༡༠. ཨ་དྷི་ཀ་ར་ཎ་ས་མ་ཐ་སུ་ཏྟ་ཝ་ཎྞ་ནཱ
༨༤. ད་ས་མེ ཨ་དྷི་ཀ་རཱི་ཡ་ནྟི ཨེ་ཏྠཱ་ཏི ཨ་དྷི་ཀ་ར་ཎཱ་ནི. ཀེ ཨ་དྷི་ཀ་རཱི་ཡ་ནྟི? ས་མ་ཐཱ. ཀ་ཐཾ ཨ་དྷི་ཀ་རཱི་ཡ་ནྟི? ས་མ་ན་ཝ་སེ་ན. ཏ་སྨཱ ཏེ ཏེ་སཾ ས་མ་ན་ཝ་སེ་ན པ་ཝ་ཏྟ་ནྟཱི་ཏི ཨཱ་ཧ ‘‘ཨ་དྷི་ཀ་ར་ཎཱ་ནི ས་མེ་ནྟཱི’’ཏི་ཨཱ་དི. ཨུ་པྤ་ནྣཱ་ནཾ ཨུ་པྤ་ནཱ་ནནྟི ཨུ་ཊྛི་ཏཱ་ནཾ ཨུ་ཊྛི་ཏཱ་ནཾ. ས་མ་ཐ་ཏྠནྟི ས་མ་ན་ཏྠཾ. དཱི་གྷ་ནི་ཀཱ་ཡེ ས་ངྒཱི་ཏི་སུ་ཏྟ་ཝ་ཎྞ་ནཱ་ཡ་མྤི (དཱི. ནི. ཨ་ཊྛ. ༣.༣༣༡) ཝི་ཏྠཱ་ར་ཏོ་ཡེ་ཝཱཏི ཨེ་ཏྠཱ་ཡཾ ཝི་ཏྠཱ་ར་ན་ཡོ – ཨ་དྷི་ཀ་ར་ཎེ་སུ ཏཱ་ཝ དྷ་མྨོ་ཏི ཝཱ ཨ་དྷ་མྨོ་ཏི ཝཱ ཨ་ཊྛཱ་ར་ས་ཧི ཝ་ཏྠཱུ་ཧི ཝི་ཝ་ད་ནྟཱ་ནཾ བྷི་ཀྑཱུ་ནཾ ཡོ ཝི་ཝཱ་དོ, ཨི་དཾ ཝི་ཝཱ་དཱ་དྷི་ཀ་ར་ཎཾ ནཱ་མ. སཱི་ལ་ཝི་པ་ཏྟི་ཡཱ ཝཱ ཨཱ་ཙཱ་ར་དི་ཊྛི་ཨཱ་ཛཱི་ཝ་ཝི་པ་ཏྟི་ཡཱ ཝཱ ཨ་ནུ་ཝ་ད་ནྟཱ་ནཾ ཡོ ཨ་ནུ་ཝཱ་དོ ཨུ་པ་ཝ་ད་ནཱ ཙེ་ཝ ཙོ་ད་ནཱ ཙ, ཨི་དཾ ཨ་ནུ་ཝཱ་དཱ་དྷི་ཀ་ར་ཎཾ ནཱ་མ. མཱ་ཏི་ཀཱ་ཡཾ ཨཱ་ག་ཏཱ པ་ཉྩ, ཝི་བྷ་ངྒེ དྭེ་ཏི ས་ཏྟ་པི ཨཱ་པ་ཏྟི་ཀྑ་ནྡྷཱ, ཨི་དཾ ཨཱ་པ་ཏྟཱ་དྷི་ཀ་ར་ཎཾ ནཱ་མ. ཡཾ ས་ངྒྷ་སྶ ཨ་པ་ལོ་ཀ་ནཱ་དཱི་ནཾ ཙ་ཏུ་ནྣཾ ཀ་མྨཱ་ནཾ ཀ་ར་ཎཾ, ཨི་དཾ ཀི་ཙྩཱ་དྷི་ཀ་ར་ཎཾ ནཱ་མ.
