༡༣. ཨ་པྤ་མ་ཉྙཱ་ཝི་བྷ་ངྒོ
༡. སུ་ཏྟ་ནྟ་བྷཱ་ཛ་ནཱི་ཡ་ཝ་ཎྞ་ནཱ
༦༤༢. དི་སཱ་དེ་སོ་དྷི་ནཱཏི ‘‘ཨེ་ཀཾ དི་ས’’ནྟི་ཨཱ་དི་དི་སོ་དྷི་ནཱ, ཝི་ཧཱ་ར་གཱ་མ་ནི་ག་མ་ན་ག་ར་ཛ་ན་པ་ད་ར་ཛྫཱ་དི་དེ་སོ་དྷི་ནཱ ཙ. ས་ཏྟོ་དྷི་ནཱཏི ‘‘ས་བྦཱ ཨི་ཏྠི་ཡོ, ས་བྦེ པུ་རི་སཱ, ཨ་རི་ཡཱ, ཨ་ན་རི་ཡཱ’’ཏི་ཨཱ་དི་ཝ་ས་པྤ་ཝ་ཏྟེ་ན ས་ཏྟོ་དྷི་ནཱ. ཨེ་ཏ་སྶཱཏི ཨེ་ཏ་སྶ པ་ད་སྶ, པ་ད་ཏྠ་སྶ ཝཱ. ཨ་ནུ་ཝ་ཏྟ་ཀནྟི ཨ་དྷི་ཀཱ་ར་ཝ་སེ་ན པ་ཝ་ཏྟ་ཀཾ. ཏཾ དྭ་ཡནྟི ཏ་ཐཱ-ས་དྡོ, ཨི་ཏི-ས་དྡོ་ཏི ཨུ་བྷ་ཡཾ. ‘‘ཏ་ཐཱ དུ་ཏི་ཡ’’ནྟི ཧི ཝུ་ཏྟེ ‘‘ཏ་ཐཱ-ས་དྡོ ཡ་ཐཱ མེ་ཏྟཱ་ས་ཧ་ག་ཏེ་ན ཙེ་ཏ་སཱ པུ་ར་ཏྠི་མཱ་དཱི་སུ ཨེ་ཀཾ དི་སཾ ཕ་རི་ཏྭཱ ཝི་ཧ་ར་ཏི, ཏ་ཐཱ དུ་ཏི་ཡ་མྤི དི་སཾ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཕ་རི་ཏྭཱ ཝི་ཧ་ར་ཏཱི’’ཏི ཨི་མ་མ་ཏྠཾ དཱི་པེ་ཏི. སེ་ས་དྭ་ཡེ་པི ཨེ་སེ་ཝ ན་ཡོ. ཡ་སྨཱ ཨི་ཏཱིཏི ཨ་ཡཾ ཨི་ཏི-ས་དྡོ པ་ཀཱ་ར་ཏྠེ, ཨེ་ཝ་ནྟི ཝུ་ཏྟཾ ཧོ་ཏི, ཏ་སྨཱ ‘‘ཡ་ཐཱ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཨེ་ཀཾ, དུ་ཏི་ཡཾ, ཏ་ཏི་ཡཾ, ཙ་ཏུ་ཏྠཾ དི་སཾ ཕ་རི་ཏྭཱ ཝི་ཧ་ར་ཏི, ཨེ་ཝཾ ཨུ་དྡྷཾ, ཨ་དྷོ, ཏི་རི་ཡཾ མེ་ཏྟཱ་ས་ཧ་ག་ཏེ་ན ཙེ་ཏ་སཱ ཕ་རི་ཏྭཱ ཝི་ཧ་ར་ཏཱི’’ཏི ཨི་མ་མ་ཏྠཾ དཱི་པེ་ཏི. ཏེ་ན ཝུ་ཏྟཾ ‘‘མེ་ཏྟཱ…པེ… ཏཾ དྭ་ཡ’’ནྟི. ཏ་སྶཱཏི དྭ་ཡ་སྶ. ཕ་ར་ཎ་ནྟ་རཱ་དི་ཊྛཱ་ནནྟི ཕ་ར་ཎ་ཏོ ཨ་ཉྙཾ ཕ་ར་ཎ་ནྟ་རཾ, ཏཾ ཨཱ་དི ཡ་སྶ, ཏཾ ཕ་ར་ཎ་ནྟ་རཱ་དི. ཕ་ར་ཎ་ནྟ་ར་ཉྷེ་ཏཾ མེ་ཏྟཱ་བྷཱ་ཝ་ནཱ་ཡ, ཡ་དི་དཾ ཝི་པུ་ལ་ཏཱ. ཨཱ་དི-ས་དྡེ་ན བྷུ་མྨ་ནྟ་ར་པ་གུ་ཎ་བྷཱ་ཝཱ་དི ག་ཡ྄ཧ་ཏི, ཏ་སྶ ཕ་ར་ཎ་ནྟ་རཱ་དི་ནོ ཋཱ་ནཾ ཋཱ་ན་བྷཱུ་ཏོ ‘‘ཝི་པུ་ལེ་ནཱ’’ཏི་ཨཱ་དི་ནཱ ཝུ་ཙྩ་མཱ་ནོ མེ་ཏྟཱ་བྷཱ་ཝ་ནཱ་ཝི་སེ་སོ. ཝུ་ཏྟ་པྤ་ཀཱ་ར་མ་ཏྟ་པ་རཱ་མ་ས་ན་སྶ ཏ་སྶ དྭ་ཡ་སྶ ཨ་ཊྛཱ་ནཾ ཨ་ནོ་ཀཱ་སོ་ཏི. ཨི་ཏི ཀ་ཏྭཱ ཨི་མི་ནཱ ཀཱ་ར་ཎེ་ན ན ཝུ་ཏྟཾ ཏཾ དྭ་ཡ་ནྟི ཨ་ཏྠོ.
