དྭཱ་ཝཱི་ས་ཏི་མོ པ་རི་ཙྪེ་དོ
༢༢. པ་ཀི་ཎྞ་ཀ་ཀ་ཐཱ
༨༤༤. ཨི་ཏྠཾ རཱུ་པཱ་ན་མུ་པྤ་ཏྟིཾ, དཱི་པེ་ཏྭཱ དཱ་ནི ཝུ་ཙྩ་ཏི;
པ་ཝ་ཏྟི་ཀོ་ས་ལླ་ཏྠཱ་ཡ, ཏ་ཏྠེ་ཝེ་ཏཾ པ་ཀི་ཎྞ་ཀཾ.
༨༤༥. དུ་ཝི་དྷཱ ས་ནྡྷི་ཡོ ཏ་ཏྠ, མི་སྶཱ་མི་སྶ་ཝི་བྷཱ་ག་ཏོ;
ཏི་ཝི་དྷཱ་པི ཙེ་ཀ་ཙ་ཏུ-པ་ཉྩ་ཝོ་ཀཱ་ར་བྷེ་ད་ཏོ.
༨༤༦. རཱུ་པ་མ་ཏྟཱ ཨ་ས་ཉྙཱི་ནཾ, ནཱ་མཱ་བྷཱ་ཝཱ ཨ་མི་སྶི་ཏཱ;
ནཱ་མ་མ་ཏྟཱ ཨ་རཱུ་པཱི་ནཾ, རཱུ་པཱ་བྷཱ་ཝཱ་ཏི ཙ དྭི་དྷཱ.
༨༤༧. ཀཱ་མཱ་ཝ་ཙ་རི་ཀཱ ཙེ་ཝ, རཱུ་པཱ་ཝ་ཙ་རི་ཀཱ་ཏི ཙ;
དུ་ཝི་དྷཱ མི་སྶི་ཏཱ ཙེ་ཏི, བྷ་ཝ་ནྟི ཙ ཙ་ཏུ་བྦི་དྷཱ.
༨༤༨. ཨེ་ཀ་ཙྩ་ཏུ་ཝོ་ཀཱ་རཱ ཙ, ཨ་མི་སྶཱ པ་ཉྩ ས་ནྡྷི་ཡོ;
ཚ་བྦཱི་ས་ཏི་ཝི་དྷཱ མི་སྶཱ, པ་ཉྩ་ཝོ་ཀཱ་ར་ས་ནྡྷི་ཡོ.
༨༤༩. ཨི་ཏྠཾ བྷཱུ་མི་པྤ་བྷེ་དེ་ན, ཨེ་ཀ་ཏིཾ་ས་ཝི་དྷཱ་པི ཙ;
ས་ནྟ་ཏི་རཱ་སི་བྷེ་དེ་ན, སི་ཡུཾ ཏིཾ་ས་ཝི་དྷཱ ཀ་ཐཾ.
༨༥༠. རཱུ་པ་ས་ནྟ་ཏི་སཱི་སཱ་ནཾ,
རཱ་ས་ཡོ ས་ཏྟ་ཝཱི་ས་ཏི;
ཝུ་ཏྟཱ ཀཱ་མེ ཝ་སཱ ཏེ་སཾ,
ས་ཏྟ་ཀཱ ཀཱ་མ་ས་ནྡྷི་ཡོ.
༨༥༡. ཝེ་ད་ནཱ་ས་ཉྙཱ་ས་ངྑཱ་ར-ཝི་ཉྙཱ་ཎ་ཀྑ་ནྡྷ་ས་ངྒ་ཧཱ;
ས་བྦ་ཏྠཱ་པི ཙ་ཏ་སྶོ་ཝ, ནཱ་མ་ས་ནྟ་ཏི་ཡོ སི་ཡུཾ.
