ཝཱི་ས་ཏི་མོ པ་རི་ཙྪེ་དོ
༢༠. ཀ་ལཱ་པ་ཀ་ཐཱ
༧༥༤. ཨི་ཏི ཝུ་ཏྟ་པྤ་ཀཱ་རེ་ན, ས་བྦཾ རཱུ་པ་མྤི པི་ཎྜི་ཏཾ;
ས་ཧ་ཝུ་ཏྟི་ནི་ཡཱ་མེ་ན, ཨེ་ཀ་ཝཱི་ས་ཝི་དྷཾ ཀ་ཐཾ.
༧༥༥. ཀ་མྨཾ ཙི་ཏྟོ་ཏུ་ཀཱ་ཧཱ་ར་ས་མུ་ཊྛཱ་ནཱ ཡ་ཐཱ་ཀྐ་མཾ;
ན་ཝ ཚ ཙ་ཏུ་རོ དྭེ ཙ, ཀ་ལཱ་པཱ ཨེ་ཀ་ཝཱི་ས་ཏི.
༧༥༦. ཛཱི་ཝི་ཏ་ཉྩཱ་ཝི་ནི་བྦྷོ་ག-རཱུ་པཱ་ནི ཙ ཡ་ཐཱ་ཀྐ་མཾ;
ཙ་ཀྑཱ་དི་ཀེ་ཧི ཡོ་ཛེ་ཏྭཱ, ད་ས་ཀཱ ཨ་ཊྛ དཱི་པི་ཏཱ.
༧༥༧. ཙ་ཀྑུ་སོ་ཏ་གྷཱ་ན་ཛི་ཝ྄ཧཱ་ད་ས་ཀཱ ཙ ཙ་ཏུ་བྦི་དྷཱ;
ཀཱ་ཡི་ཏྠི་པུ་མྦྷཱ་ཝ་ཝ་ཏྠུ་ད་ས་ཀཱ ཙ ཏ་ཐཱ་པ་རེ.
༧༥༨. ཛཱི་ཝི་ཏེ་ནཱ་ཝི་ནི་བྦྷོ་ག་རཱུ་པཱ་ནི ན་ཝ་ཀ་ནྟི ཙ;
ན་ཝེཏེ ཀ་མྨ་ཛཱ ནཱ་མ, ཀ་ལཱ་པཱ ས་མུ་དཱི་རི་ཏཱ.
༧༥༩. ཨ་ཝི་ནི་བྦྷོ་ག་རཱུ་པཱ་ནི, སུ་དྡྷ་ཊྛ་ཀ་མ་ཐཱ་པ་རཾ;
ཀཱ་ཡ་ཝི་ཉྙ་ཏྟི་ན་ཝ་ཀཾ, ཀཱ་ཡ་ཝི་ཉྙ་ཏྟི་ཡཱ ས་ཧ.
༧༦༠. ཝ་ཙཱི་ཝི་ཉྙ་ཏྟི་ད་ས་ཀཾ, ས་དྡེ་ན ས་ཧ་ཝུ་ཏྟི་ཏོ;
ལ་ཧུ་ཏཱ་དེ་ཀཱ་ད་ས་ཀཾ, ཏི་ཎྞ་ནྣཾ ས་ཧ ས་མྦྷ་ཝཱ.
༧༦༡. ཀཱ་ཡ་ཝི་ཉྙ་ཏྟི་ལ་ཧུ་ཏཱ་དཱི་ཧི དྭཱ་ད་ས་ཀཾ བྷ་ཝེ;
ཝ་ཙཱི་ཝི་ཉྙ་ཏྟི་ལ་ཧུ་ཏཱ་དཱི་ཧི ཏེ་ར་ས་ཀཾ ཏ་ཐཱ.
༧༦༢. ཨི་ཏི ཙི་ཏྟ་ས་མུ་ཊྛཱ་ནཱ, ཀ་ལཱ་པཱ ཚ པ་ཀཱ་སི་ཏཱ;
རཱུ་པཱ་ཀཱ་ར་ཝི་ཀཱ་ར་མྤི, ས་ངྒ་ཧེ་ཏྭཱ ཡ་ཐཱ་ར་ཧཾ.
