༡༨. ས་རཱུ་པ་ཀ་ཐཱ
༦༥༣. ཏེ་པ་ཉྙཱ་ས པ་ནི་ཙྩེ་ཝཾ, ནཱ་མ་དྷ་མྨཱ པ་ཀཱ་སི་ཏཱ;
ཨ་ཊྛ་ཝཱི་ས་ཝི་དྷཾ དཱ་ནི, རཱུ་པཾ ནཱ་མ ཀ་ཐཱི་ཡ་ཏི.
༦༥༤. པ་ཐ་ཝཱ་པོ ཙ ཏེ་ཛོ ཙ, ཝཱ་ཡོ ཙེ་ཏི ཙ་ཏུ་བྦི་དྷོ;
ཙ་ཀྑུ་སོ་ཏ་གྷཱ་ན་ཛི་ཝ྄ཧཱ, ཀཱ་ཡོ་ཏི པ་ན པ་ཉྩ ཙ.
༦༥༥. རཱུ་པ་ས་དྡ་ག་ནྡྷ་ར་སཱ, ཙ་ཏྟཱ་རོ ཙ ཨ་ཐཱ་པ་རཾ;
ཨི་ཏྠི་པུ་མྦྷཱ་ཝ་ཡུ་ག་ལ༹ཾ, ཛཱི་ཝི་ཏཾ ཧ་ད་ཡ་མྤི ཙ.
༦༥༦. ཀཱ་ཡ་ཝི་ཉྙ་ཏྟི ཙེ་ཝཱ་ཐ, ཝ་ཙཱི་ཝི་ཉྙ་ཏྟི ཙ དྭ་ཡཾ;
ཨཱ་ཀཱ་ས་དྷཱ་ཏུ རཱུ་པ་སྶ, ལ་ཧུ་ཏཱ མུ་དུ་ཏཱ ཏ་སྶ.
༦༥༧. ཀ་མྨ་ཉྙ་ཏཱ ཨུ་པ་ཙ་ཡོ, ས་ནྟ་ཏི ཛ་ར་ཏཱ པ་ན;
ཨ་ནི་ཙྩ་ཏཱ ཙ ཀ་བ་ལཱི༹་ཀཱ་རཱ་ཧཱ་རོ་ཏི ས་བྦ་ཐཱ.
༦༥༨. ཨ་ཊྛ་ཝཱི་ས་ཝི་དྷཾ ཧོ་ཏི, རཱུ་པ་མེ་ཏཾ ས་རཱུ་པ་ཏོ;
ཏ་སྶ ལ་ཀྑ་ཎ་བྷེ་དེ་ན, ས་བྷཱ་ཝ་ཉྩ ཝི་བྷཱ་ཝ་ཡེ.
༦༥༩. ས་ནྡྷཱ་ར་ཎཾ ཏུ པ་ཐ་ཝཱི་དྷཱ་ཏུ ཀ་ཀྑ་ལ༹་ལ་ཀྑ་ཎཱ;
ཨཱ་བ་ནྡྷ་ནམཱ་པོ་དྷཱ་ཏུ, ཨཱ་པ་གྒྷ་ར་ཎ་ལ་ཀྑ་ཎཱ.
༦༦༠. པ་རི་པཱ་ཙ་ན་ཏཱ ཏེ་ཛོ་དྷཱ་ཏུ ཨུ་ཎྷ་ཏྟ་ལ་ཀྑ་ཎཱ;
ས་མུ་དཱི་ར་ཎ་ཏཱ ཝཱ་ཡོ་དྷཱ་ཏུ ཝི་ཏྠ་མྦྷ་ལ་ཀྑ་ཎཱ.
༦༦༡. ས་བྦ་ཏྠཱ་ཝི་ནི་བྷུ་ཏྟཱ་པི, ཨ་ས་མྨི་སྶ་ཀ་ལ་ཀྑ་ཎཱ;
ཏཾ་ཏཾ་བྷཱ་ཝ་ས་མུ་སྶ་ནྣ་ས་མྦྷཱ་རེ་སུ་པ་ལ་ཀྑི་ཏཱ.
