(༡༩) ༤. བྲཱ་ཧྨ་ཎ་ཝ་གྒོ

༡-༣. ཡོ་དྷཱ་ཛཱི་ཝ་སུ་ཏྟཱ་དི་ཝ་ཎྞ་ནཱ

༡༨༡-༡༨༣. ཙ་ཏུ་ཏྠ་སྶ པ་ཋ་མཱ་དཱི་ནི ཨུ་ཏྟཱ་ན་ཏྠཱ་ནེ་ཝ.

༤. ཨ་བྷ་ཡ་སུ་ཏྟ་ཝ་ཎྞ་ནཱ

༡༨༤. ཙ་ཏུ་ཏྠེ སོ་ཙ་ཏཱིཏི ཙི་ཏྟེ ཨུ་པྤ་ནྣ་བ་ལ་ཝ་སོ་ཀེ་ན སོ་ཙ་ཏི, ཙི་ཏྟ་ས་ནྟཱ་པེ་ན ཨ་ནྟོ ནི་ཛ྄ཛྷཱ་ཡ་ཏཱི་ཏི ཨ་ཏྠོ. ཀི་ལ་མ་ཏཱིཏི ཏ་སྶེ་ཝ སོ་ཀ་སྶ ཝ་སེ་ན ཀཱ་ཡེ ཙ ཨུ་པྤ་ནྣ་དུ་ཀྑེ་ན ཀི་ལ་མ་ཏི. པ་རི་དེ་ཝ་ཏཱིཏི སོ་ཀུ་དྡེ་ཧ་ཀ་ཝ་སེ་ན ཏཾ ཏཾ ཝི་པྤ་ལ་པ་ནྟོ ཝཱ་ཙཱ་ཡ པ་རི་དེ་ཝ་ཏི. ཨུ་ར་ཏྟཱ་ལི༹ནྟི ཨུ་ར་ཏྟཱ་ལ༹ཾ, ཨུ་རཾ ཏཱ་ལེ༹་ཏྭཱ་ཏི ཨ་ཏྠོ. ཏེ་ནཱ་ཧ ‘‘ཨུ་རཾ ཏཱ་ལེ༹་ཏྭཱ’’ཏི. ཀ་ངྑཱ་ཝི་ཙི་ཀི་ཙྪཱཏི ཨེ་ཏྠ ‘‘ཨེ་ཀ་མེ་ཝི་དཾ པ་ཉྩ་མཾ ནཱི་ཝ་ར་ཎཾ. ཀིཾ ནུ ཁོ ཨི་ད’’ནྟི ཨཱ་ར་མྨ་ཎཾ ཀ་ངྑ་ན་ཏོ ཀ་ངྑཱ, ‘‘ཨི་ད་མེ་ཝ ཝ་ར’’ནྟི ནི་ཙྪེ་ཏུཾ ཨ་ས་མ་ཏྠ་བྷཱ་ཝ་ཏོ ‘‘ཝི་ཙི་ཀི་ཙྪཱ’’ཏི ཝུ་ཙྩ་ཏི – ‘‘དྷ་མྨ་ས་བྷཱ་ཝཾ ཝི་ཙི་ན་ནྟོ ཀི་ཙྪ་ཏི, ཝི་ག་ཏཱ ཙི་ཀི་ཙྪཱ’’ཏི ཝཱ ཀ་ཏྭཱ.

ཨ་བྷ་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༥. བྲཱ་ཧྨ་ཎ་ས་ཙྩ་སུ་ཏྟ་ཝ་ཎྞ་ནཱ