༧༦༣. སུ་དྡྷ་ཊྛ་ཀཾ ཏུ པ་ཋ་མཾ, ས་དྡེ་ན ན་ཝ་ཀཾ བྷ་ཝེ;
ལ་ཧུ་ཏཱ་དེ་ཀཱ་ད་ས་ཀཾ, ལ་ཧུ་ཏཱ་དཱི་ཧི ཏཱི་ཧི་པི.
༧༦༤. ས་དྡེ་ན ལ་ཧུ་ཏཱ་དཱི་ཧི, ཏ་ཐཱ དྭཱ་ད་ས་ཀ་ནྟི ཙ;
ཀ་ལཱ་པཱ ཨུ་ཏུ་ས་མྦྷཱུ་ཏཱ, ཙ་ཏུ་དྷཱ་ཝ པ་ཀི་ཏྟི་ཏཱ.
༧༦༥. སུ་དྡྷ་ཊྛ་ཀ་ཉྩ པ་ཋ་མཾ, ཨཱ་ཧཱ་ར་ཛ་མ་ཐཱ་པ་རཾ;
ལ་ཧུ་ཏཱ་དེ་ཀཱ་ད་ས་ཀཾ, ཨི་ཏི དྭེ ཨོ་ཛ་ཛཱ མ་ཏཱ.
༧༦༦. ཀ་ལཱ་པཱ་ནཾ པ་རི་ཙྪེ་ད་ལ་ཀྑ་ཎ་ཏྟཱ ཝི་ཙ་ཀྑ་ཎཱ;
ན ཀ་ལཱ་པ་ངྒ་མི་ཙྩཱ་ཧུ, ཨཱ་ཀཱ་སཾ ལ་ཀྑ་ཎཱ་ནི ཙ.
༧༦༧. ཏ་ཏྠ ཙེ་ཀཱུ་ན་ན་ཝུ་ཏི, ཏེ་ས་ཊྛི ཙ ཡ་ཐཱ་ཀྐ་མཾ;
ཏཱ་ལཱི་སེ་ཀཱུ་ན་ཝཱི་སཱ ཙ, ཀ་ལཱ་པ་ངྒཱ་ནི ཏཱ་ནི ཙ.
༧༦༨. ལ་ཀྑ་ཎཱ་ཀཱ་ས་རཱུ་པཱ་ནི, ཀ་ལཱ་པེ་སུ ཏ་ཧིཾ ཏ་ཧིཾ;
པ་ཉྩ པ་ཉྩེ་ཏི རཱུ་པཱ་ནི, ཏི་ས་ཏཾ སོ་ལ༹་སཱ་དྷི་ཀཾ.
༧༦༩. ཨ་ག་ཧཱི་ཏ་གྒ་ཧ་ཎེ་ན, ཨ་ཊྛ་ཝཱི་ས་ཝི་དྷཱ་ནི་པི;
རཱུ་པ་ཀོ་ཊྛཱ་ས་ནཱ་མེ་ན, པ་ཉྩ་ཝཱི་ས་ཏི བྷཱ་ཝ་ཡེ.
༧༧༠. བྷཱུ་ཏ་ཏྟ་ཡཾ ཏུ ཕོ་ཊྛ་བྦཾ, ཀ་ཏྭཱ་པ་ཙ་ཡ་ས་ནྟ་ཏིཾ;
ཛཱ་ཏི་མེ་ཀ་ཉྩ ཀ་ཏྭཱ ཝཱ, ཝི་ནཱ་ཐ ཧ་ད་ཡཾ ཏ་ཧིཾ.