༦༦༢. ཨ་ཉྙ་མ་ཉྙེ་ནུ་པ་ཏྠ་དྡྷཱ, སེ་ས་རཱུ་པ་སྶ ནི་སྶ་ཡཱ;
ཙ་ཏུ་དྷེ་ཝཾ ཀ་ལཱ་པེ་སུ, མ་ཧཱ་བྷཱུ་ཏཱ པ་ཝ་ཏྟ་རེ.
༦༦༣. ཙ་ཀྑུ ས་མྦྷཱ་ར་ཙ་ཀྑུ་མྷི, ས་ཏྟ་ཀྑི་པ་ཊ་ལོ་ཙི་ཏེ;
ཀ་ཎྷ་མ་ཎྜ་ལ་མ་ཛ྄ཛྷ་མྷི, པ་སཱ་དོ་ཏི པ་ཝུ་ཙྩ་ཏི.
༦༦༤. ཡེ་ན ཙ་ཀྑུ་པ་སཱ་དེ་ན, རཱུ་པཱ་ནི ཨ་ནུ་པ་སྶ་ཏི;
པ་རི་ཏྟཾ སུ་ཁུ་མ་ཉྩེ་ཏཾ, ཨཱུ་ཀཱ་སི་ར་ས་མཱུ་པ་མཾ.
༦༦༥. སོ་ཏཾ སོ་ཏ་བི་ལ་སྶ་ནྟོ,
ཏ་མྦ་ལོ་མཱ་ཙི་ཏེ ཏ་ཐཱ;
ཨ་ངྒུ་ལི་ཝེ་དྷ་ནཱ་ཀཱ་རེ,
པ་སཱ་དོ་ཏི པ་ཀཱ་སི་ཏོ.
༦༦༦. ཨ་ནྟོ ཨ་ཛ་པ་ད་ཊྛཱ་ནེ, གྷཱ་ནཾ གྷཱ་ན་བི་ལེ ཋི་ཏཾ;
ཛི་ཝ྄ཧཱ ཛི་ཝ྄ཧཱ་ཡ མ་ཛ྄ཛྷ་མྷི, ཨུ་པྤ་ལཱ་ཀཱ་ར་ས་ནྣི་བྷེ.
༦༦༧. ཨི་ཙྩེ་ཝཾ པ་ན ཙ་ཏྟཱ་རོ, ཏཾ་ཏཾ་དེ་ས་ཝ་ཝ་ཏྠི་ཏཱ;
ཀཱ་ཡཔྤ་སཱ་དོ་པཱ་དི་ནྣེ, ས་བྦ་ཀེ་ཏི ཡ་ཐཱ་ཀྐ་མཾ.
༦༦༨. རཱུ་པཱ་དྱཱ་བྷི་གྷཱ་ཏཱ་ར་ཧ་བྷཱུ་ཏཱ་ནཾ ཝཱ ཡ་ཐཱ་ར་ཧཾ;
ད་ཊྛུ་ཀཱ་མ་ནི་དཱ་ནཱ་དི་ཀ་མྨ་བྷཱུ་ཏཱ་ན་མེ་ཝ ཝཱ.
༦༦༩. པ་སཱ་ད་ལ་ཀྑ་ཎཱ བྷཱུ་ཏ་རཱུ་པཱ་ནཾ བྷཱུ་ཏ་ནི་སྶི་ཏཱ;
ཀ་པྤཱ་ས་པ་ཊ་ལ་སྣེ་ཧ་ས་ནྣི་བྷཱ་ཏི ཙ ཝ་ཎྞི་ཏཱ.
༦༧༠. པ་ཉྩཱ་པི ཛཱི་ཝི་ཏཱ་ར་ཀྑཱ, རཱུ་པཱ་དི་པ་རི་ཝཱ་རི་ཏཱ;
དྷཱི་ཏ་རཱ་ཝ ཀུ་མཱ་རཱ་ཝ, ཀ་ལཱ་པ་ནྟ་ར་ཝུ་ཏྟི་ནོ.
