༡༣. ཏེ་ར་ས་མོ པ་རི་ཙྪེ་དོ
ནི་སྶ་ནྡ་ཕ་ལ་ཝི་བྷཱ་གོ
༡༧༩༢. ཝི་པ་སྶ་ནཱ་ཡ ནི་སྶ་ནྡ་མི་ཏི ཝུ་ཏྟ་མི་ཏོ པ་རཾ;
ས་ཙྩཱ་ནཾ པ་ཊི་ཝེ་དྷཱ་དིཾ, པ་ཝ་ཀྑཱ་མི ཡ་ཐཱ་ཀྐ་མཾ.
༡༧༩༣. པ་རི་ཉྙཱ ཙ པ་ཧཱ་ན་ཉྩ, ས་ཙྪི་ཀི་རི་ཡཱ ཙ བྷཱ་ཝ་ནཱ;
ཨི་ཏི དུ་ཀྑཱ་དི་ས་ཙྩེ་སུ, ཀི་ཙྩམཱ་ཧུ ཙ་ཏུ་བྦི་དྷཾ.
༡༧༩༤. ཏཾ ས་བྦཾ མ་གྒ་ཀཱ་ལ་མྷི, ཀ་རི་སྶ་ཏི ཏ་ཏོ པ་རཾ;
པ་ཊི་པ་སྶ་དྡྷ་ཀི་ཙྩ་ཏྟཱ, ཀ་ཏཾ ཧོ་ཏི ཕ་ལེ ཀ་ཐཾ.
༡༧༩༥. ཚི་ནྣ་ཏཱ་ལོ ཕ་ལ་སྶེ་ཝ, ཚི་ནྣཱ་ནུ་ས་ཡ་མཱུ་ལ་ཀཱ;
ཁ་ནྡྷཱ ནཱ་ལ་མ་དྷི་ཊྛཱ་ནཾ, ཝི་པ་ལླཱ་ས་པ་ཝ་ཏྟི་ཡཱ.
༡༧༩༦. ཨ་ཙྩ་ནྟ་པ་ཊི་པ་ཀྑ་ཏྟཱ, ཙ་ཏུ་མ་གྒ་པ་ཝ་ཏྟི་ཡཱ;
པ་རཾ ཀླེ་སཱ ན ཛཱ་ཡ་ནྟི, ད་ཌྜྷ་བཱི་ཛ་ངྐུ་རཾ ཡ་ཐཱ.
༡༧༩༧. ནི་ཡྻཱ་ན་ཊྛ་ཝི་སེ་སེ་ན, ཨ་ཉྙ་མ་ཉྙ་སྶ པ་ཙྩ་ཡོ;
མ་གྒོ་ཝ མ་གྒཾ བྷཱ་ཝེ་ཏི, ཛཱ་ཡ་མཱ་ནོ་ཐ ཝཱ པུ་ན.
༡༧༩༨. མ་གྒ་པྤ་ཝ་ཏྟི་ས་ནྟཱ་ནེ, བྷཱ་ཝ་ནཱ་ཏི པ་ཝུ་ཙྩ་ཏི;
ཝ་ཏྟ་མཱ་ནེ་ན ཏཾ ཀི་ཙྩཾ, ནི་པྥཱ་དི་ཏ་མ་སེ་ས་ཏོ.
༡༧༩༩. ཨི་ཏི ཏཱི་ཎི་པི ས་ཙྩཱ་ནི, ཀི་ཙྩ་ཏོ པ་ཊི་ཝི་ཛ྄ཛྷ་ཏི;
ནི་བྦཱ་ནཾ ས་ཙྪི་ཀུ་བྦ་ནྟོ, མ་གྒོ ཨེ་ཀ་ཀྑ་ཎེ ས་ཧ.
༡༨༠༠. ཀི་ཙྩ་པྤ་ཝ་ཏྟི་ཏོ ཙེ་ཏྠ, པ་ཊི་ཝེ་དྷོཏི ཝུ་ཙྩ་ཏི;
ཏ་ཉྩ སཱ་དྷེ་ཏི མ་གྒོ་ཡཾ, ནི་ཡྻ་ནྟོ ས་ནྟི་གོ་ཙ་རོ.
