དུ་ཏི་ཡོ པ་རི་ཙྪེ་དོ
༢. པ་ཀི་ཎྞ་ཀ་ཀ་ཐཱ
༤༦. ཀུ་ས་ལཱ་ནེ་ཀ་ཝཱི་སེ་ཝ, དྭཱ་ད་སཱ་ཀུ་ས་ལཱ་ནི ཙ;
ཚ་ཏྟིཾ་ས་ཏི ཝི་པཱ་ཀཱ་ནི, ཀྲི་ཡཱ་ཙི་ཏྟཱ་ནི ཝཱི་ས་ཏི.
༤༧. ཀཱ་མེ་སུ ཙ་ཏུ་པ་ཉྙཱ་ས, རཱུ་པེ་སུ ད་ས པ་ཉྩ ཙ;
དྭཱ་ད་སཱ་རུ་པྤ་ཙི་ཏྟཱ་ནི, ཨ་ཊྛཱ་ནུ་ཏྟ་ར་མཱ་ན་སཱ.
༤༨. ཀཱ་མེ ཏེ་ཝཱི་ས པཱ་ཀཱ་ནི, པུ་ཉྙཱ་པུ་ཉྙཱ་ནི ཝཱི་ས་ཏི;
ཨེ་ཀཱ་ད་ས ཀྲི་ཡཱ ཙེ་ཏི, ཙ་ཏུ་པ་ཉྙཱ་ས ས་བྦ་ཐཱ.
༤༩. པུ་ཉྙ་པཱ་ཀ་ཀྲི་ཡཱ་བྷེ་དཱ, ཏ་ཡོ རཱུ་པེ་སུ པ་ཉྩ་ཀཱ;
ཨཱ་རུ་པྤེ་ཏི ཙ་ཏུ་ཀྐཱ་ནི, ས་ཏྟ་ཝཱི་ས མ་ཧ་གྒ་ཏཱ.
༥༠. ཙ་ཏུ་མ་གྒ་ཕ་ལཱ་ནཾ ཏུ, ཝ་སེ་ན་ཊྛ་པི ཛྷཱ་ན་ཏོ;
ད་སོ་བྷ་ཡ་མྤི མི་སྶེ་ཏྭཱ, ཏཱ་ལཱི་སཱ་ནུ་ཏྟ་རཱ སི་ཡུཾ.
༥༡. པུ་ཉྙ་པཱ་ཀ་ཀྲི་ཡཱ་པཱ་པཱ, ས་ནྟི ཀཱ་མེ མ་ཧ་གྒ་ཏེ;
པཱ་པཾ ན་ཏྠི ཀྲི་ཡཱ་པཱ་པཱ, ན ཝི་ཛྫ་ནྟི ཨ་ནུ་ཏྟ་རེ.
༥༢. པཱ་པཱ་ཧེ་ཏུ་ཀ་མུ་ཏྟཱ་ནི, ཨ་ན་ཝ་ཛྫཱ་ནི ས་བྦ་ཐཱ;
ཨེ་ཀཱུ་ན་ས་ཊྛི ཙི་ཏྟཱ་ནི, པུ་ཉྙ་པཱ་ཀ་ཀྲི་ཡཱ་ཝ་སཱ.
༥༣. ཀ་མྨ་ཙི་ཏྟཱ་ནི ཏེ་ཏྟིཾ་ས, པུ་ཉྙཱ་པུ་ཉྙཱ་ནི ས་བྦ་ཐཱ;
ཚ་ཏྟིཾ་ས ཏེ་སཾ པཱ་ཀཱ་ནི, ཀྲི་ཡཱ ཝཱི་ས ན ཙོ་བྷ་ཡཾ.
༥༤. ཙ་ཀྑུ་ཝི་ཉྙཱ་ཎ་དྷཱ་ཏཱ་དི, པ་ཉྩ་ཝི་ཉྙཱ་ཎ་ནཱ་མ་ཀཱ;
པ་ཉྩ་དྭཱ་རཱ་ཝ་ཛྫ་ན་ཉྩ, དུ་ཝི་དྷཾ ས་མྤ་ཊི་ཙྪ་ནཾ.
༥༥. མ་ནོ་དྷཱ་ཏུ་ཏྟ་ཡཾ ནཱ་མ, ཚ་ས་ཏྟ་ཏི ཏ་ཏོ པ་རེ;
མ་ནོ་ཝི་ཉྙཱ་ཎ་དྷཱ་ཏཱུ་ཏི, ས་ཏྟ་དྷཱ དྷཱ་ཏུ་བྷེ་ད་ཏོ.