༨༥༢. ཨི་ཙྩུ་བྷི་ནྣཾ ཝ་སཱ ཧོ་ནྟི, ཏ་ཏྠེ་ཀཱ་ད་ས་ཀཱ་ད་ཡོ;
ས་ནྟ་ཏི་རཱ་ས་ཡོ པུ་བྦེ, ཝི་བྷ་ཏྟཱ ས་ཏྟ་ཀཱ་ད་ཡོ.
༨༥༣. ཨེ་ཀཱ་ད་ས་ཀ་ད་ས་ཀ-ན་ཝ་ཊྛ་ས་ཏྟ་ཀཱ སི་ཡུཾ;
ཚ་ཀྐེ་ན ས་དྡྷིཾ ཝི་ཉྙེ་ཡྻཱ, ཏ་སྨཱ ཏ་ཏྠ ཚ ས་ངྒ་ཧཱ.
༨༥༤. ཨ་ཊྛ ས་ནྟ་ཏི་ཡོ ཧོ་ནྟི, རཱུ་པ་ལོ་ཀེ་ན མི་སྶི་ཏཱ;
ཨ་ཊྛ་ཀོ རཱ་སི ཏ་ཏྠེ་ཀོ, ཏ་སྨཱ ས་ནྟ་ཏི ཝུ་ཙྩ་ཏི.
༨༥༥. ཛཱི་ཝི་ཏ་ན་ཝ་ཀོ ཏྭེ་ཀོ, ཨ་ས་ཉྙཱི པ་ཊི་ས་ནྡྷི་ཡཾ;
ཨ་རཱུ་པཱི་ནཾ ཙ་ཏ་སྶོ་པི, ནཱ་མ་ས་ནྟ་ཏི་ཡོ སི་ཡུཾ.
༨༥༦. ཨི་ཙྩེ་ཀ་ཀ་ཙ་ཏུ་ཀྐཱ་ནཾ, ཝ་སེ་ན དྭེ ཨ་མི་སྶི་ཏཱ;
ཨ་ཊྛ་ཝཱི་ས་ཉྩ མི་སྶཱ་ཏི, ཏིཾ་སེ་ཝ ཧོ་ནྟི ས་ནྡྷི་ཡོ.
༨༥༧. ཨེ་ཀུ་པྤཱ་ད་ནི་རོ་དྷཱ ཙ, ཨ་མི་སྶཱ ཏ་ཏྠ རཱ་ས་ཡོ;
མི་སྶི་ཏཱ་ནཾ ཝི་བྷཱ་གོ་ཡཾ, ཡ་ཐཱ་ཡོ་གཾ ཀ་ཐཱི་ཡ་ཏི.
༨༥༨. ཨུ་པྤཱ་ད་ཊྛི་ཏི་བྷ་ངྒཱ་ནཾ, ཝ་སཱ ཏཱི་ཎི ཁ་ཎཱ་ནི་པི;
ས་མཱ་ནཱ་ནེ་ཝ ནཱ་མཱ་ནཾ, ཨེ་ཀ་ཙི་ཏྟ་ཀྑ་ཎཾ མ་ཏཾ.
༨༥༩. ཏུ་ལྱ་མུ་པྤཱ་ད་བྷ་ངྒཱ་ནཾ, རཱུ་པཱ་ན་མྤི ཁ་ཎ་དྭ་ཡཾ;
ཨེ་ཀཱུ་ན་པ་ཉྙཱ་ས་མ་ཏྟཾ, ཋི་ཏི་ཀྑ་ཎ་མུ་དཱི་རི་ཏཾ.
༨༦༠. ནཱ་མ་རཱུ་པཱ་ན་མུ་པྤཱ་དོ, བྷ་ངྒོ་པི ཧི ས་མོ མ་ཏོ;
ད་ནྡྷཾ ཧི ཝ་ཏྟི་ཀཾ རཱུ་པཾ, ནཱ་མཾ ཏུ ལ་ཧུ་ཝ་ཏྟི་ཀཾ.