༡༨༠༡. པ་རི་ཙྩ་ཛི་ཏྭཱ ས་ངྑཱ་རེ, མ་གྒ་སྶཱ་ར་བྦྷ ནི་བྦུ་ཏིཾ,
ནི་ཡྻཱ་ན་མེ་ཝ ས་ཙྩེ་སུ, ཀི་ཙྩ་སཱ་དྷ་ན་མཱི་རི་ཏཾ.
༡༨༠༢. མ་གྒོ ཨེ་ཝ ཧི ནི་ཡྻཱ་ཏི, སེ་སཱ ཏ་སྶོ་པ་ཀཱ་ར་ཀཱ;
ཨ་པྤེ་ནྟཱ ཛྷཱ་ན་དྷ་མྨཱ ཙ, བུ་ཛ྄ཛྷ་ནྟཱ བོ་དྷི་པ་ཀྑི་ཡཱ.
༡༨༠༣. ཏ་སྨཱ ཏ་སྶེ་ཝ ཝུ་ཊྛཱ་ནཾ, པ་ཀཱ་སེ་ནྟི ཝི་སེ་ས་ཏོ;
ཁ་ནྡྷེ་ཧི ཙ ཀི་ལེ་སེ་ཧི, ཝི་མོ་ཀྑ་ཏྟ་ཡ་ཏོ ཀ་ཐཾ.
༡༨༠༤. ཀ་ཏྭཱ་ནཱ་བྷི་ནི་ཝེ་སཾ ཏུ, ཡ་ཏྠ ཏ་ཏྠ ཡ་ཐཱ ཏ་ཐཱ;
བྷཱུ་མི་དྷ་མྨཾ པ་རི་གྒ་ཡ྄ཧ, ཝི་པ་སྶི་ཏྭཱ ཏ་ཏོ པ་རཾ.
༡༨༠༥. ཡ་ཏོ ཀུ་ཏོ་ཙི ཝུ་ཊྛཱ་ནཾ, ཡ་དི ཧོ་ཏི ཨ་ནི་ཙྩ་ཏོ;
ཧུ་ཏྭཱ་དྷི་མོ་ཀྑ་བ་ཧུ་ལོ, ས་དྡྷི་ནྡྲི་ཡ་ཝི་སེ་ས་ཏོ.
༡༨༠༦. ཨ་ནི་མི་ཏྟ་ཝི་མོ་ཀྑེ་ན, ནི་ཡྻ་ནྟོ ས་ཏྟ་པུ་གྒ་ལོ;
ས་དྡྷཱ་ནུ་སཱ་རཱི པ་ཋ་མེ, མ་ཛ྄ཛྷེ ས་དྡྷཱ་ཝི་མུ་ཏྟ་ཀོ.
༡༨༠༧. ཨ་ནྟེ པ་ཉྙཱ་ཝི་མུ་ཏྟོ་ཏི, ཏ་མཱི་རེ་ནྟི ཏ་ཐཱ་ག་ཏཱ;
ས་ངྑཱ་རེ དུ་ཀྑ་ཏོ དི་སྭཱ, ཝུ་ཊྛ་ཧ་ནྟོ ས པུ་གྒ་ལོ.
༡༨༠༨. པ་སྶ་དྡྷི་བ་ཧུ་ལོ ཧུ་ཏྭཱ, ས་མཱ་དྷི་ནྡྲི་ཡ་ལཱ་བྷ་ཏོ;
ཏ་ཐེ་ཝཱ་པྤ་ཎི་ཧི་ཏེ་ན, ནི་ཡྻ་ནྟོ ཏི་ཝི་དྷོ བྷ་ཝེ.
༡༨༠༩. ཨ་ན་ཏྟ་ཏོ ཝུ་ཊྛ་ཧི་ཏྭཱ, ཝེ་ད་བཱ་ཧུ་ལྱ་ཡོ་ག་ཏོ;
སུ་ཉྙ་ཏེ་ནཱ་ཐ ནི་ཡྻ་ནྟོ, པ་ཉྙི་ནྡྲི་ཡ་ཝི་སེ་ས་ཏོ.
༡༨༡༠. དྷ་མྨཱ་ནུ་སཱ་རཱི པ་ཋ་མེ, དི་ཊྛི་པྤ་ཏྟོ ཏ་ཏོ པ་རཾ;
ཨ་ནྟེ པ་ཉྙཱ་ཝི་མུ་ཏྟོ་ཏི, ཏ་མྤི དཱི་པེ་ནྟི པ་ཎྜི་ཏཱ.
