ཨེ་ཀ་ཝཱི་ས་ཏི་མོ པ་རི་ཙྪེ་དོ
༢༡. ཨུ་པྤ་ཏྟི་ཀ་ཐཱ
༧༩༧. ཨ་ཊྛ་ཝཱི་ས་ཏི རཱུ་པཱ་ནི, ཀ་ལཱ་པཱ ཙེ་ཀ་ཝཱི་ས་ཏི;
ཝུ་ཏྟཱ ཙེ་ཏྟཱ་ཝ་ཏཱ ཏེ་སཾ, ཨུ་པྤཱ་དོ དཱ་ནི ནི་ཡྻ་ཏེ.
༧༩༨. ཨ་ཎྜ་ཛཱ ཛ་ལཱ་བུ་ཛཱ ཙ, སཾ་སེ་ད་ཛོ་པ་པཱ་ཏི་ཀཱ;
ཨི་ཙྩུ་པྤ་ཏྟི་པ་བྷེ་དེ་ན, ཙ་ཏ་སྶོ ཡོ་ནི་ཡོ མ་ཏཱ.
༧༩༩. བྷུ་མྨ་ཝ་ཛྫེ་སུ དེ་ཝེ་སུ,
པེ་ཏེ ནི་ཛ྄ཛྷཱ་མ་ཏ་ཎྷི་ཀེ;
ནི་ར་ཡེ་སུ ཙ ས་མྦྷོ་ཏི,
ཡོ་ནེ་ཀཱ་ཝོ་པ་པཱ་ཏི་ཀཱ.
༨༠༠. བྷུ་མྨ་དེ་ཝེ མ་ནུ་སྶེ་སུ,
ཏི་ར་ཙྪཱ་ནཱ་སུ་རེ ཏ་ཐཱ;
པེ་ཏེ་སུ ཙཱ་ཝ་སེ་སེ་སུ,
ཙ་ཏ་སྶོ་པི ཙ ཡོ་ནི་ཡོ.
༨༠༡. ཏ་ཏྠ་ཎྜ་ཛཱ ཛ་ལཱ་བུ་ཛཱ, ག་བྦྷ་སེ་ཡྻ་ས་མུ་གྒ་མོ;
སཾ་སེ་ད་ཛོ་པ་པཱ་ཏི་ཀཱ, ཨོ་པ་པཱ་ཏི་ཀ་ནཱ་མ་ཀཱ.
༨༠༢. ཏ་ཏྠ ས་མྤུ་ཎྞཱ་ཡ་ཏ་ནོ, ག་བྦྷ་སེ་ཡྻ་ས་མུ་གྒ་མོ;
ཨ་བྷཱ་ཝོ དྭེ ས་བྷཱ་ཝཱ ཙ, ཨི་ཏྠི་པུ་མྦྷཱ་ཝ་མི་སྶི་ཏཱ.
༨༠༣. པ་རི་པུ་ཎྞཱ་པ་རི་པུ་ཎྞོ, ཨོ་པ་པཱ་ཏི་ཀ་ནཱ་མ་ཀོ;
ཨ་བྷཱ་ཝོ དྭེ ས་བྷཱ་ཝཱ ཙ, ཙ་ཏུ་རཱ་པཱ་ཡ་བྷཱུ་མི་ཡཾ.
༨༠༤. ས་མྤུ་ཎྞཱ་ཡ་ཏ་ནོ་ཝེ་སོ,
ཀཱ་མེ སུ་ག་ཏི་ཡཾ པ་ན;
ཨཱ་དི་ཀ་པྤེ ཨ་བྷཱ་ཝོ ཙ,
དྭེ ས་བྷཱ་ཝཱ ཏ་ཏོ པ་རཾ.
༨༠༥. ཨ་པ་རི་པུ་ཎྞཱ་ཡ་ཏ་ནོ, ཨ་བྷཱ་ཝོ ཙ མ་ཧ་གྒ་ཏེ;
ཨི་ཙྩེ་ཝཾ ད་ས་དྷཱ ཧོ་ནྟི, ས་བྦཱ ས་ནྡྷི་ས་མུ་གྒ་མཱ.
༨༠༦. ཏ་ཏྠེ་ཝ ད་ས་དྷཱ བྷི་ནྣེ, ཨ་ཏྟ་བྷཱ་ཝ་ས་མུ་གྒ་མེ;
ས་ནྡྷི་ཡ་ཉྩ པ་ཝ་ཏྟེ ཙ, རཱུ་པུ་པྤ་ཏྟིཾ ཝི་བྷཱ་ཝ་ཡེ.
༨༠༧. ཏ་ཏྠཱ་བྷཱ་ཝ་ཀ་ས་ཏྟཱ་ནཾ, ག་བྦྷ་སེ་ཡྻ་ས་མུ་གྒ་མེ;
ཀཱ་ཡ་ཝ་ཏྠུ་ཝ་སཱ དྭེ་ཝ, ད་ས་ཀཱ ཧོ་ནྟི ཀ་མྨ་ཛཱ.
༨༠༨. རཱུ་པ་ས་ནྟ་ཏི་སཱི་སཱ་ནི, དྭེ ཙ རཱུ་པཱ་ནི ཝཱི་ས་ཏི;
ཨ་ག་ཧཱི་ཏ་གྒ་ཧ་ཎེ་ན, ཏ་ཏྠེ་ཀཱ་ད་ས ནི་དྡི་སེ.
༨༠༩. ཏ་ཏོ པ་རཾ པ་ཝ་ཏྟི་མྷི, ཝ་ཌྜྷ་མཱ་ན་སྶ ཛ་ནྟུ་ནོ;
ཙ་ཀྑུ་ད་ས་ཀཱ་ད་ཡོ ཙ, ཙ་ཏྟཱ་རོ ཧོ་ནྟི ས་མྦྷ་ཝཱ.
༨༡༠. ཨི་ཙྩཱ་བྷཱ་ཝ་ཀ་ས་ཏྟཱ་ནཾ, ཚ་ལེ༹་ཝུ་ཏྟ་མ་ཀོ་ཊི་ཡཱ;
ཧེ་ཊྛི་མ་ཀོ་ཊི་ཡཱ དྭེ་ཝ, ག་བྦྷ་སེ་ཡྻ་ས་མུ་གྒ་མེ.
༨༡༡. ཙ་ཀྑུ་སོ་ཏ་གྷཱ་ན་ཝ་སཱ, ཏ་ཏྠ ཏི་དྭེ་ཀ་ཧཱི་ན་ཀཱ;
ཨེ་ཀོ ཏ་ཡོ ཏ་ཡོ ཙེ་ཝ, སི་ཡུཾ་ཏི་ཙ་ཏུ་པ་ཉྩ་ཀཱ.
༨༡༢. ཨོ་པ་པཱ་ཏི་ཀ་ས་ངྑཱ་ཏེ, ཨ་བྷཱ་ཝ་ཀ་ས་མུ་གྒ་མེ;
ཛི་ཝ྄ཧཱ་ཀཱ་ཡ་ཝ་ཏྠུ་ཝ་སཱ, ཏ་ཡོ ཧེ་ཊྛི་མ་ཀོ་ཊི་ཡཱ.
༨༡༣. ཨུ་ཏྟ་མ་ཀོ་ཊི་ཡཱ ཧོ་ནྟི, ཚ་ལེ༹་ཝོ་བྷི་ནྣ་མ་ནྟ་རེ;
ཙ་ཏུ་ཀྐ་པ་ཉྩ་ཀཱ ཏ་ཏྠ, དྭེ་ཀ་ཧཱི་ནཱ ཏ་ཡོ ཏ་ཡོ.
༨༡༤. ཚ་ཀྐཱ་ད་ཡོ ཨ་བྷཱ་ཝཱ་ནཾ,
ཨི་ཙྩེ་ཝཾ པ་ཉྩ་ས་ངྒ་ཧཱ;
ཨེ་ཀོ ཏ་ཡོ ཏ་ཡོ ཙེ་ཀོ,
ཨེ་ཀོ་ཏི ཙ ཡ་ཐཱ་ཀྐ་མཾ.
༨༡༥. ས་བྷཱ་ཝ་ཀཱ་ནཾ དྭི་ནྣ་མྤི, དུ་ཝི་དྷཱ ས་ཏྟ་ཀཱ་ད་ཡོ;
བྷཱ་ཝཱ་དི་ཀཱ ཡ་ཐཱ་ཝུ་ཏྟཱ, ན་ཝ་དྷཱ ན་ཝ་དྷཱ སི་ཡུཾ.
