(༩) ༤. མ་ཙ་ལ་ཝ་གྒོ
༡-༦. པཱ་ཎཱ་ཏི་པཱ་ཏ་སུ་ཏྟཱ་དི་ཝ་ཎྞ་ནཱ
༨༡-༨༦. ཙ་ཏུ་ཏྠ་སྶ པ་ཋ་མཱ་དཱི་ནི ཨུ་ཏྟཱ་ན་ཏྠཱ་ནེ་ཝ. པ་ཉྩ་མེ (སཾ. ནི. ཊཱི. ༡.༡.༡༣༢) ‘‘ནཱི་ཙེ ཀུ་ལེ པ་ཙྩཱ་ཛཱ་ཏོ’’ཏི་ཨཱ་དི་ཀེ་ན ཨ་པྤ་ཀཱ་ས་བྷཱ་ཝེ་ན ཏ་མ་ཏཱི་ཏི ཏ་མོ, ཏེ་ན ཏ་མེ་ན ཡུ་ཏྟོ་ཏི ཏ་མོ པུ་གྒ་ལོ ཝུ་ཙྩ་ཏི. ཏ་ཐཱ ཧི ཏཾ་ཡོ་ག་ཏོ པུ་གྒ་ལ་སྶ ཏ་བྦོ་ཧཱ་རོ ཡ་ཐཱ ‘‘མ་ཙྪེ་ར་ཡོ་ག་ཏོ མ་ཙྪ་རོ’’ཏི, ཏ་སྨཱ ཏ་མོཏི ཨ་པྤ་ཀཱ་ས་བྷཱ་ཝེ་ན ཏ་མོ ཏ་མ་བྷཱུ་ཏོ ཨ་ནྡྷ་ཀཱ་རཾ ཝི་ཡ ཛཱ་ཏོ, ཨ་ནྡྷ་ཀཱ་ར་ཏྟཾ ཝཱ པ་ཏྟོ་ཏི ཨ་ཏྠོ. ཝུ་ཏྟ་ལ་ཀྑ་ཎཾ ཏ་མ་མེ་ཝ པ་ར་མྤ་ར་ཏོ ཨ་ཡ་ནཾ ག་ཏི ནི་ཊྛཱ ཨེ་ཏ་སྶཱ་ཏི ཏ་མ་པ་རཱ་ཡ་ཎོ. ཨུ་བྷ་ཡེ་ན་པི ཏ་མ་གྒ་ཧ་ཎེ་ན ཁ་ནྡྷ་ཏ་མོ ཀ་ཐི་ཏོ, ན ཨ་ནྡྷ་ཀཱ་ར་ཏ་མོ. ཁ་ནྡྷ་ཏ་མོཏི ཙ ས་མྤ་ཏྟི་ར་ཧི་ཏཱ ཁ་ནྡྷ་པ་ཝ་ཏྟི་ཡེ་ཝ ད་ཊྛ་བྦཱ. ‘‘ཨུ་ཙྩེ ཀུ་ལེ པ་ཙྩཱ་ཛཱ་ཏོ’’ཏི་ཨཱ་དི་ཀེ་ན པ་ཀཱ་ས་བྷཱ་ཝེ་ན ཛོ་ཏེ་ཏཱི་ཏི ཛོ་ཏི, ཏེ་ན ཛོ་ཏི་ནཱ་ཡུ་ཏྟོ་ཏི་ཨཱ་དི ས་བྦཾ ཝུ་ཏྟ་ན་ཡེ་ན ཝེ་དི་ཏ་བྦཾ. ཨི་ཏ་རེ དྭེཏི ཛོ་ཏི་ཏ་མ་པ་རཱ་ཡ་ཎོ, ཛོ་ཏི་ཛོ་ཏི་པ་རཱ་ཡ་ཎོ་ཏི ཨི་ཏ་རེ དྭེ པུ་གྒ་ལེ.
