༡. སཾ་ཁི་ཏྟ་སུ་ཏྟ་ཝ་ཎྞ་ནཱ

༡༦༡. དུ་ཏི་ཡ་སྶ པ་ཋ་མེ དུ་ཀྑཱ་པ་ཊི་པ་དཱ ད་ནྡྷཱ་བྷི་ཉྙཱཏི་ཨཱ་དཱི་སུ པཱ་ལི༹་ཡཱ ཨཱ་ག་ཏ་ན་ཡེ་ན ཨ་ཏྠོ ཝེ་དི་ཏ་བྦོ. ཏ་ཐཱ ཧི –

‘‘ཏ་ཏྠ ཀ་ཏ་མཱ དུ་ཀྑ་པ་ཊི་པ་དཱ ད་ནྡྷཱ་བྷི་ཉྙཱ པ་ཉྙཱ? ཀི་ཙྪེ་ན ཀ་སི་རེ་ན ས་མཱ་དྷིཾ ཨུ་པྤཱ་དེ་ནྟ་སྶ ད་ནྡྷཾ ཏཾ ཋཱ་ནཾ ཨ་བྷི་ཛཱ་ན་ནྟ་སྶ ཡཱ ཨུ་པྤ་ཛྫ་ཏི པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི, ཨ་ཡཾ ཝུ་ཙྩ་ཏི དུ་ཀྑ་པ་ཊི་པ་དཱ ད་ནྡྷཱ་བྷི་ཉྙཱ པ་ཉྙཱ. ཏ་ཏྠ ཀ་ཏ་མཱ དུ་ཀྑ་པ་ཊི་པ་དཱ ཁི་པྤཱ་བྷི་ཉྙཱ པ་ཉྙཱ? ཀི་ཙྪེ་ན ཀ་སི་རེ་ན ས་མཱ་དྷིཾ ཨུ་པྤཱ་དེ་ནྟ་སྶ ཁི་པྤཾ ཏཾ ཋཱ་ནཾ ཨ་བྷི་ཛཱ་ན་ནྟ་སྶ ཡཱ ཨུ་པྤ་ཛྫ་ཏི པ་ཉྙཱ པ་ཛཱ་ན་ནཱ…པེ… ས་མྨཱ་དི་ཊྛི, ཨ་ཡཾ ཝུ་ཙྩ་ཏི དུ་ཀྑ་པ་ཊི་པ་དཱ ཁི་པྤཱ་བྷི་ཉྙཱ པ་ཉྙཱ. ཏ་ཏྠ ཀ་ཏ་མཱ སུ་ཁ་པ་ཊི་པ་དཱ ད་ནྡྷཱ་བྷི་ཉྙཱ པ་ཉྙཱ? ཨ་ཀི་ཙྪེ་ན ཨ་ཀ་སི་རེ་ན ས་མཱ་དྷིཾ ཨུ་པྤཱ་དེ་ནྟ་སྶ ད་ནྡྷཾ ཏཾ ཋཱ་ནཾ ཨ་བྷི་ཛཱ་ན་ནྟ་སྶ ཡཱ ཨུ་པྤ་ཛྫ་ཏི པ་ཉྙཱ པ་ཛཱ་ན་ནཱ…པེ… ས་མྨཱ་དི་ཊྛི, ཨ་ཡཾ ཝུ་ཙྩ་ཏི སུ་ཁ་པ་ཊི་པ་དཱ ད་ནྡྷཱ་བྷི་ཉྙཱ པ་ཉྙཱ. ཏ་ཏྠ ཀ་ཏ་མཱ སུ་ཁ་པ་ཊི་པ་དཱ ཁི་པྤཱ་བྷི་ཉྙཱ པ་ཉྙཱ? ཨ་ཀི་ཙྪེ་ན ཨ་ཀ་སི་རེ་ན ས་མཱ་དྷིཾ ཨུ་པྤཱ་དེ་ནྟ་སྶ ཁི་པྤཾ ཏཾ ཋཱ་ནཾ ཨ་བྷི་ཛཱ་ན་ནྟ་སྶ ཡཱ ཨུ་པྤ་ཛྫ་ཏི པ་ཉྙཱ པ་ཛཱ་ན་ནཱ…པེ… ས་མྨཱ་དི་ཊྛི, ཨ་ཡཾ ཝུ་ཙྩ་ཏི སུ་ཁ་པ་ཊི་པ་དཱ ཁི་པྤཱ་བྷི་ཉྙཱ པ་ཉྙཱ’’ཏི (ཝི་བྷ. ༨༠༡) – ཨ་ཡ་མེ་ཏྠ པཱ་ལི༹.

