ས་ཏྟ་ཝཱི་ས་ཏི་མོ པ་རི་ཙྪེ་དོ
༥. པ་ཉྙ་ཏྟི་ཝི་བྷཱ་གོ
༢༧. པ་བྷེ་ད་ཀ་ཐཱ
༡༠༦༢. ཙི་ཏྟཾ ཙེ་ཏ་སི་ཀཾ རཱུ་པཾ, ནི་བྦཱ་ན་མྤི ཙ བྷཱ་ཛི་ཏཾ;
ཏ་སྨཱ དཱ་ནི ཡ་ཐཱ་ཡོ་གཾ, པ་ཉྙ་ཏྟི་པི པ་ཝུ་ཙྩ་ཏི.
༡༠༦༣. སཱ ཙཱ་ཡཾ ཨ་ཏྠ་པ་ཉྙ་ཏྟི-ནཱ་མ་པ་ཉྙ་ཏྟི་བྷེ་ད་ཏོ;
དུ་ཝི་དྷཱ ཧོ་ཏི པ་ཉྙ་ཏྟི, ཨ་ཏྠ་པ་ཉྙ་ཏྟི ཏ་ཏྠ ཙ.
༡༠༦༤. ས་ཏྟ་ས་མྦྷཱ་ར་ས་ཎྛཱ་ན-ས་ངྒྷཱ་ཊ་པ་རི་ཎཱ་མ་ཏོ;
ཝི་ཀ་པྤུ་པ་ཊྛཱ་ནཱ་ཀཱ་ར་ཝོ་ཧཱ་རཱ་བྷི་ནི་ཝེ་ས་ཏོ.
༡༠༦༥. ཏ་ཐཱ པ་ཝ་ཏྟ་ས་ངྐེ་ཏ་སི་དྡྷཱ ཨ་ཏྠཱ པ་ཀ་པྤི་ཏཱ;
པ་ཉྙཱ་པཱི་ཡ་ནྟི ནཱ་མཱ་ཏི, པ་ཉྙ་ཏྟཱིཏི པ་ཀི་ཏྟི་ཏཱ.
༡༠༦༦. ཨ་ཏྠཱ ཧི པ་ར་མ་ཏྠ་ཏྠཱ, པ་ཉྙ་ཏྟ་ཏྠཱ་ཏི ཙ དྭི་དྷཱ;
ཏ་ཏྠ ཙ པ་ར་མ་ཏྠ་ཏྠཱ, ས་ཙྩི་ཀ་ཊྛཱ ས་ལ་ཀྑ་ཎཱ.
༡༠༦༧. པ་ཉྙ་ཏྟ་ཏྠཱ ས་ཙྩི་ཀ་ཊྛ་ས་ལ་ཀྑ་ཎ་ས་བྷཱ་ཝ་ཏོ;
ཨ་ཉྙ་ཐཱ ག་ཧི་ཏཱ ཏཾ་ཏ་མུ་པཱ་དཱ་ཡ པ་ཀ་པྤི་ཏཱ.
༡༠༦༨. ཏ་སྨཱ ཨུ་པཱ་དཱ་པ་ཉྙ་ཏྟི, ཨ་ཏྠ་པ་ཉྙ་ཏྟི་ནཱ་མ་ཀཱ;
པ་ཉྙ་པེ་ཏ་བྦ་ནཱ་མཱ་ཝ, པ་ཉྙ་ཏྟ་ཏྠཱ་ཝ ས་བྦ་ཐཱ.
༡༠༦༩. པ་ར་མ་ཏྠཱ ཡ་ཐཱ་ཝུ་ཏྟཱ, ཙི་ཏྟ་ཙེ་ཏ་སི་ཀཱ་ད་ཡོ;
པ་ཉྙ་ཏྟཱ ཨི་ཏྠི་པུ་རི་ས་མ་ཉྩ་པཱི་ཋ་པ་ཊཱ་ད་ཡོ.
༡༠༧༠. ཡེ་ན ཝུ་ཙྩ་ཏི ཏཾ ནཱ་མཾ, པ་ཉྙ་པེ་ཏཱི་ཏི ཝུ་ཙྩ་ཏི;
པ་ཉྙ་ཏྟཱིཏི ཙ སཱ ནཱ་མ་པ་ཉྙ་ཏྟཱི་ཏི ཏ་ཏོ མ་ཏཱ.
༡༠༧༡. ས་ངྑཱ ས་མ་ཉྙཱ པ་ཉྙ་ཏྟི, ཝོ་ཧཱ་རོ་ཏི ཙ བྷཱ་ཛི་ཏཱ;
ཙ་ཏུ་དྷཱ པ་ཉྙ་པེ་ཏ་བྦ་པ་ཉྙ་ཏྟཱི་ཏི ཧི ཝ་ཎྞི་ཏཱ.
༡༠༧༢. ཏ་ཏོ ནཱ་མཾ ནཱ་མ་ཀ་མྨཾ, ནཱ་མ་དྷེ་ཡྻཾ ཨ་ཐཱ་པ་རཾ;
ནི་རུ་ཏྟི བྱ་ཉྫ་ན་མ་བྷི་ལཱ་པོ་ཏི པ་ན བྷཱ་ཛི་ཏཱ.
