(༦) ༡. པུ་ཉྙཱ་བྷི་ས་ནྡ་ཝ་གྒོ
༡. པ་ཋ་མ་པུ་ཉྙཱ་བྷི་ས་ནྡ་སུ་ཏྟ་ཝ་ཎྞ་ནཱ
༥༡. དུ་ཏི་ཡ་སྶ པ་ཋ་མེ པུ་ཉྙཱ་བྷི་ས་ནྡཱཏི ཝཱ པུ་ཉྙ་ན་དི་ཡོ. ཨ་ཝི་ཙྪེ་དེ་ན ནི་ཙྩཾ པ་ཝ་ཏྟི་ཡ་མཱ་ནཱ་ནི ཧི པུ་ཉྙཱ་ནི ཨ་བྷི་ས་ནྡ་ན་ཊྛེ་ན ‘‘པུ་ཉྙཱ་བྷི་ས་ནྡཱ’’ཏི ཝུ་ཏྟཱ. ཨ་པ་རི་མི་ཏནྟི ཨཱ་ལ༹ྷ་ཀ་ག་ཎ་ནཱ་ཡ ཨ་པ་རི་མི་ཏཾ, ཡོ་ཛ་ན་ཝ་སེ་ན པ་ན་སྶ པ་རི་མཱ་ཎཾ ཨ་ཏྠི. ཏ་ཐཱ ཧི ཧེ་ཊྛཱ མ་ཧཱ་པ་ཐ་ཝི་ཡཱ ཨུ་པ་རི ཨཱ་ཀཱ་སེ་ན པ་ར་ཏོ ཙ་ཀྐ་ཝཱ་ལ༹་པ་བྦ་ཏེ་ན མ་ཛ྄ཛྷེ ཏ་ཏྠ ཏ་ཏྠ ཋི་ཏེ་ཧི དཱི་པ་པ་བྦ་ཏ་པ་རི་ཡ་ནྟེ་ཧི པ་རི་ཙྪི་ནྣ་ཏྟཱ ཡོ་ཛ་ན་ཏོ ས་ཀྐཱ པ་མཱ་ཎཾ ཀཱ་ཏུཾ. བྷེ་ར་ཝཱ་ར་མྨ་ཎེ་ཧཱིཏི ས་ཝི་ཉྙཱ་ཎ་ཀཱ་ཝི་ཉྙཱ་ཎ་ཀེ་ཧི བྷེ་ར་ཝཱ་ར་མྨ་ཎེ་ཧི. ཏ་ཐཱ ཧི ཏཾ མ་ཧཱ་ས་རཱི་ར་མ་ཙྪ་ཀུ་མྦྷཱི་ལ་ཡ་ཀྑ་ར་ཀྑ་ས་མ་ཧཱ་ནཱ་ག་དཱ་ན་ཝཱ་དཱི་ནཾ ས་ཝི་ཉྙཱ་ཎ་ཀཱ་ནཾ ཝ་ལ༹་ཝཱ་མུ་ཁ་པཱ་ཏཱ་ལཱ་དཱི་ནཾ ཨ་ཝི་ཉྙཱ་ཎ་ཀཱ་ན་ཉྩ བྷེ་ར་ཝཱ་ར་མྨ་ཎཱ་ནཾ ཝ་སེ་ན ‘‘བ་ཧུ་བྷེ་ར་ཝ’’ནྟི ཝུ་ཙྩ་ཏི. སེ་ས་མེ་ཏྠ ཨུ་ཏྟཱ་ན་མེ་ཝ.
པ་ཋ་མ་པུ་ཉྙཱ་བྷི་ས་ནྡ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༢. དུ་ཏི་ཡ་པུ་ཉྙཱ་བྷི་ས་ནྡ་སུ་ཏྟ་ཝ་ཎྞ་ནཱ
༥༢. དུ་ཏི་ཡེ སོ་ཏཱ་པ་ནྣ་སྶ ས་དྡྷཱ ཨ་དྷི་པྤེ་ཏཱཏི སོ་ཏཱ་པ་ནྣ་སྶ མ་གྒེ་ནཱ་ག་ཏཱ ས་དྡྷཱ ཨ་དྷི་པྤེ་ཏཱ.
