༢. ཙེ་ཏ་སི་ཀ་ཝི་བྷཱ་གོ
༨. ཙེ་ཏ་སི་ཀ་ས་མྤ་ཡོ་ག་ཀ་ཐཱ
༢༨༦. ཨི་ཏི ཙི་ཏྟ་ཝི་དྷིཾ ཉ་ཏྭཱ, དྭེ་པ་ཉྙཱ་ས ཝི་བྷཱ་ཝི་ནཱ;
ཉེ་ཡྻཱ ཙེ་ཏ་སི ས་མྦྷཱུ་ཏཱ, དྷ་མྨཱ ཙེ་ཏ་སི་ཀཱ ཀ་ཐཾ.
༢༨༧. ཕ་སྶོ ཙ ཝེ་ད་ནཱ ས་ཉྙཱ, ཙེ་ཏ་ནེ་ཀ་གྒ་ཏཱ ཏ་ཐཱ;
ཛཱི་ཝི་ཏཾ མ་ན་སི་ཀཱ་རོ, ས་ཏྟ སཱ་དྷཱ་ར་ཎཱ ཨི་མེ.
༢༨༨. ཝི་ཏ་ཀྐོ ཙ ཝི་ཙཱ་རོ ཙ, པཱི་ཏི ཙ ཝཱི་རི་ཡཾ ཏ་ཐཱ;
ཚ་ནྡོ ཙ ཨ་དྷི་མོ་ཀྑོ ཙ, ཚ པ་ཀི་ཎྞ་ཀ་ནཱ་མ་ཀཱ.
༢༨༩. པུ་ཉྙཱ་པུ་ཉྙེ་སུ པཱ་ཀེ་སུ, ཀྲི་ཡཱ་སུ ཙ ཡ་ཐཱ་ར་ཧཾ;
མཱ་ན་སེ་སུ པ་ཝ་ཏྟ་ནྟི, ཝི་པྤ་ཀི་ཎྞཱ པ་ཀི་ཎྞ་ཀཱ.
༢༩༠. ས་དྡྷཱ ས་ཏི་ནྡྲི་ཡ་ཉྩེ་ཝ, ཧི་རོ་ཏྟ་པྤ་བ་ལ་དྭ་ཡཾ;
ཨ་ལོ་བྷོ ཙ ཨ་དོ་སོ ཙ, པ་ཉྙཱ མ་ཛ྄ཛྷ་ཏྟ་ཏཱ་པི ཙ.
༢༩༡. ཨ་ཊྛེ་ཏེ ཨུ་ཏྟ་མཱ ནཱ་མ, དྷ་མྨཱ ཨུ་ཏྟ་མ་སཱ་དྷ་ནཱ;
ནི་ཝ་ཛྫཱ་ཏི པ་ཝུ་ཙྩ་ནྟི, ཡུ་ག་ལཱ༹ ཚ ཏ་ཏོ་པ་རེ.
༢༩༢. པ་སྶ་དྡྷི ཀཱ་ཡ་ཙི་ཏྟཱ་ནཾ, ལ་ཧུ་ཏཱ མུ་དུ་ཏཱ ཏ་ཐཱ;
ཀ་མྨ་ཉྙ་ཏཱ ཙ པཱ་གུ་ཉྙ-ཏཱ ཙ ཨུ་ཛུ་ཀ་ཏཱ་ཏི ཙ.
༢༩༣. ཨ་པྤ་མ་ཉྙཱ་དྭ་ཡཾ ནཱ་མ, ཀ་རུ་ཎཱ་མུ་དི་ཏཱ སི་ཡུཾ;
ས་མྨཱ་ཝཱ་ཙཱ ཙ ཀ་མྨ་ནྟཱ-ཛཱི་ཝཱ ཙ ཝི་ར་ཏི་ཏྟ་ཡཾ.
༢༩༤. པ་ཉྩ་ཝཱི་ས པ་ནི་ཙྩེ་ཏེ, ཨ་ན་ཝ་ཛྫཱ ཡ་ཐཱ་ར་ཧཾ;
པཱ་པཱ་ཧེ་ཏུ་ཀ་མུ་ཏྟེ་སུ, ཨ་ན་ཝ་ཛྫེ་སུ ཛཱ་ཡ་རེ.
༢༩༥. ལོ་བྷོ དོ་སོ ཙ མོ་ཧོ ཙ,
མཱ་ནོ དི་ཊྛི ཙ སཾ་ས་ཡོ;
ཐི་ན་མི་དྡྷ་ཉྩ ཨུ་དྡྷ་ཙྩཾ,
ཀུ་ཀྐུ་ཙྩ་ཉྩ ཏ་ཐཱ ད་ས.
