༨. པུ་རི་སི་ནྡྲི་ཡ་ཉཱ་ཎ་སུ་ཏྟ་ཝ་ཎྞ་ནཱ
༦༢. ཨ་ཊྛ་མེ ནི་བྦ་ཏྟི་ཝ་སེ་ན ཨ་པཱ་ཡ་སཾ་ཝ་ཏྟ་ནི་ཡེ་ན ཝཱ ཀ་མྨུ་ནཱ ཨ་པཱ་ཡེ་སུ ནི་ཡུ་ཏྟོ་ཏི ཨཱ་པཱ་ཡི་ཀོ ནེ་ར་ཡི་ཀོཏི ཨེ་ཏྠཱ་པི ཨེ་སེ་ཝ ན་ཡོ. ཨ་ཝཱི་ཙི་མྷི ཨུ་པྤ་ཛྫི་ཏྭཱ ཏ་ཏྠ ཨཱ་ཡུ་ཀ་པྤ་ས་ཉྙི་ཏཾ ཨ་ནྟ་ར་ཀ་པྤཾ ཏི་ཊྛ་ཏཱི་ཏི ཀ་པྤ་ཊྛོ. ནི་ར་ཡཱུ་པ་པ་ཏྟི་པ་རི་ཧ་ར་ཎ་ཝ་སེ་ན ཏི་ཀི་ཙྪི་ཏུཾ ཨ་ས་ཀྐུ་ཎེ་ཡྻོ་ཏི ཨ་ཏེ་ཀི་ཙྪོ. ཨ་ཁ་ཎྜཱ་ནཱིཏི ཨེ་ཀ་དེ་སེ་ན་པི ཨ་ཁ་ཎྜི་ཏཱ་ནི. བྷི་ནྣ་ཀཱ་ལ་ཏོ པ་ཊྛཱ་ཡ བཱི་ཛཾ བཱི་ཛ་ཏྠཱ་ཡ ན ཨུ་པ་ཀ་པྤ་ཏི. ཨ་པཱུ་ཏཱི་ནཱིཏི ཨུ་ད་ཀ་ཏེ་མ་ནེ་ན ཨ་པཱུ་ཏི་ཀཱ་ནི. པཱུ་ཏི་ཀ་ཉྷི བཱི་ཛཾ བཱི་ཛ་ཏྠཱ་ཡ ན ཨུ་པ་ཀ་པྤ་ཏི. ཨ་ཝཱ་ཏཱ་ཏ་པ་ཧ་ཏཱ་ནཱིཏི ཝཱ་ཏེ་ན ཙ ཨཱ་ཏ་པེ་ན ཙ ན ཧ་ཏཱ་ནི ནི་རོ་ཛ་ཏཾ ན པཱ་པི་ཏཱ་ནི. ནི་རོ་ཛ་ཉྷི ཀ་ས་ཊཾ བཱི་ཛཾ བཱི་ཛ་ཏྠཱ་ཡ ན ཨུ་པ་ཀ་པྤ་ཏི. ‘‘སཱ་རཱ་དཱ་ནཱི’’ཏི ཝ་ཏྟ་བྦེ ཨཱ-ཀཱ་ར་སྶ ར་སྶ་ཏྟཾ ཀ་ཏྭཱ པཱ་ལི༹་ཡཾ ‘‘སཱ་ར་དཱ་ནཱི’’ཏི ཝུ་ཏྟ་ནྟི ཨཱ་ཧ ‘‘སཱ་རཱ་དཱ་ནཱི’’ཏི. ཏ་ཎྜུ་ལ་སཱ་ར་སྶ ཨཱ་དཱ་ན་ཏོ སཱ་རཱ་དཱ་ནི, ག་ཧི་ཏ་སཱ་རཱ་ནི པ་ཏི་ཊྛི་ཏ་སཱ་རཱ་ནི. ནི་སྶ་ར་ཉྷི བཱི་ཛཾ བཱི་ཛ་ཏྠཱ་ཡ ན ཨུ་པ་ཀ་པྤ་ཏི. སུ་ཁ་ས་ཡི་ཏཱ་ནཱིཏི ཙ་ཏྟཱ་རོ མཱ་སེ ཀོ་ཊྛེ པ་ཀྑི་ཏྟ་ནི་ཡཱ་མེ་ནེ་ཝ སུ་ཁ་ས་ཡི་ཏཱ་ནི སུ་ཊྛུ ས་ནྣི་ཙི་ཏཱ་ནི. མ་ཎྜ་ཁེ་ཏྟེཏི ཨཱུ་ས་ཁཱ་རཱ་དི་དོ་སེ་ཧི ཨ་ཝི་དྡྷ་སྟེ སཱ་ར་ཀྑེ་ཏྟེ. ཨ་བྷི་དོཏི ཨ་བྷི-ས་དྡེ་ན ས་མཱ་ན་ཏྠ་ནི་པཱ་ཏ་པ་ད་ནྟི ཨཱ་ཧ ‘‘ཨ་བྷི་ཨ་ཌྜྷ་ར་ཏྟ’’ནྟི. ན་ཏྠི ཨེ་ཏ་སྶ བྷི་དཱ་ཏི ཝཱ ཨ་བྷི་དོ. ‘‘ཨ་བྷི་དཾ ཨ་ཌྜྷ་ར་ཏྟ’’ནྟི ཝ་ཏྟ་བྦེ ཨུ་པ་ཡོ་ག་ཏྠེ པ་ཙྩ་ཏྟ་ཝ་ཙ་ནཾ. ཨ་ཌྜྷ་ར་ཏྟནྟི ཙ ཨ་ཙྩ་ནྟ་སཾ་ཡོ་ག་ཝ་ཙ་ནཾ, བྷུ་མྨ་ཏྠེ ཝཱ. ཏ་སྨཱ ཨ་བྷི་དོ ཨ་ཌྜྷ་ར་ཏྟནྟི ཨ་བྷི་ནྣེ ཨ་ཌྜྷ་ར་ཏྟ་ས་མ་ཡེ་ཏི ཨ་ཏྠོ. པུ་ཎྞ་མཱ་སི་ཡ་ཉྷི ག་ག་ན་མ་ཛ྄ཛྷ་སྶ པུ་ར་ཏོ ཝཱ པ་ཙྪ་ཏོ ཝཱ ཙ་ནྡེ ཋི་ཏེ ཨ་ཌྜྷ་ར་ཏྟ་ས་མ་ཡོ བྷི་ནྣོ ནཱ་མ ཧོ་ཏི, མ་ཛ྄ཛྷེ ཨེ་ཝ པ་ན ཋི་ཏེ ཨ་བྷི་ནྣོ ནཱ་མ.
སུ་པྤ་བུ་དྡྷ་སུ་ན་ཀྑ་ཏྟཱ་ད་ཡོཏི ཨེ་ཏྠ (དྷ. པ. ཨ་ཊྛ. ༢.༡༢༧ སུ་པྤ་བུ་དྡྷ་ས་ཀྱ་ཝ་ཏྠུ) སུ་པྤ་བུ་དྡྷོ ཀི་ར སཱ་ཀི་ཡོ ‘‘མ་མ དྷཱི་ཏ་རཾ ཚ་ཌྜེ་ཏྭཱ ནི་ཀྑ་ནྟོ, མ་མ པུ་ཏྟཾ པ་བྦཱ་ཛེ་ཏྭཱ ཏ་སྶ ཝེ་རི་ཊྛཱ་ནེ ཋི་ཏོ ཙཱ’’ཏི ཨི་མེ་ཧི དྭཱི་ཧི ཀཱ་ར་ཎེ་ཧི ས་ཏྠ་རི ཨཱ་གྷཱ་ཏཾ བ་ནྡྷི་ཏྭཱ ཨེ་ཀ་དི་ཝ་སཾ ‘‘ན དཱ་ནི ནི་མ་ནྟི་ཏ་ཊྛཱ་ནཾ ག་ནྟྭཱ བྷུ་ཉྫི་ཏུཾ ད་སྶཱ་མཱི’’ཏི ག་མ་ན་མ་གྒཾ པི་ད་ཧི་ཏྭཱ ཨ་ནྟ་ར་ཝཱི་ཐི་ཡཾ སུ་རཾ པི་ཝ་ནྟོ ནི་སཱི་དི. ཨ་ཐ་སྶ ས་ཏྠ་རི བྷི་ཀྑུ་ས་ངྒྷ་པ་རི་ཝུ་ཏེ ཏཾ ཋཱ་ནཾ ཨཱ་ག་ཏེ ‘‘ས་ཏྠཱ ཨཱ་ག་ཏོ’’ཏི ཨཱ་རོ་ཙེ་སུཾ. སོ ཨཱ་ཧ – ‘‘པུ་ར་ཏོ ག་ཙྪཱ་ཏི ཏ་སྶ ཝ་དེ་ཐ, ནཱ་ཡཾ མ་ཡཱ མ་ཧ་ལླ་ཀ་ཏ་རོ, ནཱ་སྶ མ་གྒཾ ད་སྶཱ་མཱི’’ཏི. པུ་ན་པྤུ་ནཾ ཝུ་ཙྩ་མཱ་ནོ་པི ཏ་ཐེ་ཝ ནི་སཱི་དི. ས་ཏྠཱ མཱ་ཏུ་ལ་སྶ ས་ནྟི་ཀཱ མ་གྒཾ ཨ་ལ་བྷི་ཏྭཱ ཏ་ཏོ་ཝ ནི་ཝ་ཏྟི. སོ་པི ཙ་ར་པུ་རི་སཾ པེ་སེ་སི – ‘‘ག་ཙྪ ཏ་སྶ ཀ་ཐཾ སུ་ཏྭཱ ཨེ་ཧཱི’’ཏི. ས་ཏྠཱ་པི ནི་ཝ་ཏྟ་ནྟོ སི་ཏཾ ཀ་ཏྭཱ ཨཱ་ན་ནྡ་ཏྠེ་རེ་ན – ‘‘ཀོ ནུ ཁོ, བྷ་ནྟེ, སི་ཏ་པཱ་ཏུ་ཀ་མྨེ པ་ཙྩ་ཡོ’’ཏི པུ་ཊྛོ ཨཱ་ཧ – ‘‘པ་སྶ་སི, ཨཱ་ན་ནྡ, སུ་པྤ་བུ་དྡྷ’’ནྟི. པ་སྶཱ་མི, བྷ་ནྟེ. བྷཱ་རི་ཡཾ ཏེ་ན ཀ་མྨཾ ཀ་ཏཾ མཱ་དི་ས་སྶ བུ་དྡྷ་སྶ མ་གྒཾ ཨ་དེ་ནྟེ་ན, ཨི་ཏོ ས་ཏྟ་མེ དི་ཝ་སེ ཧེ་ཊྛཱ་པཱ་སཱ་དེ པཱ་སཱ་ད་མཱུ་ལེ པ་ཐ་ཝི་ཡཱ པ་ཝི་སི་སྶ་ཏཱི’’ཏི ཨཱ་ཙི་ཀྑི.
སུ་ན་ཀྑ་ཏྟོ་པི (མ. ནི. ཨ་ཊྛ. ༡.༡༤༧) པུ་བྦེ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ དི་བྦ་ཙ་ཀྑུ་པ་རི་ཀ་མྨཾ པུ་ཙྪི. ཨ་ཐ་སྶ བྷ་ག་ཝཱ ཀ་ཐེ་སི. སོ དི་བྦ་ཙ་ཀྑུཾ ནི་བྦ་ཏྟེ་ཏྭཱ ཨཱ་ལོ་ཀཾ ཝ་ཌྜྷེ་ཏྭཱ ཨོ་ལོ་ཀེ་ནྟོ དེ་ཝ་ལོ་ཀེ ན་ནྡ་ན་ཝ་ན་ཙི་ཏྟ་ལ་ཏཱ་ཝ་ན་ཕཱ་རུ་ས་ཀ་ཝ་ན་མི་སྶ་ཀ་ཝ་ནེ་སུ དི་བྦ་ས་མྤ་ཏྟིཾ ཨ་ནུ་བྷ་ཝ་མཱ་ནེ དེ་ཝ་པུ་ཏྟེ ཙ དེ་ཝ་དྷཱི་ཏ་རོ ཙ དི་སྭཱ – ‘‘ཨེ་ཏེ་སཾ ཨེ་ཝ་རཱུ་པཱ་ཡ ཨ་ཏྟ་བྷཱ་ཝ་ས་མྤ་ཏྟི་ཡཱ ཋི་ཏཱ་ནཾ ཀི་ར མ་དྷུ་རོ ནུ ཁོ ས་དྡོ བྷ་ཝི་སྶ་ཏཱི’’ཏི ས་དྡཾ སོ་ཏུ་ཀཱ་མོ ཧུ་ཏྭཱ ད་ས་བ་ལཾ ཨུ་པ་ས་ངྐ་མི་ཏྭཱ དི་བྦ་སོ་ཏ་དྷཱ་ཏུ་པ་རི་ཀ་མྨཾ པུ་ཙྪི. བྷ་ག་ཝཱ པ་ན་སྶ – ‘‘དི་བྦ་སོ་ཏ་དྷཱ་ཏུ་སྶ ཨུ་པ་ནི་སྶ་ཡོ ན་ཏྠཱི’’ཏི ཉ་ཏྭཱ པ་རི་ཀ་མྨཾ ན ཀ་ཐེ་སི. ན ཧི བུ་དྡྷཱ ཡཾ ན བྷ་ཝི་སྶ་ཏི, ཏ་སྶ པ་རི་ཀ་མྨཾ ཀ་ཐེ་ནྟི. སོ བྷ་ག་ཝ་ཏི ཨཱ་གྷཱ་ཏཾ བ་ནྡྷི་ཏྭཱ ཙི་ནྟེ་སི – ‘‘ཨ་ཧཾ ས་མ་ཎཾ གོ་ཏ་མཾ པ་ཋ་མཾ དི་བྦ་ཙ་ཀྑུ་པ་རི་ཀ་མྨཾ པུ་ཙྪིཾ, སོ མ་ཡ྄ཧཾ ‘ས་མྤ་ཛྫ་ཏུ ཝཱ མཱ ཝཱ ས་མྤ་ཛྫ་ཏཱུ’ཏི ཀ་ཐེ་སི. ཨ་ཧཾ པ་ན པ་ཙྩ་ཏྟ་པུ་རི་ས་ཀཱ་རེ་ན ཏཾ ནི་བྦ་ཏྟེ་ཏྭཱ དི་བྦ་སོ་ཏ་དྷཱ་ཏུ་པ་རི་ཀ་མྨཾ པུ་ཙྪིཾ, ཏཾ མེ ན ཀ་ཐེ་སི. ཨ་དྡྷཱ ཨེ་ཝཾ ཧོ་ཏི ‘ཨ་ཡཾ རཱ་ཛ་པ་བྦ་ཛི་ཏོ དི་བྦ་ཙ་ཀྑུ་ཉཱ་ཎཾ ནི་བྦ་ཏྟེ་ཏྭཱ, དི་བྦ་སོ་ཏ་ཉཱ་ཎཾ ནི་བྦ་ཏྟེ་ཏྭཱ, ཙེ་ཏོ་པ་རི་ཡ་ཀ་མྨ་ཉཱ་ཎཾ ནི་བྦ་ཏྟེ་ཏྭཱ, ཨཱ་ས་ཝཱ་ནཾ ཁ་ཡེ ཉཱ་ཎཾ ནི་བྦ་ཏྟེ་ཏྭཱ, མ་ཡཱ ས་མ་ས་མོ བྷ་ཝི་སྶ་ཏཱི’ཏི ཨི་སྶཱ་མ་ཙྪ་རི་ཡ་ཝ་སེ་ན མ་ཡ྄ཧཾ ན ཀ་ཐེ་ཏཱི’’ཏི བྷི་ཡྻོ་སོ ཨཱ་གྷཱ་ཏཾ བ་ནྡྷི་ཏྭཱ ཀཱ་སཱ་ཡཱ་ནི ཚ་ཌྜེ་ཏྭཱ གི་ཧི་བྷཱ་ཝཾ པ་ཏྭཱ་པི ན ཏུ་ཎྷཱི་བྷཱུ་ཏོ ཝི་ཧཱ་སི. ད་ས་བ་ལཾ པ་ན ཨ་ས་ཏཱ ཏུ་ཙྪེ་ན ཨ་བྦྷཱ་ཙི་ཀྑི་ཏྭཱ ཨ་པཱ་ཡཱུ་པ་གོ ཨ་ཧོ་སི. ཏ་མྤི བྷ་ག་ཝཱ བྱཱ་ཀཱ་སི. ཝུ་ཏྟ་ཉྷེ་ཏཾ – ‘‘ཨེ་ཝ་མྤི ཁོ, བྷ་གྒ་ཝ, སུ་ན་ཀྑ་ཏྟོ ལི་ཙྪ་ཝི་པུ་ཏྟོ མ་ཡཱ ཝུ་ཙྩ་མཱ་ནོ ཨ་པ་ཀྐ་མེ་ཝ ཨི་མ་སྨཱ དྷ་མྨ་ཝི་ན་ཡཱ, ཡ་ཐཱ ཏཾ ཨཱ་པཱ་ཡི་ཀོ’’ཏི (དཱི. ནི. ༣.༦). ཏེ་ན ཝུ་ཏྟཾ ‘‘ཨ་པ་རེ་པི སུ་པྤ་བུ་དྡྷ་སུ་ན་ཀྑ་ཏྟཱ་ད་ཡོ བྷ་ག་ཝ་ཏཱ ཉཱ་ཏཱ་ཝཱ’’ཏི. ཨཱ་དི-ས་དྡེ་ན ཀོ་ཀཱ་ལི་ཀཱ་དཱི་ནཾ ས་ངྒ་ཧོ ད་ཊྛ་བྦོ.
