༥. བྷཱུ་མི་པུ་གྒ་ལ་ཀ་ཐཱ
༡༨༠. ཨི་ཏོ པ་རཾ པ་ཝ་ཀྑཱ་མི, བྷཱུ་མི་པུ་གྒ་ལ་བྷེ་ད་ཏོ;
ཙི་ཏྟཱ་ནཾ པ་ན ས་བྦེ་སཾ, ཀ་མ་ཏོ ས་ངྒ་ཧཾ ཀ་ཐཾ.
༡༨༡. ནི་ར་ཡ་ཉྩ ཏི་ར་ཙྪཱ་ན་ཡོ་ནི པེ་ཏཱ་སུ་རཱ ཏ་ཐཱ;
ཙ་ཏུ་རཱ་པཱ་ཡ་བྷཱུ་མཱི་ཏི, ཀཱ་མེ དུ་གྒ་ཏི་ཡོ མ་ཏཱ.
༡༨༢. ཙཱ་ཏུ་མ་ཧཱ་རཱ་ཛི་ཀཱ ཙ, ཏཱ་ཝ་ཏིཾ་སཱ ཙ ཡཱ་མ་ཀཱ;
ཏུ་སི་ཏཱ ཙེ་ཝ ནི་མྨཱ་ན་ར་ཏི་ནོ ཝ་ས་ཝ་ཏྟི་ནོ.
༡༨༣. ཚ་ལེ༹་ཏེ དེ་ཝ་ལོ་ཀཱ ཙ, མཱ་ན་ཝཱ་ཏི ཙ ས་ཏྟ་དྷཱ;
ཀཱ་མ་སུ་ག་ཏི་ཡོ ཙེ་ཀཱ་ད་ས་དྷཱ ཀཱ་མ་བྷཱུ་མི་ཡོ.
༡༨༤. བྲ་ཧྨཱ་ནཾ པཱ་རི་ས་ཛྫཱ ཙ, ཏ་ཐཱ བྲ་ཧྨ་པུ་རོ་ཧི་ཏཱ;
མ་ཧཱ་བྲ་ཧྨཱ ཙ ཏི་ཝི་དྷཱ, པ་ཋ་མ་ཛ྄ཛྷཱ་ན་བྷཱུ་མི་ཡོ.
༡༨༥. པ་རི་ཏྟཱ་བྷཱ་པྤ་མཱ་ཎཱ་བྷཱ, ཏ་ཐེ་ཝཱ་བྷ་སྶ་རཱ་ཏི ཙ;
དུ་ཏི་ཡ་ཛ྄ཛྷཱ་ན་བྷཱུ་མི ཙ, ཏི་ཝི་དྷཱ་ཝ པ་ཀཱ་སི་ཏཱ.
༡༨༦. པ་རི་ཏྟ་སུ་བྷཱ་པྤ་མཱ་ཎཱ་སུ་བྷཱ ཙ སུ་བྷ་ཀི་ཎྷ་ཀཱ;
ཏི་ཝི་དྷཱ་པི པ་ཝུ་ཙྩ་ནྟི, ཏ་ཏི་ཡ་ཛ྄ཛྷཱ་ན་བྷཱུ་མི་ཡོ.
༡༨༧. ཝེ་ཧ་པྥ་ལཱ ཨ་ས་ཉྙཱི ཙ, སུ་དྡྷཱ་ཝཱ་སཱ ཙ པ་ཉྩ་དྷཱ;
ཨི་ཙྩེ་ཏཱ པ་ན ས་ཏྟཱ་པི, ཙ་ཏུ་ཏྠ་ཛ྄ཛྷཱ་ན་བྷཱུ་མི་ཡོ.
༡༨༨. ཨ་ཝི་ཧཱ ཙ ཨ་ཏ་པྤཱ ཙ, སུ་ད་སྶཱ ཙ སུ་ད་སྶི་ནོ;
ཨ་ཀ་ནི་ཊྛཱ་ཏི པ་ཉྩེ་ཏེ, སུ་དྡྷཱ་ཝཱ་སཱ པ་ཀཱ་སི་ཏཱ.