དུ་ཏི་ཡ་པུ་ཉྙཱ་བྷི་ས་ནྡ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༣-༤. པ་ཋ་མ་སཾ་ཝཱ་ས་སུ་ཏྟཱ་དི་ཝ་ཎྞ་ནཱ
༥༣-༥༤. ཏ་ཏི་ཡེ ཡ་ཐཱ་ཀ་མྨཾ ཏཱ ཏཱ ག་ཏི་ཡོ ཨ་རནྟི ཨུ་པ་ག་ཙྪ་ནྟཱི་ཏི ཨ་རི་ཡཱ, ས་ཏྟཱ. ཨི་མེ པ་ན ཀུ་ཙྪི་ཏཱ ཨ་རི་ཡཱ་ཏི ཀ་ད་རི་ཡཱ. ཐ་དྡྷ་མ་ཙྪ་རི་ནོ, ཐ་དྡྷེ་ན མ་ཙྪ་རེ་ན ས་མ་ནྣཱ་ག་ཏཱ་ཏི ཨ་ཏྠོ. ཐ་དྡྷ་མ་ཙྪ་རི་ཡ་ས་དི་ས་ཉྷི ཀུ་ཙྪི་ཏཾ ས་བྦ་དཱ ནི་ཧཱི་ནཾ ན་ཏྠི ས་བྦ་གུ་ཎཱ་ནཾ ཨཱ་དི་བྷཱུ་ཏ་སྶ བྷོ་ག་ས་མྤ་ཏྟི་ཨཱ་དི་ས་བྦ་ས་མྤ་ཏྟཱི་ནཾ མཱུ་ལ་བྷཱུ་ཏ་སྶ དཱ་ན་སྶ ནི་སེ་དྷ་ན་ཏོ. ཏེ་ནཱ་ཧ ‘‘ཀ་ད་རི་ཡཱ་ཏི ཐ་དྡྷ་མ་ཙྪ་རི་ནོ’’ཏི. ཨེ་ཀ་ཙྩོ ཧི ཨ་ཏྟ་ནོ ཝ་ས་ན་ཊྛཱ་ནེ བྷི་ཀྑཱུ ཧ་ཏྠཾ པ་སཱ་རེ་ཏྭཱ་པི ན ཝ་ནྡ་ཏི. ཨ་ཉྙ་ཏྠ ག་ཏོ ཝི་ཧཱ་རཾ པ་ཝི་སི་ཏྭཱ ས་ཀྐ་ཙྩཾ ཝ་ནྡི་ཏྭཱ མ་དྷུ་ར་པྤ་ཊི་ས་ནྠཱ་རཾ ཀ་རོ་ཏི ‘‘ཀིཾ, བྷ་ནྟེ, ཨ་མྷཱ་ཀཾ ཝ་ས་ན་ཊྛཱ་ནཾ ནཱ་ག་ཙྪ་ཐ, ས་མྤ་ནྣོ པ་དེ་སོ, པ་ཊི་བ་ལཱ་ཧཾ ཨ་ཡྻཱ་ནཾ ཡཱ་གུ་བྷ་ཏྟཱ་དཱི་ཧི ཨུ་པ་ཊྛཱ་ནཾ ཀཱ་ཏུ’’ནྟི. བྷི་ཀྑུ ‘‘ས་དྡྷོ ཨ་ཡཾ ཨུ་པཱ་ས་ཀོ’’ཏི ཡཱ་གུ་བྷ་ཏྟཱ་དཱི་ཧི ས་ངྒ་ཎྷཱ་ཏི.
