(༡༣) ༣. བྷ་ཡ་ཝ་གྒོ
༡. ཨ་ཏྟཱ་ནུ་ཝཱ་ད་སུ་ཏྟ་ཝ་ཎྞ་ནཱ
༡༢༡. ཏ་ཏི་ཡ་སྶ པ་ཋ་མེ ཨ་ཏྟཱ་ནཾ ཨ་ནུ་ཝ་ད་ནྟ་སྶ ཨུ་པྤ་ཛྫ་ན་ཀ་བྷ་ཡནྟི ཨ་ཏྟཱ་ནཾ ཨ་ནུ་ཝ་ད་ནྟ་སྶ པཱ་པ་ཀ་མྨི་ནོ ཨུ་པྤ་ཛྫ་ན་ཀ་བྷ་ཡཾ. དྭ་ཏྟིཾ་ས་ཀ་མྨ་ཀཱ་ར་ཎེ པ་ཊི་ཙྩ ཨུ་པྤ་ཛྫ་ན་ཀ་བྷ་ཡནྟི ཨ་གཱ་རི་ཀཱ་ནཾ ཝ་སེ་ན ཝུ་ཏྟཾ, ཨ་ན་གཱ་རི་ཀཱ་ནཾ པ་ན ཝི་ན་ཡ་ད་ཎྜཾ པ་ཊི་ཙྩ ཨུ་པྤ་ཛྫ་ན་ཀ་བྷ་ཡ་མྤི ད་ཎྜ་བྷ་ཡ་ནྟེ་ཝ ས་ངྑཾ ག་ཙྪ་ཏི. སེ་སཾ སུ་ཝི་ཉྙེ་ཡྻ་མེ་ཝ.
ཨ་ཏྟཱ་ནུ་ཝཱ་ད་སུ་ཏྟ་ཝ་ཎྞ་ནཱ ནི་ཊྛི་ཏཱ.
༢. ཨཱུ་མི་བྷ་ཡ་སུ་ཏྟ་ཝ་ཎྞ་ནཱ
༡༢༢. དུ་ཏི་ཡེ ཀོ་དྷཱུ་པཱ་ཡཱ་ས་སྶེ་ཏཾ ཨ་དྷི་ཝ་ཙ་ནནྟི ཨེ་ཏྠ ཀུ་ཛ྄ཛྷ་ན་ཊྛེ་ན ཀོ་དྷོ, སྭེ་ཝ ཙི་ཏྟ་སྶ ཀཱ་ཡ་སྶ ཙ ཨ་ཏི་པྤ་མ་དྡ་ན་མ་ཐ་ནུ་པྤཱ་ད་ནེ་ཧི ད་ལ༹ྷ་ཨཱ་ཡཱ་ས་ཊྛེ་ན ཨུ་པཱ་ཡཱ་སོ. ཨ་ནེ་ཀ་ཝཱ་རཾ པ་ཝ་ཏྟི་ཏྭཱ ཨ་ཏྟ་ནཱ ས་མ་ཝེ་ཏཾ ས་ཏྟཾ ཨ་ཛ྄ཛྷོ་ཏྠ་རི་ཏྭཱ སཱི་སཾ ཨུ་ཀྑི་པི་ཏུཾ ཨ་ད་ཏྭཱ ཨཱུ་མི་ས་དི་ས་ཏཱ ད་ཊྛ་བྦཱ. ཡ་ཐཱ ཧི བཱ་ཧི་རཾ ཨུ་ད་ཀཾ ཨོ་ཏི་ཎྞོ ཨཱུ་མཱི་སུ ཨོ་སཱི་དི་ཏྭཱ མ་ར་ཏི, ཨེ་ཝཾ ཨི་མ་སྨིཾ སཱ་ས་ནེ ཀོ་དྷཱུ་པཱ་ཡཱ་སེ ཨོ་སཱི་དི་ཏྭཱ ཝི་བྦྷ་མ་ཏི, ཏ་སྨཱ ཀོ་དྷཱུ་པཱ་ཡཱ་སོ ‘‘ཨཱུ་མི་བྷ་ཡ’’ནྟི ཝུ་ཏྟོ. ཨོ་ད་རི་ཀ་ཏྟ་སྶེ་ཏཾ ཨ་དྷི་ཝ་ཙ་ནནྟི ཡ་ཐཱ ཧི བཱ་ཧི་རཾ ཨུ་ད་ཀཾ ཨོ་ཏི་ཎྞོ ཀུ་མྦྷཱི་ལེ་ན ཁཱ་དི་ཏོ མ་ར་ཏི, ཨེ་ཝཾ ཨི་མ་སྨིཾ སཱ་ས་ནེ ཨོ་ད་རི་ཀ་ཏྟེ་ན ཨོ་ད་རི་ཀ་བྷཱ་ཝེ་ན ཨཱ་མི་ས་གེ་དྷེ་ན མི་ཙྪཱ་ཛཱི་ཝེ་ན ཛཱི་ཝི་ཀ་ཀ་པྤ་ནེ་ན ནཱ་སི་ཏ་སཱི་ལཱ་དི་གུ་ཎ་ཏཱ་ཡ ཁཱ་དི་ཏ་དྷ་མྨ་ས་རཱི་རོ ཝི་བྦྷ་མ་ཏི, ཏ་སྨཱ ཨོ་ད་རི་ཀ་ཏྟཾ ‘‘ཀུ་མྦྷཱི་ལ་བྷ་ཡ’’ནྟི ཝུ་ཏྟཾ.
ཨ་ནུ་པ་ཊྛི་ཏཱ་ཡ ས་ཏི་ཡཱཏི ཀཱ་ཡ་ག་ཏཾ ས་ཏིཾ ཨ་ནུ་ཊྛཱ་པེ་ཏྭཱ. ཨ་སཾ་ཝུ་ཏེ་ཧཱིཏི ཨ་པི་ཧི་ཏེ་ཧི. པ་ཉྩ་ནྣེ་ཏཾ ཀཱ་མ་གུ་ཎཱ་ནཾ ཨ་དྷི་ཝ་ཙ་ནནྟི ཡ་ཐཱ ཧི བཱ་ཧི་རཾ ཨུ་ད་ཀཾ ཨོ་ཏི་ཎྞོ ཨཱ་ཝ་ཊྚེ ནི་མུ་ཛྫི་ཏྭཱ མ་ར་ཏི, ཨེ་ཝཾ ཨི་མ་སྨིཾ སཱ་ས་ནེ པ་བྦ་ཛི་ཏོ པ་ཉྩ་ཀཱ་མ་གུ་ཎཱ་ཝ་ཊྚེ ནི་མུ་ཛྫི་ཏྭཱ ཝི་བྦྷ་མ་ཏི. ཀཱ་མ་རཱ་གཱ་བྷི་བྷཱུ་ཏོ ཧི ས་ཏྟོ ཨི་ཏོ ཙ ཨེ་ཏྟོ, ཨེ་ཏྟོ ཙ ཨི་ཏོ་ཏི ཨེ་ཝཾ མ་ནཱ་པི་ཡ་རཱུ་པཱ་དི་ཝི་ས་ཡ་ས་ངྑཱ་ཏེ ཨཱ་ཝ་ཊྚེ ཨ་ཏྟཱ་ནཾ སཾ་སཱ་རེ་ཏྭཱ ཡ་ཐཱ ཏ་ཏོ བ་ཧི་བྷཱུ་ཏེ ནེ་ཀྑ་མྨེ ཙི་ཏྟ་མྤི ན ཨུ་པྤཱ་དེ་ཏི, ཨེ་ཝཾ ཨཱ་ཝ་ཊྚེ་ཏྭཱ བྱ་ས་ནཱ་པཱ་ད་ནེ་ན ཀཱ་མ་གུ་ཎཱ་ནཾ ཨཱ་ཝ་ཊྚ་ས་དི་ས་ཏཱ ད་ཊྛ་བྦཱ.