༨༡༦. ས་ཏྟེ་ཝུ་ཏྟ་མ་ཏོ ཧེ་ཊྛཱ, ཏི་ཙ་ཏུ་ཀྐཱ ཏ་ད་ནྟ་རེ;
ཙ་ཏུ་ཀྐ་པ་ཉྩ་ཀ་ཙྪ་ཀྐཱ, པ་ཉྩ་ཚ་ཀྐཱ་པི ཙ དྭི་དྷཱ.
༨༡༧. ཏི་ཎྞ་ནྣ་མྤི ཝ་སེ་ནེ་ཝ, ས་ཏྟ་ཀ་ཙྪ་ཀྐ་པ་ཉྩ་ཀཱ;
ཙ་ཏུ་ཀྐ་ཏི་ཀ་དུ་ཀྐཱ ཙ, ཚ ཀོ་ཊྛཱ་སཱ ཡ་ཐཱ་ར་ཧཾ.
༨༡༨. དྭེ ས་ཏྟ ཙ ན་ཝ པ་ཉྩ, ཏ་ཡོ ཙེ་ཀོ ཡ་ཐཱ་ཀྐ་མཾ;
རཱུ་པ་ས་ནྟ་ཏི་སཱི་སཱ་ནཾ, རཱ་ས་ཡོ ས་ཏྟ་ཝཱི་ས་ཏི.
༨༡༩. ཀ་མྨ་ཛཱ་ཏཱ ཡ་ཐཱ་ཡོ་གཾ, པ་ཝ་ཏྟ་ནྟི ཁ་ཎེ ཁ་ཎེ;
ཀཱ་མཱ་ཝ་ཙ་ར་ས་ཏྟཱ་ནཾ, པ་ཊི་ས་ནྡྷི་པ་ཝ་ཏྟི་ཡཾ.
༨༢༠. ཏ་ཏྠ ས་ནྟ་ཏི་སཱི་སཱ་ནི, རཱུ་པཱ་ནི ཙ ཡ་ཐཱ་ར་ཧཾ;
པུ་བྦེ ཝུ་ཏྟ་ན་ཡེ་ནེ་ཝ, ས་བྦ་ཏྠཱ་པི ཝི་ནི་དྡི་སེ.
༨༢༡. སཱི་ཏུ་ཎྷོ་ཏུ་ས་མ་ཉྙཱ་ཏཱ,
ཏེ་ཛོ་དྷཱ་ཏུ ཋི་ཏི་ཀྑ་ཎེ;
བྷཱུ་ཏཱ ས་ནྡྷི་ཀྑ་ཎེ རཱུ་པཾ,
ཛ་ནེ་ཏི ཨུ་ཏུ་ཛ་ཊྛ་ཀཾ.
༨༢༢. པ་ཊི་ས་ནྡྷི་མ་ཏི་ཀྐ་མྨ, ཙི་ཏྟཾ ཙི་ཏྟ་ཛ་མ་ཊྛ་ཀཾ;
བྷ་ཝ་ངྒཱ་དི་མུ་པཱ་དཱ་ཡ, ཛ་ནེ་ཏུ་པྤ་ཏྟི་ཡཾ པ་ན.
༨༢༣. བྷུ་ཏྟཱ་ཧཱ་རོ ཋི་ཏི་པྤ་ཏྟོ, མཱ་ཏ་རཱ ཙ ས་ཡ་མྤི ཙ;
ས་རཱི་རཱ་ནུ་ག་ཏོ ཧུ་ཏྭཱ, ཛ་ནེ་ཏཱ་ཧཱ་ར་ཛ་ཊྛ་ཀཾ.
༨༢༤. ཨི་ཏི སུ་དྡྷ་ཊྛ་ཀཱ་ནི ཙ, ཏེ་ས་མུ་ཊྛཱ་ནི་ཀཱ་པ་རེ;
ས་དྡ་ཝི་ཉྙ་ཏྟི་ལ་ཧུ་ཏཱ, ས་མྦྷ་ཝེ ས་མྦྷ་ཝ་ནྟི ཙ.