༨༦༡. ཏ་ཐཱ ཧི རཱུ་པེ ཏི་ཊྛ་ནྟེ, ཙི་ཏྟུ་པྤཱ་དཱ ཏུ སོ་ལ༹་ས;
ཨུ་པྤ་ཛྫི་ཏྭཱ པ་ཝ་ཏྟི་ཏྭཱ, བྷི་ཛྫ་ནྟི ཙ ལ་ཧུཾ ལ་ཧུཾ.
༨༦༢. ཏ་སྨཱ ཧི ཨེ་ཀ་པ་ཉྙཱ་ས-ཁ་ཎ་རཱུ་པ་ཀྑ་ཎཾ ཏ་ཐཱ;
ས་ཏྟ་ར་ས་ཙི་ཏྟ་ཀྑ་ཎཾ, ཏི་ཁ་ཎ་ནྟི ཙ ཝུ་ཙྩ་ཏི.
༨༦༣. ཙི་ཏྟ་ཀྑ་ཎཾ ཧི ཏི་ཎྞ་ནྣཾ, ཏ་ཏྠ ཝི་ཉྙ་ཏྟི་ཀ་དྭ་ཡཾ;
ལ་ཀྑ་ཎ་ཏྟ་ཡ་རཱུ་པཾ ཏུ, ས་ལ་ཀྑ་ཎ་ཝ་ཝ་ཏྠི་ཏཾ.
༨༦༤. ཏ་སྨཱ ཧི་ཏྭཱ དྭ་ཡ་ཉྩེ་ཏཾ, བཱ་ཝཱི་ས་ཏི་ཝི་དྷ་མྤི ཙ;
རཱུ་པཾ ནཱ་མ ཙ་ཏུ་ཀྐ་ཉྩ, ས་ལ་ཀྑ་ཎ་ནི་ཡཱ་མི་ཏཾ.
༨༦༥. ཨེ་ཀུ་པྤཱ་ད་ནི་རོ་དྷཱ ཙ, ཏ་ཏྠ ཏུ་ལྱ་ཀྑ་ཎཱ མ་ཏཱ;
ཨ་ཏུ་ལྱ་ཀྑ་ཎ་དྷ་མྨཱ་ནཾ, སི་ཡཱ བྷེ་དཾ ཡ་ཐཱ་ར་ཧཾ.
༨༦༦. པ་ཊི་ས་ནྡྷི་ཀྑ་ཎེ ཛཱ་ཏཾ, ཏ་སྨཱ རཱུ་པཾ ཏ་ཏོ པ་རཾ;
ས་ཏྟ་ར་ས་མ་ཙི་ཏྟ་སྶ, བྷ་ངྒེ་ན ས་ཧ བྷི་ཛྫ་ཏི.
༨༦༧. ཏ་སྶ ཋི་ཏི་ཀྑ་ཎེ ཛཱ་ཏཾ, རཱུ་པ་མྤི ཙ ཏ་ཏོ པ་རཾ;
ཨ་ཊྛཱ་ར་ས་མ་ཙི་ཏྟ་སྶ, ཨུ་པྤཱ་དེ པ་ན བྷི་ཛྫ་ཏི.
༨༦༨. ཏ་སྶ བྷ་ངྒ་ཀྑ་ཎེ ཛཱ་ཏཾ, རཱུ་པ་མྤི ཙ ཏ་ཏོ པ་རཾ;
ཨ་ཊྛཱ་ར་ས་མ་ཙི་ཏྟ་སྶ, ཋི་ཏི་ཀཱ་ལེ་སུ བྷི་ཛྫ་ཏི.
༨༦༩. ཏ་ཐཱ དུ་ཏི་ཡ་ཙི་ཏྟ་སྶ, ཨུ་པྤཱ་ད་མྷི ས་མུ་ཊྛི་ཏཾ;
ཨ་ཊྛཱ་ར་ས་མ་ཙི་ཏྟ་སྶ, བྷ་ངྒེ་ན ས་ཧ བྷི་ཛྫ་ཏི.
