏཾ སུ་ཁ་དུ་ཀྑ’’ནྟི་ཨཱ་དི་ཀཱ དི་ཊྛི ཡ་དི་པི ཨ་ཉྙེ་ས་མྤི དི་ཊྛི་ག་ཏི་ཀཱ་ནཾ ཨ་ཏྠེ་ཝ, ཏི་མྦ་རུ་ཀོ པ་ན ཏ་ཐཱ་དི་ཊྛི་ཀོ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ པུ་ཙྪཱི་ཏི སཱ དི་ཊྛི ‘‘ཏི་མྦ་རུ་ཀ་དི་ཊྛཱི’’ཏི (སཾ. ནི. ༢.༡༨) ཝུ་ཏྟཱ. ཏེ་ནཱ་ཧ ‘‘ཏི་མྦ་རུ་ཀོ…པེ… ཨཱ་ག་ཏ་ཏྟཱ’’ཏི.
ཙ་ཏུ་ཀྐ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༥. པ་ཉྩ་ཀ་ནི་དྡེ་ས་ཝ་ཎྞ་ནཱ
༩༤༠. ཨཱ་ག་མ་ན་སྶ པ་ཊི་ས་ནྡྷི་གྒ་ཧ་ཎ་ཝ་སེ་ནཱ་ཏི ཨ་དྷི་པྤཱ་ཡོ.
༩༤༡. ཨུ་པ་ཙ་ཡ་ན་ཏོཏི ཝ་ཌྜྷ་ན་ཏོ. ཨ་ཉྙ་ཐཱཏི ལཱ་བྷ་ཏོ ཏ་ཀྐ་ན་ཏོ ཙ ཨ་ཉྙ་པྤ་ཀཱ་རོ ག་ཧི་ཏོ་ཏི ཏཾ ད་སྶེ་ནྟོ ‘‘ས་དྡྷཱ་རུ་ཙི་ཨཱ་དཱི་ཧཱི’’ཏི ཨཱ་ཧ. ཨ་ནུ་སྶ་ཝ་ཏོ ཧི ས་དྡ་ཧ་ནཾ, རུ་ཙྩ་ནཾ པ་ན ཛཱ་ཏི་སྶ་ར་ཉཱ་ཎ་ཏོ་པི ཧོ་ཏི. ཨཱ་དི-ས་དྡེ་ན ཁ་ནྟི་ཨཱ་དཱི་ནཾ ས་ངྒ་ཧོ.
༩༤༢. ཨ་ཀྑ་ནྟི མཱུ་ལཾ ཨེ་ཏེ་ས་ནྟི ཨ་ཀྑ་ནྟི་མཱུ་ལ་ཀཱ. དུ་ཀྐ་ཊ་དུ་བྦྷཱ་སི་ཏ་ཏཱ་དི་དོ་སཱ ཏཱ་དི་སཱ་ནི ཀཱ་ཡ་ཝ་ཙཱི་མ་ནོ་དུ་ཙྩ་རི་ཏཱ་ནི.
༩༤༣. ཨུ་ད་གྒ་ཏཱ་ས་ངྑཱ་ཏོ ཨ་ཝཱུ་པ་ས་མོ ན ཨུ་དྡྷ་ཙྩ་ས་ངྑཱ་ཏོ་ཏི པཱི་ཏི་ཡཱ ཨེ་ཝ ས་ཝི་པྥཱ་རི་ཀ་ཏཱ་ས་ངྑཱ་ཏཾ ཨ་ས་ནྟ་ས་བྷཱ་ཝཾ ཨཱ་ཧ. ཨ་ཝཱུ་པ་ས་མ་ཧེ་ཏུ་བྷཱུ་ཏོཏི ཝི་ཀྑེ་པ་ཧེ་ཏུ་བྷཱུ་ཏོ. པཱི་ཏི་ཡཱ ཨཱ་ཀཱ་རོཏི པཱི་ཏི་ཡཱ པ་ཝ་ཏྟི་ཨཱ་ཀཱ་རོ.
པ་ཉྩ་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༦. ཚ་ཀྐ་ནི་དྡེ་ས་ཝ་ཎྞ་ནཱ
༩༤༤. ཏེ་ནཱཏི ཀོ་དྷཱ་དཱི་ནཾ་ཡེ་ཝ ཝི་ཝཱ་ད་མཱུ་ལ་ཏྟཱ.