༡༨༥. པ་ཉྩ་མེ ཨེ་ཏྠཱཏི ཨེ་ཏ་སྨིཾ སུ་ཉྙ་ཏཱ་ནུ་པ་སྶ་ནཱ་དྷི་ཀཱ་རེ. ཀྭ་ཙཱིཏི ཀ་ཏྠ་ཙི ཋཱ་ནེ, ཀཱ་ལེ, དྷ་མྨེ ཝཱ. ཨ་ཐ ཝཱ ཀྭ་ཙཱིཏི ཨ་ཛ྄ཛྷ་ཏྟཾ བ་ཧི་དྡྷཱ ཝཱ. ཨ་ཏྟ་ནོ ཨ་ཏྟཱ་ནནྟི ས་ཀ་ཏྟཱ་ནཾ ‘‘ཨ་ཡཾ ཁོ, བྷོ བྲ་ཧྨཱ, མ་ཧཱ་བྲ་ཧྨཱ…པེ… ཝ་སཱི པི་ཏཱ བྷཱུ་ཏ་བྷ་བྱཱ་ན’’ནྟི་ཨཱ་དི་ནཱ (དཱི. ནི. ༡.༤༢) པ་རེ་ཧི པ་རི་ཀ་པྤི་ཏཾ ཨ་ཏྟཱ་ན་ཉྩ ཀ་སྶ་ཙི ཀི་ཉྩ་ན་བྷཱུ་ཏཾ ན པ་སྶ་ཏཱི་ཏི ད་སྶེ་ནྟོ ‘‘ཀ་སྶ་ཙཱི’’ཏི་ཨཱ་དི་མཱ་ཧ. ཏ་ཏྠ པ་ར་སྶཱཏི པ་ར་ཛཱ་ཏི པ་རོ པུ་རི་སོ་ཏི ཝཱ ཨེ་ཝཾ ག་ཧི་ཏ་སྶ. ན ཙ མ་མ ཀྭ་ཙ་ནཱིཏི ཨེ་ཏྠ མ་མ-ས་དྡོ ཨ་ཊྛཱ་ན་པྤ་ཡུ་ཏྟོ་ཏི ཨཱ་ཧ ‘‘མ་མ-ས་དྡཾ ཏཱ་ཝ ཋ་པེ་ཏྭཱ’’ཏི. པ་ར་སྶ ཙཱཏི ཨ་ཏྟ་ནོ ཨ་ཉྙ་སྶ. པ་རོ པུ་རི་སོ ནཱ་མ ཨ་ཏྠི མ་མ་ཏྠཱ་ཡ ཋི་ཏོ. ཏ་སྶ ཝ་སེ་ན མ་ཡ྄ཧཾ ས་བྦཾ ཨི་ཛ྄ཛྷ་ཏཱི་ཏི ཨེ་ཀ་ཙྩ་དི་ཊྛི་ག་ཏི་ཀ་པ་རི་ཀ་པྤི་ཏ་ཝ་སེ་ན པ་རཾ ཨ་ཏྟཱ་ནཾ ཏ་ཉྩ ཨ་ཏྟ་ནོ ཀི་ཉྩ་ན་བྷཱུ་ཏཾ ན པ་སྶ་ཏཱི་ཏི ད་སྶེ་ནྟོ ‘‘ན ཙ ཀྭ་ཙ་ནཱི’’ཏི་ཨཱ་དི་མཱ་ཧ. ཨེ་ཏྠ ཙ ནཱ་ཧཾ ཀྭ་ཙ་ནཱིཏི ས་ཀ་ཨ་ཏྟ་ནོ ས་བྦྷཱ་ཝཾ ན པ་སྶ་ཏི. ན ཀ་སྶ་ཙི ཀི་ཉྩ་ན་ཏ་སྨིནྟི ས་ཀ་ཨ་ཏྟ་ནོ ཨེ་ཝ ཀ་སྶ་ཙི ཨ་ཏྟ་ནི་ཡ་ཏཾ ན པ་སྶ་ཏི. ན ཙ མ་མཱཏི ཨེ་ཏཾ དྭ་ཡཾ ཡ་ཐཱ་ར་ཧཾ ས་མྦ་ནྡྷི་ཏ་བྦཾ, ཨ་ཏྠི-པ་དཾ པ་ཙྩེ་ཀཾ. ན ཙ ཀྭ་ཙ་ནི པ་ར་སྶ ཨ་ཏྟཱ ཨ་ཏྠཱིཏི པ་ར་སྶ ཨ་ཏྟ་ནོ ཨ་བྷཱ་ཝཾ པ་སྶ་ཏི. ཏ་སྶ པ་ར་སྶ ཨ་ཏྟ་ནོ མ་མ ཀི་ཉྩ་ན་ཏཱ ན་ཏྠཱིཏི པ་ར་སྶ ཨ་ཏྟ་ནོ ཨ་ན་ཏྟ་ནི་ཡ་ཏཾ པ་སྶ་ཏི. ཨེ་ཝཾ ཨ་ཛ྄ཛྷ་ཏྟཾ བ་ཧི་དྡྷཱ ཁ་ནྡྷཱ་ནཾ ཨ་ཏྟ་ཏྟ་ནི་ཡ་སུ་ཉྙ་ཏཱ-སུ་དྡྷ་ས་ངྑཱ་ར་པུ་ཉྫ་ཏཱ-ཙ་ཏུ་ཀོ་ཊི་ཀ་སུ་ཉྙ་ཏཱ་པ་རི་གྒ་ཎྷ་ནེ་ན ནི་ཊྛཱ ཧོ་ཏི. སེ་ས་མེ་ཏྠ སུ་ཝི་ཉྙེ་ཡྻ་མེ་ཝ.