ཝེ་ཎུ་ཝེ་ཏྟཱ་དི་ཝི་ལཱི་ཝེ་ཧི པེ་ལ༹་བྷཱ་ཛ་ནཱ་དི་ཀཱ་ར་ཀཱ ཝི་ལཱི་ཝ་ཀཱ་ར་ཀཱ. མི་ག་མ་ཙྪཱ་དཱི་ནཾ ནི་སཱ་ད་ན་ཏོ ནེ་སཱ་དཱ, མཱ་ག་ཝི་ཀ་མ་ཙྪ་བ་ནྡྷཱ་ད་ཡོ. ར་ཐེ་སུ ཙ་མྨེ་ན ན་ཧ་ཎ་ཀ་ར་ཎ་ཏོ ར་ཐ་ཀཱ་རཱ, ཙ་མྨ་ཀཱ་རཱ. པུ་ཨི་ཏི ཀ་རཱི་ས་སྶ ནཱ་མཾ, ཏཾ ཀུ་སེ་ནྟི ཨ་པ་ནེ་ནྟཱི་ཏི པུ་ཀྐུ་སཱ, པུ་པྥ་ཚ་ཌྜ་ཀཱ. དུ་བྦ་ཎྞོཏི ཝི་རཱུ་པོ. ཨོ་ཀོ་ཊི་མ་ཀོཏི ཨཱ་རོ་ཧཱ་བྷཱ་ཝེ་ན ཧེ་ཊྛི་མ་ཀོ, ར་སྶ་ཀཱ་ཡོ་ཏི ཨ་ཏྠོ. ཏེ་ནཱ་ཧ ‘‘ལ་ཀུ་ཎྜ་ཀོ’’ཏི. ལ་ཀུ ཝི་ཡ གྷ་ཊི་ཀཱ ཝི་ཡ ཌེ་ཏི པ་ཝ་ཏྟ་ཏཱི་ཏི ལ་ཀུ་ཎྜ་ཀོ, ར་སྶོ. ཀ་ཎ་ཏི ནི་མཱི་ལ་ཏཱི་ཏི ཀཱ་ཎོ. ཏཾ པ་ན་སྶ ནི་མཱི་ལ་ནཾ ཨེ་ཀེ་ན ཨ་ཀྑི་ནཱ དྭཱི་ཧི་པི ཝཱ་ཏི ཨཱ་ཧ ‘‘ཨེ་ཀ་ཙྪི་ཀཱ་ཎོ ཝཱ ཨུ་བྷ་ཡ་ཙྪི་ཀཱ་ཎོ ཝཱ’’ཏི. ཀུ་ཎ་ནཾ ཀུ་ཎོ, ཧ་ཏྠ་ཝེ་ཀ་ལླཾ, སོ ཨེ་ཏ་སྶ ཨ་ཏྠཱི་ཏི ཀུ་ཎཱི. ཁ་ཉྫོ ཝུ་ཙྩ་ཏི པཱ་ད་ཝི་ཀ་ལོ. ཧེ་ཊྛི་མ་ཀཱ་ཡ་ས་ངྑཱ་ཏོ ས་རཱི་ར་སྶ པ་ཀྑོ པ་དེ་སོ ཧ་ཏོ ཨ་སྶཱ་ཏི པ་ཀྑ་ཧ་ཏོ. ཏེ་ནཱ་ཧ ‘‘པཱི་ཋ་ས་པྤཱི’’ཏི. པ་དཱི་པེ པ་དཱི་པ་ནེ ཨེ་ཏ་བྦཾ ནེ་ཏ་བྦ་ནྟི པ་དཱི་པེ་ཡྻཾ, ཏེ་ལ་ཀ་པཱ་ལཱ་དི་ཨུ་པ་ཀ་ར་ཎཾ. ཝུ་ཏྟནྟི ཨ་ཊྛ་ཀ་ཐཱ་ཡཾ ཝུ་ཏྟཾ.
