ཨེ་ཀཱུ་ན་ཏིཾ་ས་ཏི་མོ པ་རི་ཙྪེ་དོ
༢༩. ནཱ་མ་པ་ཉྙ་ཏྟི་ཀ་ཐཱ
༡༡༡༤. ནཱ་མ་ཝོ་ཧཱ་ར་ས་ངྐེ་ཏ་ཀཱ་ར་ཎོ་པ་ནི་བ་ནྡྷ་ནཱ;
ཡ་ཐཱ་ཝུ་ཏྟ་ཏྠ་ས་དྡཱ་ནཾ, ཨ་ནྟ་རཱ ཙི་ནྟ་ནཱ ག་ཏཱ.
༡༡༡༥. ནཱ་མ་པ་ཉྙ་ཏྟི ནཱ་མཱ་ཡཾ, ཨ་ཏྠ་ས་དྡ་ཝི་ནི་སྶ་ཊཱ;
ཏཾ་དྭ་ཡཱ་བ་དྡྷ་ས་ངྐེ་ཏ་ཉེ་ཡྻཱ་ཀཱ་རོ་པ་ལ་ཀྑི་ཏཱ.
༡༡༡༦. ཡཱ ག་ཡ྄ཧ་ཏི ནཱ་མ་གྷོ་ས་གོ་ཙ་རུ་པྤ་ནྣ་ཝཱི་ཐི་ཡཱ;
པ་ཝ་ཏྟཱ་ན་ནྟ་རུ་པྤ་ནྣ-མ་ནོ་དྭཱ་རི་ཀ་ཝཱི་ཐི་ཡཱ.
༡༡༡༧. མ་ཉྩ་པཱི་ཋཱ་དི་ས་དྡཾ ཧི, སོ་ཏ་ཝི་ཉྙཱ་ཎ་ཝཱི་ཐི་ཡཱ;
སུ་ཏྭཱ ཏ་མེ་ཝ ཙི་ནྟེ་ཏྭཱ, མ་ནོ་དྭཱ་རི་ཀ་ཝཱི་ཐི་ཡཱ.
༡༡༡༨. ཏ་ཏོ ས་ངྐེ་ཏ་ནི་པྥ་ནྣཾ, ནཱ་མཾ ཙི་ནྟཱ་ཡ ག་ཡ྄ཧ་ཏི;
ནཱ་མ་པ་ཉྙ་ཏྟི་ཨ་ཏྠཱ ཏུ, ཏ་ཏོ ག་ཡ྄ཧ་ནྟི ས་མྦྷ་ཝཱ.
༡༡༡༩. ས་དྡ་ནཱ་མ་ཏྠ་པ་ཉྙ་ཏྟི་པ་ར་མ་ཏྠ་ཝ་སེ་ན ཧི;
ཙ་ཏུ་དྷཱ ཏི་ཝི་དྷཱ ཝཱ་ཐ, ཙི་ནྟ་ནཱ ཏ་ཏྠ ཨི་ཙྪི་ཏཱ.
༡༡༢༠. ཨི་ཏྠ་མ་ཊྛ་ཀ་ཐཱ་མ་གྒཾ, ཝ་ཎྞེ་ནྟེ་ན ཧི ད་སྶི་ཏོ;
ན་ཡོ ཨཱ་ཙ་རི་ཡེ་ནེ་ཏི, ཝི་བྷཱ་གོ་ཡཾ པ་ཀཱ་སི་ཏོ.
༡༡༢༡. ན་ཏྠ་ཉྙཱ ཀཱ་ཙི ཝི་ཉྙ་ཏྟི, ཝི་ཀཱ་ར་ས་ཧི་ཏོ པ་ན;
ས་དྡོ་ཝ ནཱ་མ་པ་ཉྙ་ཏྟི, ཨི་ཙྩེ་ཀ་ཙྩེ་ཧི ཝ་ཎྞི་ཏཾ.
༡༡༢༢. ཏ་དེ་ཏཾ ནཱ་མ་པ་ཉྙ་ཏྟི་བྷཱ་ཝེ་ནེ་ཀ་ཝི་དྷ་མྤི ཙ;
ནེ་རུ་ཏྟི་ཀ་ཡཱ་དི་ཙྪ་ཀ་ཝ་སཱ ནཱ་མཾ དྭི་དྷཱ བྷ་ཝེ.
༡༡༢༣. ས་ཉྙཱ་སུ དྷཱ་ཏུ་རཱུ་པཱ་ནི, པ་ཙྩ་ཡ་ཉྩ ཏ་ཏོ པ་རཾ;
ཀ་ཏྭཱ ཝ་ཎྞཱ་ག་མཱ་དི་ཉྩ, ས་དྡ་ལ་ཀྑ་ཎ་སཱ་དྷི་ཏཾ.
༡༡༢༤. ནེ་རུ་ཏྟི་ཀ་མུ་དཱི་རེ་ནྟི, ནཱ་མཾ ཡཱ་དི་ཙྪ་ཀཾ པ་དཾ;
ཡ་དི་ཙྪཱ་ཡ ཀ་ཏ་མ་ཏྟཾ, བྱ་ཉྫ་ན་ཏྠ་ཝི་ཝ་ཛྫི་ཏཾ.
