ཨ་ཊྛ་ཝཱི་ས་ཏི་མོ པ་རི་ཙྪེ་དོ
༢༨. ཨ་ཏྠ་པ་ཉྙ་ཏྟི་ཀ་ཐཱ
༡༠༨༤. ཏ་ཏྠ ཙ པུ་བྦཱ་པ་རི་ཡ-པ་ཝ་ཏྟ་ཀྑ་ནྡྷ་ས་མྨ་ཏཱ;
ཝི་ཉྙ་ཏྟི་ནྡྲི་ཡ་ཝི་པྥཱ་ར-ཝི་སེ་སོ་པ་ནི་བ་ནྡྷ་ནཱ.
༡༠༨༥. དེ་ཝ་ཡ་ཀྑ་མ་ནུ་སྶཱ་དི-ནཱ་ནཱ་བྷེ་དཱ ས་ལ་ཀྑི་ཀཱ;
ས་ཏྟ་པ་ཉྙ་ཏྟི ནཱ་མཱ་ཡཾ, སྭཱ་ཡཾ ས་ཏྟོ་ཏི ས་མྨ་ཏོ.
༡༠༨༦. ཝ་ཊྚ་ཏྟ་ཡ་མུ་པཱ་དཱ་ཡ,
ཁ་ནྡྷཱ་ཡ་ཏ་ན་ཝུ་ཏྟི་ཡཱ;
ཀཱ་ར་ཀོ ཝེ་ད་ཀོ ཝཱ་ཡཾ,
ས་ནྡྷཱ་ཝ་ཏི བྷ་ཝེ བྷ་ཝེ.
༡༠༨༧. ཏ་སྨཱ སཾ་སཱ་ར་མཱ་པ་ནྣོ, ས་ཏྟོ ནཱ་མ ས པུ་གྒ་ལོ;
ཨ་ཧ་མ་ཏྟཱ་པ་རཱ ཨི་ཏྠཱི, པུ་རི་སོ་ཏི ཙ ཀ་པྤི་ཏོ.
༡༠༨༨. སྭཱ་ཡཾ ཁ་ནྡྷཱ་དི་ཏོ ས་ཏྟོ, ཨ་ཉྙོ་ཏི ཙ ན ཝུ་ཙྩ་ཏི;
ཁ་ནྡྷཱ་དི་ཝི་ནི་མུ་ཏྟ་སྶ, ས་ཏྟ་སྶེ་ཝ ཨ་བྷཱ་ཝ་ཏོ.
༡༠༨༩. ཁ་ནྡྷཱ ཁ་ནྡྷཱ་ན་མེ་ཝཱ་ཡཾ, ས་ཏྟོ་ཏི ཙ ན ཝུ་ཙྩ་ཏི;
ཁ་ནྡྷ་ཝོ་ཧཱ་ར་ཏོ ཏ་སྶ, ཨ་ཉྙ་ཝོ་ཧཱ་ར་ས་མྦྷ་ཝཱ.
༡༠༩༠. ཨི་ཙྩེ་ཝཾ ཁ་ནྡྷ་ནཱ་ན་ཏྟེ-ཀ་ཏྟ་མུ་ཏྟོ་པི ཨ་ཏྠ་ཏོ;
ཏ་བྦི་སེ་སཱ་ཝ་ཙ་རི་ཏ-ཝོ་ཧཱ་རོ ཙ ཏུ དི་སྶ་ཏི.
༡༠༩༡. ཏེ་ནཱ་ཡཾ པུ་གྒ་ལོ ས་ཏྟོ, ཛཱ་ཡ་ཏི་ཛྫི་ཡྻ་ཏཱི་ཏི ཙ;
མཱི་ཡ་ཏཱི་ཏི ཙ ཏ་སྶཱ་ཡཾ, སཾ་སཱ་རོ་ཏི པ་ཝུ་ཙྩ་ཏི.
༡༠༩༢. མ་ཏོ ཛཱ་ཏོ ཙ ན སྭེ་ཝ, ཁ་ནྡྷ་བྷེ་དོ་པ་ཙཱ་ར་ཏོ;
ནཱ་པ་རོ སྭེ་ཝ ས་ནྟཱ་ན་བྷེ་དཱ་བྷཱ་ཝོ་པ་ཙཱ་ར་ཏོ.
༡༠༩༣. ནཱ་ན་ཏྟེ་ཀ་ཏྟ་མི་ཙྩེ་ཝཾ, པུ་གྒ་ལ་སྶོ་པ་ཙཱ་ར་ཏོ;
ཨུ་ཙྪེ་ད་ས་སྶ་ཏ་ཏྟཾ ཝཱ, ཏ་སྨཱ ནོ་པེ་ཏི པུ་གྒ་ལོ.
