(༨) ༣. ཡོ་དྷཱ་ཛཱི་ཝ་ཝ་གྒོ
༡-༢. པ་ཋ་མ་ཙེ་ཏོ་ཝི་མུ་ཏྟི་ཕ་ལ་སུ་ཏྟཱ་དི་ཝ་ཎྞ་ནཱ
༧༡-༧༢. ཏ་ཏི་ཡ་སྶ པ་ཋ་མེ ཨ་ཝི་ཛྫཱ་པ་ལི་གྷནྟི ཨེ་ཏྠ ཨ་ཝི་ཛྫཱཏི ཝ་ཊྚ་མཱུ་ལི་ཀཱ ཨ་ཝི་ཛྫཱ, ཨ་ཡཾ པ་ཙུ་ར་ཛ་ནེ་ཧི ཨུ་ཀྑི་པི་ཏུཾ ཨ་ས་ཀྐུ་ཎེ་ཡྻ་བྷཱ་ཝ་ཏོ དུ་ཀྑི་པ་ན་ཊྛེ་ན ནི་བྦཱ་ན་དྭཱ་ར་པྤ་ཝེ་ས་ཝི་བ་ནྡྷ་ནེ་ན ཙ ‘‘པ་ལི་གྷོ ཝི་ཡཱ་ཏི པ་ལི་གྷོ’’ཏི ཝུ་ཙྩ་ཏི. ཏེ་ནེ་ས ཏ་སྶཱ ཨུ་ཀྑི་ཏྟ་ཏྟཱ ‘‘ཨུ་ཀྑི་ཏྟ་པ་ལི་གྷོ’’ཏི ཝུ་ཏྟོ. པུ་ན་བྦྷ་ཝ་སྶ ཀ་ར་ཎ་སཱི་ལོ, པུ་ན་བྦྷ་ཝཾ ཝཱ ཕ་ལཾ ཨ་ར་ཧ་ཏཱི་ཏི པོ་ནོ་བྷ་ཝི་ཀཱ, པུ་ན་བྦྷ་ཝ་དཱ་ཡི་ཀཱ་ཏི ཨ་ཏྠོ. ཛཱ་ཏི་སཾ་སཱ་རོཏི ཛཱ་ཡ་ན་ཝ་སེ་ན ཙེ་ཝ སཾ་ས་ར་ཎ་ཝ་སེ་ན ཙ ཨེ་ཝཾ་ལ་དྡྷ་ནཱ་མཱ་ནཾ པུ་ན་བྦྷ་ཝ་ཀྑ་ནྡྷཱ་ནཾ པ་ཙྩ་ཡོ ཀ་མྨཱ་བྷི་ས་ངྑཱ་རོ. ཛཱ་ཏི་སཾ་སཱ་རོ་ཏི ཧི ཕ་ལཱུ་པ་ཙཱ་རེ་ན ཀཱ་ར་ཎཾ ཝུ་ཏྟཾ. ཏ་ཉྷི པུ་ན་པྤུ་ནཾ ཨུ་པྤ་ཏྟི་ཀཱ་ར་ཎ་ཝ་སེ་ན པ་རི་ཀྑི་པི་ཏྭཱ ཋི་ཏ་ཏྟཱ ‘‘པ་རི་ཁཱ’’ཏི ཝུ་ཙྩ་ཏི ས་ནྟཱ་ན་སྶ པ་རི་ཀྑི་པ་ན་ཏོ. ཏེ་ནེ་ས ཏ་སྶ སཾ་ཀི་ཎྞ་ཏྟཱ ཝི་ཀི་ཎྞ་ཏྟཱ ས་བྦ་སོ ཁི་ཏྟ་ཏྟཱ ཝི་ནཱ་སི་ཏ་ཏྟཱ ‘‘སཾ་ཀི་ཎྞ་པ་རི་ཁོ’’ཏི ཝུ་ཏྟོ.
ཏ་ཎྷཱ་ས་ངྑཱ་ཏནྟི ཨེ་ཏྠ ཏ་ཎྷཱཏི ཝ་ཊྚ་མཱུ་ལི་ཀཱ ཏ་ཎྷཱ. ཨ་ཡ་ཉྷི ག་མྦྷཱི་རཱ་ནུ་ག་ཏ་ཊྛེ་ན ‘‘ཨེ་སི་ཀཱ’’ཏི ཝུ་ཙྩ་ཏི. ལུ་ཉྩི་ཏྭཱ ཨུ་དྡྷ་རི་ཏྭཱ. ཨོ་ར་མྦྷཱ་གི་ཡཱ་ནཱིཏི ཨོ་ར་མྦྷཱ་ག་ཛ་ན་ཀཱ་ནི ཀཱ་མ་བྷ་ཝེ ཨུ་པ་པ་ཏྟི་པ་ཙྩ་ཡཱ་ནི ཀཱ་མ་རཱ་ག་སཾ་ཡོ་ཛ་ནཱ་དཱི་ནི. ཨེ་ཏཱ་ནི ཧི ཀ་ཝཱ་ཊཾ ཝི་ཡ ན་ག་ར་དྭཱ་རཾ ཙི་ཏྟཾ པི་ད་ཧི་ཏྭཱ ཋི་ཏ་ཏྟཱ ‘‘ཨ་གྒ་ལཱ༹’’ཏི ཝུ་ཙྩ་ནྟི. ཏེ་ནེ་ས ཏེ་སཾ ནི་གྒ་ཏ་ཏྟཱ བྷི་ནྣ་ཏྟཱ ‘‘ནི་ར་གྒ་ལོ༹’’ཏི ཝུ་ཏྟོ་ཏི. ཨ་གྒ་མ་གྒེ་ན པ་ནྣོ ཨ་པ་ཙི་ཏོ མཱ་ན་དྡྷ་ཛོ ཨེ་ཏ་སྶཱ་ཏི པ་ནྣ་དྡྷ་ཛོ. པ་ནྣ་བྷཱ་རོཏི ཁ་ནྡྷ་བྷཱ་ར་ཀི་ལེ་ས་བྷཱ་ར་ཨ་བྷི་ས་ངྑཱ་ར་བྷཱ་རཱ ཨོ་རོ་པི་ཏཱ ཨ་སྶཱ་ཏི པ་ནྣ་བྷཱ་རོ. ཝི་སཾ་ཡུ་ཏྟོཏི ཙ་ཏཱུ་ཧི ཡོ་གེ་ཧི ས་བྦ་ཀི་ལེ་སེ་ཧི ཙ ཝི་སཾ་ཡུ་ཏྟོ. ཨ་སྨི་མཱ་ནོཏི རཱུ་པེ ཨ་སྨཱི་ཏི མཱ་ནོ, ཝེ་ད་ནཱ་ཡ, ས་ཉྙཱ་ཡ, ས་ངྑཱ་རེ་སུ, ཝི་ཉྙཱ་ཎེ ཨ་སྨི་མཱ་ནོ. ཨེ་ཏྠ ཧི པ་ཉྩ་པི ཁ་ནྡྷེ ཨ་ཝི་སེ་ས་ཏོ ‘‘ཨ་སྨཱི’’ཏི ག་ཧེ་ཏྭཱ པ་ཝ་ཏྟ་མཱ་ནོ ཨ་སྨི་མཱ་ནོ་ཏི ཨ་དྷི་པྤེ་ཏོ.