༡༨༩. ཨི་ཏི སོ་ལ༹་ས་དྷཱ བྷི་ནྣཱ, བྲ་ཧྨ་ལོ་ཀཱ པ་ཝུ་ཙྩ་རེ;
རཱུ་པི་བྲ་ཧྨཱ་ན་མཱ་ཝཱ་སཱ, རཱུ་པཱ་ཝ་ཙ་ར་བྷཱུ་མི་ཡོ.
༡༩༠. ཨཱ་ཀཱ་སཱ་ན་ཉྩཱ་ཡ་ཏ་ན་ནཱ་མཱ་དཱི་ཧི པ་ཀཱ་སི་ཏཱ;
ཨ་རཱུ་པི་བྲ་ཧྨ་ལོ་ཀཱ ཙ, ཙ་ཏུ་དྷཱརཱུ་པ་བྷཱུ་མི་ཡོ.
༡༩༡. སོ་ཏཱ་པ་ནྣཱ་དི་བྷེ་དེ་ན, ཙ་ཏུ་དྷཱནུ་ཏྟ་རཱ མ་ཏཱ;
པ་ཉྩ་ཏིཾ་ས པ་ནི་ཙྩེ་ཝཾ, ས་བྦ་ཐཱ་པི ཙ བྷཱུ་མི་ཡོ.
༡༩༢. ཛཱ་ཡ་ནྟི ཙ་ཏུ་རཱ་པཱ་ཡེ, པཱ་པ་པཱ་ཀཱ་ཡ ས་ནྡྷི་ཡཱ;
ཀཱ་མཱ་ཝ་ཙ་ར་དེ་ཝེ་སུ, མ་ཧཱ་པཱ་ཀེ་ཧི ཛཱ་ཡ་རེ.
༡༩༣. ཨ་ཧེ་ཏུ་ཀཱ པུ་ཉྙ་པཱ་ཀཱ་ཧེ་ཏུ་ཀེ་ན ཏུ ཛཱ་ཡ་རེ;
བྷུ་མྨ་དེ་ཝ་མ་ནུ་སྶེ་སུ, མ་ཧཱ་པཱ་ཀེ་ཧི ཙེ་ཏ་རེ.
༡༩༤. ཝི་པཱ་ཀཾ པ་ཋ་མ་ཛ྄ཛྷཱ་ནཾ, པ་ཋ་མ་ཛ྄ཛྷཱ་ན་བྷཱུ་མི་ཡཾ;
དུ་ཏི་ཡཾ ཏ་ཏི་ཡ་ཉྩེ་ཝ, དུ་ཏི་ཡ་ཛ྄ཛྷཱ་ན་བྷཱུ་མི་ཡཾ.
༡༩༥. ཏ་ཏི་ཡ་མྷི ཙ་ཏུ་ཏྠཾ ཏུ, ཙ་ཏུ་ཏྠ་མྷི ཙ པ་ཉྩ་མཾ;
ཨཱ་རུ་པྤཱ ཙ ཀ་མེ་ནེ་ཝ, ཨཱ་རུ་པྤེ ཧོ་ནྟི ས་ནྡྷི་ཡོ.
༡༩༦. ཀཱ་ཡ་ཝཱ་ཙཱ་མ་ནོ་དྭཱ་རེ, ཀ་མྨཾ པཱ་ཎ་ཝ་དྷཱ་དི་ཀཾ;
ཀ་ཏྭཱ པཱ་པ་ཀ་ཙི་ཏྟེ་ཧི, ཛཱ་ཡ་ནྟཱ་པཱ་ཡ་བྷཱུ་མི་ཡཾ.
