༡༠. ཨ་ར་ཀ་སུ་ཏྟ་ཝ་ཎྞ་ནཱ

༧༤. ད་ས་མེ པ་རི་ཏྟནྟི ཨི་ཏྟ་རཾ. ཏེ་ནཱ་ཧ ‘‘ཨ་པྤཾ ཐོ་ཀ’’ནྟི. པ་བ་ནྡྷཱ་ནུ་པ་ཙྪེ་ད་སྶ པ་ཙྩ་ཡ་བྷཱ་ཝོ ཨི་དྷ ཛཱི་ཝི་ཏ་སྶ ར་སོ ཀི་ཙྩ་ནྟི ཨ་དྷི་པྤེ་ཏ་ནྟི ཨཱ་ཧ ‘‘ས་ར་ས་པ་རི་ཏྟ་ཏཱ་ཡ་པཱི’’ཏི. ཏ་ད་དྷཱི་ན་ཝུ་ཏྟི་ཏཱ་ཡ་པི ཧི ‘‘ཡོ, བྷི་ཀྑ་ཝེ, ཙི་རཾ ཛཱི་ཝ་ཏི, སོ ཝ་སྶ་ས་ཏཾ ཨ་པྤཾ ཝཱ བྷི་ཡྻོ’’ཏི ཝ་ཙ་ན་ཏོ པ་རི་ཏྟཾ ཁ་ཎ་པ་རི་ཏྟ་ཏཱ་ཡ་པི. པ་ར་མ་ཏྠ་ཏོ ཧི ཨ་ཏི་པ་རི་ཏྟོ ས་ཏྟཱ་ནཾ ཛཱི་ཝི་ཏ་ཀྑ་ཎོ ཨེ་ཀ་ཙི་ཏྟ་ཀྑ་ཎ་པྤ་ཝ་ཏྟི་མ་ཏྟོ་ཡེ་ཝ. ཡ་ཐཱ ནཱ་མ ར་ཐ་ཙ་ཀྐཾ པ་ཝ་ཏྟ་མཱ་ན་མྤི ཨེ་ཀེ་ནེ་ཝ ནེ་མི་པྤ་དེ་སེ་ན པ་ཝ་ཏྟ་ཏི, ཏི་ཊྛ་མཱ་ན་མྤི ཨེ་ཀེ་ནེ་ཝ ཏི་ཊྛ་ཏི, ཨེ་ཝ་མེ་ཝཾ ཨེ་ཀ་ཙི་ཏྟ་ཀྑ་ཎི་ཀཾ ས་ཏྟཱ་ནཾ ཛཱི་ཝི་ཏཾ ཏ་སྨིཾ ཙི་ཏྟེ ནི་རུ་དྡྷ་མ་ཏྟེ ས་ཏྟོ ནི་རུ་དྡྷོ་ཏི ཝུ་ཙྩ་ཏི. ཡ་ཐཱ་ཧ ‘‘ཨ་ཏཱི་ཏེ ཙི་ཏྟ་ཀྑ་ཎེ ཛཱི་ཝི་ཏྠ ན ཛཱི་ཝ་ཏི ན ཛཱི་ཝི་སྶ་ཏི. ཨ་ནཱ་ག་ཏེ ཙི་ཏྟ་ཀྑ་ཎེ ན ཛཱི་ཝི་ཏྠ ན ཛཱི་ཝ་ཏི ཛཱི་ཝི་སྶ་ཏི. པ་ཙྩུ་པྤ་ནྣེ ཙི་ཏྟ་ཀྑ་ཎེ ན ཛཱི་ཝི་ཏྠ ཛཱི་ཝ་ཏི ན ཛཱི་ཝི་སྶ་ཏི.

‘‘ཛཱི་ཝི་ཏཾ ཨ་ཏྟ་བྷཱ་ཝོ ཙ, སུ་ཁ་དུ་ཀྑཱ ཙ ཀེ་ཝ་ལཱ;

ཨེ་ཀ་ཙི་ཏྟ་ས་མཱ་ཡུ་ཏྟཱ, ལ་ཧུ་སོ ཝ་ཏྟ་ཏེ ཁ་ཎོ.

‘‘ཡེ ནི་རུ་དྡྷཱ མ་ར་ནྟ་སྶ, ཏི་ཊྛ་མཱ་ན་སྶ ཝཱ ཨི་དྷ;

ས་བྦེ་པི ས་དི་སཱ ཁ་ནྡྷཱ, ག་ཏཱ ཨ་པྤ་ཊི་ས་ནྡྷི་ཀཱ.

‘‘ཨ་ནི་བྦ་ཏྟེ་ན ན ཛཱ་ཏོ, པ་ཙྩུ་པྤ་ནྣེ་ན ཛཱི་ཝ་ཏི;

ཙི་ཏྟ་བྷ་ངྒཱ མ་ཏོ ལོ་ཀོ, པ་ཉྙ་ཏྟི པ་ར་མ་ཏྠི་ཡཱ’’ཏི. (མ་ཧཱ་ནི. ༡༠);

