༧-༡༠. ས་ཀྑི་བྷ་བྦ་སུ་ཏྟཱ་དི་ཝ་ཎྞ་ནཱ
༧༡-༧༤. ས་ཏྟ་མེ ཏ་སྨིཾ ཏ་སྨིཾ ཝི་སེ་སེཏི ཏ་སྨིཾ ཏ་སྨིཾ ས་ཙྪི་ཀཱ་ཏ་བྦེ ཝི་སེ་སེ. ས་ཀྑི་བྷཱ་ཝཱ་ཡ པ་ཙྩ་ཀྑ་ཀཱ་རི་ཏཱ་ཡ བྷ་བྦོ ས་ཀྑི་བྷ་བྦོ, ཏ་སྶ བྷཱ་ཝོ ས་ཀྑི་བྷ་བྦ་ཏཱ. ཏཾ ས་ཀྑི་བྷ་བྦ་ཏཾ. ས་ཏི ས་ཏི་ཨཱ་ཡ་ཏ་ནེཏི ས་ཏི ས་ཏི་ཀཱ་ར་ཎེ. ཀི་ཉྩེ་ཏྠ ཀཱ་ར་ཎཾ? ཨ་བྷི་ཉྙཱ ཝཱ ཨ་བྷི་ཉྙཱ་པཱ་ད་ཀ་ཛ྄ཛྷཱ་ནཾ ཝཱ, ཨ་ཝ་སཱ་ནེ པ་ན ཚ་ཊྛཱ་བྷི་ཉྙཱ་ཡ ཨ་ར་ཧ་ཏྟཾ ཝཱ ཀཱ་ར་ཎཾ, ཨ་ར་ཧ་ཏྟ་སྶ ཝི་པ་སྶ་ནཱ ཝཱ་ཏི ཝེ་དི་ཏ་བྦཾ. ཡ་ཉྷི ཏཾ ཏ་ཏྲ ཏ་ཏྲ ས་ཀྑི་བྷ་བྦ་ཏཱ་ས་ངྑཱ་ཏཾ ཨི་དྡྷི་ཝི་དྷ་པ་ཙྩ་ནུ་བྷ་ཝ་ནཱ་དི, ཏ་སྶ ཨ་བྷི་ཉྙཱ ཀཱ་ར་ཎཾ. ཨ་ཐ ཨི་དྡྷི་ཝི་དྷ་པ་ཙྩ་ནུ་བྷ་ཝ་ནཱ་དི ཨ་བྷི་ཉྙཱ, ཨེ་ཝཾ ས་ཏི ཨ་བྷི་ཉྙཱ་པཱ་ད་ཀ་ཛ྄ཛྷཱ་ནཾ ཀཱ་ར་ཎཾ. ཨ་ར་ཧ་ཏྟ་མྤི ‘‘ཀུ་དཱ་སྶུ ནཱ་མཱ་ཧཾ ཏ་དཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་རི་སྶཱ་མཱི’’ཏི ཨ་ནུ་ཏྟ་རེ་སུ ཝི་མོ་ཀྑེ་སུ པི་ཧཾ ཨུ་པ་ཊྛ་པེ་ཏྭཱ ཚ་ཊྛཱ་བྷི་ཉྙཾ ནི་བྦ་ཏྟེ་ནྟ་སྶ ཀཱ་ར་ཎཾ. ཨི་ད་ཉྩ ས་བྦ་སཱ་དྷཱ་ར་ཎཾ ན ཧོ་ཏི, སཱ་དྷཱ་ར་ཎ་ཝ་སེ་ན པ་ན ཨ་ར་ཧ་ཏྟ་སྶ ཝི་པ་སྶ་ནཱ ཀཱ་ར་ཎཾ. ཨ་ཐ ཝཱ ས་ཏི ཨཱ་ཡ་ཏ་ནེཏི ཏ་སྶ ཏ་སྶ ཝི་སེ་སཱ་དྷི་ག་མ་སྶ ཨུ་པ་ནི་སྶ་ཡ་ས་ངྑཱ་ཏེ ཀཱ་ར་ཎེ ས་ཏཱི་ཏི ཨེ་ཝ་མེ་ཏྠ ཨ་ཏྠོ ད་ཊྛ་བྦོ.
