༩. པ་ཋ་མ་སེ་ཁ་སུ་ཏྟ་ཝ་ཎྞ་ནཱ

༨༩. ན་ཝ་མེ ཨཱ་ར་མི་ཏ་བྦ་ཊྛེ་ན ཀ་མྨཾ ཨཱ་རཱ་མོ ཨེ་ཏ་སྶཱ་ཏི ཀ་མྨཱ་རཱ་མོ, ཏ་སྶ བྷཱ་ཝོ ཀ་མྨཱ་རཱ་མ་ཏཱ. ཏ་ཏྠ ཀ་མྨནྟི ཨི་ཏི་ཀ་ཏྟ་བྦཾ ཀ་མྨཾ ཝུ་ཙྩ་ཏི. སེ་ཡྻ་ཐི་དཾ – ཙཱི་ཝ་ར་ཝི་ཙཱ་ར་ཎཾ ཙཱི་ཝ་ར་ཀ་མྨ་ཀ་ར་ཎཾ ཨུ་པ་ཏྠ་མྦྷ་ནཾ པ་ཏྟ་ཏྠ་ཝི་ཀ་ཨཾ་ས་བ་དྡྷ་ཀ་ཀཱ་ཡ་བ་ནྡྷ་ན་དྷ་མྨ་ཀ་ར་ཎ་ཨཱ་དྷཱ་ར་ཀ་པཱ་ད་ཀ་ཐ་ལི་ཀ་ས་མྨ་ཛྫ་ནི་ཨཱ་དཱི་ནཾ ཀ་ར་ཎ་ནྟི. ཨེ་ཀ་ཙྩོ ཧི ཨེ་ཏཱ་ནི ཀ་རོ་ནྟོ ས་ཀ་ལ་དི་ཝ་སཾ ཨེ་ཏཱ་ནེ་ཝ ཀ་རོ་ཏི, ཏཾ ས་ནྡྷཱ་ཡེ་ས པ་ཊི་ཀྑེ་པོ. ཡོ པ་ན ཨེ་ཏེ་སཾ ཀ་ར་ཎ་ཝེ་ལཱ་ཡ་མེ་ཝ ཏཱ་ནི ཀ་རོ་ཏི, ཨུ་དྡེ་ས་ཝེ་ལཱ་ཡ ཨུ་དྡེ་སཾ ག་ཎྷཱ་ཏི, ས་ཛ྄ཛྷཱ་ཡ་ཝེ་ལཱ་ཡ ས་ཛ྄ཛྷཱ་ཡ་ཏི, ཙེ་ཏི་ཡ་ངྒ་ཎ་ཝ་ཏྟ་ཝེ་ལཱ་ཡ ཙེ་ཏི་ཡ་ངྒ་ཎ་ཝ་ཏྟཾ ཀ་རོ་ཏི, མ་ན་སི་ཀཱ་ར་ཝེ་ལཱ་ཡ མ་ན་སི་ཀཱ་རཾ ཀ་རོ་ཏི, ན སོ ཀ་མྨཱ་རཱ་མོ ནཱ་མ. བྷ་སྶཱ་རཱ་མ་ཏཱཏི ཨེ་ཏྠ ཡོ ཨི་ཏྠི་ཝ་ཎྞ་པུ་རི་ས་ཝ་ཎྞཱ་དི་ཝ་སེ་ན ཨཱ་ལཱ་པ་ས་ལླཱ་པཾ ཀ་རོ་ནྟོ་ཡེ་ཝ དི་ཝ་ས་ཉྩ ར་ཏྟི་ཉྩ ཝཱི་ཏི་ནཱ་མེ་ཏི, ཨེ་ཝ་རཱུ་པོ བྷ་སྶེ པ་རི་ཡ་ནྟ་ཀཱ་རཱི ན ཧོ་ཏི, ཨ་ཡཾ བྷ་སྶཱ་རཱ་མོ ནཱ་མ. ཡོ པ་ན ར་ཏྟི་མྤི དི་ཝ་ས་མྤི དྷ་མྨཾ ཀ་ཐེ་ཏི, པ་ཉྷཾ ཝི་སྶ་ཛྫེ་ཏི, ཨ་ཡཾ ཨ་པྤ་བྷ་སྶོ བྷ་སྶེ པ་རི་ཡ་ནྟ་ཀཱ་རཱི་ཡེ་ཝ. ཀ་སྨཱ? ‘‘ས་ནྣི་པ་ཏི་ཏཱ་ནཾ ཝོ, བྷི་ཀྑ་ཝེ, དྭ་ཡཾ ཀ་ར་ཎཱི་ཡཾ དྷ་མྨཱི ཝཱ ཀ་ཐཱ, ཨ་རི་ཡོ ཝཱ ཏུ་ཎྷཱི་བྷཱ་ཝོ’’ཏི (མ. ནི. ༡.༢༧༣; ཨུ་དཱ. ༡༢, ༢༨, ༢༩) ཝུ་ཏྟ་ཏྟཱ.

