༢. ཨཱ་ར་མྨ་ཎ་པ་ཙྩ་ཡ་ནི་དྡེ་ས་ཝ་ཎྞ་ནཱ
༢. ཨུ་པྤ་ཛྫ་ན་ཀྑ་ཎེ་ཡེ་ཝཱཏི ཨེ་ཏེ་ན ཝ་ཏྟ་མཱ་ན་ཀྑ་ཎེ་ཀ་དེ་སེ་ན ས་བྦཾ ཝ་ཏྟ་མཱ་ན་ཀྑ་ཎཾ ག་ཡ྄ཧ་ཏཱི་ཏི ད་ཊྛ་བྦཾ. ན ཧི ཨུ་པྤ་ཛྫ་ན་ཀྑ་ཎེ་ཡེ་ཝ ཙ་ཀྑུ་ཝི་ཉྙཱ་ཎཱ་དཱི་ནཾ རཱུ་པཱ་དཱི་ནི ཨཱ་ར་མྨ་ཎ་པ་ཙྩ་ཡོ, ཨ་ཐ ཁོ ས་བྦ་སྨིཾ ཝ་ཏྟ་མཱ་ན་ཀྑ་ཎེ་ཏི. ཏེ་ན ཨཱ་ལ་མྦི་ཡ་མཱ་ནཱ་ན་མྤི རཱུ་པཱ་དཱི་ནཾ ཙ་ཀྑུ་ཝི་ཉྙཱ་ཎཱ་དི་ཝ་ཏྟ་མཱ་ན་ཏཱ་ཡ པུ་རེ པ་ཙྪཱ ཙ ཝི་ཛྫ་མཱ་ནཱ་ནཾ ཨཱ་ར་མྨ་ཎ་པ་ཙྩ་ཡ་ཏྟཱ་བྷཱ་ཝཾ ད་སྶེ་ཏི, ཀོ པ་ན ཝཱ་དོ ཨ་ནཱ་ལ་མྦི་ཡ་མཱ་ནཱ་ནཾ. ན ཨེ་ཀ་ཏོ ཧོ་ནྟཱིཏི ནཱི་ལཱ་དཱི་ནི ས་བྦ་རཱུ་པཱ་ནི ས་ཧ ན ཧོ་ནྟི, ཏ་ཐཱ ས་དྡཱ་ད་ཡོ་པཱི་ཏི ཨ་ཏྠོ. ‘‘ཡཾ ཡ’’ནྟི ཧི ཝ་ཙ་ནཾ རཱུ་པཱ་དཱི་ནི བྷི་ནྡ་ཏཱི་ཏི. ཏ་ཏྠ པུ་རི་མེ་ན་ཏྠེ་ན ‘‘ཨུ་པྤ་ཛྫ་ནྟཱི’’ཏི ཝ་ཙ་ནེ་ན ཨཱ་ར་མྨ་ཎ་པ་ཙྩ་ཡ་བྷཱ་ཝ་ལ་ཀྑ་ཎ་དཱི་པ་ན་ཏྠཾ ‘‘ཡཾ ཡཾ དྷ་མྨ’’ནྟི་ཨཱ་དི ཝུ་ཏྟ་ནྟི ད་སྶེ་ཏི, པ་ཙྪི་མེ་ན ‘‘ཡཾ ཡ’’ནྟི ཝ་ཙ་ནེ་ན རཱུ་པཱ་དི་བྷེ་ད་དཱི་པ་ན་ཏྠ་ནྟི. ‘‘ཡཾ ཡཾ ཝཱ པ་ནཱ་ར་བྦྷཱ’’ཏི ཨེ་ཏ་སྶ ཝ་ཎྞ་ནཱ་ཡཾ ད་སྶི་ཏ་ས་བྦཱ་ར་མྨ་ཎཱ་དི་ཝ་སེ་ན ཝཱ ཨི་དྷཱ་པི ཨ་ཏྠོ ག་ཧེ་ཏ་བྦོ་ཏི.