བྲཱ་ཧྨ་ཎ་ས་ཙྩ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༦. ཨུ་མྨ་གྒ་སུ་ཏྟ་ཝ་ཎྞ་ནཱ

༡༨༦. ཚ་ཊྛེ ཨཱ་ཀ་ཌྜྷཱི་ཡ་ཏཱིཏི ཙི་ཏྟ་ཝ་སི་ཀོ ལོ་ཀོ ཏ་ཏྠ ཏ་ཏྠ ཨུ་པ་ཀ་ཌྜྷཱི་ཡ་ཏི. ཏེ་སཾ་ཡེ་ཝེ་ཏྠ ག་ཧ་ཎཾ ཝེ་དི་ཏ་བྦནྟི ཡེ ཨ་པ་རི་ཉྙཱ་ཏ་ཝ་ཏྠུ་ཀཱ ཙི་ཏྟ་སྶ ཝ་སཾ ག་ཙྪ་ནྟི, ཏེ་སཾ་ཡེ་ཝ ག་ཧ་ཎཾ. ན ཧི པ་རི་ཉྙཱ་ཏ་ཀྑ་ནྡྷཱ པ་ཧཱི་ན་ཀི་ལེ་སཱ ཙི་ཏྟ་སྶ ཝ་སཾ ག་ཙྪ་ནྟི, ཙི་ཏྟཾ པ་ན ཨ་ཏྟ་ནོ ཝ་སེ ཝ་ཏྟེ་ནྟི. ས་ཧ སཱི་ལེ་ནཱཏི ཙཱ་རི་ཏྟ་ཝཱ་རི་ཏྟ་སཱི་ལེ་ན ས་དྡྷིཾ. པུ་བྦ་བྷཱ་ག་པ་ཊི་པ་དནྟི དྷུ་ཏ་ངྒ་མཱ་དིཾ ཀ་ཏྭཱ ཡཱ་ཝ གོ་ཏྲ་བྷུ་ཉཱ་ཎཾ, ཏཱ་ཝ པ་ཝ་ཏྟེ་ཏ་བྦཾ ས་མ་ཐ་ཝི་པ་སྶ་ནཱ་ས་ངྑཱ་ཏཾ ས་མྨཱ་པ་ཊི་པ་དཾ. སེ་སཾ སུ་ཝི་ཉྙེ་ཡྻ་མེ་ཝ.

ཨུ་མྨ་གྒ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༧. ཝ་སྶ་ཀཱ་ར་སུ་ཏྟ་ཝ་ཎྞ་ནཱ

