ཏེ་ར་ས་མོ པ་རི་ཙྪེ་དོ
༡༣. རཱ་སི་ཡོ་ག་ཀ་ཐཱ
༤༤༡. ཨི་ཏི རཱ་སི་ཝཱི་ཐིཾ ཉ་ཏྭཱ, ལ་བྦྷ་མཱ་ན་ཝ་སཱ བུ་དྷོ;
ཏེ་ས་མེ་ཝཱ་ཐ ཡོ་ག་མྤི, ཙི་ཏྟུ་པྤཱ་དེ་སུ དཱི་པ་ཡེ.
༤༤༢. ཀཱ་མཱ་ཝ་ཙ་ར་ཀུ་ས་ལ་སྶ, པ་ཋ་མ་དྭ་ཡ་མཱ་ན་སེ;
ས་བྦེ་པི རཱ་ས་ཡོ ཧོ་ནྟི, ཡ་ཐཱ་ས་མྦྷ་ཝ་ཏོ ཀ་ཐཾ.
༤༤༣. ཕ་སྶ་པ་ཉྩ་ཀ་རཱ་སཱི ཙ, ཛྷཱ་ན་པ་ཉྩ་ཀ་རཱ་སི ཙ;
ཨི་ནྡྲི་ཡ་ཊྛ་ཀ་རཱ་སཱི ཙ, མ་གྒ་པ་ཉྩ་ཀ་རཱ་སི ཙ.
༤༤༤. བ་ལ་ས་ཏྟ་ཀ་རཱ་སཱི ཙ, ཧེ་ཏུ་ཀ་མྨ་པ་ཐ་ཏྟི་ཀཱ;
ད་སཱ་ཝ་སེ་སཱ རཱ་སཱི ཙ, ལོ་ཀ་པཱ་ལ་དུ་ཀཱ་ད་ཡོ.
༤༤༥. ཡེ་ཝཱ་པ་ན་ཀ་ན་ཝ་ཀཾ, ནི་ཡ་ཏུ་དྡྷ་ཙྩ་ཝ་ཛྫི་ཏཱ;
ཨ་པྤ་མ་ཉྙཱ་དྭ་ཡ་ཉྩེ་ཝ, ཏི་སྶོ ཝི་ར་ཏི་ཡོ་ཏི ཙ.
༤༤༦. ཨི་ཏི ས་ཏྟ་ར་སེ་ཝེ་ཏེ, དེ་སི་ཏཱ ཙ ས་རཱུ་པ་ཏོ;
ཡེ་ཝཱ་པ་ན་ཀ་རཱ་སཱི ཙ, ལ་བྦྷ་ནྟི་ཊྛཱ་ར་སཱ་པི ཙ.
༤༤༧. ཚ་པྤ་ཉྙཱ་ས པ་དཱ་ནེ་ཏྠ, དེ་སི་ཏཱ་ནི ས་རཱུ་པ་ཏོ;
དྷ་མྨཱ པ་ན ས་མ་ཏིཾ་ས, ཏ་ཏྠ ཧོ་ནྟི ས་རཱུ་པ་ཏོ.
༤༤༨. ཏཱ་ནི ཡེ་ཝཱ་པ་ན་ཀེ་ཧི, པ་ཉྩ་ས་ཊྛི པ་དཱ་ནི ཙ;
དྷ་མྨཱ ཙེ་ཀཱུ་ན་ཏཱ་ལཱི་ས, བྷ་ཝ་ནྟི པ་ན ས་མྦྷ་ཝཱ.
༤༤༩. ཏ་ཏྠ དྭཱ་ད་ས དྷ་མྨཱ ཙ, དེ་སི་ཏཱ ས་ཝི་བྷ་ཏྟི་ཀཱ;
ཨ་ཝ་སེ་སཱ ཏུ ས་བྦེ་པི, ཨ་ཝི་བྷ་ཏྟི་ཀ་ནཱ་མ་ཀཱ.
༤༥༠. ཨེ་ཀ་དྭི ཙ ཏི་ཙ་ཏུ་ཀྐ-ཚ་ས་ཏྟ་ཊྛཱ་ནི་ཀཱ པ་ན;
ས་ཏྟ་ཝཱི་ས ཙ ས་ཏྟེ་ཀོ, དྭེ་ཀེ་ཀོ ཙ ཡ་ཐཱ་ཀྐ་མཾ.
