༦. ས་ཧ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ
༦. ‘‘ཨ་ཉྙ་མ་ཉྙ་སྶཱ་ཏི ཨ་ཉྙོ ཨ་ཉྙ་སྶཱ’’ཏི པོ་རཱ་ཎ་པཱ་ཋོ. པཱ་ལི༹་ཡཾ པ་ན ‘‘ཨ་ཉྙ་མ་ཉྙཾ ས་ཧ་ཛཱ་ཏ་པ་ཙྩ་ཡེ་ན པ་ཙྩ་ཡོ’’ཏི ཨེ་ཏྠ ཝུ་ཏྟ་སྶ ‘‘ཨ་ཉྙ་མ་ཉྙ’’ནྟི ཨི་མ་སྶ ཨ་ཏྠོ ཝ་ཏྟ་བྦོ, ན ཨ་ཝུ་ཏྟ་སྶ ‘‘ཨ་ཉྙ་མ་ཉྙ་སྶཱ’’ཏི ཨི་མ་སྶ, ན ཙ ས་མཱ་ན་ཏྠ་སྶ་པི ས་དྡ་ནྟ་ར་སྶ ཨ་ཏྠེ ཝུ་ཏྟེ ས་དྡ་ནྟ་ར་སྶ ཨ་ཏྠོ ཝུ་ཏྟོ ཧོ་ཏི, ཏ་སྨཱ ‘‘ཨ་ཉྙ་མ་ཉྙ་ནྟི ཨ་ཉྙོ ཨ་ཉྙ་སྶཱ’’ཏི པ་ཋ་ནྟི. ཨོ་ཀྐ་ནྟཱི་ཏི པ་ཉྩ་ཝོ་ཀཱ་ར་པ་ཊི་ས་ནྡྷི་ཡེ་ཝ ཝུ་ཙྩ་ཏི, ན ཨི་ཏ་རཱ་ཏི ཨི་མི་ནཱ ཨ་དྷི་པྤཱ་ཡེ་ནཱ་ཧ ‘‘པ་ཉྩ་ཝོ་ཀཱ་ར་བྷ་ཝེ པ་ཊི་ས་ནྡྷི་ཀྑ་ཎེ’’ཏི. རཱུ་པི་ནོ དྷ་མྨཱ ཨ་རཱུ་པཱི་ནཾ དྷ་མྨཱ་ནནྟི ཨི་དཾ ཡ་དི་པི པུ་བྦེ ‘‘ཨོ་ཀྐ་ནྟི་ཀྑ་ཎེ ནཱ་མ་རཱུ་པ’’ནྟི ཝུ་ཏྟཾ, ཏ་ཐཱ་པི ན ཏེ་ན ཁ་ཎ་ནྟ་རེ པ་ཙྩ་ཡ་བྷཱ་ཝོ རཱུ་པཱི་ནཾ ནི་ཝཱ་རི་ཏོ་ཏི ཏ་ནྣི་ཝཱ་ར་ཎ་ཏྠཾ ཝུ་ཏྟཾ. ཀ་ཉྩི ཀཱ་ལེཏི ཀེ་ཙི ཀི་སྨི་ཉྩི ཀཱ་ལེ་ཏི ཝཱ ཨ་ཏྠོ. ཏེ་ན རཱུ་པི་ནོ དྷ་མྨཱ ཀེ་ཙི ཝ་ཏྠུ་བྷཱུ་ཏཱ ཀི་སྨི་ཉྩི པ་ཊི་ས་ནྡྷི་ཀཱ་ལེ་ཏི རཱུ་པ་ནྟ་རཱ་ནཾ ཝ་ཏྠུ་སྶ ཙ ཀཱ་ལ་ནྟ་རེ ཨ་རཱུ་པཱི་ནཾ ས་ཧ་ཛཱ་ཏ་པ་ཙྩ་ཡཾ པུ་བྦེ ཨ་ནི་ཝཱ་རི་ཏཾ ནི་ཝཱ་རེ་ཏི. ཨེ་ཝ་ཉྩ ཀ་ཏྭཱ ‘‘ཀ་ཉྩི ཀཱ་ལ’’ནྟི ཝཱ ‘‘ཀི་སྨི་ཉྩི ཀཱ་ལེ’’ཏི ཝཱ ཝ་ཏྟ་བྦེ ཝི་བྷ་ཏྟི་ཝི་པ་ལླཱ་སོ ཀ་ཏོ. ཏེ་ན ཧི ‘‘ཀ་ཉྩཱི’’ཏི ཨུ་པ་ཡོ་གེ་ཀ་ཝ་ཙ་ནཾ ‘‘རཱུ་པི་ནོ དྷ་མྨཱ’’ཏི ཨེ་ཏེ་ན ས་ཧ ས་མྦ་ནྡྷེ་ན པ་ཙྩ་ཏྟ་བ་ཧུ་ཝ་ཙ་ན་སྶ ཨཱ་དེ་སོ, ‘‘ཀཱ་ལེ’’ཏི ཨི་མི་ནཱ ས་མྦ་ནྡྷེ་ན བྷུ་མྨེ་ཀ་ཝ་ཙ་ན་སྶཱ་ཏི ཝི་ཉྙཱ་ཡ་ཏི. པུ་རི་མེ་ན ཙ ‘‘ཨེ་ཀོ ཁ་ནྡྷོ ཝ་ཏྠུ ཙ ཏི་ཎྞ་ནྣཾ ཁ་ནྡྷཱ་ན’’ནྟི་ཨཱ་དི་ནཱ ནཱ་མ་ས་ཧི་ཏ་སྶེ་ཝ ཝ་ཏྠུ་སྶ ‘‘ནཱ་མ་སྶ པ་ཙྩ་ཡོ’’ཏི ཝ་ཏྟ་བྦ་ཏྟེ ཨཱ་པ་ནྣེ ཨེ་ཏེ་ན ཀེ་ཝ་ལ་སྶེ་ཝ ཏ་ཐཱ ཝ་ཏྟ་བྦ་ཏཾ ད་སྶེ་ཏི.
ཏ་ཡོ ན ཨ་ཉྙ་མ་ཉྙ་ཝ་སེ་ནཱཏི ལ་བྦྷ་མཱ་ནེ་པི ཀ་ཏྠ་ཙི ཨ་ཉྙ་མ་ཉྙ་ས་ཧ་ཛཱ་ཏ་པ་ཙྩ་ཡ་བྷཱ་ཝེ ཝ་ཙ་ནེ་ན ཨ་ས་ངྒ་ཧི་ཏ་ཏྟཱ ཏ་སྶ ཨེ་ཝཾ ཝུ་ཏྟ་ནྟི ད་ཊྛ་བྦཾ. ཙ་ཏུ་ས་མུ་ཊྛཱ་ནི་ཀ་སྶ རཱུ་པ་སྶ ཨེ་ཀ་དེ་ས་བྷཱུ་ཏེ ཀ་མྨ་ས་མུ་ཊྛཱ་ན་རཱུ་པེ ས་མུ་དཱ་ཡེ་ཀ་དེ་ས་ཝ་སེ་ན སཱ་མི་ཝ་ཙ་ནཾ ད་ཊྛ་བྦཾ, ནི་དྡྷཱ་ར་ཎེ ཝཱ.
ས་ཧ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.