༩༤༥. ཀུ་ས་ལཱ་ནུ་ཡོ་གེ སཱ་ཏ་ཙྩཾ ཀུ་ས་ལཱ་ནུ་ཡོ་ག་སཱ་ཏ་ཙྩཾ.
ག་ཎེ་ན ས་ཏྟ་ས་མཱུ་ཧེ་ན ས་ངྒ་ཎི ས་ནྣི་པ་ཏ་ནཾ ཡེ་ན ས་དྡྷིཾ, ཏེ་ན ས་ངྒ་ཏི ག་ཎ་ས་ངྒ་ཎི་ཀཱ. ཀ་སྶ་ཙི གྷཱ་ས་ཙྪཱ་ད་ནཱ་དི་ཀ་སྶ.
༩༤༦. ཨུ་པ་ཝི་ཏ་ཀྐེ་ཏཱིཏི ཨཱ་ར་མྨ་ཎཾ ཨུ་པེ་ཙྩ ཏ་ཀྐེ་ཏི.
༩༤༨. ཨ་དྷི་ཙྩ་ས་མུ་པྤ་ནྣི་ཀོཏི ‘‘ཨ་དྷི་ཙྩ་ས་མུ་པྤ་ནྣོ ཨ་ཏྟཱ ཙ ལོ་ཀོ ཙཱ’’ཏི ཨེ་ཝཾ་ཝཱ་དཱི.
ཚ་ཀྐ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༨. ཨ་ཊྛ་ཀ་ནི་དྡེ་ས་ཝ་ཎྞ་ནཱ
༩༥༢. ཨོ་སཱི་ད་ནཱ་ཀཱ་རེ་ནཱཏི ཀ་ཏྟ་བྦ་ཀ་མྨེ ཨ་ནུ་སྶ་ཧ་ནཱ་ཀཱ་རེ་ན.
༩༥༨. ཏེ ཨ་བྷི་ནི་ཝེ་སཱ ཨ་ས་ཉྙཱི་ཝཱ་དཱ ཝ་ད་ནྟི ཨེ་ཏེ་ཧཱི་ཏི.
ཨ་ཊྛ་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༩. ན་ཝ་ཀ་ནི་དྡེ་ས་ཝ་ཎྞ་ནཱ
༩༦༠-༩༦༣. ད་ས་མ་སྶཱཏི ཨ་ཊྛཱ་ན་གྷཱ་ཏ་སྶ.
ཨ་ཛ྄ཛྷ་ཏྟནྟི གོ་ཙ་ར་ཛ྄ཛྷ་ཏྟཾ ཨ་དྷི་པྤེ་ཏཾ. ཨེ་ཏ་སྶ གཱ་ཐཱ་ཝ་ཙ་ན་སྶ. ནི་ཊྛ་པེ་ཏྭཱཏི ཨ་བྷི་ནི་ཝི་སྶ.
༩༦༤. ཨ་ཉྙེ་སཾ ཕ་སྶཱ་དཱི་ནཾ ས་ངྑ་ཏ་བྷཱ་ཝེ ཡ་ཐཱ་ས་ཀཾ་པ་ཙྩ་ཡེ་ཧི. ཡེ་ནཱ་ཀཱ་རེ་ན མཱ་ན་སྶ སཱ་ཏི་ས་ཡཱ པ་ཝ་ཏྟི, ཏཾ ད་སྶེ་ཏུཾ ‘‘ཨ་ཧ་ནྟི, ཨ་སྨཱི་ཏི ཙཱ’’ཏི ཝུ་ཏྟཾ. ཨ་ཏྟ་ནོཏི དི་ཊྛི་ག་ཏ་པ་རི་ཀ་པྤི་ཏ་སྶ ཨ་ཏྟ་ནོ. ཡ་ཐཱ མཱ་ན་སྶ ས་མྤ་གྒ་ཧ་ཝ་སེ་ན, ཨེ་ཝཾ ཏ་ཎྷཱ་ཡ མ་མ་ཏྟ་ཝ་སེ་ན, དི་ཊྛི་ཡཱ ནི་ཙྩཱ་དི་ཝ་སེ་ན པ་ཝ་ཏྟི ཝི་སེ་ས་ཝ་ཏཱི ས་མཱ་ནེ་པི ཨ་ནཱ་ག་ཏ་ཀཱ་ལཱ་མ་ས་ནེ་ཏི ཨཱ་ཧ ‘‘བྷ་ཝི་སྶ་ནྟཱི…པེ… ཝུ་ཏྟོ’’ཏི. ‘‘ཨ་ཧ་མ་སྨཱི’’ཏི པ་ན པ་ཝ་ཏྟ་མཱ་ན་སྶེ་ཝ བྷ་ཝ་ཏཱི་ཏི ས་བྦ་པ་ད་སཱ་དྷཱ་ར་ཎ་སྶ མཱ་ན་སྶེ་ཝ ཝ་སེ་ན ཨི་ཉྫི་ཏཱ་དི་ཏཱ ཨ་ཊྛ་ཀ་ཐཱ་ཡཾ ཝུ་ཏྟཱ.
