༣. ནི་སྶཱ་ར་ཎཱི་ཡ་སུ་ཏྟ་ཝ་ཎྞ་ནཱ

༡༣. ཏ་ཏི་ཡེ ཝ་ཌྜྷི་ཏཱཏི བྷཱ་ཝ་ནཱ་པཱ་རི་པཱུ་རི་ཝ་སེ་ན པ་རི་བྲཱུ་ཧི་ཏཱ. པུ་ན་པྤུ་ནཾ ཀ་ཏཱཏི བྷཱ་ཝ་ནཱ་ཡ བ་ཧུ་ལཱི་ཀ་ར་ཎེ་ན ཨ་པ་རཱ་པ་རཾ པ་ཝ་ཏྟི་ཏཱ. ཡུ་ཏྟ་ཡཱ་ན་ས་དི་སཱ ཀ་ཏཱཏི ཡ་ཐཱ ཡུ་ཏྟ་མཱ་ཛ་ཉྙ་ཡཱ་ནཾ ཚེ་ཀེ་ན སཱ་ར་ཐི་ནཱ ཨ་དྷི་ཊྛི་ཏཾ ཡ་ཐཱ་རུ་ཙི པ་ཝ་ཏྟ་ཏི, ཨེ་ཝཾ ཡ་ཐཱ་རུ་ཙི པ་ཝ་ཏྟི་ར་ཧཾ ག་ཧི་ཏཱ. ཝ་ཏྠུ་ཀ་ཏཱཏི ཝཱ ཨ་དྷི་ཊྛཱ་ན་ཊྛེ་ན ཝ་ཏྠུ ཝི་ཡ ཀ་ཏཱ, ས་བྦ་སོ ཨུ་པ་ཀྐི་ལེ་ས་ཝི་སོ་དྷ་ནེ་ན ཨི་དྡྷི་ཝི་སེ་ས་ཏཱ་ཡ པ་ཝ་ཏྟི་ཊྛཱ་ན་བྷཱ་ཝ་ཏོ སུ་ཝི་སོ་དྷི་ཏ་པ་རི་སྶ་ཡ་ཝ་ཏྠུ ཝི་ཡ ཀ་ཏཱ་ཏི ཝུ་ཏྟཾ ཧོ་ཏི. ཨ་དྷི་ཊྛི་ཏཱཏི པ་ཊི་པ་ཀྑ་དཱུ་རཱི་བྷཱ་ཝ་ཏོ སུ་བྷཱ་ཝི་ཏ་བྷཱ་ཝེ་ན ཏཾ་ཏཾ་ཨ་དྷི་ཊྛཱ་ན་ཡོ་གྱ་ཏཱ་ཡ ཋ་པི་ཏཱ. ས་མ་ནྟ་ཏོ ཙི་ཏཱཏི ས་བྦ་བྷཱ་གེ་ན བྷཱ་ཝ་ནཱུ་པ་ཙ་ཡཾ ག་མི་ཏཱ. ཏེ་ནཱ་ཧ ‘‘ཨུ་པ་ཙི་ཏཱ’ཏི. སུ་ཊྛུ ས་མཱ་ར་དྡྷཱཏི ཨི་དྡྷི་བྷཱ་ཝ་ནཱ་སི་ཁཱ་པྤ་ཏྟི་ཡཱ ས་མྨ་དེ་ཝ ས་མྦྷཱ་ཝི་ཏཱ. ཨ་བྷཱུ་ཏ་བྱཱ་ཀ་ར་ཎཾ བྱཱ་ཀ་རོ་ཏཱིཏི ‘‘མེ་ཏྟཱ ཧི ཁོ མེ ཙེ་ཏོ་ཝི་མུ་ཏྟི བྷཱ་ཝི་ཏཱ’’ཏི་ཨཱ་དི་ནཱ ཨ་ཏྟ་ནི ཨ་ཝི་ཛྫ་མཱ་ན་གུ་ཎཱ་བྷི་བྱཱ་ཧཱ་རཾ བྱཱ་ཧ་ར་ཏི. ཙེ་ཏོ་ཝི་མུ་ཏྟི་ས་དྡཾ ཨ་པེ་ཀྑི་ཏྭཱ ‘‘ནི་སྶ་ཊཱ’’ཏི ཝུ་ཏྟཾ. པུ་ན བྱཱ་པཱ་དོ ན་ཏྠཱིཏི ཨི་དཱ་ནི མ་མ བྱཱ་པཱ་དོ ནཱ་མ ས་བྦ་སོ ན་ཏྠཱི་ཏི ཉ་ཏྭཱ.

