༡༦. ཨི་ནྡྲི་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ
༡༦. ཨ་རཱུ་པ་ཛཱི་ཝི་ཏི་ནྡྲི་ཡ་མྤི ས་ངྒ་ཧི་ཏནྟི མི་སྶ་ཀ་ཏྟཱ ཛཱི་ཝི་ཏི་ནྡྲི་ཡཾ ན ས་བྦེ་ན ས་བྦཾ ཝ་ཛྫི་ཏ་བྦ་ནྟི ཨ་དྷི་པྤཱ་ཡོ.
ཨ་ཝི་ནི་བྦྷུ་ཏྟ་དྷ་མྨཱ་ནནྟི ཨེ་ཏྠ ཨ་ཡཾ ཨ་དྷི་པྤཱ་ཡོ – རཱུ་པཱ་རཱུ་པཱ་ནཾ ཨ་ཉྙ་མ་ཉྙཾ ཨ་ཝི་ནི་བྦྷུ་ཏྟ་ཝོ་ཧཱ་རོ ན་ཏྠཱི་ཏི ཨ་རཱུ་པཱ་ནཾ ཨི་ནྡྲི་ཡ་པ་ཙྩ་ཡ་བྷཱུ་ཏཱ་ནི པ་ཙྩ་ཡ་ནྟ་རཱ་པེ་ཀྑཱ་ནི ཙ་ཀྑཱ་དཱི་ནི ཨ་ཏྟ་ནོ ཝི་ཛྫ་མཱ་ན་ཀྑ་ཎེ ཨ་ཝི་ནི་བྦྷུ་ཏྟ་དྷ་མྨཱ་ནཾ ཨི་ནྡྲི་ཡ་པ་ཙྩ་ཡ་ཏཾ ཨ་ཕ་ར་ནྟཱ་ནི་པི ཨི་ནྡྲི་ཡ་པ་ཙྩ་ཡཱ སི་ཡུཾ. ཡོ པ་ན ནི་ར་པེ་ཀྑོ ཨི་ནྡྲི་ཡ་པ་ཙྩ་ཡོ ཨ་ཝི་ནི་བྦྷུ་ཏྟ་དྷ་མྨཱ་ནཾ ཧོ་ཏི, སོ ཨ་ཏྟ་ནོ ཝི་ཛྫ་མཱ་ན་ཀྑ་ཎེ ཏེ་སཾ ཨི་ནྡྲི་ཡ་པ་ཙྩ་ཡ་ཏཾ ཨ་ཕ་ར་ནྟོ ནཱ་མ ན་ཏྠི. ཡ་དི ཙ ཨི་ཏྠི་ནྡྲི་ཡ་པུ་རི་སི་ནྡྲི་ཡཱ་ནི ཨི་ནྡྲི་ཡ་པ་ཙྩ་ཡོ ལི་ངྒཱ་དཱི་ནཾ སི་ཡུཾ, ཨ་ཝི་ནི་བྦྷུ་ཏྟཱ་ནཾ ཏེ་ས་མྤི སི་ཡུཾ. ན ཧི རཱུ་པཾ རཱུ་པ་སྶ, ཨ་རཱུ་པཾ ཝཱ ཨ་རཱུ་པ་སྶ ཝི་ནི་བྦྷུ་ཏྟ་སྶ ཨི་ནྡྲི་ཡ་པ་ཙྩ་ཡོ ཨ་ཏྠཱི་ཏི. ས་ཏི ཙེ་ཝཾ ཨི་ཏྠི་པུ་རི་སི་ནྡྲི་ཡེ་ཧི ཨ་ཝི་ནི་བྦྷུ་ཏྟ་ཏྟཱ ཀ་ལ་ལཱ་དི་ཀཱ་ལེ ཙ ལི་ངྒཱ་དཱི་ནི སི་ཡུཾ, ཡེ་སཾ ཏཱ་ནི ཨི་ནྡྲི་ཡ་པ་ཙྩ་ཡ་ཏཾ ཕ་རེ་ཡྻུཾ, ན ཙ ཕ་ར་ནྟི. ཏ་སྨཱ ན ཏེ་ཧི ཏཱ་ནི ཨ་ཝི་ནི་བྦྷུ་ཏྟ་ཀཱ་ནི, ཨ་ཝི་ནི་བྦྷུ་ཏྟ་ཏྟཱ་བྷཱ་ཝ་ཏོ ཙ ཏེ་སཾ ཨི་ནྡྲི་ཡ་པ་ཙྩ་ཡ་ཏཾ ན ཕ་ར་ནྟི. ཨ་ཉྙེ་སཾ པ་ན ཡེ་ཧི ཏཱ་ནི ས་ཧ་ཛཱ་ཏཱ་ནི, ཏེ་སཾ ཨ་བཱི་ཛ་བྷཱ་ཝ་ཏོ་ཡེ་ཝ ན ཕ་ར་ནྟི, ཏ་སྨཱ ཨཱ་པ་ནྣ་ཝི་ནི་བྦྷུ་ཏྟ་བྷཱ་ཝཱ་ནཾ ཏེ་སཾ ལི་ངྒཱ་དཱི་ནཾ ཨ་ཝི་ནི་བྦྷུ་ཏྟཱ་ནཾ ཨ་ཉྙེ་ས་ཉྩ ས་མཱ་ན་ཀ་ལཱ་པ་དྷ་མྨཱ་ནཾ ཨི་ནྡྲི་ཡ་པ་ཙྩ་ཡ་ཏཱ་ཡ ཨ་ཕ་ར་ཎ་ཏོ ཏཱ་ནི ཨི་ནྡྲི་ཡ་པ་ཙྩ་ཡོ ན ཧོ་ནྟཱི་ཏི. ཡེ་སཾ བཱི་ཛ་བྷཱུ་ཏཱ་ནི ཨི་ཏྠི་པུ་རི་སི་ནྡྲི་ཡཱ་ནི, ཏེ་སཾ ལི་ངྒཱ་དཱི་ནཾ ཨ་པ་ར་མ་ཏྠ་བྷཱ་ཝ་ཏོ་ཏི ཀེ་ཙི, ཏེ པ་ན ཀ་ལ་ལཱ་དི་ཀཱ་ལེ་པི ལི་ངྒཱ་དཱི་ནཾ ཏ་ད་ནུ་རཱུ་པཱ་ནཾ ཨ་ཏྠི་ཏཾ ཨི་ཙྪ་ནྟི.