༢༩༦. ཨ་ཧི་རཱི་ཀ་མ་ནོ་ཏྟ་པྤཾ, ཨི་སྶཱ མ་ཙྪ་རི་ཡ་ནྟི ཙ;
ཧོ་ནྟི ཙུ་དྡ་ས སཱ་ཝ་ཛྫཱ, སཱ་ཝ་ཛྫེ་སྭེ་ཝ ས་མྦྷ་ཝཱ.
༢༩༧. དྭེ་པ་ཉྙཱ་ས ཙ་ཏུ་དྡྷེ་ཝཾ, དྷ་མྨཱ ཙེ་ཏ་སི་ཀཱ ཋི་ཏཱ;
ཏེ་སཾ དཱ་ནི པ་ཝ་ཀྑཱ་མི, ས་མྤ་ཡོ་ག་ཉྩ ས་ངྒ་ཧཾ.
༢༩༨. ས་ཏྟ སཱ་དྷཱ་ར་ཎཱ ས་བྦ-ཙི་ཏྟ་སཱ་དྷཱ་ར་ཎཱ ཏ་ཏོ;
ཙི་ཏྟེ་ན ས་དྡྷི ཨ་ཊྛ་ནྣཾ, ཝི་པྤ་ཡོ་གོ ན ཀ་ཏྠ་ཙི.
༢༩༩. ཝི་ཏ་ཀྐོ པ་ཉྩ་ཝི་ཉྙཱ་ཎཾ, དུ་ཏི་ཡཱ་དི་ཝི་ཝ་ཛྫི་ཏེ;
ཝི་ཙཱ་རོ་པི ཙ ཏ་ཏྠེ་ཝ, ཏ་ཏི་ཡཱ་དི་ཝི་ཝ་ཛྫི་ཏེ.
༣༠༠. སོ་མ་ན་སྶ་ཡུ་ཏེ པཱི་ཏི-ཙ་ཏུ་ཏྠ་ཛ྄ཛྷཱ་ན་ཝ་ཛྫི་ཏེ;
ཝཱི་རི་ཡཾ པ་ཋ་མཱ་ཝ་ཛྫ-ཝི་པཱ་ཀཱ་ཧེ་ཏུ་ཝ་ཛྫི་ཏེ.
༣༠༡. ཚ་ནྡོ ས་མྦྷོ་ཏི ས་བྦ་ཏྠ, མོ་མཱུ་ཧཱ་ཧེ་ཏུ་ཝ་ཛྫི་ཏེ;
ཨ་དྷི་མོ་ཀྑོ ཝི་ཙི་ཀི་ཙྪཱ-པ་ཉྩ་ཝི་ཉྙཱ་ཎ་ཝ་ཛྫི་ཏེ.
༣༠༢. ཚ་ས་ཊྛི པ་ཉྩ་པ་ཉྙཱ་ས, ས་ཏྟ་ཏི ཙེ་ཝ སོ་ལ༹་ས;
ཝཱི་ས་ཏེ་ཀཱ་ད་སེ་ཝཱ་ཐ, པ་ཀི་ཎྞ་ཀ་ཝི་ཝ་ཛྫི་ཏཱ.
༣༠༣. མཱ་ན་སཱ པ་ཉྩ་པ་ཉྙཱ་ས, ས་ཝི་ཏ་ཀྐཱ ཚ་ས་ཊྛི ཙ;
ས་ཝི་ཙཱ་རེ་ཀ་པ་ཉྙཱ་ས, ས་པྤཱི་ཏི་ཀ་མ་ནཱ ཏ་ཐཱ.
༣༠༤. ཏེ་ས་ཏྟ་ཏི ས་ཝཱི་རི་ཡཱ, ས་ཚ་ནྡེ་ཀཱུ་ན་ས་ཏྟ་ཏི;
སཱ་དྷི་མོ་ཀྑཱ པ་ཝུ་ཙྩ་ནྟི, ཨ་ཊྛ་ས་ཏྟ་ཏི མཱ་ན་སཱ.
༣༠༥. པ་ཉྙཱ་པྤ་མ་ཉྙཱ་ཝི་ར་ཏཱི, ཧི་ཏྭཱ ཨེ་ཀཱུ་ན་ས་ཊྛི་སུ;
པཱ་པཱ་ཧེ་ཏུ་ཀ་མུ་ཏྟེ་སུ, ས་དྡྷཱ་དེ་ཀཱུ་ན་ཝཱི་ས་ཏི.