ན་ག་ར་དྭཱ་ར་སྶ པ་རི་སྶ་ཡ་པ་ཊི་བཱ་ཧ་ན་ཏྠ་ཉྩེ་ཝ སོ་དྷ་ན་ཏྠ་ཉྩ ཨུ་བྷོ་སུ པ་སྶེ་སུ ཨེ་སི་ཀཱ་ཐ་མྦྷེ ནི་ཁ་ཎི་ཏྭཱ ཋ་པེ་ཏཱི་ཏི ཨཱ་ཧ ‘‘ན་ག་ར་དྭཱ་རེ ཨུ་སྶཱ་པི་ཏེ ཨེ་སི་ཀཱ་ཐ་མྦྷེ’’ཏི. པཱ་ཀཱ་ར་ཝི་དྡྷཾ་ས་ནེ་ནེ་ཝ པ་རི་ཁཱ་བྷཱུ་མི་ས་མ་ཀ་ར་ཎཾ ཧོ་ཏཱི་ཏི ཨཱ་ཧ ‘‘པཱ་ཀཱ་རཾ བྷི་ནྡི་ཏྭཱ པ་རི་ཁཾ ཝི་ཀི་རི་ཏྭཱ’’ཏི. ‘‘ཨེ་ཝ’’ནྟི་ཨཱ་དི ཨུ་པ་མཱ་སཾ་ས་ནྡ་ནཾ. ས་ནྟོ སཾ་ཝི་ཛྫ་མཱ་ནོ ཀཱ་ཡོ དྷ་མྨ་ས་མཱུ་ཧོ་ཏི ས་ཀྐཱ་ཡོ, ཨུ་པཱ་དཱ་ན་ཀྑ་ནྡྷ་པ་ཉྩ་ཀཾ. དྭ་ཏྟིཾ་ས་ཀ་མྨ་ཀཱ་ར་ཎཱ དུ་ཀྑ་ཀྑ་ནྡྷེ ཨཱ་ག་ཏ་དུ་ཀྑཱ་ནི. ཨ་ཀྑི་རོ་ག་སཱི་ས་རོ་གཱ་ད་ཡོ. ཨ་ཊྛ་ན་ཝུ་ཏི རོ་གཱ, རཱ་ཛ་བྷ་ཡཱ་དཱི་ནི པ་ཉྩ་ཝཱི་ས་ཏི་མ་ཧཱ་བྷ་ཡཱ་ནི. དུ་ཏི་ཡཾ ཨུ་ཏྟཱ་ན་མེ་ཝ.
པ་ཋ་མ་ཙེ་ཏོ་ཝི་མུ་ཏྟི་ཕ་ལ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
༣-༤. པ་ཋ་མ་དྷ་མྨ་ཝི་ཧཱ་རཱི་སུ་ཏྟཱ་དི་ཝ་ཎྞ་ནཱ
༧༣-༧༤. ཏ་ཏི་ཡེ ནི་ཡ་ཀ་ཛ྄ཛྷ་ཏྟེཏི ཨ་ཏྟ་ནོ ས་ནྟཱ་ནེ. མེ་ཏྟཱ་ཡ ཨུ་པ་སཾ་ཧ་ར་ཎ་ཝ་སེ་ན ཧི་ཏཾ ཨེ་ས་ནྟེ་ན. ཀ་རུ་ཎཱ་ཡ ཝ་སེ་ན ཨ་ནུ་ཀ་མྤ་མཱ་ནེ་ན. པ་རི་གྒ་ཧེ་ཏྭཱཏི པ་རི་ཏོ ག་ཧེ་ཏྭཱ, ཕ་རི་ཏྭཱ་ཏི ཨ་ཏྠོ. པ་རི་ཙྩཱཏི པ་རི་ཏོ ཀ་ཏྭཱ, ས་མ་ནྟ་ཏོ ཕ་རི་ཏྭཱ ཨི་ཙྩེ་ཝ ཨ་ཏྠོ. ‘‘པ་ཊི་ཙྩཱ’’ཏི་པི པཱ་ཋོ. མཱ པ་མ་ཛྫི་ཏྠཱཏི ‘‘ཛྷཱ་ཡ་ཐཱ’’ཏི ཝུ་ཏྟ་ས་མ་ཐ་ཝི་པ་སྶ་ནཱ་ནཾ ཨ་ན་ནུ་ཡུ་ཉྫ་ནེ་ན ཨ་ཉྙེ་ན ཝཱ ཀེ་ན་ཙི པ་མཱ་ད་ཀཱ་ར་ཎེ་ན མཱ པ་མཱ་དཾ ཨཱ་པ་ཛྫི་ཏྠ. ནི་ཡྻཱ་ནི་ཀ་སཱ་ས་ནེ ཨ་ཀ་ཏྟ་བྦ་ཀ་ར་ཎཾ ཝི་ཡ ཀ་ཏྟ་བྦཱ་ཀ་ར་ཎ་མྤི པ་མཱ་དོ་ཏི. ཝི་པ་ཏྟི་ཀཱ་ལེཏི ས་ཏྟ་ཨ་ས་པྤཱ་ཡཱ་དི་ཝི་པ་ཏྟི་ཡུ་ཏྟེ ཀཱ་ལེ. ས་བྦེ་པི སཱ་ས་ནེ གུ་ཎཱ ཨི་དྷེ་ཝ ས་ངྒ་ཧཾ ག་ཙྪ་ནྟཱི་ཏི ཨཱ་ཧ ‘‘ཛྷཱ་ཡ་ཐ མཱ པ་མཱ་ད་ཏྠ…པེ… ཨ་ནུ་སཱ་ས་ནཱི’’ཏི. ཙ་ཏུ་ཏྠེ ན་ཏྠི ཝ་ཏྟ་བྦཾ.