༦༧༡. རཱུ་པཾ ནི་བྷཱ་སོ བྷཱུ་ཏཱ་ནཾ, ས་དྡོ ནི་གྒྷོ་ས་ནཾ ཏ་ཐཱ;
ག་ནྡྷོ ཙ ག་ནྡྷ་ནཾ ཏ་ཏྠ, ར་སོ ཙ ར་ས་ནཱི་ཡ་ཏཱ.
༦༧༢. བྷཱུ་ཏ་ཏྟ་ཡ་ཉྩ ཕོ་ཊྛ་བྦཾ, ཨཱ་པོ་དྷཱ་ཏུ་ཝི་ཝ་ཛྫི་ཏཾ;
ས་དྡོ ཨ་ནི་ཡ་ཏོ ཏ་ཏྠ, ཏ་ད་ཉྙེ ས་ཧ་ཝུ་ཏྟི་ནོ.
༦༧༣. ཙ་ཀྑཱ་དི་པ་ཊི་ཧ་ན་ན་ལ་ཀྑ་ཎཱ ཏུ ཡ་ཐཱ་ཀྐ་མཾ;
པ་ཉྩེ་ཝ པ་ཉྩ་ཝི་ཉྙཱ་ཎ་ཝཱི་ཐི་ཡཱ ཝི་ས་ཡཱ མ་ཏཱ.
༦༧༤. ཨི་ཏྠི་ནྡྲི་ཡཾ པ་ནི་ཏྠི་ཏྟཾ, ཨི་ཏྠི་བྷཱ་ཝོཏི དེ་སི་ཏོ;
པུ་རི་ས་ཏྟཾ ཏ་ཐཱ་བྷཱ་ཝོ, པུ་རི་སི་ནྡྲི་ཡ ནཱ་མ་ཀོ.
༦༧༥. ཏཾ དྭ་ཡཾ པ་ནུ་པཱ་དི་ནྣེ, ཀཱ་ཡེ ས་བྦ་ཏྠ ལ་བྦྷ་ཏི;
ཀ་ལཱ་པ་ནྟ་ར་བྷི་ནྣ་ཉྩ, བྷི་ནྣ་ས་ནྟཱ་ན་ཝ་ཏྟི ཙ.
༦༧༦. རཱུ་པཱ་ནཾ ཀ་མྨ་ཛཱ་ཏཱ་ནཾ, ཨ་ནུ་པཱ་ལ་ན་ལ་ཀྑ་ཎཾ;
ཛཱི་ཝི་ཏི་ནྡྲི་ཡ་རཱུ་པནྟི, ཨཱ་ཡུ ནཱ་མ པ་ཝུ་ཙྩ་ཏི.
༦༧༧. མ་ནོ་དྷཱ་ཏུ་ཡཱ ཙ ཏ་ཐཱ, མ་ནོ་ཝི་ཉྙཱ་ཎ་དྷཱ་ཏུ་ཡཱ;
ནི་སྶ་ཡ་ལ་ཀྑ་ཎཾ ཝ་ཏྠུ་རཱུ་པཾ ཧ་ད་ཡ་ནི་སྶི་ཏཾ.
༦༧༨. མ་ཛ྄ཛྷེ ཧ་ད་ཡ་ཀོ་ས་མྷི, ཨ་ཌྜྷ་པྤ་ས་ཏ་ལོ་ཧི་ཏེ;
བྷཱུ་ཏ་རཱུ་པ་མུ་པཱ་དཱ་ཡ, ཙ་ཀྑཱ་དི ཝི་ཡ ཝ་ཏྟ་ཏི.
༦༧༩. ཨཱ་ཀཱ་ས་དྷཱ་ཏུ རཱུ་པཱ་ནཾ, པ་རི་ཙྪེ་ད་ཀ་ལ་ཀྑ་ཎཱ;
ཏཾ་ཏཾ་རཱུ་པ་ཀ་ལཱ་པཱ་ནཾ, པ་རི་ཡ་ནྟོ་ཏི ཝུ་ཙྩ་ཏི.