སུ་སཱི་མོ པ་རི་བྦཱ་ཛ་ཀོཏི (སཾ. ནི. ཨ་ཊྛ. ༢.༢.༧༠) ཨེ་ཝཾ་ནཱ་མ་ཀོ ཝེ་ད་ངྒེ་སུ ཀུ་ས་ལོ པ་ཎྜི་ཏོ པ་རི་བྦཱ་ཛ་ཀོ. ཨ་ཉྙ་ཏི་ཏྠི་ཡཱ ཧི པ་རི་ཧཱི་ན་ལཱ་བྷ་ས་ཀྐཱ་ར་སི་ལོ་ཀཱ ‘‘ས་མ་ཎོ གོ་ཏ་མོ ན ཛཱ་ཏི་གོ་ཏྟཱ་དཱི་ནི ཨཱ་ར་བྦྷ ལཱ་བྷ་གྒ་པྤ་ཏྟོ ཛཱ་ཏོ, ཀ་ཝི་སེ་ཊྛོ པ་ནེ་ས ཨུ་ཏྟ་མ་ཀ་ཝི་ཏཱ་ཡ སཱ་ཝ་ཀཱ་ནཾ བ་ནྡྷཾ བ་ནྡྷི་ཏྭཱ དེ་ཏི. ཏེ ཏཾ ཨུ་གྒ་ཎྷི་ཏྭཱ ཨུ་པ་ཊྛཱ་ཀཱ་ནཾ ཨུ་པ་ནི་སི་ནྣ་ཀ་ཐ་མྤི ཨ་ནུ་མོ་ད་ན་མྤི ས་ར་བྷ་ཉྙ་མྤཱི་ཏི ཨེ་ཝ་མཱ་དཱི་ནི ཀ་ཐེ་ནྟི. ཏེ ཏེ་སཾ པ་ས་ནྣཱ་ནཾ ལཱ་བྷཾ ཨུ་པ་སཾ་ཧ་ར་ནྟི. ས་ཙེ མ་ཡཾ ཡཾ ས་མ་ཎོ གོ་ཏ་མཱ ཛཱ་ནཱ་ཏི, ཏ་ཏོ ཐོ་ཀཾ ཛཱ་ནེ་ཡྻཱ་མ, ཨ་ཏྟ་ནོ ས་མ་ཡཾ ཏ་ཏྠ པ་ཀྑི་པི་ཏྭཱ མ་ཡ་མྤི ཨུ་པ་ཊྛཱ་ཀཱ་ནཾ ཀ་ཐེ་ཡྻཱ་མ. ཏ་ཏོ ཨེ་ཏེ་ཧི ལཱ་བྷི་ཏ་རཱ བྷ་ཝེ་ཡྻཱ་མ. ཀོ ནུ ཁོ ས་མ་ཎ་སྶ གོ་ཏ་མ་སྶ ས་ནྟི་ཀེ པ་བྦ་ཛི་ཏྭཱ ཁི་པྤ་མེ་ཝ ཨུ་གྒ་ཎྷི་ཏུཾ ས་ཀྑི་སྶ་ཏཱི’’ཏི ཨེ་ཝཾ ཙི་ནྟེ་ཏྭཱ ‘‘སུ་སི་མོ པ་ཊི་བ་ལོ’’ཏི དི་སྭཱ ཨུ་པ་ས་ངྐ་མི་ཏྭཱ ཨེ་ཝ་མཱ་ཧཾ་སུ ‘‘ཨེ་ཧི ཏྭཾ, ཨཱ་ཝུ་སོ སུ་སཱི་མ, ས་མ་ཎེ གོ་ཏ་མེ བྲ་ཧྨ་ཙ་རི་ཡཾ ཙ་ར, ཏྭཾ དྷ་མྨཾ པ་རི་ཡཱ་པུ་ཎི་ཏྭཱ ཨ་མྷེ ཝཱ་ཙེ་ཡྻཱ་སི, ཏཾ མ་ཡཾ དྷ་མྨཾ པ་རི་ཡཱ་པུ་ཎི་ཏྭཱ གི་ཧཱི་ནཾ བྷཱ་སི་སྶཱ་མ, ཨེ་ཝཾ མ་ཡ་མྤི ས་ཀྐ་ཏཱ བྷ་ཝི་སྶཱ་མ ག་རུ་ཀ་ཏཱ མཱ་ནི་ཏཱ པཱུ་ཛི་ཏཱ ལཱ་བྷི་ནོ ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ན’’ནྟི (སཾ. ནི. ༢.༧༠).