པ་ཋ་མ་དྷ་མྨ་ཝི་ཧཱ་རཱི་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
༥. པ་ཋ་མ་ཡོ་དྷཱ་ཛཱི་ཝ་སུ་ཏྟ་ཝ་ཎྞ་ནཱ
༧༥. པ་ཉྩ་མེ ཡུ་ཛ྄ཛྷ་ནཾ ཡོ་དྷོ, སོ ཨཱ་ཛཱི་ཝོ ཨེ་ཏེ་ས་ནྟི ཡོ་དྷཱ་ཛཱི་ཝཱ. ཏེ་ནཱ་ཧ ‘‘ཡུ་དྡྷཱུ་པ་ཛཱི་ཝི་ནོ’’ཏི. ས་ནྠ་མྦྷི་ཏྭཱ ཋཱ་ཏུཾ ན ས་ཀྐོ་ཏཱིཏི བ་དྡྷོ དྷི་ཏི་ས་མྤ་ནྣོ ཋཱ་ཏུཾ ན ས་ཀྐོ་ཏི. ས་མཱ་ག་ཏེཏི ས་མྤ་ཏྟེ. བྱཱ་པ་ཛྫ་ཏཱིཏི ཝི་ཀཱ་ར་མཱ་པ་ཛྫ་ཏི. ཏེ་ནཱ་ཧ ‘‘པ་ཀ་ཏི་བྷཱ་ཝཾ ཛ་ཧ་ཏཱི’’ཏི.
ར་ཛ་གྒ་སྨིནྟི པ་ཙྩ་ཏྟེ བྷུ་མྨ་ཝ་ཙ་ན་ནྟི ཨཱ་ཧ ‘‘ཀིཾ ཏ་སྶ པུ་གྒ་ལ་སྶ ར་ཛ་གྒཾ ནཱ་མཱ’’ཏི. ཝི་ནི་བྦེ་ཋེ་ཏྭཱཏི ག་ཧི་ཏ་གྒ་ཧ་ཎཾ ཝི་སྶ་ཛྫཱ་པེ་ཏྭཱ. མོ་ཙེ་ཏྭཱཏི ས་རཱི་ར་ཏོ ཨ་པ་ནེ་ཏྭཱ.
པ་ཋ་མ་ཡོ་དྷཱ་ཛཱི་ཝ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༦. དུ་ཏི་ཡ་ཡོ་དྷཱ་ཛཱི་ཝ་སུ་ཏྟ་ཝ་ཎྞ་ནཱ
༧༦. ཚ་ཊྛེ ཙ་མྨནྟི ཨི་མི་ནཱ ཙ་མྨ་མ་ཡཾ ཙ་མྨ་མི་ཏི སི་བྦི་ཏཾ, ཨ་ཉྙཾ ཝཱ ཀེ་ཊ་ཀ་ཕ་ལ་ཀཱ་དིཾ ས་ངྒ་ཎྷཱ་ཏི. དྷ་ནུ་ཀ་ལཱ་པཾ ས་ནྣ་ཡ྄ཧི་ཏྭཱཏི དྷ་ནུ་ཉྩེ་ཝ ཏཱུ་ཎི་ར་ཉྩ ས་ནྣ་ཡ྄ཧི་ཏྭཱ ས་ཛྫེ་ཏྭཱ. དྷ་ནུ་ད་ཎྜ་སྶ ཛི་ཡཱ་ཡ་ཏྟ་བྷཱ་ཝ་ཀ་ར་ཎཱ་དི་པི ཧི དྷ་ནུ་ནོ ས་ནྣ་ཡ྄ཧ་ནཾ. ཏེ་ནེ་ཝཱ་ཧ ‘‘དྷ་ནུ་ཉྩ ས་ར་ཀ་ལཱ་པ་ཉྩ ས་ནྣ་ཡ྄ཧི་ཏྭཱ’’ཏི. ཡུ་དྡྷ་ས་ནྣི་ཝེ་སེ་ན ཋི་ཏནྟི དྭི་ནྣཾ སེ་ནཱ་ནཾ བྱཱུ་ཧ་ན་སཾ་ཝི་དྷཱ་ན་ན་ཡེ་ན ཀ་ཏོ ཡོ ས་ནྣི་ཝེ་སོ, ཏ་སྶ ཝ་སེ་ན ཋི་ཏཾ, སེ་ནཱ་བྱཱུ་ཧ་སཾ་ཝི་དྷཱ་ན་ཝ་སེ་ན ས་ནྣི་ཝི་ཊྛ་ནྟི ཝུ་ཏྟཾ ཧོ་ཏི. ཨུ་སྶཱ་ཧ་ཉྩ ཝཱ་ཡཱ་མ་ཉྩ ཀ་རོ་ཏཱིཏི ཡུ་ཛ྄ཛྷ་ན་ཝ་སེ་ན ཨུ་སྶཱ་ཧཾ ཝཱ་ཡཱ་མ་ཉྩ ཀ་རོ་ཏི. པ་རི་ཡཱ་པཱ་དེ་ནྟཱིཏི མ་ར་ཎ་པ་རི་ཡ་ནྟི་ཀཾ ཨ་པ་རཾ པཱ་པེ་ནྟི. ཏེ་ནཱ་ཧ ‘‘པ་རི་ཡཱ་པཱ་ད་ཡ་ནྟཱི’’ཏི, ཛཱི་ཝི་ཏཾ པ་རི་ཡཱ་པཱ་ད་ཡ་ནྟི མ་ར་ཎཾ པ་ཊི་པ་ཛྫཱ་པེ་ནྟཱི་ཏི ཝུ་ཏྟཾ ཧོ་ཏི.
ཨ་ར་ཀྑི་ཏེ་ནེ་ཝ ཀཱ་ཡེ་ནཱཏི་ཨཱ་དཱི་སུ ཧ་ཏྠ་པཱ་དེ ཀཱི་ལཱ༹་པེ་ནྟོ གཱི་ཝཾ ཝི་པ་རི་ཝ་ཏྟེ་ནྟོ ཀཱ་ཡཾ ན ར་ཀྑ་ཏི ནཱ་མ. ནཱ་ན་པྤ་ཀཱ་རཾ དུ་ཊྛུ་ལླཾ ཀ་རོ་ནྟོ ཝཱ་ཙཾ ན ར་ཀྑ་ཏི ནཱ་མ. ཀཱ་མ་ཝི་ཏ་ཀྐཱ་ད་ཡོ ཝི་ཏ་ཀྐེ་ནྟོ ཙི་ཏྟཾ ན ར་ཀྑ་ཏི ནཱ་མ. ཨ་ནུ་པ་ཊྛི་ཏཱ་ཡ ས་ཏི་ཡཱཏི ཀཱ་ཡ་ག་ཏཱ་ཡ ས་ཏི་ཡཱ ཨ་ནུ་པ་ཊྛི་ཏཱ་ཡ. རཱ་གེ་ན ཨ་ནུ་ག་ཏོཏི རཱ་གེ་ན ཨ་ནུ་པ་ཧ་ཏོ. རཱ་ག་པ་རེ་ཏོཏི ཝཱ རཱ་གེ་ན ཕུ་ཊྛོ ཕུ་ཊྛ་ཝི་སེ་ན ཝི་ཡ ས་པྤེ་ན.