༦༨༠. ཙི་ཏྟཾ ས་ཧ་ཛ་རཱུ་པཱ་ནཾ, ཀཱ་ཡ་སྶ ག་མ་ནཱ་དི་སུ;
ས་ནྠ་མྦྷ་ན་ས་ནྡྷཱ་ར་ཎ་ཙ་ལ་ན་སྶ ཏུ པ་ཙྩ་ཡོ.
༦༨༡. ཝཱ་ཡོ་དྷཱ་ཏུ་ཝི་ཀཱ་རོ་ཡཾ, ཀཱ་ཡ་ཝི་ཉྙ་ཏྟིནཱ་མ་ཀོ;
ཝཱ་ཡོ་དྷཱ་ཏཱ་དྷི་ཀཱ་ནཾ ཏུ, བྷཱུ་ཏཱ་ན་མི་ཏི ཀེ་ཙ་ནཱ.
༦༨༢. ཏ་ཐཱ ཙི་ཏྟ་ས་མུ་ཊྛི་ནོ, ཝ་ཙཱི་གྷོ་ས་པྤ་ཝ་ཏྟི་ཡཾ;
ཨུ་པཱ་དི་ནྣ་རཱུ་པ་ཀཱ་ཡ་གྷ་ཊྚ་ན་སྶ ཏུ པ་ཙྩ་ཡོ.
༦༨༣. པ་ཐ་ཝཱི་དྷཱ་ཏུ་ཝི་ཀཱ་རོ་ཡཾ, ཝ་ཙཱི་ཝི་ཉྙ་ཏྟིནཱ་མ་ཀོ;
པ་ཐ་ཝཱི་དྷཱ་ཏཱ་དྷི་ཀཱ་ནཾ ཏུ, བྷཱུ་ཏཱ་ན་མི་ཏི ཀེ་ཙ་ནཱ.
༦༨༤. དྭེ་པི ཀཱ་ཡ་ཝ་ཙཱི་ཀ་མྨ་དྭཱ་ར་བྷཱུ་ཏཱ ཡ་ཐཱ་ཀྐ་མཾ;
ཏེ པ་ན གྷ་ཊྚ་ནཱ་ཧེ་ཏུ-ཝི་ཀཱ་རཱ་ཀཱ་ར་ལ་ཀྑ་ཎཱ.
༦༨༥. ཝི་ཉྙཱ་པེ་ཏཱི་ཏི ཀཱ་ཡེ་ན, ཝཱ་ཙཱ་ཡ ཙ ཝི་ཙི་ནྟི་ཏཾ;
ས་ཡ་ཉྩ ཝི་ཉྙཱ་ཡ་ཏཱི་ཏི, ཝི་ཉྙ་ཏྟཱི་ཏི པ་ཀི་ཏྟི་ཏཱ.
༦༨༦. ལ་ཧུ་ཏཱ པ་ན རཱུ་པཱ་ནཾ, ཨ་ད་ནྡྷཱ་ཀཱ་ར་ལ་ཀྑ་ཎཱ;
མུ་དུ་ཏཱ་པི ཙ རཱུ་པཱ་ནཾ, མ་དྡ་ཝཱ་ཀཱ་ར་ལ་ཀྑ་ཎཱ.
༦༨༧. ཀ་མྨ་ཉྙ་ཏཱ ཙ རཱུ་པཱ་ནཾ, ཡོ་གྒ་ཏཱ་ཀཱ་ར་ལ་ཀྑ་ཎཱ;
གཱ་ར་ཝ་ཐ་དྡྷ་ཏཱ ཡོ་གྒ་པ་ཊི་པ་ཀྑཱ ཡ་ཐཱ་ཀྐ་མཾ.
༦༨༨. ས་པྤཱ་ཡ་མུ་ཏུ་མཱ་ཧཱ་རཾ, ལ་བྷི་ཏྭཱ ཙི་ཏྟ་ས་མྤ་དཾ;
ལ་ཧཱུ མུ་དུ ཙ ཀ་མྨ་ཉྙཾ, ཡ་དཱ རཱུ་པཾ པ་ཝ་ཏྟ་ཏི.
