༥. ཨུ་ཎྞཱ་བྷ་བྲཱ་ཧྨ་ཎ་སུ་ཏྟཾ
༨༢༧. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ ཨཱ་ཡ་སྨཱ ཨཱ་ན་ནྡོ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཨ་ཐ ཁོ ཨུ་ཎྞཱ་བྷོ བྲཱ་ཧྨ་ཎོ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ ཨཱ་ན་ནྡེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨུ་ཎྞཱ་བྷོ བྲཱ་ཧྨ་ཎོ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ཀི་མ་ཏྠི་ཡཾ ནུ ཁོ, བྷོ ཨཱ་ན་ནྡ, ས་མ་ཎེ གོ་ཏ་མེ བྲ་ཧྨ་ཙ་རི་ཡཾ ཝུ་སྶ་ཏཱི’’ཏི? ‘‘ཚ་ནྡ་པྤ་ཧཱ་ན་ཏྠཾ ཁོ, བྲཱ་ཧྨ་ཎ, བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི’’ཏི.
‘‘ཨ་ཏྠི པ་ན, བྷོ ཨཱ་ན་ནྡ, མ་གྒོ ཨ་ཏྠི པ་ཊི་པ་དཱ ཨེ་ཏ་སྶ ཚ་ནྡ་སྶ པ་ཧཱ་ནཱ་ཡཱ’’ཏི? ‘‘ཨ་ཏྠི ཁོ, བྲཱ་ཧྨ་ཎ, མ་གྒོ ཨ་ཏྠི པ་ཊི་པ་དཱ ཨེ་ཏ་སྶ ཚ་ནྡ་སྶ པ་ཧཱ་ནཱ་ཡཱ’’ཏི.
‘‘ཀ་ཏ་མོ པ་ན, བྷོ ཨཱ་ན་ནྡ, མ་གྒོ ཀ་ཏ་མཱ པ་ཊི་པ་དཱ ཨེ་ཏ་སྶ ཚ་ནྡ་སྶ པ་ཧཱ་ནཱ་ཡཱ’’ཏི? ‘‘ཨི་དྷ, བྲཱ་ཧྨ་ཎ, བྷི་ཀྑུ ཚ་ནྡ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི, ཝཱི་རི་ཡ་ས་མཱ་དྷི…པེ… ཙི་ཏྟ་ས་མཱ་དྷི…པེ… ཝཱི་མཾ་སཱ་ས་མཱ་དྷི་པྤ་དྷཱ་ན་ས་ངྑཱ་ར་ས་མ་ནྣཱ་ག་ཏཾ ཨི་དྡྷི་པཱ་དཾ བྷཱ་ཝེ་ཏི – ཨ་ཡཾ ཁོ, བྲཱ་ཧྨ་ཎ, མ་གྒོ ཨ་ཡཾ པ་ཊི་པ་དཱ ཨེ་ཏ་སྶ ཚ་ནྡ་སྶ པ་ཧཱ་ནཱ་ཡཱ’’ཏི.
‘‘ཨེ་ཝཾ ས་ནྟེ, བྷོ ཨཱ་ན་ནྡ, ས་ནྟ་ཀཾ ཧོ་ཏི ནོ ཨ་ས་ནྟ་ཀཾ. ཚ་ནྡེ་ནེ་ཝ ཚ་ནྡཾ པ་ཛ་ཧི་སྶ་ཏཱི་ཏི – ནེ་ཏཾ ཋཱ་ནཾ ཝི་ཛྫ་ཏི’’. ‘‘ཏེ་ན ཧི, བྲཱ་ཧྨ་ཎ, ཏ་ཉྙེ་ཝེ་ཏྠ པ་ཊི་པུ་ཙྪི་སྶཱ་མི. ཡ་ཐཱ ཏེ ཁ་མེ་ཡྻ ཏ་ཐཱ ཏཾ བྱཱ་ཀ་རེ་ཡྻཱ་སི. ཏཾ ཀིཾ མ་ཉྙ་སི, བྲཱ་ཧྨ་ཎ, ཨ་ཧོ་སི ཏེ པུ་བྦེ ཚ་ནྡོ ‘ཨཱ་རཱ་མཾ ག་མི་སྶཱ་མཱི’ཏི? ཏ་སྶ ཏེ ཨཱ་རཱ་མ་ག་ཏ་སྶ ཡོ ཏ་ཛྫོ ཚ་ནྡོ སོ པ་ཊི་པྤ་སྶ་དྡྷོ’’ཏི? ‘‘ཨེ་ཝཾ, བྷོ’’. ‘‘ཨ་ཧོ་སི ཏེ པུ་བྦེ ཝཱི་རི་ཡཾ ‘ཨཱ་རཱ་མཾ ག་མི་སྶཱ་མཱི’ཏི? ཏ་སྶ ཏེ ཨཱ་རཱ་མ་ག་ཏ་སྶ ཡཾ ཏ་ཛྫཾ ཝཱི་རི་ཡཾ ཏཾ པ་ཊི་པྤ་སྶ་དྡྷ’’ནྟི? ‘‘ཨེ་ཝཾ, བྷོ’’. ‘‘ཨ་ཧོ་སི ཏེ པུ་བྦེ ཙི་ཏྟཾ ‘ཨཱ་རཱ་མཾ ག་མི་སྶཱ་མཱི’ཏི? ཏ་སྶ ཏེ ཨཱ་རཱ་མ་ག་ཏ་སྶ ཡཾ ཏ་ཛྫཾ ཙི་ཏྟཾ ཏཾ པ་ཊི་པྤ་སྶ་དྡྷ’’ནྟི? ‘‘ཨེ་ཝཾ, བྷོ’’. ‘‘ཨ་ཧོ་སི ཏེ པུ་བྦེ ཝཱི་མཾ་སཱ ‘ཨཱ་རཱ་མཾ ག་མི་སྶཱ་མཱི’ཏི? ཏ་སྶ ཏེ ཨཱ་རཱ་མ་ག་ཏ་སྶ ཡཱ ཏ་ཛྫཱ ཝཱི་མཾ་སཱ སཱ པ་ཊི་པྤ་སྶ་དྡྷཱ’’ཏི? ‘‘ཨེ་ཝཾ, བྷོ’’.