ཛཱ་ཏི་བྷཱུ་མི་ཝ་སེ་ན ཝུ་ཏྟེ་སུ བྷེ་དེ་སུ ཀུ་ས་ལ་ཛཱ་ཏི་ཡཾ རཱུ་པཱ་ཝ་ཙ་ར་ཀུ་ས་ལ་མེ་ཝ ཨཱ་རུ་པྤེ ཋ་པེ་ཏ་བྦ་ནྟི ‘‘ཋ་པེ་ཏྭཱ པ་ན རཱུ་པཱ་ཝ་ཙ་ར་ཀུ་ས་ལཾ ཨ་ཝ་སེ་སཱ ཀུ་ས་ལཱ་ཀུ་ས་ལཱ’’ཏི ཝུ་ཏྟཾ. པ་ཋ་མ་ལོ་ཀུ་ཏྟ་རཾ པ་ན དོ་མ་ན་སྶ་ཡུ་ཏྟ་ཉྩ ཝི་སུཾ ཨེ་ཀཱ ཛཱ་ཏི བྷཱུ་མི ཝཱ ན ཧོ་ཏཱི་ཏི ཨཱ་རུ་པྤེ ཨ་ལ་བྦྷ་མཱ་ན་མྤི ན ཋ་པི་ཏཾ. ཧེ་ཏུ་ཨཱ་དཱི་སུ་པི ‘‘ཏ་ཐཱ ཨ་པ་རི་ཡཱ་པ་ནྣ་ཀུ་ས་ལ་ཧེ་ཏུ, ཏ་ཐཱ ཨ་ཀུ་ས་ལ་ཧེ་ཏཱུ’’ཏི་ཨཱ་དཱི་སུ (པ་ཊྛཱ. ཨ་ཊྛ. ༡.༡) ཨེ་ས ན་ཡོ ཡོ་ཛེ་ཏ་བྦོ.
ཋི་ཏི་ཀྑ་ཎེཏི ཨི་དཾ རཱུ་པ་ཛཱི་ཝི་ཏི་ནྡྲི་ཡ་སྶ ས་ཧ་ཛཱ་ཏ་པ་ཙྩ་ཡ་ཏྟཱ་བྷཱ་ཝཾ ས་ནྡྷཱ་ཡ ཝུ་ཏྟཾ. ཨུ་པྤཱ་ད་ཀྑ་ཎེ་པི པ་ན ཏ་སྶ ཨི་ནྡྲི་ཡ་པ་ཙྩ་ཡ་ཏཱ ན ས་ཀྐཱ ནི་ཝཱ་རེ་ཏུཾ. ཝ་ཀྑ་ཏི ཧི ‘‘ཨ་བྱཱ་ཀ་ཏཾ དྷ་མྨཾ པ་ཊི་ཙྩ…པེ… ཨ་ས་ཉྙ་ས་ཏྟཱ་ནཾ ཨེ་ཀཾ མ་ཧཱ་བྷཱུ་ཏཾ པ་ཊི་ཙྩ…པེ… ཨི་ནྡྲི་ཡ་པ་ཙྩ་ཡཾ ཀ་མྨ་པ་ཙྩ་ཡ་ས་དི་ས’’ནྟི (པ་ཊྛཱ. ༡.༡.༦༦). ན ཧི ཨ་ས་ཉྙ་ས་ཏྟཱ་ནཾ ཨི་ནྡྲི་ཡ་པ་ཙྩ་ཡཱ ཨུ་པྤ་ཛྫ་མཱ་ན་སྶ རཱུ་པ་སྶ རཱུ་པ་ཛཱི་ཝི་ཏི་ནྡྲི་ཡ་ཏོ ཨ་ཉྙོ ཨི་ནྡྲི་ཡ་པ་ཙྩ་ཡོ ཨ་ཏྠི, པ་ཉྩ་ཝོ་ཀཱ་རེ པ་ཝ་ཏྟེ ཙ ཀ་ཊ་ཏྟཱ་རཱུ་པ་སྶ. པ་ཊི་ཙྩ་ཝཱ་རཱ་ད་ཡོ ཙ ཚ ཨུ་པྤཱ་ད་ཀྑ་ཎ་མེ་ཝ ག་ཧེ་ཏྭཱ པ་ཝ་ཏྟཱ, ཨེ་ཝ་ཉྩ ཀ་ཏྭཱ པ་ཙྪཱ་ཛཱ་ཏ་པ་ཙྩ་ཡོ ཨེ་ཏེ་སུ ཨ་ནུ་ལོ་མ་ཏོ ན ཏི་ཊྛ་ཏཱི་ཏི.
ཨི་ནྡྲི་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.