༡༨༡༡. ཨཱ་ནེ་ཉྫ་པཱ་ད་ཀ་ཛ྄ཛྷཱ་ན-ནཱ་མ་ཀཱ་ཡ་ཝི་སེ་ས་ཏོ;
ས་ཙྪི་ཀ་ཏྭཱ་ན ནི་བྦཱ་ནཾ, མ་ཛ྄ཛྷེ ཚ ཀཱ་ཡ་ས་ཀྑི་ནོ.
༡༨༡༢. ཨ་རཱུ་པ་ཏོ ཙ མ་གྒེ་ན, ཨཱ་ནེ་ཉྫེ་ན ཙ རཱུ་པ་ཏོ;
ཝི་མུ་ཏྟོ ཨུ་བྷ་ཏོ་བྷཱ་ག-ཝི་མུ་ཏྟོ ཨ་ར་ཧཱ བྷ་ཝེ.
༡༨༡༣. ཏི་ཝི་མོ་ཀྑ་མུ་ཁཱི་བྷཱུ་ཏཱ, ཨི་ཏི ཝུ་ཊྛཱ་ན་སཱ་དྷི་ཀཱ;
ས་ཏྟ་པུ་གྒ་ལ་བྷེ་ད་ཉྩ, ས་མྤཱ་དེ་ཏི ཝི་པ་སྶ་ནཱ.
༡༨༡༤. ཨ་དྷི་མུ་ཙྩ་ཏི ས་དྡྷཱ ཙ, ཡ་ཐཱ་ཝ་ཏྠུ་ས་བྷཱ་ཝ་ཏོ;
ཉེ་ཡྻ་དྷ་མྨེ་སུ ས་བྦ་ཏྠ, པ་ཉྙཱ ཙ པ་ཊི་ཝི་ཛ྄ཛྷ་ཏི.
༡༨༡༥. ཏ་སྨཱ ས་དྡྷཱ ཙ པ་ཉྙཱ ཙ, ཝ་ཏྠུ་ནི་ཙྪ་ཡ་ལ་ཀྑ་ཎཱ;
ཝ་ཏྠུ་པྤ་ཏི་ཊྛི་ཏཱ ཙཱ་ཡཾ, ཏི་ལ་ཀྑ་ཎ་ཝི་པ་སྶ་ནཱ.
༡༨༡༦. ཏ་སྨཱ ས་དྡྷཱ་དྷུ་རོ ཡོ་གཱི, དི་སྭོ་ལཱ༹་རི་ཀ་ལ་ཀྑ་ཎཾ;
ཏ་ཏོ པ་ར་མ་ན་ཏྟཱ་ཏི, སུ་ཁུ་མེ ཨ་དྷི་མུ་ཙྩ་ཏི.
༡༨༡༧. ཏ་སྶེ་ཝ་མ་དྷི་མུ་ཏྟ་སྶ, ས་དྡྷཱ ཝཱ པ་ན ཀེ་ཝ་ལཱ;
ས་མཱ་དྷི་ནྡྲི་ཡཱ་དྷི་ཀཱ ཙ, ཝུ་ཊྛཱ་ན་གྷ་ཊི་ཀཱ བྷ་ཝེ.
༡༨༡༨. ཐཱུ་ལ་ལ་ཀྑ་ཎ་མོ་ཧཱ་ཡ, པ་ཉྙཱ་དྷུ་རེ ཝི་པ་སྶ་ཏོ;
དྷ་མྨ་ས་བྷཱ་ཝ་མཱ་ཧ་ཙྩ, སུ་ཁུ་མཾ པ་ཊི་ཝི་ཛ྄ཛྷ་ཏི.
༡༨༡༩. ཏ་སྨཱ ས་དྡྷཱ་དྷུ་ར་སྶེ་ཝ, ཝུ་ཊྛཱ་ན་དྭ་ཡ་མཱ་དི་ཏོ;
ཨ་ནྟེ ས་དྡྷཱ་ནུ་ག་ཏ་སྶ, པ་ཉྙཱ སུ་པ་རི་པཱུ་ར་ཏི.
༡༨༢༠. པ་ཉྙཱ་དྷུ་ར་སྶ སེ་ས་ནྟི, ཀེ་ཙི ཨཱ་ཙ་རི་ཡཱ པ་ན;
དྷུ་ར་སཾ་ས་ནྡ་ནཾ ནཱ་མ, ཝུ་ཊྛཱ་ནེ་སུ ཝི་བྷཱ་ཝ་ཡུཾ.