ཧཱ་ན་བྷཱ་གི་ཡཱ་དཱི་སུ ‘‘པ་ཋ་མ་ཛ྄ཛྷཱ་ན་སྶ ལཱ་བྷིཾ ཀཱ་མ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, ཧཱ་ན་བྷཱ་གི་ཡོ ས་མཱ་དྷི. ཏ་ད་ནུ་དྷ་མྨ་ཏཱ ས་ཏི ས་ནྟི་ཊྛ་ཏི, ཋི་ཏི་བྷཱ་གི་ཡོ ས་མཱ་དྷི. ཨ་ཝི་ཏ་ཀྐ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི, ཝི་སེ་ས་བྷཱ་གི་ཡོ ས་མཱ་དྷི. ནི་བྦི་དཱ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི ཝི་རཱ་གཱུ་པ་སཾ་ཧི་ཏཱ, ནི་བྦེ་དྷ་བྷཱ་གི་ཡོ ས་མཱ་དྷཱི’’ཏི (ཝི་བྷ. ༧༩༩) ཨི་མི་ནཱ ན་ཡེ་ན ས་བྦ་ས་མཱ་པ་ཏྟི་ཡོ ཝི་ཏྠཱ་རེ་ཏྭཱ ཧཱ་ན་བྷཱ་གི་ཡཱ་དི་ཨ་ཏྠོ ཝེ་དི་ཏ་བྦོ. ཏ་ཏྠ པ་ཋ་མ་ཛ྄ཛྷཱ་ན་སྶ ལཱ་བྷིནྟི ཡྭཱ་ཡཾ ཨ་པྤ་གུ་ཎ་སྶ པ་ཋ་མ་སྶ ཛྷཱ་ན་སྶ ལཱ་བྷཱི, ཏཾ. ཀཱ་མ་ས་ཧ་ག་ཏཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟཱིཏི ཏ་ཏོ ཝུ་ཊྛི་ཏཾ ཨཱ་ར་མྨ་ཎ་ཝ་སེ་ན ཀཱ་མ་ས་ཧ་ག་ཏཱ ཧུ་ཏྭཱ ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟི ཏུ་ད་ནྟི, ཏ་སྶ ཀཱ་མཱ་ན་ཏཱི་ཏ་སྶ ཀཱ་མཱ་ནུ་པ་ཀྑ་ནྡཱ་ནཾ ས་ཉྙཱ་མ་ན་སི་ཀཱ་རཱ་ནཾ ཝ་སེ་ན སོ པ་ཋ་མ་ཛ྄ཛྷཱ་ན་ས་མཱ་དྷི ཧཱ་ཡ་ཏི པ་རི་ཧཱ་ཡ་ཏི, ཏ་སྨཱ ཧཱ་ན་བྷཱ་གི་ཡོ ཝུ་ཏྟོ. ཏ་ད་ནུ་དྷ་མྨ་ཏཱཏི ཏ་ད་ནུ་རཱུ་པ་ས་བྷཱ་ཝོ. ས་ཏི ས་ནྟི་ཊྛ་ཏཱིཏི ཨི་དཾ མི་ཙྪཱ་ས་ཏིཾ ས་ནྡྷཱ་ཡ ཝུ་ཏྟཾ. ཡ་སྶ ཧི པ་ཋ་མ་ཛ྄ཛྷཱ་ནཱ་ནུ་རཱུ་པ་ས་བྷཱ་ཝཱ པ་ཋ་མ་ཛ྄ཛྷཱ་ནཾ ས་ནྟ་ཏོ པ་ཎཱི་ཏ་ཏོ དི་སྭཱ ཨ་སྶཱ་ད་ཡ་མཱ་ནཱ ཨ་བྷི་ན་ནྡ་མཱ་ནཱ ནི་ཀ་ནྟི ཧོ་ཏི, ཏ་སྶ ནི་ཀ་ནྟི་ཝ་སེ་ན སོ པ་ཋ་མ་ཛ྄ཛྷཱ་ན་ས་མཱ་དྷི ནེ་ཝ ཧཱ་ཡ་ཏི ན ཝ་ཌྜྷ་ཏི, ཋི་ཏི་ཀོ་ཊྛཱ་སི་ཀོ ཧོ་ཏི. ཏེ་ན ཝུ་ཏྟཾ ‘‘ཋི་ཏི་བྷཱ་གི་ཡོ ས་མཱ་དྷཱི’’ཏི. ཨ་ཝི་ཏ་ཀྐ་ས་ཧ་ག་ཏཱཏི ཨ་ཝི་ཏ་ཀྐཾ དུ་ཏི་ཡ་ཛ྄ཛྷཱ་ནཾ ས་ནྟ་ཏོ པ་ཎཱི་ཏ་ཏོ མ་ན་སི་ཀ་རོ་ཏོ ཨཱ་ར་མྨ་ཎ་ཝ་སེ་ན ཨ་ཝི་ཏ་ཀྐ་ས་ཧ་ག་ཏཱ. ས་ཉྙཱ་མ་ན་སི་ཀཱ་རཱ ས་མུ་དཱ་ཙ་ར་ནྟཱིཏི པ་གུ་ཎ་པ་ཋ་མ་ཛ྄ཛྷཱ་ན་ཏོ ཝུ་ཊྛི་ཏཾ དུ་ཏི་ཡ་ཛ྄ཛྷཱ་ནཱ་དྷི་ག་མ་ཏྠཱ་ཡ ཙོ་དེ་ནྟི ཏུ་ད་ནྟི. ཏ་སྶ ཨུ་པ་རི དུ་ཏི་ཡ་ཛ྄ཛྷཱ་ནཱ་ནུ་པ་ཀྑ་ནྡཱ་ནཾ ས་ཉྙཱ་མ་ན་སི་ཀཱ་རཱ་ནཾ ཝ་སེ་ན སོ པ་ཋ་མ་ཛ྄ཛྷཱ་ན་ས་མཱ་དྷི ཝི་སེ་ས་བྷཱུ་ཏ་སྶ དུ་ཏི་ཡ་ཛ྄ཛྷཱ་ན་སྶ ཨུ་པྤ་ཏྟི་པ་ད་ཊྛཱ་ན་ཏཱ་ཡ ‘‘ཝི་སེ་ས་བྷཱ་གི་ཡོ’’ཏི ཝུ་ཏྟོ.