༨༧༠. ཨི་ཏི ཝུ་ཏྟ་ནི་ཡཱ་མེ་ན, ས་ཛཱ་ཏི་ཀྑ་ཎ་ཏོ པ་རཾ;
ཋ་ཏྭཱ ཨེ་ཀཱུ་ན་པ་ཉྙཱ་ས, ཁ་ཎཱ་ནི པུ་ན བྷི་ཛྫ་ཏི.
༨༧༡. ཏ་སྨཱ ཨེ་ཀཱུ་ན་པ་ཉྙཱ་ས, ཀ་ལཱ་པཱ ས་ཧ ཝ་ཏྟ་རེ;
ཨེ་ཀོ ཛཱ་ཡ་ཏི ཨེ་ཀོ ཙ, བྷི་ཛྫ་ཏཱི་ཏི ཙ ས་བྦ་ཐཱ.
༨༧༢. ཨེ་ཀ་ས་ནྟ་ཏི་ས་མྦ་ནྡྷཱ, ཀ་ལཱ་པཱ ས་ཧ ཀ་མྨ་ཛཱ;
ཡ་ཐཱ་ནུ་པུ་བྦ་གྷ་ཊི་ཏཱ, ཨེ་ཀ་པ་ཉྙཱ་ས ལ་བྦྷ་རེ.
༨༧༣. ས་ཏྟ་ཝཱི་ས པ་ནི་ཙྩེ་ཝཾ, ཀཱ་མེ དྭེ རཱུ་པ་བྷཱུ་མི་ཡཾ;
རཱུ་པ་ས་ནྟ་ཏི་སཱི་སཱ་ནཾ, རཱ་ས་ཡོ ས་ཏྟ་ཀཱ་ད་ཡོ.
༨༧༤. ཨེ་ཀཱུ་ན་ཏིཾ་ས ས་བྦེ་པི, ཀ་མྨ་ཛཱ་ཏཱ ཡ་ཐཱ་ར་ཧཾ;
ཨེ་ཀ་པ་ཉྙཱ་ས གྷ་ཊི་ཀཱ, པ་ཝ་ཏྟ་ནྟི ཁ་ཎེ ཁ་ཎེ.
༨༧༥. ཏ་ཏྠ ས་ནྡྷི་ཀྑ་ཎེ ཛཱ་ཏཾ, ས་ཏྟ་ར་ས་མ་ཙེ་ཏ་སོ;
ཨུ་པྤཱ་དེ བྷི་ཛྫ་ཏི་ཙྩེ་ཝཾ, ཝུ་ཏྟོ ཨ་ཊྛ་ཀ་ཐཱ་ན་ཡོ.
༨༧༦. ཏཾ ན་ཡཾ པ་ཊི་བཱ་ཧི་ཏྭཱ, ཙི་ཏྟེ་ན ས་ཧ བྷི་ཛྫ་ཏི;
ཙི་ཏྟེ་ན ས་ཧ ཛཱ་ཏ་ནྟི, ཝུ་ཏྟ་མཱ་ཙ་རི་ཡེ་ན ཧི.
༨༧༧. ཨཱ་ནཱ་པཱ་ན་ཏ་ཀྐ་ཙཱ་རཱ, ཨེ་ཀུ་པྤཱ་ད་ནི་རོ་དྷ་ཀཱ;
ཝུ་ཏྟཱ ཧི ཡ་མ་ཀེ ཀཱ་ཡ་ཝ་ཙཱི་ས་ངྑཱ་ར་ནཱ་མ་ཀཱ.