༡༨༧. ས་ཏྟ་མེ ཝ་སྶ་ཀཱ་རོ བྲཱ་ཧྨ་ཎོ མ་ག་དྷ་མ་ཧཱ་མ་ཏྟོཏི ཨེ་ཏྠ ཝ་སྶ་ཀཱ་རོཏི ཏ་སྶ བྲཱ་ཧྨ་ཎ་སྶ ནཱ་མཾ. མ་ཧ་ཏི་ཡཱ ཨི་སྶ་རི་ཡ་མ་ཏྟཱ་ཡ ས་མ་ནྣཱ་ག་ཏོ མ་ཧཱ་མ་ཏྟོ. ཨི་སྶ་རི་ཡ་མ་ཏྟཱ་ཡཱཏི ཙ ཨི་སྶ་རི་ཡ་པྤ་མཱ་ཎེ་ནཱ་ཏི ཨ་ཏྠོ, ཨི་སྶ་རི་ཡེ་ན ཙེ་ཝ ཝི་ཏྟཱུ་པ་ཀ་ར་ཎེ་ན ཙཱ་ཏི ཨེ་ཝཾ ཝཱ ཨེ་ཏྠ ཨ་ཏྠོ ད་ཊྛ་བྦོ, ཨུ་པ་བྷོ་གཱུ་པ་ཀ་ར་ཎཱ་ནི་པི ཧི ལོ་ཀེ ‘‘མ་ཏྟཱ’’ཏི ཝུ་ཙྩ་ནྟི. མ་ག་དྷ་ར་ཉྙོ, མ་ག་དྷ་ར་ཊྛེ ཝཱ མ་ཧཱ་མ་ཏྟོ་ཏི མ་ག་དྷ་མ་ཧཱ་མ་ཏྟོ. ཏུ་དི་ས་ཉྙི་ཏོ གཱ་མོ ནི་ཝཱ་སོ ཨེ་ཏ་སྶཱ་ཏི ཏོ་དེ་ཡྻོ. ཏེ་ནེ་ཝཱ་ཧ ‘‘ཏུ་དི་གཱ་མ་ཝཱ་སི་ཀ་སྶཱ’’ཏི. ཏུ་དི་གཱ་མ་ཝཱ་སི་ཏཱ ཙ་སྶ ཏ་ཏྠ ཨ་དྷི་པ་ཏི་བྷཱ་ཝེ་ནཱ་ཏི ད་ཊྛ་བྦཱ. སོ ཧི ཏཾ གཱ་མཾ སོ་ཎ་ད་ཎྜོ ཝི་ཡ, ཙ་མྤཾ ཀཱུ་ཊ་ད་ནྟོ ཝི་ཡ, ཁཱ་ཎུ་མ་ཏཾ ཨ་དྷི་པ་ཏི་བྷཱ་ཝེ་ན ཨ་ཛ྄ཛྷཱ་ཝ་ས་ཏི. མ་ཧ་དྡྷ་ནོ ཧོ་ཏི པ་ཉྩ་ཙ་ཏྟཱ་ལཱི་ས་ཀོ་ཊི་ཝི་བྷ་ཝོ. པ་རི་ས་ཏཱིཏི པ་རི་སཱ་ཡཾ, ཛ་ན་ས་མཱུ་ཧེ་ཏི ཨ་ཏྠོ. ཏེ་ནཱ་ཧ ‘‘ས་ནྣི་པ་ཏི་ཏཱ་ཡ པ་རི་སཱ་ཡཱ’’ཏི. ཨ་བྷི་པྤ་ས་ནྣོཏི ཨེ་ཏྠ ཨ་བྷི་ཀྐ་མ་ན་ཏྠོ ཨ་བྷི-ས་དྡོ་ཏི ཨཱ་ཧ ‘‘ཨ་ཏི་ཀྐ་མྨ པ་ས་ནྣོ’’ཏི, པ་སཱ་ད་ནཱི་ཡཾ ཋཱ་ནཾ ཨ་ཏི་ཀྐ་མི་ཏྭཱ ཨ་པྤ་སཱ་ད་ནཱི་ཡ་ཊྛཱ་ནེ པ་ས་ནྣོ་ཏི ཨ་དྷི་པྤཱ་ཡོ. ཏཾ ཏཾ ཀི་ཙྩཾ ཨ་ཏྠཾ པ་སྶ་ཏཱི་ཏི ཨ་ཏྠ་ད་སཱ, ཨ་ལཾ ས་མ་ཏྠཱ པ་ཊི་བ་ལཱ ཨ་ཏྠ་ད་སཱ ཨ་ལ་མ་ཏྠ་ད་སཱ, ཨ་ལ་མ་ཏྠ་ད་སེ ཨ་ཏི་ས་ཡ་ནྟཱི་ཏི ཨ་ལ་མ་ཏྠ་ད་ས་ཏ་རཱ. ཏེ་ནཱ་ཧ ‘‘ཨ་ཏྠེ པ་སྶི་ཏུཾ ས་མ་ཏྠཱ’’ཏི་ཨཱ་དི. ནེ་ཝ ས་པྤུ་རི་སཾ ན ཨ་ས་པྤུ་རི་སཾ ཛཱ་ནཱ་ཏི ས་པྤུ་རི་ས་དྷ་མྨཱ་ནཾ ཨ་ས་པྤུ་རི་ས་དྷ་མྨཱ་ན་ཉྩ ཡཱ་ཐཱ་ཝ་ཏོ ཨ་ཛཱ་ན་ན་ཏོ. སེ་ས་མེ་ཏྠ ཨུ་ཏྟཱ་ན་མེ་ཝ.

