༥. པ་ཉྙ་ཏྟི་སུ་ཏྟ་ཝ་ཎྞ་ནཱ
༡༥. པ་ཉྩ་མེ ཨ་ཏྟ་བྷཱ་ཝོ ཨེ་ཏེ་སཾ ཨ་ཏྠཱི་ཏི ཨ་ཏྟ་བྷཱ་ཝི་ནོ, ཏེ་སཾ ཨ་ཏྟ་བྷཱ་ཝཱི་ནཾ. ཏེ་ནཱ་ཧ ‘‘ཨ་ཏྟ་བྷཱ་ཝ་ཝ་ནྟཱ་ན’’ནྟི. ཡཱ་ཝ ཚ་ཏྟིཾ་སཱ་ཡ ཨི་ནྡཱ་ནཾ ཨཱ་ཡུ་པྤ་མཱ་ཎཾ, ཏཱ་ཝ པ་ཎཱི་ཏེ ཀཱ་མེ པ་རི་བྷུ་ཉྫཱིཏི མ་ནྡྷཱ་ཏུ་རཱ་ཛཱ ཀི་ར ཨེ་ཀ་དི་ཝ་སཾ ཨ་ཏྟ་ནོ པ་རི་ཎཱ་ཡ་ཀ་ར་ཏ་ནཾ པུ་ཙྪི – ‘‘ཨ་ཏྠི ནུ ཁོ མ་ནུ་སྶ་ལོ་ཀ་ཏོ ར་མ་ཎཱི་ཡ་ཏ་རཾ ཋཱ་ན’’ནྟི. ཀ་སྨཱ དེ་ཝ ཨེ་ཝཾ བྷ་ཎ་སི, ཀིཾ ན པ་སྶ་སི ཙ་ནྡི་མ་སཱུ་རི་ཡཱ་ནཾ ཨཱ་ནུ་བྷཱ་ཝཾ, ན་ནུ ཨེ་ཏེ་སཾ ཋཱ་ནཾ ཨི་ཏོ ར་མ་ཎཱི་ཡ་ཏ་ར་ནྟི? རཱ་ཛཱ ཙ་ཀྐ་ར་ཏ་ནཾ པུ་ར་ཀྑ་ཏྭཱ ཏ་ཏྠ ཨ་ག་མཱ་སི.
ཙ་ཏྟཱ་རོ མ་ཧཱ་རཱ་ཛཱ་ནོ ‘‘མ་ནྡྷཱ་ཏུ་མ་ཧཱ་རཱ་ཛཱ ཨཱ་ག་ཏོ’’ཏི སུ་ཏྭཱ ‘‘ཏཱ་ཝ་མ་ཧི་དྡྷི་ཀོ མ་ཧཱ་རཱ་ཛཱ ན ས་ཀྐཱ ཡུ་དྡྷེ་ན པ་ཊི་བཱ་ཧི་ཏུ’’ནྟི ས་ཀ་ར་ཛྫཾ ནི་ཡྻཱ་ཏེ་སུཾ. སོ ཏཾ ག་ཧེ་ཏྭཱ པུ་ན པུ་ཙྪི – ‘‘ཨ་ཏྠི ནུ ཁོ ཨི་ཏོ ར་མ་ཎཱི་ཡ་ཏ་རཾ ཋཱ་ན’’ནྟི. ཨ་ཐ་སྶ ཏཱ་ཝ་ཏིཾ་ས་བྷ་ཝ་ནཾ ཀ་ཐ་ཡིཾ་སུ. ‘‘ཏཱ་ཝ་ཏིཾ་ས་བྷ་ཝ་ནཾ, དེ་ཝ, ར་མ་ཎཱི་ཡཾ, ཏ་ཏྠ ས་ཀྐ་སྶ དེ་ཝ་ར་ཉྙོ ཨི་མེ ཙ་ཏྟཱ་རོ མ་ཧཱ་རཱ་ཛཱ་ནོ པཱ་རི་ཙཱ་རི་ཀཱ དོ་ཝཱ་རི་ཀ་བྷཱུ་མི་ཡཾ ཏི་ཊྛ་ནྟི. ས་ཀྐོ དེ་ཝ་རཱ་ཛཱ མ་ཧི་དྡྷི་ཀོ མ་ཧཱ་ནུ་བྷཱ་ཝོ. ཏ་སྶི་མཱ་ནི ཨུ་པ་བྷོ་ག་ཊྛཱ་ནཱ་ནི – ཡོ་ཛ་ན་ས་ཧ་སྶུ་བྦེ་དྷོ ཝེ་ཛ་ཡ་ནྟ་པཱ་སཱ་དོ, པ་ཉྩ་ཡོ་ཛ་ན་ས་ཏུ་བྦེ་དྷཱ སུ་དྷ་མྨ་དེ་ཝ་ས་བྷཱ, དི་ཡ་ཌྜྷ་ཡོ་ཛ་ན་ས་ཏི་ཀོ ཝེ་ཛ་ཡ་ནྟ་ར་ཐོ, ཏ་ཐཱ ཨེ་རཱ་ཝ་ཎོ ཧ་ཏྠཱི, དི་བྦ་རུ་ཀྑ་ས་ཧ་སྶ་པྤ་ཊི་མ་ཎྜི་ཏཾ ན་ནྡ་ན་ཝ་ནཾ, ཙི་ཏྟ་ལ་ཏཱ་ཝ་ནཾ, ཕཱ་རུ་ས་ཀ་ཝ་ནཾ, ཡོ་ཛ་ན་ས་ཏུ་བྦེ་དྷོ པཱ་རི་ཙྪ་ཏྟ་ཀོ ཀོ་ཝི་ལཱ༹་རོ, ཏ་སྶ ཧེ་ཊྛཱ ས་ཊྛི་ཡོ་ཛ་ནཱ་ཡཱ་མཱ པ་ཉྙཱ་ས་ཡོ་ཛ་ན་ཝི་ཏྠཱ་རཱ པ་ཉྩ་ད་ས་ཡོ་ཛ་ནུ་བྦེ་དྷཱ ཛ་ཡ་སུ་མ་ན་པུ་པྥ་ཝ་ཎྞཱ པ་ཎྜུ་ཀ་མྦ་ལ་སི་ལཱ, ཡ་སྶཱ མུ་དུ་ཏཱ་ཡ ས་ཀྐ་སྶ ནི་སཱི་ད་ཏོ ཨུ་པ་ཌྜྷ་ཀཱ་ཡོ ཨ་ནུ་པྤ་ཝི་ས་ཏཱི’’ཏི.
ཏཾ སུ་ཏྭཱ རཱ་ཛཱ ཏ་ཏྠ ག་ནྟུ་ཀཱ་མོ ཙ་ཀྐ་ར་ཏ་ནཾ ཨ་བྦྷུ་ཀྐི་རི. ཏཾ ཨཱ་ཀཱ་སེ ཨུ་ཊྛ་ཧི ས་དྡྷིཾ ཙ་ཏུ་ར་ངྒི་ནི་ཡཱ སེ་ནཱ་ཡ. ཨ་ཐ དྭི་ནྣཾ དེ་ཝ་ལོ་ཀཱ་ནཾ ཝེ་མ་ཛ྄ཛྷ་ཏོ ཙ་ཀྐ་ར་ཏ་ནཾ ཨོ་ཏ་རི་ཏྭཱ པ་ཐ་ཝི་ཡཱ ཨཱ་ས་ནྣེ ཋཱ་ནེ ཨ་ཊྛཱ་སི ས་དྡྷིཾ པ་རི་ཎཱ་ཡ་ཀ་ར་ཏ་ན་པྤ་མུ་ཁཱ་ཡ ཙ་ཏུ་ར་ངྒི་ནི་ཡཱ སེ་ནཱ་ཡ. རཱ་ཛཱ ཨེ་ཀ་ཀོ་ཝ ཨ་ཏྟ་ནོ ཨཱ་ནུ་བྷཱ་ཝེ་ན ཏཱ་ཝ་ཏིཾ་ས་བྷ་ཝ་ནཾ ཨ་ག་མཱ་སི. ས་ཀྐོ ‘‘མ་ནྡྷཱ་ཏཱ ཨཱ་ག་ཏོ’’ཏི སུ་ཏྭཱ ཏ་སྶ པ་ཙྩུ་གྒ་མ་ནཾ ཀ་ཏྭཱ ‘‘སྭཱ་ག་ཏཾ, མ་ཧཱ་རཱ་ཛ, ས་ཀཾ, ཏེ མ་ཧཱ་རཱ་ཛ, ཨ་ནུ་སཱ་ས མ་ཧཱ་རཱ་ཛཱ’’ཏི