༣༠༦. དྭི་ཧེ་ཏུ་ཀཱ་ཧེ་ཏུ་པཱ་པ་ཝ་ཛྫི་ཏེ་སུ ས་མཱ་ས་ཏོ;
པ་ཉྙཱ ཏུ ཛཱ་ཡ་ཏེ ས་ཏྟ་ཙ་ཏྟཱ་ལཱི་སེ་སུ ས་བྦ་ཐཱ.
༣༠༧. མ་ཧཱ་ཀྲི་ཡཱ་ཀཱ་མ་པུ་ཉྙ-རཱུ་པ་ཛ྄ཛྷཱ་ནེ་སུ ཛཱ་ཡ་རེ;
ཨ་པྤ་མ་ཉྙཱ་ཊྛ་ཝཱི་སེ་སུ, ཧི་ཏྭཱ ཛྷཱ་ནཾ ཏུ པ་ཉྩ་མཾ.
༣༠༨. ལོ་ཀུ་ཏྟ་རེ་སུ ས་བྦ་ཏྠ, ས་ཧེ་ཝ ཝི་ར་ཏི་ཏྟ་ཡཾ;
ཀཱ་མ་པུ་ཉྙེ་སུ ས་མྦྷོ་ཏི, ཡ་ཐཱ་ས་མྦྷ་ཝ་ཏོ ཝི་སུཾ.
༣༠༩. ཝི་ར་ཏཱི་ཨ་པྤ་མ་ཉྙཱ་སུ, པ་ཉྩ་སྭ་པི ཡ་ཐཱ་ར་ཧཾ;
ཀ་དཱ་ཙི་དེ་ཝ ས་མྦྷོ་ཏི, ཨེ་ཀེ་ཀོ་ཝ ན ཙེ་ཀ་ཏོ.
༣༡༠. ཨ་ཧི་རཱི་ཀ་མ་ནོ་ཏྟ་པྤཾ, མོ་ཧ་ཨུ་དྡྷ་ཙྩ་མེ་ཝ ཙ;
པཱ་པ་སཱ་དྷཱ་ར་ཎཱ ནཱ་མ, ཙ་ཏྟཱ་རོ པཱ་པ་ས་མྦྷ་ཝཱ.
༣༡༡. ལོ་བྷོ ཙ ལོ་བྷ་མཱུ་ལེ་སུ, དི་ཊྛི་ཡུ་ཏྟེ་སུ དི་ཊྛི ཙ;
མཱ་ནོ དི་ཊྛི་ཝི་ཡུ་ཏྟེ་སུ, དི་ཊྛི་མཱ་ནཱ ན ཙེ་ཀ་ཏོ.
༣༡༢. དོ་ས་མཱུ་ལེ་སུ དོ་སོ ཙ, ཨི་སྶཱ མ་ཙྪ་རི་ཡཾ ཏ་ཐཱ;
ཀུ་ཀྐུ་ཙྩ་མི་ཏི ཙ་ཏྟཱ་རོ, ཝི་ཙི་ཀི་ཙྪཱ ཏུ ཀ་ངྑི་ཏེ.
༣༡༣. ས་ཧེ་ཝ ཐི་ན་མི་དྡྷཾ ཏུ, ས་ས་ངྑཱ་རེ་སུ པ་ཉྩ་སུ;
ཨི་ཏི ཙུ་དྡ་ས སཱ་ཝ་ཛྫཱ, སཱ་ཝ་ཛྫེ་སྭེ་ཝ ནི་ཙྪི་ཏཱ.
༣༡༤. མཱ་ནོ ཙ ཐི་ན་མི་དྡྷ་ཉྩ, ས་ཧ ཝཱ་ཐ ཝི་སུཾ ན ཝཱ;
ཨི་སྶཱ་མ་ཙྪེ་ར་ཀུ་ཀྐུ་ཙྩཱ, ཨ་ཉྙ་མ་ཉྙཾ ཝི་སུཾ ན ཝཱ་ཏི.
ཨི་ཏི ཙེ་ཏ་སི་ཀ་ཝི་བྷཱ་གེ ཙེ་ཏ་སི་ཀ་ས་མྤ་ཡོ་ག་ཀ་ཐཱ ནི་ཊྛི་ཏཱ.
ཨ་ཊྛ་མོ པ་རི་ཙྪེ་དོ.