ཝ་སྶ་ཀཱ་ར་སུ་ཏྟ་ཝ་ཎྞ་ནཱ ནི་ཊྛི་ཏཱ.

༨. ཨུ་པ་ཀ་སུ་ཏྟ་ཝ་ཎྞ་ནཱ

༡༨༨. ཨ་ཊྛ་མེ ནི་བྦ་ཏྟི་ཝ་སེ་ན ནི་ར་ཡཾ ཨ་ར་ཧ་ཏི, ནི་ར་ཡ་སཾ་ཝ་ཏྟ་ནི་ཡེ་ན ཝཱ ཀ་མྨུ་ནཱ ནི་ར་ཡེ ནི་ཡུ་ཏྟོ་ཏི ནེ་ར་ཡི་ཀོ. ཨ་ཝཱི་ཙི་མྷི ཨུ་པྤ་ཛྫི་ཏྭཱ ཏ་ཏྠ ཨཱ་ཡུ་ཀ་པྤ་ས་ཉྙི་ཏཾ ཨ་ནྟ་ར་ཀ་པྤཾ ཏི་ཊྛ་ཏཱི་ཏི ཀ་པྤ་ཊྛོ. ནི་ར་ཡཱུ་པ་པ་ཏྟིཾ པ་རི་ཧ་ར་ཎ་ཝ་སེ་ན ཏི་ཀི་ཙྪི་ཏུཾ ཨ་ས་ཀྐུ་ཎེ་ཡྻོ་ཏི ཨ་ཏེ་ཀི་ཙྪོ. ཨ་པ་རི་ཡཱ་དི་ནྣཱ་ཝཱཏི ཨ་པ་རི་ཀྑཱི་ཎཱ་ཡེ་ཝ. ས་ཙེ ཧི ཨེ་ཀོ བྷི་ཀྑུ ཀཱ་ཡཱ་ནུ་པ་སྶ་ནཾ པུ་ཙྪ་ཏི, ཨ་ཉྙོ ཝེ་ད་ནཱ་ནུ་པ་སྶ་ནཾ…པེ… ཙི་ཏྟཱ་ནུ་པ་སྶ་ནཾ. ‘‘ཨི་མི་ནཱ པུ་ཊྛེ ཨ་ཧཾ པུ་ཙྪཱ་མཱི’’ཏི ཨེ་ཀོ ཨེ་ཀཾ ན ཨོ་ལོ་ཀེ་ཏི, ཨེ་ཝཾ ས་ནྟེ་པི ཏེ་སཾ ཝཱ་རོ པ་ཉྙཱ་ཡ་ཏི ཨེ་ཝ, བུ་དྡྷཱ་ནཾ པ་ན ཝཱ་རོ ན པ་ཉྙཱ་ཡ་ཏི. ཝི་ད་ཏྠི་ཙ་ཏུ་ར་ངྒུ་ལཾ ཚཱ་ཡཾ ཨ་ཏི་ཀྐ་མ་ན་ཏོ པུ་རེ་ཏ་རཾ་ཡེ་ཝ བྷ་ག་ཝཱ ཙུ་དྡ་ས་ཝི་དྷེ་ན ཀཱ་ཡཱ་ནུ་པ་སྶ་ནཾ, ན་ཝ་ཝི་དྷེ་ན ཝེ་ད་ནཱ་ནུ་པ་སྶ་ནཾ, སོ་ལ༹་ས་ཝི་དྷེ་ན ཙི་ཏྟཱ་ནུ་པ་སྶ་ནཾ, པ་ཉྩ་ཝི་དྷེ་ན དྷ་མྨཱ་ནུ་པ་སྶ་ནཾ ཀ་ཐེ་ཏི. ཏི་ཊྛ་ནྟུ ཝཱ ཨེ་ཝཾ ཙ་ཏྟཱ་རོ. ས་ཙེ ཧི ཨ་ཉྙེ ཙ་ཏྟཱ་རོ ས་མྨ་པྤ་དྷཱ་ནེ་སུ, ཨ་ཉྙེ ཨི་དྡྷི་པཱ་དེ་སུ, ཨ་ཉྙེ པ་ཉྩི་ནྡྲི་ཡེ་སུ, ཨ་ཉྙེ པ་ཉྩ་བ་ལེ་སུ, ཨ་ཉྙེ ས་ཏྟ་བོ་ཛ྄ཛྷ་ངྒེ་སུ, ཨ་ཉྙེ ཨ་ཊྛ་མ་གྒ་ངྒེ་སུ པ་ཉྷེ པུ་ཙྪེ་ཡྻུཾ, ཏ་མྤི བྷ་ག་ཝཱ ཀ་ཐེ་ཡྻ. ཏི་ཊྛ་ནྟུ ཝཱ ཨེ་ཏེ ཨ་ཊྛ. ས་ཙེ ཨ་ཉྙེ ས་ཏྟ་ཏིཾ་ས ཛ་ནཱ བོ་དྷི་པ་ཀྑི་ཡེ་སུ པ་ཉྷེ པུ་ཙྪེ་ཡྻུཾ, ཏ་མྤི བྷ་ག་ཝཱ ཏཱ་ཝ་དེ་ཝ ཀ་ཐེ་ཡྻ. ཀ་སྨཱ? ཡཱ་ཝ་ཏཱ ཧི ལོ་ཀི་ཡ་མ་ཧཱ་ཛ་ནེ ཨེ་ཀཾ པ་དཾ ཀ་ཐེ་ནྟེ ཏཱ་ཝ ཨཱ་ན་ནྡ་ཏྠེ་རོ ཨ་ཊྛ པ་དཱ་ནི ཀ་ཐེ་ཏི. ཨཱ་ན་ནྡ་ཏྠེ་རེ པ་ན ཨེ་ཀཾ པ་དཾ ཀ་ཐེ་ནྟེ་ཡེ་ཝ བྷ་ག་ཝཱ སོ་ལ༹་ས པ་དཱ་ནི ཀ་ཐེ་ཏི. ཀ་སྨཱ? བྷ་ག་ཝ་ཏོ ཧི ཛི་ཝ྄ཧཱ མུ་དུ, ད་ནྟཱ་ཝ་ར་ཎཾ སུ་ཕུ་སི་ཏཾ, ཝ་ཙ་ནཾ ཨ་ག་ལི༹་ཏཾ, བྷ་ཝ་ངྒ་པ་རི་ཝཱ་སོ ལ་ཧུ་ཀོ. ཏེ་ན ཝུ་ཏྟཾ – ‘‘ཨ་པ་རི་ཡཱ་དི་ནྣཱ་ཝ་སྶ ཏ་ཐཱ་ག་ཏ་སྶ དྷ་མྨ་དེ་ས་ནཱ, ཨ་པ་རི་ཡཱ་དི་ནྣཾ དྷ་མྨ་པ་ད་བྱ་ཉྫ་ན’’ནྟི.