ཨ་ནུ་དྡྷཾ་སེ་ཏཱིཏི ཀི་ལ་མེ་ཏི ཝི་ལོ་ལ་ཏི. རཱ་གཱ་ནུ་དྡྷཾ་སི་ཏེ་ནཱཏི རཱ་གེ་ན ཨ་ནུ་དྡྷཾ་སི་ཏེ་ན. མཱ་ཏུ་གཱ་མ་སྶེ་ཏཾ ཨ་དྷི་ཝ་ཙ་ནནྟི. ཡ་ཐཱ ཧི བཱ་ཧི་རཾ ཨུ་ད་ཀཾ ཨོ་ཏི་ཎྞོ ཙ་ཎྜ་མ་ཙྪཾ ཨཱ་ག་མྨ ལ་དྡྷ་པྤ་ཧཱ་རོ མ་ར་ཏི, ཨེ་ཝཾ ཨི་མ་སྨིཾ སཱ་ས་ནེ མཱ་ཏུ་གཱ་མཾ ཨཱ་ར་བྦྷ ཨུ་པྤ་ནྣ་ཀཱ་མ་རཱ་གོ ཝི་བྦྷ་མ་ཏི, ཏ་སྨཱ མཱ་ཏུ་གཱ་མོ ‘‘སུ་སུ་ཀཱ་བྷ་ཡ’’ནྟི ཝུ་ཏྟོ. མཱ་ཏུ་གཱ་མོ ཧི ཡོ་ནི་སོ་མ་ན་སི་ཀཱ་ར་ར་ཧི་ཏཾ ཨ་དྷཱི་ར་པུ་རི་སཾ ཨི་ཏྠི་ཀུ་ཏྟ་བྷཱུ་ཏེ་ཧི ཨ་ཏྟ་ནོ ཧཱ་ས་བྷཱ་ཝ་ཝི་ལཱ་སེ་ཧི ཨ་བྷི་བྷུ་ཡྻ ག་ཧེ་ཏྭཱ དྷཱི་ར་ཛཱ་ཏི་ཀ་མྤི ཨ་ཏྟ་ནོ རཱུ་པཱ་དཱི་ཧི ས་མྤ་ལོ་བྷ་ན་ཝ་སེ་ན ཨ་ན་ཝ་སེ་སཾ ཨ་ཏྟ་ནོ ཨུ་པ་ཀཱ་ར་དྷ་མྨེ སཱི་ལཱ་དི་ཀེ ས་མྤཱ་དེ་ཏུཾ ཨ་ས་མ་ཏྠཾ ཀ་རོ་ནྟོ ཨ་ན་ཡ་བྱ་ས་ནཾ པཱ་པེ་ཏི.
ཨི་མཱ་ནི པ་ན ཙ་ཏྟཱ་རི བྷ་ཡཱ་ནི བྷཱ་ཡི་ཏྭཱ ཡ་ཐཱ ཨུ་ད་ཀཾ ཨ་ནོ་རོ་ཧ་ནྟ་སྶ ཨུ་ད་ཀཾ ནི་སྶཱ་ཡ ཨུ་ད་ཀ་པི་པཱ་སཱ་ཝི་ན་ཡ་ནཾ ས་རཱི་ར་སུ་དྡྷི་པ་རི་ལཱ༹་ཧཱུ་པ་ས་མོ ཀཱ་ཡ་ཨུ་ཏུ་གྒཱ་ཧཱ་པ་ན་ནྟི, ཨེ་ཝ་མཱ་དི ཨཱ་ནི་སཾ་སོ ན་ཏྠི, ཨེ་ཝ་མེ་ཝཾ ཨི་མཱ་ནི ཙ་ཏྟཱ་རི བྷ་ཡཱ་ནི བྷཱ་ཡི་ཏྭཱ སཱ་ས་ནེ ཨ་པ་བྦ་ཛ་ནྟ་སྶ་པི ཨི་མཾ སཱ་ས་ནཾ ནི་སྶཱ་ཡ ས་ངྑེ་པ་ཏོ ཝ་ཊྚ་དུ་ཀྑཱུ་པ་ས་མོ, ཝི་ཏྠཱ་ར་ཏོ པ་ན སཱི་ལཱ་ནི་སཾ་སཱ་དི་ཝ་སེ་ན ཨ་ནེ་ཀ་ཝི་དྷོ ཨཱ་ནི་སཾ་སོ ན་ཏྠི. ཡ་ཐཱ པ་ན ཨི་མཱ་ནི ཙ་ཏྟཱ་རི བྷ་ཡཱ་ནི ཨ་བྷཱ་ཡི་ཏྭཱ ཨུ་ད་ཀཾ ཨོ་རོ་ཧ་ནྟ་སྶ ཝུ་ཏྟ་པྤ་ཀཱ་རོ ཨཱ་ནི་སཾ་སོ ཧོ་ཏི, ཨེ་ཝཾ ཨི་མཱ་ནི ཨ་བྷཱ་ཡི་ཏྭཱ སཱ་ས་ནེ པ་བྦ་ཛ་ནྟ་སྶ་པི ཝུ་ཏྟ་པྤ་ཀཱ་རོ ཨཱ་ནི་སཾ་སོ ཧོ་ཏི. མ་ཧཱ་དྷ་མྨ་ར་ཀྑི་ཏ་ཏྠེ་རོ པ་ནཱ་ཧ ‘‘ཙ་ཏྟཱ་རི བྷ་ཡཱ་ནི བྷཱ་ཡི་ཏྭཱ ཨུ་ད་ཀཾ ཨ་ནོ་ཏ་ར་ནྟོ སོ་ཏཾ ཚི་ནྡི་ཏྭཱ པ་ར་ཏཱི་རཾ པཱ་པུ་ཎི་ཏུཾ ན ས་ཀྐོ་ཏི, ཨ་བྷཱ་ཡི་ཏྭཱ ཨོ་ཏ་ར་ནྟོ ས་ཀྐོ་ཏི, ཨེ་ཝ་མེ་ཝཾ བྷཱ་ཡི་ཏྭཱ སཱ་ས་ནེ ཨ་པ་བྦ་ཛ་ནྟོ་པི ཏ་ཎྷཱ་སོ་ཏཾ ཚི་ནྡི་ཏྭཱ ནི་བྦཱ་ན་པཱ་རཾ ད་ཊྛུཾ ན ས་ཀྐོ་ཏི, ཨ་བྷཱ་ཡི་ཏྭཱ པ་བྦ་ཛ་ནྟོ ས་ཀྐོ་ཏཱི’’ཏི.