༡༨༢༡. ས་ཏྟ་ཀྑ་ཏྟུ་པ་ར་མོ ཙ,
ཀོ་ལཾ་ཀོ་ལོ ཏ་ཐཱ་པ་རོ;
ཨེ་ཀ་བཱི་ཛཱི་ཏི ཏི་ཝི་དྷོ,
སོ་ཏཱ་པ་ནྣོ པ་ཝུ་ཙྩ་ཏི.
༡༨༢༢. ས་ཀིཾ་དེ་ཝ ཨི་མཾ ལོ་ཀཾ, ཨཱ་ག་ནྟྭཱ པུ་ན པུ་གྒ་ལོ;
ས་ཀ་དཱ་གཱ་མིནཱ་མེ་ན, དུ་ཏི་ཡོ་པི པ་ཀཱ་སི་ཏོ.
༡༨༢༣. ཨ་ནྟ་རཱ་པ་རི་ནི་བྦཱ་ཡཱི, ཨུ་པ་ཧ་ཙྩཱ་པ་རོ ཏ་ཐཱ;
ཨ་ས་ངྑཱ་རཾ ས་ས་ངྑཱ་རཾ, ཨུ་དྡྷཾ་སོ་ཏོ་ཏི པ་ཉྩ་དྷཱ.
༡༨༢༤. ཨ་ནཱ་གཱ་མཱི ཙ ཏ་ཏི་ཡོ, ཙ་ཏུ་ཏྠོ ཨ་ར་ཧཱཏི ཙ;
ཨི་ཏྠཾ ཕ་ལ་ཊྛཱ ཙ་ཏྟཱ་རོ, མ་གྒ་ཊྛཱ ཙ ཏ་ཏོ་པ་རེ.
༡༨༢༥. བྷཱ་ཝ་ནཱ་པ་རི་ཡཱ་ཡེ་ན, པ་ཊི་ཝེ་དྷཱ་ནུ་རཱུ་པ་ཏོ;
ཙ་ཏྟཱ་རོ ཙ ཡུ་གཱ ཧོ་ནྟི, ཨ་ཊྛ ཙཱ་རི་ཡ་པུ་གྒ་ལཱ.
༡༨༢༦. དི་ཊྛི་ཀ་ངྑཱ པ་ཧཱི་ཡ་ནྟི, ཨཱ་དི་མ་གྒེ་ན ས་བྦ་ཐཱ;
ཨ་པཱ་ཡ་ག་མ་ནཱི་ཡ་མྤི, པཱ་པ་མ་ཉྙཾ པ་ཧཱི་ཡ་ཏི.
༡༨༢༧. ས་ཀ་དཱ་གཱ་མི་མ་གྒེ་ན, ཁཱི་ཡ་ནྟོ་ལཱ༹་རི་ཀཱ ཏ་ཐཱ;
ཨ་ནཱ་གཱ་མི་ཀ་མ་གྒེ་ན, ཀཱ་མ་དོ་སཱ་ཝ ས་བྦ་ཐཱ.
༡༨༢༨. ཨ་ར་ཧ་ཏྟེ་ན ས་བྦེ་པི, ཀླེ་སཱ ཁཱི་ཡ་ནྟི ས་བྦ་ཐཱ;
ཀླེ་ས་ཧཱ་ནི ཡ་ཐཱ་ཡོ་ག-མི་ཏི ཉེ་ཡྻཱ ཝི་བྷཱ་ཝི་ནཱ.
༡༨༢༩. པ་ཊི་ས་མྦྷི་དཱ ཙ་ཏ་སྶོ, ཨ་ཏྠེ དྷ་མྨེ ནི་རུ་ཏྟི་ཡཾ;
པ་ཊི་བྷཱ་ནེ ཙ བྷཱ་ས་ནྟི, ཉཱ་ཎཾ བྷེ་ད་ག་ཏཾ བུ་དྷཱ.
༡༨༣༠. ཧེ་ཏུ་པྥ་ལ་ཉྩ ནི་བྦཱ་ནཾ, བྷཱ་སི་ཏ་ཏྠོ ཏ་ཐཱ་པ་རོ;
པཱ་ཀཱ་ཀྲི་ཡཱ་ཏི པ་ཉྩེ་ཏེ, ཨ་ཏྠནཱ་མེ་ན བྷཱ་སི་ཏཱ.
