༥-༦. རོ་ཧི་ཏ་སྶ་སུ་ཏྟཱ་དི་ཝ་ཎྞ་ནཱ
༤༥-༤༦. པ་ཉྩ་མེ (སཾ. ནི. ཊཱི. ༡.༡.༡༠༧) ཨེ་ཀོ་ཀཱ་སེཏི ཙ་ཀྐ་ཝཱ་ལ༹་སྶ པ་རི་ཡ་ནྟ་ས་ཉྙི་ཏེ ཨེ་ཀ་སྨིཾ ཨོ་ཀཱ་སེ. བྷུ་མྨནྟི ‘‘ཡ་ཏྠཱ’’ཏི ཨི་དཾ བྷུ་མྨ་ཝ་ཙ་ནཾ. སཱ་མ་ཉྙ་ཏོ ཝུ་ཏྟ་མྤི ‘‘སོ ལོ་ཀ་སྶ ཨ་ནྟོ’’ཏི ཝ་ཙ་ན་ཏོ ཝི་སི་ཊྛ་ཝི་ས་ཡ་མེ་ཝ ཧོ་ཏི. ‘‘ན ཛཱ་ཡ་ཏི, ན མཱི་ཡ་ཏཱི’’ཏི ཝ་ཏྭཱ པུ་ན ‘‘ན ཙ་ཝ་ཏི, ན ཨུ་པ་པ་ཛྫ་ཏཱི’’ཏི ཀ་སྨཱ ཝུ་ཏྟ་ནྟི ཨཱ་ཧ ‘‘ཨི་དཾ ཨ་པ་རཱ་པ་རཾ…པེ… ག་ཧི་ཏ’’ནྟི. པ་ད་ག་མ་ནེ་ནཱཏི པ་ད་སཱ ག་མ་ནེ་ན. ས་ཏྠཱ ས་ངྑཱ་ར་ལོ་ཀ་སྶ ཨ་ནྟཾ ས་ནྡྷཱ་ཡ ཝ་ད་ཏི ཨུ་པ་རི ས་བྦཱ་ནི པ་ཀཱ་སེ་ཏུ་ཀཱ་མོ. ས་ངྑཱ་ར་ལོ་ཀ་སྶ ཧི ཨ་ནྟོ ནི་བྦཱ་ནཾ.
ད་ལ༹ྷཾ ཐི་རཾ དྷ་ནུ ཨེ་ཏ་སྶཱ་ཏི ད་ལ༹ྷ་དྷ་ནྭཱ, སོ ཨེ་ཝ ‘‘ད་ལ༹ྷ་དྷ་མྨཱ’’ཏི ཝུ་ཏྟོ. ཏེ་ནཱ་ཧ ‘‘ད་ལ༹ྷ་དྷ་ནཱུ’’ཏི. ཨུ་ཏྟ་མ་པྤ་མཱ་ཎཾ ནཱ་མ ས་ཧ་སྶ་ཐཱ་མ་དྷ་ནུ. དྷ་ནུ་གྒ་ཎྷ་ན་སི་པྤ་ཙི་ཏྟ་ཀ་ཏཱ་ཡ དྷ་ནུ་གྒ་ཧོ, ན དྷ་ནུ་གྒ་ཧ་ཎ་མ་ཏྟེ་ནཱ་ཏི ཨཱ་ཧ ‘‘དྷ་ནུ་གྒ་ཧོ་ཏི དྷ་ནུ་ཨཱ་ཙ་རི་ཡོ’’ཏི. ‘‘དྷ་ནུ་གྒ་ཧོ’’ཏི ཝ་ཏྭཱ ‘‘སི་ཀྑི་ཏོ’’ཏི ཝུ་ཏྟེ དྷ་ནུ་སི་ཀྑཱ་ཡ སི་ཀྑི་ཏོ་ཏི ཝི་ཉྙཱ་ཡ་ཏི. སི་ཀྑཱ ཙ ཨེ་ཏྟ་ཀེ་ན ཀཱ་ལེ་ན སི་ཀྑ་ནྟ་སྶ ཨུ་ཀྐཾ་ས་ག་ཏཱ ཧོ་ཏཱི་ཏི ཨཱ་ཧ ‘‘དྭཱ་ད་ས ཝ་སྶཱ་ནི དྷ་ནུ་སི་པྤཾ སི་ཀྑི་ཏོ’’ཏི. ཨུ་ས་བྷ་པྤ་མཱ་ཎེཏི ཝཱི་ས་ཏི ཡ་ཊྛི་ཡོ ཨུ་ས་བྷཾ, ཏ་སྨིཾ ཨུ་ས་བྷ་པྤ་མཱ་ཎེ པ་དེ་སེ. ཝཱ་ལ་གྒནྟི ཝཱ་ལ་ཀོ་ཊིཾ. ཀ་ཏ་ཧ་ཏྠོཏི པ་རི་ཙི་ཏ་ཧ་ཏྠོ. ཀ་ཏ་ས་ར་ཀྑེ་པོཏི ཐི་ར་ལ་ཀྑེ ཙ ཙ་ལ་ལ་ཀྑེ ཙ པ་རེ་སཾ ད་སྶ་ན་ཝ་སེ་ན ས་ར་ཀྑེ་པ་སྶ ཀ་ཏཱ་པཱི. ཏེ་ནཱ་ཧ ‘‘ད་སྶི་ཏ་སི་པྤོ’’ཏི, ‘‘ཀ་ཏ་ཡོ་གྒོ’’ཏི ཀེ་ཙི. ཨ་ས་ནྟི ཨེ་ཏེ་ནཱ་ཏི ཨ་ས་ནཾ, ཀ་ཎྜོ. ཏཱ་ལ་ཙྪཱ་དིནྟི ཏཱ་ལ་ཙྪཱ་ཡཾ. སཱ པ་ན ར་ཏ་ན་མ་ཏྟཱ ཝི་ད་ཏྠི་ཙ་ཏུ་ར་ངྒུ་ལཱ.