༨༢༥. ཨི་ཏྠཾ ཙ་ཏུ་ས་མུ་ཊྛཱ་ནཱ, ཀ་ལཱ་པཱ ཀཱ་མ་བྷཱུ་མི་ཡཾ;
ཡཱ་ཝ་ཛཱི་ཝཾ པ་ཝ་ཏྟ་ནྟི, དཱི་པ་ཛཱ་ལཱ་ཝ ས་ནྟ་ཏི.
༨༢༦. ཙ་ཀྑུ་སོ་ཏ་ཝ་ཏྠུ་ཝ་སཱ, ད་ས་ཀཱ ཙ ཏ་ཡོ པ་རཾ;
ཛཱི་ཝི་ཏ་ན་ཝ་ཀ་ཉྩེ་ཝ, རཱུ་པཱ་ཝ་ཙ་ར་བྷཱུ་མི་ཡཾ.
༨༢༧. ཧོ་ནྟི ས་ནྡྷི་པ་ཝ་ཏྟཱི་སུ, ཙ་ཏྟཱ་རོ ཀ་མྨ་ཛཱ ས་དཱ;
པུ་བྦེ ཝུ་ཏྟ་ན་ཡེ་ནེ་ཝ, པ་ཝ་ཏྟེ ཨུ་ཏུ་ཙི་ཏྟ་ཛཱ.
༨༢༨. ཛཱི་ཝི་ཏ་ན་ཝ་ཀ་ཉྩེ་ཀཾ, པ་ཊི་ས་ནྡྷི་པ་ཝ་ཏྟི་ཡཾ;
པ་ཝ་ཏྟེ ཨུ་ཏུ་ཛ་ཉྩེ་ཏི, དྭེ་དྷཱ་ས་ཉྙཱི་ན་མུ་དྡི་སེ.
༨༢༩. ཨི་ཙྩུ་པྤ་ཏྟི་ཀ་མཾ ཉ་ཏྭཱ, ཝི་བྷཱ་ཝེ་ཡྻ ཏ་ཏོ པ་རཾ;
ཀ་ལཱ་པཱ་ན་ཉྩ རཱུ་པཱ་ནཾ, ས་མྦྷ་ཝཱ་ས་མྦྷ་ཝ་མྤི ཙ.
༨༣༠. ཨི་ནྡྲི་ཡ་བ་དྡྷ་ས་ནྟཱ་ནེ, ས་བྦེ ས་མྦྷོ་ནྟི ས་མྦྷ་ཝཱ;
ཀ་ལཱ་པཱ ཙེ་ཝ རཱུ་པཱ་ནི, ཏ་ཐཱ ས་ནྟ་ཏི་རཱ་ས་ཡོ.
༨༣༡. བ་ཧི་དྡྷཱ མ་ཏ་ཀཱ་ཡེ ཙ, ནོ་པ་ལ་བྦྷ་ནྟི ཀ་མྨ་ཛཱ;
ཙི་ཏྟོ་ཛ་ཛཱ ཀ་ལཱ་པཱ ཙ, ཨུ་ཏུ་ཛཱ ལ་ཧུ་ཏཱ་ད་ཡོ.
༨༣༢. ཏ་ཐཱ སུ་དྡྷ་ཊྛ་ཀ་ས་དྡ-ན་ཝ་ཀ་ཉྩོ་ཏུ ས་བྦ་ཐཱ;
ཀ་ལཱ་པཱ ཏ་ཏྠ ལ་བྦྷ་ནྟི, དྭེ ཙ རཱུ་པཱ་ནི ཨུ་དྡི་སེ.
༨༣༣. ཏེ་ས་མུ་ཊྛཱ་ནི་ཀཱ ས་བྦེ, ཀ་ལཱ་པཱ ན་ཏྠི ས་ནྡྷི་ཡཾ;
ཨུ་པྤཱ་ད་ཀཱ་ལེ ས་བྦ་ཏྠ, ཛ་ར་ཏཱ་ནི་ཙྩ་ཏཱ་པི ཙ.
༨༣༤. ཀ་ལཱ་པཱ ཀ་མྨ་ཛཱ ས་ནྟི, ཛཱ་ཏི་རཱུ་པ་ཉྩ ས་ནྡྷི་ཡཾ;
རཱུ་པཱ་ནི ཙ ཀ་ལཱ་པཱ ཙ, ས་བྦེ་པི ཙ པ་ཝ་ཏྟི་ཡཾ.