ཨཱ་ག་མ་ན་ཝི་པ་ཏྟཱིཏི ཨཱ་ག་མ་ན་ཊྛཱ་ན་ཝ་སེ་ན ཝི་པ་ཏྟི ‘‘ཨཱ་ག་མོ ཨེ་ཏྠཱ’’ཏི ཀ་ཏྭཱ. པུ་བྦུ་པྤ་ནྣ་པ་ཙྩ་ཡ་ཝི་པ་ཏྟཱིཏི པ་ཋ་མུ་པྤ་ནྣ་པ་ཙྩ་ཡ་ཝ་སེ་ན ཝི་པ་རཱ་ཝ་ཏྟི. ཙ་ཎྜཱ་ལཱ་དི་ས་བྷཱ་ཝཱ ཧི་སྶ མཱ་ཏཱ་པི་ཏ་རོ པ་ཋ་མུ་པྤ་ནྣ་པ་ཙྩ་ཡོ. པ་ཝ་ཏྟ་པ་ཙྩ་ཡ་ཝི་པ་ཏྟཱིཏི པ་ཝ་ཏྟེ སུ་ཁ་པ་ཙྩ་ཡ་ཝི་པ་ཏྟི. ཏཱ་དི་སེ ནི་ཧཱི་ན་ཀུ་ལེ ཨུ་པྤ་ནྣོ་པི ཀོ་ཙི ཝི་བྷ་ཝ་ས་མྤ་ནྣོ སི་ཡཱ, ཨ་ཡཾ པ་ན དུ་གྒ་ཏོ དུ་རཱུ་པོ. ཨཱ་ཛཱི་ཝུ་པཱ་ཡ་ཝི་པ་ཏྟཱིཏི ཨཱ་ཛཱི་ཝ་ནུ་པཱ་ཡ་ཝ་སེ་ན ཝི་པ་ཏྟི. སུ་ཁེ་ན ཧི ཛཱི་ཝི་ཀཾ པ་ཝ་ཏྟེ་ཏུཾ ཨུ་པཱ་ཡ་བྷཱུ་ཏཱ ཧ་ཏྠི་སི་པྤཱ་ད་ཡོ ཨི་མ་སྶ ན་ཏྠི, པུ་པྥ་ཚ་ཌྜ་ན་སི་ལཱ་ཀོ་ཊྚ་ནཱ་དི་ཀ་མྨཾ པ་ན ཀ་ཏྭཱ ཛཱི་ཝི་ཀཾ པ་ཝ་ཏྟེ་ཏི. ཏེ་ནཱ་ཧ ‘‘ཀ་སི་ར་ཝུ་ཏྟི་ཀེ’’ཏི. ཨ་ཏྟ་བྷཱ་ཝ་ཝི་པ་ཏྟཱིཏི ཨུ་པ་དྷི་ཝི་པ་ཏྟི. དུ་ཀྑ་ཀཱ་ར་ཎ་ས་མཱ་ཡོ་གོཏི ཀཱ་ཡི་ཀ་ཙེ་ཏ་སི་ཀ་དུ་ཀྑུ་པྤ་ཏྟི་ཡཱ པ་ཙྩ་ཡ་ས་མོ་དྷཱ་ནཾ. སུ་ཁ་ཀཱ་ར་ཎ་ཝི་པ་ཏྟཱིཏི སུ་ཁ་པ་ཙྩ་ཡ་པ་རི་ཧཱ་ནི. ཨུ་པ་བྷོ་ག་ཝི་པ་ཏྟཱིཏི ཨུ་པ་བྷོ་ག་སུ་ཁ་སྶ ཝི་ནཱ་སོ ཨ་ནུ་པ་ལ་དྡྷི. ཛོ་ཏི ཙེ་ཝ ཛོ་ཏི་པ་རཱ་ཡ་ཎ་བྷཱ་ཝོ ཙ སུ་ཀྐ་པ་ཀྑོ. ཚ་ཊྛཾ ཨུ་ཏྟཱ་ན་མེ་ཝ.
པཱ་ཎཱ་ཏི་པཱ་ཏ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
༧. པུ་ཏྟ་སུ་ཏྟ་ཝ་ཎྞ་ནཱ
༨༧. ས་ཏྟ་མེ མ-ཀཱ་རོ པ་ད་ས་ནྡྷི་ཀ་རོ ‘‘ཨ་ཉྙ་མ་ཉྙ’’ནྟི་ཨཱ་དཱི་སུ ཝི་ཡ. ནི་ཙྩ་ལ་ས་མ་ཎོཏི ཐི་ར་ས་མ་ཎོ. ཨ་བྷི་སི་ཉྩི་ཏ་བྦོ་ཏི ཨ་བྷི་སེ་ཀོཏི ཀ་མྨ་སཱ་དྷ་ནོ ཨ་བྷི་སེ་ཀ་ས་དྡོ. ཏེ་ནཱ་ཧ ‘‘ཨ་བྷི་སེ་ཀཾ ཀཱ་ཏུཾ ཡུ་ཏྟོ’’ཏི.