༤༥༡. ནི་ཡ་ཏཱ ཏུ ཙ་ཏུ་ཏྟིཾ་ས, དྷ་མྨཱ་ཝ ས་ཧ་ཝུ་ཏྟི་ཏོ;
ཡ་ཐཱ་ས་མྦྷ་ཝ་ཝུ་ཏྟི་ཏོ, པ་ཉྩ་དྷཱ ནི་ཡ་ཏཱ ཀ་ཐཱ.
༤༥༢. ཏ་ཏྠ ཙཱ་ནི་ཡ་ཏེ ས་བྦེ, ག་ཧེ་ཏྭཱ ཙ པ་ཧཱ་ཡ ཙ;
པ་ཙྩེ་ཀ་ཉྩ ག་ཧེ་ཏྭཱ་པི, ས་ཏྟ་དྷཱ ཡོ་ཛ་ན་ཀྐ་མོ.
༤༥༣. ས་ཀི་མེ་ཀཱུ་ན་ཏཱ་ལཱི་ས, ཙ་ཏུ་ཏྟིཾ་ས ཡ་ཐཱ་ཀྐ་མཾ;
པ་ཉྩ་ཀྑ་ཏྟུ་ཉྩ ཡོ་ཛེ་ཡྻ, པ་ཉྩ་ཏིཾ་སཱ་ཏི པ་ཎྜི་ཏོ.
༤༥༤. རཱ་ས་ཡོ ཙ པ་དཱ་ནཱི་དྷ, དྷ་མྨ་ནྟ་ར་ཝི་བྷ་ཏྟི་ཡོ;
ས་རཱུ་པ་ཡེ་ཝཱ་པ་ན་ཀེ, ནི་ཡ་ཏཱ་ནི་ཡ་ཏེ ཡ་ཐཱ.
༤༥༥. ཡོ་ཛ་ནཱ་ན་ཡ་བྷེ་ད་ཉྩ, ག་ཎ་ནཱ་ས་ངྒ་ཧ་ཊྛི་ཏི;
ལ་བྦྷ་མཱ་ནཱ་ནུ་མཱ་ནེ་ན, ས་ལླ་ཀྑེ་ནྟོ ཏ་ཧིཾ ཏ་ཧིཾ.
༤༥༦. ཉཱ་ཎཾ ཉཱ་ཎ་ཝི་ཡུ་ཏྟ་མྷི, ཧི་ཏྭཱ པཱི་ཏིཾ ཨུ་པེ་ཀྑི་ཏེ;
ཝེ་ད་ནཱ པ་རི་ཝ་ཏྟེ་ནྟོ, ཀཱ་མ་པུ་ཉྙེ ཙ སེ་ས་ཀེ.
༤༥༧. མ་ཧཱ་ཀྲི་ཡེ ཙ ཡོ་ཛེ་ཡྻ, པ་ཧཱ་ཡ ཝི་ར་ཏི་ཏྟ་ཡཾ;
ཨ་པྤ་མ་ཉྙཱ ཙ ཧི་ཏྭཱ་ཐ, མ་ཧཱ་པཱ་ཀེ ཙ ཡོ་ཛ་ཡེ.
༤༥༨. ཏ་ཀྐཱ་དིཾ ཀ་མ་ཏོ ཧི་ཏྭཱ, ས་བྦ་ཏྠ ཝི་ར་ཏི་ཏྟ་ཡཾ;
པ་ཉྩ་མེ ཨ་པྤ་མ་ཉྙཱ་ཡ, ཧི་ཏྭཱ རཱུ་པེ ཙ ཡོ་ཛ་ཡེ.
༤༥༩. ཧི་ཏྭཱ་པྤ་མ་ཉྙཱ ཡོ་ཛ་ཡེ, ཡ་ཐཱ་ཛྷཱ་ན་མ་ནུ་ཏྟ་རེ;
ལོ་ཀུ་ཏྟ་རི་ནྡྲི་ཡ་ཉྩེ་ཝ, ག་ཧེ་ཏྭཱ ཝི་ར་ཏི་ཏྟ་ཡཾ.
༤༦༠. ཛྷཱ་ནཱ་ནི ཙ་ཏུ་ཏཱ་ལཱི་ས, སུ་ཁ་ཡུ་ཏྟཱ་ནི ཝ་ཏྟ་རེ;
ཨུ་པེ་ཀྑི་ཏཱ་ནི ཏེ་ཝཱི་ས, པ་ཉྩ་མ་ཛ྄ཛྷཱ་ནེ ཙ ས་བྦ་ཐཱ.