ཨཱུ་མི་བྷ་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༣. པ་ཋ་མ་ནཱ་ནཱ་ཀ་ར་ཎ་སུ་ཏྟ་ཝ་ཎྞ་ནཱ
༡༢༣. ཏ་ཏི་ཡེ བྲ་ཧྨ་ཀཱ་ཡི་ཀཱ་ནཾ དེ་ཝཱ་ནནྟི ཨེ་ཏྠ བྲ་ཧྨཱ་ནཾ ཀཱ་ཡོ ས་མཱུ་ཧོ་ཏི བྲ་ཧྨ་ཀཱ་ཡོ, ཏ་པྤ་རི་ཡཱ་པ་ནྣ་ཏཱ་ཡ ཏ་ཏྠ ག་ཏཱ་ཏི བྲ་ཧྨ་ཀཱ་ཡི་ཀཱ. ཨེ་ཏཱ་ཡ ཙ ས་བྦ་སྶ་པི བྲ་ཧྨ་ཀཱ་ཡ་སྶ ས་མ་ཉྙཱ་ཡ བྷ་ཝི་ཏ་བྦཾ. ཨཱ་བྷ་སྶ་རཱ་ནཾ དེ་ཝཱ་ནནྟི་ཨཱ་དི་ནཱ པ་ན དུ་ཏི་ཡ་ཛ྄ཛྷཱ་ན་བྷཱུ་མི་ཀཱ་དཱི་ནཾ ཨུ་པ་རི ག་ཧི་ཏ་ཏྟཱ གོ་བ་ལཱི་བ་དྡ་ཉྙཱ་ཡེ་ན ཏ་ད་ཝ་སི་ཊྛཱ་ནཾ ཨ་ཡཾ ས་མ་ཉྙཱ, ཏ་སྨཱ ‘‘བྲ་ཧྨ་ཀཱ་ཡི་ཀཱ་ནཾ དེ་ཝཱ་ན’’ནྟི པ་ཋ་མ་ཛ྄ཛྷཱ་ན་བྷཱུ་མི་ཀཱ་ནཾ་ཡེ་ཝ ག་ཧ་ཎཾ ཝེ་དི་ཏ་བྦཾ. ས་ཧ བྱ་ཡ་ཏི ག་ཙྪ་ཏཱི་ཏི ས་ཧ་བྱོ, ས་ཧ་ཝ་ཏྟ་ན་ཀོ. ཏ་སྶ བྷཱ་ཝོ ས་ཧ་བྱ་ཏཱ, ས་ཧ་པ་ཝ་ཏྟཱི་ཏི ཨཱ་ཧ ‘‘ས་ཧ་བྷཱ་ཝཾ ཨུ་པ་ག་ཙྪ་ཏཱི’’ཏི. ཀ་པྤོ ཨཱ་ཡུ་པྤ་མཱ་ཎནྟི ཨེ་ཏྠ ཡ་དི་པི བྲ་ཧྨ་པཱ་རི་ས་ཛྫཱ་དཱི་ནཾ ཨཱ་ཡུ་ནོ ཨ་ནྟ་རཾ ཨ་ཏྠི, ཨུ་ཀྐ་ཊྛ་པ་རི་ཙྪེ་དེ་ན པ་ནེ་ཏཾ ཝུ་ཏྟ་ནྟི ད་སྶེ་ནྟོ ‘‘པ་ཋ་མ་ཛ྄ཛྷཱ་ནཾ ཨ་ཏྠི ཧཱི་ན’’ནྟི་ཨཱ་དི་མཱ་ཧ.
དྭེ ཀ་པྤཱ ཨཱ་ཡུ་པྤ་མཱ་ཎནྟི ཨེ་ཏྠ པ་ན ཧཱི་ན་ཛ྄ཛྷཱ་ནེ་ན ནི་བྦ་ཏྟཱ་ནཾ ཝ་སེ་ན ཨ་ཡཾ པ་རི་ཙྪེ་དོ ཀ་ཏོ་ཏི ད་སྶེ་ཏུཾ ‘‘དུ་ཏི་ཡ་ཛ྄ཛྷཱ་ནཾ ཝུ་ཏྟ་ན་ཡེ་ནེ་ཝ ཏི་ཝི་དྷཾ ཧོ་ཏཱི’’ཏི་ཨཱ་དི ཨཱ་ར་དྡྷཾ. ཙ་ཏྟཱ་རོ ཀ་པྤཱཏི ཨེ་ཏྠ པ་ན ཨུ་ཀྐ་ཊྛ་པ་རི་ཙྪེ་དེ་ན ཙ་ཏུ་ས་ཊྛི ཀ་པྤཱ ཝ་ཏྟ་བྦཱ་ཏི ད་སྶེ་ནྟོ ‘‘ཡཾ ཧེ་ཊྛཱ ཝུ་ཏྟཾ ‘ཀ་པྤོ དྭེ ཀ་པྤཱ’ཏི, ཀ་མྤི ཨཱ་ཧ་རི་ཏྭཱ ཨ་ཏྠོ ཝེ་དི་ཏ་བྦོ’’ཏི ཨཱ་ཧ. ཀ་ཐཾ པ་ནེ་ཏྠ ཨ་ཡ་མ་ཏྠོ ལ་བྦྷ་ཏཱི་ཏི ཨཱ་ཧ ‘‘ཀ་པྤོ་ཏི ཙ གུ་ཎ་སྶ་པི ནཱ་མ’’ནྟི. ཏ་ཏྠ པ་ཋ་མཾ ཝུ་ཏྟོ ཀ་པྤོ, ཏ་ཏོ ཨེ་ཀེ་ན གུ་ཎེ་ན, ཨེ་ཀ་སྨིཾ ཝཱ་རེ ག་ཎ་ནཱ་ཡཱ་ཏི ཨ་ཏྠོ. དྭེ ཀ་པྤཱ ཧོ་ནྟཱིཏི ཨེ་ཀ་ཝཱ་ར་ག་ཎ་ནཱ་ཡ ཀ་པྤ་སྶ དྭི་གུ་ཎི་ཏ་ཏྟཱ དྭེ མ་ཧཱ་ཀ་པྤཱ ཧོ་ནྟཱི་ཏི ཨ་ཏྠོ. དུ་ཏི་ཡེ་ནཱཏི དུ་ཏི་ཡ་ཝཱ་ར་ག་ཎ་ནཱ་ཡ. ཙ་ཏྟཱ་རོཏི དུ་ཏི་ཡ་ཝཱ་ར་ག་ཎ་ནཱ་ཡ དྭཱི་སུ ཀ་པྤེ་སུ དྭི་གུ་ཎི་ཏེ་སུ ཙ་ཏྟཱ་རོ མ་ཧཱ་ཀ་པྤཱ ཧོ་ནྟཱི་ཏི ཨ་ཏྠོ. པུ་ན ཏེ ཙ་ཏྟཱ་རོ ཀ་པྤཱཏི ཝུ་ཏྟ་ན་ཡེ་ན དྭེ ཝཱ་རེ གུ་ཎེ་ཏྭཱ ཡེ ཙ་ཏྟཱ་རོ ཀ་པྤཱ ད་སྶི་ཏཱ, པུ་ན ཏེ ཙ་ཏྟཱ་རོ ཀ་པྤཱ ཙ་ཏུ་གྒུ་ཎཱ ཧོ་ནྟཱི་ཏི ཨ་ཏྠོ. ཨི་དཾ ཝུ་ཏྟཾ ཧོ་ཏི – དྭེ ཝཱ་རེ གུ་ཎེ་ཏྭཱ ཡེ ཙ་ཏྟཱ་རོ ཀ་པྤཱ ད་སྶི་ཏཱ, ཏེ་སུ ཙ་ཏུ་ཀྑ་ཏྟུཾ གུ་ཎི་ཏེ་སུ ཙ་ཏུ་ས་ཊྛི ཀ་པྤཱ ས་མྤ་ཛྫ་ནྟཱི་ཏི. ཏ་ཐཱ ཧི ཙ་ཏྟཱ་རོ ཨེ་ཀ་སྨིཾ ཝཱ་རེ གུ་ཎི་ཏཱ ཨ་ཊྛ ཧོ་ནྟི, པུ་ན ཏེ ཨ་ཊྛ དུ་ཏི་ཡ་ཝཱ་རེ གུ་ཎི་ཏཱ སོ་ལ༹་ས ཧོ་ནྟི, པུ་ན ཏེ སོ་ལ༹་ས ཏ་ཏི་ཡ་ཝཱ་རེ གུ་ཎི་ཏཱ དྭ་ཏྟིཾ་ས ཧོ་ནྟི, པུ་ན ཏེ དྭ་ཏྟིཾ་ས ཙ་ཏུ་ཏྠ་ཝཱ་རེ གུ་ཎི་ཏཱ ཙ་ཏུ་ས་ཊྛི ཧོ་ནྟི. ཏེ་ནེ་ཝཱ་ཧ ‘‘ཨི་མེ་ཧི ཙ་ཏཱུ་ཧི གུ་ཎེ་ཧི གུ་ཎི་ཏཱ ཨེ་ཀེ་ན གུ་ཎེ་ན ཨ་ཊྛ ཧོ་ནྟཱི’’ཏི་ཨཱ་དི. ཨེ་ཏྠ ཙ ཧེ་ཊྛཱ ཨུ་པོ་ས་ཐ་སུ་ཏྟེ (ཨ. ནི. ༣.༧༡) –
‘‘ཡཱ་ནི མཱ་ནུ་ས་ཀཱ་ནི པ་ཉྙཱ་ས ཝ་སྶཱ་ནི, ཙཱ་ཏུ་མ་ཧཱ་རཱ་ཛི་ཀཱ་ནཾ དེ་ཝཱ་ནཾ ཨེ་སོ ཨེ་ཀོ ར་ཏྟི་ནྡི་ཝོ’’ཏི –
ཨཱ་དི་ནཱ ཀཱ་མཱ་ཝ་ཙ་ར་དེ་ཝཱ་ན་མེ་ཝ ཨཱ་ཡུ་པྤ་མཱ་ཎཾ ད་སྶི་ཏཾ. ཧེ་ཊྛཱ་ཡེ་ཝ –
‘‘ཏ་ཡོ་མེ, བྷི་ཀྑ་ཝེ, པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ཏ་ཡོ? ཨི་དྷ, བྷི་ཀྑ་ཝེ, ཨེ་ཀ་ཙྩོ པུ་གྒ་ལོ ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ…པེ… ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫ་ཏི. ཨཱ་ཀཱ་སཱ་ན་ཉྩཱ་ཡ་ཏ་ནཱུ་པ་གཱ་ནཾ, བྷི་ཀྑ་ཝེ, དེ་ཝཱ་ནཾ ཝཱི་ས་ཏི ཀ་པྤ་ས་ཧ་སྶཱ་ནི ཨཱ་ཡུ་པྤ་མཱ་ཎ’’ནྟི (ཨ. ནི. ༣.༡༡༧) –
ཨཱ་དི་ནཱ ཨ་རཱུ་པཱ་ཝ་ཙ་རཱ་ནཾ་ཡེ་ཝ ཨཱ་ཡུ་པྤ་མཱ་ཎཾ ཝུ་ཏྟཾ. ཨི་དྷ པ་ན རཱུ་པཱ་ཝ་ཙ་རཱ་ན་མེ་ཝ ཨཱ་ཡུ་པྤ་མཱ་ཎཾ ད་སྶི་ཏཾ. ཝི་བྷ་ངྒ་པཱ་ལི༹་ཡཾ (ཝི་བྷ. ༡༠༢༢) པ་ན ‘‘མ་ནུ་སྶཱ་ནཾ ཀི་ཏྟ་ཀཾ ཨཱ་ཡུ་པྤ་མཱ་ཎཾ, ཝ་སྶ་ས་ཏཾ ཨ་པྤཾ ཝཱ བྷི་ཡྻོ’’ཏི་ཨཱ་དི་ནཱ དེ་ཝ་མ་ནུ་སྶཱ་ན་ཉྩེ་ཝ རཱུ་པཱ་རཱུ་པཱ་ཝ་ཙ་ར་ས་ཏྟཱ་ན་ཉྩ ཨཱ་ཡུ་པྤ་མཱ་ཎཾ ད་སྶི་ཏཾ.