༧༧༡. དྷ་མྨ་ས་ངྒ་ཎི་ཡཾ ཧེ་ཏཾ, རཱུ་པ་ཀ་ཎྜེ ས་རཱུ་པ་ཏོ;
ཝ་ཏྠུ་རཱུ་པཾ ན ནི་དྡི་ཊྛཾ, པ་ཊྛཱ་ནེ དེ་སི་ཏཾ ཏུ ཏཾ.
༧༧༢. དྭེ ས་དྡ་ན་ཝ་ཀཱ ཙེ་ཝ,
ཏ་ཡོ སུ་དྡྷ་ཊྛ་ཀཱ་པི ཙ;
དྭེ དྭེ ཙི་ཏྟོ་ཏུ་ས་མྦྷཱུ་ཏཱ,
ཨེ་ཀོ ཨཱ་ཧཱ་ར་ཛོ་ཏི ཙ.
༧༧༣. ཏེ་ས་མུ་ཊྛཱ་ནི་ཀཱ པ་ཉྩ, ཀ་མྨ་ཛཱ་ནི ན་ཝེ་ཏི ཙ;
རཱུ་པ་རཱུ་པ་ཝ་སེ་ནེ་ཏེ, ཀ་ལཱ་པཱ ཙུ་དྡ་སེ་རི་ཏཱ.
༧༧༤. ད་ས་ཀེ་སྭེ་ཝ ས་ངྒ་ཡ྄ཧ, ཛཱི་ཝི་ཏ་ན་ཝ་ཀཾ ཏ་ཧིཾ;
བྷཱ་ཝ་དྡ་ས་ཀ་མེ་ཀཾ ཝཱ, ཀ་ཏྭཱ ཝ་ཏྠུཾ ཝི་ནཱ ཏ་ཐཱ.
༧༧༥. ས་དྡཱ ཙི་ཏྟོ་ཏུ་ཛཱ དྭེ་ཝ, ཏེ་ས་མུ་ཊྛཱ་ནི་ཀཱ ཏ་ཡོ;
སུ་དྡྷ་ཊྛ་ཀཱ ཙ ས་ཏྟེ་ཝ, ཀ་མྨ་ཛཱ ད་ས་ཀཱ་ནི ཙ.
༧༧༦. ཚ་ནྣ་ཝཱུ་ཏི་ཝི་དྷཾ ཏ་ཏྠ, རཱུ་པཾ བྷཱ་ས་ནྟི པ་ཎྜི་ཏཱ;
ཨ་ག་ཧཱི་ཏ་གྒ་ཧ་ཎེ་ན, ཨ་ཊྛཱ་ར་ས་ཝི་དྷཾ བྷ་ཝེ.
༧༧༧. ཏེ་ས་མེ་ཝ ཀ་ལཱ་པཱ་ནཾ, ས་ཏྟ་ཀ་ཙྪ་ཀྐ་པ་ཉྩ་ཀཱ;
ཙ་ཏུ་ཀྐཱ ཙ ཏི་ཀ་དྭི་ཀཱ, ཨེ་ཀ་ཀཱ ཙ ཡ་ཐཱ་ར་ཧཾ.
༧༧༨. དྭེ ས་ཏྟ ན་ཝ ཚ ཏ་ཡོ, ཏ་ཡོ་པི ཙ ཡ་ཐཱ་ཀྐ་མཾ;
ཙ་ཏྟཱ་རོ་ཏི ཙ་ཏུ་ཏྟིཾ་ས, ས་ཧ་ཝུ་ཏྟི་ཀ་རཱ་ས་ཡོ.
༧༧༩. ཙ་ཀྑུ་སོ་ཏ་གྷཱ་ན་ཛི་ཝ྄ཧཱ-ཀཱ་ཡ་ཝ་ཏྠུ་ཝ་སཱ སི་ཡུཾ;
ཨི་ཏྠི་པུ་མྦྷཱ་ཝ་ད་ས་ཀ་ས་ཧི་ཏཱ ས་ཏྟ་ཀཱ དྭི་དྷཱ.