༡༩༧. ཀཱ་ཡ་ཝཱ་ཙཱ་མ་ནོ་དྭཱ་རེ, དཱ་ནཾ སཱི་ལ་ཉྩ བྷཱ་ཝ་ནཾ;
ཀཱ་མ་པུ་ཉྙེ་ཧི ཀ་ཏྭཱ་ན, ཀཱ་མ་སུ་ག་ཏི་ཡཾ སི་ཡུཾ.
༡༩༨. པ་རི་ཏྟཾ མ་ཛ྄ཛྷི་མཾ ཛྷཱ་ནཾ, པ་ཎཱི་ཏ་ཉྩ ཡ་ཐཱ་ཀྐ་མཾ;
བྷཱ་ཝེ་ཏྭཱ ཏི་ཝི་དྷཱ ཧོ་ནྟི, ཏཱི་སུ བྷཱུ་མཱི་སུ ཡོ་གི་ནོ.
༡༩༩. ཝེ་ཧ་པྥ་ལེ་སུ ཛཱ་ཡ་ནྟི, བྷཱ་ཝེ་ཏྭཱ པ་ཉྩ་མཾ ཏ་ཐཱ;
ས་ཉྙཱ་ཝི་རཱ་ག་ཏ་ཉྩེ་ཝ, བྷཱ་ཝེ་ཏྭཱ་ས་ཉྙི་བྷཱུ་མི་ཡཾ.
༢༠༠. སུ་དྡྷཱ་ཝཱ་སེ་སུ ཛཱ་ཡ་ནྟི, ཨ་ནཱ་གཱ་མི་ཀ་པུ་གྒ་ལཱ;
ཨཱ་རུ་པྤཱ་ནི ཙ བྷཱ་ཝེ་ཏྭཱ, ཨ་རཱུ་པེ་སུ ཡ་ཐཱ་ཀྐ་མཾ.
༢༠༡. ལོ་ཀུ་ཏྟ་རཾ ཏུ བྷཱ་ཝེ་ཏྭཱ, ཡ་ཐཱ་ས་ཀ་མ་ན་ནྟ་རཾ;
ས་མཱ་པ་ཏྟི་ཀྑ་ཎེ ཙེ་ཝ, ཨ་པྤེ་ཏི ཕ་ལ་མཱ་ན་སཾ.
༢༠༢. ཨ་པཱ་ཡ་མྷཱ ཙུ་ཏཱ ས་ཏྟཱ, ཀཱ་མ་དྷཱ་ཏུ་མྷི ཛཱ་ཡ་རེ;
ས་བྦ་ཊྛཱ་ནེ་སུ ཛཱ་ཡ་ནྟི, ཀཱ་མ་སུ་ག་ཏི་ཏོ ཙུ་ཏཱ.
༢༠༣. ཙུ་ཏཱ ཛཱ་ཡ་ནྟི རཱུ་པ་མྷཱ, ས་བྦ་ཏྠཱ་པཱ་ཡ་ཝ་ཛྫི་ཏེ;
ཀཱ་མ་སུ་ག་ཏི་ཡཾ ཧོ་ནྟི, ཨ་རཱུ་པཱ་ས་ཉྙ་ཏོ ཙུ་ཏཱ.
༢༠༤. ཏ་ཐཱ་རཱུ་པ་ཙུ་ཏཱ ཧོ་ནྟི, ཏ་ཏྠེ་ཝོ་པ་རི་མེ་ཝ ཙ;
ཝ་ཊྚ་མཱུ་ལ་ས་མུ་ཙྪེ་དཱ, ནི་བྦཱ་ཡ་ནྟི ཨ་ནཱ་ས་ཝཱ.
༢༠༥. སུ་དྡྷཱ་ཝཱ་སེ་སྭ་ནཱ་གཱ་མི-པུ་གྒ་ལཱ་ཝོ་པ་པ་ཛྫ་རེ;
ཀཱ་མ་དྷཱ་ཏུ་མྷི ཛཱ་ཡ་ནྟི, ཨ་ནཱ་གཱ་མི་ཝི་ཝ་ཛྫི་ཏཱ.
