༤. མོ་གྒ་ལླཱ་ན་སུ་ཏྟཾ
༨༢༦. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ་པཱ་སཱ་དེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑཱུ ཧེ་ཊྛཱ་མི་གཱ་ར་མཱ་ཏུ་པཱ་སཱ་དེ ཝི་ཧ་ར་ནྟི ཨུ་དྡྷ་ཏཱ ཨུ་ནྣ་ལཱ༹ ཙ་པ་ལཱ མུ་ཁ་རཱ ཝི་ཀི་ཎྞ་ཝཱ་ཙཱ མུ་ཊྛ་སྶ་ཏི་ནོ ཨ་ས་མྤ་ཛཱ་ནཱ ཨ་ས་མཱ་ཧི་ཏཱ བྷ་ནྟ་ཙི་ཏྟཱ [ཝི་བྦྷ་ནྟ་ཙི་ཏྟཱ (སཱི. སྱཱ. ཀཾ.)] པཱ་ཀ་ཏི་ནྡྲི་ཡཱ.
ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ མ་ཧཱ་མོ་གྒ་ལླཱ་ནཾ ཨཱ་མ་ནྟེ་སི – ‘‘ཨེ་ཏེ ཁོ, མོ་གྒ་ལླཱ་ན, ས་བྲ་ཧྨ་ཙཱ་རི་ནོ ཧེ་ཊྛཱ་མི་གཱ་ར་མཱ་ཏུ་པཱ་སཱ་དེ ཝི་ཧ་ར་ནྟི ཨུ་དྡྷ་ཏཱ ཨུ་ནྣ་ལཱ༹ ཙ་པ་ལཱ མུ་ཁ་རཱ ཝི་ཀི་ཎྞ་ཝཱ་ཙཱ མུ་ཊྛ་སྶ་ཏི་ནོ ཨ་ས་མྤ་ཛཱ་ནཱ ཨ་ས་མཱ་ཧི་ཏཱ བྷ་ནྟ་ཙི་ཏྟཱ པཱ་ཀ་ཏི་ནྡྲི་ཡཱ. ག་ཙྪ, མོ་གྒ་ལླཱ་ན, ཏེ བྷི་ཀྑཱུ སཾ་ཝེ་ཛེ་ཧཱི’’ཏི.
‘‘ཨེ་ཝཾ, བྷ་ནྟེ’’ཏི ཁོ ཨཱ་ཡ་སྨཱ མ་ཧཱ་མོ་གྒ་ལླཱ་ནོ བྷ་ག་ཝ་ཏོ པ་ཊི་སྶུ་ཏྭཱ ཏ་ཐཱ་རཱུ་པཾ ཨི་དྡྷཱ་བྷི་ས་ངྑཱ་རཾ ཨ་བྷི་ས་ངྑཱ་རེ་སི [ཨ་བྷི་ས་ངྑ་རེ་སི (སྱཱ. པཱི. ཀ.)] ཡ་ཐཱ པཱ་ད་ངྒུ་ཊྛ་ཀེ་ན མི་གཱ་ར་མཱ་ཏུ་པཱ་སཱ་དཾ ས་ངྐ་མྤེ་སི ས་མྤ་ཀ་མྤེ་སི ས་མྤ་ཙཱ་ལེ་སི. ཨ་ཐ ཁོ ཏེ བྷི་ཀྑཱུ སཾ་ཝི་གྒཱ ལོ་མ་ཧ་ཊྛ་ཛཱ་ཏཱ ཨེ་ཀ་མ་ནྟཾ ཨ་ཊྛཾ་སུ – ‘‘ཨ་ཙྪ་རི་ཡཾ ཝ་ཏ, བྷོ, ཨ་བྦྷུ་ཏཾ ཝ་ཏ, བྷོ! ནི་ཝཱ་ཏ་ཉྩ ཝ་ཏ ཨ་ཡ་ཉྩ མི་གཱ་ར་མཱ་ཏུ་པཱ་སཱ་དོ ག་མྦྷཱི་ར་ནེ་མོ སུ་ནི་ཁཱ་ཏོ ཨ་ཙ་ལོ ཨ་ས་མྤ་ཀ་མྤཱི, ཨ་ཐ ཙ པ་ན ས་ངྐ་མྤི་ཏོ ས་མྤ་ཀ་མྤི་ཏོ ས་མྤ་ཙཱ་ལི་ཏོ’’ཏི!