ཏ་ཏྠ ས་མྨཱ་ས་མྦུ་དྡྷེ་ན མ་ནུ་སྶཱ་ནཾ དེ་ཝཱ་ན་ཉྩ ཨཱ་ཡུཾ པ་རི་ཙྪི་ནྡ་མཱ་ནེ་ན ཙ་ཏཱུ་སུ ཨ་པཱ་ཡེ་སུ བྷུ་མྨ་དེ་ཝེ་སུ ཙ ཨཱ་ཡུ ན པ་རི་ཙྪི་ནྣཾ. ཏཾ ཀ་སྨཱ་ཏི? ནི་ར་ཡེ ཏཱ་ཝ ཀ་མྨ་མེ་ཝ པ་མཱ་ཎཾ. ཡཱ་ཝ ཀ་མྨཾ ན ཁཱི་ཡ་ཏི, ཏཱ་ཝ པ་ཙྩ་ནྟི. ཏ་ཐཱ སེ་ས་ཨ་པཱ་ཡེ་སུ. བྷུ་མྨ་དེ་ཝཱ་ན་མྤི ཀ་མྨ་མེ་ཝ པ་མཱ་ཎཾ. ཏ་ཏྠ ནི་བྦ་ཏྟཱ ཧི ཀེ་ཙི ས་ཏྟཱ་ཧ་མ་ཏྟཾ ཏི་ཊྛ་ནྟི, ཀེ་ཙི ཨ་ཌྜྷ་མཱ་སཾ, ཀ་པྤཾ ཏི་ཊྛ་མཱ་ནཱ་པི ཨ་ཏྠི་ཡེ་ཝ. ཏ་ཏྠ མ་ནུ་སྶེ་སུ གི་ཧི་བྷཱ་ཝེ ཋི་ཏཱ་ཡེ་ཝ སོ་ཏཱ་པ་ནྣཱ་པི ཧོ་ནྟི, ས་ཀ་དཱ་གཱ་མི་ཕ་ལཾ ཨ་ནཱ་གཱ་མི་ཕ་ལཾ ཨ་ར་ཧ་ཏྟ་མྤི པཱ་པུ་ཎ་ནྟི, ཏེ་སུ སོ་ཏཱ་པ་ནྣཱ་ད་ཡོ ཡཱ་ཝ་ཛཱི་ཝཾ ཏི་ཊྛ་ནྟི, ཁཱི་ཎཱ་ས་ཝཱ པ་ན པ་རི་ནི་བྦཱ་ཡ་ནྟི ཝཱ པ་བྦ་ཛ་ནྟི ཝཱ. ཀ་སྨཱ? ཨ་ར་ཧ་ཏྟཾ ནཱ་མ སེ་ཊྛ་གུ་ཎཾ, གི་ཧི་ལི་ངྒཾ ཧཱི་ནཾ, ཏཾ ཧཱི་ན་ཏཱ་ཡ ཨུ་ཏྟ་མཾ གུ་ཎཾ དྷཱ་རེ་ཏུཾ ན ས་ཀྐོ་ཏི, ཏ་སྨཱ ཏེ པ་རི་ནི་བྦཱ་ཏུ་ཀཱ་མཱ ཝཱ ཧོ་ནྟི པ་བྦ་ཛི་ཏུ་ཀཱ་མཱ ཝཱ. བྷུ་མྨ་དེ་ཝཱ པ་ན ཨ་ར་ཧ་ཏྟཾ པ་ཏྟཱ་པི ཡཱ་ཝ་ཛཱི་ཝཾ ཏི་ཊྛ་ནྟི, ཚ་སུ ཀཱ་མཱ་ཝ་ཙ་རེ་སུ དེ་ཝེ་སུ སོ་ཏཱ་པ་ནྣ་ས་ཀ་དཱ་གཱ་མི་ནོ ཡཱ་ཝ་ཛཱི་ཝཾ ཏི་ཊྛ་ནྟི, ཨ་ནཱ་གཱ་མི་ནཱ རཱུ་པ་བྷ་ཝཾ ག་ནྟུཾ ཝ་ཊྚ་ཏི ཁཱི་ཎཱ་ས་ཝེ་ན པ་རི་ནི་བྦཱ་ཏུཾ. ཀ་སྨཱ? ནི་ལཱི་ཡ་ནོ་ཀཱ་ས་སྶ ཨ་བྷཱ་ཝཱ. རཱུ་པཱ་ཝ་ཙ་རཱ་རཱུ་པཱ་ཝ་ཙ་རེ་སུ ས་བྦེ་པི ཡཱ་ཝ་ཛཱི་ཝཾ ཏི་ཊྛ་ནྟི, ཏ་ཏྠ རཱུ་པཱ་ཝ་ཙ་རེ ནི་བྦ་ཏྟཱ སོ་ཏཱ་པ་ནྣ་ས་ཀ་དཱ་གཱ་མི་ནོ ན པུ་ན ཨི་དྷཱ་ག་ཙྪ་ནྟི, ཏ་ཏྠེ་ཝ པ་རི་ནི་བྦཱ་ཡ་ནྟི. ཨེ་ཏེ ཧི ཛྷཱ་ན་ཨ་ནཱ་གཱ་མི་ནོ ནཱ་མ.
ཨ་ཊྛ་ས་མཱ་པ་ཏྟི་ལཱ་བྷཱི་ནཾ པ་ན ཀིཾ ནི་ཡ་མེ་ཏི? པ་གུ་ཎ་ཛ྄ཛྷཱ་ནཾ. ཡ་དེ་ཝ་སྶ པ་གུ་ཎཾ ཧོ་ཏི, ཏེ་ན ཨུ་པ་པ་ཛྫ་ཏི. ས་བྦེ་སུ པ་གུ་ཎེ་སུ ཀིཾ ནི་ཡ་མེ་ཏི? ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་མཱ་པ་ཏྟི. ཨེ་ཀཾ་སེ་ནེ་ཝ ཧི སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནེ ཨུ་པ་པ་ཛྫ་ཏི. ན་ཝ་སུ བྲ་ཧྨ་ལོ་ཀེ་སུ ནི་བྦ་ཏྟ་ཨ་རི་ཡ་སཱ་ཝ་ཀཱ་ནཾ ཏ་ཏྲཱུ་པ་པ་ཏྟི་པི ཨུ་པ་རཱུ་པ་པ་ཏྟི་པི, ན ཧེ་ཊྛཱུ་པ་པ་ཏྟི. པུ་ཐུ་ཛྫ་ནཱ་ནཾ པ་ན ཏ་ཏྲཱུ་པ་པ་ཏྟི་པི ཧོ་ཏི, ཨུ་པ་རཱུ་པ་པ་ཏྟི་པི, ཧེ་ཊྛཱུ་པ་པ་ཏྟི་པི. པ་ཉྩ་སུ སུ་དྡྷཱ་ཝཱ་སེ་སུ ཙ་ཏཱུ་སུ ཙ ཨ་རཱུ་པེ་སུ ཨ་རི་ཡ་སཱ་ཝ་ཀཱ་ནཾ ཏ་ཏྲཱུ་པ་པ་ཏྟི་པི ཧོ་ཏི ཨུ་པ་རཱུ་པ་པ་ཏྟི་པི. པ་ཋ་མ་ཛ྄ཛྷཱ་ན་བྷཱུ་མི་ཡཾ ནི་བྦ་ཏྟོ ཨ་ནཱ་གཱ་མཱི ན་ཝ བྲ་ཧྨ་ལོ་ཀེ སོ་དྷེ་ཏྭཱ མ་ཏྠ་ཀེ ཋི་ཏོ པ་རི་ནི་བྦཱ་ཏི. ཝེ་ཧ་པྥ་ལཾ, ཨ་ཀ་ནི་ཊྛཾ, ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ནྟི ཨི་མེ ཏ་ཡོ དེ་ཝ་ལོ་ཀཱ སེ་ཊྛ་བྷ་ཝཱ ནཱ་མ. ཨི་མེ་སུ ཏཱི་སུ ཋཱ་ནེ་སུ ནི་བྦ་ཏྟ་ཨ་ནཱ་གཱ་མི་ནོ ནེ་ཝ ཨུ་དྡྷཾ ག་ཙྪ་ནྟི, ན ཨ་དྷོ, ཏ་ཏྠ ཏ་ཏྠེ་ཝ པ་རི་ནི་བྦཱ་ཡ་ནྟཱི་ཏི ཨི་དཾ པ་ཀི་ཎྞ་ཀཾ ཝེ་དི་ཏ་བྦཾ.