པུ་ར་ཏྠི་མཱ ས་མུ་དྡཱཏི ཨེ་ཀ་སྨིཾ ཙ་ཀྐ་ཝཱ་ལེ༹ པུ་ར་ཏྠི་མཱ ས་མུ་དྡཱ. ས་མུ་དྡ་སཱི་སེ་ན པུ་ར་ཏྠི་མ་ཙ་ཀྐ་ཝཱ་ལ༹་མུ་ཁ་ཝ་ཊྚིཾ ཝ་ད་ཏི. པ་ཙྪི་མ་ས་མུ་དྡོཏི ཨེ་ཏྠཱ་པི ཨེ་སེ་ཝ ན་ཡོ. ནི་པྤ་པ་ཉྩ་ཏནྟི ཨ་ད་ནྟ་ཀཱ་རི་ཏཾ. ས་མྤ་ཏྟེཏི ཏཱ་དི་སེ་ན ཛ་ཝེ་ན ག་ཙྪ་ནྟེ་ན ས་མྤ་ཏྟེ. ཨ་ནོ་ཏ་ཏྟེཏི ཨེ་ཏྠཱ་པི ‘‘ས་མྤ་ཏྟེ’’ཏི པ་དཾ ཨཱ་ནེ་ཏྭཱ ས་མྦ་ནྡྷོ, ཏ་ཐཱ ‘‘ནཱ་ག་ལ་ཏཱ་ད་ནྟ་ཀ་ཊྛ’’ནྟི ཨེ་ཏྠཱ་པི. ཏ་དཱཏི ཡ་དཱ སོ ལོ་ཀ་ནྟ་ག་ཝེ་ས་ཀོ ཨ་ཧོ་སི, ཏ་དཱ. དཱི་གྷཱ་ཡུ་ཀ་ཀཱ་ལོཏི ཨ་ནེ་ཀ་ཝ་སྶ་ས་ཧ་སྶཱ་ཡུ་ཀ་ཀཱ་ལོ. ཙ་ཀྐ་ཝཱ་ལ༹་ལོ་ཀ་སྶཱཏི སཱ་མ་ཉྙ་ཝ་སེ་ན ཨེ་ཀ་ཝ་ཙ་ནཾ, ཙ་ཀྐ་ཝཱ་ལ༹་ལོ་ཀཱ་ན་ནྟི ཨ་ཏྠོ. ཨི་མ་སྨིཾ་ཡེ་ཝ ཙ་ཀྐ་ཝཱ་ལེ༹ ནི་བྦ་ཏྟི་པུ་བྦ་པ་རི་ཙ་ཡ་སི་དྡྷཱ་ཡ ནི་ཀ་ནྟི་ཡཱ.
ས་ས་ཉྙི་མྷི ས་མ་ན་ཀེཏི ན རཱུ་པ་དྷ་མྨ་མ་ཏྟ་ཀེ, ཨ་ཐ ཁོ པ་ཉྩ་ཀྑ་ནྡྷ་ས་མུ་དཱ་ཡེ་ཏི ད་སྶེ་ཏི. ས་མི་ཏ་པཱ་པོཏི ས་མུ་ཙྪི་ནྣ་སཾ་ཀི་ལེ་ས་དྷ་མྨོ. ཚ་ཊྛཾ ཨུ་ཏྟཱ་ན་མེ་ཝ.
རོ་ཧི་ཏ་སྶ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.