༥༦. མ་ནོ་ཝི་ཉྙཱ་ཎ་དྷཱ་ཏུ་ཉྩ, མ་ནོ་དྷཱ་ཏུ་ཏྟ་ཡཾ ཏ་ཐཱ;
ཀ་ཏྭཱ མ་ནོ་ཝི་ཉྙཱ་ཎ་ནྟི, ཚ ཝི་ཉྙཱ་ཎཱ པ་ཀི་ཏྟི་ཏཱ.
༥༧. ཨཱ་ཝ་ཛྫ་ནཾ ད་སྶ་ན་ཉྩ, ས་ཝ་ནཾ གྷཱ་ཡ་ནཾ ཏ་ཐཱ;
སཱ་ཡ་ནཾ ཕུ་ས་ན་ཉྩེ་ཝ, ས་མྤ་ཊི་ཙྪ་ན་ཏཱི་ར་ཎཾ.
༥༨. ཝོ་ཊྛ་བྦ་ན་ཉྩ ཛ་ཝ་ནཾ, ཏ་དཱ་ར་མྨ་ཎ་ནཱ་མ་ཀཾ;
བྷ་ཝ་ངྒཾ ཙུ་ཏི ས་ནྡྷཱི་ཏི, ཙི་ཏྟཾ ཙུ་དྡ་ས་དྷཱ ཋི་ཏཾ.
༥༩. ཨཱ་ཝ་ཛྫ་ནཱ་ད་ཡོ དྭེ དྭེ, ཡུ་གཱ ས་ཏྟ ཡ་ཐཱ་ཀྐ་མཾ;
ཏཱི་ཎི ཏཱི་ར་ཎ་ཙི་ཏྟཱ་ནི, ཨེ་ཀཾ ཝོ་ཊྛ་བྦ་ནཾ མ་ཏཾ.
༦༠. ཀུ་ས་ལཱ་ཀུ་ས་ལཱ ས་བྦེ, ཕ་ལཱ ཙཱ་ཝ་ཛྫ་ནཾ ཝི་ནཱ;
ཀྲི་ཡཱ ཙ པ་ཉྩ་པ་ཉྙཱ་ས, ཛ་ཝ་ན་ནྟི པ་ཝུ་ཙྩ་རེ.
༦༡. ས་ནྟཱི་ར་ཎ་མ་ཧཱ་པཱ་ཀཱ, ཏ་དཱ་ར་མྨ་ཎ་ནཱ་མ་ཀཱ;
ཨེ་ཀཱ་ད་ས པ་ཝ་ཏྟ་ནྟི, ཛ་ཝ་ནཱ་ར་མྨ་ཎེ ཡ་ཏོ.
༦༢. མ་ཧ་གྒ་ཏ་མ་ཧཱ་པཱ་ཀཱ, ཨུ་པེ་ཀྑཱ་ཏཱི་ར་ཎ་དྭ་ཡཾ;
ཙུ་ཏི་ས་ནྡྷི་བྷ་ཝ་ངྒཱ་ནི, ཙི་ཏྟཱ་ནེ་ཀཱུ་ན་ཝཱི་ས་ཏི.
༦༣. ཛ་ཝ་ནཱ་ཝ་ཛྫ་ནཱ་དཱི་ནི, ཝོ་ཊྛ་བྦ་སུ་ཁ་ཏཱི་ར་ཎཱ;
མ་ཧ་གྒ་ཏ་མ་ཧཱ་པཱ་ཀཱ, ཨུ་པེ་ཀྑཱ་ཏཱི་ར་ཎཱ་ཏི ཙ.
༦༤. ཨ་ཊྛ་ས་ཊྛི ཏ་ཐཱ དྭེ ཙ, ན་ཝ་ཊྛ དྭེ ཡ་ཐཱ་ཀྐ་མཾ;
ཨེ་ཀ་དྭི་ཏི་ཙ་ཏུ་པྤ་ཉྩ་ཀི་ཙྩ་ཊྛཱ་ནཱ་ནི ནི་དྡི་སེ.