ན་ཝ་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
༡༠. ད་ས་ཀ་ནི་དྡེ་ས་ཝ་ཎྞ་ནཱ
༩༧༠. ས་ངྐ་པྤ་ནནྟི ‘‘ཀུ་ས་ལ་ཏཱ’’ཏི ཝུ་ཏྟ་པ་ད་སྶ ཨ་ཏྠ་ཝ་ཙ་ནཾ. ཏ་སྶཱ ཨུ་པཱ་ཡ་ཙི་ནྟཱ་ཡ. མི་ཙྪཱ་བྷཱ་ཝོ སཱ་ཝ་ཛྫ་བྷཱ་ཝོ. ཏ་དཱ་ཀཱ་རོ མོ་ཧོཏི ཡ་ཐཱ་ཝུ་ཏྟཱ་ཀཱ་རེ་ན པ་ཝ་ཏྟེ ཙི་ཏྟུ་པྤཱ་དེ མོ་ཧོ. ཏ་སྶཱ་པི ཡ་ཐཱ་ཝུ་ཏྟ་པ་ཙྩ་ཝེ་ཀྑ་ཎཱ་ཡ་པི ཡ་ཐཱ་ཀ་ཏ་པཱ་པེ་པི. ཨ་དྷི་མཱ་ན་ས་མྤ་ཡུ་ཏྟཾ ས་ཉྫཱ་ན་ནཾ པ་ཀ་ཏི་པུ་རི་ས་ནྟ་ར་ད་སྶ་ནཱ་དི་ཝ་སེ་ན པ་ཝ་ཏྟཾ དི་ཊྛི་ས་མྤ་ཡུ་ཏྟ་ཙི་ཏྟཾ ཕ་ལཾ ཝི་ཡ ཝི་མུ་ཏྟ་ནྟི ག་ཧི་ཏཾ ད་ཊྛ་བྦཾ.
ད་ས་ཀ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
ཏ་ཎྷཱ་ཝི་ཙ་རི་ཏ་ནི་དྡེ་ས་ཝ་ཎྞ་ནཱ
༩༧༣. ཝི་སེ་སཾ ཨ་ཀ་ཏྭཱཏི ཨ་ནུ་པ་ནི་དྷཱ་ནཾ, ས་མ་ཏོ ཙ ཨ་ས་མ་ཏོ ཙ ཨུ་པ་ནི་དྷཱ་ན་ནྟི ཨི་མཾ ཝི་བྷཱ་གཾ ཨ་ཀ་ཏྭཱ, ཡོ ‘‘ཨི་ཏྠཾ, ཨེ་ཝཾ, ཨ་ཉྙ་ཐཱ’’ཏི པ་དེ་ཧི པ་ཀཱ་སི་ཏོ.