༤༦༡. ཨ་པྤ་མ་ཉྙཱ་ཝི་ར་ཏི་ཡོ, ཀཱ་མ་པུ་ཉྙེ་སུ ལ་བྦྷ་རེ;
ཨ་པྤ་མ་ཉྙཱ རཱུ་པ་ཛ྄ཛྷཱ་ན-ཙ་ཏུ་ཀྐེ ཙ མ་ཧཱ་ཀྲི་ཡེ.
༤༦༢. ལོ་ཀུ་ཏྟ་རེ་སུ ས་བྦ་ཏྠ, ས་མྦྷོ་ཏི ཝི་ར་ཏི་ཏྟ་ཡཾ;
ན་ཏྠི་དྭ་ཡ་མྤི ཨཱ་རུ་པྤེ, མ་ཧཱ་པཱ་ཀེ ཙ པ་ཉྩ་མེ.
༤༦༣. ཝི་ཏ་ཀྐཱ་དི་ཏྟ་ཡཾ པ་ཉྙཱ, པ་ཉྩ ཙཱ་ནི་ཡ་ཏཱ ཙ་ལཱ;
ཧཱ་ནི་བུ་དྡྷི་ཝ་སཱ སེ་སཱ, ན ཙ་ལ་ནྟི ཀུ་དཱ་ཙ་ནཾ.
༤༦༤. བཱ་ཝཱི་ས་ཏི་ཝི་དྷོ ཙེ་ཏྠ, ས་ངྒ་ཧོ ཨ་ན་ཝ་ཛྫ་ཀེ;
དྭ་ཡ་དྭ་ཡ་ཝ་སཱ ཙེ་ཝ, ཛྷཱ་ན་པ་ཉྩ་ཀ་ཏོ་པི ཙ.
༤༦༥. ཨི་ཏི ཉ་ཏྭཱ་ན་ཝ་ཛྫེ་སུ, རཱ་སི་ས་ངྒ་ཧ ས་མྦྷ་ཝཾ;
སཱ་ཝ་ཛྫེ་སུ་པི ཝི་ཉྙེ་ཡྻཱ, ཝི་ཉྙུ་ནཱ རཱ་ས་ཡོ ཀ་ཐཾ.
༤༦༦. ལོ་བྷ་མཱུ་ལེ་སུ པ་ཋ་མེ, ཕ་སྶ་པ་ཉྩ་ཀ་རཱ་སི ཙ;
ཛྷཱ་ན་པ་ཉྩ་ཀ་རཱ་སཱི ཙ, ཏ་ཐེ་ཝི་ནྡྲི་ཡ་པ་ཉྩ་ཀཾ.
༤༦༧. མ་གྒ་བ་ལ་ཙ་ཏུ་ཀྐ་ཉྩ, ཧེ་ཏུ་ཀ་མྨ་པ་ཐ་དུ་ཀཱ;
ལོ་ཀ་ནཱ་ས་ཀ་རཱ་སཱི ཙ, ས་མ་ཐོ ས་མ་ཐ་དྡུ་ཀཱ.
༤༦༨. ཏ་ཏྲ་མ་ཛ྄ཛྷ་ཏྟ་ཏཾ ཧི་ཏྭཱ, ཡེ་ཝཱ་པ་ན་ཀ་ནཱ་མ་ཀཱ;
ཙ་ཏྟཱ་རོ ཙེ་ཏི ལ་བྦྷ་ནྟི, ཏ་ཏྠེ་ཀཱ་ད་ས རཱ་ས་ཡོ.
༤༦༩. དྭ་ཏྟིཾ་སེ་ཝ པ་དཱ་ནེ་ཏྠ, དེ་སི་ཏཱ་ནི ས་རཱུ་པ་ཏོ;
ཏཱ་ནི ཡེ་ཝཱ་པ་ན་ཀེ་ཧི, ཚ་ཏྟིཾ་སེ་ཝ བྷ་ཝ་ནྟི ཙ.
༤༧༠. ཨ་ས་མྦྷི་ནྣ་པ་དཱ་ནེ་ཏྠ, ས་མ་ཝཱི་ས་ཏི ས་མྦྷ་ཝཱ;
ས་ཝི་བྷ་ཏྟི་ཀ་ནཱ་མཱ ཙ, ན་ཝ དྷ་མྨཱ པ་ཀཱ་སི་ཏཱ.