ལ་ཧུ་སནྟི ལ་ཧུ་ཀཾ. ཏེ་ནཱ་ཧ ‘‘ལ་ཧུཾ ཨུ་པྤ་ཛྫི་ཏྭཱ ནི་རུ་ཛ྄ཛྷ་ན་ཏོ ལ་ཧུ་ས’’ནྟི. པ་རི་ཏྟཾ ལ་ཧུ་སནྟི ཨུ་བྷ་ཡཾ པ་ནེ་ཏཾ ཨ་པྤ་ཀ་སྶ ཝེ་ཝ་ཙ་ནཾ. ཡ་ཉྷི ཨ་པྤ་ཀཾ, ཏཾ པ་རི་ཏྟ་ཉྩེ་ཝ ལ་ཧུ་ཀ་ཉྩ ཧོ་ཏི. ཨི་དྷ པ་ན ཨཱ་ཡུ་ནོ ཨ་དྷི་པྤེ་ཏ་ཏྟཱ ར་སྶ་ནྟི ཝུ་ཏྟཾ ཧོ་ཏི. མ་ནྟཱ་ཡནྟི ཀ་ར་ཎ་ཏྠེ ཨེ་ཏཾ བྷུ་མྨ་ཝ་ཙ་ན་ནྟི ཨཱ་ཧ ‘‘མ་ནྟཱ་ཡ བོ་དྡྷ་བྦཾ, པ་ཉྙཱ་ཡ ཛཱ་ནི་ཏ་བྦ་ནྟི ཨ་ཏྠོ’’ཏི. མ་ནྟཱ་ཡནྟི ཝཱ མ་ནྟེ་ཡྻ་ནྟི ཝུ་ཏྟཾ ཧོ་ཏི, མ་ནྟེ་ཏ་བྦཾ མ་ནྟཱ་ཡ ཨུ་པ་པ་རི་ཀྑི་ཏ་བྦ་ནྟི ཨ་ཏྠོ. པ་ཉྙཱ་ཡ ཛཱ་ནི་ཏ་བྦནྟི ཛཱ་ནི་ཏ་བྦཾ ཛཱི་ཝི་ཏ་སྶ པ་རི་ཏྟ་བྷཱ་ཝོ བ་ཧུ་དུ་ཀྑཱ་དི་བྷཱ་ཝོ. ཛཱ་ནི་ཏྭཱ ཙ པ་ན ས་བྦ་པ་ལི་བོ་དྷེ ཚི་ནྡི་ཏྭཱ ཀ་ཏྟ་བྦཾ ཀུ་ས་ལཾ, ཙ་རི་ཏ་བྦཾ བྲ་ཧྨ་ཙ་རི་ཡཾ. ཡ་སྨཱ ཨི་ཏྠི ཛཱ་ཏ་སྶ ཨ་མ་ར་ཎཾ, ཨ་པྤཾ ཝཱ བྷི་ཡྻོ ཝ་སྶ་ས་ཏ་ཏོ ཨུ་པ་རི ཨ་པྤཾ ཨ་ཉྙཾ ཝ་སྶ་ས་ཏཾ ཨ་པྤ་ཏྭཱ ཝཱི་སཾ ཝཱ ཏིཾ་སཾ ཝཱ ཙ་ཏྟཱ་ལཱི་སཾ ཝཱ པ་ཎྞཱ་སཾ ཝཱ ས་ཊྛི ཝཱ ཝ་སྶཱ་ནི ཛཱི་ཝ་ཏི, ཨེ་ཝཾ་དཱི་གྷཱ་ཡུ་ཀོ པ་ན ཨ་ཏི་དུ་ལླ་བྷོ. ‘‘ཨ་སུ་ཀོ ཧི ཨེ་ཝཾ ཙི་རཾ ཛཱི་ཝ་ཏཱི’’ཏི ཏ་ཏྠ ཏ་ཏྠ ག་ནྟྭཱ ད་ཊྛ་བྦོ ཧོ་ཏི. ཏ་ཏྠ ཝི་སཱ་ཁཱ ཨུ་པཱ་སི་ཀཱ ཝཱི་ས་ས་ཏཾ ཛཱི་ཝ་ཏི, ཏ་ཐཱ པོ་ཀྑ་ར་སཱ་ཏི་བྲཱ་ཧྨ་ཎོ, བྲ་ཧྨཱ་ཡུ་བྲཱ་ཧྨ་ཎོ, བཱ་ཝ་རི་ཡ་བྲཱ་ཧྨ་ཎོ, ཨཱ་ན་ནྡ་ཏྠེ་རོ, མ་ཧཱ་ཀ་སྶ་པ་ཏྠེ་རོ་ཏི. ཨ་ནུ་རུ་དྡྷ་ཏྠེ་རོ པ་ན ཝ་སྶ་ས་ཏ་ཉྩེ་ཝ པ་ཎྞཱ་ས་ཉྩ ཝ་སྶཱ་ནི. བཱ་ཀུ་ལ་ཏྠེ་རོ ཝ་སྶ་ས་ཏ་ཉྩེ་ཝ ས་ཊྛི ཙ ཝ་སྶཱ་ནི, ཨ་ཡཾ ས་བྦ་དཱི་གྷཱ་ཡུ་ཀོ, སོ་པི དྭེ ཝ་སྶ་ས་ཏཱ་ནི ན ཛཱི་ཝི.

ཨ་ར་ཀ་སུ་ཏྟ་ཝ་ཎྞ་ནཱ ནི་ཊྛི་ཏཱ.

མ་ཧཱ་ཝ་གྒ་ཝ་ཎྞ་ནཱ ནི་ཊྛི་ཏཱ.