ཨེ་ཝཾ ཝུ་ཏྟནྟི ཡ་ཐཱ ན་དཱི་པ་བྦ་ཏཱ་ནཾ ས་ནྡ་ནཾ ཋཱ་ན་ཉྩ པ་ཝ་ཏྟཾ ཨ་ཝི་ར་ཏཾ ཨ་ཝི་ཙྪི་ནྣ་ནྟི ས་ནྡ་ནྟི ཏི་ཊྛ་ནྟཱི་ཏི ཝ་ཏྟ་མཱ་ན་ཝ་ཙ་ནཾ ཝུ་ཏྟཾ, ཨེ་ཝཾ ‘‘ཡེ ཡེ དྷ་མྨཱ’’ཏི ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ནཾ ས་བྦ་ས་ངྒ་ཧ་ས་མུ་དཱ་ཡ་ཝ་སེ་ན ག་ཧི་ཏ་ཏྟཱ ཏེ་སཾ ཨུ་པྤ་ཛྫ་ནཾ པ་ཝ་ཏྟ་ནཾ ཨ་ཝི་ར་ཏ་ནྟི ཨུ་པྤ་ཛྫ་ནྟཱི་ཏི ཝ་ཏྟ་མཱ་ན་ཝ་ཙ་ནཾ ཝུ་ཏྟ་ནྟི ཨ་དྷི་པྤཱ་ཡོ. ཨི་མེ པ་ན ན ཧེ་ཏཱ་དི་པ་ཙྩ་ཡཱ ས་བྦེ་པི ཨ་ཏཱི་ཏཱ་ནཱ་ག་ཏཱ་ནཾ ཧོ་ནྟི. ན ཧི ཨ་ཏཱི་ཏོ ཙ ཨ་ནཱ་ག་ཏོ ཙ ཨ་ཏྠི, ཡ་སྶེ་ཏེ པ་ཙྩ་ཡཱ སི་ཡུཾ. ཨེ་ཝ་ཉྩ ཀ་ཏྭཱ ཨ་ཏཱི་ཏ་ཏྟི་ཀེ ཨ་ཏཱི་ཏཱ་ནཱ་ག་ཏཱ་ནཾ ན ཀོ་ཙི པ་ཙྩ་ཡོ ཝུ་ཏྟོ, ཏ་སྨཱ ཨི་དྷཱ་པི ‘‘ཨུ་པྤ་ཛྫ་ནྟཱི’’ཏི ཝ་ཙ་ནེ་ན ཡེ་སཾ རཱུ་པཱ་ད་ཡོ ཨཱ་ར་མྨ་ཎ་དྷ་མྨཱ ཨཱ་ར་མྨ་ཎ་པ་ཙྩ་ཡཱ ཧོ་ནྟི, ཏེ པ་ཙྩུ་པྤ་ནྣཱ་ཝ ད་སྶི་ཏཱ་ཏི ད་ཊྛ་བྦཱ. ཏེ་སུ ཧི ད་སྶི་ཏེ་སུ ཨ་ཏཱི་ཏཱ་ནཱ་ག་ཏེ་སུ ཏཾ་ཏཾ་པ་ཙྩ་ཡཱ ཨ་ཧེ་སུཾ བྷ་ཝི་སྶ་ནྟི ཙཱ་ཏི ཨ་ཡ་མ་ཏྠོ ད་སྶི་ཏོ ཧོ་ཏི, ན པ་ན ཏཾ་ཏཾ་པ་ཙྩ་ཡ་ཝ་ནྟ་ཏཱ. པ་ཙྩ་ཡ་ཝ་ནྟོ ཧི པ་ཙྩུ་པྤ་ནྣཱ་ཡེ་ཝཱ་ཏི.