༡༨༣༡. ཧེ་ཏུ ཙཱ་རི་ཡ་མ་གྒོ ཙ, བྷཱ་སི་ཏ་ཉྩ ཏ་ཐཱ་པ་རཾ;
ཀུ་ས་ལཱ་ཀུ་ས་ལ་ཉྩེ་ཏི, པ་ཉྩ དྷ་མྨོ པ་ཀཱ་སི་ཏོ.
༡༨༣༢. ཏ་ཏྠེ་ཝཾ ད་ས་དྷཱ བྷེ་དེ, ཨ་ཏྠ་དྷ་མྨེ ཡ་ཐཱ་ར་ཧཾ;
ཡོ ཝོ་ཧཱ་རོ ས་བྷཱ་ཝེ་ན, སཱ ནི་རུ་ཏྟཱིཏི ས་མྨ་ཏཱ.
༡༨༣༣. ཏཾ་ཏཾ་གོ་ཙ་ར་ཀི་ཙྩཱ་དི-བྷེ་ད་བྷི་ནྣཾ ཏ་ཧིཾ ཏ་ཧིཾ;
པ་ཝ་ཏྟ་མཱ་ནཾ ཡཾ ཉཱ་ཎཾ, པ་ཊི་བྷཱ་ནཾ ཏ་མཱི་རི་ཏཾ.
༡༨༣༤. པུ་བྦ་ཡོ་གོ བཱ་ཧུ་སྶ་ཙྩཾ,
དེ་ས་བྷཱ་སཱ ཏ་ཐཱ་ག་མོ;
པ་རི་པུ་ཙྪཱ ཙཱ་དྷི་ག་མོ,
ནི་སྶ་ཡོ མི་ཏྟ་ས་མྤ་དཱ.
༡༨༣༥. ཨི་ཙྩཱུ་པ་ནི་སྶ་ཡཾ ལ་དྡྷཱ, བྷི་ཛྫ་ཏི པ་ཊི་ས་མྦྷི་དཱ;
ཨ་སེ་ཀྑ་བྷཱུ་མི་ཡཾ ཝཱ་ཐ, སེ་ཀྑ་བྷཱུ་མི་ཡ་མེ་ཝ ཝཱ.
༡༨༣༦. ས་ར་སྶ་ཏོ ཨཱ་ག་མ་ཏོ, ཏ་ཐཱ་ལ་མྦ་ཎ་ཏོ་པི ཙ;
ནཱ་མུ་པྤ་ཏྟིཾ པ་ཀཱ་སེ་ནྟི, ཕ་ལ་སྶ ཏི་ཝི་དྷཾ བུ་དྷཱ.
༡༨༣༧. ཏི་དྷཱ ཏ་ཏོ ས་མཱ་པ་ཏྟི, སོ་ཏཱ་པ་ཏྟི་ཕ་ལཱ་དི་ཀཱ;
སུ་ཉྙ་ཏཱ ཙཱ་ནི་མི་ཏྟཱ ཙ, ཏ་ཐཱ་པྤ་ཎི་ཧི་ཏཱ་ཏི ཙ.
༡༨༣༨. ཏ་ཉྩ ཝུ་ཏྟ་ན་ཡེ་ནེ་ཝ, ས་མཱ་པ་ཛྫི་ཏུ་མི་ཙྪ་ཏོ;
ཝི་པ་སྶ་ནྟ་སྶ ས་ངྑཱ་རེ, ཕ་ལ་མ་པྤེ་ཏི ཨ་ཏྟ་ནོ.
༡༨༣༩. ནི་རོ་དྷཾ ཏུ ས་མཱ་པ་ཏྟིཾ, རཱུ་པཱ་རཱུ་པ་སྶ ལཱ་བྷ་ཀོ;
ས་མཱ་པ་ཛྫ་ཏཱ་ནཱ་གཱ་མཱི, ཨ་ར་ཧཱ ཙ ཡ་ཐཱ ཏ་ཐཱ.
༡༨༤༠. རཱུ་པཱ་རཱུ་པ་ས་མཱ་པ་ཏྟིཾ, ས་མཱ་པ་ཛྫ ཡ་ཐཱ་ཀྐ་མཾ;
ཝུ་ཊྛ་ཧི་ཏྭཱ ཝི་པ་སྶ་ནྟོ, ཏ་ཏྠ ཏ་ཏྠེ་ཝ ས་ངྑ་ཏེ.