༡༠༩༤. ཨི་ཙྩཱ་ཡཾ པུ་གྒ་ལོ ནཱ་མ, ས་ཏྟོ སཾ་སཱ་ར་ཀཱ་ར་ཀོ;
ཁ་ནྡྷཱ་དི་ཀ་མུ་པཱ་དཱ་ཡ, པ་ཉྙ་ཏྟོ་ཏི པ་ཝུ་ཙྩ་ཏི.
༡༠༩༥. ཏ་སྨཱ པུ་གྒ་ལ་ས་ངྑཱ་ཏཱ, སཾ་སཱ་རོ་པ་ནི་བ་ནྡྷ་ནཱ;
ས་ཏྟ་པ་ཉྙ་ཏྟི ནཱ་མཱ་ཏི, ཝི་ཉྙཱ་ཏ་བྦཱ ཝི་བྷཱ་ཝི་ནཱ.
༡༠༩༦. ཨ་ཛ྄ཛྷ་ཏྟི་ཀཱ ཙ ཀེ་སཱ་དི་ཀོ་ཊྛཱ་སཱ བཱ་ཧི་རེ་སུ ཙ;
བྷཱུ་མི་པ་བྦ་ཏ་པཱ་སཱ་ཎ་ཏི་ཎ་རུ་ཀྑ་ལ་ཏཱ་དི་ཀཱ.
༡༠༩༧. བྷཱུ་ཏ་ས་མྦྷཱ་ར་ནི་བྦ་ཏྟི་ཝི་བྷཱ་ག་པ་རི་ཀ་པྤི་ཏཱ;
ཏ་མུ་པཱ་དཱ་ཡ ས་མྦྷཱ་ར་པ་ཉྙ་ཏྟཱིཏི པ་ཝུ་ཙྩ་ཏི.
༡༠༩༨. བྷཱུ་ཏ་ས་མྦྷཱ་ར་ས་ཎྛཱ་ན་ཝི་བྷཱ་ག་པ་རི་ཀ་པྤི་ཏཱ;
ས་ཎྛཱ་ན་པ་ཉྙ་ཏྟི ནཱ་མ, ཐ་མྦྷ་ཀུ་མྦྷཱ་དི་ཀཱ མ་ཏཱ.
༡༠༩༩. བྷཱུ་ཏ་ས་མྦྷཱ་ར་ས་ངྒྷཱ་ཏ་ཝི་སེ་ས་པ་རི་ཀ་པྤི་ཏཱ;
ས་ངྒྷཱ་ཏ་པ་ཉྙ་ཏྟི ནཱ་མ, ར་ཐ་གེ་ཧཱ་དི་ཀཱ མ་ཏཱ.
༡༡༠༠. བྷཱུ་ཏ་ས་མྦྷཱ་ར་ཝི་སེ་ས་པ་རི་ཎཱ་མ་པ་ཀ་པྤི་ཏཱ;
པ་རི་ཎཱ་མ་པ་ཉྙ་ཏྟཱིཏི, ད་དྷི་བྷ་ཏྟཱ་དི་ཀཱ མ་ཏཱ.
༡༡༠༡. ཨི་ཏྠ་མ་ཛ྄ཛྷ་ཏྟ་བ་ཧི་དྡྷཱ, དྷ་མྨཱ ས་མྦྷཱ་ར་ས་མྦྷཱུ་ཏཱ;
ས་ནྟཱ་ན་ཝུ་ཏྟི ས་ངྐེ་ཏ་སི་དྡྷཱ པ་ཉྙ་ཏྟི པ་ཉྩ་དྷཱ.
༡༡༠༢. ཏ་ཐཱ ཏ་ཐཱ ས་མུ་པྤ་ནྣ་ཝི་ཀ་པྤཱ་བྷོ་ག་ས་མྨ་ཏཱ;
ཝི་ཀ་པྤ་པ་ཉྙ་ཏྟི ནཱ་མ, ཀཱ་ལཱ་ཀཱ་ས་དི་སཱ་དི་ཀཱ.
༡༡༠༣. ཏཾ ཏཾ ནི་མི་ཏྟ་མཱ་ག་མྨ, ཏ་ཏོ་པ་ཊྛཱ་ན་ཀ་པྤི་ཏཱ;
ཨུ་པ་ཊྛཱ་ན་པ་ཉྙ་ཏྟཱིཏི, པ་ཊི་བྷཱ་གཱ་དི་ཀཱ མ་ཏཱ.