༦༥. རཱུ་པ་པཱ་ཀཱ མ་ཧཱ་པཱ་ཀཱ, མ་ནོ་དྷཱ་ཏུ ཙ ཏཱི་ར་ཎཾ;
རཱུ་པཾ ཛ་ནེ་ནྟི ཨེ་ཀཱུ་ན་ཝཱི་ས་ཏི ནེ་ཏ་ར་དྭ་ཡཾ.
༦༦. ཨ་བྷི་ཉྙཱ་ཝ་ཛྫི་ཏཱ ས་བྦེ, ཨ་པྤ་ནཱ་ཛ་ཝ་ནཱ པ་ན;
རཱུ་པཾ ཛ་ནེ་ནྟི ཚ་བྦཱི་ས, པ་ཎཱ་མེ་ནྟི་རི་ཡཱ་པ་ཐཾ.
༦༧. ཨ་བྷི་ཉྙཱ་དྭ་ཡ་ཝོ་ཊྛ་བྦ་པ་རི་ཏྟ་ཛ་ཝ་ནཱ པ་ན;
དྭ་ཏྟིཾ་ས རཱུ་པ་ཝི་ཉྙ་ཏྟི་ཨི་རི་ཡཱ་པ་ཐ་སཱ་དྷ་ཀཱ.
༦༨. པ་ཉྩ་ཝི་ཉྙཱ་ཎ་མཱ་རུ་པྤ-ཝི་པཱ་ཀཱ ས་བྦ་ས་ནྡྷི་ཡོ;
ཙུ་ཏི ཁཱི་ཎཱ་ས་ཝ་སྶེ་ཏི, སོ་ལ༹་སེ་ཏེ ན ཀི་ཉྩི་པི.
༦༩. རཱུ་པཾ ཛ་ནེ་ནྟི ཙི་ཏྟཱ་ནི, ས་ཏྟ་ས་ཏྟ་ཏི ས་བྦ་ཐཱ;
ཨ་ཊྛ་པ་ཉྙཱ་ས ཙི་ཏྟཱ་ནི, པ་ཎཱ་མེ་ནྟི་རི་ཡཱ་པ་ཐཾ.
༧༠. དྭ་ཏྟིཾ་ས ཙ་ཏུ་ཝི་ཉྙ་ཏྟིཾ, ས་མུ་ཊྛཱ་པེ་ནྟི མཱ་ན་སཱ;
ན ཛ་ནེ་ནྟི ཏ་སྶ་མྤེ་ཀཾ, ཡ་ཐཱ་ཝུ་ཏྟཱ་ནི སོ་ལ༹་ས.
༧༡. སོ་མ་ན་སྶ་ས་ཧ་ག་ཏཱ, པ་རི་ཏྟ་ཛ་ཝ་ནཱ པ་ན;
ཧ་ས་ན་མྤི ཛ་ནེ་ནྟཱི་ཏི, ཙ་ཏུ་ཀི་ཙྩཱ་ནི ཏེ་ར་ས.
༧༢. ས་བྦ་མྤི པ་ཉྩ་ཝོ་ཀཱ་རེ, ཀི་ཙྩ་མེ་ཏཾ པ་ཀཱ་སི་ཏཾ;
ཨཱ་རུ་པྤེ པ་ན ས་བྦ་མྤི, རཱུ་པཱ་ཡ་ཏྟཾ ན ཝི་ཛྫ་ཏི.
༧༣. ཨ་ས་ཉྙཱི་ནཾ ཏུ ས་བྦཱ་ནི, ཙི་ཏྟཱ་ནེ་ཝ ན ལ་བྦྷ་རེ;
རཱུ་པ་ཀྑ་ནྡྷོ་ཝ ཏེ་སཾ ཏུ, ཨ་ཏྟ་བྷཱ་ཝོ་ཏི ཝུ་ཙྩ་ཏི.
༧༤. པཱ་ཎཱ་ཏི་པཱ་ཏ་ཐེ་ཡྻཱ་དི་ཝ་སེ་ནོ་པ་ཙི་ཏཾ པ་ན;
ཨུ་དྡྷ་ཙྩ་ར་ཧི་ཏཱ་པུ་ཉྙཾ, ཙ་ཏུ་རཱ་པཱ་ཡ་བྷཱུ་མི་ཡཾ.
༧༥. ད་ཏྭཱ ས་ནྡྷིཾ པ་ཝ་ཏྟེ ཏུ, པ་ཉྩ་ཝོ་ཀཱ་ར་བྷཱུ་མི་ཡཾ;
ཨུ་དྡྷ་ཙྩ་ས་ཧི་ཏ་ཉྩཱ་པི, ས་ཏྟ པཱ་ཀཱ་ནི པ་ཙྩ་ཏི.