ཨེ་ཏྠ ཙ ‘‘ཡཾ ཡཾ དྷ་མྨཾ ཨཱ་ར་བྦྷཱ’’ཏི ཨེ་ཀ་ཝ་ཙ་ན་ནི་དྡེ་སཾ ཀ་ཏྭཱ པུ་ན ‘‘ཏེ ཏེ དྷ་མྨཱ’’ཏི བ་ཧུ་ཝ་ཙ་ན་ནི་དྡེ་སོ ‘‘ཡཾ ཡ’’ནྟི ཝུ་ཏྟ་སྶ ཨཱ་ར་མྨ་ཎ་དྷ་མྨ་སྶ ཨ་ནེ་ཀ་བྷཱ་ཝོ་པི ཨ་ཏྠཱི་ཏི ད་སྶ་ན་ཏྠོ. ཙ་ཏྟཱ་རོ ཧི ཁ་ནྡྷཱ ས་ཧེ་ཝ ཨཱ་ར་མྨ་ཎ་པ་ཙྩ་ཡཱ ཧོ་ནྟི, ཏེ ས་བྦེ་པི ཨཱ་ར་བྦྷ ཨུ་པྤ་ཛྫ་མཱ་ན་མྤི ཏེ་སུ ཨེ་ཀེ་ཀཾ ཨཱ་ར་བྦྷ ཨུ་པྤ་ཛྫ་མཱ་ནཾ ན ན ཧོ་ཏི, ཏ་སྨཱ ཝེ་ད་ནཱ་དཱི་སུ ཕ་སྶཱ་དཱི་སུ ཙ ཨེ་ཀེ་ཀ་སྶ་པི ཨཱ་ར་མྨ་ཎ་པ་ཙྩ་ཡ་བྷཱ་ཝ་ད་སྶ་ན་ཏྠཾ ‘‘ཡཾ ཡ’’ནྟི ཝུ་ཏྟཾ, ས་བྦེ་སཾ ཨེ་ཀ་ཙི་ཏྟུ་པྤཱ་ད་པ་རི་ཡཱ་པ་ནྣཱ་ནཾ ཨཱ་ར་མྨ་ཎ་པ་ཙྩ་ཡ་བྷཱ་ཝ་ད་སྶ་ན་ཏྠཾ ‘‘ཏེ ཏེ’’ཏི. ཏ་ཏྠ ཡོ ཙ རཱུ་པཱ་དི་ཀོ ཨེ་ཀེ་ཀོ་ཝ ཡཾ་ཡཾ-ས་དྡེ་ན ཝུ་ཏྟོ, ཡེ ཙ ཨ་ནེ་ཀེ ཕ་སྶཱ་ད་ཡོ ཨེ་ཀེ་ཀ་ཝ་སེ་ན ཡཾ་ཡཾ-ས་དྡེ་ན ཝུ་ཏྟཱ, ཏེ ས་བྦེ ག་ཧེ་ཏྭཱ ‘‘ཏེ ཏེ’’ཏི ཝུ་ཏྟ་ནྟི ད་ཊྛ་བྦཾ. ཨ་ཐ ཝཱ ཡ་སྨིཾ ཀཱ་ལེ ཨཱ་ར་བྦྷ ཨུ་པྤ་ཛྫ་ནྟི, ཏ་སྨིཾ ཀཱ་ལེ ནཱི་ལཱ་དཱི་སུ ཙི་ཏྟུ་པྤཱ་དེ་སུ ཙ ཨེ་ཀེ་ཀ་མེ་ཝ ཨཱ་ར་བྦྷ ཨུ་པྤ་ཛྫ་ནྟཱི་ཏི ད་སྶ་ན་ཏྠཾ ‘‘ཡཾ ཡ’’ནྟི ཝུ་ཏྟཾ, ཏེ པ་ན ཨཱ་ལ་མྦི་ཡ་མཱ་ནཱ རཱུ་པཱ་ར་མྨ་ཎ་དྷ་མྨཱ ཙ ཨ་ནེ་ཀེ, ཏ་ཐཱ ས་དྡཱ་དི་ཨཱ་ར་མྨ་ཎ་དྷ་མྨཱ ཙཱ་ཏི ད་སྶ་ན་ཏྠཾ ‘‘ཏེ ཏེ’’ཏི.