༧༨༠. ཙ་ཀྑུ་སོ་ཏ་གྷཱ་ན་ཧཱི་ནཱ, པ་ཙྩེ་ཀཾ དྭེ ས་བྷཱ་ཝ་ཀཱ;
ཨ་བྷཱ་ཝ་ཏོ བྷཱ་ཝ་ཧཱི་ནོ, ཨི་ཏྠཾ ཚ་ཀྐཱ་པི ས་ཏྟ་དྷཱ.
༧༨༡. ཙ་ཀྑུ་སོ་ཏ་ཝི་ཧཱི་ནཱ ཙ,
ཙ་ཀྑུ་གྷཱ་ན་ཝི་ཧཱི་ན་ཀཱ;
སོ་ཏ་གྷཱ་ན་ཝི་ཧཱི་ནཱ ཙ,
ས་བྷཱ་ཝཱ དྭེ ཏ་ཡོ ཏ་ཡོ.
༧༨༢. ཙ་ཀྑཱ་དེ་ཀེ་ཀ་ཏོ ཧཱི་ནཱ,
ཏི་ཝི་དྷཱ་པི ཨ་བྷཱ་ཝ་ཏོ;
ཨི་ཙྩེ་ཝཾ པ་ཉྩ་ཀཱ ནཱ་མ,
ན་ཝ་ཀཱ རཱ་ས་ཡོ སི་ཡུཾ.
༧༨༣. ཙ་ཀྑཱ་དི་ཏྟ་ཡ་ཧཱི་ནཱ་ཝ, ཨེ་ཀ་ཏོ དྭེ ས་བྷཱ་ཝ་ཀཱ;
ཙ་ཀྑཱ་དི་ཏྟ་ཡ་ཏོ དྭཱི་ཧི, ཏ་ཡོ ཧཱི་ནཱ ཨ་བྷཱ་ཝ་ཀཱ.
༧༨༤. རཱུ་པ་ལོ་ཀེ ཙ་ཀྑུ་སོ་ཏ-ཝ་ཏྠུ་ཛཱི་ཝི་ཏ་ན་ཝ་ཀཱ;
ཙ་ཏྟཱ་རོ་ཝ ཀ་ལཱ་པཱ་ཏི, ཙ་ཏུ་ཀྐཱ ཚ ཡ་ཐཱ་ར་ཧཾ.
༧༨༥. ཛི་ཝ྄ཧཱ་ཀཱ་ཡ་ཝ་ཏྠུ་ཝ་སཱ,
ཨ་བྷཱ་ཝོ དྭེ ས་བྷཱ་ཝ་ཀཱ;
ཀཱ་ཡ་བྷཱ་ཝ་ཝ་ཏྠུ་ཝ་སཱ,
ཨི་ཏི ཧོ་ནྟི ཏ་ཡོ ཏི་ཀཱ.
༧༨༦. ཀཱ་ཡ་ཝ་ཏྠུ་ཝ་སེ་ནེ་ཀོ, དྭེ ཙ ཙི་ཏྟོ་ཏུ་ས་མྦྷ་ཝཱ;
ས་དྡ་ན་ཝ་ཀ་ཊྛ་ཀཱ་ཏི, དུ་ཀཱ ཙ ཏི་ཝི་དྷཱ སི་ཡུཾ.
༧༨༧. ཛཱི་ཝི་ཏ་ན་ཝ་ཀ་ཉྩེ་ཀཾ, ཏེ་ས་མུ་ཊྛཱ་ནི་ཀཱ་ནི ཙ;
སུ་དྡྷ་ཊྛ་ཀཱ་ནི ཏཱི་ཎཱི་ཏི, ཙ་ཏྟཱ་རོ ཨེ་ཀ་ཀཱ སི་ཡུཾ.
༧༨༨. ཙ་ཏུ་ཏྟིཾ་ས པ་ནི་ཙྩེ་ཏེ, ས་ནྡྷི་ཡ་ཉྩ པ་ཝ་ཏྟི་ཡཾ;
རཱུ་པ་རཱུ་པ་ཀ་ལཱ་པཱ་ནཾ, རཱ་ས་ཡོ ཧོ་ནྟི ས་མྦྷ་ཝཱ.
