༡༢. རཱ་སི་ཝི་ནི་ཙྪ་ཡ་ཀ་ཐཱ
༤༡༦. ཏ་ཏྠ ཝི་ཉྙཱ་ཎ་ཀཱ་ཡཱ ཚ, ས་ཏྟ ཝི་ཉྙཱ་ཎ་དྷཱ་ཏུ་ཡོ;
ཕ་སྶཱ ཙ་ཀྑཱ་དི་ས་མྥ་སྶཱ, ཚ་བྦི་དྷཱ ས་ཏྟ་དྷཱ་པི ཙ.
༤༡༧. ཙ་ཀྑུ་ས་མྥ་སྶ་ཛཱ་དཱི་ཧི, བྷེ་དེ་ཧི པ་ན ཝེ་ད་ནཱ;
ས་ཉྙཱ ཙ ཙེ་ཏ་ནཱ ཙེ་ཝ, བྷི་ནྣཱ ཚ་དྷཱ ཙ ས་ཏྟ་དྷཱ.
༤༡༨. ཙི་ཏྟུ་པྤཱ་དེ་སུ དྷ་མྨཱ ཙ, ཁ་ནྡྷཱ་ཡ་ཏ་ན་དྷཱ་ཏུ་ཡོ;
ཨཱ་ཧཱ་རཱ ཙ ཡ་ཐཱ་ཡོ་གཾ, ཕ་སྶ་པ་ཉྩ་ཀ་རཱ་སི་ཡཾ.
༤༡༩. ས་བྦེ ས་ངྒ་ཧི་ཏཱ ཧོ་ནྟི, ཏ་སྨཱ ནཱ་མ་པ་རི་གྒ་ཧོ;
མཱུ་ལ་རཱ་སི ཙ སོ ས་བྦ-ས་ངྒ་ཧོ་ཏི པ་ཝུ་ཙྩ་ཏི.
༤༢༠. ཛྷཱ་ན་རཱ་སི་མྷི པ་ཉྩེ་ཝ, དྷ་མྨཱ ས་ཏྟ་པྤ་བྷེ་ད་ཏོ;
ཨི་ནྡྲི་ཡཱ་ནི ཙ བཱ་ཝཱི་ས, དྷ་མྨ་ཏོ པ་ན སོ་ལ༹་ས.
༤༢༡. ན་ཝ མ་གྒ་ངྒ་དྷ་མྨཱ ཙ, བྷི་ནྣཱ དྭཱ་ད་ས་དྷཱ་པི ཏེ;
ཚ་ལེ༹་ཝ ཧེ་ཏུ་ཡོ ཏ་ཏྠ, དེ་སི་ཏཱ ཀ་ངྑི་ཏུ་དྡྷ་ཝཱ.
༤༢༢. ད་ས ཀ་མྨ་པ་ཐཱ དྷ་མྨཱ, ཚ་ལེ༹་ཝ པ་ན དེ་སི་ཏཱ;
སེ་སཱ་ཝ ད་ས་དྷ་མྨེ་ཧི, ས་མཱ་ནཱ ཙ་ཏུ་རཱ་ས་ཡོ.
༤༢༣. པ་ཉྙཱ ད་ས་ཝི་དྷཱ ཏ་ཏྠ, ཝེ་ད་ནཱ ན་ཝ་དྷཱ ཋི་ཏཱ;
ས་མཱ་དྷི ས་ཏྟ་དྷཱ ཧོ་ཏི, ཝཱི་རི་ཡཾ པ་ན པ་ཉྩ་དྷཱ.
༤༢༤. ས་ཏི བྷི་ནྣཱ ཙ་ཏུ་དྷཱ་ཝ, ཝི་ཏ་ཀྐོ ཏི་ཝི་དྷོ མ་ཏོ;
དྭི་དྷཱ ཙི་ཏྟཱ་ད་ཡོ ཧོ་ནྟི, ད་ས་པ་ཉྩེ་ཝ ས་མྦྷ་ཝཱ.
༤༢༥. སེ་སཱ དྭ་ཏྟིཾ་ས ས་བྦེ་པི, དྷ་མྨཱ ཨེ་ཀེ་ཀ་དྷཱ་པི ཙ;
ཧི་ཏྭཱ རཱུ་པི་ནྡྲི་ཡཱ་ནེ་ཏེ, ཝི་བྷཱ་གཱ ཨ་ཊྛ་དྷཱ ཀ་ཐཾ.
༤༢༦. ཕ་སྶོ ཙ ཙེ་ཏ་ནཱ ས་ཉྙཱ, ཝི་ཙཱ་རོ པཱི་ཏི ཛཱི་ཝི་ཏཾ;
ནི་ར་ཝ་ཛྫཱ ཚ ཡུ་ག་ལཱ༹, སཱ་ཝ་ཛྫ་མོ་ཧ་ཀ་ངྑི་ཏཱ.
༤༢༧. ཡེ་ཝཱ་པ་ན་ཀ་དྷ་མྨཱ ཙ, ཝི་ར་ཏུ་དྡྷ་ཙྩ་ཝ་ཛྫི་ཏཱ;
དྭཱ་ད་སཱ ཙེ་ཏི ས་བྦེ་པི, དྭ་ཏྟིཾ་ས་ཀེ་ཀ་དྷཱ ཏ་ཐཱ.
༤༢༨. ཙི་ཏྟཾ མ་ནི་ནྡྲི་ཡཾ ཙི་ཏྟཾ, ས་དྡྷཱ ས་དྡྷི་ནྡྲི་ཡཾ བ་ལཾ;
བ་ལེ་སུ ལོ་ཀི་ཡཱ ཝུ་ཏྟཱ, ལོ་ཀི་ཡེ ཙ དུ་ཀ་དྭ་ཡེ.
༤༢༩. ལོ་བྷཱ་ལོ་བྷཱ་དི་ཀཱ དྭེ དྭེ,
ཙ་ཏྟཱ་རོ ཧེ་ཏུ་རཱ་སི་ཡཾ;
མི་ཙྪཱ་དི་ཊྛི ཙ མ་གྒ་ངྒེ,
པ་ཉྩ་ཀ་མྨ་པ་ཐེ་པི ཏེ.
༤༣༠. ཡེ་ཝཱ་པ་ན་ཀ་རཱ་སི་མྷི, དེ་སི་ཏཱ ཝི་ར་ཏུ་དྡྷ་ཝཱ;
མ་གྒ་ཧེ་ཏཱུ་སུ ཙེ་ཝེ་ཏི, དྭི་དྷཱ པ་ཉྩ་ད་ས ཋི་ཏཱ.
༤༣༡. ཝི་ཏ་ཀྐོ ཛྷཱ་ན་མ་གྒེ་སུ, ཏི་ཝི་དྷཱ ན་ཝ་དྷཱ པ་ན;
ཝེ་ད་ནཱ མཱུ་ལ་རཱ་སི་མྷི, ཏ་ཐཱ ཛྷཱ་ནི་ནྡྲི་ཡེ་སུ ཙ.
༤༣༢. ཨི་ནྡྲི་ཡ་མ་གྒ་རཱ་སི་མྷི, བ་ལ་པི་ཊྛི་དུ་ཀ་ཏྟི་ཀེ;
ཙ་ཏུ་དྷཱ ས་ཏི ཏ་ཏྠེ་ཝ, ཝཱི་རི་ཡ་མྤི ཙ པ་ཉྩ་དྷཱ.
༤༣༣. ས་མཱ་དྷི ས་ཏྟ་དྷཱ ཝུ་ཏྟོ, ཛྷཱ་ན་ངྒེ་སུ ཙ ཏ་ཏྠ ཙ;
ཏ་ཏྠེ་ཝ ད་ས་དྷཱ པ་ཉྙཱ, ཧེ་ཏུ་ཀ་མྨ་པ་ཐེ་སུ ཙ.
༤༣༤. ད་ས་ན་ཝ་ས་ཏྟ་པ་ཉྩ་ཙ་ཏུ་ཏི་དྭེ་ཀ་དྷཱ ཋི་ཏཱ;
ཚ་ལེ༹་ཀ་ཀཱ པ་ཉྩ་ད་ས, དྭ་ཏྟིཾ་ས ཙ ཡ་ཐཱ་ཀྐ་མཾ.
༤༣༥. ཨ་ཊྛ ཝི་བྷཱ་ག་ས་ངྑེ་པཱ, པ་དཱ་ནི ད་ས་དྷཱ སི་ཡུཾ;
ཏེ་པ་ཉྙཱ་སེ་ཝ དྷ་མྨཱ ཙ, ཨ་ཊྛཱ་ར་ས ཙ རཱ་ས་ཡོ.
༤༣༦. ཨི་ཏི དྷ་མྨ་ཝ་ཝ་ཏྠཱ་ནེ, དྷ་མྨ་ས་ངྒ་ཎི་ཡཾ པ་ན;
ཙི་ཏྟུ་པྤཱ་ད་པ་རི་ཙྪེ་དེ, ཨུ་དྡེ་ས་ན་ཡ་ས་ངྒ་ཧོ.
༤༣༧. པ་དཱ་ནི ཙ་ཏུ་རཱ་སཱི་ཏི, དེ་སི་ཏཱ་ནི ས་རཱུ་པ་ཏོ;
ཡེ་ཝཱ་པ་ན་ཀ་ནཱ་མེ་ན, སོ་ལ༹་སེ་ཝ ཡ་ཐཱ་ར་ཧཾ.
༤༣༨. ཏ་ཏྠཱ་ནི་ཡ་ཏ་ནཱ་མཱ་ནི, པ་དཱ་ནེ་ཀཱ་ད་སེ་ཝ ཏུ;
ཝུ་ཏྟཱ་ནེ་ཀཱུ་ན་ན་ཝུ་ཏི, ནི་ཡ་ཏཱ་ནེ་ཝ ས་མྦྷ་ཝཱ.
༤༣༩. ཨ་ས་མྦྷི་ནྣ་པ་དཱ་ནེ་ཏྠ, ཏེ་པ་ཉྙཱ་སེ་ཝ ས་བྦ་ཐཱ;
ཙི་ཏྟ་ཙེ་ཏ་སི་ཀཱ་ནཾ ཏུ, ཝ་སེ་ན པ་རི་དཱི་པ་ཡེ.
༤༤༠. ཝི་བྷཱ་ག་པ་ད་དྷ་མྨཱ་ནཾ, ཝ་སེ་ནེ་ཝཾ པ་ཀཱ་སི་ཏོ;
ཙི་ཏྟ་ཙེ་ཏ་སི་ཀཱ་ནཾ ཏུ, ཀ་མ་ཏོ རཱ་སི་ནི་ཙྪ་ཡོ་ཏི.
ཨི་ཏི ཙེ་ཏ་སི་ཀ་ཝི་བྷཱ་གེ རཱ་སི་ཝི་ནི་ཙྪ་ཡ་ཀ་ཐཱ ནི་ཊྛི་ཏཱ.
དྭཱ་ད་ས་མོ པ་རི་ཙྪེ་དོ.