ཏ་ཏྠ ཝི་ཝཱ་དཱ་དྷི་ཀ་ར་ཎཾ དྭཱི་ཧི ས་མ་ཐེ་ཧི ས་མྨ་ཏི ས་མྨུ་ཁཱ་ཝི་ན་ཡེ་ན ཙ ཡེ་བྷུ་ཡྻ་སི་ཀཱ་ཡ ཙ. ས་མྨུ་ཁཱ་ཝི་ན་ཡེ་ནེ་ཝ ས་མྨ་མཱ་ནཾ ཡ་སྨིཾ ཝི་ཧཱ་རེ ཨུ་པྤ་ནྣཾ ཏ་སྨིཾ་ཡེ་ཝ ཝཱ, ཨ་ཉྙ་ཏྲ ཝཱུ་པ་ས་མེ་ཏུཾ ག་ཙྪ་ནྟཱ་ནཾ ཨ་ནྟ་རཱ་མ་གྒེ ཝཱ, ཡ་ཏྠ ག་ནྟྭཱ ས་ངྒྷ་སྶ ནི་ཡྻཱ་ཏི་ཏཾ, ཏ་ཏྠ ས་ངྒྷེ་ན ཝཱ, ས་ངྒྷེ ཝཱུ་པ་ས་མེ་ཏུཾ ཨ་ས་ཀྐོ་ནྟེ ཏ་ཏྠེ་ཝ ཨུ་བྦཱ་ཧི་ཀཱ་ཡ ས་མྨ་ཏ་པུ་གྒ་ལེ་ཧི ཝཱ ཝི་ནི་ཙྪི་ཏཾ ས་མྨ་ཏི. ཨེ་ཝཾ ས་མྨ་མཱ་ནེ ཙ པ་ནེ་ཏ་སྨིཾ ཡཱ ས་ངྒྷ་ས་མྨུ་ཁ་ཏོ དྷ་མྨ་ས་མྨུ་ཁ་ཏོ ཝི་ན་ཡ་ས་མྨུ་ཁ་ཏཱ པུ་གྒ་ལ་ས་མྨུ་ཁ་ཏཱ, ཨ་ཡཾ ས་མྨུ་ཁཱ་ཝི་ན་ཡོ ནཱ་མ. ཏ་ཏྠ ཙ ཀཱ་ར་ཀ་ས་ངྒྷ་སྶ ས་ངྒྷ་སཱ་མ་གྒི་ཝ་སེ་ན ས་མྨུ་ཁི་བྷཱ་ཝོ ས་ངྒྷ་ས་མྨུ་ཁ་ཏཱ. ས་མེ་ཏ་བྦ་སྶ ཝ་ཏྠུ་ནོ བྷཱུ་ཏ་ཏྟཱ དྷ་མྨ་ས་མྨུ་ཁ་ཏཱ. ཡ་ཐཱ ཏཾ ས་མེ་ཏ་བྦཾ, ཏ་ཐེ་ཝ་སྶ ས་མ་ནཾ ཝི་ན་ཡ་ས་མྨུ་ཁ་ཏཱ. ཡོ ཙ ཝི་ཝ་ད་ཏི, ཡེ་ན ཙ ཝི་ཝ་ད་ཏི, ཏེ་སཾ ཨུ་བྷི་ནྣཾ ཨ་ཏྠ་པ་ཙྩ་ཏྠི་ཀཱ་ནཾ ས་མྨུ་ཁཱི་བྷཱ་ཝོ པུ་གྒ་ལ་ས་མྨུ་ཁ་ཏཱ. ཨུ་བྦཱ་ཧི་ཀཱ་ཡ ཝཱུ་པ་ས་མེ པ་ནེ་ཏྠ ས་ངྒྷ་ས་མྨུ་ཁ་ཏཱ པ་རི་ཧཱ་ཡ་ཏི. ཨེ་ཝཾ ཏཱ་ཝ ས་མྨུ་ཁཱ་ཝི་ན་ཡེ་ནེ་ཝ ས་མྨ་ཏི.