༦༨༩. ཏ་ཐཱ་པ་ཝ་ཏྟ་རཱུ་པ་སྶ, པ་ཝ་ཏྟཱ་ཀཱ་ར་བྷེ་དི་ཏཾ;
ལ་ཧུ་ཏཱ་དི་ཏྟ་ཡ་མྤེ་ཏཾ, ས་ཧ་ཝུ་ཏྟི ཏ་དཱ བྷ་ཝེ.
༦༩༠. ས་པྤཱ་ཡཾ པ་ཊི་ཝེ་དྷཱ་ཡ, པ་ཊི་པ་ཏྟུ་པ་ཀཱ་རི་ཏཱ;
སཱ་ཀཱ་རཱ རཱུ་པ་ས་མྤ་ཏྟི, པ་ཉྙ་ཏྟཱ་ཝ མ་ཧེ་སི་ནཱ.
༦༩༡. རཱུ་པ་སྶོཔ་ཙ་ཡོ ནཱ་མ, རཱུ་པ་སྶཱ་ཙ་ཡ་ལ་ཀྑ་ཎོ;
པ་ཝ་ཏྟི་ལ་ཀྑ་ཎཱ རཱུ་པ་ས་ནྟ་ཏཱིཏི པ་ཀཱ་སི་ཏཱ.
༦༩༢. རཱུ་པ་མཱ་ཙ་ཡ་རཱུ་པེ་ན, ཛཱ་ཡ་ཏི་ཙྩུ་པ་རཱུ་པ་རི;
པེ་ཀྑ་ཏོ་པ་ཙ་ཡཱ་ཀཱ་རཱ, ཛཱ་ཏི ག་ཡ྄ཧ་ཏི ཡོ་གི་ནོ.
༦༩༣. ཨ་ནུ་པྤ་བ་ནྡྷཱ་ཀཱ་རེ་ན, ཛཱ་ཡ་ཏཱི་ཏི ས་པེ་ཀྑ་ཏོ;
ཏ་དཱ་ཡཾ ས་ནྟ་ཏཱ་ཀཱ་རཱ, ཛཱ་ཏི ག་ཡ྄ཧ་ཏི ཏ་སྶ ཏུ.
༦༩༤. ཨེ་ཝ་མཱ་བྷོ་ག་བྷེ་དེ་ན, ཛཱ་ཏི་རཱུ་པཾ དྭི་དྷཱ ཀ་ཏཾ;
ཨ་ཏྟཱུ་པ་ལ་དྡྷི་བྷཱ་ཝེ་ན, ཛཱ་ཡ་ནྟཾ ཝཱ་ཐ ཀེ་ཝ་ལཾ.
༦༩༥. རཱུ་པཾ ཝི་ཝི་ཏྟོ་ཀཱ་ས་སྶ, པཱུ་ར་ཀ་ཊྛེ་ན ཙཱི་ཡ་ཏི;
ཨ་བྷཱ་ཝཱ པུ་ན་བྷཱ་ཝཱ་ཡ, པ་ཝ་ཏྟཾ ས་ནྟ་ཏཱི་ཏི ཙ.
༦༩༦. ཨེ་ཝ་མཱ་ཀཱ་ར་བྷེ་དཱ་ཝ, ས་བྦཱ་ཀཱ་ར་ཝ་རཱ་ཀ་རོ;
ཛཱ་ཏི་རཱུ་པཾ དྭི་དྷཱ་ཀཱ་སི, ཛཱ་ཏི་རཱུ་པ་ཝི་རོ་ཙ་ནོ.
༦༩༧. ཛ་ར་ཏཱ ན་ཝ་ཏཱ་ཧཱ་ཡཱ, རཱུ་པཱ་ནཾ པཱ་ཀ་ལ་ཀྑ་ཎཱ;
ཨ་ནི་ཙྩ་ཏ་ནྟི མ་པྤ་ཏྟི, པ་རི་བྷི་ཛྫ་ན་ལ་ཀྑ་ཎཱ.