ཏ་ཏྠ དྷ་མྨ་དེ་ས་ནཱཏི ཏ་ནྟི་ཊྛ་པ་ནཱ. དྷ་མྨ་པ་ད་བྱ་ཉྫ་ནནྟི ཨེ་ཏྠ དྷ་མྨོཏི པཱ་ལི༹. པ་ཛྫ་ཏི ཨ་ཏྠོ ཨེ་ཏེ་ནཱ་ཏི པ་དཾ. ཝཱ་ཀྱ་ཉྩ པ་དེ་ནེ་ཝ ས་ངྒ་ཧི་ཏཾ. ཨ་ཏྠཾ བྱ་ཉྫེ་ཏཱི་ཏི བྱ་ཉྫ་ནཾ, ཨ་ཀྑ་རཾ. ཏ་ཉྷི པ་ད་ཝཱ་ཀྱཾ པ་རི་ཙྪི་ཛྫ་མཱ་ནཾ ཏཾ ཏཾ ཨ་ཏྠཾ བྱ་ཉྫེ་ཏི པ་ཀཱ་སེ་ཏི. ཨེ་ཏེ་ན ཨ་པ་རཱ་པ་རེ་ཧི པ་ད་བྱ་ཉྫ་ནེ་ཧི སུ་ཙི་ར་མྤི ཀཱ་ལཾ ཀ་ཐེ་ནྟ་སྶ ཏ་ཐཱ་ག་ཏ་སྶ ན ཀ་དཱ་ཙི ཏེ་སཾ པ་རི་ཡཱ་དཱ་ནཾ ཨ་ཏྠཱི་ཏི ད་སྶེ་ཏི. གུ་ཎ་དྷཾ་སཱིཏི གུ་ཎ་དྷཾ་ས་ན་སཱི་ལོ. པ་ག་བྦོཏི ཝཱ་ཙཱ་པཱ་ག་བྦི་ཡེ་ན ས་མ་ནྣཱ་ག་ཏོ.