པ་ཋ་མ་ནཱ་ནཱ་ཀ་ར་ཎ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༤-༦. དུ་ཏི་ཡ་ནཱ་ནཱ་ཀ་ར་ཎ་སུ་ཏྟཱ་དི་ཝ་ཎྞ་ནཱ
༡༢༤-༦. ཙ་ཏུ་ཏྠེ ཏེ དྷ་མྨེཏི ཏེ ‘‘རཱུ་པ་ག་ཏ’’ནྟི་ཨཱ་དི་ནཱ ན་ཡེ་ན ཝུ་ཏྟེ རཱུ་པཱ་ད་ཡོ དྷ་མྨེ. ཨ་ནི་ཙྩ་ཏོཏི ཨི་མི་ནཱ ནི་ཙྩ་པྤ་ཊི་ཀྑེ་པ་ཏོ ཏེ་སཾ ཨ་ནི་ཙྩ་ཏ་མཱ་ཧ, ཏ་ཏོ ཨེ་ཝ ཙ ཨུ་ད་ཡ་ཝ་ཡ་ཝ་ནྟ་ཏོ ཝི་པ་རི་ཎཱ་མ་ཏོ ཏཱ་ཝ་ཀཱ་ལི་ཀ་ཏོ ཙ ཏེ ཨ་ནི་ཙྩཱ་ཏི ཛོ་ཏི་ཏཾ ཧོ་ཏི. ཡ་ཉྷི ནི་བྦ་ཏྟཾ ཧོ་ཏི, ཏཾ ཨུ་ད་ཡ་ཝ་ཡ་པ་རི་ཙྪི་ནྣཾ. ཛ་རཱ་ཡ མ་ར་ཎེ་ན ཙ ཏ་དེ་ཝ ཝི་པ་རཱི་ཏཾ, ཨི་ཏྟ་ར་ཀྑ་ཎ་མེ་ཝ ཙ ཧོ་ཏཱི་ཏི. དུ་ཀྑ་ཏོཏི ཨི་མི་ནཱ སུ་ཁ་པྤ་ཊི་ཀྑེ་པ་ཏོ ཏེ་སཾ དུ་ཀྑ་ཏ་མཱ་ཧ. ཏ་ཏོ ཨེ་ཝ ཙ ཨ་བྷི་ཎྷ་པྤ་ཊི་པཱི་ལ༹་ན་ཏོ དུ་ཀྑ་ཝ་ཏྠུ་ཏོ ཙ ཏེ དུ་ཀྑཱ་ཏི ཛོ་ཏི་ཏཾ ཧོ་ཏི. ཨུ་ད་ཡ་ཝ་ཡ་ཝ་ནྟ་ཏཱ་ཡ ཧི ཏེ ཨ་བྷི་ཎྷ་པྤ་ཊི་པཱི་ལ༹་ན་ཏོ ནི་ར་ནྟ་ར་དུ་ཀྑ་ཏཱ་ཡ དུ་ཀྑ་སྶེ་ཝ ཙ ཨ་དྷི་ཊྛཱ་ན་བྷཱུ་ཏཱ. པ་ཙྩ་ཡ་ཡཱ་པ་ནཱི་ཡ་ཏཱ་ཡ རོ་ག་མཱུ་ལ་ཏཱ་ཡ ཙ རོ་ག་ཏོ. དུ་ཀྑ་ཏཱ་སཱུ་ལ་ཡོ་ག་ཏོ ཀི་ལེ་སཱ་སུ་ཙི་པ་གྒྷ་ར་ཎ་ཏོ ཨུ་པྤཱ་ད་ཛ་རཱ་བྷ་ངྒེ་ཧི ཨུ་དྡྷུ་མཱ་ཏ་པ་རི་པ་ཀྐ་པ་བྷི་ནྣ་ཏོ ཙ ག་ཎྜ་ཏོ. པཱི་ལཱ༹་ཛ་ན་ན་ཏོ, ཨ་ནྟོ་ཏུ་ད་ན་ཏོ, དུ་ནྣཱི་ཧ་ར་ཎ་ཏོ ཙ ས་ལླ་ཏོ. ཨ་ཝ་ཌྜྷི་ཨཱ་ཝ་ཧ་ན་ཏོ ཨ་གྷ་ཝ་ཏྠུ་ཏོ ཙ ཨ་གྷ་ཏོ. ཨ་སེ་རི་བྷཱ་ཝ་ཛ་ན་ན་ཏོ ཨཱ་བཱ་དྷ་པ་ད་ཊྛཱ་ན་ཏཱ་ཡ ཙ ཨཱ་བཱ་དྷ་ཏོ. ཨ་ཝ་ས་ཝ་ཏྟ་ན་ཏོ ཨ་ཝི་དྷེ་ཡྻ་ཏཱ་ཡ ཙ པ་ར་ཏོ. བྱཱ་དྷི་ཛ་རཱ་མ་ར་ཎེ་ཧི པ་ལུ་ཛྫ་ནཱི་ཡ་ཏཱ་ཡ པ་ལོ་ཀ་ཏོ. སཱ་མི་ནི་ཝཱ་སི་ཀཱ་ར་ཀ་ཝེ་ད་ཀ་ཨ་དྷི་ཊྛཱ་ཡ་ཀ་ཝི་ར་ཧ་ཏོ སུ་ཉྙ་ཏོ. ཨ་ཏྟ་པྤ་ཊི་ཀྑེ་པ་ཊྛེ་ན ཨ་ན་ཏྟ་ཏོ. རཱུ་པཱ་དི་དྷ་མྨཱ ཧི ན ཨེ་ཏྠ ཨ་ཏྟཱ ཨ་ཏྠཱི་ཏི ཨ་ན་ཏྟཱ. ཨེ་ཝཾ ས་ཡ་མྤི ཨ་ཏྟཱ ན ཧོ་ནྟཱི་ཏི ཨ་ན་ཏྟཱ. ཏེ་ན ཨ་བྱཱ་པཱ་ར་ཏོ ནི་རཱི་ཧ་ཏོ ཏུ་ཙྪ་ཏོ ཨ་ན་ཏྟཱ་ཏི དཱི་པི་ཏཾ ཧོ་ཏི. ལ་ཀྑ་ཎ་ཏྟ་ཡ་མེ་ཝ སུ་ཁཱ་ཝ་བོ་དྷ་ན་ཏྠཾ ཨེ་ཀཱ་ད་ས་ཧི པ་དེ་ཧི ཝི་བྷ་ཛི་ཏྭཱ ག་ཧི་ཏ་ནྟི ད་སྶེ་ཏུཾ ‘‘ཏ་ཏྠཱ’’ཏི་ཨཱ་དི ཝུ་ཏྟཾ. པ་ཉྩ་མ་ཚ་ཊྛཱ་ནི ཨུ་ཏྟཱ་ན་ཏྠཱ་ནེ་ཝ.