ས་ཙེ པ་ནེ་ཝ་མྤི ན ས་མྨ་ཏི, ཨ་ཐ ནཾ ཨུ་བྦཱ་ཧི་ཀཱ་ཡ ས་མྨ་ཏཱ བྷི་ཀྑཱུ ‘‘ན མ་ཡཾ ས་ཀྐོ་མ ཝཱུ་པ་ས་མེ་ཏུ’’ནྟི ས་ངྒྷ་སྶེ་ཝ ནི་ཡྻཱ་ཏེ་ནྟི. ཏ་ཏོ ས་ངྒྷོ པ་ཉྩ་ངྒ་ས་མ་ནྣཱ་ག་ཏཾ བྷི་ཀྑུཾ ས་ལཱ་ཀ་གྒཱ་ཧཱ་པ་ཀཾ ས་མྨ་ནྣ་ཏི, ཏེ་ན གུ་ལ༹ྷ་ཀ་ཝི་ཝ་ཊ་ཀ་ས་ཀ་ཎྞ་ཛ་པྤ་ཀེ་སུ ཏཱི་སུ ས་ལཱ་ཀ་གྒཱ་ཧ་ཀེ་སུ ཨ་ཉྙ་ཏ་ར་ཝ་སེ་ན ས་ལཱ་ཀཾ གཱ་ཧཱ་པེ་ཏྭཱ ས་ནྣི་པ་ཏི་ཏཱ་ཡ པ་རི་སཱ་ཡ དྷ་མྨ་ཝཱ་དཱི་ནཾ ཡེ་བྷུ་ཡྻ་ཏཱ་ཡ ཡ་ཐཱ ཏེ དྷ་མྨ་ཝཱ་དི་ནོ ཝ་ད་ནྟི, ཨེ་ཝཾ ཝཱུ་པ་ས་ནྟཾ ཨ་དྷི་ཀ་ར་ཎཾ ས་མྨུ་ཁཱ་ཝི་ན་ཡེ་ན ཙ ཡེ་བྷུ་ཡྻ་སི་ཀཱ་ཡ ཙ ཝཱུ་པ་ས་ནྟཾ ཧོ་ཏི. ཏ་ཏྠ ས་མྨུ་ཁཱ་ཝི་ན་ཡོ ཝུ་ཏྟ་ན་ཡོ ཨེ་ཝ. ཡཾ པ་ན ཡེ་བྷུ་ཡྻ་སི་ཀཱ་ཀ་མྨ་སྶ ཀ་ར་ཎཾ, ཨ་ཡཾ ཡེ་བྷུ་ཡྻ་སི་ཀཱ ནཱ་མ. ཨེ་ཝཾ ཝི་ཝཱ་དཱ་དྷི་ཀ་ར་ཎཾ དྭཱི་ཧི ས་མ་ཐེ་ཧི ས་མྨ་ཏི.