ནི་བྦཱ་ནཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་སྶ ཨ་པ་རི་ཡཱ་པ་ནྣ་ཏོ ཀུ་ས་ལ་ཝི་པཱ་ཀ་སྶ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏཱིཏི ཨི་དཾ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎེ་ན ཁ་ནྡྷ་པ་ཊི་བ་དྡྷཱ་ནུ་སྶ་ར་ཎ་ཀཱ་ལེ ནི་བྦཱ་ན་མྤི རཱུ་པཱ་ཝ་ཙ་ར་ཀུ་ས་ལ་ཀི་རི་ཡཱ་ནཾ ཨཱ་ར་མྨ་ཎཾ ཧོ་ཏཱི་ཏི ཨི་མི་ནཱ ཨ་དྷི་པྤཱ་ཡེ་ན ཝུ་ཏྟཾ. ཨེ་ཝཾ ས་ཏི ཡ་ཐཱ ‘‘ཨ་པྤ་མཱ་ཎཱ ཁ་ནྡྷཱ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎ་སྶ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༢.༡༢.༥༨) ཝུ་ཏྟཾ, ཨེ་ཝཾ ‘‘ནི་བྦཱ་ན’’ནྟི ཙ ཝ་ཏྟ་བྦཾ སི་ཡཱ, ན ཙ ཏཾ ཝུ་ཏྟཾ. ན ཧི ནི་བྦཱ་ནཾ པུ་བྦེ ནི་ཝུ་ཊྛཾ ཨ་ས་ངྑ་ཏ་ཏྟཱ, ན ཙ པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎེ་ན པུ་བྦེ ནི་ཝུ་ཊྛེ་སུ ཨ་པྤ་མཱ་ཎ་ཀྑ་ནྡྷེ་སུ ཉཱ་ཏེ་སུ ནི་བྦཱ་ན་ཛཱ་ན་ནེ ན ཏེ་ན པ་ཡོ་ཛ་ནཾ ཨ་ཏྠི. ཡ་ཐཱ ཧི ཙེ་ཏོ་པ་རི་ཡ་ཉཱ་ཎཾ ཙི་ཏྟཾ ཝི་བྷཱ་ཝེ་ནྟ་མེ་ཝ ཙི་ཏྟཱ་ར་མྨ་ཎ་ཛཱ་ན་ན་སྶ ཀཱ་མཱ་ཝ་ཙ་ར་སྶ པ་ཙྩ་ཡོ ཧོ་ཏི, ཨེ་ཝ་མི་ད་མྤི ཨ་པྤ་མཱ་ཎ་ཀྑ་ནྡྷེ ཝི་བྷཱ་ཝེ་ནྟ་མེ་ཝ ཏ་དཱ་ར་མྨ་ཎ་ཛཱ་ན་ན་སྶ ཀཱ་མཱ་ཝ་ཙ་ར་སྶ པ་ཙྩ་ཡོ ཧོ་ཏཱི་ཏི. དི་ཊྛ་ནི་བྦཱ་ནོ་ཡེ་ཝ ཙ པུ་བྦེ ནི་ཝུ་ཊྛེ ཨ་པྤ་མཱ་ཎ་ཀྑ་ནྡྷེ ཨ་ནུ་སྶ་ར་ཏི, ཏེ་ན ཡ་ཐཱ་དི་ཊྛ་མེ་ཝ ནི་བྦཱ་ནཾ ཏེ་སཾ ཁ་ནྡྷཱ་ནཾ ཨཱ་ར་མྨ་ཎ་ནྟི ད་ཊྛ་བྦཾ, ན པ་ན པུ་བྦེ་ནི་ཝཱ་སཱ་ནུ་སྶ་ཏི་ཉཱ་ཎེ་ན ཏ་དཱ་ར་མྨ་ཎ་ཝི་བྷཱ་ཝ་ནཾ ཀཱ་ཏ་བྦཾ. ཝི་བྷཱུ་ཏ་མེ་ཝ ཧི ཏཾ ཏ་སྶཱ་ཏི. ཨེ་ཝཾ ཨ་ནཱ་ག་ཏཾ་ས་ཉཱ་ཎེ་པི ཡ་ཐཱ་ར་ཧཾ ཡོ་ཛེ་ཏ་བྦཾ, ཏ་སྨཱ ནི་བྦཱ་ནཾ ན ཀ་སྶ་ཙི རཱུ་པཱ་ཝ་ཙ་ར་སྶ ཨཱ་ར་མྨ་ཎ་ནྟི ‘‘ཙ་ཏུ་ནྣཾ རཱ་སཱི་ན’’ནྟི ཝ་ཏྟུཾ ཡུ་ཏྟཾ.
ཨཱ་ར་མྨ་ཎ་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.