ཨ་ཐ སུ་སཱི་མོ པ་རི་བྦཱ་ཛ་ཀོ ཏེ་སཾ ཝ་ཙ་ནཾ ས་མྤ་ཊི་ཙྪི་ཏྭཱ ཡེ་ནཱ་ན་ནྡོ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི. ཐེ་རོ ཙ ཏཾ ཨཱ་དཱ་ཡ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ ཨེ་ཏ་མ་ཏྠཾ ཨཱ་རོ་ཙེ་སི. བྷ་ག་ཝཱ པ་ན ཙི་ནྟེ་སི ‘‘ཨ་ཡཾ པ་རི་བྦཱ་ཛ་ཀོ ཏི་ཏྠི་ཡ་ས་མ་ཡེ ‘ཨ་ཧཾ པཱ་ཊི་ཨེ་ཀྐོ ས་ཏྠཱ’ཏི པ་ཊི་ཛཱ་ན་མཱ་ནོ ཙ་ར་ཏི, ‘ཨི་དྷེ་ཝ མ་གྒ་བྲ་ཧྨ་ཙ་རི་ཡཾ ཙ་རི་ཏུཾ ཨི་ཙྪཱ་མཱི’ཏི ཀི་ར ཝ་ད་ཏི, ཀིཾ ནུ ཁོ མ་ཡི པ་ས་ནྣོ, ཨུ་དཱ་ཧུ མ་ཡ྄ཧཾ ཝཱ མ་མ སཱ་ཝ་ཀཱ་ནཾ དྷ་མྨ་ཀ་ཐཱ་ཡ པ་ས་ནྣོ’’ཏི. ཨ་ཐ་སྶ ཨེ་ཀ་ཊྛཱ་ནེ་པི པ་སཱ་དཱ་བྷཱ་ཝཾ ཉ་ཏྭཱ ‘‘ཨ་ཡཾ མ་མ སཱ་ས་ནེ ‘དྷ་མྨཾ ཐེ་ནེ་སྶཱ་མཱི’ཏི པ་བྦ་ཛ་ཏི, ཨི་ཏི་སྶ ཨཱ་ག་མ་ནཾ ཨ་པ་རི་སུ་དྡྷཾ, ནི་པྥ་ཏྟི ནུ ཁོ ཀཱི་དི་སཱ’’ཏི ཨོ་ལོ་ཀེ་ནྟོ ‘‘ཀི་ཉྩཱ་པི ‘དྷ་མྨཾ ཐེ་ནེ་སྶཱ་མཱི’ཏི པ་བྦ་ཛ་ཏི, ཀ་ཏི་པཱ་ཧེ་ནེ་ཝ པ་ན གྷ་ཊེ་ཏྭཱ ཨ་ར་ཧ་ཏྟཾ ག་ཎྷི་སྶ་ཏཱི’’ཏི ཉ་ཏྭཱ ‘‘ཏེ་ན་ཧཱ་ན་ནྡ, སུ་སཱི་མཾ པ་བྦཱ་ཛེ་ཐཱ’’ཏི ཨཱ་ཧ. ཏཾ ས་ནྡྷཱ་ཡེ་ཏཾ ཝུ་ཏྟཾ ‘‘ཨེ་ཝཾ བྷ་ག་ཝ་ཏཱ ཀོ ཉཱ་ཏོ? སུ་སཱི་མོ པ་རི་བྦཱ་ཛ་ཀོ’’ཏི.