ཨ་ཐ ཁོ བྷ་ག་ཝཱ ཡེ་ན ཏེ བྷི་ཀྑཱུ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏེ བྷི་ཀྑཱུ བྷ་ག་ཝཱ ཨེ་ཏ་ད་ཝོ་ཙ – ‘‘ཀིཾ ནུ ཏུ་མྷེ, བྷི་ཀྑ་ཝེ, སཾ་ཝི་གྒཱ ལོ་མ་ཧ་ཊྛ་ཛཱ་ཏཱ ཨེ་ཀ་མ་ནྟཾ ཋི་ཏཱ’’ཏི? ‘‘ཨ་ཙྪ་རི་ཡཾ, བྷ་ནྟེ, ཨ་བྦྷུ་ཏཾ བྷ་ནྟེ! ནི་ཝཱ་ཏ་ཉྩ ཝ་ཏ ཨ་ཡ་ཉྩ མི་གཱ་ར་མཱ་ཏུ་པཱ་སཱ་དོ ག་མྦྷཱི་ར་ནེ་མོ སུ་ནི་ཁཱ་ཏོ ཨ་ཙ་ལོ ཨ་ས་མྤ་ཀ་མྤཱི, ཨ་ཐ ཙ པ་ན ས་ངྐ་མྤི་ཏོ ས་མྤ་ཀ་མྤི་ཏོ ས་མྤ་ཙཱ་ལི་ཏོ’’ཏི! ‘‘ཏུ་མྷེ་ཝ ཁོ, བྷི་ཀྑ་ཝེ, སཾ་ཝེ་ཛེ་ཏུ་ཀཱ་མེ་ན མོ་གྒ་ལླཱ་ནེ་ན བྷི་ཀྑུ་ནཱ པཱ་ད་ངྒུ་ཊྛ་ཀེ་ན མི་གཱ་ར་མཱ་ཏུ་པཱ་སཱ་དོ, ས་ངྐ་མྤི་ཏོ ས་མྤ་ཀ་མྤི་ཏོ ས་མྤ་ཙཱ་ལི་ཏོ. ཏཾ ཀིཾ མ་ཉྙ་ཐ, བྷི་ཀྑ་ཝེ, ཀ་ཏ་མེ་སཾ དྷ་མྨཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ’’ཏི? ‘‘བྷ་ག་ཝཾ་མཱུ་ལ་ཀཱ ནོ, བྷ་ནྟེ, དྷ་མྨཱ, བྷ་ག་ཝཾ་ནེ་ཏྟི་ཀཱ བྷ་ག་ཝཾ་པ་ཊི་ས་ར་ཎཱ. སཱ་དྷུ ཝ་ཏ, བྷ་ནྟེ, བྷ་ག་ཝ་ནྟཾ་ཡེ་ཝ པ་ཊི་བྷཱ་ཏུ ཨེ་ཏ་སྶ བྷཱ་སི་ཏ་སྶ ཨ་ཏྠོ. བྷ་ག་ཝ་ཏོ སུ་ཏྭཱ བྷི་ཀྑཱུ དྷཱ་རེ་སྶ་ནྟཱི’’ཏི.
‘‘ཏེ་ན ཧི, བྷི་ཀྑ་ཝེ, སུ་ཎཱ་ཐ. ཙ་ཏུ་ནྣཾ ཁོ, བྷི་ཀྑ་ཝེ, ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ. ཀ་ཏ་མེ་སཾ ཙ་ཏུ་ནྣཾ? ཨི་དྷ, བྷི་ཀྑ་ཝེ, མོ་གྒ་ལླཱ་ནོ བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ‘ཨི་ཏི མེ ཝཱི་མཾ་སཱ ན ཙ ཨ་ཏི་ལཱི་ནཱ བྷ་ཝི་སྶ་ཏི, ན ཙ ཨ་ཏི་པྤ་གྒ་ཧི་ཏཱ བྷ་ཝི་སྶ་ཏི; ན ཙ ཨ་ཛ྄ཛྷ་ཏྟཾ སཾ་ཁི་ཏྟཱ བྷ་ཝི་སྶ་ཏི, ན ཙ བ་ཧི་དྡྷཱ ཝི་ཀྑི་ཏྟཱ བྷ་ཝི་སྶ་ཏི’. པ་ཙྪཱ་པུ་རེ་ས་ཉྙཱི ཙ ཝི་ཧ་ར་ཏི – ཡ་ཐཱ པུ་རེ ཏ་ཐཱ པ་ཙྪཱ, ཡ་ཐཱ པ་ཙྪཱ ཏ་ཐཱ པུ་རེ; ཡ་ཐཱ ཨ་དྷོ ཏ་ཐཱ ཨུ་དྡྷཾ ཡ་ཐཱ ཨུ་དྡྷཾ ཏ་ཐཱ ཨ་དྷོ; ཡ་ཐཱ དི་ཝཱ ཏ་ཐཱ ར་ཏྟིཾ, ཡ་ཐཱ ར་ཏྟིཾ ཏ་ཐཱ དི་ཝཱ. ཨི་ཏི ཝི་ཝ་ཊེ་ན ཙེ་ཏ་སཱ ཨ་པ་རི་ཡོ་ན་དྡྷེ་ན ས་པྤ་བྷཱ་སཾ ཙི་ཏྟཾ བྷཱ་ཝེ་ཏི. ཨི་མེ་སཾ ཁོ, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨེ་ཝཾ་མ་ཧི་དྡྷི་ཀོ ཨེ་ཝཾ་མ་ཧཱ་ནུ་བྷཱ་ཝོ. ཨི་མེ་ས་ཉྩ པ་ན, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨ་ནེ་ཀ་ཝི་ཧི་ཏཾ ཨི་དྡྷི་ཝི་དྷཾ པ་ཙྩ་ནུ་བྷོ་ཏི…པེ… ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ཏི…པེ… ཨི་མེ་ས་ཉྩ པ་ན, བྷི་ཀྑ་ཝེ, ཙ་ཏུ་ནྣཾ ཨི་དྡྷི་པཱ་དཱ་ནཾ བྷཱ་ཝི་ཏ་ཏྟཱ བ་ཧུ་ལཱི་ཀ་ཏ་ཏྟཱ མོ་གྒ་ལླཱ་ནོ བྷི་ཀྑུ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི’’ཏི. ཙ་ཏུ་ཏྠཾ.