༡༨༤༡. ཡུ་ག་ན་ནྡྷཾ པ་ཝ་ཏྟེ་ཏྭཱ, ས་མ་ཐ་ཉྩ ཝི་པ་སྶ་ནཾ;
ཡཱ་ཝཱ་ཀི་ཉྩ་ཉྙཱ་ཡ་ཏ་ན-མི་ཏྠཾ པ་ཏྭཱ ཏ་ཏོ པ་རཾ.
༡༨༤༢. ཨ་དྷི་ཊྛེ་ཡྻ་མ་དྷི་ཊྛཱ་ཡ, ཀ་ཏྭཱ་བྷོ་གཾ ཡ་ཐཱ་ར་ཧཾ;
མ་གྒཱ་རཱུ་པ་ས་མཱ་པ་ཏྟིཾ, ས་མཱ་པ་ཛྫ་ཏི པ་ཎྜི་ཏོ.
༡༨༤༣. ཏ་ཏོ ནི་རོ་དྷཾ ཕུ་ས་ཏི, ཙི་ཏྟུ་པྤཱ་ད་དྭ་ཡཱ པ་རཾ;
ཏ་སྶེ་ཝཾ མ་ན་སཱ་བྷཱ་ཝོ, ནི་རོ་དྷོཏི པ་ཝུ་ཙྩ་ཏི.
༡༨༤༤. ཕ་ལ་ཙི་ཏྟ་ས་མུ་པྤཱ་དཱ, ཝུ་ཊྛཱ་ནཾ ཏ་སྶ དཱི་པི་ཏཾ;
ཏ་ཏོ བྷ་ཝ་ངྒཾ ཚེ་ཏྭཱ་ན, པ་ཙྩ་ཝེ་ཀྑ་ཏི བུ་དྡྷི་མཱ.
༡༨༤༥. ཨི་ཙྩཱ་ནེ་ཀ་གུ་ཎཱ་དྷཱ་རཾ, པ་ཉྙཱ་བྷཱ་ཝ་ན་མུ་ཏྟ་མཾ;
བྷཱ་ཝེ་ཡྻ མ་ཏི་མཱ ཡོ་གཱི, པ་ཏྠེ་ནྟོ ཧི་ཏ་མ་ཏྟ་ནོ.
༡༨༤༦. ཨི་ཏྠཾ སུ་ས་མྤཱ་དི་ཏ་སཱི་ལ་ཙི་ཏྟ-
པ་ཉྙཱ་ཝི་སུ་དྡྷཱི པ་ཊི་པཱ་ད་ཡ་ནྟཱ;
པ་ཏྭཱ་ན ས་མྦོ་དྷི་མ་པེ་ཏ་སོ་ཀཱ,
པཱ་ལེ་ནྟི སོ་ཏྠིཾ པ་ར་མཾ ཙི་རཱ་ཡ.
༡༨༤༧. ཏེ པ་ཏྟི་པ་ཏྟཱ པ་ར་མ་པྤ་ཏཱི་ཏཱ,
པ་ཀྑཱ་ལི་ཏ་ཀླེ་ས་མ་ལཱ མ་ཧེ་སཱི;
ཨ་ཙྩ་ནྟ་ཝོ་དཱ་ཏ་གུ་ཎོ་དི་ཏ་ཏྟཱ,
ལོ་ཀ་སྶ ཧོ་ནྟུ་ཏྟ་མ་ད་ཀྑི་ཎེ་ཡྻཱ.
ཨི་ཏི ནཱ་མ་རཱུ་པ་པ་རི་ཙྪེ་དེ ནི་སྶ་ནྡ་ཕ་ལ་ཝི་བྷཱ་གོ ནཱ་མ
ཏེ་ར་ས་མོ པ་རི་ཙྪེ་དོ.
ནི་ཊྛི་ཏོ ཙ ས་བྦ་ཐཱ་པི ཝི་པ་སྶ་ནཱ་ཝི་བྷཱ་གོ.
ནི་ག་མ་ན་ཀ་ཐཱ
༡༨༤༨. ཨེ་ཏྟཱ་ཝ་ཏཱ པ་ཊི་ཉྙཱ་ཏོ, པ་ཝ་ཀྑཱ་མཱི་ཏི ཨཱ་དི་ཏོ;
ནཱ་མ་རཱུ་པ་པ་རི་ཙྪེ་དོ, པ་རི་ནི་ཊྛཱ་པི་ཏོ མ་ཡཱ.