ཨུ་པ་ཀ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༩. ས་ཙྪི་ཀ་ར་ཎཱི་ཡ་སུ་ཏྟ་ཝ་ཎྞ་ནཱ

༡༨༩. ན་ཝ་མེ ནཱ་མ་ཀཱ་ཡེ་ནཱཏི ས་ཧ་ཛཱ་ཏ་ནཱ་མ་ཀཱ་ཡེ་ན. སེ་ས་མེ་ཏྠ ཨུ་ཏྟཱ་ན་མེ་ཝ.

ས་ཙྪི་ཀ་ར་ཎཱི་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༡༠. ཨུ་པོ་ས་ཐ་སུ་ཏྟ་ཝ་ཎྞ་ནཱ

༡༩༠. ད་ས་མེ ཏུ་ཎྷཱི་བྷཱུ་ཏཾ ཏུ་ཎྷཱི་བྷཱུ་ཏནྟི ཨཱ་མེ་ཌི་ཏ་ཝ་ཙ་ནཾ བྱཱ་པ་ནི་ཙྪཱ་ཝ་སེ་ན ཝུ་ཏྟ་ནྟི ཨཱ་ཧ ‘‘ཡ་ཏོ ཡ་ཏོ ཨ་ནུ་ཝི་ལོ་ཀེ་ཏཱི’’ཏི. ཨ་ནུ་ཝི་ལོ་ཀེ་ཏྭཱཏི ཨེ་ཏྠ ཨ་ནུ-ས་དྡོ་པི བྱཱ་པ་ནི་ཙྪཱ་ཝ་ཙ་ན་མེ་ཝཱ་ཏི ཨ་ནུ ཨ་ནུ ཝི་ལོ་ཀེ་ཏྭཱ་ཏི ཨ་ཏྠོ, པ་ཉྩ་པ་སཱ་ད་པྤ་ཊི་མ་ཎྜི་ཏཱ་ནི ཨ་ཀྑཱི་ནི ཨུ་མྨཱི་ལེ་ཏྭཱ ཏ་ཏོ ཏ་ཏོ ཝི་ལོ་ཀེ་ཏྭཱ་ཏི ཝུ་ཏྟཾ ཧོ་ཏི. ཨ་ལནྟི ཡུ་ཏྟཾ, ཨོ་པཱ་ཡི་ཀ་ནྟི ཨ་ཏྠོ ‘‘ཨ་ལ་མེ་ཝ ནི་བྦི་ནྡི་ཏུ’’ནྟི་ཨཱ་དཱི་སུ (དཱི. ནི. ༢.༢༧༢; སཾ. ནི. ༢.༡༢༤-༡༢༦) ཝི་ཡ. པུ་ཊ་བ་ནྡྷ་ནེ་ན པ་རི་ཧ་རི་ཏྭཱ ཨ་སི་ཏ་བྦཾ པུ་ཊོ་སཾ ས་མྦ་ལཾ ཨ-ཀཱ་ར་སྶ ཨོ-ཀཱ་རཾ ཀ་ཏྭཱ. ཏེ་ནཱ་ཧ ‘‘པཱ་ཐེ་ཡྻ’’ནྟི. སེ་ས་མེ་ཏྠ སུ་ཝི་ཉྙེ་ཡྻ་མེ་ཝ.

ཨུ་པོ་ས་ཐ་སུ་ཏྟ་ཝ་ཎྞ་ནཱ ནི་ཊྛི་ཏཱ.

བྲཱ་ཧྨ་ཎ་ཝ་གྒ་ཝ་ཎྞ་ནཱ ནི་ཊྛི་ཏཱ.