ཝི་སེ་ས་སྶཱཏི ‘‘ཨི་ཏྠཾ, ཨེ་ཝཾ, ཨ་ཉྙ་ཐཱ’’ཏི ཡ་ཐཱ་ཝུ་ཏྟ་སྶེ་ཝ ཝི་སེ་ས་སྶ. དི་ཊྛི་ཡཱཏི དི་ཊྛི་ཡཱ ག་ཧི་ཏཱ་ཡ ཏ་ད་ཝི་ནཱ་བྷཱ་ཝི་ནཱི ཏ་ཎྷཱ ད་སྶི་ཏཱ. སཱི་ས་སཱི་ས་མཱུ་ལ་ཀེ་ཧཱིཏི ཙ་ཏཱུ་ཧི སཱི་སེ་ཧི, དྭཱ་ད་ས་ཧི ཙ སཱི་ས་མཱུ་ལ་ཀེ་ཧི. ས་ཡ་མེ་ཝ ཙ ཏ་ཎྷཱ ད་སྶི་ཏཱ་ཏི ཡོ་ཛ་ནཱ. ཡ་དི དི་ཊྛི་མཱ་ན་གཱ་ཧོ་པི ཨི་དྷཱ་དྷི་པྤེ་ཏོ, ཡ་ཏོ ‘‘ཏ་ཎྷཱ་མཱ་ན་དི་ཊྛི་ཝ་སེ་ན ས་མཱུ་ཧ་གཱ་ཧ་ཏོ’’ཏི (ཝི་བྷ. ཨ་ཊྛ. ༩༧༣) ཨ་ཊྛ་ཀ་ཐཱ་ཡཾ ཝུ་ཏྟཾ, ཀ་ཐཾ ‘‘ཏ་ཎྷཱ་ཝི་ཙ་རི་ཏཱ་ནཱི’’ཏི ཝ་ཙ་ན་ནྟི ཨཱ་ཧ ‘‘དི་ཊྛི་མཱ་ནེ་སཱུ’’ཏི་ཨཱ་དི. ཏཾ་མཱུ་ལ་ཀ་ཏྟཱཏི ཏ་ཎྷཱ་མཱུ་ལ་ཀ་ཏྟཱ.
༩༧༤. ན ཨ་ཝ་ཀྐ་རཱི་ཡ་ཏཱི་ཏི ཨ་ན་ཝ་ཀཱ་རཱི, ཏཾ ཨ་ན་ཝ་ཀཱ་རིཾ ཀ་ཏྭཱ, ཏཾ པ་ད་ནྟ་རེ་ན ཝི་བྷཱ་ཝེ་ནྟོ ‘‘ཨ་ན་ཝ་ཀྐ་རི, ཏཾ ཀ་ཏྭཱ’’ཏི ཨཱ་ཧ. ཝི་ཀྑེ་པ་ནཾ ཨ་ཝ་ཡ་ཝ་ཏོ ཝི་བྷཱ་གོ. ཨ་ཏྟ་ཏོ ཨ་ཝི་ནི་བྦྷུ་ཛི་ཏྭཱཏི ཡྭཱ་ཡཾ དི་ཊྛི་ག་ཏི་ཀ་པ་རི་ཀ་པྤི་ཏོ ཨ་ཏྟཱ, ཏ་ཏོ ཨ་ཝི་སུཾ ཀ་ཏྭཱ.
༩༧༦. བ་ཧི་ཀ་ཏཱ་ནི རཱུ་པཱ་དཱི་ནི ཨུ་པ་ག་ནྟྭཱ པ་ཝ་ཏྟཱ ཏ་ཎྷཱ ཨུ་པཱ་དཱ་ཡཱ་ཏི ཝུ་ཏྟཱ་ཏི ཡོ་ཛ་ནཱ.
ཨེ་ཀ་ཙྩ་སྶ པུ་གྒ་ལ་སྶ ཨེ་ཀ་སྨིཾ ཨ་ཏྟ་བྷཱ་ཝེ ཀ་སྶ་ཙི ཏ་ཎྷཱ་ཝི་ཙ་རི་ཏ་སྶ ཨ་ས་མྦྷ་ཝོ, ཀ་སྶ་ཙི་དེ་ཝ ས་མྦྷ་ཝོ་ཏི ཨཱ་ཧ ‘‘ཀ་སྶ་ཙི ས་མྦྷ་ཝ་ད་སྶ་ན་ཏྠཾ ཝུ་ཏྟ’’ནྟི.
ཏ་ཎྷཱ་ཝི་ཙ་རི་ཏ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.
ཁུ་དྡ་ཀ་ཝ་ཏྠུ་ཝི་བྷ་ངྒ་ཝ་ཎྞ་ནཱ ནི་ཊྛི་ཏཱ.