༤༧༡. ཨེ་ཀ་དྭ་ཡ་ཏི་ཙ་ཏུ་ཀྐ-ཚ་ཊྛཱ་ན་ནི་ཡ་ཏཱ པ་ན;
ཨེ་ཀཱ་ད་ས ཚ་ལེ༹་ཀཱ ཙ, ཀ་མེ་ནེ་ཀོ པུ་ནེ་ཀ་ཀོ.
༤༧༢. ན་ཏྠེ་ཝཱ་ནི་ཡ་ཏཱ ཧེ་ཏྠ, ཡེ་ཝཱ་པ་ན་ཀ་ནཱ་མ་ཀཱ;
ཡོ་ཛ་ནཱ་ན་ཡ་བྷེ་དོ ཙ, ཏ་སྨཱ ཏ་ཏྠ ན ཝི་ཛྫ་ཏི.
༤༧༣. མཱ་ནོ ཙ ཐི་ན་མི་དྡྷ་ཉྩ, ཨི་སྶཱ མ་ཙྪ་རི་ཡཾ ཏ་ཐཱ;
ཀུ་ཀྐུ་ཙྩ་མི་ཏི སཱ་ཝ་ཛྫེ, ཚ་ལེ༹་ཝཱ་ནི་ཡ་ཏཱ མ་ཏཱ.
༤༧༤. མཱ་ནོ དི་ཊྛི་ཝི་ཡུ་ཏྟེ་སུ, ས་ས་ངྑཱ་རེ་སུ པ་ཉྩ་སུ;
ཐི་ན་མི་དྡྷཾ ཏ་ཡོ སེ་སཱ, པ་ཊི་གྷ་དྭ་ཡ་ཡོ་གི་ནོ.
༤༧༥. ཨི་ཙྩེ་ཝ་མ་ཊྛ སཱ་ཝ་ཛྫཱ, ཨ་ན་ཝ་ཛྫ་ཊྛ་ཝཱི་ས་ཏི;
ཚ་ཏྟིཾ་ས མཱ་ན་སཱ ས་བྦེ, ཧོ་ནྟཱ་ནི་ཡ་ཏ་ཡོ་གི་ནོ.
༤༧༦. ཏེ་ཧི ཡུ་ཏྟཱ ཡ་ཐཱ་ཡོ་གཾ, ཨེ་ཀ་དྭི་ཏྟ་ཡ་པ་ཉྩ་ཧི;
དྭེ དྭཱ་ཝཱི་སཾ ཏ་ཡོ ཙེ་ཝ, ན་ཝ ཙཱ་ཐ ཡ་ཐཱ་ཀྐ་མཾ.
༤༧༧. ཨི་ཏི ཝུ་ཏྟཱ་ནུ་སཱ་རེ་ན, ལ་བྦྷ་མཱ་ན་ཝ་སཱ པ་ན;
ཏ་ད་ཉྙེ་སུ་པི ཡོ་ཛེ་ཡྻ, སཱ་ཝ་ཛྫེ་སུ ཡ་ཐཱ་ཀྐ་མཾ.
༤༧༨. ལོ་བྷ་མཱུ་ལེ་སུ ལོ་བྷ་ཉྩ, དོ་ས་ཉྩ པ་ཊི་གྷ་དྭ་ཡེ;
མོ་ཧ་མཱུ་ལེ ཀ་ངྑུ་དྡྷ་ཙྩཾ, ག་ཧེ་ཏྭཱ ཧེ་ཏུ་རཱ་སི་ཡཾ.
༤༧༩. དི་ཊྛིཾ དི་ཊྛི་ཝི་ཡུ་ཏྟ་མྷི, ཧི་ཏྭཱ པཱི་ཏི་མུ་པེ་ཀྑི་ཏེ;
ཝེ་ད་ནཾ པ་རི་ཝ་ཏྟེ་ནྟོ, དོ་ས་མཱུ་ལེ ཙ པ་ཎྜི་ཏོ.
༤༨༠. ཏ་ཐཱ ཀ་མྨ་པ་ཐཾ དི་ཊྛིཾ,
པཱི་ཏིཾ ཚ་ནྡ་ཉྩ མོ་མུ་ཧེ;
ཀ་ངྑི་ཏེ ཨ་དྷི་མོ་ཀྑ་ཉྩ,
ཧི་ཏྭཱ ཡོ་ཛེ་ཡྻ རཱ་ས་ཡོ.