བཱ་ཀུ་ལ་ཏྠེ་རོ ཝི་ཡཱཏི ཐེ་རོ ཧི མ་ཧཱ་ཡ་ས་སྶཱི, ཏ་སྶ པུ་ཏྟ་དྷཱི་ཏ་རོ ན་ཏྟུ་པ་ན་ཏྟ་ཀཱ སུ་ཁུ་མ་སཱ་ཊ་ཀེ་ཧི ཙཱི་ཝ་རཱ་ནི ཀཱ་རེ་ཏྭཱ ར་ཛཱ་པེ་ཏྭཱ ས་མུ་གྒེ པ་ཀྑི་པི་ཏྭཱ པ་ཧི་ཎ་ནྟི. ཐེ་ར་སྶ ན་ཧཱ་ན་ཀཱ་ལེ ན་ཧཱ་ན་ཀོ་ཊྛ་ཀེ ཋ་པེ་ནྟི. ཐེ་རོ ཏཱ་ནི ནི་ཝཱ་སེ་ཏི ཙེ་ཝ པཱ་རུ་པ་ཏི ཙ. ཏེ་ནེ་ཝེ་ཏཾ ཝུ་ཏྟཾ.
ཁ་དི་ར་ཝ་ན་མ་གྒེ སཱི་ཝ་ལི་ཏྠེ་རོ ཝི་ཡཱཏི ས་ཏྠ་རི ཀི་ར ཏཾ མ་གྒཾ པ་ཊི་པ་ནྣེ དེ་ཝ་ཏཱ ‘‘ཨ་མྷཱ་ཀཾ ཨ་ཡྻ་སྶ སཱི་ཝ་ལི་ཏྠེ་ར་སྶ ས་ཀྐཱ་རཾ ཀ་རི་སྶཱ་མཱ’’ཏི ཙི་ནྟེ་ཏྭཱ ཨེ་ཀེ་ཀ་ཡོ་ཛ་ནེ ཝི་ཧཱ་རཾ ཀཱ་རེ་ཏྭཱ ཨེ་ཀ་ཡོ་ཛ་ན་ཏོ ཨུ་དྡྷཾ ག་ནྟུཾ ཨ་ད་ཏྭཱ པཱ་ཏོ་ཝ ཨུ་ཊྛཱ་ཡ དི་བྦཱ་ནི ཡཱ་གུ་ཨཱ་དཱི་ནི ག་ཧེ་ཏྭཱ ‘‘ཨ་མྷཱ་ཀཾ ཨ་ཡྻོ སཱི་ཝ་ལི་ཏྠེ་རོ ཀ་ཧཾ ནི་སི་ནྣོ’’ཏི ཝི་ཙ་ར་ནྟི. ཐེ་རོ ཨ་ཏྟ་ནོ ཨ་བྷི་ཧ་ཊཾ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ དཱ་པེ་སི. ཨེ་ཝཾ ས་ཏྠཱ ས་པ་རི་ཝཱ་རོ ཏིཾ་ས་ཡོ་ཛ་ནི་ཀཾ ཀ་ནྟཱ་རཾ སཱི་ཝ་ལི་ཏྠེ་ར་སྶ པུ་ཉྙ་ཕ་ལཾ ཨ་ནུ་བྷ་ཝ་མཱ་ནོ་ཝ ཨ་ག་མཱ་སི. ཏེ་ནེ་ཝེ་ཏཾ ཝུ་ཏྟཾ.
ཨ་ཊྛ་ཀ་ནཱ་ག་ར་སུ་ཏྟེ ཨཱ་ན་ནྡ་ཏྠེ་རོ ཝི་ཡཱཏི ཨ་ཊྛ་ཀ་ནཱ་ག་ར་ཀོ ཀི་ར ག་ཧ་པ་ཏི ཐེ་ར་སྶ དྷ་མྨ་དེ་ས་ནཱ་ཡ པ་སཱི་དི་ཏྭཱ པ་ཉྩ་ས་ཏ་གྒྷ་ན་ཀཾ ཝི་ཧཱ་རཾ ཀཱ་རེ་ཏྭཱ ཨ་དཱ་སི. ཏཾ ས་ནྡྷཱ་ཡེ་ཏཾ ཝུ་ཏྟཾ.