ཨ་ནུ་ཝཱ་དཱ་དྷི་ཀ་ར་ཎཾ ཙ་ཏཱུ་ཧི ས་མ་ཐེ་ཧི ས་མྨ་ཏི ས་མྨུ་ཁཱ་ཝི་ན་ཡེ་ན ཙ ས་ཏི་ཝི་ན་ཡེ་ན ཙ ཨ་མཱུ་ལ༹ྷ་ཝི་ན་ཡེ་ན ཙ ཏ་སྶ་པཱ་པི་ཡ་སི་ཀཱ་ཡ ཙ. ས་མྨུ་ཁཱ་ཝི་ན་ཡེ་ནེ་ཝ ས་མྨ་མཱ་ནཾ ཡོ ཙ ཨ་ནུ་ཝ་ད་ཏི, ཡ་ཉྩ ཨ་ནུ་ཝ་ད་ཏི, ཏེ་སཾ ཝ་ཙ་ནཾ སུ་ཏྭཱ ས་ཙེ ཀཱ་ཙི ཨཱ་པ་ཏྟི ན་ཏྠི, ཨུ་བྷོ ཁ་མཱ་པེ་ཏྭཱ, ས་ཙེ ཨ་ཏྠི ཨ་ཡཾ ནཱ་མེ་ཏྠ ཨཱ་པ་ཏྟཱི་ཏི ཨེ་ཝཾ ཝི་ནི་ཙྪི་ཏཾ ཝཱུ་པ་ས་མྨ་ཏི. ཏ་ཏྠ ས་མྨུ་ཁཱ་ཝི་ན་ཡ་ལ་ཀྑ་ཎཾ ཝུ་ཏྟ་ན་ཡ་མེ་ཝ.
ཡ་དཱ པ་ན ཁཱི་ཎཱ་ས་ཝ་སྶ བྷི་ཀྑུ་ནོ ཨ་མཱུ་ལི་ཀཱ་ཡ སཱི་ལ་ཝི་པ་ཏྟི་ཡཱ ཨ་ནུ་དྡྷཾ་སི་ཏ་སྶ ས་ཏི་ཝི་ན་ཡཾ ཡཱ་ཙ་མཱ་ན་སྶ ས་ངྒྷོ ཉ་ཏྟི་ཙ་ཏུ་ཏྠེ་ན ཀ་མྨེ་ན ས་ཏི་ཝི་ན་ཡཾ དེ་ཏི, ཏ་དཱ ས་མྨུ་ཁཱ་ཝི་ན་ཡེ་ན ཙ ས་ཏི་ཝི་ན་ཡེ་ན ཙ ཝཱུ་པ་ས་ནྟཾ ཧོ་ཏི. དི་ནྣེ པ་ན ས་ཏི་ཝི་ན་ཡེ པུ་ན ཏ་སྨིཾ པུ་གྒ་ལེ ཀ་སྶ་ཙི ཨ་ནུ་ཝཱ་དོ ན རུ་ཧ་ཏི. ཡ་དཱ ཨུ་མྨ་ཏྟ་ཀོ བྷི་ཀྑུ ཨུ་མྨཱ་ད་ཝ་སེ་ན ཀ་ཏེ ཨ་སྶཱ་མ་ཎ་ཀེ ཨ་ཛ྄ཛྷཱ་ཙཱ་རེ ‘‘ས་ར་ཏཱ་ཡ་སྨཱ ཨེ་ཝ་རཱུ་པིཾ ཨཱ་པ་ཏྟི’’ནྟི བྷི་ཀྑཱུ་ཧི ཙོ་དི་ཡ་མཱ་ནོ ‘‘ཨུ་མྨ་ཏྟ་ཀེ་ན མེ, ཨཱ་ཝུ་སོ, ཨེ་ཏཾ ཀ་ཏཾ, ནཱ་ཧཾ ཏཾ ས་རཱ་མཱི’’ཏི བྷ་ཎ་ནྟོ་པི བྷི་ཀྑཱུ་ཧི ཙོ་དི་ཡ་མཱ་ནོ་ཝ པུ་ན ཨ་ཙོ་ད་ན་ཏྠཱ་ཡ ཨ་མཱུ་ལ༹ྷ་ཝི་ན་ཡཾ ཡཱ་ཙ་ཏི, ས་ངྒྷོ ཙ་སྶ ཉ་ཏྟི་ཙ་ཏུ་ཏྠེ་ན ཀ་མྨེ་ན ཨ་མཱུ་ལ༹ྷ་ཝི་ན་ཡཾ དེ་ཏི. ཏ་དཱ ས་མྨུ་ཁཱ་ཝི་ན་ཡེ་ན