‘‘ཨེ་ཝ་མེ་ཝ ཁོ, བྲཱ་ཧྨ་ཎ, ཡོ སོ བྷི་ཀྑུ ཨ་ར་ཧཾ ཁཱི་ཎཱ་ས་ཝོ ཝུ་སི་ཏ་ཝཱ ཀ་ཏ་ཀ་ར་ཎཱི་ཡོ ཨོ་ཧི་ཏ་བྷཱ་རོ ཨ་ནུ་པྤ་ཏྟ་ས་ད་ཏྠོ པ་རི་ཀྑཱི་ཎ་བྷ་ཝ་སཾ་ཡོ་ཛ་ནོ ས་མྨ་ད་ཉྙཱ ཝི་མུ་ཏྟོ, ཏ་སྶ ཡོ པུ་བྦེ ཚ་ནྡོ ཨ་ཧོ་སི ཨ་ར་ཧ་ཏྟ་པྤ་ཏྟི་ཡཱ, ཨ་ར་ཧ་ཏྟ་པྤ་ཏྟེ [ཨ་ར་ཧ་ཏྟེ པ་ཏྟེ (སཱི. སྱཱ. ཀཾ.)] ཡོ ཏ་ཛྫོ ཚ་ནྡོ སོ པ་ཊི་པྤ་སྶ་དྡྷོ; ཡཾ པུ་བྦེ ཝཱི་རི་ཡཾ ཨ་ཧོ་སི ཨ་ར་ཧ་ཏྟ་པྤ་ཏྟི་ཡཱ, ཨ་ར་ཧ་ཏྟ་པྤ་ཏྟེ ཡཾ ཏ་ཛྫཾ ཝཱི་རི་ཡཾ ཏཾ པ་ཊི་པྤ་སྶ་དྡྷཾ; ཡཾ པུ་བྦེ ཙི་ཏྟཾ ཨ་ཧོ་སི ཨ་ར་ཧ་ཏྟ་པྤ་ཏྟི་ཡཱ, ཨ་ར་ཧ་ཏྟ་པྤ་ཏྟེ ཡཾ ཏ་ཛྫཾ ཙི་ཏྟཾ ཏཾ པ་ཊི་པྤ་སྶ་དྡྷཾ; ཡཱ པུ་བྦེ ཝཱི་མཾ་སཱ ཨ་ཧོ་སི ཨ་ར་ཧ་ཏྟ་པྤ་ཏྟི་ཡཱ, ཨ་ར་ཧ་ཏྟ་པྤ་ཏྟེ ཡཱ ཏ་ཛྫཱ ཝཱི་མཾ་སཱ སཱ པ་ཊི་པྤ་སྶ་དྡྷཱ. ཏཾ ཀིཾ མ་ཉྙ་སི, བྲཱ་ཧྨ་ཎ, ཨི་ཏི ཨེ་ཝཾ ས་ནྟེ, ས་ནྟ་ཀཾ ཝཱ ཧོ་ཏི ནོ ཨ་ས་ནྟ་ཀཾ ཝཱ’’ཏི?
‘‘ཨ་དྡྷཱ, བྷོ ཨཱ་ན་ནྡ, ཨེ་ཝཾ ས་ནྟེ, ས་ནྟ་ཀཾ ཧོ་ཏི ནོ ཨ་ས་ནྟ་ཀཾ. ཨ་བྷི་ཀྐ་ནྟཾ, བྷོ ཨཱ་ན་ནྡ, ཨ་བྷི་ཀྐ་ནྟཾ, བྷོ ཨཱ་ན་ནྡ! སེ་ཡྻ་ཐཱ་པི, བྷོ ཨཱ་ན་ནྡ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ, པ་ཊི་ཙྪ་ནྣཾ ཝཱ ཝི་ཝ་རེ་ཡྻ, མཱུ་ལ༹ྷ་སྶ ཝཱ མ་གྒཾ ཨཱ་ཙི་ཀྑེ་ཡྻ, ཨ་ནྡྷ་ཀཱ་རེ ཝཱ ཏེ་ལ་པ་ཛྫོ་ཏཾ དྷཱ་རེ་ཡྻ – ཙ་ཀྑུ་མ་ནྟོ རཱུ་པཱ་ནི ད་ཀྑ་ནྟཱི་ཏི; ཨེ་ཝ་མེ་ཝཾ བྷོ་ཏཱ ཨཱ་ན་ནྡེ་ན ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ, བྷོ ཨཱ་ན་ནྡ, ཏཾ བྷ་ཝ་ནྟཾ གོ་ཏ་མཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ བྷ་ཝཾ ཨཱ་ན་ནྡོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎཾ ག་ཏ’’ནྟི. པ་ཉྩ་མཾ.