པི་ལི་ནྡ་ཝ་ཙྪ་ཏྠེ་རོ ཝི་ཡཱཏི ཐེ་ར་སྶ ཀི་ར ཨི་དྡྷཱ་ནུ་བྷཱ་ཝེ་ན པ་ས་ནྣཱ མ་ནུ་སྶཱ ས་པྤི་ཨཱ་དཱི་ནི བ་ཧཱུ་ནི བྷེ་ས་ཛྫཱ་ནི ཨ་བྷི་ཧ་རིཾ་སུ. པ་ཀ་ཏི་ཡཱ་པི ཙ ཨཱ་ཡ་སྨཱ པི་ལི་ནྡ་ཝ་ཙྪོ ལཱ་བྷཱི ཧོ་ཏི པ་ཉྩ་ནྣཾ བྷེ་ས་ཛྫཱ་ནཾ, ལ་དྡྷཾ ལ་དྡྷཾ པ་རི་སཱ་ཡ ཝི་སྶ་ཛྫེ་ཏི. ཏེ་ནེ་ཏཾ ཝུ་ཏྟཾ ‘‘གི་ལཱ་ན་པ་ཙྩ་ཡཾ པི་ལི་ནྡ་ཝ་ཙྪ་ཏྠེ་རོ ཝི་ཡཱ’’ཏི.
ཏི་ཎྞ་མྤི ས་ནྣི་པཱ་ཏེ་ན ནི་བྦ་ཏྟཱ་ནཱིཏི པི་ཏྟཱ་དཱི་ནཾ ཏི་ཎྞ་མྤི ཝི་ས་མཱ་ནཾ ས་ནྣི་པཱ་ཏེ་ན ཛཱ་ཏཱ་ནི. ཨ་ཏི་སཱི་ཏཱ་དི་བྷཱ་ཝེ་ན ཨུ་ཏཱུ་ནཾ པ་རི་ཎཱ་མོ་ཏི ཨཱ་ཧ ‘‘ཨ་ཏི་སཱི་ཏ་ཨ་ཏི་ཨུ་ཎྷ་ཨུ་ཏུ་ཏོ ཛཱ་ཏཱ་ནཱི’’ཏི. པུ་རི་མ་ཨུ་ཏུ་ཏོ ཝི་ས་དི་སོ ཨུ་ཏུ ཨུ་ཏུ་པ་རི་ཎཱ་མོ, ཏ་ཏོ ཛཱ་ཏཱ་ནི ཨུ་ཏུ་པ་རི་ཎཱ་མ་ཛཱ་ནི, ཝི་ས་བྷཱ་ག་ཨུ་ཏུ་ཏོ ཛཱ་ཏཱ་ནཱི་ཏི ཨ་ཏྠོ. ཛ་ངྒ་ལ་དེ་ས་ཝཱ་སཱི་ན་ཉྷི ཨ་ནཱུ་པ་དེ་སེ ཝ་ས་ནྟཱ་ནཾ ཝི་ས་བྷཱ་གོ་ཝ ཨུ་ཏུ ཨུ་པྤ་ཛྫ་ཏི, ཨ་ནཱུ་པ་དེ་ས་ཝཱ་སཱི་ན་ཉྩ ཛ་ངྒ་ལ་དེ་སེ་ཏི. ཨེ་ཝཾ མ་ལ་ཡ་ས་མུ་དྡ་ཏཱི་རཱ་དི་ཝ་སེ་ན་པི ཨུ་ཏུ་ཝི་ས་བྷཱ་ག་ཏཱ ཨུ་པྤ་ཛྫ་ཏི་ཡེ་ཝ. ཏ་ཏོ ཛཱ་ཏཱ་ནི ཨུ་ཏུ་པ་རི་ཎཱ་མ་ཛཱ་ནི ནཱ་མ.