ནི་དྡཱ་རཱ་མ་ཏཱཏི ཨེ་ཏྠ ཡོ ག་ཙྪ་ནྟོ་པི ནི་སི་ནྣོ་པི ནི་པ་ནྣོ་པི ཐི་ན་མི་དྡྷཱ་བྷི་བྷཱུ་ཏོ ནི་དྡཱ་ཡ་ཏི་ཡེ་ཝ, ཨ་ཡཾ ནི་དྡཱ་རཱ་མོ ནཱ་མ. ཡ་སྶ པ་ན ཀ་ར་ཛ་ཀཱ་ཡེ གེ་ལ་ཉྙེ་ན ཙི་ཏྟཾ བྷ་ཝ་ངྒེ ཨོ་ཏ་ར་ཏི, ནཱ་ཡཾ ནི་དྡཱ་རཱ་མོ. ཏེ་ནེ་ཝཱ་ཧ – ‘‘ཨ་བྷི་ཛཱ་ནཱ་མི ཁོ པ་ནཱ་ཧཾ, ཨ་གྒི་ཝེ་སྶ་ན, གི་མྷཱ་ནཾ པ་ཙྪི་མེ མཱ་སེ པ་ཙྪཱ་བྷ་ཏྟཾ པི་ཎྜ་པཱ་ཏ་པྤ་ཊི་ཀྐ་ནྟོ ཙ་ཏུ་གྒུ་ཎཾ ས་ངྒྷཱ་ཊིཾ པ་ཉྙཱ་པེ་ཏྭཱ ད་ཀྑི་ཎེ་ན པ་སྶེ་ན ས་ཏོ ས་མྤ་ཛཱ་ནོ ནི་དྡཾ ཨོ་ཀྐ་མི་ཏཱ’’ཏི (མ. ནི. ༡.༣༨༧). ས་ངྒ་ཎི་ཀཱ་རཱ་མ་ཏཱཏི ཨེ་ཏྠ ཡོ ཨེ་ཀ་སྶ དུ་ཏི་ཡོ, དྭི་ནྣཾ ཏ་ཏི་ཡོ, ཏི་ཎྞཾ ཙ་ཏུ་ཏྠོ་ཏི ཨེ་ཝཾ སཾ་ས་ཊྛོ་ཝ ཝི་ཧ་ར་ཏི, ཨེ་ཀ་ཀོ ཨ་སྶཱ་དཾ ན ལ་བྷ་ཏི, ཨ་ཡཾ ས་ངྒ་ཎི་ཀཱ་རཱ་མོ. ཡོ པ་ན ཙ་ཏཱུ་སུ ཨི་རི་ཡཱ་པ་ཐེ་སུ ཨེ་ཀ་ཀོ་ཝ ཨ་སྶཱ་དཾ ལ་བྷ་ཏི, ནཱ་ཡཾ ས་ངྒ་ཎི་ཀཱ་རཱ་མོ ཝེ་དི་ཏ་བྦོ. སེ་ཁཱ་ནཾ པ་ཊི་ལ་དྡྷ་གུ་ཎ་སྶ པ་རི་ཧཱ་ནཱ་ས་མྦྷ་ཝ་ཏོ ‘‘ཨུ་པ་རི་གུ་ཎེ་ཧཱི’’ཏི་ཨཱ་དི ཝུ་ཏྟཾ.

པ་ཋ་མ་སེ་ཁ་སུ་ཏྟ་ཝ་ཎྞ་ནཱ ནི་ཊྛི་ཏཱ.