༡༨༤༩. ཏེ་ར་སེ་ཝ པ་རི་ཙྪེ་དཱ, ཝི་བྷ་ཏྟཱ ས་ཏྟ སཱ་དྷི་ཀཱ;
ནཱ་མ་རཱུ་པ་པ་རི་ཙྪེ་དེ, བྷཱ་ཎ་ཝཱ་རཱ པ་ཀཱ་སི་ཏཱ.
༡༨༥༠. ཨ་བྷི་དྷ་མྨ་པ་ར་མ་ཏྠཱ, ས་མ་ཐོ ཙ ཝི་པ་སྶ་ནཱ;
ཝི་སུཾ ཝི་སུཾ ཝི་བྷ་ཏྟཱ་ཏི, ཝི་བྷཱ་གེ་ཏྠ ཏི་དྷཱ མ་ཏཱ.
༡༨༥༡. སོ་ཡཾ ཝི་ཛྫཱ་ཝི་མོ་ཀྑཱ ཙ, ཧ་ད་ཡེ་སུ ཝི་བྷཱ་ཝི་ནཾ;
ཝ་ལླ་བྷ་ཏྟ་མ་དྷི་ཊྛཱ་ཡ, སཱ་ས་ནེ་ཏྠ ག་ཝེ་སི་ནཾ.
༡༨༥༢. མ་ནོ་ག་ཏ་ཏ་མུ་དྡྷཾ་སཱི, ར་ཝི་རཾ་སཱི་ཝ པ་ཎྜི་ཏོ;
ད་སྶེ་ཏུ ཙི་ར་མཱ་ལོ་ཀཾ, ས་དྡྷ་མྨ་ར་ཏ་ནཱ་ལ་ཡེ.
༡༨༥༣. པ་ཎྜི་ཙྩཾ པ་ར་མ་ཏྠེ་སུ, པཱ་ཊ་ཝཾ པ་ཊི་པ་ཏྟི་ཡཾ;
པ་ཏྠ་ཡ་ནྟེ་ན བྷི་ཀྑཱུ་ན-མི་ཏྠཾ སུ་ག་ཏ་སཱ་ས་ནེ.
༡༨༥༤. ནཱ་མ་རཱུ་པ་པ་རི་ཙྪེ་ད-མ་སཾ་ཀི་ཎྞ་མ་ནཱ་ཀུ་ལཾ;
ཀུ་བྦ་ཏཱ ཧི་ཏ་ཀཱ་མེ་ན, སུ་ཀ་ཏེ་ན ཀ་ཏེ་ན མེ.
༡༨༥༥. མ་ཧཱ་མེ་རུ་ནི་བྷཾ གེ་ཧཾ, མ་ཧཱ་ཙེ་ཏི་ཡ་བྷཱུ་སི་ཏཾ;
མ་ཧཱ་ཝི་ཧཱ་ར་མཱ་རུ་ལ༹ྷ-མ་ཧཱ་བོ་དྷི་མ་ཧུ་སྶ་ཝཾ.
༡༨༥༦. ཨ་ལ་ངྐཱ་ཏུཾ པ་ཧོ་ནྟཱ་ལཾ, ཙི་ར་ཀཱ་ལཾ ཏ་པོ་དྷ་ནཱ;
ལ་ངྐཱ་དཱི་པ་སྶ་ལ་ངྐཱ་རཾ, ཀ་ལ་ངྐཱ་པ་ག་ཏཱ་ལ་ཡཾ.
༡༨༥༧. ནཱ་མ་རཱུ་པ་པ་རི་ཙྪེ་དོ,
ཨ་ནྟ་རཱ་ཡཾ ཝི་ནཱ ཡ་ཐཱ;
ནི་ཊྛི་ཏོ་ཡཾ ཏ་ཐཱ ལོ་ཀེ,
ནི་ཊྛ་ནྟ་ཛ྄ཛྷཱ་ས་ཡཱ སུ་བྷཱ.
ཨི་ཏི ཨ་ནུ་རུ་དྡྷཱ་ཙ་རི་ཡེ་ན ཝི་ར་ཙི་ཏཾ
ནཱ་མ་རཱུ་པ་པ་རི་ཙྪེ་ད་པ་ཀ་ར་ཎཾ ནི་ཊྛི་ཏཾ.