ཨ་ནུ་ད་ཧ་ན་ཊྛེ་ནཱཏི ཨ་ནུ་པཱ་ཡ་པྤ་ཊི་པ་ཏྟི་ཡཱ. ས་མྤ་ཏི ཨཱ་ཡ་ཏི་ཉྩ མ་ཧཱ་བྷི་ཏཱ་པ་ཊྛེ་ན. ཨ་ན་ཝ་ཏྠི་ཏ་ས་བྷཱ་ཝ་ཏཱ་ཡ ཨི་ཏྟ་ར་པ་ཙྩུ་པ་ཊྛཱ་ན་ཊྛེ་ན. མུ་ཧུ་ཏྟ་ར་མ་ཎཱི་ཡ་ཏཱ་ཡ ཏཱ་ཝ་ཀཱ་ལི་ཀ་ཊྛེ་ན. བྱ་ཏྟེ་ཧི ཨ་བྷི་བྷ་ཝ་ནཱི་ཡ་ཏཱ་ཡ ས་བྦ་ངྒ་པ་ཙྩ་ངྒ་པ་ལི་བྷ་ཉྫ་ན་ཊྛེ་ན. ཚེ་ད་ན་བྷེ་ད་ནཱ་དི་ཨ་དྷི་ཀ་ར་ཎ་བྷཱ་ཝེ་ན ཨུ་གྒྷ་ཊྚ་ན་ས་དི་ས་ཏཱ་ཡ ཨ་དྷི་ཀུ་ཊྚ་ན་ཊྛེ་ན. ཨ་ཝ་ཎེ ཝ་ཎཾ ཨུ་པྤཱ་དེ་ཏྭཱ ཨ་ནྟོ ཨ་ནུ་པ་ཝི་ས་ན་ས་བྷཱ་ཝ་ཏཱ་ཡ ཝི་ནི་ཝི་ཛ྄ཛྷ་ན་ཊྛེ་ན. དི་ཊྛ་དྷ་མྨི་ཀ་ས་མྤ་རཱ་ཡི་ཀ ཨ་ན་ཏྠ་ནི་མི་ཏྟ་ཏཱ་ཡ སཱ་ས་ངྐ་ས་པྤ་ཊི་བྷ་ཡ་ཊྛེ་ན.
དུ་ཏི་ཡ་ཡོ་དྷཱ་ཛཱི་ཝ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༧-༨. པ་ཋ་མ་ཨ་ནཱ་ག་ཏ་བྷ་ཡ་སུ་ཏྟཱ་དི་ཝ་ཎྞ་ནཱ
༧༧-༧༨. ས་ཏྟ་མེ ཝི་སེ་ས་སྶ པ་ཏྟི་ཡཱ ཝི་སེ་ས་སྶ པཱ་པུ་ཎ་ན་ཏྠཾ. ཝཱི་རི་ཡནྟི པ་དྷཱ་ན་ཝཱི་རི་ཡཾ. ཏཾ པ་ན ཙ་ངྐ་མ་ན་ཝ་སེ་ན ཀ་ར་ཎེ ‘‘ཀཱ་ཡི་ཀ’’ནྟི་པི ཝ་ཏྟ་བྦ་ཏཾ ལ་བྷ་ཏཱི་ཏི ཨཱ་ཧ – ‘‘དུ་ཝི་དྷ་མྤཱི’’ཏི. ས་ཏྠ་ཀ་ཝཱ་ཏཱཏི ས་ནྡྷི་བ་ནྡྷ་ནཱ་ནི ཀ་ཏྟ་རི་ཡཱ ཚི་ནྡ་ནྟཱ ཝི་ཡ པ་ཝ་ཏྟ་ཝཱ་ཏཱ. ཏེ་ནཱ་ཧ – ‘‘ས་ཏྠཾ ཝི་ཡཱ’’ཏི་ཨཱ་དི. ཀ་ཏ་ཀ་མྨེ་ཧཱིཏི ཀ་ཏ་ཙོ་ར་ཀ་མྨེ་ཧི. ཏེ ཀི་ར ཀ་ཏ་ཀ་མྨཱ ཡཾ ནེ་སཾ དེ་ཝ་ཏཾ ཨཱ་ཡཱ་ཙི་ཏྭཱ ཀ་མྨཾ ནི་པྥ་ནྣཾ, ཏ་སྶ ཨུ་པ་ཀཱ་ར་ཏྠཱ་ཡ མ་ནུ་སྶེ མཱ་རེ་ཏྭཱ ག་ལ་ལོ་ཧི་ཏཱ་ནི ག་ཎྷ་ནྟི. ཏེ ‘‘ཨ་ཉྙེ་སུ མ་ནུ་སྶེ་སུ མཱ་རི་ཡ་མཱ་ནེ་སུ ཀོ་ལཱ་ཧ་ལཾ ཨུ་པྤ་ཛྫི་སྶ་ཏི, པ་བྦ་ཛི་ཏཾ པ་རི་ཡེ་ས་ནྟོ ནཱ་མ ན་ཏྠཱི’’ཏི མ་ཉྙ་མཱ་ནཱ བྷི་ཀྑཱུ ག་ཧེ་ཏྭཱ མཱ་རེ་ནྟི. ཏཾ ས་ནྡྷཱ་ཡེ་ཏཾ ཝུ་ཏྟཾ. ཨ་ཀ་ཏ་ཀ་མྨེ་ཧཱིཏི ཨ་ཊ་ཝི་ཏོ གཱ་མཾ ཨཱ་ག་མ་ན་ཀཱ་ལེ ཀ་མྨ་ནི་པྥ་ཏྟ་ཏྠཾ པུ་རེ་ཏ་རཾ བ་ལི་ཀ་མྨཾ ཀཱ་ཏུ་ཀཱ་མེ་ཧི. ཏེ་ནེ་ཝཱ་ཧ – ‘‘ཙོ་རི་ཀཾ ཀ་ཏྭཱ ནི་ཀྑ་ནྟཱ ཀ་ཏ་ཀ་མྨཱ ནཱ་མཱ’’ཏི་ཨཱ་དི. ཨ་ཊྛ་མེ ན་ཏྠི ཝ་ཏྟ་བྦཾ.