༡༡༢༥. ཏི་ཝི་དྷ་མྤི ཏ་ད་ནྭ་ཏྠ་ཀཱ་དི་མ་ཉྩོ་པ་ཙཱ་རི་མཾ;
ནི་བྦ་ཙ་ན་ཏྠ་སཱ་པེ་ཀྑཾ, ཏ་ཏྠཱ་ནྭ་ཏྠ་མུ་དཱི་རི་ཏཾ.
༡༡༢༦. ཡ་དི་ཙྪཱ་ཀ་ཏ་ས་ངྐེ་ཏཾ, ཀཱ་དི་མ་ཉྩོ་པ་ཙཱ་རི་མཾ;
ཨ་ཏ་མྦྷཱུ་ཏ་སྶ ཏ་བྦྷཱ་ཝ་ཝོ་ཧཱ་རོ་ཏི པ་ཝུ་ཙྩ་ཏི.
༡༡༢༧. ཏ་ཐཱ སཱ་མ་ཉྙ་ནཱ་མ་ཉྩ, གུ་ཎ་ནཱ་མ་ཉྩ ཀི་ཏྟི་མཾ;
ཨོ་པ་པཱ་ཏི་ཀ་མི་ཙྩེ་ཝཾ, ནཱ་མཾ ཧོ་ཏི ཙ་ཏུ་བྦི་དྷཾ.
༡༡༢༨. མ་ཧཱ་ཛ་ན་ས་མྨ་ཏ་ཉྩ, ཨ་ནྭ་ཏྠ་ཉྩེ་ཝ ཏཱ་དི་སཾ;
ཏཱི་ཎི ནཱ་མཱ་ནི ཙ་ནྡཱ་དི་ནཱ་མཾ ཏ་ཏྠོ་པ་པཱ་ཏི་ཀཾ.
༡༡༢༩. ཡཱ་དི་ཙྪ་ཀ་མཱ་ཝ་ཏྠི་ཀཾ, ནེ་མི་ཏྟ་ཀ་མ་ཐཱ་པ་རཾ;
ལི་ངྒི་ཀཾ རུ་ལ༹ྷི་ཀ་ཉྩེ་ཏི, ནཱ་མཾ པ་ཉྩ་ཝི་དྷཾ བྷ་ཝེ.
༡༡༣༠. ཡཱ་དི་ཙྪ་ཀཾ ཡ་ཐཱ་ཝུ་ཌྜྷཾ, ཝ་ཙྪ་ད་མྨཱ་དི་ཀཾ པ་ན;
ཨཱ་ཝ་ཏྠི་ཀཾ ནེ་མི་ཏྟ་ཀཾ, སཱི་ལ་ཝཱ་པ་ཉྙ་ཝཱ་དི་ཀཾ.
༡༡༣༡. ལི་ངྒི་ཀཾ དི་ཊྛ་ལི་ངྒཾ ཏུ, ད་ཎྜཱི་ཚ་ཏྟཱི་ཏི་ཨཱ་དི་ཀཾ;
རུ་ལ༹ྷི་ཀཾ ལེ་ས་མ་ཏྟེ་ན, རུ་ལ༹ྷཾ གོ་མ་ཧིཾ་སཱ་དི་ཀཾ.
༡༡༣༢. ཝི་ཛྫ་མཱ་ནཱ་ཝི་ཛྫ་མཱ་ན-པ་ཉྙ་ཏྟོ་བྷ་ཡ་མི་སྶི་ཏཱ;
ཝི་བྷ་ཏྟཱ ནཱ་མ་པ་ཉྙ་ཏྟི, ཚ་བྦི་དྷཱ ཧོ་ཏི ཏ་ཏྠ ཧི.
༡༡༣༣. ཝི་ཛྫ་མཱ་ན་པ་ཉྙ་ཏྟཱི་ཏི, ཝི་ཛྫ་མཱ་ན་ཏྠ་དཱི་པི་ཏཱ;
ཝུ་ཙྩ་ཏི ཁ་ནྡྷཱ་ཡ་ཏ་ན-དྷཱ་ཏུ་པ་ཉྩི་ནྡྲི་ཡཱ་དི་ཀཱ.
༡༡༣༤. ཨ་ཝི་ཛྫ་མཱ་ན་པ་ཉྙ་ཏྟི-ནཱ་མི་ཀཱ པ་ར་མ་ཏྠ་ཏོ;
ཨ་ཝི་ཛྫ་མཱ་ན་མ་ཉྩཱ་དི, ཨ་ཏྠ་པ་ཉྙ་ཏྟི་དཱི་པི་ཏཱ.
༡༡༣༥. ཝི་ཛྫ་མཱ་ནེ་ན ཨ་ཝི་ཛྫ-མཱ་ན་པ་ཉྙ་ཏྟི་ནཱ་མི་ཀཱ;
ཏེ་ཝི་ཛྫོ ཚ་ལ༹་བྷི་ཉྙོ ཙ, སཱི་ལ་ཝཱ པ་ཉྙ་ཝཱ་པི ཙ.