ཨ་ཐེ་ཀོ ཐེ་རོ ཏ་སྶ གཱ་མཾ ག་ནྟྭཱ པི་ཎྜཱ་ཡ ཙ་ར་ཏི. སོ ཏཾ དི་སྭཱ ཨ་ཉྙེ་ན ཝཱ ག་ཙྪ་ཏི, གྷ་རཾ ཝཱ པ་ཝི་ས་ཏི. ས་ཙེ་པི ས་མྨུ་ཁཱི་བྷཱ་ཝཾ ཨཱ་ག་ཙྪ་ཏི, ཧ་ཏྠེ་ན ཝ་ནྡི་ཏྭཱ ‘‘ཨ་ཡྻ་སྶ བྷི་ཀྑཾ དེ་ཐ, ཨ་ཧཾ ཨེ་ཀེ་ན ཀ་མྨེ་ན ག་ཙྪཱ་མཱི’’ཏི པ་ཀྐ་མ་ཏི. ཐེ་རོ ས་ཀ་ལ་གཱ་མཾ ཙ་རི་ཏྭཱ ཏུ་ཙྪ་པ་ཏྟོ་ཝ ནི་ཀྑ་མ་ཏི. ཨི་དཾ ཏཱ་ཝ མུ་དུ་མ་ཙྪ་རི་ཡཾ ནཱ་མ. ཡེ་ན ཨ་དཱ་ཡ་ཀོ་པི དཱ་ཡ་ཀོ ཝི་ཡ པ་ཉྙཱ་ཡ་ཏི. ཨི་དྷ པ་ན ཐ་དྡྷ་མ་ཙྪ་རི་ཡཾ ཨ་དྷི་པྤེ་ཏཾ. ཡེ་ན ས་མ་ནྣཱ་ག་ཏོ བྷི་ཀྑཱུ་སུ པི་ཎྜཱ་ཡ པ་ཝི་ཊྛེ་སུ ‘‘ཐེ་རཱ ཋི་ཏཱ’’ཏི ཝུ་ཏྟེ ‘‘ཀིཾ མ་ཡ྄ཧཾ པཱ་དཱ རུ་ཛྫ་ནྟཱི’’ཏི་ཨཱ་དཱི་ནི ཝ་ཏྭཱ སི་ལཱ་ཐ་མྦྷོ ཝི་ཡ ཁཱ་ཎུ་ཀོ ཝི་ཡ ཙ ཐ་དྡྷོ ཧུ་ཏྭཱ ཏི་ཊྛ་ཏི, སཱ་མཱི་ཙི་མྤི ན ཀ་རོ་ཏི, ཀུ་ཏོ དཱ་ནཾ. ཨ་ཡ་མི་དྷ ཨ་དྷི་པྤེ་ཏོ. ཏེ་ན ཝུ་ཏྟཾ ‘‘ཐ་དྡྷ་མ་ཙྪ་རི་ནོ་ཏི ཐ་དྡྷེ་ན མ་ཙྪ་རེ་ན ས་མ་ནྣཱ་ག་ཏཱ་ཏི ཨ་ཏྠོ’’ཏི. མ་ཙྪ་རཾ མ་ཙྪེ་རཾ མ་ཙྪ་རི་ཡ་ནྟི ཨ་ཏྠ་ཏོ ཨེ་ཀཾ.
པ་རི་བྷཱ་ས་ཀཱཏི བྷི་ཀྑཱུ གྷ་ར་དྭཱ་རེ ཋི་ཏེ དི་སྭཱ ‘‘ཀིཾ ཏུ་མྷེ ཀ་སི་ཏྭཱ ཨཱ་ག་ཏཱ ཝ་པི་ཏྭཱ ལཱ་ཡི་ཏྭཱ, མ་ཡཾ ཨ་ཏྟ་ནོ་པི ན ལ་བྷཱ་མ, ཀུ་ཏོ ཏུ་མྷཱ་ཀཾ, སཱི་གྷཾ ནི་ཀྑ་མ་ཐཱ’’ཏི་ཨཱ་དཱི་ཧི ས་ནྟ་ཛྫ་ཀཱ. ཡཱ་ཙ་ཀཱ་ནཾ ཝ་ཙ་ན་སྶ ཨ་ཏྠཾ ཛཱ་ན་ནྟཱིཏི ཨེ་ཏྠ ཀི་ཉྩཱ་པི བྷི་ཀྑཱུ གྷ་ར་དྭཱ་རེ ཋི་ཏཱ ཏུ་ཎྷཱི ཧོ་ནྟི, ཨ་ཏྠ་ཏོ པ་ན ‘‘བྷི་ཀྑཾ དེ་ཐཱ’’ཏི ཝ་ད་ནྟི ནཱ་མ ཨ་རི་ཡཱ་ཡ ཡཱ་ཙ་ནཱ་ཡ. ཝུ་ཏྟ་ཉྷེ་ཏཾ ‘‘ཨུ་དྡི་སྶ ཨ་རི་ཡཱ ཏི་ཊྛ་ནྟི, ཨེ་སཱ ཨ་རི་ཡཱ་ན ཡཱ་ཙ་ནཱ’’ཏི (མི. པ. ༤.