ཨ་ཏྟ་ནོ པ་ཀ་ཏི་ཙ་རི་ཡཱ་ནཾ ཝི་ས་མཾ ཀཱ་ཡ་སྶ པ་རི་ཧ་ར་ཎ་ཝ་སེ་ན ཝི་ས་མ་པ་རི་ཧཱ་ར་ཛཱ་ནི. ཏཱ་ནི པ་ན ཨ་ཙྩཱ་ས་ན་ཨ་ཏི་ཊྛཱ་ནཱ་དི་ནཱ ཝེ་དི་ཏ་བྦཱ་ནཱི་ཏི ཨཱ་ཧ ‘‘ཨ་ཙྩཱ་ས་ན་ཨ་ཏི་ཊྛཱ་ནཱ་དི་ཀཱ’’ཏི. ཨཱ་དི-ས་དྡེ་ན མ་ཧཱ་བྷཱ་ར་ཝ་ཧ་ཎ་སུ་དྷཱ་ཀོ་ཊྚ་ན་ཨ་དེ་ས་ཀཱ་ལ་ཙ་ར་ཎཱ་དཱི་ནི ས་ངྒ་ཎྷཱ་ཏི. པ་ར་སྶ ཨུ་པ་ཀྐ་མ་ཏོ ནི་བྦ་ཏྟཱ་ནི ཨོ་པ་ཀྐ་མི་ཀཱ་ནི, ཨ་ཡཾ ཙོ་རོ་ཏི ཝཱ པཱ་ར་དཱ་རི་ཀོ་ཏི ཝཱ ག་ཧེ་ཏྭཱ ཛ་ཎྞུ་ཀ་ཀ་པྤ་ར་མུ་གྒ་རཱ་དཱི་ཧི ནི་པྤོ་ཐ་ན་ཨུ་པ་ཀྐ་མཾ པ་ཙྩ་ཡཾ ཀ་ཏྭཱ ཨུ་པྤ་ནྣཱ་ནཱི་ཏི ཨ་ཏྠོ. ཏེ་ནཱ་ཧ ‘‘ཝ་དྷ་བ་ནྡྷ་ནཱ་དི་ཨུ་པ་ཀྐ་མེ་ན ནི་བྦ་ཏྟཱ་ནཱི’’ཏི. ཀེ་ཝ་ལནྟི བཱ་ཧི་རཾ པ་ཙྩ་ཡཾ ཨ་ན་པེ་ཀྑི་ཏྭཱ ཀེ་ཝ་ལཾ, ཏེ་ན ཝི་ནཱ་ཏི ཨ་ཏྠོ. ཏེ་ནཱ་ཧ ‘‘པུ་བྦེ་ཀ་ཏ་ཀ་མྨ་ཝི་པཱ་ཀ་ཝ་སེ་ནེ་ཝ ཛཱ་ཏཱ་ནཱི’’ཏི.
པུ་ཏྟ་སུ་ཏྟ་ཝ་ཎྞ་ནཱ ནི་ཊྛི་ཏཱ.
༨-༡༠. སཾ་ཡོ་ཛ་ན་སུ་ཏྟཱ་དི་ཝ་ཎྞ་ནཱ
༨༨-༩༠. ཨ་ཊྛ་མེ སོ་ཏཱ་པ་ནྣོ ཙ་ཏཱུ་ཧི ཝཱ་ཏེ་ཧི ཨི་ནྡ་ཁཱི་ལོ ཝི་ཡ པ་ར་པྤ་ཝཱ་དེ་ཧི ཨ་ཀ་མྤི་ཡོ ཨ་ཙ་ལ་ས་དྡྷཱ་ཡ ས་མ་ནྣཱ་ག་ཏ་ཏྟཱ སཱ་ས་ནེ ལ་དྡྷ་པྤ་ཏི་ཊྛོ ས་མ་ཎ་མ་ཙ་ལོ ནཱ་མཱ་ཏི ཨཱ་ཧ ‘‘སཱ་ས་ནེ ལ་དྡྷ་པྤ་ཏི་ཊྛ་ཏྟཱ’’ཏི་ཨཱ་དི. ཐ་དྡྷ་བྷཱ་ཝ་ཀ་རཱ་ནཾ ཀི་ལེ་སཱ་ནཾ ས་བྦ་སོ ས་མུ་ཙྪི་ནྣ་ཏྟཱཏི ཙི་ཏྟ་སྶ ཐ་དྡྷ་བྷཱ་ཝ་ཀ་རཱ་ནཾ ཨུ་དྡྷ་མྦྷཱ་གི་ཡ་ཀི་ལེ་སཱ་ནཾ ས་བྦ་སོ ཨ་བྷཱ་ཝཱ ས་མ་ཎ་སུ་ཁུ་མཱ་ལོ ནཱ་མ སུ་ཁུ་མཱ་ལ་བྷཱ་ཝ་པྤ་ཏྟི་ཏོ. ན་ཝ་མ་ད་ས་མཱ་ནི སུ་ཝི་ཉྙེ་ཡྻཱ་ནེ་ཝ.
སཾ་ཡོ་ཛ་ན་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.
མ་ཙ་ལ་ཝ་གྒ་ཝ་ཎྞ་ནཱ ནི་ཊྛི་ཏཱ.