༡༡༣༦. ཨ་ཝི་ཛྫ་མཱ་ནེ་ན ཝི་ཛྫ-མཱ་ན་པ་ཉྙ་ཏྟི་ནཱ་མི་ཀཱ;
ཨི་ཏྠི་རཱུ་པཾ ཨི་ཏྠི་ས་དྡོ, ཨི་ཏྠི་ཙི་ཏྟ་ནྟི་ཨཱ་དི་ཀཱ.
༡༡༣༧. ཝི་ཛྫ་མཱ་ནེ་ན ཏུ ཝི་ཛྫ-མཱ་ན་པ་ཉྙ་ཏྟི་ནཱ་མི་ཀཱ;
ཙ་ཀྑུ་ཝི་ཉྙཱ་ཎཾ ཙ ཙ་ཀྑུ-ས་མྥ་སྶོ ཙེ་ཝ་མཱ་དི་ཀཱ.
༡༡༣༨. ཨ་ཝི་ཛྫ་མཱ་ནེ་ནཱ་ཝི་ཛྫ-མཱ་ན་པ་ཉྙ་ཏྟི་ནཱ་མི་ཀཱ;
ཁ་ཏྟི་ཡ་པུ་ཏྟོ བྲཱ་ཧྨ་ཎ-པུ་ཏྟོ ཨི་ཙྩེ་ཝ་མཱ་དི་ཀཱ.
༡༡༣༩. ཨི་ཏི ཝུ་ཏྟཱ་ནུ་སཱ་རེ་ན, ནཱ་མ་པ་ཉྙ་ཏྟི་ཡཱ བུ་དྷོ;
ས་རཱུ་པཾ ཝི་ས་ཡ་ཉྩེ་ཝ, ཝི་བྷཱ་ག་ཉྩ ཝི་བྷཱ་ཝ་ཡེ.
༡༡༤༠. ཨི་ཙྩེ་ཝཾ པ་ར་མ་ཏྠཱ ཙ, ཡ་ཐཱ་ཝུ་ཏྟཱ ཙ་ཏུ་བྦི་དྷཱ;
པ་ཉྙ་ཏྟི དུ་ཝི་དྷཱ ཙེ་ཏི, ཉེ་ཡྻ་ཏྠཱ ཚ་བྦི་དྷཱ མ་ཏཱ་ཏི.
ཨི་ཏི པ་ཉྙ་ཏྟི་ཝི་བྷཱ་གེ ནཱ་མ་པ་ཉྙ་ཏྟི་ཀ་ཐཱ ནི་ཊྛི་ཏཱ.
ཨེ་ཀཱུ་ན་ཏིཾ་ས་ཏི་མོ པ་རི་ཙྪེ་དོ.
ནི་ཊྛི་ཏོ ཙ ས་བྦ་ཐཱ་པི པ་ཉྙ་ཏྟི་ཝི་བྷཱ་གོ.
ནི་ག་མ་ན་ཀ་ཐཱ
༡༡༤༡. སེ་ཊྛེ ཀ་ཉྩི་ཝ་རེ ར་ཊྛེ, ཀཱ་ཝེ་རིན་ག་རེ ཝ་རེ;
ཀུ་ལེ ས་ཉྫཱ་ཏ་བྷཱུ་ཏེ་ན, བ་ཧུ་སྶུ་ཏེ་ན ཉཱ་ཎི་ནཱ.
༡༡༤༢. ཨ་ནུ་རུ་དྡྷེ་ན ཐེ་རེ་ན, ཨ་ནི་རུ་དྡྷ་ཡ་ས་སྶི་ནཱ;
ཏ་མྦ་ར་ཊྛེ ཝ་ས་ནྟེ་ན, ན་ག་རེ ཏ་ཉྫནཱ་མ་ཀེ.
༡༡༤༣. ཏ་ཏྠ ས་ངྒྷ་ཝི་སི་ཊྛེ་ན, ཡཱ་ཙི་ཏེ་ན ཨ་ནཱ་ཀུ་ལཾ;
མ་ཧཱ་ཝི་ཧཱ་ར་ཝཱ་སཱི་ནཾ, ཝཱ་ཙ་ནཱ་མ་གྒ་ནི་སྶི་ཏཾ.
༡༡༤༤. པ་ར་མ་ཏྠཾ པ་ཀཱ་སེ་ནྟཾ, པ་ར་མ་ཏྠ་ཝི་ནི་ཙྪ་ཡཾ;
པ་ཀ་ར་ཎཾ ཀ་ཏཾ ཏེ་ན, པ་ར་མ་ཏྠ་ཏྠ་ཝེ་དི་ནཱ་ཏི.
ཨི་ཏི ཨ་ནུ་རུ་དྡྷཱ་ཙ་རི་ཡེ་ན ར་ཙི་ཏོ
པ་ར་མ་ཏྠ་ཝི་ནི་ཙྪ་ཡོ ནི་ཊྛི་ཏོ.
ན་མོ ཏ་སྶ བྷ་ག་ཝ་ཏོ ཨ་ར་ཧ་ཏོ ས་མྨཱ་ས་མྦུ་དྡྷ་སྶ