༧༦. དཱ་ན་སཱི་ལཱ་དི་བྷེ་དེ་ན, པ་ཝ་ཏྟཾ ཀུ་ས་ལཾ པ་ན;
ཀཱ་མེ མཱ་ན་ས་མུ་ཀྐ་ཊྛཾ, ཙ་ཏུ་ཀྐཾ ཏུ ཏི་ཧེ་ཏུ་ཀཾ.
༧༧. ད་ཏྭཱ ཏི་ཧེ་ཏུ་ཀཾ ས་ནྡྷིཾ, ཀཱ་མེ སུ་ག་ཏི་ཡཾ པ་ན;
སོ་ལ༹་ས པུ་ཉྙ་པཱ་ཀཱ་ནི, པ་ཝ་ཏྟེ ཏུ ཝི་པ་ཙྩ་ཏི.
༧༨. ཏི་ཧེ་ཏུ་ཀོ་མ་ཀཾ པུ་ཉྙཾ, ཨུ་ཀྐ་ཊྛ་ཉྩ དྭི་ཧེ་ཏུ་ཀཾ;
ད་ཏྭཱ དྭི་ཧེ་ཏུ་ཀཾ ས་ནྡྷིཾ, ཀཱ་མེ སུ་ག་ཏི་ཡཾ ཏ་ཐཱ.
༧༩. པ་ཝ་ཏྟེ པ་ན ཉཱ་ཎེ་ན, ས་མྤ་ཡུ་ཏྟཾ ཝི་ཝ་ཛྫི་ཡ;
དྭཱ་ད་ས པུ་ཉྙ་པཱ་ཀཱ་ནི, ཝི་པ་ཙྩ་ཏི ཡ་ཐཱ་ར་ཧཾ.
༨༠. དྭི་ཧེ་ཏུ་ཀོ་མ་ཀཾ པུ་ཉྙཾ, པ་ཊི་ས་ནྡྷི་མ་ཧེ་ཏུ་ཀཾ;
དེ་ཏི མཱ་ནུ་ས་ཀེ ཙེ་ཝ, ཝི་ནི་པཱ་ཏཱ་སུ་རེ ཏ་ཐཱ.
༨༡. ཨ་ཊྛཱ་ཧེ་ཏུ་ཀ་པཱ་ཀཱ་ནི, པ་ཝ་ཏྟེ ཏུ ཝི་པ་ཙྩ་རེ;
ཙ་ཏྟཱ་རི་པི ཙ་ཏུ་ཀྐཱ་ནི, པ་ཉྩ་ཝོ་ཀཱ་ར་བྷཱུ་མི་ཡཾ.
༨༢. བྷཱ་ཝ་ནཱ་མ་ཡ་པུ་ཉྙཾ ཏུ, མ་ཧ་གྒ་ཏ་མ་ནུ་ཏྟ་རཾ;
ཡ་ཐཱ་བྷཱུ་མི་ནི་ཡཱ་མེ་ན, དེ་ཏི པཱ་ཀཾ ཡ་ཐཱ་ས་ཀཾ.
༨༣. ཀ་ཊ་ཏྟཱ་རཱུ་པ་པཱ་ཀཱ་ནི, པ་ཉྩ་ཝོ་ཀཱ་ར་བྷཱུ་མི་ཡཾ;
ཨཱ་རུ་པྤཱ་ནུ་ཏྟ་རེ པཱ་ཀཾ, ཏ་ཐཱ རཱུ་པ་མ་ས་ཉྙི་སུ.
༨༤. པུ་ཉྙཱ་པུ་ཉྙཱ་ནི ཀ་མྨཱ་ནི, ཏེ་ཏྟིཾ་སཱ་པི ཙ ཡ་བྦ་ཐཱ;
ས་ཉྫ་ནེ་ནྟི ཡ་ཐཱ་ཡོ་གཾ, པ་ཊི་ས་ནྡྷི་པ་ཝ་ཏྟི་ཡཾ.
ཨི་ཏི ཙི་ཏྟ་ཝི་བྷཱ་གེ པ་ཀི་ཎྞ་ཀ་ཀ་ཐཱ ནི་ཊྛི་ཏཱ.
དུ་ཏི་ཡོ པ་རི་ཙྪེ་དོ.