ཙ ཨ་མཱུ་ལ༹ྷ་ཝི་ན་ཡེ་ན ཙ ཝཱུ་པ་ས་ནྟཾ ཧོ་ཏི. དི་ནྣེ པ་ན ཨ་མཱུ་ལ༹ྷ་ཝི་ན་ཡེ པུ་ན ཏ་སྨིཾ པུ་གྒ་ལེ ཀ་སྶ་ཙི ཏ་པྤ་ཙྩ་ཡཱ ཨ་ནུ་ཝཱ་དོ ན རུ་ཧ་ཏི. ཡ་དཱ པ་ན པཱ་རཱ་ཛི་ཀེ་ན ཝཱ པཱ་རཱ་ཛི་ཀ་སཱ་མ་ནྟེ་ན ཝཱ ཙོ་དི་ཡ་མཱ་ན་སྶ ཨ་ཉྙེ་ན་ཉྙཾ པ་ཊི་ཙ་ར་ཏོ པཱ་པུ་སྶ་ནྣ་ཏཱ་ཡ པཱ་པི་ཡ་སྶ པུ་གྒ་ལ་སྶ ‘‘ས་ཙཱ་ཡཾ ཨ་ཙྪི་ནྣ་མཱུ་ལོ བྷ་ཝི་སྶ་ཏི, ས་མྨཱ ཝ་ཏྟི་ཏྭཱ ཨོ་སཱ་ར་ཎཾ ལ་བྷི་སྶ་ཏི. ས་ཙེ ཚི་ནྣ་མཱུ་ལོ, ཨ་ཡ་མེ་ཝ་སྶ ནཱ་ས་ནཱ བྷ་ཝི་སྶ་ཏཱི’’ཏི མ་ཉྙ་མཱ་ནོ ས་ངྒྷོ ཉ་ཏྟི་ཙ་ཏུ་ཏྠེ་ན ཀ་མྨེ་ན ཏ་སྶ་པཱ་པི་ཡ་སི་ཀཾ ཀ་རོ་ཏི, ཏ་དཱ ས་མྨུ་ཁཱ་ཝི་ན་ཡེ་ན ཙ ཏ་སྶ་པཱ་པི་ཡ་སི་ཀཱ་ཡ ཙ ཝཱུ་པ་ས་ནྟཾ ཧོ་ཏཱི་ཏི. ཨེ་ཝཾ ཨ་ནུ་ཝཱ་དཱ་དྷི་ཀ་ར་ཎཾ ཙ་ཏཱུ་ཧི ས་མ་ཐེ་ཧི ས་མྨ་ཏི.
ཨཱ་པ་ཏྟཱ་དྷི་ཀ་ར་ཎཾ ཏཱི་ཧི ས་མ་ཐེ་ཧི ས་མྨ་ཏི ས་མྨུ་ཁཱ་ཝི་ན་ཡེ་ན ཙ པ་ཊི་ཉྙཱ་ཏ་ཀ་ར་ཎེ་ན ཙ ཏི་ཎ་ཝ་ཏྠཱ་ར་ཀེ་ན ཙ. ཏ་སྶ ས་མྨུ་ཁཱ་ཝི་ན་ཡེ་ནེ་ཝ ཝཱུ་པ་ས་མོ ན་ཏྠི. ཡ་དཱ པ་ན ཨེ་ཀ་སྶ ཝཱ བྷི་ཀྑུ་ནོ ས་ནྟི་ཀེ ས་ངྒྷ་ག་ཎ་མ་ཛ྄ཛྷེ་སུ ཝཱ བྷི་ཀྑུ ལ་ཧུ་ཀཾ ཨཱ་པ་ཏྟིཾ དེ་སེ་ཏི, ཏ་དཱ ཨཱ་པ་ཏྟཱ་དྷི་ཀ་ར་ཎཾ ས་མྨུ་ཁཱ་ཝི་ན་ཡེ་ན ཙ པ་ཊི་ཉྙཱ་ཏ་ཀ་ར་ཎེ་ན ཙ ཝཱུ་པ་ས་མྨ་ཏི. ཏ་ཏྠ ས་མྨུ་ཁཱ་ཝི་ན་ཡེ ཏཱ་ཝ ཡོ ཙ དེ་སེ་ཏི, ཡ་སྶ ཙ དེ་སེ་ཏི, ཏེ་སཾ ས་མྨུ་ཁཱི་བྷཱ་ཝོ པུ་གྒ་ལ་ས་མྨུ་ཁ་ཏོ. སེ་སཾ ཝུ་ཏྟ་ན་ཡ་མེ་ཝ.
