༡༨. མ་གྒ་པ་ཙྩ་ཡ་ནི་དྡེ་ས་ཝ་ཎྞ་ནཱ
༡༨. པ་ཉྙཱ ཝི་ཏ་ཀྐོ ས་མྨཱ་ཝཱ་ཙཱ་ཀ་མྨ་ནྟཱ་ཛཱི་ཝཱ ཝཱི་རི་ཡཾ ས་ཏི ས་མཱ་དྷི མི་ཙྪཱ་དི་ཊྛི མི་ཙྪཱ་ཝཱ་ཙཱ་ཀ་མྨ་ནྟཱ་ཛཱི་ཝཱ་ཏི ཨི་མཱ་ནི དྭཱ་ད་ས་ངྒཱ་ནཱིཏི ཨེ་ཏྠ དུ་ཝི་དྷ་མྤི ས་ངྐ་པྤཾ ཝཱི་རི་ཡཾ ས་མཱ་དྷི་ཉྩ ཝི་ཏ་ཀྐ་ཝཱི་རི་ཡ་ས་མཱ་དྷི་ཝ་ཙ་ནེ་ཧི ས་ངྒ་ཎྷི་ཏྭཱ ‘‘ཨ་ཡ་མེ་ཝ ཁོ, ཨཱ་ཝུ་སོ, ཨ་ཊྛ་ངྒི་ཀོ མི་ཙྪཱ་མ་གྒོ ཨ་བྲ་ཧྨ་ཙ་རི་ཡཾ. སེ་ཡྻ་ཐི་དཾ – མི་ཙྪཱ་དི་ཊྛི…པེ… མི་ཙྪཱ་ས་མཱ་དྷཱི’’ཏི་ཨཱ་དཱི་ཧི (སཾ. ནི. ༥.༡༨) སུ་ཏྟ་ཝ་ཙ་ནེ་ཧི མི་ཙྪཱ་ཝཱ་ཙཱ་ཀ་མྨ་ནྟཱ་ཛཱི་ཝེ་སུ་པི མ་གྒ་ངྒ་ཝོ་ཧཱ་ར་སི་དྡྷི་ཏོ ཏེ་ཧི ས་ཧ དྭཱ་ད་ས་ངྒཱ་ནི ཨི་དྷ ལ་བྦྷ་མཱ་ནཱ་ནི ཙ ཨ་ལ་བྦྷ་མཱ་ནཱ་ནི ཙ མ་གྒ་ངྒ་ཝ་ཙ་ན་སཱ་མ་ཉྙེ་ན ས་ངྒ་ཎྷི་ཏྭཱ ཝུ་ཏྟཱ་ནི. ཨེ་ཝ་ཉྷི སུ་ཏྟ་ནྟ་ཝོ་ཧཱ་རོ་པི ད་སྶི་ཏོ ཧོ་ཏི, ཨེ་ཝཾ པ་ན ད་སྶེ་ནྟེ་ན ‘‘མ་གྒ་པ་ཙྩ་ཡ་ནི་དྡེ་སེ མ་གྒ་ངྒཱ་ནཱི’’ཏི ཨེ་ཝཾ ཨུ་དྡྷ་རི་ཏྭཱ ཏ་སྶ པཱ་ཋ་ག་ཏ་སྶ མ་གྒ་ངྒ་ས་དྡ་སྶ ཨ་ཏྠ་བྷཱ་ཝེ་ན ཨི་མཱ་ནི དྭཱ་ད་ས་ངྒཱ་ནི ན ད་སྶེ་ཏ་བྦཱ་ནི. ན ཧི པཱ་ལི༹་ཡཾ མ་གྒ་ངྒ་ས་དྡ་སྶ མི་ཙྪཱ་ཝཱ་ཙཱ་ཀ་མྨ་ནྟཱ་ཛཱི་ཝོ་ཏི ཨ་ཏྠོ ཝ་ཏྟ་བྦོ. ཏེ་ཧི ས་མྨཱ་ཝཱ་ཙཱ་དཱི་ཧི པ་ཊི་པ་ཀྑཱ ཙེ་ཏ་ནཱ་དྷ་མྨཱ ཏ་པྤ་ཊི་པ་ཀྑ་བྷཱ་ཝ་ཏོ་ཡེ་ཝ ‘‘མི་ཙྪཱ་མ་གྒ་ངྒཱ་ནཱི’’ཏི སུ་ཏྟེ ཝུ་ཏྟཱ་ནི, ན པ་ན མ་གྒ་པ་ཙྩ་ཡ་བྷཱ་ཝེ་ན. མ་གྒ་ངྒཱ་ནི མ་གྒ་པ་ཙྩ་ཡ་བྷཱུ་ཏཱ་ནི