༡༠༧༣. ནཱ་མ་པ་ཉྙ་ཏྟི ནཱ་མཱ་ཏི, པ་ཉྙ་ཏྟི དུ་ཝི་དྷཱ ཀ་ཏཱ;
ས་བྦེ་ཝ དྷ་མྨཱ པ་ཉྙ་ཏྟི་པ་ཐཱ་ཏི པ་ན བྷཱ་ཛི་ཏཱ.
༡༠༧༤. པ་ར་མ་ཏྠ་པ་ཉྙ་ཏྟ་ཏྠཱ, དུ་ཝི་དྷཱ ཧོ་ནྟི ཏ་ཏྠ ཙ;
པ་ཉྙ་ཏྟི་པ་ཐཱ་ཝ ཧོ་ནྟི, པ་ར་མ་ཏྠཱ ས་ལ་ཀྑ་ཎཱ.
༡༠༧༥. པ་ཉྙ་ཏྟ་ཏྠཱ པ་ཉྙ་ཏྟི ཙ, པ་ཉྙ་པེ་ཏ་བྦ་མ་ཏྟ་ཏོ;
པ་ཉྙ་ཏྟི་པ་ཐཱ ཙ ནཱ་མ་པ་ཉྙ་ཏྟི་པ་ཐ་བྷཱ་ཝ་ཏོ.
༡༠༧༦. ནཱ་མ་མྤི པ་ཉྙཱ་པེ་ཏ་བྦ་མེ་ཝ ཀི་ཉྩཱ་པི ཀེ་ན་ཙི;
ནཱ་མ་མེ་ཝ་མྤེ་ཏཾ ཏ་ཏྠ, པ་ཉྙ་ཏྟི་ཙྩེ་ཝ ཝ་ཎྞི་ཏཾ.
༡༠༧༧. པ་ཉྙ་པེ་ཏ་བྦ་དྷ་མྨཱ ཙ, ཏེ་སཾ པ་ཉྙཱ་པི་ཏཱ་པི ཙ;
ཨི་ཙྪི་ཏ་བྦཱ་པི པ་ཉྙ་ཏྟི་པ་ཐཱ པ་ཉྙ་ཏྟི་ནཱ་ན་ཏཱ.
༡༠༧༨. ཨི་ཏི ཝུ་ཏྟཱ་ནུ་སཱ་རེ་ན, ཝུ་ཏྟཾ ཨ་ཊྛ་ཀ་ཐཱ་ན་ཡེ;
ན་ཡཾ ག་ཧེ་ཏྭཱ ཨེ་ཏྠཱ་པི, པ་ཉྙ་ཏྟི དུ་ཝི་དྷཱ ཀ་ཏཱ.
༡༠༧༩. ཏ་སྨི་མྤི པ་ར་མ་ཏྠཱ ཙ, ས་ཙྩི་ཀ་ཊྛ་ས་ལ་ཀྑ་ཎཱ;
ཨ་ཏྠཱ པ་ཉྙ་ཏྟི་མ་ཏྟཱ ཙ, ཨ་ཏྠ་པ་ཉྙ་ཏྟི་ནཱ་མ་ཀཱ.
༡༠༨༠. ཏེ་སཾ པ་ཉྙཱ་པི་ཀཱ ཙེ་ཝ, ནཱ་མ་པ་ཉྙ་ཏྟི་ནཱ་མི་ཀཱ;
ཨི་ཙྩེ་ཝཾ ཝ་ཎྞ་ནཱ་མ་གྒེ, ཉེ་ཡྻ་ཏྟཱ ཏི་ཝི་དྷཱ ཀ་ཏཱ.
༡༠༨༡. པ་ར་མ་ཏྠ་ས་ཙྩཾ ནཱ་མ, པ་ར་མ་ཏྠཱ་ཝ ཏ་ཏྠ ཙ;
ས་ཙྩི་ཀ་ཊྛ་ས་བྷཱ་ཝ་ཏྟཱ, ཨ་ཝི་སཾ་ཝཱ་ད་ཀཱ ཧི ཏེ.
༡༠༨༢. ས་མྨུ་ཏི་ས་ཙྩཾ པ་ཉྙ་ཏྟི་དྭ་ཡཾ ཝོ་ཧཱ་ར་ཝུ་ཏྟི་ཡཱ;
ལོ་ཀ་ས་མ་ཉྙཱ་དྷི་པྤཱ་ཡཱ་ཝི་སཾ་ཝཱ་ད་ཀ་བྷཱ་ཝ་ཏོ.
༡༠༨༣. ཨི་ཏི ས་ཙྩ་དྭ་ཡ་མྤེ་ཏཾ, ཨ་ཀྑཱ་སི པུ་རི་སུ་ཏྟ་མོ;
ཏེ་ནཱ་པི ནཱ་མ་སཾ་ཝི་ཉྙཱུ, ཝོ་ཧ་རེ་ཡྻུ་བྷ་ཡ་མྤི ཝཱ.
ཨི་ཏི པ་ཉྙ་ཏྟི་ཝི་བྷཱ་གེ པ་བྷེ་ད་ཀ་ཐཱ ནི་ཊྛི་ཏཱ.
ས་ཏྟ་ཝཱི་ས་ཏི་མོ པ་རི་ཙྪེ་དོ.