༢༠༦. ཧེ་ཊྛུ་པ་པ་ཏྟི་བྲ་ཧྨཱ་ནཾ, ཨ་རི་ཡཱ་ནཾ ན ཀ་ཏྠ་ཙི;
ཨ་ས་ཉྙ་ས་ཏྟཱ་པཱ་ཡེ་སུ, ན་ཏྠེ་ཝཱ་རི་ཡ་པུ་གྒ་ལཱ.
༢༠༧. ཝེ་ཧ་པྥ་ལེ ཨ་ཀ་ནི་ཊྛེ, བྷ་ཝ་གྒེ ཙ པ་ཏི་ཊྛི་ཏཱ;
ན པུ་ནཱ་ཉྙ་ཏྠ ཛཱ་ཡ་ནྟི, ས་བྦེ ཨ་རི་ཡ་པུ་གྒ་ལཱ.
༢༠༨. ཚ་སུ དེ་ཝེ་སྭ་ནཱ་གཱ་མཱི, ཝཱི་ཏ་རཱ་གཱ ན ཏི་ཊྛ་རེ;
ན ཙི་ར་ཊྛཱ་ཡི་ནོ ཏ་ཏྠ, ལོ་ཀི་ཡཱ་པི ཙ ཡོ་གི་ནོ.
༢༠༩. གི་ཧི་ལི་ངྒེ ན ཏི་ཊྛ་ནྟི, མ་ནུ་སྶེ་སུ ཨ་ནཱ་ས་ཝཱ;
པ་བྦ་ཛྫཱ་ཡ་ཉྩ བྷུ་མྨེ ཙ, བྲ་ཧྨ་ཏྟེ་པི ཙ ཏི་ཊྛ་རེ.
༢༡༠. ཡཱ་ནི པ་ཉྙཱ་ས ཝ་སྶཱ་ནི,
མ་ནུ་སྶཱ་ནཾ ས པི་ཎྜི་ཏོ;
ཨེ་ཀོ ར་ཏྟི་དི་ཝོ ཏེ་ན,
མཱ་སེ་ཀོ ཏིཾ་ས ར་ཏྟི་ཡོ.
༢༡༡. དྭཱ་ད་ས་མཱ་སི་ཡོ ཝ་སྶོ, ཏེ་ན པ་ཉྩ་ས་ཏཾ བྷ་ཝེ;
ཙཱ་ཏུ་མ་ཧཱ་རཱ་ཛི་ཀཱ་ནཾ, པ་མཱ་ཎ་མི་ད་མཱ་ཡུ་ནོ.
༢༡༢. ཏཾ ན་ཝུ་ཏི་ཝ་སྶ་ས་ཏ-ས་ཧ་སྶཾ པ་ན པི་ཎྜི་ཏཾ;
ག་ཎ་ནཱ་ཡ མ་ནུ་སྶཱ་ནཾ, ཙ་ཏུ་བྷཱ་གཱུ་པ་རཱུ་པ་རི.
༢༡༣. ཡཾ མ་ནུ་སྶ་ཝ་སྶ་ས་ཏཾ, ཏ་དེ་ཀོ དི་ཝ་སོ ཀ་ཏོ;
ཏེ་ན ཝ་སྶ་ས་ཧ་སྶཱ་ཡུ, ཏཱ་ཝ་ཏིཾ་སེ་སུ དེ་སི་ཏོ.
༢༡༤. ཀོ་ཊི་ཏྟ་ཡཾ ས་ཊྛི་ས་ཏ་ས་ཧ་སྶ་ཉྩཱ་དྷི་ཀཾ བྷ་ཝེ;
ག་ཎ་ནཱ་ཡ མ་ནུ་སྶཱ་ནཾ, ཏཱ་ཝ་ཏིཾ་སེ་སུ པི་ཎྜི་ཏཾ.