ཝ་ཏྭཱ ས་དྡྷིཾ ནཱ་ཊ་ཀེ་ཧི ར་ཛྫཾ དྭེ བྷཱ་གེ ཀ་ཏྭཱ ཨེ་ཀཾ བྷཱ་ག་མ་དཱ་སི. ར་ཉྙོ ཏཱ་ཝ་ཏིཾ་ས་བྷ་ཝ་ནེ པ་ཏི་ཊྛི་ཏ་མ་ཏྟ་སྶེ་ཝ མ་ནུ་སྶ་ག་ནྡྷ་ས་རཱི་ར་ནི་སྶ་ནྡཱ་དི་མ་ནུ་སྶ་བྷཱ་ཝོ ཝི་ག་ཙྪི, དེ་ཝ་ལོ་ཀེ པ་ཝ་ཏྟི་ཝི་པཱ་ཀ་དཱ་ཡི་ནོ ཨ་པ་ར་པ་རི་ཡཱ་ཡ་ཝེ་ད་ནཱི་ཡ་སྶ ཀ་མྨ་སྶ ཀ་ཏོ་ཀཱ་ས་ཏྟཱ ས་བྦ་དཱ སོ་ལ༹་ས་ཝ་སྶུ་དྡེ་སི་ཀ་ཏཱ་མཱ་ལཱ་མི་ལཱ་ཡ་ནཱ་དི་དེ་ཝ་བྷཱ་ཝོ པཱ་ཏུ་ར་ཧོ་སི. ཏ་སྶ ས་ཀྐེ་ན ས་དྡྷིཾ པ་ཎྜུ་ཀ་མྦ་ལ་སི་ལཱ་ཡ ནི་སི་ནྣ་སྶ ཨ་ཀྑི་ནི་མི་ས་ན་མ་ཏྟེ་ན ནཱ་ན་ཏྟཾ པ་ཉྙཱ་ཡ་ཏི. ཏཾ ཨ་ས་ལླ་ཀྑེ་ནྟཱ དེ་ཝཱ ས་ཀྐ་སྶ ཙ ཏ་སྶ ཙ ནཱ་ན་ཏྟེ མུ་ཡ྄ཧ་ནྟི. སོ ཏ་ཏྠ དི་བྦ་ས་མྤ་ཏྟིཾ ཨ་ནུ་བྷ་ཝ་མཱ་ནོ ཏ་དཱ མ་ནུ་སྶཱ་ནཾ ཨ་ས་ངྑྱེ་ཡྻཱ་ཡུ་ཀ་ཏཱ་ཡ ཡཱ་ཝ ཚ་ཏྟིཾ་ས ས་ཀྐཱ ཨུ་པ་པ་ཛྫི་ཏྭཱ ཙུ་ཏཱ, ཏཱ་ཝ ས་ཀྐ་ར་ཛྫཾ ཀཱ་རེ་ཏྭཱ ‘‘ཀིཾ མེ ཨི་མི་ནཱ ཨུ་པ་ཌྜྷ་ར་ཛྫེ་ནཱ’’ཏི ཨ་ཏི་ཏྟོ ཀཱ་མེ་ཧི ཏ་ཏོ ཙ་ཝི་ཏྭཱ ཨ་ཏྟ་ནོ ཨུ་ཡྻཱ་ནེ པ་ཏི་ཏོ མ་ནུ་སྶ་ལོ་ཀེ ཨུ་ཏུ་ཀ་ཀྑ་ལ༹་ཏཱ་ཡ ཝཱ་ཏཱ་ཏ་པེ་ན ཕུ་སི་ཏ་ག་ཏྟོ ཀཱ་ལ་མ་ཀཱ་སི. ཏེ་ན ཝུ་ཏྟཾ ‘‘དེ་ཝ་ལོ་ཀེ པ་ན ཡཱ་ཝ ཚ་ཏྟིཾ་སཱ་ཡ ཨི་ནྡཱ་ནཾ ཨཱ་ཡུ་པྤ་མཱ་ཎཾ, ཏཱ་ཝ པ་ཎཱི་ཏེ ཀཱ་མེ པ་རི་བྷུ་ཉྫཱི’’ཏི.
པ་ཉྙ་ཏྟི་སུ་ཏྟ་ཝ་ཎྞ་ནཱ ནི་ཊྛི་ཏཱ.