པུ་གྒ་ལ་སྶ ཙ ག་ཎ་སྶ ཙ དེ་ས་ནཱ་ཀཱ་ལེ ས་ངྒྷ་ས་མྨུ་ཁ་ཏོ པ་རི་ཧཱ་ཡ་ཏི. ཡཾ པ་ནེ་ཏྠ ‘‘ཨ་ཧཾ, བྷ་ནྟེ, ཨི་ཏྠ་ནྣཱ་མཾ ཨཱ་པ་ཏྟིཾ ཨཱ་པ་ནྣོ’’ཏི ཙ ‘‘པ་སྶ་སཱི’’ཏི ཙ ‘‘ཨཱ་མ, པ་སྶཱ་མཱི’’ཏི ཙ པ་ཊི་ཉྙཱ་ཏཱ་ཡ ‘‘ཨཱ་ཡ་ཏིཾ སཾ་ཝ་རེ་ཡྻཱ་སཱི’’ཏི ཀ་ར་ཎཾ, ཏཾ པ་ཊི་ཉྙཱ་ཏ་ཀ་ར་ཎཾ ནཱ་མ. ས་ངྒྷཱ་དི་སེ་སེ པ་རི་ཝཱ་སཱ་དི་ཡཱ་ཙ་ནཱ པ་ཊི་ཉྙཱ, པ་རི་ཝཱ་སཱ་དཱི་ནཾ དཱ་ནཾ པ་ཊི་ཉྙཱ་ཏ་ཀ་ར་ཎཾ ནཱ་མ.
དྭེ་པ་ཀྑ་ཛཱ་ཏཱ པ་ན བྷ་ཎྜ་ན་ཀཱ་ར་ཀཱ བྷི་ཀྑཱུ བ་ཧུཾ ཨ་སྶཱ་མ་ཎ་ཀཾ ཨ་ཛ྄ཛྷཱ་ཙཱ་རཾ ཙ་རི་ཏྭཱ པུ་ན ལ་ཛྫི་དྷ་མྨེ ཨུ་པྤ་ནྣེ ‘‘ས་ཙེ མ་ཡཾ ཨི་མཱ་ཧི ཨཱ་པ་ཏྟཱི་ཧི ཨ་ཉྙ་མ་ཉྙཾ ཀཱ་རེ་སྶཱ་མ, སི་ཡཱ་པི ཏཾ ཨ་དྷི་ཀ་ར་ཎཾ ཀ་ཀྑ་ལ༹་ཏྟཱ་ཡ ཝཱ་ལ༹་ཏྟཱ་ཡ སཾ་ཝ་ཏྟེ་ཡྻཱ’’ཏི ཨ་ཉྙ་མ་ཉྙཾ ཨཱ་པ་ཏྟི་ཡཱ ཀཱ་རཱ་པ་ནེ དོ་སཾ དི་སྭཱ ཡ་དཱ བྷི་ཀྑཱུ ཏི་ཎ་ཝ་ཏྠཱ་ར་ཀ་ཀ་མྨཾ ཀ་རོ་ནྟི, ཏ་དཱ ཨཱ་པ་ཏྟཱ་དྷི་ཀ་ར་ཎཾ ས་མྨུ་ཁཱ་ཝི་ན་ཡེ་ན ཙ ཏི་ཎ་ཝ་ཏྠཱ་ར་ཀེ་ན ཙ ས་མྨ་ཏི. ཏ་ཏྲ ཧི ཡ་ཏྟ་ཀཱ ཧ་ཏྠ་པཱ་སཱུ་པ་ག་ཏཱ ‘‘ན མེ་ཏཾ ཁ་མ་ཏཱི’’ཏི ཨེ་ཝཾ དི་ཊྛཱ་ཝི་ཀ་མྨཾ ཨ་ཀ་ཏྭཱ ‘‘དུ་ཀྐ་ཊཾ ཀ་མྨཾ པུ་ན ཀཱ་ཏ་བྦཾ ཀ་མྨ’’ནྟི ན ཨུ་ཀྐོ་ཊེ་ནྟི, ནི་དྡ་མྤི ཨོ་ཀྐ་ནྟཱ ཧོ་ནྟི, ས་བྦེ་སཾ ཋ་པེ་ཏྭཱ ཐུ་ལླ་ཝ་ཛྫ་ཉྩ གི་ཧི་པ་ཊི་སཾ་ཡུ་ཏྟ་ཉྩ ས་བྦཱ་པ་ཏྟི་ཡོ ཝུ་ཊྛ་ཧ་ནྟི. ཨེ་ཝཾ ཨཱ་པ་ཏྟཱ་དྷི་ཀ་ར་ཎཾ ཏཱི་ཧི ས་མ་ཐེ་ཧི ས་མྨ་ཏི.
ཀི་ཙྩཱ་དྷི་ཀ་ར་ཎཾ ཨེ་ཀེ་ན ས་མ་ཐེ་ན ས་མྨ་ཏི ས་མྨུ་ཁཱ་ཝི་ན་ཡེ་ནེ་ཝ. ཨི་ཏི ཨི་མཱ་ནི ཙ་ཏྟཱ་རི ཨ་དྷི་ཀ་ར་ཎཱ་ནི ཡ་ཐཱ་ནུ་རཱུ་པཾ ཨི་མེ་ཧི ས་ཏྟ་ཧི ས་མ་ཐེ་ཧི ས་མྨ་ནྟི. ཏེ་ན ཝུ་ཏྟཾ – ‘‘ཨུ་པྤ་ནྣུ་པྤ་ནྣཱ་ནཾ ཨ་དྷི་ཀ་ར་ཎཱ་ནཾ ས་མ་ཐཱ་ཡ ཝཱུ་པ་ས་མཱ་ཡ ས་མྨུ་ཁཱ་ཝི་ན་ཡོ དཱ་ཏ་བྦོ…པེ… ཏི་ཎ་ཝ་ཏྠཱ་ར་ཀོ’’ཏི. སེ་སཾ ས་བྦ་ཏྠ ཨུ་ཏྟཱ་ན་མེ་ཝ.
ཨ་དྷི་ཀ་ར་ཎ་ས་མ་ཐ་སུ་ཏྟ་ཝ་ཎྞ་ནཱ ནི་ཊྛི་ཏཱ.
ཝི་ན་ཡ་ཝ་གྒ་ཝ་ཎྞ་ནཱ ནི་ཊྛི་ཏཱ.
ཨི་ཏི མ་ནོ་ར་ཐ་པཱུ་ར་ཎི་ཡཱ ཨ་ངྒུ་ཏྟ་ར་ནི་ཀཱ་ཡ-ཨ་ཊྛ་ཀ་ཐཱ་ཡ
ས་ཏྟ་ཀ་ནི་པཱ་ཏ་ཝ་ཎྞ་ནཱ་ཡ ཨ་ནུ་ཏྟཱ་ན་ཏྠ་དཱི་པ་ནཱ ས་མ་ཏྟཱ.