ས་ནྟ་ཏི་མ་ཧཱ་མ་ཏྟོཏི (དྷ. པ. ཨ་ཊྛ. ༢.༡༤༡ ས་ནྟ་ཏི་མ་ཧཱ་མ་ཏྟ་ཝ་ཏྠུ) སོ ཀི་ར ཨེ་ཀ་སྨིཾ ཀཱ་ལེ ར་ཉྙོ པ་སེ་ན་དི་སྶ པ་ཙྩ་ནྟཾ ཀུ་པི་ཏཾ ཝཱུ་པ་ས་མེ་ཏྭཱ ཨཱ་ག་ཏོ. ཨ་ཐ་སྶ རཱ་ཛཱ ཏུ་ཊྛོ ས་ཏྟ དི་ཝ་སཱ་ནི ར་ཛྫཾ ད་ཏྭཱ ཨེ་ཀཾ ན་ཙྩ་གཱི་ཏ་ཀུ་ས་ལཾ ཨི་ཏྠིཾ ཨ་དཱ་སི. སོ ས་ཏྟ དི་ཝ་སཱ་ནི སུ་རཱ་མ་ད་མ་ཏྟོ ཧུ་ཏྭཱ ས་ཏྟ་མེ དི་ཝ་སེ ས་བྦཱ་ལ་ངྐཱ་ར་པྤ་ཊི་མ་ཎྜི་ཏོ ཧ་ཏྠི་ཀྑ་ནྡྷ་ཝ་ར་ག་ཏོ ན་ཧཱ་ན་ཏི་ཏྠཾ ག་ཙྪ་ནྟོ ས་ཏྠཱ་རཾ པི་ཎྜཱ་ཡ པ་ཝི་ས་ནྟཾ དྭཱ་ར་ནྟ་རེ དི་སྭཱ ཧ་ཏྠི་ཀྑ་ནྡྷ་ཝ་ར་ག་ཏོ་ཝ སཱི་སཾ ཙཱ་ལེ་ཏྭཱ ཝ་ནྡི. ས་ཏྠཱ སི་ཏཾ ཀ་ཏྭཱ ‘‘ཀོ ནུ ཁོ, བྷ་ནྟེ, སི་ཏ་པཱ་ཏུ་ཀ་ར་ཎེ ཧེ་ཏཱུ’’ཏི ཨཱ་ན་ནྡ་ཏྠེ་རེ་ན པུ་ཊྛོ སི་ཏ་ཀཱ་ར་ཎཾ ཨཱ་ཙི་ཀྑ་ནྟོ ཨཱ་ཧ – ‘‘པ་སྶ་སི, ཨཱ་ན་ནྡ, ས་ནྟ་ཏི་མ་ཧཱ་མ་ཏྟཾ, ཨ་ཛྫེ་ཝ ས་བྦཱ་བྷ་ར་ཎ་པྤ་ཊི་མ་ཎྜི་ཏོ མ་མ ས་ནྟི་ཀཾ ཨཱ་ག་ནྟྭཱ ཙཱ་ཏུ་པྤ་དི་ཀ་གཱ་ཐཱ་ཝ་སཱ་ནེ ཨ་ར་ཧ་ཏྟཾ པ་ཏྭཱ པ་རི་ནི་བྦཱ་ཡི་སྶ་ཏཱི’’ཏི. ཏེ་ན ཝུ་ཏྟཾ ‘‘ཨེ་ཝཾ ཀོ ཉཱ་ཏོ བྷ་ག་ཝ་ཏཱ་ཏི? ས་ནྟ་ཏི་མ་ཧཱ་མ་ཏྟོ’’ཏི.
པུ་རི་སི་ནྡྲི་ཡ་ཉཱ་ཎ་སུ་ཏྟ་ཝ་ཎྞ་ནཱ ནི་ཊྛི་ཏཱ.