༨༧༨. ཙི་ཏྟུ་པྤཱ་ད་ཀྑ་ཎེ ཛཱ་ཏཱ, ཨུ་ཏུ ཏ་སྶ ཋི་ཏི་ཀྑ་ཎེ;
རཱུ་པཾ ཛ་ནེ་ཏི ཏ་ཏྠཱ་པི, ཨུ་ཏུ བྷ་ངྒ་ཀྑ་ཎེ་པི ཙ.
༨༧༩. ཨ་ནུ་པུ་བྦ་ཀྐ་མེ་ནེ་ཝཾ, ཛཱ་ཏཾ རཱུ་པཾ ཏ་ཐཱ་པ་རཾ;
ཨ་ཊྛཱ་ར་ས་མ་ཨུ་པྤཱ་ད་ཊྛི་ཏི་ཨཱ་དཱི་སུ བྷི་ཛྫ་ཏི.
༨༨༠. ཨི་ཏྠཾ ཀ་ལཱ་པཱ གྷ་ཊི་ཏཱ, ཨུ་ཏུ་ཛཱ་ཧཱ་ར་ཛཱ་པི ཙ;
ཨེ་ཀ་ས་ནྟ་ཏི་ས་མྦ་ནྡྷཱ, ཨེ་ཀ་པ་ཉྙཱ་ས ལ་བྦྷ་རེ.
༨༨༡. ཀ་ལཱ་པཱ ཙི་ཏྟ་ཛཱ ཡ་སྨཱ, ཨུ་པྤཱ་ད་ཀྑ་ཎ་ས་མྦྷཱུ་ཏཱ;
གྷ་ཊི་ཀཱ ས་ཧ ལ་བྦྷ་ནྟི, ཏ་སྨཱ ས་ཏྟ་ར་སེ་ཝ ཏེ.
༨༨༢. ས་བྦེ་པི རཱུ་པ་ཛ་ན་ཀཱ, ཙི་ཏྟུ་པྤཱ་དེ ཡ་ཐཱ་ས་ཀཾ;
ཛ་ནེ་ནྟི ཋི་ཏི་བྷ་ངྒེ་སུ, ན ཛ་ནེ་ནྟཱི་ཏི ཀེ་ཙ་ནཱ.
༨༨༣. ཀུ་ས་ལཱ་བྱཱ་ཀ་ཏཱ་དཱི་ནཾ, ཨེ་ཀུ་པྤཱ་ད་ནི་རོ་དྷ་ཏཱ;
དྷ་མྨཱ་ནཾ ཡ་མ་ཀེ ཝུ་ཏྟཱ, ཨི་ཏི པཱ་ལི༹ ཝ་ད་ནྟི ཙ.
༨༨༤. ཀུ་ས་ལཱ་དི་ཀ་ས་མྦ་ནྡྷཱ, ཏ་ཏྠ ཏ་ཏྠ ཧི དེ་སི་ཏཱ;
ཨི་ཏི ཝ་ཏྭཱ པུ་རེ ཝུ་ཏྟཾ, ཨི་ཙྪ་ནྟཱ་ཙ་རི་ཡཱ ན་ཡཾ.
༨༨༥. ཨི་ཙྩེ་ཝཾ ཙ་ཏུ་ས་མྦྷཱུ་ཏཱ, རཱུ་པ་ས་ནྟ་ཏི་རཱ་ས་ཡོ;
རཱུ་པཱ་ནི ཙ ཀ་ལཱ་པཱ ཙ, ཨེ་ཀཱ་བ་དྡྷཱ ཡ་ཐཱ་ར་ཧཾ.
༨༨༦. སུ་ཏྟ་པ་ཝ་ཏྟ་མ་ཏྟཱ་ནཾ, ས་མྦུ་དྡྷཱ་ན་མྤི པཱ་ཎི་ནཾ;
ཡཱ་ཝ མ་ར་ཎ་ཀཱ་ལཱ་པི, པ་ཝ་ཏྟ་ནྟི ནི་ར་ནྟ་རཾ.