༢༡༥. ཨཱ་ཡུ་པྤ་མཱ་ཎ་མི་ཙྩེ་ཝཾ, དེ་ཝཱ་ན་མུ་པ་རཱུ་པ་རི;
དྭི་ཀྑ་ཏྟུཾ དྭི་གུ་ཎཾ ཀ་ཏྭཱ, ཙ་ཏུ་བྷཱ་ག་མུ་དཱ་ཧ་ཊཾ.
༢༡༦. ག་ཎ་ནཱ་ཡ མ་ནུ་སྶཱ་ནཾ, ཏ་ཏྠ ཙུ་དྡ་ས ཀོ་ཊི་ཡོ;
ཙ་ཏྟཱ་ལཱི་ས་ས་ཏ་ས་ཧ་སྶཱ་དྷི་ཀཱ ཡཱ་མ་བྷཱུ་མི་ཡཾ.
༢༡༧. ཏུ་སི་ཏཱ་ནཾ པ་ཀཱ་སེ་ནྟི, ས་ཏྟ་པ་ཉྙཱ་ས ཀོ་ཊི་ཡོ;
ས་ཊྛི་ས་ཏ་ས་ཧ་སྶཱ་ནི, ཝ་སྶཱ་ནི ཨ་དྷི་ཀཱ་ནི ཙ.
༢༡༨. ནི་མྨཱ་ན་ར་ཏིདེ་ཝཱ་ནཾ, དྭི་ས་ཏཾ ཏིཾ་ས ཀོ་ཊི་ཡོ;
ཙ་ཏྟཱ་ལཱི་ས་ཝ་སྶ་ས་ཏ་ས་ཧ་སྶཱ་ནི ཙ ས་བྦ་ཐཱ.
༢༡༩. ན་ཝ་ཀོ་ཊི་ས་ཏ་ཉྩེ་ཀ་ཝཱི་ས་ཏི་ཝ་སྶ་ཀོ་ཊི་ཡོ;
ས་ཊྛི་ཝ་སྶ་ས་ཏ་ས་ཧ་སྶཱ་དྷི་ཀཱ ཝ་ས་ཝ་ཏྟི་སུ.
༢༢༠. ཀ་པྤ་སྶ ཏ་ཏི་ཡོ བྷཱ་གོ, ཨུ་པ་ཌྜྷ་ཉྩ ཡ་ཐཱ་ཀྐ་མཾ;
ཀ་པྤེ་ཀོ དྭེ ཙ ཙ་ཏྟཱ་རོ, ཨ་ཊྛ ཀ་པྤཱ ཙ སོ་ལ༹་ས.
༢༢༡. དྭ་ཏྟིཾ་ས ཙ་ཏུ་ས་ཊྛཱི ཙ, ན་ཝ་སུ བྲ་ཧྨ་བྷཱུ་མི་སུ;
ཝེ་ཧ་པྥ་ལཱ ཨ་ས་ཉྙཱི ཙ, པ་ཉྩ་ཀ་པྤ་ས་ཏཱ་ཡུ་ཀཱ.
༢༢༢. ཀ་པྤ་ས་ཧ་སྶཾ དྭེ ཙ་ཏྟཱ་རི, ཨ་ཊྛ སོ་ལ༹་ས ཙ་ཀྐ་མཱ;
ས་ཧ་སྶཱ་ནི ཙ ཀ་པྤཱ་ནཾ, སུ་དྡྷཱ་ཝཱ་སཱ་ནམུ་དྡི་སེ.
༢༢༣. ཝཱི་ས་ཀ་པྤ་ས་ཧ་སྶཱ་ནི, ཙ་ཏྟཱ་ལཱི་ས་ཉྩ ས་ཊྛི ཙ;
ཙ་ཏུ་རཱ་སཱི་ཏི་ས་ཧ་སྶཱ, ཀ་པྤཱ ཙཱརུ་པྤ་ཀེ ཀ་མཱ.