༦༩༨. ཨི་ཏི ལ་ཀྑ་ཎ་རཱུ་པཾ ཏུ, ཏི་ཝི་དྷཾ བྷི་ནྣ་ཀཱ་ལི་ཀཾ;
ས་བྷཱ་ཝ་རཱུ་པ་དྷ་མྨེ་སུ, ཏཾ་ཏཾ་ཀཱ་ལོ་པ་ལ་ཀྑི་ཏཾ.
༦༩༩. ཡེ་ན ལ་ཀྑཱི་ཡ་ཏི རཱུ་པཾ, བྷི་ནྣཱ་ཀཱ་རཾ ཁ་ཎེ ཁ་ཎེ;
ཝི་པ་སྶ་ནཱ་ན་ཡ་ཏྠཱ་ཡ, ཏ་མི་ཙྩཱ་ཧ ཏ་ཐཱ་ག་ཏོ.
༧༠༠. ཀ་བ་ལཱི༹་ཀཱ་རོ ཨཱ་ཧཱ་རོ,
ཡཱ་པེ་ཏ་བྦོ་ཛ་ལ་ཀྑ་ཎོ;
ཨཱ་ཧཱ་རོ སེ་ནྡྲི་ཡ་ཛཱ་ཏོ,
རཱུ་པ་ཀཱ་ཡཱ་ནུ་པཱ་ལ་ཀོ.
༧༠༡. ཨི་ཙྩེ་ཝཾ ས་པ་རི་ཙྪེ་དཱ, ས་ཝི་ཀཱ་རཱ ས་ལ་ཀྑ་ཎཱ;
ཨ་ཀི་ཙྩ་པ་ཊི་ཝེ་དྷཱ་ཡ, ད་ཡཱ་པ་ནྣེ་ན ཏཱ་དི་ནཱ.
༧༠༢. ཏ་ཏྠ ཏ་ཏྠ ཡ་ཐཱ་ཡོ་གཾ, དེ་སི་ཏཱ་ཏི པ་ཀཱ་སི་ཏཱ;
རཱུ་པ་དྷ་མྨཱ ས་རཱུ་པེ་ན, ཨ་ཊྛ་ཝཱི་ས་ཏི ས་བྦ་ཐཱ.
༧༠༣. ཀ་ཏྭཱ་ན ཛཱ་ཏི་མེ་ཀཾ ཏུ, ཏ་ཏྠོ་པ་ཙ་ཡ་ས་ནྟ་ཏིཾ;
ས་ཏྟ་ཝཱི་ས་ཏི རཱུ་པཱ་ནི, བྷ་ཝ་ནྟཱི་ཏི ཝི་ནི་དྡི་སེ.
༧༠༤. བྷཱུ་ཏ་ཏྟ་ཡཾ ཏུ ཕོ་ཊྛ་བྦཾ, ཀ་ཏྭཱ ཚ་བྦཱི་ས་དྷཱ་པི ཙ;
ཨུ་བྷ་ཡཾ ཛཱ་ཏི་ཕོ་ཊྛ་བྦཾ, ག་ཧེ་ཏྭཱ པ་ཉྩ་ཝཱི་ས་ཏི.
༧༠༥. རཱུ་པ་དྷ་མྨཱ་ན་མི་ཙྩེ་ཝཾ, ཝི་བྷཱ་ཝེ་ཡྻ ཝི་སཱ་ར་དོ;
ས་རཱུ་པཾ ནཱ་མ་ས་ངྑེ་པཾ, ས་བྷཱ་ཝ་ཉྩ ས་ལ་ཀྑ་ཎ་ནྟི.
ཨི་ཏི རཱུ་པ་ཝི་བྷཱ་གེ ས་རཱུ་པ་ཀ་ཐཱ ནི་ཊྛི་ཏཱ.
ཨ་ཊྛཱ་ར་ས་མོ པ་རི་ཙྪེ་དོ.