༧༨༩. ས་ཏྟ་ཏི ས་ཊྛི་མི་ཙྩེ་ཝ་མཱ་དི་ནཱ ཙ ཡ་ཐཱ་ར་ཧཾ;
ཀ་ལཱ་པ་རཱ་སི་རཱུ་པཱ་ནི, ཏ་ཏྠ ཏ་ཏྠ ཝི་བྷཱ་ཝ་ཡེ.
༧༩༠. སོ་ལ༹་ས པ་ཉྩ་ད་སེ་ཏི་ཨཱ་དི་བྷེ་ད་ཝ་སཱ་པི ཙ;
ཨ་ག་ཧཱི་ཏ་གྒ་ཧ་ཎེ་ན, ཏ་ཏྠ ཏ་ཏྠ ཝི་ནི་དྡི་སེ.
༧༩༡. ཙ་ཏུ་ཙ་ཏྟཱ་ལཱི་ས་ས་ཏཾ, ཀ་ལཱ་པཱ ཧོ་ནྟི པི་ཎྜི་ཏཱ;
ཚ་བྦཱི་ས ཏ་ཏྠ རཱུ་པཱ་ནི, ས་ཧ་སྶ་ཉྩ ཙ་ཏུ་སྶ་ཏཾ.
༧༩༢. ཨི་ཙྩཱ་པཱ་ཡ་ཙ་ཏུ་ཀྐེ ཙ, ཀཱ་མེ སུ་ག་ཏི་ས་ཏྟ་ཀེ;
རཱུ་པེ ཙ པ་ཉྩ་ད་ས་ཀེ, ཨ་ས་ཉྙཱ་པཱ་ཡ་བྷཱུ་མི་ཡཾ.
༧༩༣. ཙ་ཏུ་ཀོ་ཊྛཱ་སི་ཀེ་སྭེ་ཝ, ས་ཏྟ་ཝཱི་ས་ཝི་དྷེ་སུ་པི;
ཛཱ་ཏི་ཊྛཱ་ནེ་སུ ས་ཏྟཱ་ནཾ, ས་ནྡྷི་ཡ་ཉྩ པ་ཝ་ཏྟི་ཡཾ.
༧༩༤. ཨི་ནྡྲི་ཡ་བ་དྡྷ་ས་ནྟཱ་ནེ, ཏ་ཐཱ་ནི་ནྡྲི་ཡ་ཀ་མྷི ཙ;
བ་ཧི་ས་ངྑཱ་ར་ས་ནྟཱ་ནེ, མ་ཏ་ཀཱ་ཡེ ཙ ས་མྦྷ་ཝཱ.
༧༩༥. ལ་བྦྷ་མཱ་ན་ཀ་ལཱ་པཱ ཙ, ཀ་ལཱ་པཱ་ན་ཉྩ རཱ་ས་ཡོ;
ཏ་ཏྠ ཝི་ཏྠཱ་ར་ས་ངྑེ་པཱ, རཱུ་པཱ་ནཾ ག་ཎ་ནཱ་པི ཙ.
༧༩༦. ཨེ་ཏྠ རཱུ་པཱ ཨ་ཝུ་ཏྟཱ ཧི, ཡ་ཐཱ་ཝུ་ཏྟཱ་ནུ་སཱ་ར་ཏོ;
ཝི་ཏྠཱ་རེ་ཏྭཱ་ན ཝི་ཉྙེ་ཡྻཱ, ས་བྦ་ཐཱ་པི ཙ ཝི་ཉྙུ་ནཱ་ཏི.
ཨི་ཏི རཱུ་པ་ཝི་བྷཱ་གེ ཀ་ལཱ་པ་ཀ་ཐཱ ནི་ཊྛི་ཏཱ.
ཝཱི་ས་ཏི་མོ པ་རི་ཙྪེ་དོ.