པ་ཋ་མ་ཨ་ནཱ་ག་ཏ་བྷ་ཡ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
༩. ཏ་ཏི་ཡ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ
༧༩. ན་ཝ་མེ པཱ་ལི༹་ག་མྦྷཱི་རཱཏི (སཾ. ནི. ཊཱི. ༢.༢.༢༢༩) པཱ་ལི༹་ཝ་སེ་ན ག་མྦྷཱི་རཱ ཨ་གཱ་དྷཱ དུ་ཀྑོ་གཱ་ཧཱ ས་ལླ་སུ་ཏྟ་ས་དི་སཱ. ས་ལླ་སུ་ཏྟཉྷི (སུ. ནི. ༥༧༩) ‘‘ཨ་ནི་མི་ཏྟ་མ་ན་ཉྙཱ་ཏ’’ནྟི་ཨཱ་དི་ནཱ པཱ་ལི༹་ཝ་སེ་ན ག་མྦྷཱི་རཾ, ན ཨ་ཏྠ་ག་མྦྷཱི་རཾ. ཏ་ཐཱ ཧི ཏ་ཏྠ ཏཱ ཏཱ གཱ་ཐཱ དུ་ཝི་ཉྙེ་ཡྻ་རཱུ་པཱ ཏི་ཊྛ་ནྟི. དུ་ཝི་ཉྙེ་ཡྻ་ཉྷི ཉཱ་ཎེ་ན དུ་ཀྑོ་གཱ་ཧ་ནྟི ཀ་ཏྭཱ ‘‘ག་མྦྷཱི་ར’’ནྟི ཝུ་ཙྩ་ཏི. པུ་བྦཱ་པ་རཾ་པེ་ཏྠ ཀཱ་ས་ཉྩི གཱ་ཐཱ་ནཾ དུ་ཝི་ཉྙེ་ཡྻ་ཏཱ་ཡ དུ་ཀྑོ་གཱ་ཧ་མེ་ཝ, ཏ་སྨཱ པཱ་ལི༹་ཝ་སེ་ན ག་མྦྷཱི་རཾ. ཨ་ཏྠ་ག་མྦྷཱི་རཱཏི ཨ་ཏྠ་ཝ་སེ་ན ག་མྦྷཱི་རཱ མ་ཧཱ་ཝེ་ད་ལླ་སུ་ཏྟ་ས་དི་སཱ, མ་ཧཱ་ཝེ་ད་ལླ་སུ་ཏྟ་སྶ (མ. ནི. ༡.༤༤༩ ཨཱ་ད་ཡོ) ཨ་ཏྠ་ཝ་སེ་ན ག་མྦྷཱི་ར་ཏཱ པཱ་ཀ་ཊཱ་ཡེ་ཝ. ལོ་ཀཾ ཨུ་ཏྟ་ར་ཏཱི་ཏི ལོ་ཀུ་ཏྟ་རོ, སོ ཨ་ཏྠ་བྷཱུ་ཏོ ཨེ་ཏེ་སཾ ཨ་ཏྠཱི་ཏི ལོ་ཀུ་ཏྟ་རཱ. ཏེ་ནཱ་ཧ – ‘‘ལོ་ཀུ་ཏྟ་ར་དྷ་མྨ་དཱི་པ་ཀཱ’’ཏི. སུ་ཉྙ་ཏཱ་པ་ཊི་སཾ་ཡུ་ཏྟཱཏི ས་ཏྟ་སུ་ཉྙ་དྷ་མྨ་པྤ་ཀཱ་ས་ཀཱ. ཏེ་ནཱ་ཧ ‘‘ཁ་ནྡྷ་དྷཱ་ཏུ་ཨཱ་ཡ་ཏ་ན་པ་ཙྩ་ཡཱ་ཀཱ་ར་པྤ་ཊི་སཾ་ཡུ་ཏྟཱ’’ཏི. ཨུ་གྒ་ཧེ་ཏ་བྦཾ པ་རི་ཡཱ་པུ་ཎི་ཏ་བྦནྟི ཙ ལི་ངྒ་ཝ་ཙ་ན་ཝི་པ་ལླཱ་སེ་ན ཝུ་ཏྟ་ནྟི ཨཱ་ཧ ‘‘ཨུ་གྒ་ཧེ་ཏ་བྦེ ཙེ་ཝ ཝ་ལ༹་ཉྫེ་ཏ་བྦེ ཙཱ’’ཏི. ཀ་ཝི་ནོ ཀ་མྨཾ ཀ་ཝི་ཏཱ. ཡ་སྶ པ་ན ཡཾ ཀ་མྨཾ, ཏཾ ཏེ་ན ཀ་ཏ་ནྟི ཝུ་ཙྩ་ཏཱི་ཏི ཨཱ་ཧ ‘‘ཀ་ཝི་ཏཱ་ཏི ཀ་ཝཱི་ཧི ཀ་ཏཱ’’ཏི. ཀཱ་ཝེ་ཡྻནྟི ཀ་བྱཾ, ཀ་བྱནྟི ཙ ཀ་ཝི་ནཱ ཝུ་ཏྟ་ནྟི ཨ་ཏྠོ. ཏེ་ནཱ་ཧ ‘‘ཏ་སྶེ་ཝ ཝེ་ཝ་ཙ་ན’’ནྟི. ཙི་ཏྟ་ཀྑ་རཱཏི ཙི་ཏྲཱ་ཀཱ་ར་ཨ་ཀྑ་རཱ. ཨི་ཏ་རཾ ཏ་སྶེ་ཝ ཝེ་ཝ་ཙ་ནཾ. སཱ་ས་ན་ཏོ བ་ཧི་དྡྷཱ ཋི་ཏཱཏི ན སཱ་ས་ནཱ་ཝ་ཙ་རཱ. བཱ་ཧི་ར་ཀ་སཱ་ཝ་ཀེ་ཧཱིཏི ‘‘བུ་དྡྷཱ’’ཏི ཨ་པྤ་ཉྙཱ་ཏཱ་ནཾ ཡེ་སཾ ཀེ་ས་ཉྩི སཱ་ཝ་ཀེ་ཧི. སུ་སྶཱུ་སི་སྶ་ནྟཱིཏི ཨ་ཀྑ་ར་ཙི་ཏྟ་ཏཱ་ཡ ཙེ་ཝ ས་ར་ས་མྤ་ཏྟི་ཡཱ ཙ ཨ་ཏྟ་མ་ནཱ ཧུ་ཏྭཱ སཱ་མ་ཎེ་ར་ད་ཧ་ར་བྷི་ཀྑུ་མཱ་ཏུ་གཱ་མ་མ་ཧཱ་ག་ཧ་པ་ཏི་ཀཱ་ད་ཡོ ‘‘ཨེ་ས དྷ་མྨ་ཀ་ཐི་ཀོ’’ཏི ས་ནྣི་པ་ཏི་ཏྭཱ སོ་ཏུ་ཀཱ་མཱ བྷ་ཝི་སྶ་ནྟི.