དུ་ཏི་ཡ་ནཱ་ནཱ་ཀ་ར་ཎ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
༧. པ་ཋ་མ་ཏ་ཐཱ་ག་ཏ་ཨ་ཙྪ་རི་ཡ་སུ་ཏྟ་ཝ་ཎྞ་ནཱ
༡༢༧. ས་ཏྟ་མེ ཝ་ཏྟ་མཱ་ན་ས་མཱི་པེ ཝ་ཏྟ་མཱ་ནེ ཝི་ཡ ཝོ་ཧ་རི་ཏ་བྦ་ནྟི ‘‘ཨོ་ཀྐ་མ་ཏཱི’’ཏི ཨཱ་ཧ ‘‘ཨོ་ཀྐ་ནྟོ ཧོ་ཏཱི་ཏི ཨ་ཏྠོ’’ཏི. ད་ས་ས་ཧ་སྶ་ཙ་ཀྐ་ཝཱ་ལ༹་པ་ཏྠ་ར་ཎོ ས་མུ་ཛྫ་ལ་བྷཱ་ཝེ་ན ཨུ་ལཱ༹་རོ. དེ་ཝཱ་ནུ་བྷཱ་ཝནྟི དེ་ཝཱ་ནཾ པ་བྷཱ་ནུ་བྷཱ་ཝཾ. དེ་ཝཱ་ན་ཉྷི པ་བྷཾ སོ ཨོ་བྷཱ་སོ ཨ་དྷི་བྷ་ཝ་ཏི, ན དེ་ཝེ. ཏེ་ནཱ་ཧ ‘‘དེ་ཝཱ་ན’’ནྟི་ཨཱ་དི. རུ་ཀྑ་ག་ཙྪཱ་དི་ནཱ ཀེ་ན་ཙི ན ཧ་ཉྙ་ཏཱི་ཏི ཨ་གྷཱ, ཨ་ས་མྦཱ་དྷཱ. ཏེ་ནཱ་ཧ ‘‘ནི་ཙྩ་ཝི་ཝ་རཱ’’ཏི. ཨ་སཾ་ཝུ་ཏཱཏི ཧེ་ཊྛཱ ཨུ་པ་རི ཀེ་ན་ཙི ཨ་པི་ཧི་ཏཱ. ཏེ་ནཱ་ཧ ‘‘ཧེ་ཊྛཱ་པི ཨ་པྤ་ཏི་ཊྛཱ’’ཏི. ཏ་ཏྠ པི-ས་དྡེ་ན ཡ་ཐཱ ཧེ་ཊྛཱ ཨུ་ད་ཀ་སྶ པི་དྷཱ་ཡི་ཀཱ ས་ནྡྷཱ་རི་ཀཱ པ་ཐ་ཝཱི ན་ཏྠི ཨ་སཾ་ཝུ་ཏཱ ལོ་ཀ་ནྟ་རི་ཀཱ, ཨེ་ཝཾ ཨུ་པ་རི་པི ཙ་ཀྐ་ཝཱ་ལེ༹་སུ དེ་ཝ་ཝི་མཱ་ནཱ་ནཾ ཨ་བྷཱ་ཝ་ཏོ ཨ་སཾ་ཝུ་ཏཱ ཨ་པྤ་ཏི་ཊྛཱ་ཏི ད་སྶེ་ཏི. ཨ་ནྡྷ་ཀཱ་རོ ཨེ་ཏྠ ཨ་ཏྠཱི་ཏི ཨ་ནྡྷ་ཀཱ་རཱ. ཙ་ཀྑུ་ཝི་ཉྙཱ་ཎཾ ན ཛཱ་ཡ་ཏི ཨཱ་ལོ་ཀ་སྶ ཨ་བྷཱ་ཝ་ཏོ, ན ཙ་ཀྑུ་ནོ. ཏ་ཐཱ ཧི ‘‘ཏེ་ནོ་བྷཱ་སེ་ན ཨ་ཉྙ་མ་ཉྙཾ ས་ཉྫཱ་ན་ནྟཱི’’ཏི ཝུ་ཏྟཾ. ཛ་མྦུ་དཱི་པེ ཋི་ཏ་མ་ཛ྄ཛྷ་ནྷི་ཀ་ཝེ་ལཱ་ཡ པུ་བྦ་ཝི་དེ་ཧ་ཝཱ་སཱི་ནཾ ཨ་ཏྠ་ངྒ་མ་ཝ་སེ་ན ཨུ་པ་ཌྜྷཾ སཱུ་རི་ཡ་མ་ཎྜ་ལཾ པ་ཉྙཱ་ཡ་ཏི, ཨ་པ་ར་གོ་ཡཱ་ན་ཝཱ་སཱི་ནཾ ཨུ་གྒ་མ་ན་ཝ་སེ་ན. ཨེ་ཝཾ སེ་ས་དཱི་པེ་སུ་པཱི་ཏི ཨཱ་ཧ ‘‘ཨེ་ཀ་པྤ་ཧཱ་རེ་ནེ་ཝ ཏཱི་སུ དཱི་པེ་སུ པ་ཉྙཱ་ཡ་ནྟཱི’’ཏི. ཨི་ཏོ ཨ་ཉྙ་ཐཱ དྭཱི་སུ ཨེ་ཝ དཱི་པེ་སུ པ་ཉྙཱ་ཡ་ནྟི. ཨེ་ཀེ་ཀཱ་ཡ དི་སཱ་ཡ ན་ཝ་ན་ཝ་ཡོ་ཛ་ན་ས་ཏ་ས་ཧ་སྶཱ་ནི ཨ་ནྡྷ་ཀཱ་ར་ཝི་དྷ་མ་ན་མྤི ཨི་མི་ནཱ་ཝ ན་ཡེ་ན ད་ཊྛ་བྦཾ. པ་བྷཱ་ཡ ན་པྤ་ཧོ་ནྟཱིཏི ཨ་ཏྟ་ནོ པ་བྷཱ་ཡ ཨོ་བྷཱ་སི་ཏུཾ ནཱ་བྷི་ས་མྦྷུ་ཎ་ནྟི. ཡུ་ག་ནྡྷ་ར་པ་བྦ་ཏ་མ་ཏྠ་ཀ་ས་མ་པྤ་མཱ་ཎེ ཨཱ་ཀཱ་སེ ཝི་ཙ་ར་ཎ་ཏོ ‘‘ཙ་ཀྐ་ཝཱ་ལ༹་པ་བྦ་ཏ་སྶ ཝེ་མ་ཛ྄ཛྷེ་ན ཙ་ར་ནྟཱི’’ཏི ཝུ་ཏྟཾ.