༤༨༡. ཙི་ཏྟ་སྶ ཋི་ཏིཾ པ་ཏྟཱ་སུ, ཙི་ཏྟ་སྶེ་ཀ་གྒ་ཏཱ པ་ན;
ཀ་ངྑི་ཏེ པ་རི་ཧཱི་ནཱ་ཝ, ཨི་ནྡྲི་ཡཱ་དཱི་སུ པ་ཉྩ་སུ.
༤༨༢. ཨི་ཏི དྭཱ་ད་ས་དྷཱ ཉ་ཏྭཱ, སཱ་ཝ་ཛྫེ་སུ་པི ས་ངྒ་ཧཾ;
ཨ་ཧེ་ཏུ་ཀེ་པི ཝི་ཉྙེ་ཡྻཱ, ཡ་ཐཱ་ས་མྦྷ་ཝ་ཏོ ཀ་ཐཾ.
༤༨༣. ཨ་ཊྛཱ་ར་སཱ་ཧེ་ཏུ་ཀེ་སུ, པ་ཉྩ་ཝི་ཉྙཱ་ཎ་མཱ་ན་སེ;
ཕ་སྶ་པ་ཉྩ་ཀ་རཱ་སཱི ཙ, ཛྷཱ་ན་ཊྛཱ་ན་དུ་ཀཾ ཏ་ཐཱ.
༤༨༤. ཨི་ནྡྲི་ཡ་ཏྟི་ཀ་རཱ་སཱི ཙ, ཡེ་ཝཱ་པ་ན་ཀ་ནཱ་མ་ཀོ;
ཨེ་ཀོ མ་ན་སི་ཀཱ་རོ་ཏི, ཙ་ཏྟཱ་རོ རཱ་ས་ཡོ སི་ཡུཾ.
༤༨༥. ཨ་ས་མྦྷི་ནྣཱ པ་ན་ཊྛེ་ཝ, དྭེ ཏ་ཏྠ ས་ཝི་བྷ་ཏྟི་ཀཱ;
ཨེ་ཀ་དྭ་ཡ་ཏི་ཀ་ཊྛཱ་ནཱ, ཚ་ལེ༹་ཀོ ཙ པུ་ནེ་ཀ་ཀོ.
༤༨༦. མ་ནོ་དྷཱ་ཏུ་ཏྟི་ཀཱ་ཧེ་ཏུ-པ་ཊི་ས་ནྡྷི་ཡུ་གེ པ་ན;
ཝི་ཏ་ཀྐོ ཙ ཝི་ཙཱ་རོ ཙ, ཨ་དྷི་ཀཱ ཛྷཱ་ན་རཱ་སི་ཡཾ.
༤༨༧. སུ་ཁ་ས་ནྟཱི་ར་ཎེ པཱི་ཏི, དུ་ཏི་ཡཱ་ཝ་ཛྫ་ནེ པ་ན;
ཝཱི་རི་ཡ་ཉྩ ས་མཱ་དྷི་ཉྩ, ལ་བྦྷ་ཏི་ནྡྲི་ཡ་རཱ་སི་ཡཾ.
༤༨༨. ཨ་དྷི་ཀཱ ཧ་སི་ཏེ ཧོ་ནྟི, པཱི་ཏི ཙ ཝཱི་རི་ཡཱ་ད་ཡོ;
ཡེ་ཝཱ་པ་ནཱ་དྷི་མོ་ཀྑོ ཙ, པ་ཉྩ་ཝི་ཉྙཱ་ཎ་ཝ་ཛྫི་ཏེ.
༤༨༩. ཨི་ཙྩཱ་ན་ཝ་ཛྫེ བཱ་ཝཱི་ས,
སཱ་ཝ་ཛྫེ དྭཱ་ད་སཱ་པ་རེ;
ཡོ་གཱ ཧེ་ཏུ་མྷི པ་ཉྩེ་ཏེ,
ཏཱ་ལཱི་སེ་ཀཱུ་ན་ཀཱ ཀ་ཐཱ་ཏི.
ཨི་ཏི ཙེ་ཏ་སི་ཀ་ཝི་བྷཱ་གེ རཱ་སི་ཡོ་ག་ཀ་ཐཱ ནི་ཊྛི་ཏཱ.
ཏེ་ར་ས་མོ པ་རི་ཙྪེ་དོ.