ཏ་ཏྠ ཀི་ཙྪེ་ན ཀ་སི་རེ་ན ས་མཱ་དྷིཾ ཨུ་པྤཱ་དེ་ནྟ་སྶཱཏི པུ་བྦ་བྷཱ་གེ ཨཱ་ག་མ་ན་ཀཱ་ལེ ཀི་ཙྪེ་ན ཀ་སི་རེ་ན དུ་ཀྑེ་ན ས་ས་ངྑཱ་རེ་ན ས་པྤ་ཡོ་གེ་ན ཀི་ལེ་སེ ཝི་ཀྑ་མྦྷེ་ཏྭཱ ལོ་ཀུ་ཏྟ་ར་ས་མཱ་དྷིཾ ཨུ་པྤཱ་དེ་ནྟ་སྶ. ད་ནྡྷཾ ཏཾ ཋཱ་ནཾ ཨ་བྷི་ཛཱ་ན་ནྟ་སྶཱཏི ཝི་ཀྑ་མྦྷི་ཏེ་སུ ཀི་ལེ་སེ་སུ ཝི་པ་སྶ་ནཱ་པ་རི་ཝཱ་སེ ཙི་རཾ ཝ་སི་ཏྭཱ ཏཾ ལོ་ཀུ་ཏྟ་ར་ས་མཱ་དྷི་ས་ངྑཱ་ཏཾ ཋཱ་ནཾ ད་ནྡྷཾ ས་ཎི་ཀཾ ཨ་བྷི་ཛཱ་ན་ནྟ་སྶ པ་ཊི་ཝི་ཛ྄ཛྷ་ནྟ་སྶ, པཱ་པུ་ཎ་ནྟ་སྶཱ་ཏི ཨ་ཏྠོ. ཨ་ཡཾ ཝུ་ཙྩ་ཏཱིཏི ཡཱ ཨེ་སཱ ཨེ་ཝཾ ཨུ་པྤ་ཛྫ་ཏི, ཨ་ཡཾ ཀི་ལེ་ས་ཝི་ཀྑ་མྦྷ་ན་པྤ་ཊི་པ་དཱ་ཡ དུ་ཀྑ་ཏྟཱ, ཝི་པ་སྶ་ནཱ་པ་རི་ཝཱ་ས་པ་ཉྙཱ་ཡ ཙ ད་ནྡྷ་ཏྟཱ མ་གྒ་ཀཱ་ལེ ཨེ་ཀ་ཙི་ཏྟ་ཀྑ་ཎེ ཨུ་པྤ་ནྣཱ་པི པ་ཉྙཱ ཨཱ་ག་མ་ན་ཝ་སེ་ན ‘‘དུ་ཀྑ་པ་ཊི་པ་དཱ ད་ནྡྷཱ་བྷི་ཉྙཱ ནཱ་མཱ’’ཏི ཝུ་ཙྩ་ཏི. ཨུ་པ་རི ཏཱི་སུ པ་དེ་སུ་པི ཨི་མི་ནཱ ན་ཡེ་ན ཨ་ཏྠོ ཝེ་དི་ཏ་བྦོ.

སཾ་ཁི་ཏྟ་སུ་ཏྟ་ཝ་ཎྞ་ནཱ ནི་ཊྛི་ཏཱ.