ཏ་ཏི་ཡ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༡༠. ཙ་ཏུ་ཏྠ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ
༨༠. ད་ས་མེ པ་ཉྩ་ཝི་དྷེ་ན སཾ་ས་གྒེ་ནཱཏི ‘‘ས་ཝ་ན་སཾ་ས་གྒོ, ད་སྶ་ན་སཾ་ས་གྒོ, ས་མུ་ལླཱ་པ་སཾ་ས་གྒོ, ས་མྦྷོ་ག་སཾ་ས་གྒོ, ཀཱ་ཡ་སཾ་ས་གྒོ’’ཏི ཨེ་ཝཾ ཝུ་ཏྟེ་ན པ་ཉྩ་ཝི་དྷེ་ན སཾ་ས་གྒེ་ན. སཾ་ས་ཛྫ་ཏི ཨེ་ཏེ་ནཱ་ཏི སཾ་ས་གྒོ, རཱ་གོ. ས་ཝ་ན་ཧེ་ཏུ་ཀོ, ས་ཝ་ན་ཝ་སེ་ན ཝཱ པ་ཝ་ཏྟོ སཾ་ས་གྒོ ས་ཝ་ན་སཾ་ས་གྒོ. ཨེ་ས ན་ཡོ སེ་སེ་སུ་པི. ཀཱ་ཡ་སཾ་ས་གྒོ པ་ན ཀཱ་ཡ་པ་རཱ་མཱ་སོ. ཏེ་སུ པ་རེ་ཧི ཝཱ ཀ་ཐི་ཡ་མཱ་ནཾ རཱུ་པཱ་དི་ས་མྤ་ཏྟིཾ ཨ་ཏྟ་ནཱ ཝཱ སི་ཏ་ལ་པི་ཏ་གཱི་ཏ་ས་དྡཾ སུ་ཎ་ནྟ་སྶ སོ་ཏ་ཝི་ཉྙཱ་ཎ་ཝཱི་ཐི་ཝ་སེ་ན ཨུ་པྤ་ནྣོ རཱ་གོ ས་ཝ་ན་སཾ་ས་གྒོ ནཱ་མ. ཝི་ས་བྷཱ་ག་རཱུ་པཾ ཨོ་ལོ་ཀེ་ནྟ་སྶ པ་ན ཙ་ཀྑུ་ཝི་ཉྙཱ་ཎ་ཝཱི་ཐི་ཝ་སེ་ན ཨུ་པྤ་ནྣོ རཱ་གོ ད་སྶ་ན་སཾ་ས་གྒོ ནཱ་མ. ཨ་ཉྙ་མ་ཉྙ་ཨཱ་ལཱ་པ་ས་ལླཱ་པ་ཝ་སེ་ན ཨུ་པྤ་ནྣ་རཱ་གོ ས་མུ་ལླཱ་པ་སཾ་ས་གྒོ ནཱ་མ. བྷི་ཀྑུ་ནོ བྷི་ཀྑུ་ནི་ཡཱ ས་ནྟ་ཀཾ, བྷི་ཀྑུ་ནི་ཡཱ བྷི་ཀྑུ་སྶ ས་ནྟ་ཀཾ ག་ཧེ་ཏྭཱ པ་རི་བྷོ་ག་ཀ་ར་ཎ་ཝ་སེ་ན ཨུ་པྤ་ནྣ་རཱ་གོ ས་མྦྷོ་ག་སཾ་ས་གྒོ ནཱ་མ. ཧ་ཏྠ་གྒཱ་ཧཱ་དི་ཝ་སེ་ན ཨུ་པྤ་ནྣོ རཱ་གོ ཀཱ་ཡ་སཾ་ས་གྒོ ནཱ་མ.
ཨ་ནེ་ཀ་ཝི་ཧི་ཏནྟི ཨ་ནྣ་ས་ནྣི་དྷི་པཱ་ན་ས་ནྣི་དྷི་ཝ་ཏྠ་ས་ནྣི་དྷི་ཡཱ་ན་ས་ནྣི་དྷི་ས་ཡ་ན་ས་ནྣི་དྷི་ག་ནྡྷ་ས་ནྣི་དྷི- ཨཱ་མི་ས་ས་ནྣི་དྷི་ཝ་སེ་ན ཨ་ནེ་ཀ་པྤ་ཀཱ་རཾ. ས་ནྣི་དྷི་ཀ་ཏ་སྶཱཏི ཨེ་ཏེ་ན ‘‘ས་ནྣི་དྷི་ཀཱ་ར་པ་རི་བྷོ་ག’’ནྟི (དྷ. ས. ཏི་ཀ་མཱ་ཏི་ཀཱ ༡༠) ཨེ་ཏྠ ཀཱ་ར-ས་དྡ་སྶ ཀ་མྨ་ཏྠ་ཏཾ ད་སྶེ་ཏི. ཡ་ཐཱ ཝཱ ‘‘ཨཱ་ཙ་ཡཾ གཱ་མི་ནོ’’ཏི ཝ་ཏྟ་བྦེ ཨ་ནུ་ནཱ་སི་ཀ་ལོ་པེ་ན ‘‘ཨཱ་ཙ་ཡ་གཱ་མི་ནོ’’ཏི ནི་དྡེ་སོ ཀ་ཏོ, ཨེ་ཝཾ ‘‘ས་ནྣི་དྷི་ཀཱ་རཾ པ་རི་བྷོ་ག’’ནྟི ཝ་ཏྟ་བྦེ ཨ་ནུ་ནཱ་སི་ཀ་ལོ་པེ་ན ‘‘ས་ནྣི་དྷི་ཀཱ་ར་པ་རི་བྷོ་ག’’ནྟི ཝུ་ཏྟཾ, ས་ནྣི་དྷིཾ ཀ་ཏྭཱ པ་རི་བྷོ་ག་ནྟི ཨ་ཏྠོ.