༨༣༥. ས་ནྟི ས་བྦཱ་ནི རཱུ་པཱ་ནི, ཀཱ་མེ་སུ ཙ་ཏུ་ས་མྦྷ་ཝཱ;
ཛཱི་ཝི་ཏ་ན་ཝ་ཀཾ ཧི་ཏྭཱ, ཀ་ལཱ་པཱ ཧོ་ནྟི ཝཱི་ས་ཏི.
༨༣༦. ད་ས་ཀེ་སྭེ་ཝ ག་ཧི་ཏཾ, ཝི་སུཾ ཀཱ་མེ ན ལ་བྦྷ་ཏི;
ཛཱི་ཝི་ཏ་ན་ཝ་ཀཾ ནཱ་མ, རཱུ་པ་ལོ་ཀེ ཝི་སུཾ སི་ཡཱ.
༨༣༧. ཨཱ་ཧཱ་ར་ཛ་ཀ་ལཱ་པཱ ཙ, བྷཱ་ཝཱ དྭེ ཙཱ་དི་ཀ་པྤི་ཀེ;
ཨཱ་དི་ཀཱ་ལེ ན ལ་བྦྷ་ནྟི, པ་ཙྪཱ ལ་བྦྷ་ནྟི ཀེ་ཙི་པི.
༨༣༨. གྷཱ་ན་ཛི་ཝ྄ཧཱ་ཀཱ་ཡ་བྷཱ་ཝ-ད་ས་ཀཱ རཱུ་པ་བྷཱུ་མི་ཡཾ;
ཨཱ་ཧཱ་ར་ཛ་ཀ་ལཱ་པཱ ཙ, ན ལ་བྦྷ་ནྟེ་ཝ ས་བྦ་ཐཱ.
༨༣༩. ཙ་ཀྑུ་སོ་ཏ་ཝ་ཏྠུ་ས་དྡཱ, ཀ་ལཱ་པཱ ཙི་ཏྟ་ཛཱ་པི ཙ;
ཨ་ས་ཉྙི་བྷཱུ་མི་ཡཾ པུ་བྦེ, ཝུ་ཏྟཱ་པི ཙ ན ལ་བྦྷ་རེ.
༨༤༠. ཀ་ལཱ་པཱ ས་ཏྟ རཱུ་པཱ་ནི, པ་ཉྩ རཱུ་པེ་སྭ་ས་ཉྙི་སུ;
ན་ཏྠེ་ཀཱ་ད་ས རཱུ་པཱ་ནི, ཀ་ལཱ་པེ་ཀཱུ་ན་ཝཱི་ས་ཏི.
༨༤༡. ཏ་སྨཱ ཏེ་ཝཱི་ས རཱུ་པཱ་ནི, ཀ་ལཱ་པཱ པ་ན ཙུ་དྡ་ས;
ཏེ་ས་མུ་ཊྛཱ་ནི་ཀཱ ས་ནྟི, རཱུ་པཱ་ཝ་ཙ་ར་བྷཱུ་མི་ཡཾ.
༨༤༢. ས་ཏྟ་ར་སེ་ཝ རཱུ་པཱ་ནི, ཀ་ལཱ་པཱ དྭེ དྭི་ས་མྦྷ་ཝཱ;
ཨ་ས་ཉྙཱི་ནཾ ཏུ ས་མྦྷོ་ནྟི, ན་ཏྠཱ་རཱུ་པེ་སུ ཀི་ཉྩི་པི.
༨༤༣. ཨུ་པྤ་ཏྟི་ཀྐ་མ་མི་ཙྩེ་ཝཾ, ས་མྦྷ་ཝཱ་ས་མྦྷ་ཝ་མྤི ཙ;
ཀ་ལཱ་པཱ་ན་ཉྩ རཱུ་པཱ་ནཾ, ཡ་ཐཱ་ཡོ་གཾ ཝི་བྷཱ་ཝ་ཡེ་ཏི.
ཨི་ཏི རཱུ་པ་ཝི་བྷཱ་གེ ཨུ་པྤ་ཏྟི་ཀ་ཐཱ ནི་ཊྛི་ཏཱ.
ཨེ་ཀ་ཝཱི་ས་ཏི་མོ པ་རི་ཙྪེ་དོ.