ནི་བྦི་དཱ་ས་ཧ་ག་ཏཱཏི ཏ་མེ་ཝ པ་ཋ་མ་ཛ྄ཛྷཱ་ན་ལཱ་བྷིཾ ཛྷཱ་ན་ཏོ ཝུ་ཊྛི་ཏཾ ནི་བྦི་དཱ་ས་ངྑཱ་ཏེ་ན ཝི་པ་སྶ་ནཱ་ཉཱ་ཎེ་ན ས་ཧ་ག་ཏཱ. ཝི་པ་སྶ་ནཱ་ཉཱ་ཎ་ཉྷི ཛྷཱ་ན་ངྒེ་སུ པ་བྷེ་དེ་ན ཨུ་པ་ཊྛ་ཧ་ནྟེ་སུ ནི་བྦི་ནྡ་ཏི ཨུ་ཀྐ་ཎྛ་ཏི, ཏ་སྨཱ ‘‘ནི་བྦི་དཱ’’ཏི ཝུ་ཙྩ་ཏི. ས་མུ་དཱ་ཙ་ར་ནྟཱིཏི ནི་བྦཱ་ན་ས་ཙྪི་ཀི་རི་ཡ་ཏྠཱ་ཡ ཙོ་དེ་ནྟི ཏུ་ད་ནྟི. ཝི་རཱ་གཱུ་པ་སཾ་ཧི་ཏཱཏི ཝི་རཱ་ག་ས་ངྑཱ་ཏེ་ན ནི་བྦཱ་ནེ་ན ཨུ་པ་སཾ་ཧི་ཏཱ. ཝི་པ་སྶ་ནཱ་ཉཱ་ཎ་ཉྷི ས་ཀྐཱ ཨི་མི་ནཱ མ་གྒེ་ན ཝི་རཱ་གཾ ནི་བྦཱ་ནཾ ས་ཙྪི་ཀཱ་ཏུ་ནྟི པ་ཝ་ཏྟི་ཏོ ‘‘ཝི་རཱ་གཱུ་པ་སཾ་ཧི་ཏ’’ནྟི ཝུ་ཙྩ་ཏི. ཏཾ་ས་མྤ་ཡུ་ཏྟཱ ས་ཉྙཱ་མ་ན་སི་ཀཱ་རཱ ཝི་རཱ་གཱུ་པ་སཾ་ཧི་ཏཱ ཨེ་ཝ ནཱ་མ. ཏ་སྶ ཏེ་སཾ ས་ཉྙཱ་མ་ན་སི་ཀཱ་རཱ་ནཾ ཝ་སེ་ན པ་ཋ་མ་ཛ྄ཛྷཱ་ན་ས་མཱ་དྷི ཨ་རི་ཡ་མ་གྒ་པྤ་ཊི་ཝེ་དྷ་སྶ པ་ད་ཊྛཱ་ན་ཏཱ་ཡ ‘‘ནི་བྦེ་དྷ་བྷཱ་གི་ཡོ’’ཏི ཝུ་ཏྟོ. ཧཱ་ནཾ བྷ་ཛ་ནྟཱི་ཏི ཧཱ་ན་བྷཱ་གི་ཡཱ, ཧཱ་ན་བྷཱ་གོ ཝཱ ཨེ་ཏེ་སཾ ཨ་ཏྠཱི་ཏི ཧཱ་ན་བྷཱ་གི་ཡཱ, པ་རི་ཧཱ་ན་ཀོ་ཊྛཱ་སི་ཀཱ་ཏི ཨ་ཏྠོ. ཨི་མི་ནཱ ན་ཡེ་ན ཋི་ཏི་བྷཱ་གི་ཡོ ཝེ་དི་ཏ་བྦོ. ཨ་ཊྛ་མཱ་དཱི་ནི ཨུ་ཏྟཱ་ན་ཏྠཱ་ནེ་ཝ.
ས་ཀྑི་བྷ་བྦ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
དེ་ཝ་ཏཱ་ཝ་གྒ་ཝ་ཎྞ་ནཱ ནི་ཊྛི་ཏཱ.