‘‘ས་ནྣི་དྷི་ཀ་ཏ་སྶ པ་རི་བྷོ་ག’’ནྟི ཨེ་ཏྠ (དཱི. ནི. ཨ་ཊྛ. ༡.༡༢) པ་ན དུ་ཝི་དྷཱ ཀ་ཐཱ ཝི་ན་ཡ་ཝ་སེ་ན ས་ལླེ་ཁ་ཝ་སེ་ན ཙ. ཝི་ན་ཡ་ཝ་སེ་ན ཏཱ་ཝ ཡཾ ཀི་ཉྩི ཨ་ནྣཾ ཨ་ཛྫ པ་ཊི་གྒ་ཧི་ཏཾ ཨ་པ་ར་ཛྫུ ས་ནྣི་དྷི་ཀཱ་རཾ ཧོ་ཏི, ཏ་སྶ པ་རི་བྷོ་གེ པཱ་ཙི་ཏྟི་ཡཾ. ཨ་ཏྟ་ནཱ ལ་དྡྷཾ པ་ན སཱ་མ་ཎེ་རཱ་ནཾ ད་ཏྭཱ ཏེ་ཧི ལ་དྡྷཾ ཝཱ པཱ་པེ་ཏྭཱ དུ་ཏི་ཡ་དི་ཝ་སེ བྷུ་ཉྫི་ཏུཾ ཝ་ཊྚ་ཏི, ས་ལླེ་ཁོ པ་ན ན ཧོ་ཏི. པཱ་ན་ས་ནྣི་དྷི་མྷི་པི ཨེ་སེ་ཝ ན་ཡོ. ཝ་ཏྠ་ས་ནྣི་དྷི་མྷི ཨ་ན་དྷི་ཊྛི་ཏཱ་ཝི་ཀ་པྤི་ཏཾ ས་ནྣི་དྷི ཙ ཧོ་ཏི, ས་ལླེ་ཁ་ཉྩ ཀོ་པེ་ཏི. ཨ་ཡཾ ནི་པྤ་རི་ཡཱ་ཡ་ཀ་ཐཱ. པ་རི་ཡཱ་ཡ་ཏོ པ་ན ཏི་ཙཱི་ཝ་ར་ས་ནྟུ་ཊྛེ་ན བྷ་ཝི་ཏ་བྦཾ, ཙ་ཏུ་ཏྠཾ ལ་བྷི་ཏྭཱ ཨ་ཉྙ་སྶ དཱ་ཏ་བྦཾ. ས་ཙེ ཡ་སྶ ཀ་སྶ་ཙི དཱ་ཏུཾ ན ས་ཀྐོ་ཏི, ཡ་སྶ པ་ན དཱ་ཏུ་ཀཱ་མོ ཧོ་ཏི, སོ ཨུ་དྡེ་ས་ཏྠཱ་ཡ ཝཱ པ་རི་པུ་ཙྪ་ཏྠཱ་ཡ ཝཱ ག་ཏོ, ཨཱ་ག་ཏ་མ་ཏྟེ དཱ་ཏ་བྦཾ, ཨ་དཱ་ཏུཾ ན ཝ་ཊྚ་ཏི. ཙཱི་ཝ་རེ པ་ན ཨ་པྤ་ཧོ་ནྟེ, ས་ཏི་ཡཱ ཝཱ པ་ཙྩཱ་སཱ་ཡ ཨ་ནུ་ཉྙཱ་ཏ་ཀཱ་ལཾ ཋ་པེ་ཏུཾ ཝ་ཊྚ་ཏི. སཱུ་ཙི་སུ་ཏྟ་ཙཱི་ཝ་ར་ཀཱ་ར་ཀཱ་ནཾ ཨ་ལཱ་བྷེ ཏ་ཏོ་པི ཝི་ན་ཡ་ཀ་མྨཾ ཀ་ཏྭཱ ཋ་པེ་ཏུཾ ཝ་ཊྚ་ཏི ‘‘ཨི་མ་སྨིཾ ཛི་ཎྞེ པུ་ན ཨཱི་དི་སཾ ཀུ་ཏོ ལ་བྷི་སྶཱ་མཱི’’ཏི པ་ན ཋ་པེ་ཏུཾ ན ཝ་ཊྚ་ཏི, ས་ནྣི་དྷི ཙ ཧོ་ཏི, ས་ལླེ་ཁ་ཉྩ ཀོ་པེ་ཏི.
ཡཱ་ན་ས་ནྣི་དྷི་མྷི ཡཱ་ནཾ ནཱ་མ ཝ་ཡ྄ཧཾ ར་ཐོ ས་ཀ་ཊཾ ས་ནྡ་མཱ་ནི་ཀཱ པཱ་ཊ་ངྐཱི་ཏི. ན པ་ནེ་ཏཾ པ་བྦ་ཛི་ཏ་སྶ ཡཱ་ནཾ, ཨུ་པཱ་ཧ་ནཾ པ་ན ཡཱ་ནཾ. ཨེ་ཀ་བྷི་ཀྑུ་སྶ ཧི ཨེ་ཀོ ཨ་ར་ཉྙ་ཝཱ་ས་ཏྠཱ་ཡ, ཨེ་ཀོ དྷོ་ཏ་པཱ་ད་ཀ་ཏྠཱ་ཡཱ་ཏི ཨུ་ཀྐཾ་ས་ཏོ དྭེ ཨུ་པཱ་ཧ་ན་ས་ངྒྷཱ་ཊ་ཀཱ ཝ་ཊྚ་ནྟི, ཏ་ཏི་ཡཾ ལ་བྷི་ཏྭཱ ཨ་ཉྙ་སྶ དཱ་ཏ་བྦོ. ‘‘ཨི་མ་སྨིཾ ཛི་ཎྞེ ཨ་ཉྙཾ ཀུ་ཏོ ལ་བྷི་སྶཱ་མཱི’’ཏི ཋ་པེ་ཏུཾ ན ཝ་ཊྚ་ཏི, ས་ནྣི་དྷི ཙ ཧོ་ཏི, ས་ལླེ་ཁ་ཉྩ ཀོ་པེ་ཏི. ས་ཡ་ན་ས་ནྣི་དྷི་མྷི ས་ཡ་ནནྟི མ་ཉྩོ. ཨེ་ཀ་སྶ བྷི་ཀྑུ་ནོ ཨེ་ཀོ ས་ཡ་ན་ག་བྦྷེ, ཨེ་ཀོ དི་ཝཱ་ཊྛཱ་ནེ་ཏི ཨུ་ཀྐཾ་ས་ཏོ དྭེ མ་ཉྩཱ ཝ་ཊྚ་ནྟི. ཏ་ཏོ ཨུ་ཏྟ་རིཾ ལ་བྷི་ཏྭཱ ཨ་ཉྙ་སྶ བྷི་ཀྑུ་ནོ, ག་ཎ་སྶ ཝཱ དཱ་ཏ་བྦོ, ཨ་དཱ་ཏུཾ ན ཝ་ཊྚ་ཏི, ས་ནྣི་དྷི ཙེ་ཝ ཧོ་ཏི, ས་ལླེ་ཁོ ཙ ཀུ་པྤ་ཏི. ག་ནྡྷ་ས་ནྣི་དྷི་མྷི བྷི་ཀྑུ་ནོ ཀ་ཎྜུ་ཀ་ཙྪུ་ཚ་ཝི་དོ་སཱ་དི་ཨཱ་བཱ་དྷེ ས་ཏི ག་ནྡྷཱ ཝ་ཊྚ་ནྟི. ག་ནྡྷ་ཏྠི་ཀེ་ན ག་ནྡྷ་ཉྩ ཨཱ་ཧ་རཱ་པེ་ཏྭཱ ཏ་སྨིཾ རོ་གེ ཝཱུ་པ་ས་ནྟེ ཨ་ཉྙེ་སཾ ཝཱ ཨཱ་བཱ་དྷི་ཀཱ་ནཾ དཱ་ཏ་བྦཾ, དྭཱ་རེ པ་ཉྩ་ངྒུ་ལི་གྷ་ར་དྷཱུ་པ་ནཱ་དཱི་སུ ཝཱ ཨུ་པ་ནེ་ཏ་བྦཾ. ‘‘པུ་ན རོ་གེ ས་ཏི བྷ་ཝི་སྶ་ཏཱི’’ཏི ཋ་པེ་ཏུཾ ན ཝ་ཊྚ་ཏི, ག་ནྡྷ་ས་ནྣི་དྷི ཙ ཧོ་ཏི, ས་ལླེ་ཁ་ཉྩ ཀོ་པེ་ཏི.