བ་ལ་ཝ་ཝི་པ་སྶ་ནཱཏི བྷ་ཡ་ཏུ་པ་ཊྛཱ་ནེ ཉཱ་ཎཾ, ཨཱ་དཱི་ན་ཝཱ་ནུ་པ་སྶ་ནེ ཉཱ་ཎཾ མུ་ཙྩི་ཏུ་ཀ་མྱ་ཏཱ་ཉཱ་ཎཾ, བྷ་ངྒ་ཉཱ་ཎ་ནྟི ཙ་ཏུ་ནྣཾ ཉཱ་ཎཱ་ནཾ ཨ་དྷི་ཝ་ཙ་ནཾ. ཡེ་སཾ ནི་མི་ཏྟཱ་ནཾ ཨ་བྷཱ་ཝེ་ན ཨ་ར་ཧ་ཏྟ་ཕ་ལ་ས་མཱ་པ་ཏྟི་ཡཱ ཨ་ནི་མི་ཏྟ་ཏཱ, ཏཾ ད་སྶེ་ཏུཾ ‘‘སཱ ཧཱི’’ཏི་ཨཱ་དི ཝུ་ཏྟཾ. ཏ་ཏྠ རཱ་ག་སྶ ནི་མི་ཏྟཾ, རཱ་གོ ཨེ་ཝ ཝཱ ནི་མི་ཏྟཾ རཱ་ག་ནི་མི་ཏྟཾ. ཨཱ་དི-ས་དྡེ་ན དོ་ས་ནི་མི་ཏྟཱ་དཱི་ནཾ ས་ངྒ་ཧོ ད་ཊྛ་བྦོ. རཱུ་པ་ཝེ་ད་ནཱ་དི་ས་ངྑཱ་ར་ནི་མི་ཏྟཾ རཱུ་པ་ནི་མི་ཏྟཱ་དི. ཏེ་སཾ་ཡེ་ཝ ནི་ཙྩཱ་དི་ཝ་སེ་ན ཨུ་པ་ཊྛཱ་ནཾ ནི་ཙྩ་ནི་མི་ཏྟཱ་དི. ཏ་ཡི་དཾ ནི་མི་ཏྟཾ ཡ་སྨཱ ས་བྦེ་ན ས་བྦཾ ཨ་ར་ཧ་ཏྟ་ཕ་ལེ ན་ཏྠི, ཏ་སྨཱ ཝུ་ཏྟཾ ‘‘སཱ ཧི…པེ… ཨ་ནི་མི་ཏྟཱ’’ཏི. ནི་མི་ཏྟཾ ཨ་ནུ་སྶ་ར་ཏི ཨ་ནུ་ག་ཙྪ་ཏི ཨཱ་ར་བྦྷ པ་ཝ་ཏྟ་ཏི སཱི་ལེ་ནཱ་ཏི ནི་མི་ཏྟཱ་ནུ་སཱ་རཱི. ཏེ་ནཱ་ཧ ‘‘ཝུ་ཏྟ་པྤ་བྷེ་དཾ ནི་མི་ཏྟཾ ཨ་ནུ་ས་ར་ཎ་ས་བྷཱ་ཝ’’ནྟི.

ཨ་སྨི་མཱ་ནོཏི ‘‘ཨ་སྨཱི’’ཏི པ་ཝ་ཏྟོ ཨ་ཏྟ་ཝི་ས་ཡོ མཱ་ནོ. ཨ་ཡཾ ནཱ་མ ཨ་ཧ་མ་སྨཱིཏི རཱུ་པ་ལ་ཀྑ་ཎོ ཝེ་ད་ནཱ་དཱི་སུ ཝཱ ཨ་ཉྙ་ཏ་ར་ལ་ཀྑ་ཎོ ཨ་ཡཾ ནཱ་མ ཨ་ཏྟཱ ཨ་ཧཾ ཨ་སྨཱི་ཏི. ཨ་སྨི་མཱ་ནོ ས་མུ་གྒྷཱ་ཏཱི་ཡ་ཏི ཨེ་ཏེ་ནཱ་ཏི ཨ་སྨི་མཱ་ན་ས་མུ་གྒྷཱ་ཏོ, ཨ་ར་ཧ་ཏྟ་མ་གྒོ. པུ་ན ཨ་སྨི་མཱ་ནོ ན་ཏྠཱིཏི ཏ་སྶ ཨ་ནུ་པྤ་ཏྟི་དྷ་མྨ་ཏཱ་པཱ་ད་ནཾ ཀི་ཏྟེ་ནྟོ ས་མུ་གྒྷཱ་ཏ་ཏྟ་མེ་ཝ ཝི་བྷཱ་ཝེ་ཏི.

ནི་སྶཱ་ར་ཎཱི་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.