༦༤༣. རཱ་ག་སྶཱཏི ཀཱ་མ་རཱ་ག་སྶ. སི་ནེ་ཧ་སྶཱཏི པུ་ཏྟ་སི་ནེ་ཧཱ་དི་སི་ནེ་ཧ་སྶ. ཝི་པ་ཏྟི་ཡཱཏི རཱ་ག་སི་ནེ་ཧ་ས་ངྑཱ་ཏཱ་ཡ མེ་ཏྟཱ་བྷཱ་ཝ་ནཱ་ཡ ཝི་པ་ཏྟི་ཡཱ ཝི་ནཱ་ས་སྶ. ཨ་ནུ་པྤ་ཏྟི་ཏོ ཧི་རོ་ཏྟ་པྤ་བ་ལེ་ན ཨ་ནུ་པྤ་ཛྫ་ན་ཏོ.
༦༤༥. ཨ་དྷི་མུ་ཉྩི་ཏྭཱཏི བྷཱ་ཝ་ནཱ་ཙི་ཏྟཾ ཨཱ་ར་མྨ་ཎེ སུ་ཊྛུ ཝི་སྶ་ཛྫེ་ཏྭཱ, ཏཾ པ་ནེ་ཏྠ ཨ་དྷི་མུ་ཙྩ་ནཾ ཡ་སྨཱ ཕ་ར་ཎ་ཝ་སེ་ནེ་ཝ ཧོ་ཏི, ཏ་སྨཱ ཝུ་ཏྟཾ ‘‘སུ་ཊྛུ པ་སཱ་རེ་ཏྭཱ’’ཏི. ཡ་སྨཱ པ་ན ཨཱ་ར་མྨ་ཎེ སུ་ཊྛུ ཨ་སཾ་ས་པྤ་ན་ཝ་སེ་ནེ་ཝ ཏཾ མེ་ཏྟཱ་བྷཱ་ཝ་ནཱ་ཡ ཨ་དྷི་མུ་ཙྩ་ནཾ ཧོ་ཏི, ཏ་སྨཱ ‘‘བ་ལ་ཝ་ཏཱ ཝཱ ཨ་དྷི་མོ་ཀྑེ་ན ཨ་དྷི་མུ་ཙྩི་ཏྭཱ’’ཏི ཙ ཝུ་ཏྟཾ.
༦༤༨. ཨེ་ཏེ་སཾ པ་དཱ་ནཾ ས་བྦེ་ན ས་ཀ་ལེ་ན དི་སཱ་དེ་སཱ་དི་བྷེ་དེ་ན ཨ་ཝ་དྷི་ནཱ. ས་བྦཱ་ཝ་དྷི་དི་སཱ་དི་ཕ་ར་ཎཱ་ཀཱ་རེ་ཧཱིཏི ས་བྦཱ་ཝ་དྷི་བྷཱུ་ཏ་དི་སཱ་དེ་ས་པུ་གྒ་ལ་ཕ་ར་ཎ་པྤ་ཀཱ་རེ་ཧི.
༦༥༠. ཝི་གྷཱ་ཏ་ཝ་སེ་ནཱཏི ཝི་ཀྑ་མྦྷ་ན་ཝ་སེ་ན.
སུ་ཏྟ་ནྟ་བྷཱ་ཛ་ནཱི་ཡ་ཝ་ཎྞ་ནཱ ནི་ཊྛི་ཏཱ.
༣. པ་ཉྷ་པུ་ཙྪ་ཀ་ཝ་ཎྞ་ནཱ
༦༩༩. ཀ་ཐི་ཏཱ་ནཾ ཀུ་ས་ལཱ་དི་དྷ་མྨཱ་ནཾ. ཨི་མ་སྨིཾ པ་ན ཨ་པྤ་མ་ཉྙཱ་ཝི་བྷ་ངྒེ ཀ་ཐི་ཏཱ ཨ་པྤ་མ་ཉྙཱ, ཏཱ ཙ ས་བྷཱ་ཝ་ཏོ ལོ་ཀི་ཡཱ ཨེ་ཝ, ན ཁ་ནྡྷ་ཝི་བྷ་ངྒཱ་དཱི་སུ ཀ་ཐི་ཏཱ ཁ་ནྡྷཱ་ད་ཡོ ཝི་ཡ ལོ་ཀུ་ཏྟ་རཱ་པཱི་ཏི ཨེ་ཀཾ་ས་ཏོ ས་བྦཱ་སཾ ཨ་པྤ་མ་ཉྙཱ་ནཾ ལོ་ཀི་ཡ་བྷཱ་ཝ་མེ་ཝ དཱི་པེ་ཏུཾ ཨ་ཊྛ་ཀ་ཐཱ་ཡཾ ‘‘ཨི་མ་སྨིཾ པ་ནཱ’’ཏི་ཨཱ་དི ཝུ་ཏྟ་ནྟི ཨི་མ་མ་ཏྠཾ ད་སྶེ་ནྟོ ཨཱ་ཧ ‘‘ཨི་མ་སྨིཾ པ་ན…པེ… ཧོ་ཏཱི’’ཏི.
པ་ཉྷ་པུ་ཙྪ་ཀ་ཝ་ཎྞ་ནཱ ནི་ཊྛི་ཏཱ.
ཨ་པྤ་མ་ཉྙཱ་ཝི་བྷ་ངྒ་ཝ་ཎྞ་ནཱ ནི་ཊྛི་ཏཱ.