༡༡༠༤. ཝི་སེ་སཱ་ཀཱ་ར་མ་ཏྟཱ་པི, ཨ་ཏྠ་ནྟ་ར་པ་ཀ་པྤི་ཏཱ;
ཨཱ་ཀཱ་ར་པ་ཉྙ་ཏྟི ནཱ་མ, ཝི་ཉྙ་ཏྟི་ལ་ཧུ་ཏཱ་དི་ཀཱ.
༡༡༠༥. ཏཾ ཏཾ ཀཱ་ར་ཎ་མཱ་ག་མྨ, ཏ་ཐཱ ཝོ་ཧཱ་ར་ཀ་པྤི་ཏཱ;
ཝོ་ཧཱ་ར་པ་ཉྙ་ཏྟི ནཱ་མ, ཀ་ཐི་ནཱ་པ་ཏྟི་ཨཱ་དི་ཀཱ.
༡༡༠༦. བཱ་ལོ ཡོ སོ ཙ མེ ཨ་ཏྟཱ,
སོ བྷ་ཝི་སྶཱ་མི མཾ ཙ ཏུ;
ནི་ཙྩོ དྷུ་ཝོ ས་སྶ་ཏོ་ཏི-
ཨཱ་དི་ཀཱ པ་ན ས་བྦ་ཐཱ.
༡༡༠༧. ཏ་བྦོ་ཧཱ་ར་ནི་མི་ཏྟཱ་ནཾ, ཨ་བྷཱ་ཝེ་པི པ་ཝ་ཏྟི་ཏོ;
ཨ་བྷི་ནི་ཝེ་ས་པ་ཉྙ་ཏྟི, ནཱ་མ ཏི་ཏྠི་ཡ་ཀ་པྤི་ཏཱ.
༡༡༠༨. ཨི་ཙྩེ་ཝཾ ལོ་ཀ་སཱ་ས་ན་ཏི་ཏྠཱ་ཡ་ཏ་ན་ཀ་པྤི་ཏཱ;
ས་ནྟཱ་ན་མུ་ཏྟ་ས་ངྐེ་ཏ་སི་དྡྷཱ ཨ་ཏྠཱ་པི པ་ཉྩ་དྷཱ.
༡༡༠༩. ས་ངྐཱ་ན་ཝུ་ཏྟི་ས་ནྟཱ་ན་མུ་ཏྟ་བྷེ་ད་ཝ་སཱ དྭི་དྷཱ;
ཨ་ཏྠ་པ་ཉྙ་ཏྟི ནཱ་མཱ་ཡཾ, ད་ས་དྷཱ པ་རི་དཱི་པི་ཏཱ.
༡༡༡༠. ཨི་ཏི ཝུ་ཏྟ་པྤ་ཀཱ་རེ་སུ, པ་ཉྙ་ཏྟ་ཏྠེ་སུ པ་ཎྜི་ཏཱ;
པ་ཉྙ་ཏྟི་མ་ཏྟཾ ས་ནྡྷཱ་ཡ, ཝོ་ཧ་ར་ནྟི ཡ་ཐཱ་ཀ་ཐཾ.
༡༡༡༡. ཏ་ད་ཉྙེ པ་ན བཱ་ལཱ ཙ, ཏི་ཏྠི་ཡཱ་པི ཨ་ཀོ་ཝི་དཱ;
པ་ཉྙ་ཏྟི་མ་ཏི་དྷཱ་ཝི་ཏྭཱ, ག་ཎྷ་ནྟི པ་ར་མ་ཏྠ་ཏོ.
༡༡༡༢. ཏེ ཏ་ཐཱ ག་ཧི་ཏཱ་ཀཱ་རཱ, ཨ་ཉྙཱ་ཎ་ག་ཧི་ཏཱ ཛ་ནཱ;
མི་ཙྪ་ཏྟཱ་བྷི་ནི་ཝི་ཊྛཱ ཙ, ཝ་ཌྜྷ་ནྟི བྷ་ཝ་བ་ནྡྷ་ནཾ.
༡༡༡༣. དུ་ཝི་དྷེ་སུ་པི ཨ་ཏྠེ་སུ, ཏ་སྨཱ པ་ཎྜི་ཏ་ཛཱ་ཏི་ཀོ;
པ་ར་མ་ཏྠ་པ་ཉྙ་ཏྟཱི་སུ, ཝི་བྷཱ་ག་མི་ཏི ལ་ཀྑ་ཡེ་ཏི.
ཨི་ཏི པ་ཉྙ་ཏྟི་ཝི་བྷཱ་གེ ཨ་ཏྠ་པ་ཉྙ་ཏྟི་ཀ་ཐཱ ནི་ཊྛི་ཏཱ.
ཨ་ཊྛ་ཝཱི་ས་ཏི་མོ པ་རི་ཙྪེ་དོ.