༨༨༧. ཨཱ་ཡུ་ཀྑ་ཡཱ ཙ མ་ར་ཎཾ, ཏ་ཐཱ ཀ་མྨ་ཀྑ་ཡཱ སི་ཡཱ;
ཨུ་བྷི་ནྣཾ ཝཱ ཁ་ཡཱ ཙཱ་ཐ, ཨུ་པ་ཙྪེ་ད་ཀ་ཀ་མྨུ་ནཱ.
༨༨༨. ཙ་ཏུ་དྷཱ་པི མ་ར་ནྟ་སྶ, ཏ་སྶེ་ཝཾ ཏུ ཡ་ཐཱ་ར་ཧཾ;
ས་ཏྟ་ར་ས་ཙི་ཏྟ་ཀྑ་ཎ་མ་ཏྟ་སེ་ས་མྷི ཛཱི་ཝི་ཏེ.
༨༨༩. ཨུ་པ་རི་ཙྩུ་ཏི་ཙི་ཏྟ་སྶ, ས་ཏྟ་ར་ས་མ་ཙེ་ཏ་སོ;
ཋི་ཏི་ཀཱ་ལ་མུ་པཱ་དཱ་ཡ, ན ཏུ ཛཱ་ཡ་ཏི ཀ་མྨ་ཛཾ.
༨༩༠. ཏ་སྶུ་པྤཱ་ད་ཀྑ་ཎེ ཛཱ་ཏཾ,
རཱུ་པ་ཉྩ ཙུ་ཏི་ཡཱ ས་ཧ;
བྷི་ཛྫ་ཏཱི་ཏི མ་ཏོ ནཱ་མ,
ཏ་ཏོ ཧོ་ཏི ས པུ་གྒ་ལོ.
༨༩༡. ཙི་ཏྟ་ཛཱ་ཧཱ་ར་ཛ་ཉྩཱ་པི, ན ཛཱ་ཡ་ཏི ཏ་ཏོ པ་རཾ;
ཨུ་ཏུ་ས་མྦྷ་ཝ་རཱུ་པཾ ཏུ, ཨ་ཝ་སི་སྶ་ཏི ཝཱ ན ཝཱ.
༨༩༢. ཏ་ཏོ ཝུ་ཏྟ་ན་ཡེ་ནེ་ཝ, མ་ཏ་ས་ཏྟོ ཡ་ཐཱ་ར་ཧཾ;
མི་སྶཱ་མི་སྶཱ་ཧི ས་ནྡྷཱི་ཧི, པུ་ན་དེ་ཝོ་པ་པ་ཛྫ་ཏི.
༨༩༣. ཏ་ཏོ ཝུ་ཏྟ་ན་ཡེ་ནེ་ཝ, ཨེ་ཀཱུ་ན་ཏིཾ་ས ཀ་མྨ་ཛཱ;
ཏེ་ས་མུ་ཊྛཱ་ནི་ཀཱ པ་ཉྩ, ཙ་ཏུ་ཏྟིཾ་ས ས་མི་སྶི་ཏཱ.
༨༩༤. ཀ་ལཱ་པཱ རཱ་ས་ཡོ ཧོ་ནྟི, ས་ཏྟ་ཝཱི་ས་ཏི་བྷཱུ་མི་སུ;
ཨི་ཏི ས་བྦ་པ་ཀཱ་རེ་ན, རཱུ་པ་དྷ་མྨཱ པ་ཀཱ་སི་ཏཱ་ཏི.
ཨི་ཏི རཱུ་པ་ཝི་བྷཱ་གེ པ་ཀི་ཎྞ་ཀ་ཀ་ཐཱ ནི་ཊྛི་ཏཱ.
དྭཱ་ཝཱི་ས་ཏི་མོ པ་རི་ཙྪེ་དོ.
ནི་ཊྛི་ཏོ ཙ ས་བྦ་ཐཱ་པི རཱུ་པ་ཝི་བྷཱ་གོ.