བྱཱ་ཝ་ཊཱཏི ཁཱ་ད་ན་ཏྠཾ ག་ཎྷི་ཏུཾ ཨུ་པ་ཀྐ་མ་ནྟཱ. ཝི་པ་རི་ཝ་ཏྟི་ཏྭཱཏི ཝི་ཝ་ཊྚི་ཏྭཱ. ཚི་ཛྫི་ཏྭཱཏི མུ་ཙྪཱ་པ་ཝ་ཏྟི་ཡཱ ཋི་ཏ་ཊྛཱ་ན་ཏོ མུ་ཙྩི་ཏྭཱ, ཨ་ངྒ་པ་ཙྩ་ངྒ་ཚེ་ད་ན་ཝ་སེ་ན ཝཱ ཚི་ཛྫི་ཏྭཱ. ཨ་ཙྩ་ནྟ་ཁཱ་རེཏི ཨཱ་ཏ་པ་ས་ནྟ་པཱ་བྷཱ་ཝེ་ན ཨ་ཏི་སཱི་ཏ་བྷཱ་ཝཾ ས་ནྡྷཱ་ཡ ཨ་ཙྩ་ནྟ་ཁཱ་ར་ཏཱ ཝུ་ཏྟཱ སི་ཡཱ. ན ཧི ཏཾ ཀ་པྤ་ས་ཎྛཱ་ན་ཨུ་ད་ཀཾ ས་མྤ་ཏྟི་ཀ་ར་མ་ཧཱ་མེ་གྷ་ཝུ་ཊྛཾ པ་ཐ་ཝི་ས་ནྡྷཱ་ར་ཀཾ ཀ་པྤ་ཝི་ནཱ་ས་ཀ་ཨུ་ད་ཀཾ ཝི་ཡ ཁཱ་རཾ བྷ་ཝི་ཏུ་མ་ར་ཧ་ཏི, ཏ་ཐཱ ས་ཏི པ་ཐ་ཝཱི་པི ཝི་ལཱི་ཡེ་ཡྻ, ཏེ་སཾ ཝཱ པཱ་པ་ཀ་མྨ་ཕ་ལེ་ན པེ་ཏཱ་ནཾ པ་ཀ་ཏི་ཨུ་ད་ཀ་སྶ པུ་བྦ་ཁེ་ལ༹་བྷཱ་ཝཱ་པ་ཏྟི ཝི་ཡ ཏ་སྶ ཨུ་ད་ཀ་སྶ ཁཱ་ར་བྷཱ་ཝཱ་པ་ཏྟི ཧོ་ཏཱི་ཏི ཝུ་ཏྟཾ ‘‘ཨ་ཙྩ་ནྟ་ཁཱ་རེ ཨུ་ད་ཀེ’’ཏི.
པ་ཋ་མ་ཏ་ཐཱ་ག་ཏ་ཨ་ཙྪ་རི་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༨. དུ་ཏི་ཡ་ཏ་ཐཱ་ག་ཏ་ཨ་ཙྪ་རི་ཡ་སུ་ཏྟ་ཝ་ཎྞ་ནཱ
༡༢༨. ཨ་ཊྛ་མེ ཨཱ་ལཱི་ཡ་ནྟི ཨཱ་ར་མི་ཏ་བྦ་ཊྛེ་ན སེ་ཝཱི་ཡ་ནྟཱི་ཏི ཨཱ་ལ་ཡཱ, པ་ཉྩ ཀཱ་མ་གུ་ཎཱ. ཨཱ་ར་མ་ནྟཱིཏི ར་ཏིཾ ཝི་ནྡ་ནྟི ཀཱི་ལ༹་ནྟི ལ་ལ༹་ནྟི. ཨཱ་ལཱི་ཡ་ནྟི ཝཱ ཨ་ལླཱི་ཡ་ནྟཱ ཨ་བྷི་ར་མ་ཎ་ཝ་སེ་ན སེ་ཝ་ནྟཱི་ཏི ཨཱ་ལ་ཡཱ, ཏ་ཎྷཱ་ཝི་ཙ་རི་ཏཱ་ནི. ཏེ་ཧི ཨཱ་ལ་ཡེ་ཧི ར་མ་ནྟཱི་ཏི ཨཱ་ལ་ཡཱ་རཱ་མཱ. ཡ་ཐེ་ཝ ཧི སུ་ས་ཛྫི་ཏཾ པུ་པྥ་ཕ་ལ་བྷ་རི་ཏ་རུ་ཀྑཱ་དི་ས་མྤ་ནྣ་ཨུ་ཡྻཱ་ནཾ པ་ཝི་ཊྛོ རཱ་ཛཱ ཏཱ་ཡ ས་མྤ་ཏྟི་ཡཱ ར་མ་ཏི, ས་མྨུ་དི་ཏོ ཨཱ་མོ་དི་ཏ་པྤ་མོ་དི་ཏོ ཧོ་ཏི, ན ཨུ་ཀྐ་ཎྛེ་ཏི, སཱ་ཡ་མྤི ནི་ཀྑ་མི་ཏུཾ ན ཨི་ཙྪ་ཏི, ཨེ་ཝ་མི་མེ་ཧི ཀཱ་མཱ་ལ་ཡ་ཏ་ཎྷཱ་ལ་ཡེ་ཧི ས་ཏྟཱ ར་མ་ནྟི, སཾ་སཱ་ར་ཝ་ཊྚེ པ་མུ་དི་ཏཱ ཨ་ནུ་ཀྐ་ཎྛི་ཏཱ ཝ་ས་ནྟི. ཏེ་ན ཏེ་སཾ བྷ་ག་ཝཱ དུ་ཝི་དྷ་མྤི ཨཱ་ལ་ཡཾ ཨུ་ཡྻཱ་ན་བྷཱུ་མིཾ ཝི་ཡ ད་སྶེ་ནྟོ ‘‘ཨཱ་ལ་ཡཱ་རཱ་མཱ’’ཏི་ཨཱ་དི་མཱ་ཧ. སེ་ས་མེ་ཏྠ ཨུ་ཏྟཱ་ན་མེ་ཝ.
དུ་ཏི་ཡ་ཏ་ཐཱ་ག་ཏ་ཨ་ཙྪ་རི་ཡ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༩-༡༠. ཨཱ་ན་ནྡ་ཨ་ཙྪ་རི་ཡ་སུ་ཏྟཱ་དི་ཝ་ཎྞ་ནཱ
༡༢༩-༡༣༠. ན་ཝ་མེ པ་ཊི་ས་ནྠཱ་ར་དྷ་མྨནྟི པ་ཀ་ཏི་ཙཱ་རི་ཏྟ་ཝ་སེ་ན ཝུ་ཏྟཾ, ཨུ་པ་ག་ཏཱ་ནཾ པ་ན བྷི་ཀྑཱུ་ནཾ བྷི་ཀྑུ་ནཱི་ན་ཉྩ པུ་ཙྪཱ་ཝི་སྶ་ཛྫ་ན་ཝ་སེ་ན ཙེ་ཝ ཙི་ཏྟ་རུ་ཙི་ཝ་སེ་ན ཙ ཡ་ཐཱ་ཀཱ་ལཾ དྷ་མྨཾ དེ་སེ་ཏི་ཡེ་ཝ, ཨུ་པཱ་ས་ཀ་ཨུ་པཱ་སི་ཀཱ་ནཾ པ་ན ཨུ་པ་ནི་སི་ནྣ་ཀ་ཀ་ཐཱ་ཝ་སེ་ན. ད་ས་མཾ ཨུ་ཏྟཱ་ན་མེ་ཝ.
ཨཱ་ན་ནྡ་ཨ་ཙྪ་རི་ཡ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
བྷ་ཡ་ཝ་གྒ་ཝ་ཎྞ་ནཱ ནི་ཊྛི་ཏཱ.