ཙ ཨི་དྷ པཱ་ལི༹་ཡཾ ‘‘མ་གྒ་ངྒཱ་ནཱི’’ཏི ཝུ་ཏྟཱ་ནི, ན ཙ ཨ་ཉྙཾ ཨུ་དྡྷ་རི་ཏྭཱ ཨ་ཉྙ་སྶ ཨ་ཏྠོ ཝ་ཏྟ་བྦོ. པ་རི་ཡཱ་ཡ་ནི་པྤ་རི་ཡཱ་ཡ་མ་གྒ་ངྒ་ད་སྶ་ན་ཏྠཾ པ་ན ཨི་ཙྪ་ནྟེ་ན པཱ་ལི༹་ག་ཏ་མ་གྒ་ངྒ་ས་དྡ་པ་ཏི་རཱུ་པ་ཀོ ཨ་ཉྙོ མ་གྒ་ངྒ་ས་དྡོ ཨུ་བྷ་ཡ་པ་ད་ཏྠོ ཨུ་དྡྷ་རི་ཏ་བྦོ ཡ་ཐཱ ‘‘ཨ་དྷི་ཀ་ར་ཎཾ ནཱ་མ ཙ་ཏྟཱ་རི ཨ་དྷི་ཀ་ར་ཎཱ་ནཱི’’ཏི (པཱ་རཱ. ༣༨༦, ༤༠༥). ཨི་དྷ པ་ན ‘‘མ་གྒ་པ་ཙྩ་ཡ་ནི་དྡེ་སེ མ་གྒ་ངྒཱ་ནཱི’’ཏི པཱ་ལི༹་ག་ཏོ་ཡེ་ཝ མ་གྒ་ངྒ་ས་དྡོ ཨུ་དྡྷ་ཊོ, ན ཙ ཨ་ཏྠུ་དྡྷ་ར་ཎ་ཝ་སེ་ན ད་སྶེ་ཏྭཱ ཨ་དྷི་པྤེ་ཏ་ཏྠ་ནི་ཡ་མ་ནཾ ཀ་ཏཾ, ཏ་སྨཱ པཱ་ལི༹་ཡཾ མ་གྒ་ངྒ་ས་དྡ་སྶ མི་ཙྪཱ་ཝཱ་ཙཱ་དཱི་ནཾ ཨ་ཏྠ་བྷཱ་ཝོ མཱ ཧོ་ཏཱུ་ཏི ‘‘ས་མྨཱ་དི་ཊྛི་ས་ངྐ་པྤ་ཝཱ་ཙཱ་ཀ་མྨ་ནྟཱ་ཛཱི་ཝ་ཝཱ་ཡཱ་མ་ས་ཏི་ས་མཱ་དྷི་མི་ཙྪཱ་དི་ཊྛི་ས་ངྐ་པྤ་ཝཱ་ཡཱ་མ་ས་མཱ་དྷ་ཡོ་ཏི ཨི་མཱ་ནི དྭཱ་ད་ས་ངྒཱ་ནཱི’’ཏི པ་ཋ་ནྟི. ན་ནུ ཨེ་ཝཾ ‘‘ཨ་ཧེ་ཏུ་ཀ་ཙི་ཏྟུ་པྤཱ་ད་ཝ་ཛྫེ་སཱུ’’ཏི ན ཝ་ཏྟ་བྦཾ. ན ཧི ཏེ་སུ ས་མྨཱ་དི་ཊྛི་ཨཱ་ད་ཡོ ཡ་ཐཱ་ཝུ་ཏྟཱ ས་ནྟི, ཡེ ཝ་ཛྫེ་ཏ་བྦཱ སི་ཡུ་ནྟི? ན, ཨུ་པྤ་ཏྟི་ཊྛཱ་ན་ནི་ཡ་མ་ན་ཏྠ་ཏྟཱ. ཨ་ཧེ་ཏུ་ཀ་ཙི་ཏྟུ་པྤཱ་ད་ཝ་ཛྫེ་སྭེ་ཝ ཨེ་ཏཱ་ནི ཨུ་པྤ་ཛྫ་ནྟི, ནཱ་ཧེ་ཏུ་ཀ་ཙི་ཏྟུ་པྤཱ་དེ་སུ. ཏ་ཏྠུ་པྤ་ནྣཱ་ནི དྭཱ་ད་ས་ངྒཱ་ནཱི་ཏི ཨ་ཡ་ཉྷེ་ཏྠ ཨ་ཏྠོ.
མ་གྒ་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.