༥.༩). ཏ་ཏྲ ཡེ ‘‘མ་ཡཾ པ་ཙཱ་མ, ཨི་མེ ན པ་ཙ་ནྟི, པ་ཙ་མཱ་ནེ པ་ཏྭཱ ཨ་ལ་བྷ་ནྟཱ ཀུ་ཧིཾ ལ་བྷི་སྶ་ཏཱི’’ཏི དེ་ཡྻ་དྷ་མྨཾ སཾ་ཝི་བྷ་ཛ་ནྟི, ཏེ ཝ་ད་ཉྙཱུ ཡཱ་ཙ་ཀཱ་ནཾ ཝ་ཙ་ན་སྶ ཨ་ཏྠཾ ཛཱ་ན་ནྟི ནཱ་མ ཉ་ཏྭཱ ཀ་ཏྟ་བྦ་ཀ་ར་ཎ་ཏོ. ཙ་ཏུ་ཏྠཾ ཨུ་ཏྟཱ་ན་མེ་ཝ.
པ་ཋ་མ་སཾ་ཝཱ་ས་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
༥-༦. ས་མ་ཛཱི་ཝཱི་སུ་ཏྟཱ་དི་ཝ་ཎྞ་ནཱ
༥༥-༥༦. པ་ཉྩ་མེ ཨ་ནུ་གྒ་ཎྷ་ན་ཏྠནྟི ན་ཀུ་ལ་མཱ་ཏཱ ན་ཀུ་ལ་པི་ཏཱ་ཏི ཨི་མེ་སཾ དྭི་ནྣཾ ས་ངྒ་ཧ་ཏྠཱ་ཡ. ན་ཀུ་ལ་སྶ དཱ་ར་ཀ་སྶ པི་ཏཱ ན་ཀུ་ལ་པི་ཏཱ. ན་ཀུ་ལ་མཱ་ཏཱཏི ཨེ་ཏྠཱ་པི ཨེ་སེ་ཝ ན་ཡོ. སེ་ས་མེ་ཏྠ ཨུ་ཏྟཱ་ན་མེ་ཝ. ཚ་ཊྛེ ན་ཏྠི ཝ་ཏྟ་བྦཾ.
ས་མ་ཛཱི་ཝཱི་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
༧-༡༠. སུ་པྤ་ཝཱ་སཱ་སུ་ཏྟཱ་དི་ཝ་ཎྞ་ནཱ
༥༧-༦༠. ས་ཏྟ་མེ ཨཱ་ཡུ་བྷཱ་ག་པ་ཊི་ལཱ་བྷི་ནཱི ཧོ་ཏཱིཏི ཨཱ་ཡུ་ཀོ་ཊྛཱ་ས་སྶ པ་ཊི་ལཱ་བྷི་ནཱི ཧོ་ཏི. ཏི་ཝི་དྷ་ལོ་ཀནྟི ས་ཏྟ་ས་ངྑཱ་ར་བྷཱ་ཛ་ན་ས་ངྑཱ་ཏཾ ཏི་ཝི་དྷཾ ལོ་ཀཾ. ཝི་དི་ཏཾ ཀ་ཏྭཱཏི ཝི་བྷཱུ་ཏཾ ཀ་ཏྭཱ. ལོ་ཀ་ཝི་དཱུ་ནནྟི ཀ་ར་ཎ་ཏྠེ སཱ་མི་ཝ་ཙ་ན་ནྟི ཨཱ་ཧ ‘‘བུ་དྡྷེ་ཧི པ་ས་ཏྠཱ’’ཏི. ཨ་ཊྛ་མ་ན་ཝ་མ་ད་ས་མཱ་ནི ཨུ་ཏྟཱ་ན་ཏྠཱ་ནེ་ཝ.
སུ་པྤ་ཝཱ་སཱ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
པུ་ཉྙཱ་བྷི་ས་ནྡ་ཝ་གྒ་ཝ་ཎྞ་ནཱ ནི་ཊྛི་ཏཱ.