ཨཱ་མི་སནྟི ཝུ་ཏྟཱ་ཝ་སེ་སཾ ད་ཊྛ་བྦཾ. སེ་ཡྻ་ཐི་དཾ – ཨི་དྷེ་ཀ་ཙྩོ བྷི་ཀྑུ ‘‘ཏ་ཐཱ་རཱུ་པེ ཀཱ་ལེ ཨུ་པ་ཀཱ་རཱ་ཡ བྷ་ཝི་སྶ་ནྟཱི’’ཏི ཏི་ལ་ཏ་ཎྜུ་ལ་མུ་གྒ་མཱ་ས་ནཱ་ལི༹་ཀེ་ར་ལོ་ཎ་མ་ཙྪ་ས་པྤི་ཏེ་ལ་ཀུ་ལཱ་ལ་བྷཱ་ཛ་ནཱ་དཱི་ནི ཨཱ་ཧ་རཱ་པེ་ཏྭཱ ཋ་པེ་ཏི. སོ ཝ་སྶ་ཀཱ་ལེ ཀཱ་ལ་སྶེ་ཝ སཱ་མ་ཎེ་རེ་ཧི ཡཱ་གུཾ པ་ཙཱ་པེ་ཏྭཱ པ་རི་བྷུ་ཉྫི་ཏྭཱ ‘‘སཱ་མ་ཎེ་ར ཨུ་ད་ཀ་ཀ་དྡ་མེ དུ་ཀྑཾ གཱ་མཾ པ་ཝི་སི་ཏུཾ, ག་ཙྪ ཨ་སུ་ཀ་ཀུ་ལཾ ག་ནྟྭཱ མ་ཡ྄ཧཾ ཝི་ཧཱ་རེ ནི་སི་ནྣ་བྷཱ་ཝཾ ཨཱ་རོ་ཙེ་ཧི, ཨ་སུ་ཀ་ཀུ་ལ་ཏོ ད་དྷི་ཨཱ་དཱི་ནི ཨཱ་ཧ་རཱ’’ཏི པེ་སེ་ཏི. བྷི་ཀྑཱུ་ཧི ‘‘ཀིཾ, བྷ་ནྟེ, གཱ་མཾ པ་ཝི་སི་སྶཱ་མཱ’’ཏི ཝུ་ཏྟེ་པི ‘‘དུ་པྤ་ཝེ་སོ, ཨཱ་ཝུ་སོ, ཨི་དཱ་ནི གཱ་མོ’’ཏི ཝ་ད་ཏི. ཏེ ‘‘ཧོ་ཏུ, བྷ་ནྟེ, ཨ་ཙྪ་ཐ ཏུ་མྷེ, མ་ཡཾ བྷི་ཀྑཾ པ་རི་ཡེ་སི་ཏྭཱ ཨཱ་ཧ་རི་སྶཱ་མཱ’’ཏི ག་ཙྪ་ནྟི. ཨ་ཐ སཱ་མ་ཎེ་རོ ད་དྷི་ཨཱ་དཱི་ནི ཨཱ་ཧ་རི་ཏྭཱ བྷ་ཏྟ་ཉྩ བྱ་ཉྫ་ན་ཉྩ ས་མྤཱ་དེ་ཏྭཱ ཨུ་པ་ནེ་ཏི, ཏཾ བྷུ་ཉྫ་ནྟ་སྶེ་ཝ ཨུ་པ་ཊྛཱ་ཀཱ བྷ་ཏྟཾ པ་ཧི་ཎ་ནྟི, ཏ་ཏོ་པི མ་ནཱ་པ་མ་ནཱ་པཾ བྷུ་ཉྫ་ཏི. ཨ་ཐ བྷི་ཀྑཱུ པི་ཎྜ་པཱ་ཏཾ ག་ཧེ་ཏྭཱ ཨཱ་ག་ཙྪ་ནྟི, ཏ་ཏོ་པི མ་ནཱ་པ་མ་ནཱ་པཾ བྷུ་ཉྫ་ཏི་ཡེ་ཝ. ཨེ་ཝཾ ཙ་ཏུ་མཱ་ས་མྤི ཝཱི་ཏི་ནཱ་མེ་ཏི. ཨ་ཡཾ ཝུ་ཙྩ་ཏི བྷི་ཀྑུ མུ་ཎྜ་ཀུ་ཊུ་མྦི་ཀ་ཛཱི་ཝི་ཀཾ ཛཱི་ཝ་ཏི, ན ས་མ་ཎ་ཛཱི་ཝི་ཀ་ནྟི. ཨེ་ཝ་རཱུ་པོ ཨཱ་མི་ས་ས་ནྣི་དྷི ནཱ་མ ཧོ་ཏི. བྷི་ཀྑུ་ནོ པ་ན ཝ་ས་ན་ཊྛཱ་ནེ ཨེ་ཀཱ ཏ་ཎྜུ་ལ་ནཱ་ལི༹ ཨེ་ཀོ གུ་ལ༹་པི་ཎྜོ ཀུ་ཌུ་ཝ་མ་ཏྟཾ ས་པྤཱི་ཏི ཨེ་ཏྟ་ཀཾ ནི་དྷེ་ཏུཾ ཝ་ཊྚ་ཏི ཨ་ཀཱ་ལེ ས་མྤ་ཏྟ་ཙོ་རཱ་ནཾ ཨ་ཏྠཱ་ཡ. ཏེ ཧི ཨེ་ཏྟ་ཀཾ ཨཱ་མི་ས་པ་ཊི་ས་ནྠཱ་རཾ ཨ་ལ་བྷ་ནྟཱ ཛཱི་ཝི་ཏཱ ཝོ་རོ་པེ་ཡྻུཾ, ཏ་སྨཱ ས་ཙེ ཧི ཨེ་ཏྟ་ཀཾ ན་ཏྠི, ཨཱ་ཧ་རཱ་པེ་ཏྭཱ་པི ཋ་པེ་ཏུཾ ཝ་ཊྚ་ཏི. ཨ་ཕཱ་སུ་ཀ་ཀཱ་ལེ ཙ ཡ་དེ་ཏྠ ཀ་པྤི་ཡཾ, ཏཾ ཨ་ཏྟ་ནཱ་པི པ་རི་བྷུ་ཉྫི་ཏུཾ ཝ་ཊྚ་ཏི. ཀ་པྤི་ཡ་ཀུ་ཊི་ཡཾ པ་ན བ་ཧུཾ ཋ་པེ་ནྟ་སྶ་པི ས་ནྣི་དྷི ནཱ་མ ན་ཏྠི.
ཙ་ཏུ་ཏྠ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.
ཡོ་དྷཱ་ཛཱི་ཝ་ཝ་གྒ་ཝ་ཎྞ་ནཱ ནི་ཊྛི་ཏཱ.