༢༢༤. ཨཱ་ཡུ་པྤ་མཱ་ཎ་ནི་ཡ་མོ, ན་ཏྠི བྷུ་མྨེ ཙ མཱ་ན་ཝེ;
ཝ་སྶཱ་ནཾ ག་ཎ་ནཱ ན་ཏྠི, ཙ་ཏུ་རཱ་པཱ་ཡ་བྷཱུ་མི་ཡཾ.
༢༢༥. པུ་ཐུ་ཛྫ་ནཱ་རི་ཡཱ ཙེ་ཏི, དུ་ཝི་དྷཱ ཧོ་ནྟི པུ་གྒ་ལཱ;
ཏི་ཧེ་ཏུ་ཀཱ་དི་བྷེ་དེ་ན, ཏི་ཝི་དྷཱ ཙ པུ་ཐུ་ཛྫ་ནཱ.
༢༢༦. མ་གྒ་ཊྛཱ ཙ ཕ་ལ་ཊྛཱ ཙ,
ཨ་ཊྛེ་ཝཱ་རི་ཡ་པུ་གྒ་ལཱ;
ཨཱ་དི་ཏོ ས་ཏྟ སེ་ཀྑཱ ཙ,
ཨ་སེ་ཀྑོ ཙཱ་ར་ཧཱ་པ་རོ.
༢༢༧. ཨ་ཧེ་ཏུ་ཀཱ་ཝ ལ་བྦྷ་ནྟི, ས་ཏྟཱ དུ་གྒ་ཏི་ཡཾ པ་ན;
ཏི་ཧེ་ཏུ་ཀཱ་ཝ ལ་བྦྷ་ནྟི, རཱུ་པཱ་རཱུ་པེ ས་ཙི་ཏྟ་ཀཱ.
༢༢༨. ཀཱ་མཱ་ཝ་ཙ་ར་དེ་ཝེ་སུ, ཨ་ཧེ་ཏུ་ཀ་ཝི་ཝ་ཛྫི་ཏཱ;
ཝི་ནི་པཱ་ཏཱ་སུ་རེ ཙེ་ཝ, མཱ་ན་ཝེ ཙ ཏ་ཡོ་པི ཙ.
༢༢༩. ཨ་རི་ཡཱ ནཱ་མ ལ་བྦྷ་ནྟི, ཨ་ས་ཉྙཱ་པཱ་ཡ་ཝ་ཛྫི་ཏེ;
པུ་ཐུ་ཛྫ་ནཱ ཏུ ལ་བྦྷ་ནྟི, སུ་དྡྷཱ་ཝཱ་ས་ཝི་ཝ་ཛྫི་ཏེ.
༢༣༠. སུ་དྡྷཱ་ཝཱ་ས་མ་པཱ་ཡ་ཉྩ, ཧི་ཏྭཱ་ས་ཉྙི་བྷ་ཝཾ ཏི་དྷཱ;
སོ་ཏཱ་པ་ནྣཱ་ད་ཡོ དྭེ་པི, སེ་ས་ཊྛཱ་ནེ་སུ ལ་བྦྷ་རེ.
༢༣༡. ཨི་ཏི ས་བྦ་པྤ་བྷེ་དེ་ན, བྷཱུ་མི་པུ་གྒ་ལ་ས་ངྒ་ཧཾ;
ཉ་ཏྭཱ ཝི་ཉྙཱུ ཝི་བྷཱ་ཝེ་ཡྻ, ཏ་ཏྠ ཙི་ཏྟཱ་ནི ས་མྦྷ་ཝཱ་ཏི.
ཨི་ཏི ཙི་ཏྟ་ཝི་བྷཱ་གེ བྷཱུ་མི་པུ་གྒ་ལ་ཀ་ཐཱ ནི་ཊྛི་ཏཱ.
པ་ཉྩ་མོ པ་རི་ཙྪེ་དོ.